ᐳᓛᕐᓱᖓ ᐊᕐᓴᓂᖅ ᐃᓕᓐᓂᐊᕕᒻᒥ 2021-ᒥ, ᑕᑯᒍᒪᓚᐅᕐᓯᒪᔪᖓ ᐊᑯᓂ ᐃᓕᓐᓂᐊᑎᑦᓯᓕᓂᐅᓕᕐᑐᒥᒃ ᖃᓇ ᐃᕐᓂᒥᒃ. ᑌᑦᓱᒪᓂ, ᐃᓱᒪᖃᓕᓚᐅᕐᓯᒪᔪᖅ ᐱᓇᓱᒍᓐᓀᕈᒫᕐᓂᒥᓂᒃ, ᐃᓕᓐᓂᐊᑎᑦᓯᕕᐅᑉ ᐃᓗᐊᓃᒋᐊᒥᒃ ᐊᓕᐊᓪᓚᕆᖏᓐᓇᓱᓂ. ᐊᕐᕌᒍᐃᑦ ᓯᑕᒪᑦ ᓈᑎᓪᓗᒋᑦ, ᓱᓕ ᑲᔪᓯᑦᓯᐊᓱᓂ ᑲᒃᓱᙰᓕᓐᓇᓱᓂᓗ ᓄᐃᑕᖏᓇᑐᖅ ᐊᕐᓴᓂᖅ ᐃᓕᓐᓂᐊᕕᒻᒥ.

ᖃᓇ ᐃᕐᓂᐅᑉ ᐃᓕᓐᓂᐊᑎᑦᓯᔨᐅᓂᖓ ᐱᒋᐊᑲᓪᓚᓯᒪᔪᖅ ᐃᓛᓂᐅᔮᖕᖏᑐᖅ 1990-ᒥ, ᐃᓇᖐᒪᖁᔭᐅᒍᑖᓂ ᐱᓇᓱᐊᕈᓯᕐᒥᒃ ᐊᑕᐅᓯᕐᒥᒃ ᐱᓇᓱᓪᓗᓂ. ᑌᑲᓂ ᐱᓇᓱᐊᕈᓯᕐᒥ ᐱᓇᓱᓐᓂᖓ ᐃᓅᓯᓕᒫᖅ ᐱᓇᓱᒐᖕᖑᓯᖏᓐᓇᓯᒪᔪᖅ. “ᐃᓕᓐᓂᐊᑎᑦᓯᓂᕐᒥᒃ ᐆᑦᑐᕈᒪᓚᐅᕐᓯᒪᔪᖓ, ᐊᓕᐊᒋᒻᒪᖔᒃᑯ ᖃᐅᔨᒍᒪᒧᑦ. ᐊᒻᒪᓗ ᑕᒐᐅᕗᖓ ᐅᓪᓗᒥ, ᐊᕐᕌᒍᐃᑦ 32 ᐊᓂᒍᕐᓯᒪᓕᕐᓱᒋᑦ!” ᑌᒣᓕᔪᖅ ᐃᔪᓯᑦᓱᓂ, ᐃᓱᒪᑦᓱᓂ ᐊᕐᖁᑎᕕᓂᕐᒥᓂᒃ.

ᓯᕗᓪᓕᒥᒃ ᐋᓐᓂᓯᐊᕐᑎᐅᓗᓂ ᐱᓇᓱᒐᔭᕆᐊᒥᒃ ᐃᓱᒪᓚᐅᕐᓯᒪᔪᖅ, ᖃᐅᔨᑦᓴᐅᑎᒋᓚᖓᑦᓱᓂ ᑕᒪᑐᒪ ᐃᒻᒥᓄᑦ ᓈᒻᒪᓯᐊᖕᖏᓂᖓᓂᒃ. ᓂᐅᕕᕐᕕᓂ ᐊᓪᓚᕕᓐᓂᓗ ᐱᓇᓱᖃᑦᑕᓯᒪᓕᕐᓱᓂ, ᐃᓕᓐᓂᐊᑎᑦᓯᓂᕐᒧᑦ ᓄᑦᓱᑕᐅᓂᕐᒥᓂᒃ ᐃᑉᐱᒍᓱᓕᕐᑐᕕᓂᖅ—ᑐᑭᑖᕐᓱᓂ ᓴᓇᓚᖓᓕᕐᑐᒥᒃ ᐃᓅᓯᖓᓂᒃ ᓄᓇᓕᖓᓂᓪᓗ.

