ᐊᐅᐸᓗᒻᒥᐅᑦ ᑲᖏᕐᓱᔪᐊᕐᒥᐅᓗ ᐃᓕᓐᓂᐊᑏᑦ ᐊᑐᐊᒐᑦᓴᓕᐅᕐᓯᒪᓕᕐᑐᑦ ᑭᓇᒃᑯᑐᐃᓐᓇᓄᑦ ᑕᑯᔭᐅᕈᓐᓇᓕᕐᑐᓂᒃ

2008-2009-ᒥ ᐃᓕᓐᓂᐊᓇᐅᑉ ᐊᕐᕌᒍᖓᓂ, ᐳᕐᑐᓂᕐᓴᒥ ᖃᓪᓗᓈᑎᑐᑦ ᐃᓕᓐᓂᐊᑏᒃ ᒪᕐᕉᒃ, ᐊᐅᐸᓗᒻᒥᐅᖅ ᑲᖏᕐᓱᔪᐊᕐᒥᐅᓗ, ᓂᕈᐊᕐᑕᐅᓚᐅᔪᔫᒃ ᐃᓚᐅᖃᑕᐅᔪᑦᓴᐅᑎᓪᓗᒋᒃ ᐃᓕᓐᓂᐊᓂᕐᒨᓕᖓᔪᓄᑦ ᐱᓇᓱᐊᕐᑕᐅᔪᓄᑦ Blue Metropolis-ᑯᓐᓄᑦ ᐊᐅᓚᑕᐅᔪᒧᑦ, ᖄᖏᓐᓂᑯᓕᐅᕐᓂᖃᕋᓂ ᑎᒥᐅᔪᖅ "ᑐᕌᒐᖃᕐᓱᓂ ᓄᓇᖃᑎᒌᑦᓴᔭᐅᖕᖏᑐᓂᒃ ᐃᓗᕐᖁᓯᖃᑎᒌᕋᑎᒃ ᑲᓱᕐᑎᓯᓂᕐᒥᒃ ᑲᑎᒪᓗᑎᒃ ᐊᓪᓚᓂᐊᖃᑦᑕᑎᓪᓗᒋᑦ ᐊᓪᓚᓯᒪᔪᓕᐅᕐᓂᒥᓪᓗ". ᐃᑲᔪᕐᑕᐅᓱᑎᒃ ᐱᒍᓐᓇᐅᑎᓕᓐᓄᑦ ᐊᓪᓚᑎᓄᑦ, ᐊᑦᔨᓕᐅᕆᔨᓄᑦ ᓂᐱᓕᕆᔨᓄᓪᓗ, ᐃᒻᒥᒎᕐᑑᒃ ᐱᓇᓱᖃᑎᒌᓚᐅᔪᔫᒃ ᐊᕐᕌᒍᓕᒫᒥ ᑐᕌᒐᓱᑦᑕᒥᓄᑦ ᑎᑭᐅᑎᒐᓱᐊᕐᓱᑎᒃ ᑐᓴᐅᒪᖃᑎᒌᓐᓂᑯᑦ ᐃᓗᕐᖁᓯᕐᒥᓂᒃ ᑕᓚᕖᓴᒃᑯᑦ ᑕᑯᓐᓇᖃᑦᑕᐅᑎᖃᑦᑕᓱᑎᑦ. ᐊᓪᓚᓂᐊᖏᓐᓇᓗᑎᑦ ᖃᐅᔨᓚᖓᔪᑎᑦ ᖃᓄᐃᑦᑑᓂᖏᓐᓂᒃ ᐱᓇᓱᐊᕐᑕᕕᓂᖏᑦᑕ ᓇᓂᓗ ᑕᑯᕈᓐᓇᒪᖔᑕ ᐱᓇᓱᑦᑕᕕᓂᖏᑦ ᑭᓇᒃᑯᑐᐃᓐᓇᓄᑦ ᐊᑐᐃᓐᓀᑦ. 

