ᐱᒍᓐᓇᐳᒍᑦ

ᐱᒍᓐᓇᐳᒍᑦ ᖃᐅᓐᓇᒥ ᐊᑑᑎᔭᐅᓚᐅᔪᔪᖅ, ᑲᑎᕕᒃ ᐃᓕᓐᓂᐊᓂᓕᕆᓂᒃᑯᑦ ᓴᓪᓗᓂ ᐃᓄᒻᒪᕇᑦ ᐃᓕᓐᓂᐊᕕᖁᑎᖓᓂ ᒫᑦᔨ 9-ᒥᑦ ᐁᕆᓕ 3-ᒧᑦ. ᐱᓇᓱᐊᕈᓯᕐᓂ ᓯᑕᒪᓂ ᐱᓇᓱᐊᕐᓂᐅᓱᓂ ᐱᐅᓯᑐᖃᒃᑯᑦ ᐱᔪᓐᓇᓂᕐᓂᒃ ᒥᕐᓱᓂᕐᒥ, ᓂᑦᓯᕋᕐᓂᒥ, ᓄᕕᕐᓴᓂᕐᒥ, ᑕᕐᓯᑐᐃᓂᕐᒥ ᑲᒻᒥᐅᓂᕐᒥᓗ, ᐊᕐᓀᓗ ᖃᓄᐃᖕᖏᓯᐊᕐᓂᖏᓐᓂ. ᐃᓕᓐᓂᐊᑎᑦᓯᔩᑦ ᓄᓇᕕᒻᒥᐅᑦ ᓄᓇᕘᒻᒥᐅᓗ ᖃᐅᔨᒪᔭᐅᓂᖃᕐᓱᑎᒃ ᐱᓯᑎᐅᓂᕐᒥᓄᑦ ᐱᔪᓐᓇᓯᐊᕐᓂᒥᓂ ᑌᒣᑦᑐᓂᒃ. ᐃᓚᐅᔪᑦ ᒥᕐᓱᓯᑎᐅᑦᓱᑎᒃ ᓂᕈᐊᕐᑕᐅᓚᐅᔪᔪᑦ ᓄᓇᓕᓐᓂᑦ ᐊᑐᓂᑦ ᐱᓯᒪᔪᑦ. ᐃᓚᐅᔪᑦ ᐋᕐᕿᓱᐃᓛᕐᒥᔪᑦ ᑌᒣᑦᑐᓭᓐᓇᒐᓛᓂᒃ, ᓄᓇᓕᒻᒥᓄᑦ ᐅᑎᕐᓯᒪᓕᕈᑎᒃ.

ᐱᓇᓱᐊᕐᓂᖃᕐᓂᒥᓂ ᐱᔪᓐᓇᓂᕐᑖᓚᐅᔪᔪᑦ ᐃᓚᐅᔪᑦ ᐊᕐᕌᒍᕐᓂ ᐊᒥᓱᓂ ᐱᔪᓐᓇᓂᕐᑖᕙᓪᓕᐊᕈᑎᕕᓂᖏᓐᓂᒃ. ᑕᐅᕐᓰᖃᑦᑕᐅᑎᕈᓐᓇᓚᐅᔪᔪᑦ ᐃᓕᕐᑎᐅᑎᒥᓂᒃ ᓄᑖᓂᓗ ᐱᖕᖑᑎᑦᓯᖃᑦᑕᓱᑎᒃ ᐃᓚᐅᑎᓪᓗᒋᑦ ᐱᐅᓯᑐᖃᒃᑯᑦ ᖃᓄᐃᑦᑐᔭᐅᓂᖏᑦ. ᐃᓚᐅᔪᑦ ᐊᑐᓂᑦ ᐃᓚᖃᕐᑎᑕᐅᓚᐅᔪᔪᑦ ᐱᐊᕋᕐᒥᒃ/ᑲᒃᑲᓛᒥᒃ ᐊᑕᐅᓯᕐᒥᒃ ᐃᓚᖏᑦ ᒪᕐᕈᖃᕐᑎᑕᐅᑎᓪᓗᒋᑦ ᐱᒋᐅᕐᕕᒥ ᐳᒃᑭᓂᕐᓴᒥ ᐃᓕᓐᓂᐊᕕᐅᑉ ᐱᓇᓱᑦᑎᖏᓐᓄᑦ ᓂᕈᐊᕐᑕᐅᔪᕕᓂᕐᓂᒃ. ᐊᕐᓀᑦ ᐊᑎᒋᓕᐅᕐᓱᑎᒃ, ᓯᓚᑉᐱᐊᓕᕐᓱᑎᒃ/ᖃᕐᓕᑲᔮᓕᐅᕐᓱᑎᒃ ᐳᐊᓗᓕᕐᓱᑎᓗ ᑌᒃᑯᓄᖓ ᐱᐊᕋᕐᓄᑦ/ᑲᒃᑲᓛᓄᑦ. ᐃᓄᒻᒪᕆᓐᓄᑦ ᐃᑭᑦᑐᓄᑦ ᐊᓐᓄᕌᓕᐅᓚᐅᔪᒻᒥᔪᑦ ᐊᓐᓄᕌᕐᑕᒋᐊᓕᓐᓄᑦ.