ᐊᕐᕌᒍᐃᑦ ᐊᓂᒍᕐᐸᓕᐊᖓᓂᖏᓐᓂ, ᖃᓈ ᐃᓕᓐᓂᐊᑎᑦᓯᓯᒪᔪᖅ ᐃᓕᓐᓂᐊᕆᐅᕐᑐᓂᒃ ᐳᕐᑐᓂᕐᒧᑦ 4-ᒧᑦ ᑎᑭᑦᓱᒍ, ᑌᒪᖕᖓᑦ ᓄᓇᑐᖃᒥᓂ ᑲᖏᕐᓱᔪᐊᒦᑦᓱᓂ. ᐃᓕᓐᓂᐊᓂᕐᒥᒃ ᑲᑦᓱᙰᒍᑎᖃᕐᓂᖓ ᑐᕌᕈᑎᒋᓯᒪᖓ ᐱᔪᓐᓇᐅᑎᓪᓚᕆᓐᓂᒃ ᐱᒐᓱᐊᕐᓂᒧᑦ, ᐱᓚᕿᐅᑎᒋᑦᓱᒍ ᒪᑭᓪ ᐱᔪᓐᓇᐅᑎᑖᕐᑎᓯᒍᑎᖓᓂᒃ ᐃᓕᓐᓂᐊᑎᑦᓯᓂᕐᒥᒃ – ᓄᓇᖃᕐᖄᓯᒪᔪᓂ ᐊᒻᒪᓗ ᐃᓄᓐᓂ 1999-ᖑᑎᓪᓗᒍ, ᑭᖑᓪᓕᖃᕐᒥᑎᓪᓗᒍ ᐃᒻᒥᓂᕿᒍᓐᓇᐅᑎᒥᒃ ᐃᓕᓐᓂᐊᑎᑦᓯᓂᕐᒥᒃ ᐃᓕᑦᓯᒪᐅᑎᒻᒪᕆᒻᒥᒃ 2019-ᒥ. ᑖᒃᑯᐊ ᐃᓕᓐᓂᐊᕈᑏᑦ ᐱᕙᓪᓕᕈᑕᐅᓯᒪᑐᐃᓐᓇᖏᑦᑐᑦ ᐃᓕᓐᓂᐊᑎᑦᓯᓂᒃᑯᑦ ᐱᓯᑎᐅᓂᖓᓄᑦ ᓱᕐᕃᓯᒪᓪᓚᕆᒻᒥᒐᒥᒃ ᓇᒻᒥᓂᖅ ᐃᓅᓯᖓᓂᒃ.

ᖃᓇᐅᑉ ᐊᓕᐊᓐᓂᖓ ᑭᓯᑦᓯᑎᓕᕆᓂᕐᒥᒃ ᐃᓱᐊᕈᑎᒋᑦᓴᐅᑎᒋᓯᒪᔭᖓ ᐃᓕᓐᓂᐊᑎᑦᓯᓂᕐᒧᑦ ᐊᒻᒪᓗ ᐱᕙᓪᓕᐊᓂᕐᒧᑦ ᑭᓯᑦᓯᑎᓐᓂᐊᓂᕐᒥᒃ ᐃᓕᓐᓂᐊᕈᑎᓂᒃ ᐃᓕᓐᓂᐊᑎᑦᓯᔨᐅᖃᑎᖏᓐᓄᑦ ᓇᓂᑐᐃᓐᓇᖅ ᓄᓇᕕᒻᒥ. ᐱᓇᓱᖃᑕᐅᓯᒪᔪᖅ ᒪᑭᓪᒥ ᐃᓱᒪᓕᐅᕐᑎᓄᑦ ᐊᒻᒪᓗ ᐃᑲᔪᕐᓯᓯᒪᑦᓱᓂ ᐱᖕᖑᐃᓂᕐᒥᒃ ᐃᓗᕐᖁᓯᕐᒧᑦ ᒥᑦᓯᓕᓐᓂᒃ ᐃᓕᓐᓂᐊᑎᑦᓯᒍᑎᑦᓴᓂᒃ, ᓱᕐᖁᐃᕈᑕᐅᑎᓪᓗᒍ ᐅᖃᐅᓯᐅᑉ ᐊᒻᒪᓗ ᐃᓱᒪᒍᓰᑦ ᓄᐃᑕᑦᓯᓂᖓᓂᒃ ᐱᐅᓯᓪᓚᕆᓐᓂᒃ ᓄᓇᓕᖓᓂ. “ᓴᓇᖃᑦᑕᓯᒪᔪᖓ ᐊᒥᓱᓂᒃ ᐃᓕᓐᓂᐊᕈᑎᑦᓴᓂᒃ …. ᐅᖃᐅᓰᑦ ᐃᓚᖏᑦ ᓈᒻᒪᓯᓕᑎᕆᐊᖃᖃᑦᓯᒪᒻᒥᔪᑦ, ᑌᒣᒻᒪᓗ ᐱᓇᓱᖃᑎᖃᕐᓯᒪᑦᓱᖓ ᐊᓯᑲᓂᒃ ᐃᓕᓐᓂᐊᑎᑦᓯᓕᓂᕐᓂᒃ ᓱᕐᖁᐃᕆᐊᕐᓱᑕ ᐃᓕᓐᓂᐊᕈᑏᑦ ᐊᑐᕐᑕᑕ ᒪᓕᑦᓯᐊᓂᖓᓂᒃ ᖃᓄᖅ ᓱᓇᑐᐃᓐᓇᓂᒃ ᐊᑎᖃᕐᑎᓯᒍᑎᑦᑎᓂᒃ ᑕᒫᓂ.”

