ᓱᓕᔪᖕᖑᐊᓂᒃ ᐃᓕᓐᓂᐊᓂᖅ!
ᐃᓕᓐᓂᐊᓂᕐᒥᒃ ᐃᑲᕐᑎᐅᑉ ᐅᖃᐅᓯᖓ ᒍᐃᒍᐃᑎᑐᑦ...
"ᐳᕐᑐᓂᓖᑦ 5-ᒦᑦᑐᑦ 6-ᒦᑦᑐᓗ ᐊᔭᒍᑕᖅ ᐃᓕᓐᓂᐊᕕᖓᓂ ᑕᓯᐅᔭᒥ ᐆᑐᕋᖃᑎᒋᓚᐅᔪᔭᒃᑲ ᐱᖕᖑᐊᕈᑎᒥᒃ ᐱᓂᐊᕐᓂᖃᕐᓂᑯᑦ ᓱᔪᓕᖕᖑᐊᓂᒃ ᐃᓕᓐᓂᐊᓂᕐᒥᒃ. ᐱᓇᓱᐊᕐᓂᐅᔪᓂ, ᐃᓕᓐᓂᐊᑎᑦᓯᔨ ᒪᕆ-ᐄᕝ ᕈᐊᑉ ᐃᓕᓐᓂᐊᑎᖏᑦ ᓱᓕᔪᖕᖑᐊᓂᒃ ᓴᓇᓚᐅᔪᑦ ᓄᓇᓕᖕᖑᐊᒥᒃ ᐃᓄᒻᒪᕆᐅᓕᕈᑎᒎᖅ ᓄᓇᓕᒋᒐᔭᕐᑕᒥᓂᒃ. ᐊᑦᔨᒌᖕᖏᑐᓂᒃ ᐱᓇᓱᒐᕐᓂᒃ ᕿᒥᕐᕈᖃᑦᑕᓱᑎᒃ ᐱᒍᓐᓇᓂᕆᒋᐊᓕᒻᒥᓂᓪᓗ ᖃᐅᔨᓴᕐᓱᑎᒃ. ᐃᓕᓐᓂᐊᑏᑦ ᐱᕕᑦᓴᖃᓚᕿᓚᐅᔪᑦ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᒍᐃᒍᐃᑎᑐᑦ ᐃᓕᓐᓂᐊᕈᑎᖏᓐᓂ ᐱᒍᓐᓇᓯᔭᐅᒋᐊᓕᓐᓂᒃ ᐱᓇᓱᐊᕈᓐᓇᓚᕿᑦᓱᑎᒃ.
ᑖᒃᑯᑎᒎᓇ ᐱᓂᐊᕐᓂᖃᕐᓂᑯᑦ ᐱᓇᓱᐊᕐᓂᒥᓂ ᐃᓕᓐᓂᐊᑏᑦ ᐃᓕᓐᓂᐊᓚᐅᔪᒻᒥᔪᑦ ᐱᔪᓐᓇᓂᕐᑖᓱᑎᒃ ᐃᑲᔪᖃᑎᒌᓂᒥᒃ ᑐᓴᐅᒪᖃᑎᒌᑦᓯᐊᓂᕐᒥᓗ.
ᓱᓕᔪᖕᖑᐊᓂᒃ ᐱᖕᖑᐊᓂᖅ ᐃᓕᓐᓂᐊᑎᓂᒃ ᑲᑦᓱᙰᓕᓭᒍᑎᒻᒪᕆᐅᓲᖑᕗᖅ ᐃᓕᓐᓂᐊᑎᓂᒃ. ᐱᓇᓱᐊᓚᐅᔪᒐᓗᐊᕋᒥᒃ ᐱᓇᓱᐊᕈᓯᓕᒫᑲᓴᑦᓯᐊᒧᑦ, ᐃᓕᓐᓂᐊᑏᑦ ᑲᑦᓱᙰᑦᑐᒪᕆᐅᓚᐅᔪᑦ ᑲᑦᓱᙰᓐᓂᖏᑦ ᑲᑕᒐᓛᕋᐱᓚᐅᕐᓯᒪᑎᓐᓇᒋᑦ. ᐃᓕᓐᓂᐊᑏᑦ ᐱᓇᓱᐊᕐᑕᐅᒋᐊᓕᓕᒫᓂᒃ ᑲᔪᓯᑦᓯᐊᑐᒥᒃ ᐱᔭᕇᖃᑦᑕᓚᐅᔪᑦ ᑐᓂᖃᑦᑕᓱᒋᓗ ᐱᔭᕇᕋᒥᒋᑦ ᑲᑦᓱᙰᑦᑐᐹᓘᑦᓱᑎᒃ. ᓱᓕᔪᖕᖑᐊᓂᒃ ᐃᓕᓐᓂᐊᓂᖏᓐᓄᑦ ᐃᓚᐅᑎᑦᓯᓂᖅ ᐱᐅᔫᒍᑎᖃᕐᐳᖅ ᑖᒃᑯᓂᖓᑦᓭᓇᖅ ᐱᓇᓱᐊᖕᖏᑑᑎᑦᓯᓚᕿᒍᑎᐅᒍᓐᓇᒪᑦ ᐊᑦᔨᒌᖕᖏᑐᓂᓪᓗ ᐱᒍᓐᓇᓯᔭᐅᒋᐊᓕᓐᓂᒃ ᐃᓕᓐᓂᐊᑎᑦᓯᒍᑎᐅᒍᓐᓇᓱᓂ ᐊᑕᐅᑦᓯᑯᑦ.
