ᐊᓪᓚᓂᕐᒥ ᑐᑭᒧᐊᕐᑕᐅᓂᖅ

ᐱᐅᓂᕐᐸᐅᑎᓪᓗᒍ ᐱᕙᓪᓕᐊᓂᕐᓂ ᐊᑐᖃᑦᑕᓯᒪᔭᒃᑲᓂ ᑫᓪᓗᑐᐃᓂᕐᒧᑦ ᐊᓪᓚᓂᕐᒥ ᑐᑭᒧᐊᕐᑕᐅᒍᑎᖃᕐᑎᓗᒋᑦ ᐊᓪᓚᒍᓯᕐᒥᒃ. ᑕᒪᓐᓇ ᐊᑐᕐᑕᐅᖏᓐᓇᓴᐅᑎᒋᓲᖑᑉᐸᑦ ᐃᓕᓐᓂᐊᑎᐅᑉ ᐱᓇᓱᒐᖃᕐᐸᓕᐊᓂᖓᓂ, ᐃᒻᒥᓂᕿᒍᓐᓇᓯᑎᑕᐅᓯᒪᓕᕋᔭᕐᒪᑕ ᐊᕕᑦᑐᓯᒪᓂᐅᑉ ᓯᕗᓪᓕᐹᑉ ᓄᖕᖑᐊᓃᓕᕈᑎᒃ ᐳᕐᑐᓂᕐᓴᒥ, ᐃᓕᓐᓂᐊᑎᑦᓯᔨᐅᑦᓱᖓ ᑌᒣᑦᑑᖃᑦᑕᓯᒪᒻᒪᑦ.

ᐱᔭᕆᐊᑭᑦᑐᖅ ᑕᒪᓐᓇ, ᐊᑐᕐᑕᐅᕈᓐᓇᓱᓂᓗ ᓀᑦᑐᒥᒃ ᐅᓂᒃᑳᓕᐅᕐᓂᒥ, ᐅᖃᐅᓯᑦᓴᖃᕈᑎᐅᓗᓂ, ᐅᖄᕈᑎᐅᓗᓂᓘᓐᓃᑦ. ᐃᓕᓐᓂᐊᑎᑦᓯᔨ ᑐᑭᑖᕐᑎᓗᒍ ᓱᓇᒨᓕᖓᓚᖓᒻᒪᖔᑦ ᐊᓪᓚᑕᐅᔪᖅ. ᐆᑦᑑᑎᒋᓗᒍ, ᐃᓕᓐᓂᐊᑎᑦᓯᔨ ᐱᓇᓱᐊᕐᓂᓕᕕᓂᐅᑦᓴᐸᑦ ᑐᓴᕈᑎᓕᕆᓂᕐᓂᒃ, ᐃᒻᒪᖄ ᐃᓕᓐᓂᐊᑎᒥᓂᒃ ᐅᖄᓂᖃᖁᔨᒐᔭᕐᑐᖅ ᑕᓚᕖᓴᒃᑯᑦ ᑕᑯᑦᓴᐅᓲᓂᒃ ᐊᓕᐊᒋᓂᕐᐹᒥᓂᒃ. ᑐᑭᒧᐊᕐᑕᐅᓂᑦᑕᓕᒃ ᐊᓪᓚᓂᕐᒥ ᐱᖓᓲᓕᕿᖓᔪᖅ.

ᓯᕗᓪᓕᐹᖅ:
ᐃᓕᓐᓂᐊᑎᑦᓯᔨ ᓱᓇᑐᐃᓐᓇᓂᒃ ᐃᓱᒪᒋᔭᖃᕈᓐᓇᑎᑦᓯᑎᓪᓗᒍ (ᓲᕐᓗ ᐊᐱᕐᓲᑏᑦ ᑭᐅᔭᐅᖃᑦᑕᑎᓪᓗᒋᑦ ᐊᖏᕐᑐᓂᒃ ᐊᐅᑳᕐᑐᓂᓘᓐᓃᑦ) ᐊᓪᓚᓯᒪᔪᑦ ᐃᓂᓪᓚᖓᐅᑎᖏᓐᓂ ᐊᑐᓂᑦ ᐊᓪᓚᑕᐅᔪᒧᑦ. ᐃᓕᓐᓂᐊᑎ ᑭᐅᒋᐊᖃᑐᐃᓐᓇᓂᐊᓕᕐᒪᑦ ᐊᐱᕐᓲᑎᓂᒃ ᐅᖃᐅᓯᓕᐅᕐᓗᓂ ᓈᒻᒪᓈᕐᑐᒥ ᐊᐱᕐᓲᑏᑦ ᐊᓪᓚᕕᑦᓴᖓᓂ. ᑖᓐᓇ ᓯᕗᓪᓕᐸᐅᑎᓪᓗᒍ ᐆᑦᑑᑎᒋᓗᓂᐅᒃ.

