Reply to comment

ᑯᐃᓐ ᑳᑐᒥᒃ ᑲᒪᔨᖃᕐᓱᑎᒃ ᐃᓕᓐᓂᐊᑎᑦᓯᔨᒥᓂᒃ, ᐊᑯᓕᕕᒻᒥᐅᑦ ᖃᓪᓗᓈᑎᑐᑦ ᐃᓕᓐᓂᐊᑏᑦ ᐳᕐᑐᓂᕐᓴᒥ 3,4,5-ᒥ ᐱᓇᓱᐊᕈᑎᖃᒻᒪᕆᖃᑦᑕᓚᐅᔪᔪᑦ ᐊᑐᐃᓐᓇᕈᕐᑎᓱᑎᒃ ᐊᑦᔨᓕᐅᕈᑎᒃᑯᑦ ᐆᑦᑐᕋᐅᑎᒥᒃ ᓄᓇᓕᒻᒥᓅᓕᖓᔪᒥᒃ. ᐃᓕᓐᓂᐊᑏᑦ ᐱᖕᖑᑎᑦᓯᒋᐊᖃᓚᐅᔪᔪᑦ ᐊᓪᓚᖃᑦᑕᑕᕕᓂᕐᒥᓂᒃ ᑲᑎᕐᓱᐃᓯᒪᓗᑎᒃ ᓄᓇᓕᒻᒥᓂᒃ ᖃᓄᐃᑦᑑᒪᖔᑦ ᑐᑭᓯᑎᑦᓯᒍᑎᓂᒃ. ᑖᒃᑯᐊ ᓯᑕᒪᒋᔭᐅᓕᕐᑐᑦ ᐃᓚᐅᓯᒪᓕᕐᓱᑎᒃ ᑖᑦᓱᒧᖓ ᐱᓇᓱᐊᕐᑕᐅᔪᒧᑦ ᐊᐅᓚᑕᐅᔪᒧᑦ ᐊᑐᓱᐃᓐᓇᕈᕐᑎᑕᐅᒪᑦᓱᓂᓗ Blue Metropolis-ᑯᓐᓄᑦ, ᒪᓐᑐᔨᐊᒥᐅᖑᑦᓱᓂ ᑎᒥᐅᔪᖅ ᖄᖏᓐᓂᑯᓕᐅᕐᑎᐅᒐᓂ. ᐱᓇᓱᐊᕐᑕᐅᔫᑉ ᑐᕌᒐᖏᑦᑕ ᐃᓚᖓ ᐃᓕᓐᓂᐊᑏᑦ ᐅᖄᕈᑎᖃᒋᐊᖃᕐᓂᖏᑦ ᓄᓇᓕᖓᑕ ᐊᑦᔨᐅᖏᑦᑑᒍᑎᖏᓐᓂᒃ ᐃᓱᒪᒋᔭᒥᓂᓪᓗ ᑐᓴᐅᒪᔭᐅᑎᑦᓯᓗᑎᒃ ᐊᓪᓚᓯᒪᔫᑎᓪᓗᒋᑦ. ᓯᕗᓪᓕᒥ ᓄᓇᕕᒻᒥᐅᑦ ᐃᓚᐅᖃᑕᐅᖃᑦᑕᓯᒪᔪᑦ ᑌᔭᐅᒍᓯᖃᕐᓯᒪᔪᑦ ᒪᑯᓂᖓ: ᕿᒧᑦᓰᑦ, ᐃᓄᐃᑦ ᐅᓪᓗᒥ ᑌᑦᓱᒪᓂᓗ, ᓄᓇᓕᒻᒥᓗ ᓱᖃᑦᓯᒍᑏᑦ. ᑕᒡᒐᓂ ᐊᕐᕌᒍᕐᒥ, ᐃᓚᐅᔪᑦ ᑲᒪᒋᔭᖃᓚᐅᕐᑐᑦ ᐃᓕᓐᓂᐊᕕᒻᒥᒃ ᓄᓇᓕᒻᒥᓗ ᖃᓄᐃᓘᕐᑎᐅᓂᖓᓂᒃ.