ᐱᒍᓐᓇᓯᔭᐅᒋᐊᓖᑦ ᓇᓪᓕᖁᐊᕇᓐᓂᖏᑦ ᒍᐃᒍᐃᑎᑐᑦ
ᐃᓚᒋᔭᐅᑦᓱᓂ ᐱᒍᓐᓇᓯᔭᐅᓯᒪᓪᓚᕆᒋᐊᓕᓐᓄᑦ ᐱᔪᓐᓇᓂᑖᕆᔭᐅᒋᐊᓕᓐᓄᓗ ᐃᓕᖓᔪᓂᒃ ᑕᓯᐅᕐᓯᔭᐅᓂᒃᑯᑦ ᐊᕐᖁᓯᐅᕐᓂᒥᒃ ᐃᓕᓐᓂᐊᓂᖅ, ᑖᓐᓇ ᐱᓇᓱᐊᕐᓂᐅᓚᐅᔪᖅ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᐱᒍᓐᓇᓯᔭᐅᒋᐊᓕᖏᑦᑕ ᓯᑕᒪᐅᓕᕿᖓᔫᑦᓱᑎᒃ ᐃᓕᓐᓂᐊᑕᐅᒋᐊᓖᑦ ᒍᐃᒍᐃᑎᑐᑦ ᐃᓕᓐᓂᐊᑎᑦᓯᒍᑎᐅᓚᐅᔪᕗᖅ. ᐱᓇᓱᐊᕐᓂᓕᒫᒥ, ᐃᓕᓐᓂᐊᑏᑦ ᐊᑐᐊᕐᓯᒋᐊᓖᑦ ᐊᑦᔨᒌᖕᖏᑐᓂᒃ ᐊᓪᓚᓯᒪᔪᓂᒃ, ᑕᑕᕐᓭᖃᑦᑕᓱᑎᒃ ᑕᑕᕐᓴᒋᐊᓕᓐᓂᒃ ᓄᐃᑕᑎᒐᑦᓴᒥᓂᒃ ᓴᓇᖃᑦᓴᑎᒃ, ᖃᐅᔨᒪᔭᐅᒋᐊᓕᓐᓂᒃ ᑐᓴᖃᑎᒌᖃᑦᓴᓱᑎᒃ ᑐᑭᓯᒪᑎᑕᐅᑦᓯᐊᓱᑎᓗ ᐱᓇᓱᐊᕐᓂᒥᒃ ᖃᓄᐃᓘᕆᐊᖃᕐᓂᒥᓂᒃ ᐱᕕᑦᓴᖃᕐᕕᒥᓂᓪᓗ. ᐃᓕᓐᓂᐊᕈᑏᑦ ᐊᓪᓚᓯᒪᔪᕐᑕᓖᑦ ᐱᔭᕆᐊᑐᔫᓂᕐᓴᓂᒃ ᐱᓇᓱᐊᓚᐅᔪᒐᑦᑕ ᐊᓪᓚᓯᒪᔪᖏᑦᑕ ᐳᕐᑐᓂᓕᖏᑦ 3 ᒥᑦᓵᓃᑦᑐᓂᒃ. ᐊᓪᓚᓯᒪᔪᖏᑦᑕ ᐅᖃᐅᓯᖃᕐᕕᖏᑦ ᐊᑕᐅᓯᕐᑕᓖᑦ ᐱᔭᐅᒍᓐᓇᓯᐊᓚᐅᔪᑦ ᐃᓕᓐᓂᐊᑎᓄᑦ ᐳᕐᑐᓂᓕᒻᒦᑐᓄᑦ 5-ᒥ 6-ᒥᓪᓗ.