ᑐᖓᓕᖓ:
ᐃᓕᓐᓂᐊᑎᑦᓯᔨ ᐃᓕᓐᓂᐊᑎᒥᓂᒃ ᐃᑦᓯᕙᖃᑎᖃᕐᓗᓂ ᕿᒥᕐᕈᖃᑎᒋᓗᒋᑦ ᑭᐅᒍᑎᕕᓂᖏᓐᓂᒃ, ᐋᕐᕿᒋᐊᕐᓗᒋᑦ ᑭᐅᒍᑎᖏᑦ, ᑐᓴᐅᒪᔭᐅᒋᐊᓕᓐᓂᒃ ᐱᑕᖃᒋᐊᓪᓚᖁᔨᓗᓂ, ᐊᓯᖏᓐᓂᓗ. ᐃᓕᓐᓂᐊᑏᑦ ᐋᕐᕿᒋᐊᕐᑕᐅᒪᔪᓂᒃ ᐆᑦᑐᕋᐅᑎᕕᓂᕐᒥᓂᒃ ᑎᒍᓯᒋᐊᓪᓚᓗᑎᒃ ᐊᓪᓚᓯᐊᕐᓗᒋᓪᓗ ᐊᓪᓚᕕᑦᓴᓄᑦ ᑐᑭᒧᐊᒍᑎᓕᓐᓄᑦ ᐊᐱᕐᓲᑎᖃᖕᖏᑐᓂ ᓲᓱᒋᖏᓐᓇᒐᓗᐊᕐᓗᒋᑦ ᐊᓪᓚᓯᒪᔪᑦ ᐃᓂᓪᓚᖓᐅᑎᖏᑦ. ᐊᓯᑦᔨᑐᕐᓯᒪᔪᓕᒫᓂᒃ ᐊᓪᓚᒋᐊᓖᑦ ᓈᒻᒪᓈᓕᕐᑎᓗᒋᓗ.

ᐱᖓᔪᖓ:
ᐃᓕᓐᓂᐊᑎᑦᓯᔨ ᐃᓕᓐᓂᐊᑎᒥᓂᒃ ᐃᑦᓯᕙᖃᑎᖃᕆᐊᓪᓚᓗᓂ, ᐋᕐᕿᓱᒋᐊᓪᓚᓕᕐᒥᓗᒍ ᑐᖓᓕᕆᓕᕐᑕᖓᓂ ᐆᑦᑐᕋᐅᑎᐅᑉ. ᐃᓕᓐᓂᐊᑎ ᐋᕐᕿᒋᐊᕆᓂᐊᓕᕐᒪᑦ ᑭᖑᓪᓕᐹᒥᒃ ᐊᓪᓚᕕᑦᓴᒥ ᑐᑭᒧᐊᒍᑎᓕᒻᒥ. ᑌᔭᐅᒍᑎᖃᕐᑎᓕᕐᓗᒍ. ᑭᖑᓪᓕᐹᖅ ᑖᓐᓇ ᐆᑦᑐᕋᐅᑎᓂ.

