ᐊᕙᑎᑦ ᒪᕐᕉᒃ ᖁᓕᓪᓗ ᐊᕐᕌᒍᐃᑦ ᐊᓂᒍᕐᑐᑦ, ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᖅ (JBNQA) ᑕᕐᓯᕈᑕᐅᓚᐅᕐᓯᒪᑎᓪᓗᒍ ᓴᖑᓂᓪᓚᕆᒻᒧᑦ ᐃᓄᐃᑦ ᐊᒻᒪᓗ ᑯᔩ ᐃᓄᖏᓐᓄᑦ ᑯᐯᒻᒥᐅᓄᑦ. ᑖᓐᓇ ᑕᕐᓯᕆᐅᕈᑕᐅᓯᒪᔪᖅ ᐊᖏᖃᑎᒌᓐᓂᖅ ᓄᐃᑦᓯᓯᒪᔪᖅ ᓯᕗᓪᓕᐹᑦᓯᐊᒥᒃ ᑲᕙᒣᑦ ᐃᓕᑕᕐᓯᒍᑎᖓᓂᒃ ᓄᓇᑦᑎᓂ ᐱᔪᓐᓇᓂᖃᕈᑎᑦᑎᓂᒃ, ᖃᓄᕐᓗ ᐃᓅᓯᖃᕐᓂᑎᓐᓂᒃ, ᐊᒻᒪᓗ ᐃᒻᒥᓂᒃ ᑐᑭᑖᕆᐅᕐᓂᐅᓂᑦᑎᓂᒃ ᐅᕙᑦᑐᓅᓕᖓᔪᓂᒃ. ᐃᓕᓐᓂᐊᓂᐅᑉ ᑐᑭᐊᒍᑦ, ᐊᕐᖁᓯᐅᕐᓯᒪᔪᖅ ᐃᓕᓐᓂᐊᕕᖃᕐᓂᓴᒥᒃ ᓴᓇᔭᐅᒪᔪᒥᒃ ᑕᕐᕋᒥ ᓄᓇᓕᓐᓄᑦ ᐃᒻᒥᓂᒃ ᑭᒡᒐᑑᑎᒋᑦᓱᒍ, ᒪᖑᓯᒪᑦᓯᐊᑎᓪᓗᒋᑦ ᐃᓗᕐᖁᓯᕐᒥᒍᑦ ᐅᖃᐅᓯᕐᒥᒍᓪᓗ ᐱᐅᓯᓪᓚᕆᖓᓄᑦ.

ᑌᒣᓕᖓᑎᓪᓗᒍ ᑲᑎᕕᒃ ᐃᓕᓴᕐᓂᓕᕆᓂᖅ ᐱᖕᖑᓯᒪᔪᖅ 1975-ᒥ—ᓯᕗᓪᓕᐸᐅᖃᑕᐅᓯᒪᔪᖅ ᐃᓕᓐᓂᐊᓂᓕᕆᔩᑦ ᑎᒥᖏᓐᓄᑦ ᑳᓇᑕᒥ ᓄᐃᑕᐅᔪᓄᑦ ᓄᑖᒧᑦ ᓄᓇᖃᕐᓂᒧᑦ ᐊᖏᖃᑎᒌᒍᑎᒧᑦ.

ᐅᓪᓗᒥ ᓱᓕ, ᑖᓐᓇ ᐊᖏᖃᑎᒌᓐᓂᖅ ᐆᒪᖏᓐᓇᐳᖅ ᖃᐅᑕᒫᕐᓯᐅᑎᓂᒃᐱᓇᓱᓐᓂᑎᒍᑦ. ᐊᑐᓂ ᐱᓂᐊᕈᑎ, ᐊᑐᓂ ᐱᓇᓱᐊᑦᓴᖅ, ᐊᒻᒪᓗ ᐊᑐᓂ ᐃᓕᓐᓂᐊᓂᕐᒨᓕᖓᔪᖅ ᑐᑭᑖᕗᑦ ᑕᑯᑦᓴᕈᐃᕗᖅ ᑲᑦᓱᙰᒍᑎᖃᕐᓂᑎᓐᓂᒃ ᑌᑦᓱᒥᖓ ᐱᖕᖑᑕᐅᒍᑎᒋᓯᒪᑦᓱᒍ ᐅᖃᕐᓯᒪᐅᑎᒥᒃ. ᐃᒣᑦᑐᖅ, ᐱᒋᐊᑐᔪᐃᑦ ᐊᒻᒪᓗ ᖃᓄᐃᓕᖓᓂᐅᓕᕐᑐᑦ ᐊᓯᖕᖑᐸᓪᓕᐊᓯᒪᒐᓗᐊᕐᑎᓗᒋᑦ, JBNQA ᐆᒻᒪᖓ—ᐃᒻᒥᓂᕿᓂᖅ, ᐃᑲᔪᕐᑎᒌᖑᓂᖅ, ᐊᒻᒪᓗ ᐃᓄᐃᑦ ᖃᐅᔨᒪᐅᓯᖓᑕ ᑐᓂᓂᖓ—ᓱᓕ ᐅᕙᑦᑎᓂᒃ ᑕᓯᐅᖏᓐᓇᐳᖅ ᑕᒪᑦᑕ ᐊᕐᖁᑎᑦᑎᓂ.

