ᖁᐊᕐᑕᒥ ᐃᓕᓐᓂᐊᑏᑦ ᓯᓚᕐᔪᐊᒥᒃ ᖃᐅᔨᕙᓪᓕᐊᔪᑦ!

ᓄᓇᕕᒻᒥᐅᑦ ᐊᓪᓚᑕᕕᓂᖏᑦ ᐊᐅᓪᓚᖃᑦᑕᑐᑦ ᐅᖓᓯᑦᑐᓄᑦ ᑭᓚᒦᑕᓄᑦ...
ᐃᓕᓐᓂᐊᑎᖁᑎᕗᑦ ᐃᓕᓐᓂᐊᑎᓂᒃ ᐊᓯᖏᓐᓂᒃ ᓯᓚᕐᔪᐊᒥᐅᓂᑦ ᓇᑭᑐᐃᓐᓇᖅ ᐱᓯᒪᔪᓂᒃ ᑐᓴᐅᒪᖃᑦᑕᐅᑎᓂᖃᓲᖑᕗᑦ. ᑌᒣᓘᕐᓱᓂ ᐱᐅᔫᕗᖅ ᐅᐃᒍᐃᑎᑑᕐᓂᒥᒃ ᐱᔪᓐᓇᓯᑦᓯᐊᕙᓪᓕᐊᓂᕐᒧᑦ.

ᕈᓃ ᓵᓯᓐ ᐃᓕᓐᓂᐊᑎᑦᓯᕕᖓᓂ ᖁᐊᕐᑕᒥ, ᐃᓕᓐᓂᐊᑏᑦ ᑐᓴᐅᒪᖃᑦᑕᐅᑎᖃᑎᑖᕈᓐᓇᓯᓚᐅᔪᔪᑦ ᒪᕐᕉᐃᓂᒃ ᐃᓕᓐᓂᐊᕕᓐᓂᑦ ᐊᓯᖏᓐᓂᑦ. ᒪᓐᑐᔨᐊᒥ ᐃᓕᓐᓂᐊᑎᓂᒃ ᑐᓴᐅᒪᖃᑦᑕᐅᑎᖃᑎᖃᕐᓱᑎᒃ ᐅᐃᒍᐃᒃᑯᓗ ᓄᓇᖓᓂᒻᒥᐅᓂᑦ ᑕᕆᐅᑉ ᐊᑭᐊᓂ. ᐊᓪᓚᑕᕕᓂᕐᒥᓂᒃ ᑕᐅᕐᓰᖃᑎᖃᕐᓱᑎᒃ, ᐊᑦᔨᖑᐊᕐᒥᓂᒃ ᑐᖕᖓᓱᑦᑎᓯᒍᑎᒥᓂᓪᓗ ᓴᓇᔭᕕᓂᕐᒥᓂᒃ. ᑕᑯᓐᓇᕋᑦᓴᓕᐅᑦᓴᒪᕆᓚᐅᔪᔪᑦ ᑕᑯᑦᓴᐅᑎᑦᓯᔪᓂᒃ ᐃᓕᓐᓂᐊᑎᓂᒃ, ᐱᓇᓱᐊᕐᑕᕕᓂᕐᒥᓂᒃ, ᐃᓕᓐᓂᐊᕕᒻᒥᒃ ᓄᓇᓕᒻᒥᓂᓗ. ᑖᓐᓇ ᐱᓇᓱᐊᕐᓱᒍ ᐃᓕᓐᓂᐊᑎᓂᒃ ᑲᑦᓱᙰᑦᑑᑎᑦᓯᓯᐊᓚᐅᔪᔪᖅ!

ᖃᓄᐃᓘᕐᓗᑏᒃ ᐊᕝᕕᑕᕈᓐᓇᖃᑦ ᐃᓕᓐᓂᐊᑎᑦᓯᕕᒻᒥᑦ ᓅᕈᓐᓀᑎᓪᓗᒋᑦ?
ᓵᓯᓐᓗ ᐃᓕᓐᓂᐊᑎᖏᓪᓗ ᐳᕐᑐᓂᓖᑦ 6-ᒥᒃ 7-ᒥᓪᓗ ᖁᐊᕐᑕᒥᐅᑦ ᖃᓄᐃᑦᑐᑐᐃᓐᓇᓂᒃ ᓄᓇᒻᒪᕆᓐᓂᒃ ᐊᕕᑦᑐᓯᒪᔪᓂᒃ ᓯᓚᕐᔪᐊᒥ ᓇᓂᑐᐃᓐᓇᖅ ᖃᐅᔨᕈᓐᓇᓯᓚᐅᔪᔪᑦ ᐃᓕᓐᓂᐊᑎᑦᓯᕕᒻᒥᓂᑦ ᓅᓚᐅᕐᓯᒪᒐᑎᒃ!