ᐃᓕᓐᓂᐊᑏᑦ ᐊᓪᓚᖃᑦᑕᓯᓚᐅᔪᔪᑦ ᐅᑭᐊᑦᓴᐅᑎᓪᓗᒍ ᐊᓪᓚᓯᒪᔪᓕᐅᕐᑎ ᒧᓃᒃ ᐳᓚᒃ ᐊᑦᔨᓕᐅᕆᔨᓗ Thomas Kneubühler ᐊᑯᓕᕕᒻᒦᑎᓪᓗᒋᒃ ᐃᓕᓐᓂᐊᑎᓂᒃ ᐃᑲᔪᕐᓯᒪᕆᐊᕐᑐᓱᑎᒃ. ᐊᓪᓚᓯᒪᔪᓕᐅᕐᑎ ᐊᑦᔨᓕᐅᕆᔨᓗ ᐃᓕᓐᓂᐊᑎᓂᒃ ᑲᑎᒪᓂᐊᕈᓯᖃᕐᑎᓯᖃᑦᑕᓚᐅᔪᔫᒃ ᐃᑲᔪᕐᓯᓱᑎᓪᓗ ᐱᒋᐊᖕᖓᐸᓪᓕᐊᓂᖏᓐᓂ ᐱᓇᓱᐊᕐᑕᒥᓂᒃ. ᐊᓪᓚᓯᒪᔪᓕᐅᕐᑎ ᐊᑦᔨᓕᐅᕆᔨ ᐃᓕᓐᓂᐊᑎᑦᓯᔨᓗ ᐃᓕᓐᓂᐊᑎᓂᒃ ᐃᑲᔪᕐᓯᒪᖃᑦᑕᓚᐅᔪᔪᑦ ᑕᕐᕿᓂ ᓯᑕᒪᓂ. ᐱᓇᓱᐊᕐᓂᒥᓂ, ᐃᓕᓐᓂᐊᑏᑦ ᐱᓇᓱᐊᖃᑦᑕᓚᐅᔪᔪᑦ, ᐆᑦᑐᕋᐅᑎᓕᐅᖃᑦᑕᓱᑎᒃ, ᑕᒻᒪᓯᒪᔪᕐᓯᐅᖃᑦᑕᓱᑎᒃ ᐊᑦᔨᓕᐅᕆᖃᑦᑕᓱᑎᓪᓘᓚᐅᔪᔪᑦ. ᐱᓇᓱᐊᕐᑕᐅᓂᖓ ᐊᑯᓃᓚᐅᔪᔪᖅ ᐱᔭᕆᐊᑐᔫᑦᓱᓂᓗ, ᓴᐱᓕᑫᓐᓇᖃᑦᑕᕋᓗᐊᕐᓱᑎᒃ ᐃᓚᖓᓂᑦ, ᐃᓕᓐᓂᐊᑏᑦ ᐊᔪᐃᓐᓇᓚᐅᔪᔪᑦ ᐱᔭᕇᕐᓱᒍᓗ. ᐃᓕᓐᓂᐊᑏᑦ ᐱᓇᓱᐊᕐᑕᕕᓂᖏᑦ ᐃᓚᒋᔭᐅᒋᐊᖃᓚᐅᔪᔪᑦ ᑕᓪᓕᒪᒋᐊᓪᓚᓄᑦ ᑯᐯᒻᒥ ᖃᓪᓗᓈᑎᑐᑦ ᐃᓕᓐᓂᐊᕕᓐᓄᑦ. ᓄᐃᑕᖓ--ᕿᒥᕐᕈᐊᒐᖅ ᓄᐃᑕᑎᑦᓯᓱᓂ ᖃᓄᐃᑦᑐᑐᐃᓐᓇᓂᒃ ᑯᐯᒻᒥ ᓄᓇᓕᓐᓂᒃ.