ᓲᖑᔪᒥᒃ ᕿᒻᒪᖁᓯᕐᓯᒪᔪᖅ: ᐃᓕᓐᓂᐊᓂᖅ ᑕᑯᒍᑎᑦᓴᐅᕗᖅ ᐱᒻᒪᕆᖁᑎᑦᑎᓂᒃ

JBNQA ᑐᑭᓯᓐᓇᓯᐊᕐᓱᓂ ᐅᖃᕐᓯᒪᔪᖅ ᐃᓄᐃᑦ ᐱᔪᓐᓇᓂᖓᓂᒃ ᐱᑎᑕᐅᓂᕐᒥᒃ ᐃᓕᓐᓂᐊᓂᕐᒥᒃ ᓲᓱᑦᓴᑐᒥᒃ ᐃᓗᕐᖁᓯᖓᓐᓂᒃ, ᐅᖃᐅᓯᖓᓐᓂᒃ ᐊᒻᒪᓗ ᐱᒻᒪᕆᖁᑎᖏᓐᓂᒃ. ᐊᕐᕌᒍᐃᑦ ᐊᕙᑎᑦ ᒪᕐᕉᒃ ᖁᓕᓪᓗ ᐊᓂᒍᕐᑎᓗᒋᑦ, ᑖᓐᓇ ᐅᖃᕐᑕᐅᓯᒪᔪᖅ ᓄᐃᒍᑎᖃᕐᓯᒪᔪᖅ ᓱᓇᒥᑦᓯᐊᑐᒥᒃ ᐃᓕᓐᓂᐊᕕᖃᕐᓂᒥᒃ ᓄᓇᕕᒻᒥ ᐃᓗᕐᖁᓯᐅᑉ ᐅᖃᐅᓯᐅᓪᓗ ᑲᔪᓯᑦᓭᓇᕐᓂᖓᑕ ᐃᓕᓐᓂᐊᑎ ᕿᑎᖓᓃᑦᑎᓗᒍ.

ᐱᐊᕌᐱᐅᓂᕐᒥᒃ ᐱᒋᐊᕐᓱᑎᒃ ᐃᓄᒃᑎᑐᑦ ᐃᓕᓐᓂᐊᓱᑎᒃ ᑎᑭᑦᓱᒍ ᐃᓄᒻᒪᕇᑦ ᐃᓕᓐᓂᐊᕈᑎᖏᓐᓄᑦ ᑐᖕᖓᕕᓕᓐᓄᑦ ᓄᓇᓕᐅᑉ ᐃᓗᐊᓂ ᐃᓅᓯᕐᒥᒃ, ᐊᑐᓂ ᐱᒋᐊᕈᑕᐅᔪᖅ  ᓱᕐᖁᐃᕈᑕᐅᒐᓱᐊᕐᑐᖅ ᐃᓕᓐᓂᐊᑏᑦ ᐃᓕᓐᓂᐊᕈᓐᓇᓂᖓᓂᒃ ᑭᓇᐅᓂᕐᒥᓂᒃ ᖁᔭᓈᕐᓂᖅ ᑭᓯᐅᓂᐅᒍᓐᓀᑎᓪᓗᒍ.

