ᐅᑭᐅᕐᑕᑐᒧᑦ ᐱᑐᑦᓯᒪᓂᖅ
ᖃᓪᓗᓈᑎᑐᑦ ᐳᒃᑭᓂᕐᓴᒥ ᐃᓕᓐᓂᐊᑏᑦ ᓄᓇᕕᒻᒥ ᐊᓕᐊᓇᕐᑐᓂᒃ ᐊᑑᑎᖃᑦᑕᖁᑦ ᑕᒡᒐᓂ ᐊᕐᕌᒍᕐᒥ. ᓯᑎᐱᕆ 2009-ᒥᓂᑦ, ᐳᒃᑭᓂᕐᓴᒥ ᖃᓪᓗᓈᑎᑐᑦ ᐊᑕᐅᓰᑦ ᐃᓕᓐᓂᐊᖃᑎᒌᑦ ᓄᓇᓕᓐᓂᑦ ᐊᑐᓂᑦ ᐃᓚᐅᖃᐅᑕᕕᖃᖃᑦᑕᑐᑦ ᐃᓗᕐᖁᓯᕐᒨᓕᖓᔪᓂ ᐱᓇᓱᐊᕐᑕᐅᔪᓄᑦ ᑲᑦᓱᙰᑦᑎᑕᐅᓚᕿᑦᓱᑎᒃ ᐃᓗᕐᖁᓯᕐᒥᓂᒃ ᐃᓕᑦᓯᒋᐊᓪᓛᓂᕐᒧᑦ, ᓂᑦᔭᕉᑎᖃᕐᓂᒧᑦ ᐃᓱᒪᒋᔭᒥᓂᒃ, ᖃᐅᔨᕈᓐᓇᓯᑎᑕᐅᓚᖓᑦᓱᑎᓪᓗ ᓄᓇᕕᒻᒥᐅᖑᖃᑎᒥᓄᑦ ᐃᓕᓐᓂᐊᑎᓄᑦ ᐱᑐᑦᓯᒪᓂᖃᕐᓂᒥᓂᒃ.
ᓱᑲᑦᑐᐊᓗᒻᒥᒃ ᐊᕐᕌᒍᓕᒫᕐᒥ ᐱᓇᓱᐊᕐᑕᕗᑦ ᐱᔭᕇᕐᐸᓕᐊᓕᕐᑕᕗᑦ. ᒣ 31-ᒥᑦ ᔫᓂ 4, 2010-ᒧᑦ, ᐃᓕᓐᓂᐊᑏᓐᓂᒃ ᒪᕐᕉᓂᒃ ᐃᓕᓐᓂᐊᑎᑦᓯᔩᓐᓂᓗ ᒪᕐᕉᓂᒃ ᓄᓇᓕᓐᓂᑦ ᐊᑐᓂᑦ ᐱᓯᒪᔪᑦ ᐊᐅᐸᓗᓕᐊᓛᕐᑐᑦ ᓂᐱᓕᐅᕆᒋᐊᕐᑐᓗᑎᒃ ᓄᓇᕕᐅᑉ ᐱᓯᖓᓂᒃ. ᐊᐅᐸᓗᒻᒦᓂᕐᒥᓂ ᐃᓕᓐᓂᐊᑏᑦ ᐳᓛᕆᐊᕐᓯᒪᔪᑦ (ᐃᓚᐅᑎᓪᓗᒋᑦ ᐳᒃᑭᓂᕐᓴᒥ ᐃᓕᓐᓂᐊᑏᑦ) ᓂᕆᖃᑎᒌᖃᑦᑕᓛᕐᑐᑦ, ᑕᒡᒐᓂᑦᓭᓇᖅ ᓯᓂᖃᑦᑕᓗᑎᒃ, ᐱᖕᖑᑎᑦᓯᖃᑦᑕᓗᑎᒃ ᐱᖕᖑᐊᖃᑎᒌᖃᑦᑕᓗᑎᓪᓗ ᐊᑕᐅᑦᓯᑯᑦ ᐱᓇᓱᖃᑎᒌᓐᓂᖃᕐᓗᑎᒃ ᐊᓕᐊᓱᐊᓂᖃᕐᓗᑎᓪᓗ. ᓄᓇᕕᐅᑉ ᐱᓯᖓᓄᑦ ᐃᓚᒋᔭᐅᑎᓪᓗᒍ, ᓂᑦᔭᕈᑎᐅᔮᕈᒃ ᓂᐱᖁᑎᖃᓛᕐᒥᔪᖅ ᐃᓕᓐᓂᐊᑏᑦ ᐃᓄᐃᑦ ᐅᓂᒃᑳᖏᓐᓂᒃ ᐊᑐᐊᕐᓯᑎᓪᓗᒋᑦ ᐅᓂᒃᑳᓕᐊᕕᓂᕐᒥᓂᓘᓐᓃᑦ, ᐃᒥᐊᕇᒃᑯᑎᖃᕐᓗᑎᒃ ᓂᐱᖏᑦ ᐱᐅᔫᒐᔭᕐᒪᑕ ᐊᑐᓂᑦ. ᓂᕆᐅᓐᓇᖏᑦᑐᓂᒃ ᓂᐱᓕᐅᕐᓯᒪᔪᖃᑐᐃᓐᓇᕆᐊᖃᓛᕐᒥᔪᑦ… ᓈᓚᕋᓱᑦᓯᐊᕆᑦᓯ!
