“ᓱᑯᐃᔦᓂᕐᒥᒃ ᓄᑖᒍᓕᕐᑐᓂᓪᓗ ᐱᓇᓱᒍᑎᑦᓴᓕᕆᓂᕐᒥᒃ” ᐃᓕᓴᖃᑕᐅᓂᖅ

ᐃᓕᓴᖃᑕᐅᔪᑦ EDEE 372 ᐃᓕᓭᒍᓯᕐᓂᒃ ᓱᑯᐃᔦᓂᕐᒥᒃ, ᐃᓄᒃᔪᐊᒥ ᒫᑦᓯ 1-10

ᑖᓐᓇ ᐃᓕᓴᕋᑦᓴᖅ ᖃᕝᕙᕆᐊᕈᑎᑖᕐᐸᓕᐊᒍᑕᐅᒍᓐᓇᑐᖅ 60ᓂᒃ ᖃᕝᕙᕆᐊᕈᑎᑖᕋᓱᐊᕐᑐᓄᑦ ᐊᓪᓓᓗ ᐃᓄᐃᓪᓗ ᐃᓕᓐᓂᐊᓂᖓᒍᑦ (ᑲᑎᕕᒃ ᐃᓕᓐᓂᐊᓂᓕᕆᓂᑎᒍᑦ/ᒪᑭᐊᓪᑎᒍᓪᓗ ᐱᒋᐅᕐᓴᓂᒃᑯᑦ). ᐃᓕᓴᖃᑦᑕᕆᐊᖃᕐᒪᑕ Brevet (ᐃᓕᓭᒍᓐᓇᐅᑎᑖᕐᒣᑐᐃᑦ). ᐃᓕᓭᒍᓐᓇᐅᑎᑖᕇᕐᓯᒪᓕᕋᓗᐊᕈᑎᒃ ᐃᓕᓴᕆᐊᓪᓚᑖᖁᔭᐅᔪᑦ ᐳᕐᑐᓂᕐᓴᒋᐊᓪᓚᒥᒃ ᐱᒍᓐᓇᐅᑎᑖᕈᑎᑦᓴᓂᒃ B.Ed.

ᐊᑦᓯᖑᐁᑦ

ᑖᒃᑯᐊ ᐃᓕᓴᕋᑦᓭᑦ ᐱᒐᓱᐊᒻᒪᕆᓐᓇᑐᑦ ᑫᕙᓪᓚᒍᓯᖏᑦ ᐊᒥᓲᒋᐊᖃᕐᓱᑎᒃ ᐃᓕᓴᕐᕕᒥ ᐃᓕᓴᕐᕕᒥᐅᖕᖏᑐᕐᓗ. ᑕᒪᑐᒥᖓ ᐃᓕᓴᕐᑐᓕᒫᑦ, ᐊᓕᐊᒋᔭᖃᖃᑦᑕᓯᒪᔪᑦ ᐃᓕᓭᓂᕐᒥᒃ/ᐃᓕᑦᓯᕙᓪᓕᐊᓂᕐᒥᓗ ᐱᕕᑦᓴᖃᕐᑎᑕᐅᖃᑦᑕᓂᕋᒥᒃ “ᓱᑯᐃᔦᓂᕐᒥᒃ ᓄᑖᒍᓕᕐᑐᓂᓪᓗ ᐱᓇᓱᒍᑎᑦᓴᓕᕆᓂᕐᒥᒃ” ᐃᓕᓴᖃᑕᐅᒍᒪᓯᒪᔪᑦ. ᑕᒪᑐᒥᖓ ᐃᓕᓴᖃᑕᐅᖃᑦᑕᑐᑦ “ᓱᑯᐃᔦᓂᕐᒥᒃ ᓄᑖᒍᓕᕐᑐᓂᓪᓗ ᐱᓇᓱᒍᑎᑦᓴᓕᕆᓂᕐᒥᒃ” ᑐᓱᓕᖃᑦᑕᐅᑎᒍᑎᐅᖁᔨᔫᒐᓗᐊᑦ ᓄᓇᕕᒻᒥᐅᑦ ᑲᒃᑲᓛᑦ ᐱᕙᓪᓕᖁᑎᖃᑦᓯᐊᖁᑦᓱᒋᑦ ᖃᐅᔨᒪᔭᐅᓕᕐᑐᓂᒃ.

ᓕᕖᓇ ᐳᑦᑖᔪᖅ, ᐋᓂ ᐊᓚᑯᓗ ᐊᒻᒪᓗ ᕚᓚᓐᑏᓇ ᑎᑯᕌᒻ ᐃᓕᓭᔪᕕᓃᑦ ᖁᓕᓪᓗ ᑕᓪᓕᒪᓪᓗᓂᒃ ᐊᕐᓇᓂᒃ. ᐊᓓ ᕈᔅᕘ ᐅᓪᓗᓕᒫᑦ ᖃᕆᑕᐅᔭᓕᕆᒋᐅᕐᓴᑎᑦᓯᓂᕐᒥᔪᖅ ᑲᑎᒪᓂᐊᕈᓯᖃᕐᑎᓯᑦᓱᓂ.

ᐃᓕᓴᕋᑦᓴᖅ ᑐᕌᒐᓕᐅᕈᑕᐅᓯᒪᔪᖅ ᒪᑯᓂᖓ:

• ᓱᑯᐃᔦᓂᕐᒥᒃ ᐃᓕᓭᒍᑎᑦᓴᓂᒃ ᓱᖏᐅᓯᒪᓂᕐᒥᒃ (ᑲᑎᕕᒃ ᐃᓕᓐᓂᐊᓂᓕᕆᓂᖅ, QEP) ᓱᑯᐃᔦᓂᕐᒥᒃ ᐊᓕᐊᒋᔭᐅᓂᐊᓕᕐᑎᓗᒍ ᐃᓕᓭᒍᑎᖃᕐᓂᖅ,
• ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᖃᐅᔨᓴᕐᓂᖅ ᓱᑯᐃᔦᓂᕐᒨᓕᖓᔪᓂᒃ ᐃᓄᑐᙯᑦ ᖃᐅᔨᒐᓱᐊᕐᕕᒋᓗᒋᑦ,
• ᓇᓗᕐᖁᓀᑦᑑᓂᖅ ᐃᓕᓭᓗᓂ ᖃᐅᔨᒪᔭᐅᑎᑦᓯᓂᕐᓗ ᓱᑯᐃᔦᓂᕐᒥᒃ ᐳᒃᑭᓂᕐᓭᑦ ᐃᓕᓴᕐᕕᖏᓐᓂ,
• ᑐᑭᓯᒪᑦᓯᐊᓂᕐᓴᐅᓕᕐᓂᖅ ᐅᐱᒋᔭᖃᕐᓂᓴᐅᓕᕐᓂᓗ ᐱᒻᒪᕆᖁᑎᒋᔭᐅᓂᖏᓐᓂᒃ ᓱᑯᐃᔦᓂᐅᓪᓗ ᓄᑖᒍᓕᕐᑐᓂᓪᓗ ᐱᓇᓱᒍᑎᑦᓴᖃᕐᓂᐅᑉ ᐅᓪᓗᑕᒫᑦ,
• ᖃᐅᔨᓴᕈᓯᕐᓂᒃ ᓄᐃᑦᓯᒋᐊᓪᓚᓂᖅ ᓱᑯᐃᔦᒍᓯᕐᓂᓗ ᐊᓪᓚᒍᓐᓇᓂᖅ ᐊᑐᐊᕐᓯᒍᓐᓇᓂᕐᓗ.