ᑲᖏᕐᓱᔪᐊᖅ
ᐳᕐᑐᓂᕐᓴᒥ ᖃᓪᓗᓈᑎᑐᑦ ᐃᓕᓐᓂᐊᑏᑦ ᐃᓚᐅᓚᐅᔪᔪᑦ ᐆᑦᑐᕋᐅᑎᖓᓂ ᐊᑐᐃᓐᓇᐅᑎᑕᐅᔪᒥᒃ Blue Metropolis-ᑯᓐᓄᑦ ᑌᔭᐅᒍᑎᖃᕐᓱᓂ "ᑯᐯᒻᒥᐅᑦ ᓂᐱᖏᑦ". ᐃᓕᓐᓂᐊᑏᑦ ᐱᖕᖑᑎᑦᓯᒍᓐᓇᓯᑎᑕᐅᓚᐅᔪᔪᑦ ᓈᓚᐅᑎᒃᑯᑦ ᑐᓴᕐᓴᐅᔪᑦᓴᒥᒃ ᐅᓂᒃᑳᒥᒃ ᓄᓇᓕᒻᒥᓅᓕᖓᔪᒥᒃ ᖃᕆᑕᐅᔭᒃᑯᑦ ᐊᑐᐃᓐᓇᐅᑎᑕᐅᓚᐅᔪᔪᖅ ᓈᓚᕋᑦᓴᐅᑎᓪᓗᒍ. ᐊᑐᐃᓐᓇᕈᕐᑎᓂᕐᒧᑦ ᐱᔭᑦᓴᒥᒃ ᐊᓂᒎᑎᔭᖃᕈᓐᓇᓂᕐᒧᓗ, ᐃᓕᓐᓂᐊᑏᑦ ᐱᒍᓐᓇᐅᑎᓖᓐᓂᒃ ᐊᓪᓚᑎᒥᒃ ᐱᓇᓱᖃᑎᖃᓚᐅᔪᔪᑦ (John Graham) ᓂᐱᓕᕆᔨᒥᒃ (John Sellekaers) ᕕᕈᐊᕆᐅᑎᓪᓗᒍ ᑲᖏᕐᓱᔪᐊᓕᐊᓚᐅᔪᔫᒃ. ᐅᐸᑦᑕᐅᒪᔪᕕᓂᐅᓕᕐᓱᑎᒃ ᑲᑎᕐᓱᐃᖃᑦᑕᓯᓚᐅᔪᔪᑦ ᐊᑦᔨᖑᐊᓂᒃ, ᓂᐱᓂᒃ, ᐅᓂᒃᑳᓂᓪᓗ ᑲᔪᓯᓂᕐᒧᑦ ᐅᓂᒃᑳᓕᐊᒥᓂᒃ. ᓄᐃᑕᖓ: ᐱᐅᔫᑦᓱᓂ, ᐃᓗᕐᖁᓯᕐᒨᓕᖓᑦᓯᐊᓱᓂ ᑐᑭᓯᓐᓇᓯᐊᕐᓱᓂᓗ ᐃᓕᓐᓂᐊᑏᑦ ᐊᖏᕐᓯᒪᓂᖏᓐᓂᒃ ᓄᐃᑕᑎᑦᓯᑐᐃᓐᓇᕋᓂ ᓄᓇᓕᒻᒥᓄᓪᓗ ᐃᓗᕐᖁᓯᕐᒥᓄᒐᓴᖅ ᐱᑐᑦᓯᒪᑦᓯᐊᑐᓂᒃ ᓄᐃᑦᓯᓚᐅᔪᒻᒥᔪᖅ. ᖃᕆᑕᐅᔭᒃᑯᑦ ᓈᓚᕋᑦᓴᖅ ᓈᓚᑦᑕᐅᕆᐊᑦᑐᒍᓐᓇᑐᖅ ᐅᕙᓂ:  www.bluemetropolis.org/podcasts

ᐊᐅᐸᓗᒃ