ᓯᕗᒧᐊᑦᑏᑦ 2025-2030-ᒧᑦ ᓯᕗᓂᓕᐅᕐᓯᒪᐅᑎᓂᒃ ᐸᕐᓇᓯᒪᐅᑎᕗᑦ ᑕᒪᑐᒥᖓ ᑕᐅᑐᒐᕐᒥᒃ ᓇᑦᓴᐳᖅ ᓯᕗᓂᕐᒧᑦ. ᐱᕙᓪᓕᐊᔭᐅᓯᒪᔪᖅ ᓱᑌᔭᕐᑐᒪᕆᒻᒥᒃ ᓄᓇᓕᓐᓂᒃ ᐃᓱᒪᑦᓴᓯᐅᕈᑕᐅᓚᐅᕐᓱᓂ, ᓵᖕᖓᓯᔪᖅ ᐱᖓᓱᐃᓂᒃ ᐱᑕᖃᕆᐊᖃᓪᓚᕆᑦᑐᓂᒃ ᓇᐸᒍᑎᓂᒃ: ᑭᓇᐅᓂᖅ, ᐅᖃᐅᓯᖅ ᐊᒻᒪᓗ ᖃᓄᐃᖕᖏᓯᐊᕐᓂᖅ. ᑖᒃᑯᐊ ᑯᒻᒪᓇᕐᓂᐹᑦ ᐃᕐᖃᐅᒪᒍᑎᒋᕙᕗᑦ ᐃᓕᓐᓂᐊᕈᑎᑎᒍᑦ ᐱᑦᓯᐊᓂᐅᑉ ᐲᕐᕕᖃᖕᖏᓂᖓᓂᒃ ᐃᓗᕐᖁᓯᐅᑉ ᑲᔪᓯᑦᓯᐊᓂᖓᓂᒃ ᐊᒻᒪᓗ ᐃᓚᒋᔭᐅᒋᐊᒥᒃ ᐃᑉᐱᒍᓱᐊᓂᕐᒥᒃ. ᐅᖃᕐᒥᔪᑦ ᑕᒣᓐᓄᑦ ᐱᔪᒪᔭᐅᔪᒥᒃ ᐊᑕᐅᑦᓯᑯᑦ ᓯᕗᒧᐊᑦᓯᐊᓂᕐᒥᒃ, ᒪᓕᓪᓗᓂ ᐃᓱᒪᐅᓯᒪᔪᓂᒃ JBNQA-ᒥᒃ ᐱᕕᖃᕐᑎᓯᓚᐅᕐᓯᒪᔪᓂᒃ: ᐃᓕᓐᓂᐊᓂᖅ ᐋᕐᕿᓱᕐᑕᐅᓯᒪᔪᖅ ᓄᓇᕕᒻᒥᐅᓄᑦ ᐋᕐᕿᓲᑦᔨᒍᑕᐅᑦᓱᓂ ᓄᓇᕕᒻᒥᐅᓂᒃ.