ᐃᓕᓐᓂᐊᑎᓕᒫᑦ ᖃᐅᔨᓴᕐᓂᖃᓚᐅᔪᔪᑦ ᓄᓇᒻᒪᕆᒻᒥᒃ ᐊᕕᑦᑐᓯᒪᔪᒥᒃ ᓴᕐᕿᑎᑦᓯᕕᖃᕐᓂᒧᑦ ᐃᓕᓐᓂᐊᑏᓪᓗ ᐊᑐᓂᑦ ᓴᕐᕿᑎᑦᓯᒋᐊᖃᕐᓱᑎᒃ ᐃᓕᓐᓂᐊᖃᑎᒥᓄᑦ ᑐᓴᐅᒪᔭᐅᒋᐊᓕᓐᓂᒃ ᓄᓇᒻᒪᕆᒻᒥᓅᓕᖓᔪᓂᒃ ᓄᓇᒻᒪᕆᒻᒧᑦ ᓴᕐᕿᑎᑦᓯᕕᒻᒥᓄᑦ. ᐃᓕᓐᓂᐊᑏᑦ ᑐᓴᐅᒪᔭᐅᒋᐊᓕᓐᓂᒃ ᐋᕐᕿᓱᐃᓯᒪᓚᐅᔪᔪᑦ ᐊᖏᔫᑎᓪᓗᒍ ᑕᑯᑦᓴᐅᑎᑦᓯᓂᕐᒧᑦ ᐱᓇᓱᐊᕐᑕᕕᓂᕐᒥᓂᒃ.

ᑌᒣᒻᒪᑦ ᓄᓇᒻᒪᕆᓐᓂᒃ ᐊᑦᔨᒌᖑᖕᖏᑐᓂᒃ ᑐᑭᓯᐅᒥᖃᑦᑕᓕᕐᓱᑎᒃ ᐊᕝᕕᑕᕐᑑᔮᕐᓂᖃᕐᓱᑎᓪᓗ ᓯᓚᕐᔪᐊᒥ ᓇᒧᑐᐃᓐᓇᖅ!

ᐅᒥᐊᖕᖑᐊᕈᓗᒃ!
ᓵᓯᓐ ᐃᓕᓐᓂᐊᑎᖏᑦ ᖁᐊᕐᑕᒥᐅᑦ ᐅᒥᐊᖕᖑᐊᓕᐅᓚᐅᔪᔪᑦ ᐃᑦᓯᕕᕕᓂᕐᓂᒃ ᖃᓪᓗᓈᓕᕐᑕᓂᓪᓗ ᐊᑐᕐᓱᑎᒃ. ᐅᒥᐊᖕᖑᐊᑦ ᑕᑭᓂᖃᕐᓱᑎᒃ 60 ᓯᐊᓐᑎᒦᑕᓂᒃ 50-ᓂᒃ ᑕᑭᓂᖃᕐᓱᑎᒃ ᑎᖏᕐᕋᐅᑎᖏᑦ. ᐳᕐᑐᓂᓖᑦ 6-ᒥᒃ 7-ᒥᓪᓗ ᑕᑯᑦᓴᐅᑎᑦᓯᓚᐅᕐᑐᑦ ᐱᔪᓐᓇᓂᕐᒥᓂᒃ ᕿᓄᐃᓵᕈᓐᓇᓂᕐᒥᓂᓗ ᐱᔭᖃᕈᓐᓇᓯᓂᕕᓂᕐᒥᓄᑦ ᑖᑦᓱᒥᖓ ᐱᓇᓱᐊᕐᑕᕕᓂᕐᒥᓂᒃ. ᐱᑦᓯᐊᖁᓯ ᐃᓘᓐᓇᓯ!