ᐳᕐᑐᓂᕐᓴᒥ ᐃᓕᓐᓂᐊᑏᑦ ᐊᐅᐸᓗᒻᒥᐅᑦ ᐃᓚᐅᖃᑕᐅᓚᐅᔪᔪᑦ ᐱᓇᓱᐊᕐᑕᐅᔪᒧᑦ ᑌᔭᐅᒍᑎᓕᒻᒧᑦ ᑯᐯᑉ ᐊᒫᖏᑦ. ᐱᓇᓱᐊᕐᑕᐅᔪᖅ ᐱᑦᔪᑎᖃᓚᐅᔪᔪᖅ ᐃᓕᓐᓂᐊᑏᑦ ᖃᐅᔨᓴᖃᑦᑕᑐᑦᓴᐅᓂᖏᓐᓂᒃ, ᓄᓇᓕᒻᒥᓅᓕᖓᔪᓂᒃ ᐃᓱᒪᒋᔭᒥᓂᒃ ᑐᓴᐅᒪᖃᑎᖃᕐᓂᒥᒃ. ᐱᒍᓐᓇᓯᐊᕐᑐᑦ ᐊᖏᕐᓯᒪᑦᓯᐊᓱᑎᓪᓗ ᐃᓕᓐᓂᐊᑎᑦᓯᔨᖏᑦᑕ ᐊᓯᖏᓐᓄᑦ ᐃᑲᔪᕐᑕᐅᓚᐅᔪᒻᒥᔪᑦ ᐊᓪᓚᑎᐅᒻᒥᔪᒧᑦ (Carolyn Marie Souaid) ᐊᑦᔨᓕᐅᕆᔨᒧᓪᓗ (Monique Dykstra). ᕕᕈᐊᕆᐅᑎᓪᓗᒍ, ᐊᓪᓚᑎ ᐃᓕᓐᓂᐊᑎᓂᒃ ᐱᓇᓱᖃᑎᖃᖃᑦᑕᓱᓂ ᐃᓱᒪᒋᔭᖏᓐᓂᒃ ᐊᓪᓚᖑᕐᑎᓯᖃᑦᑕᓂᒃᑯᑦ ᑌᔭᐅᒍᑎᖃᕐᑎᓗᒍ "ᓱᖃᑦᓯᒍᑎᕗᑦ ᐊᐅᐸᓗᒻᒥ: ᐊᓕᐊᒋᔭᕗᑦ, ᓱᓲᖑᓂᕗᑦ", ᐊᑦᔨᓕᐅᕆᔨ ᐃᓕᓐᓂᐊᑎᑦᓯᑎᓪᓗᒍ ᐊᑦᔨᓕᐅᕆᓂᕐᒥᒃ ᐊᑦᔨᐅᖏᑦᑐᓂᒃ ᐊᓪᓚᑕᖏᓐᓄᑦ ᐃᓚᐅᔪᑦᓴᓂᒃ. ᑕᕐᕿᓂ ᐊᒥᓱᓂ ᐱᓇᓱᐊᒻᒪᕆᓯᒪᓕᕐᓱᑎᒃ, ᐃᓕᓐᓂᐊᑏᑦ ᐊᑦᔨᖑᐊᖏᑦᑕ ᐆᑦᑐᕋᐅᑎᐅᓂᖏᑦ ᓄᐃᑕᐅᓚᐅᔪᔪᑦ ᕿᒥᕐᕈᐊᒐᕐᓂ ᑌᔭᐅᒍᑎᓕᒻᒥ "ᑯᐯᑉ ᐊᒫᖏᑦ: ᐊᖏᕐᕋᕋ 2009". ᐱᖓᓱᑦ ᐃᓕᓐᓂᐊᑏᑦ ᓂᕈᐊᕐᑕᐅᓚᐅᔪᔪᑦ ᒪᓐᑐᔨᐊᓕᐊᖁᔭᐅᑦᓱᑎᒃ ᐃᓕᓐᓂᐊᑎᑦᓯᔨᖏᑦ ᒪᓕᑦᑎᓗᒋᑦ ᐃᓕᓐᓂᐊᖃᑎᒥᓂᓗ ᑭᒡᒐᑐᕐᓗᑎᒃ ᕿᒥᕐᕈᐊᒉᑦ ᓄᐃᑕᐅᕆᐊᖕᖓᓂᖏᓐᓂᒃ ᓇᓪᓕᐅᓂᕐᓯᐅᓂᕐᒧᑦ. ᒪᓐᑐᔨᐊᒦᑦᓱᑎᒃ, ᐃᓕᓐᓂᐊᑏᑦ ᑲᑎᓯᓚᐅᔪᔪᑦ ᑯᐯᓕᒫᒥ ᐱᓯᒪᔪᓂᒃ ᐃᓕᓐᓂᐊᑎᓂᒃ ᐃᓕᓐᓂᐊᕕᓐᓂᑦ ᐊᓯᖏᓐᓂᑦ, ᐊᓪᓚᑎᓂᒃ, ᐊᑦᔨᓕᐅᕆᔨᓂᒃ, ᑭᒡᒐᑐᕐᑎᖏᓐᓂᓗ Blue Metropolis-ᑯᑦ.