ᐊᓪᓚᓯᒪᔪᓕᐅᕆᐊᖃᕋᒥᒃ ᐃᓕᓐᓂᐊᑏᑦ ᐃᓕᓐᓂᐊᑎᑦᓯᔨᒥᓄᑦ ᐃᓕᓐᓂᐊᑎᑕᐅᑦᓯᐊᕆᐊᖃᖃᑦᑕᓚᐅᔪᑦ. ᐃᓕᓐᓂᐊᑏᑦ ᐊᓪᓚᓯᒪᔪᓕᐅᕆᐊᖃᖃᑦᑕᓚᐅᔪᑦ ᓯᓚᕐᔪᐊᒥᐅᓄᑦ ᐊᓪᓚᕕᖃᕆᐊᖃᕐᓱᑎᒃ ᐱᓇᓱᒐᖃᕐᓂᕃᔪᓂᒃ ᓄᓇᓕᒻᒥ. ᐃᓕᓐᓂᐊᑏᑦ ᐊᑦᔨᒌᒥ ᐃᑦᔭᕋᑦᓴᒥᒃ ᒪᓕᒐᖃᖃᑦᑕᓚᐅᔪᑦ ᐊᓪᓚᓯᒪᔪᓕᐅᕈᑎᓂᒃ.
ᐅᖃᑎᑕᐅᖃᑦᑕᓚᐅᔪᒻᒥᒐᒥᒃ ᐃᓕᓐᓂᐊᑏᑦ ᐅᖄᕕᖃᖕᖑᐊᑐᕐᑎᑐᑦ ᑎᒥᒻᒪᕆᐅᑉ ᐊᖓᔪᕐᖄᖓᓂᒃ ᐅᖄᑎᑕᐅᖃᑦᑕᓚᐅᔪᑦ. ᐃᓄᐃᑦ ᐊᒥᓱᑦ ᓯᕗᕌᓂ ᐅᖄᒋᐊᒥᒃ ᓯᕘᕋᒐᓗᐊᕐᓱᑎᒃ ᐃᓕᓐᓂᐊᑏᑦ ᐊᓂᒎᑎᑦᓯᐊᓚᐅᔪᒋᕗᑦ ᑲᔪᓯᑎᑦᓯᓯᐊᕐᓱᑎᒃ ᓱᒋᐊᓕᒻᒥᓂᒃ.
ᐱᓇᓱᐊᕐᓂᓕᒫᑦᑎᓂ, ᐃᓕᓐᓂᐊᑏᑦ ᐃᓕᑦᓯᕙᓪᓕᐊᓚᐅᔪᑦ ᐊᑦᔨᒌᖕᖏᑐᓂᒃ ᖃᐅᔨᒪᔭᐅᒋᐊᓕᓐᓂᒃ ᓴᕐᕿᓯᒪᔪᓕᐅᕐᓂᓗ ᖃᓄᐃᓘᕐᑕᐅᓗᓂ ᐱᓇᓱᐊᕐᑕᐅᒋᐊᖃᕐᓂᖓᓂᒃ ᒪᓕᒉᑦ ᒪᓕᑦᓱᒋᑦ.
ᐱᒍᓐᓇᓯᔭᐅᒋᐊᓕᓐᓄᑦ ᐃᓕᓐᓂᐊᓂᕐᒥᒃ ᒍᐃᒍᐃᑎᑐᑦ ᐃᓚᒋᔭᐅᑦᓱᓂ, ᓱᓕᔪᖕᖑᐊᓂᒃ ᐱᓇᓱᐊᕈᑎᖃᕐᓂᖅ ᐱᔭᕆᐊᑭᑦᑑᓚᐅᔪᕗᖅ ᐃᓕᓐᓂᐊᕈᑎᓕᕆᓂᒃᑯᑦ. ᐃᓅᑦᔪᓯᓕᕆᓂᕐᒥᒃ, ᑭᓯᑦᓯᒍᑎᓐᓂᐊᓂᕐᒥᒃ, ᑕᓯᐅᕐᓯᓂᒃᑯᑦ ᐃᓕᓐᓂᐊᑎᑦᓯᓂᕐᒥᒃ, ᑕᑯᒥᓇᕐᑐᓕᐅᕐᓂᒥᒃ, ᒍᐃᒍᐃᑎᑐᓪᓗ ᐃᓕᓐᓂᐊᕈᑏᑦ ᑲᒪᒋᖃᑦᑕᓚᐅᔪᔭᕗᑦ.