ᑖᓐᓇ ᓄᓇᓕᓕᒫᓂ ᐱᓇᓱᐊᕐᑕᐅᔪᖅ ᐊᑑᑎᔭᐅᕐᖃᔭᕋᔭᓚᐅᖕᖏᑐᖅ ᑮᓇᐅᔭᖃᕐᑎᑕᐅᖃᑦᑕᓂᖕᖏᑯᓂ. ᓇᑯᕐᒦᒪᕆᑦᑕᕗᑦ ᐃᓕᓐᓂᐊᓂᕐᒨᓕᖓᔪᓂᒃ ᓄᑖᓂᒃ ᐊᕐᖁᓯᐅᕐᓂᑯᑦ, ᐊᑦᑕᓇᖕᖏᓂᕐᓴᓂᒃ ᓄᓇᓕᖃᕐᓂᒧᑦ ᐱᓇᓱᐊᕐᑕᐅᔪᑦ, ᐱᐅᓂᕐᓴᒥᒃ ᓯᕗᓂᑦᓴᖃᕐᓂᒧᑦ ᐱᓇᓱᐊᕐᑕᐅᔪᑦ, ᓄᓇᓕᑐᙯᑦ ᐃᑲᔪᖃᑎᒌᑦᑐᑦ ᐃᓄᐃᑦ ᑲᑐᑦᔨᖃᑎᒌᓐᓂᖓ, ᐃᓄᐃᑦ ᖃᖓᑦᑕᔫᖏᑦ ᐅᑉᐱᕆᔭᖃᕐᓯᒪᓂᖏᓐᓄᑦ ᑖᑦᓱᒪ ᐃᓕᓐᓂᐊᓂᕐᒨᓕᖓᔫᑉ ᐃᓗᕐᖁᓯᓕᕆᓂᕐᒥ ᐱᓇᓱᐊᕐᑕᐅᔫᑉ ᓲᖑᔪᐊᓘᓂᖓᓂᒃ. ᐅᑉᐱᕆᔭᖃᕐᓂᓯ ᓄᓇᕕᒻᒥᐅᑦ ᐱᐊᕃᑦ ᖃᓄᐃᓘᕐᑎᐅᕈᓐᓇᓂᖏᓐᓂᒃ ᐱᐅᔪᓪᓚᕆᐊᓘᕗᖅ. ᓇᑯᕐᓴᓚᕆᕐᖁᖓ. ᐊᒻᒪᓗ ᓇᑯᕆᒻᒪᕆᒻᒥᔭᕗᑦ ᐃᓕᓐᓂᐊᕕᓐᓂ ᐊᐅᓚᑦᓯᓂᓕᕆᔩᑦ, ᐃᓕᓐᓂᐊᑎᑦᓯᔩᑦ ᐃᓚᐅᖃᑕᐅᖃᑦᑕᓚᐅᕐᑐᑦ, ᑎᐊᑉᕋ, ᐃᓕᓐᓂᐊᑎᐊᐲᓪᓗ ᐊᕐᕌᒍᓕᒫᕐᒥ ᐱᓇᓱᐊᒻᒪᕆᖃᑦᑕᓚᐅᕐᑐᑦ!