ᐊᕐᓀᑦ ᐱᓇᓱᐊᕐᓂᒥᓂᑦ ᐊᐅᓪᓚᓚᐅᔪᔪᑦ ᓄᑖᓂᒃ ᐃᓕᕐᑎᐅᑎᑦᓴᖃᓕᕐᓱᑎᒃ ᒥᕐᓱᒐᕐᒥᓂᓗ ᓇᑦᔭᓯᑦᓱᑎᒃ ᐆᑦᑑᑎᕕᓂᕐᓂᒃ. ᑖᓐᓇ ᐱᓇᓱᐊᕐᑕᐅᔪᖅ ᐃᑲᔪᕐᓯᓯᒪᓚᖓᖁᓇᕐᑑᕗᖅ ᐊᓯᐅᔨᑦᑌᓕᓂᕐᒥᒃ ᐱᔪᓐᓇᓂᕐᓂᒃ ᐃᒻᒪᖄᓗ ᐃᓚᐅᔪᓂᒃ ᐅᒃᑯᐃᓯᒍᓐᓇᓯᓚᕿᑎᑦᓯᓗᓂ ᓂᐅᕕᕐᕕᖁᑎᓂᒃ. ᑭᒡᒐᑐᕐᑎᖃᓚᐅᔪᔪᖅ ᐱᓇᓱᒐᑦᓴᓂᒃ ᖁᕝᕙᕆᐊᕐᑎᓯᓯᒪᓂᕐᒧᑦ ᓄᓇᕕᒻᒥᐅᑦ ᐱᓕᐊᕕᓂᖏᓐᓂ.

ᐱᐅᓯᑐᖃᒃᑯᑦ ᐱᔪᓐᓇᓂᕐᓂ ᐱᓇᓱᐊᓐᓂᖃᕐᓂᓂ, ᐅᖃᕐᑎᖃᖃᑦᑕᓚᐅᔪᒻᒥᔪᖅ ᑎᒥᐅᔪᓂᑦ ᐊᓯᖏᓐᓂᒃ ᐱᓯᒪᔪᓂᒃ ᐊᕐᓀᑦ ᖃᓄᐃᖕᖏᓯᐊᕐᓂᖏᓐᓅᓕᖓᔪᓂᒃ ᐆᑦᑑᑎᒋᓗᒋᑦ ᐃᓗᓯᕐᓱᓯᐊᕐᓂᖅ, ᐊᑦᑕᓇᑦᑌᓕᒪᓂᖅ, ᓇᒻᒥᓂᖅ ᓇᓗᕐᖁᑎᖕᖏᓂᖃᕐᓂᖅ, ᓲᖑᓰᒋᐊᕐᓂᖅ ᐃᓚᒌᓐᓂᓂᒃ, ᓯᕗᓕᕈᓐᓇᓂᕐᓂᓗ. ᐅᖃᖃᑎᒌᑐᐃᓐᓇᖃᑦᑕᓚᐅᔪᒻᒥᔪᑦ ᐱᓇᓱᐊᕐᓂᖏᓐᓂ. ᑖᒃᑯᓇᓂ ᐱᓇᓱᐊᕐᓂᓂ ᑲᑎᒪᓂᖃᓯᖃᑦᑕᓚᐅᔪᔪᑦ ᑐᓴᐅᒪᖃᑦᑕᐅᑎᓂᕐᓄᑦ ᐱᓐᓀᓗᑕᓂᒃ ᐊᕐᓇᓕᒫᓅᓕᖓᔪᓂᒃ ᑎᒥᐅᔪᒥ.

ᐅᑉᐱᕆᔭᖃᓪᓚᕆᑦᑐᒍᑦ ᐃᓅᖃᑎᒌᓐᓂᒥ ᐊᕐᓀᑦ ᐃᓗᐃᑦᑐᓚᕆᐅᑎᑦᓯᓂᖏᓐᓂᒃ. ᐱᔪᒪᓕᕐᑎᓯᔨᐅᑦᓱᑎᒃ ᓲᖑᓂᖃᕐᑎᓯᑦᓱᑎᓗ ᐃᓚᒥᓂᒃ. ᐃᑉᐱᒋᔭᖃᕐᑐᒍᑦ ᐃᑲᔪᕐᓯᑐᐊᕈᑦᑕ ᐊᕐᓇᓂᒃ ᓲᖑᓂᙯᓐᓇᑎᑦᓯᓂᕐᒧᑦ ᐱᐅᓯᑐᖃᒃᑯᑦ ᐱᔪᓐᓇᓂᕐᑎᒍᑦ, ᓄᓇᓕᓕᒫᕐᒥᒃ ᐃᑲᔪᕐᓯᕋᔭᕐᓂᖏᓂᒃ.

ᐅᑉᐱᕆᔭᖃᕐᑐᒍᑦ ᑖᑦᓱᒥᖓ ᐱᓇᓱᐊᕐᑎᓯᓂᒃᑯᑦ, ᐅᐱᒍᓱᓐᓂᕗᑦ ᐃᒻᒥᓂᓗ ᖁᓚᖕᖏᓂᖃᕐᓂᕗᑦ ᐊᓯᐅᔨᔭᐅᑦᑌᓕᕈᓐᓇᓂᖓᓂᒃ, ᑭᖑᕚᕗᓪᓗ ᐱᕕᑦᓴᖃᕐᓂᓴᐅᓚᖓᑦᓱᑎᒃ ᐅᐱᒋᔭᖃᕐᓂᒥᒃ ᑭᓇᐅᓂᕐᒥᓃᑦᓯᐊᑐᐃᓐᓇᓗᑎᒃ.

ᐊᓪᓚᑕᖏᑦ ᐄᕙ ᑯᐊᓇᓈᑉ, ᑲᕐᒥᐊᓪ ᑳᔅᑑᖕᑮᑉ, ᐳᕉᓇ ᒫᔅᑐᕆᐋᓂᐅᓪᓗ