ᐊᕐᖁᓯᐅᕐᑏᑦ: ᐃᓱᒪᒋᐊᑦᓯᐊᓂᖅ ᐃᓕᓐᓂᐊᕈᑎᑦᑎᓂᒃ ᓲᖑᓯᓕᑎᕆᓗᓂ ᐃᒻᒥᓂᕿᒍᓐᓇᓂᕐᒥᒃ

ᐱᒻᒪᕆᓐᓂᒃ ᐱᓇᓱᐊᕈᑕᐅᓕᕐᑐᓄᑦ ᐃᓚᐅᑦᓱᑎᒃ, ᐊᕐᖁᓯᐅᕐᑏᑦ ᑲᑎᒪᔨᐊᐲᑦ ᐊᑐᕐᑐᒪᕆᒻᒥᒃ ᑲᒪᒍᑎᖃᕐᖁᑦ. ᒪᑭᑕᐅᓯᒪᔪᑦ ᐃᓱᒪᓕᐅᕆᐊᑦᓯᐊᑐᑦᓴᐅᓱᑎᒃ ᓄᓇᕕᒻᒥ ᐃᓕᓐᓂᐊᕈᑎᓂᒃ ᐊᒻᒪᓗ ᓄᑕᐅᓯᓕᑎᕆᓗᑎᒃ ᓄᓇᖓᑕ ᒪᓕᒐᖓᓂᒃ ᐃᓕᖓᔪᒥᒃ ᐃᓕᓐᓂᐊᑎᑦᓯᓂᐅᑉ ᐅᖃᐅᓯᖓᓄᑦ. ᐱᒋᐊᓚᕿᑎᑕᐅᓯᒪᔪᑦ ᖃᒧᐅᓕᔪᒥᒃ ᕿᒥᕐᕈᓚᕆᓐᓂᒧᑦ ᐃᓕᓐᓂᐊᕈᑏᑦ ᐃᓗᓕᖏᓐᓂᒃ ᐊᒻᒪᓗ ᐃᓕᓐᓂᐊᑎᑦᓯᒍᓯᕐᓂᒃ, ᑖᒃᑯᐊ ᑲᑎᒪᔨᐊᐲᑦ ᑲᑎᕐᓱᐃᒍᑕᐅᓯᒪᔪᑦ ᐃᓱᒪᓕᐅᕐᑎᓂᒃ, ᐃᓕᓐᓂᐊᑎᑦᓯᔨᓂᒃ ᐊᒻᒪᓗ ᖃᐅᔨᒪᔨᒻᒪᕆᓐᓂᒃ. ᑲᑐᑦᔨᓱᑎᒃ, ᐱᓇᓱᑦᑐᑦ ᑐᑭᓯᓐᓇᑎᑦᓯᒋᐊᕐᓂᒥᒃ ᐃᓕᓐᓂᐊᑏᑦ ᐱᔭᖃᕐᓂᖓᓄᑦ ᐊᕐᖁᑎᑦᓴᓂᒃ, ᐋᕐᕿᒋᐊᕐᑎᓯᑦᓱᑎᓪᓗ ᖃᓄᖅ ᓯᕿᕐᖑᔭᒃᑯᑦ ᐃᓕᓐᓂᐊᑎᑦᕕᑦᓴᖃᕐᓂᐅᑉ ᐊᒡᒍᓯᒪᓂᖓᓂᒃ, ᐊᒻᒪᓗ ᐱᕙᓪᓕᐊᓱᑎᒃ ᑐᑭᖃᑦᓯᐊᑐᒥᒃ ᐅᖃᐅᓯᕐᓂᒃ ᐊᒥᓱᐃᓂᒃ ᐊᑐᕐᓱᓂ ᐃᓕᓐᓂᐊᑎᑦᓯᒍᓯᕐᒥᒃ.

ᑕᒪᓐᓇ ᐱᓇᓱᓐᓂᖓᑦ ᖄᖏᐅᑎᔪᒻᒪᕆᐅᕗᖅ ᐱᓪᓗᑯᑦᑐᓕᕆᑐᐃᓐᓇᑐᓂᒃ ᐋᕐᕿᓱᐃᒋᐊᓪᓚᑖᓂᕐᒥᒃ. ᐊᑕᖏᕐᑐᓄᑦ ᐊᑐᕐᓂᐅᒐᒥ ᐃᒻᒥᓄᑦ-ᑐᑭᑖᕐᑎᐅᓂᕐᒥᒃ — ᐊᕐᖁᑕᐅᑦᓱᓂ ᕿᒥᕐᕈᓂᕐᒧᑦ ᓱᓇᒥᒃ ᐃᓕᓐᓂᐊᑎᑦᓯᒪᖔᑦᑕ, ᖃᓄᕐᓗ ᐃᓕᓐᓂᐊᑎᑦᓯᒪᖔᑦᑕ, ᐊᒻᒪᓗ ᓱᒧᑦ. ᑌᒣᓘᕐᓂᐅᑉ ᐊᑐᕐᖂᑕᕐᓂᖓ ᐊᑦᑐᐊᕗᖅ ᐱᕙᓪᓕᐊᓂᕐᒧᑦ ᓄᑖᒥᒃ ᐃᓕᓐᓂᐊᓂᕐᒧᑦ ᐃᓂᓪᓚᖓᐅᑎᑦᓴᒥᒃ ᓄᓇᕕᒻᒨᓕᖓᑎᓪᓗᒍ, ᑐᖕᖓᓗᓂ ᐃᓄᐃᑦ ᑕᐅᑐᒍᑎᖓᓄᑦ ᖃᐅᔨᒪᐅᓯᕐᒥᒃ ᐊᒻᒪᓗ ᐱᒃᑲᑐᖕᖏᒍᑎᓂᒃ. ᑕᒪᓐᓇ ᐃᓗᐃᑦᑐᐊᑐᖅ  ᒥᑦᓯᖃᓪᓚᕆᑦᓱᓂᓗ ᐱᓇᓱᓐᓂᖅ ᑐᖕᖓᕕᓕᐅᓚᖓᔪᖅ ᓯᕗᓂᕐᒥ ᐃᓕᓐᓂᐊᓂᕐᒥᒃ ᐱᓂᐊᕈᑕᐅᖃᑦᑕᓛᕐᑐᓄᑦ ᐃᓕᓐᓂᐊᕕᑦᑕ ᐃᓗᐊᓂ.