ᐊᑐᐊᒐᖅ ᑌᔭᐅᒍᑎᖃᕐᓱᓂ, ᑯᐯᑉ ᐊᒫᖏᑦ-ᐊᓂᕐᕋᖃᕐᕕᒐ 2010, ᒪᓐᑐᔨᐊᒥ ᑭᓇᒃᑯᑐᐃᓐᓇᓄᑦ ᐊᑐᓐᓇᐅᓚᖓᓯᑎᓪᓗᒍ ᐱᒋᐊᖕᖓᑎᑕᐅᓚᐅᔪᔪᖅ ᐁᕆᓕᐅᑎᓪᓗᒍ. ᐃᓕᓐᓂᐊᑏᑦ ᐱᖓᓱᑦ ᐊᖏᕐᓯᒪᓂᖃᓪᓚᕆᖃᑦᑕᓚᐅᔪᔪᑦ ᐱᓇᓱᐊᕐᓂᒥᓂ ᐃᓕᓐᓂᐊᖃᑎᒥᓂᒃ ᑭᒡᒐᑐᕈᓐᓇᓂᖃᓚᐅᔪᔪᑦ ᐊᑐᐊᒐᖅ ᓄᐃᑕᐅᕆᐊᖕᖓᓂᖃᕐᑎᓗᒍ. ᒪᓐᑐᔨᐊᒦᑦᓱᑎᒃ ᐃᓕᓐᓂᐊᑏᑦ ᐃᓕᓐᓂᐊᑎᑦᓯᔨᖓᓗ ᑕᑯᓂᐊᕈᓐᓇᓚᐅᔪᔪᑦ Blue Metropolis-ᑯᑦ ᐊᑐᐊᒐᕐᓂᒃ ᓇᓪᓕᐅᓂᕐᓯᐅᒍᑎᖃᕐᑎᓗᒋᑦ. ᐃᓚᐅᖃᑕᐅᓚᐅᔪᔪᑦ ᐊᓪᓚᓯᒪᔪᓕᐅᕐᓂᒥ ᑲᑎᒪᓂᐊᕈᓯᕐᓄᑦ ᐊᓪᓚᓯᒪᔪᓕᐅᕐᑎᓄᑦ ᐊᐅᓚᑕᐅᑎᓪᓗᒋᑦ ᐊᓯᒥᓂᓪᓗ ᑲᑎᓯᕈᓐᓇᓯᓚᐅᔪᑦᓱᑎᒃ ᐱᓇᓱᐊᖃᑕᐅᔪᕕᓂᕐᓂᒃ. ᐃᓕᓐᓂᐊᖃᑎᒌᓂᒃ ᐊᓯᖏᓐᓂᒃ ᑕᑯᓂᐊᕐᓯᒪᑦᓱᑎᒃ ᐊᑯᓕᕕᒻᒥᐅᑦ ᐃᓕᓐᓂᐊᑏᑦ ᐃᓗᕐᖁᓯᕐᒥᓂᒃ ᑕᑯᑦᓴᐅᑎᑦᓯᓂᖃᓚᐅᔪᔪᑦ (ᑲᑕᑦᔭᓂᒃᑯᑦ ᐃᓄᑦᑎᑐᓪᓗ ᐃᓕᓐᓂᐊᑎᑦᓯᓂᒃᑯᑦ). ᐃᓕᓐᓂᐊᑏᑦ ᓂᕈᐊᕐᑕᐅᔪᕕᓃᑦ ᑭᒡᒐᑐᕐᑎᓯᐊᓪᓚᕆᐅᓚᐅᔪᔪᑦ ᐃᓕᓐᓂᐊᖃᑎᒥᓄᑦ.

ᒪᓐᑐᔨᐊᒦᑦᓱᑎᒃ, ᒥᐊᔨ ᕿᓐᓄᐊᔪᐊᖅ, ᐳᕐᑐᓂᕐᓴᒥ 5-ᒥ ᐃᓕᓐᓂᐊᑎ ᐊᐱᕐᓱᑕᐅᓂᖃᓚᐅᔪᔪᖅ ᑕᑯᓐᓇᕋᑦᓴᓕᕆᔨᓄᑦ CBC-ᑯᓄᑦ. ᐊᐱᕐᓱᑕᐅᑎᓪᓗᒍ ᑕᑯᓐᓇᑕᐅᕈᓐᓇᑐᖅ ᐅᕙᓂ:
http://www.cbc.ca/video/#/News/Canada/Montreal/ID=1476488768

ᐃᓕᓐᓂᐊᑏᑦ ᐊᓪᓚᑕᕕᓂᖏᑦ ᖃᓄᐃᑦᑐᑐᐃᓐᓀᑦ, ᑲᖐᒋᓇᕐᑑᓱᑎᒃ ᐃᓚᐅᖃᑕᐅᓐᓇᓱᑎᓪᓗ. ᖃᓄᐃᑦᑐᑐᐃᓐᓇᓅᓕᖓᔪᓂᒃ ᐅᖄᕈᑎᖃᕐᓱᑎᒃ: ᐃᓕᓐᓂᐊᕕᐅᑉ ᐊᑑᑎᓯᒪᔭᖏᑦ, ᑲᕙᒪᒃᑯᓄᑦ ᐃᓕᓐᓂᐊᕆᐊᕐᑎᑕᐅᓲᕕᓃᑦ, ᐃᓕᓐᓂᐊᕕᐅᑉ ᐊᕐᕕᑕᕐᑎᓯᓂᖏᑦ, ᐱᖕᖑᐊᓃᑦ, ᐃᕿᐊᓱᓐᓂᖅ, ᐃᓗᕐᖁᓯᕐᒥᒃ ᐃᓕᓐᓂᐊᓂᖅ ᐃᓕᓐᓂᐊᓂᕐᒥᓗ ᐱᔭᕇᕈᓯᕐᓂᖅ.