ᐅᓂᒃᑳᑐᐊᕐᓂᖅ ᑐᖕᖓᕕᓪᓚᕆᐅᒻᒥᔪᖅ ᖃᓇᐅᑉ ᐃᓕᓐᓂᐊᑎᑦᓯᓂᒃᑯᑦ ᐃᓱᒪᒍᓯᖓᓄᑦ. ᐊᑐᕐᓱᓂ ᓱᓇᑐᐃᓐᓇᓕᒻᒥᒃ  ᐅᖃᐅᓯᒃᑯᑦ ᐱᐅᓯᑐᖃᕐᒥᒃ ᐁᑦᑑᓯᐊᕆᓯᒪᔭᒥᓂᒃ ᐊᓈᓇᒥᓂᒃ ᐊᑦᓴᒥᓂᓪᓗ, ᐊᑐᓲᖅ ᐅᓂᒃᑳᓂᒃ ᐃᓕᓐᓂᐊᑎᓂᒃ ᓄᓱᑦᓯᒍᑎᒋᑦᓱᒋᑦ ᐱᑎᑦᓯᒍᑎᒋᑦᓱᒋᓪᓗ ᐃᓅᓯᕐᒥ ᐃᓕᑦᓯᒍᑎᓂᒃ. “ᐅᓂᒃᑳᑐᐊᑦ ᐊᑐᕐᑐᒪᕆᐅᕗᑦ, ᒪᓕᑦᑎᖃᕋᒥᒃ ᐃᓕᓐᓂᐊᑎᑦᓯᒍᑎᓂᒃ ᐃᓅᓯᐅᑉ ᒥᑦᓵᓄᑦ… ᐅᕙᓐᓄᓕ, ᖃᖓᑐᐃᓐᓇᖅ ᓇᓗᓇᕐᑐᓕᕆᓕᑐᐊᕋᒪ, ᐃᕐᖃᐅᒪᓲᖑᒐᒪ ᐅᓂᒃᑳᓂᒃ ᐊᓈᓇᒻᒪ ᐊᑦᓴᒪᓘᓐᓃᑦ ᐅᕙᓐᓄᑦ ᐅᓂᒃᑳᓯᒪᔭᖏᓐᓂᒃ, ᑕᒪᓐᓇᓗ ᐃᑲᔪᓲᖑᒻᒪᑦ ᑐᑭᑖᕋᓱᐊᕐᓂᕋᓂᒃ  ᓱᓇᐊᕐᒪᖔᕐᒪ.”