ᑐᕌᕐᓂᖓ ᐃᓕᖓᔪᖅ ᓱᕐᖁᐃᓂᕐᒧᑦ ᐃᓕᓐᓂᐊᑏᑦ ᐃᓕᓐᓂᐊᓂᖓᓂᒃ ᓇᔪᒐᖃᕐᓗᑎᒃ ᐃᓄᒃᑎᑑᑦ, ᐅᐃᒍᑎᑐᑦ ᐊᒻᒪᓗ ᖃᓪᓈᑎᑐᑦ ᐅᖃᐅᓰᑦ ᓄᐃᑕᖃᑎᒌᕝᕕᖓᓂᒃ ᐃᓱᐃᓪᓕᖓᐅᑎᒐᑎᒃ, ᐃᓄᐃᑦ ᖃᐅᔨᒪᐅᓯᖓ ᑕᖏᕐᒥᐅᑕᐅᖏᓐᓇᓕᒫᕐᑎᓗᒍ. ᑕᒪᓐᓇ ᐋᕐᕿᓱᕆᐊᑦᓯᐊᓂᖅ ᓴᓇᔭᐅᕗᖅ ᑕᕐᕋᒥ, ᓴᓇᒻᒪᓕᐅᕐᑎᓗᒋᑦ ᐱᒋᐊᓕᒻᒥᓂᒃ ᐅᖃᕈᑕᐅᓯᒪᔪᑦ ᓄᓇᓕᓐᓄᑦ, ᐃᓕᓐᓂᐊᑎᑦᓯᕕᓐᓂ ᐱᐅᓯᐅᓪᓚᕆᑦᑐᑦ, ᐊᒻᒪᓗ ᑕᒪᑦᑎᒍᑦ ᐱᔪᒪᔭᕗᑦ ᐃᓱᒪᑦᓱᑕ ᑭᖑᕚᖑᓛᕐᑐᓂᒃ.

ᑐᕌᕐᓂᖅ ᐳᕐᑐᓂᕐᓭᑦ ᕿᖑᓂᐊᒍᑦ ᐃᓕᓐᓂᐊᕕᒻᒪᕆᒻᒧᑦ ᓄᓇᕕᒻᒥ

ᐊᓯᐊᑦᑕᐅᖅ ᐊᖏᔪᒥᒃ ᐊᓪᓗᕆᐊᕐᓂᐅᓯᒪᔪᖅ ᑐᕌᕈᑕᐅᑦᓱᓂ ᐃᓕᓐᓂᐊᓂᒃᑯᑦ ᐃᒻᒥᓂᕿᓂᕐᒧᑦ ᑕᒪᓐᓇᐅᕗᖅ ᐅᓪᓗᒥ ᐊᔪᐃᓐᓇᑕᐅᓕᕐᒥᔪᖅ ᒪᑭᑦᓯᓂᑦᓴᖅ  ᐳᕐᑐᓂᕐᓭᑦ ᕿᖑᓂᐊᒍᑦ ᐃᓕᓐᓂᐊᕕᒻᒪᕆᒻᒥᒃ ᓄᓇᕕᒻᒥ. ᐳᕐᑐᓂᕐᓭᑦ ᑭᖑᓂᐊᒍᑦ ᐃᓕᓐᓂᐊᑎᓂᒃ ᐱᒍᑦᔨᓂᕐᒥᒃ ᐱᓇᓱᕝᕕᒃ ᓯᕗᓕᕐᑎᓪᓗᒍ ᐊᒻᒪᓗ ᐊᑦᔨᒌᖕᖏᑐᑦ ᓄᓇᓕᓕᒫᓂ ᐊᒻᒪᓗ ᑲᕙᒪᓂ ᐱᓇᓱᖃᑎᕗᑦ ᐃᑲᔪᕐᑎᓗᒋᑦ, ᑖᓐᓇ ᐱᓇᓱᐊᑦᓴᖅ ᑐᖕᖓᕕᖃᕐᖁᖅ ᒪᑐᒥᖓ ᐅᑉᐱᕆᔭᐅᓪᓚᕆᑦᑐᒥᒃ: ᐃᓅᓱᑦᑐᐃᑦ ᓄᓇᒥᓂᒃ, ᐃᓚᒥᓂᓪᓗ ᐊᒻᒪᓗ ᐃᓗᕐᖁᓯᕐᒥᓂᒃ ᐊᐅᓪᓚᓗᑎᒃ ᑭᓯᐊᓂᐅᔪᑦᓴᐅᔭᖏᓪᓚᑦ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᓂᐊᕋᒥᒃ.

ᑕᒪᓐᓇ ᑎᒥᒃᑯᑦ ᖃᓂᖕᖏᑐᒥᐅᖑᓂᑦᑎᓂᒃ ᐱᑦᔪᑎᑐᐊᖃᑦᔭᖏᑦᑐᖅ. ᑐᕌᖓᔪᖅ ᐃᓱᒪᒋᐊᑦᓯᐊᓂᕐᒧᑦ ᐳᕐᑐᓂᕐᓭᑦ ᑭᖑᓂᖓᓂ ᐃᓕᓐᓂᐊᓂᕐᒥᒃ ᐃᓄᐃᑦ ᐃᔨᖏᑎᒍᑦ ᑕᑯᓐᓇᓗᓂ: ᐱᑎᑦᓯᓚᖓᓗᓂ ᐃᓕᓐᓂᐊᕈᑎᓂᒃ ᒥᑦᓯᖃᓪᓚᕆᑦᑐᓂᒃ ᓄᓇᕕᒻᒥ ᐱᐅᓯᓪᓚᕆᓐᓄᑦ, ᒪᖕᖑᖃᕐᑎᓗᒋᑦ ᐃᓄᐃᑦ ᐃᓗᕐᖁᓯᖓᓄᑦ ᐊᒻᒪᓗ ᓄᓇᓕᖓᓄᑦ, ᐊᒻᒪᓗ ᐊᐅᓚᑦᓯᔨᖃᕐᑎᓗᒋᑦ ᓄᓇᕕᒻᒥᐅᓂᒃ ᐃᒻᒥᒍᑦ.

ᐱᖕᖑᐃᓂᖅ ᑌᒣᑦᑐᒥᒃ ᐃᓕᓐᓂᐊᕕᒻᒪᕆᒻᒥᒃ ᑌᒫᑐᐃᓐᓇᖅ  JBNQA-ᒧᑦ ᐊᖏᖃᑕᐅᑦᓯᐊᕋᔭᕐᑐᖅ—ᓱᓇᒥᑦᑐᓂᒃ ᐃᓕᓐᓂᐊᕕᖃᓯᑎᓪᓗᒍ, ᐱᒋᐊᕐᓗᒍ ᐱᐊᕌᐱᐅᓂᕐᒥᒃ ᑎᑭᓪᓗᒍ ᓯᓚᑦᑐᓴᕐᕕᓕᐊᕐᓂᒧᑦ, ᓴᓇᔭᐅᒪᓗᓂ ᓯᕗᓕᕐᑕᐅᓗᓂᓗ ᑌᒃᑯᓄᖓ ᑐᕃᓐᓇᑐᒥᒃ ᓱᕐᕋᑕᖏᓐᓄᑦ.

ᓴᐳᒻᒥᓂᖅ ᓄᓇᑖᕐᓂᑯᑦ ᐱᔪᓐᓇᓂᖃᕈᑎᓂᒃ: ᐱᖁᔭᖅ 14 ᐊᒻᒪᓗ ᓱᕙᓪᓖᒍᑎᖏᑦ

ᐊᕐᕌᒍᐃᑦ ᐊᕙᑎᑦ ᒪᕐᕉᒃ ᖁᓕᓪᓗ ᑭᖑᓂᖓᓂ JBNQA ᐊᑎᓕᐅᕐᕕᐅᓚᐅᕐᓯᒪᑎᓪᓗᒍ, ᑕᖏᖓᓂ ᑐᑭᒻᒪᕆᖏᑦ ᓱᓕ ᓴᐳᒻᒥᒋᐊᖃᓲᖑᖏᓐᓇᑐᑦ. ᑕᒪᓐᓇ ᐱᑦᔪᑎᒋᑦᓱᒍ ᑲᑎᕕᒃ ᐃᓕᓴᕐᓂᓕᕆᓂᖅ ᐱᒋᐊᕐᑎᓯᓯᒪᔪᖅ ᐃᕐᖃᑐᐃᕕᓕᕆᓂᕐᒥᒃ ᐊᑭᒪᑦᔭᒋᐊᕐᓱᓂ ᐱᖁᔭᒥᒃ 14-ᒥᒃ, ᑯᐯᒃᑯᑦ ᑲᕙᒪᖓᑕ ᐊᑐᓕᕐᑎᓯᒪᔭᖓᓂᒃ.