ᐃᓕᓐᓂᐊᑎᑦᓯᔨ ᖃᐅᔨᓴᖃᑦᑕᑎᓪᓗᒍ ᐆᑦᑐᕋᐅᑎᓂᒃ ᐃᓕᓐᓂᐊᑏᑦ ᑲᔪᓯᑎᓪᓗᒋᑦ. ᐃᓕᓐᓂᐊᑎ ᑕᑯᓐᓇᓱᒍ ᐱᔭᖃᕈᓐᓇᓯᒋᐊᖕᖓᑎᓪᓗᒍ ᐊᓪᓚᑕᒥᓂᒃ, ᐊᓪᓚᓚᐅᕐᓯᒪᓪᓗᐊᖏᑐᐊᕐᒪᓗᐊᖕᖑᐊᖅ — ᐱᖓᓱᓂᒃ ᐊᒥᓲᓂᕐᓴᓂᒃ ᐊᓪᓚᓯᒪᔪᖃᕐᑎᓗᒍ! ᐅᐱᒍᓱᓐᓇᓗᐊᖕᖑᐊᓇᓲᖅ ᑕᒪᑦᓱᒥᖓ ᐱᓇᓱᒐᖃᕆᐊᒥᒃ.

ᑕᒪᓐᓇ ᐊᑐᕐᑕᐅᓲᖑᑐᐊᕐᐸᑦ ᐊᓪᓚᑐᖃᕆᐊᖃᓕᕐᓂᑕᒫᑦ, ᐊᑑᑎᓯᒪᔭᒐᑎᒍᑦ ᐃᓕᓐᓂᐊᑎ "ᑐᑭᓯᒪᓕᕐᓯᒪᔪᖅ" — ᓲᕐᓗ ᑐᑭᓯᒪᑦᓱᓂ ᐊᓪᓚᓯᒪᔪᑦ ᐃᓂᓪᓚᖓᐅᑎᖏᓐᓂᒃ, ᐋᕐᕿᓱᐃᒋᐊᕐᓂᒥᒃ, ᐊᓯᖏᓐᓂᓗ ᐃᒻᒥᒎᕐᑎᓗᒋᑦ ᐅᖄᖃᑎᒋᖃᑦᑕᑕᕕᓂᕆᑦᓱᒋᑦ ᐋᕐᕿᓱᐃᒋᐊᕐᓂᒦᑦᑎᓗᒋᑦ. ᐱᖓᓱᒐᓛᓂᒃ ᐊᕐᕌᒍᕐᑐᕈᓐᓇᑐᖅ ᑲᔪᓰᓐᓇᑐᒥᒃ ᑕᒪᑦᓱᒥᖓ ᐊᑐᕐᓂᖅ, ᐃᓱᐊᓂ ᐃᓕᓐᓂᐊᑎᒧᑦ ᐊᑑᑎᓕᒻᒪᕆᒃ ᐊᑯᓃᕐᑐᕕᓂᐅᒐᓗᐊᕈᓂ.

ᐊᓯᖏᓐᓂᒃ ᓱᓕ ᐃᒣᒋᐊᖁᔨᒍᑎᓕᒃ ᓵᑉᑕᒥ ᐊᓪᓚᓯᒪᔭᒃᑲᓂ ᐊᓪᓚᓂᕐᒨᓕᖓᔪᓂᒃ ᐳᕐᑐᓂᕐᓴᒥ ᖃᓪᓗᓈᑎᑑᕐᑐᓂ ᐊᓪᓚᖁᑎᓂ ᑕᒡᒐᓂ ᖃᕆᑕᐅᔭᒃᑯᑦ ᐊᑐᐃᓐᓇᖃᕐᕕᒥ. ᑕᒪᓐᓇᓗᐊᖕᖑᐊᖅ ᖃᓄᐃᓘᒍᓯᖅ ᐊᑑᑎᖃᑦᓯᐊᓂᕐᓴᐅᓯᒪᔪᖅ ᐊᒥᓲᓂᕐᓴᓂᑦ. ᐆᑦᑑᑎᖃᕐᒥᔪᖅ ᑐᑭᒧᐊᕐᑕᐅᔪᓕᒻᒥᒃ ᐊᓪᓚᓂᕐᒧᑦ.

ᐆᑦᑐᑐᐊᕈᕕᐅᒃ, ᖃᐅᔨᒪᑎᑕᐅᓛᕐᖁᖓ ᓱᓇᒥᒃ ᓄᐃᑦᓯᓂᒻᒪᖔᑦ!