ᐅᓪᓗᒥ, ᐱᓇᓱᒍᓐᓀᕋᔭᕐᓂᒥᓂᒃ ᐃᓱᒪᓕᕋᓗᐊᕐᓱᓂ ᐃᓕᓐᓂᐊᑎᑦᓯᖏᓐᓇᓴᕐᓂᒥᓂ, ᖃᓈ ᓵᖕᖓᓯᖏᓐᓇᑐᖅ ᐃᓱᒻᒪᓭᓂᕐᒥᒃ ᑭᖑᕚᖑᓕᕐᒥᔪᓂᒃ. ᐃᓕᓐᓂᐊᑎᕕᓂᖏᑦᑕ ᐃᓚᖏᑦ ᐃᓕᓐᓂᐊᑎᑦᓯᔨᖕᖑᓕᕐᒥᔪᑦ ᐃᒻᒥᒍᑦ. “ᐃᓛ, ᐃᓕᓐᓂᐊᑎᑦᔨᐅᓂᕐᒥᒃ ᐃᓕᓐᓂᐊᑎᒥᒃ ᐱᒋᐊᖃᓕᕋᔭᕐᑐᖓ. ᐱᐅᔫᒐᔭᕐᑐᖅ  ᐁᑦᑑᑎᖃᕈᓐᓇᕈᒪ ᖃᐅᔨᒪᔭᒃᑲᓂᒃ ᐃᓕᓐᓂᐊᑎᓯᔨᒧᑦ ᐃᓅᓱᓐᓂᓴᒧᑦ,” ᑌᒫᒃ ᐃᓱᒣᔭᕐᑐᖅ.

ᐃᓕᓐᓂᐊᑎᑦᓯᕕᐅᑉ ᓯᓚᑖᓂ, ᖄᓇ ᐊᓕᐊᓲᖅ ᐅᐃᒥᓂᒃ ᐊᖁᐃᒪᖃᑎᖃᖕᖑᐊᓂᕐᒥᒃ ᐊᑯᓕᕕᒻᒥ. ᑖᕙᓂ, ᑕᙯᕐᓯᓲᒃ ᐅᖃᓕᒪᐅᑎᓂᒃ ᖃᕆᑕᐅᔭᓂᓪᓗ ᐱᑕᖃᖕᖏᑐᒥ, ᐊᕙᑎᒥᐅᑕᖃᕐᓱᑎᒃ ᓄᓇᒥᐅᑕᕐᓂᒃ ᑭᓯᐊᓂ. ᓯᕗᓂᕐᒥᓄᑦ ᐸᕐᓇᕈᑎᖏᑦ ᐱᒻᒪᕆᒐᓱᐊᑦᔭᖏᑦᑐᑦ: “ᐊᓂᕐᕋᓯᒪᑐᐃᓐᓇᓗᖓ, ᓱᓕᑦᓱᖓ, ᐊᕐᕌᒍᐃᑦ 30 ᐅᖓᑖᓄᑦ ᐱᓇᓱᖏᓐᓇᓕᒫᑦᓯᐊᕋᒪ, ᐊᓂᕐᕋᓯᒪᑐᐃᓐᓇᕈᒪᕗᖓ, ᐊᐅᓛᓯᒪᖃᑦᑕᓗᖓᓗ ᐊᒻᒪᓗ ᑕᙯᕐᓯᓯᐊᕐᑐᐃᓐᓇᓗᖓ.”

ᖃᓇ ᐃᕐᓂᐅᑉ ᐅᓂᒃᑳᖓ ᑕᒪᓐᓇᐅᕗᖅ ᑲᑦᓱᙰᓐᓂᖅ, ᓴᑐᕆᐊᕐᑕᓂᖅ, ᐊᒻᒪᓗ ᖃᒨᓇᒻᒪᕆᒃ ᐃᓗᕐᖁᓯᕐᒧᑦ ᐱᑐᑦᓯᒪᓂᖅ. ᒫᓐᓇᓯᐅᑎᑐᐃᓐᓇᐅᓱᓂ ᐊᑐᕐᓂᕆᒋᐊᓚᐅᕐᓯᒪᔭᖓ ᓴᖑᓯᒪᔪᖅ ᐊᑯᓂᕆᓂᐊᕐᑐᒥᒃ ᐃᑲᔪᕐᓯᒍᑎᑕᐅᓂᕐᒧᑦ ᓄᓇᓕᖓᑕ ᓯᕗᓂᑦᓴᖓᓂᒃ.

ᖃᓇᐅᑉ ᐅᓂᒃᑳᖓᓄᑦ ᐱᔪᑦᓴᐅᔮᓕᕐᑎᑕᐅᕕᑦ? ᐱᓇᓱᑦᑎᓯᐅᕐᐳᒍᑦ! ᐱᓇᓱᑦᑎᑎᓐᓄᑦ ᐃᓚᐅᒋᑦ.
ᐱᔪᒪᐅᑎᓕᐅᕐᓗᑎᑦ ᐅᕙᓂ  ➔