ᑖᓐᓇ ᐱᖁᔭᖅ ᓄᑖᓂᒃ ᐅᖃᐅᓯᕐᒧᐊᓕᖓᔪᓂᒃ ᓂᐳᕐᑎᒋᐊᓕᓐᓂᒃ ᐊᑐᕆᐊᖃᕐᑎᓯᕗᖅ ᐳᕐᑐᓂᕐᓭᑦ ᑭᖑᓂᐊᒍᑦ ᐃᓕᓐᓂᐊᑎᓄᑦ, ᑕᒪᑐᒪᓗ ᓱᕐᕃᓂᕐᓗᕈᑎᖏᑦ ᐃᑉᐱᓇᓕᕇᕐᖁᑦ: ᐃᓚᖏᑦ ᐃᓅᓱᑦᑐᐃᑦ ᓄᓇᕕᒻᒥᐅᑦ ᓄᕐᙯᓇᕐᓯᒪᔪᑦ, ᐊᓯᖏᓪᓗ ᐱᑦᓯᐊᓂᖓᑕ ᐳᕐᑐᓂᖓᓂᒃ ᑲᑕᔨᐊᖃᕐᓯᒪᑦᓱᑎᒃ, ᐊᒻᒪᓗ ᐊᒥᓱᑦ ᓴᕗᖓᑎᑕᐅᓕᕐᓱᑎᒃ ᐊᕝᕕᐊᓗᑕᕐᓄᑦ ᐱᑕᖃᕐᑐᓴᐅᑦᔭᖏᑦᑐᓄᑦ.

ᐃᕐᖃᑐᐃᕕᒻᒨᑎᑦᓯᓂᖅ ᐃᓕᑕᕐᓯᒍᑕᐅᑎᑦᓯᒋᐊᕐᑐᖅ ᐱᖁᔭᖅ ᓯᖁᒥᑦᓯᒋᐊᖓ ᓄᓇᑖᕐᓂᒧᑦ-ᑐᖕᖓᔪᓂᒃ ᐅᖃᐅᓯᕐᒥᒃ ᐱᔪᓐᓇᓂᖃᕈᑎᓂᒃ, ᐃᓚᐅᑎᓪᓗᒍ JBNQA-ᒥ ᐃᓚᐅᔪᑦ ᐳᕐᑐᓂᕐᓭᑦ ᑭᖑᓂᐊᒍᑦ ᐃᓕᓐᓂᐊᕈᓐᓇᓂᖓ ᐅᖃᐅᓯᕐᒥᒃ ᐊᑐᕈᒪᔭᒥᓂᒃ ᐊᑐᕐᓗᑎᒃ.

ᑕᒪᓐᓇ ᐃᓕᓐᓂᐊᓂᕐᒥᒃ ᑭᓯᐊᓂ ᑲᒪᖕᖏᑐᖅ— ᐊᑦᑑᐱᓚᑦᑐᖅ ᐊᖏᓂᕐᓴᒥᒃ ᑲᒪᒋᐅᑎᓂᖓᓂᒃ ᐃᓄᐃᑦ ᐊᒻᒪᓗ ᑯᐯᒃ ᓄᓇᖓᑕ. ᑕᒪᓐᓇ ᐊᑦᓱᕉᑕᐅᔪᖅ ᐃᕐᙯᒍᑎᓪᓚᕆᐅᕗᖅ ᐃᒻᒥᓄᑦ-ᑐᑭᑖᕐᓂᖅ ᑐᑭᖃᕆᐊᖓᑦᑕᐅᖅ ᓴᐳᑦᔨᒋᐊᕐᓂᒥᒃ ᐱᓯᒪᓕᕐᑐᓂᒃ ᐱᔪᓐᓇᓂᖃᕈᑎᓂᒃ, ᐊᒻᒪᓗ ᐅᐸᓗᙰᕐᓯᒪᖏᓐᓇᓕᒫᕐᓂᒥᒃ ᑐᑭᑖᕐᑐᖃᑦᓴᓂᐊᕐᐸᑦ ᑕᒪᒃᑯᓂᖓ ᓴᖕᖐᓕᑎᕆᓂᐅᔭᔪᓂᒃ.

ᕿᒻᒪᖁᑎᖓ ᐆᒪᑦᓭᓇᕐᑐᖅ

ᐊᕙᑎᑦ ᒪᕐᕉᒃ ᖁᓕᓪᓗ ᐊᕐᕌᒍᐃᑦ ᑭᖑᓂᖓᓂ JBNQA ᐊᑎᓕᐅᕐᕕᐅᓚᐅᕐᓯᒪᑎᓪᓗᒍ, ᑭᖑᒧᑦ ᑕᑯᓴᑐᐃᓐᓇᔭᖏᓪᓚᒍᑦ—ᐊᑐᐃᓐᓇᕈᑦᑎᐳᒍᑦ ᓯᕗᓂᕐᒧᑦ. ᐃᖏᕐᕌᓚᑎᑕᐅᓯᒪᔪᖅ ᑫᑦᓴᐅᒥᑎᑕᐅᑦᓱᓂ 1975-ᒥ ᐅᓪᓗᒥ ᓱᓕ ᑲᔪᓯᕗᖅ ᐊᕐᖁᑎᖃᕐᓱᓂ ᐃᓕᓐᓂᐊᑎᑦᓯᔨᑦᑕ, ᐃᓕᓐᓂᐊᕈᑎᓕᐅᕐᓂᒧᑦ ᐃᓱᒪᓕᐅᕐᑎᑕ, ᐊᐅᓚᑦᓯᔨᑦᑕ ᐊᒻᒪᓗ ᓄᓇᓕᓐᓂ ᐱᓇᓱᐊᖃᑎᑦᑕ ᖃᐅᑕᒫᑦᓯᐊᖅ ᑲᑦᓱᙰᓐᓂᖓᓂᒃ.

ᑖᓐᓇ ᐃᖏᕐᕋᓂᕗᑦ ᓄᐃᑕᑦᓯᕗᖅ ᑕᐅᑐᒐᕐᒥᒃ ᓱᓕ ᒥᑦᓯᖃᓪᓗᑐᑦᓯᐊᑐᒥᒃ: ᓱᕐᖁᐃᓚᖓᓗᓂ ᐊᑐᓂ ᐱᐊᕋᐅᑉ, ᐅᕕᒃᑲᐅᑉ, ᐊᒻᒪᓗ ᐃᓄᒻᒪᕆᐅᑉ ᓄᓇᕕᒻᒥ ᐱᕕᖃᕐᓂᖓᓂᒃ ᐃᓕᑦᓯᓂᕐᒥᒃ, ᐃᓱᒪᖕᖑᐊᓂᕐᒥᒃ, ᐊᒻᒪᓗ ᐱᕈᕐᓴᓂᕐᒥᒃ, ᒪᓕᓪᓗᓂ ᓇᒻᒥᓂᖅ ᐃᓗᕐᖁᓯᕐᒥᓂᒃ ᐊᒻᒪᓗ ᐅᖃᐅᓯᕐᒥᓂᒃ.

ᐃᒻᒥᓄᑦ ᑐᑭᑖᕐᑎᐅᓂᖅ ᐃᓱᒪᑐᐃᓐᓇᐅᔭᖏᓪᓚᖅ. ᐱᕙᓪᓕᐊᔪᖅ ᖃᐅᑕᒫᑦ ᐃᓕᓐᓂᐊᕕᑦᑕ ᐃᓗᐊᓂ, ᑲᑎᒪᔨᐊᐱᑦᑎᓂ, ᒪᓕᒐᑦᑎᓂ ᐊᒻᒪᓗ ᐃᓕᓐᓂᐊᑎᑦᓯᒍᑎᑦᑎᓂ. ᑲᔪᓯᖏᓐᓇᓱᓂ ᑕᒪᑐᒥᖓ ᐱᓇᓱᐊᒐᕐᒥᓂᒃ, ᑲᑎᕕᒃ ᐃᓕᓴᕐᓂᓕᕆᓂᖅ ᐆᒪᑦᓯᕗᖅ JBNQA ᐃᓱᒪᖓᓂᒃ—ᐃᓱᒪᒥᒃ ᐱᑦᓯᐊᑕᐅᔪᑦᓴᐅᓂᕐᒥᒃ, ᓲᓱᒋᔭᑦᓴᐅᓂᕐᒥᒃ ᐊᒻᒪᓗ ᑲᒪᒋᐊᖃᕐᓂᒥᒃ ᑭᖑᕚᖑᓛᕐᑐᑦ ᐱᑦᔪᑎᒋᓗᒋᑦ.