ᐱᑕᑲᓪᓚᒃ ᐃᓕᓐᓂᐊᕕᒻᒥ ᑰᑦᔪᐊᒥ, ᓄᑖᖅ ᐱᒋᐊᕐᑎᑕᐅᓯᒪᔪᖅ ᐱᑦᓯᐊᓂᐊᐲᑦ ᓇᓪᓕᐅᑎᑦᑕᓂᖓᓂᒃ ᐱᓂᐊᕈᑎᒥᒃ ᑌᔭᐅᔪᖅ ᓴᓇᒋᐊᑦᓯᐊᓕᕐᑐᖅ ᖃᓄᖅ ᐃᓕᓐᓂᐊᑏᑦ ᑐᑭᓯᒪᓂᖓᓂᒃ ᐊᒻᒪᓗ ᐊᐅᓚᑦᓯᓂᖓᓂᒃ ᐃᑉᐱᓂᐊᒍᑎᒥᓂᒃ.
ᐅᓪᓗᒥ ᐱᐅᔪᒻᒪᕆᐊᓗᓐᓂᒃ ᐱᓂᐊᕐᓂᕐᑲᓚᖕᒐᔪᖕᒐ – I will do great things today – je ferai de grandes choses aujourd’hui
ᑖᓐᓇ ᓲᖑᔪᒻᒪᕆᐊᓗᒃ ᐅᖃᕈᑎ ᐊᑐᖃᑦᑕᓯᑦᓱᒍ ᐃᓕᓐᓂᐊᑏᑦ ᐱᑕᑲᓪᓚᒃ ᐃᓕᓐᓂᐊᕕᒻᒥ ᑰᑦᔪᐊᒥ ᐱᒋᐊᓚᐅᔪᔪᑦ ᐃᓕᓐᓂᐊᓂᐅᑉ ᐊᕐᕌᒍᖓᓂᒃ—ᑐᓴᖃᑦᑕᓱᑎᒃ ᑲᑦᓱᙰᓕᑎᕆᔪᓂᒃ ᑐᓴᕈᑎᓂᒃ ᐅᓪᓛᑕᒫᑦ ᖃᓂᖕᖒᑎᒃᑯᑦ ᐅᖃᐅᓯᕐᓄᑦ ᐱᖓᓱᓄᑦ ᐅᖄᔭᐅᑎᓪᓗᒋᑦ: ᐃᓄᒃᑎᑐᑦ, ᖃᓪᓗᓈᑎᑐᓪᓗ ᐊᒻᒪᓗ ᐅᐃᒍᐃᑎᑐᑦ. ᑕᒪᓐᓇ ᐃᓚᐅᔪᖅ ᐊᕐᕌᒍᓕᒫᖅ ᐱᓇᓱᐊᕐᓂᒧᑦ ᐅᖃᕐᑕᐅᓱᓂ ᐱᑦᓯᐊᓂᐊᐲᑦ ᓇᓪᓕᐅᑎᑦᑕᓂᖓᓂᒃ ᐱᓂᐊᕈᑎᒥᒃ.
ᐱᕙᓪᓕᐊᔭᐅᓯᒪᔪᖅ ᐋᓐ ᒫᑦᓯᐅᒧᑦ ᐱᓇᓱᑦᑎᒧᑦ ᐊᓯᖕᖑᐃᔪᓂᒃ ᐃᓅᓯᕐᒥ ᐱᒋᐅᕐᓂᐅᒍᑎᓂᒃ ᓄᓇᕕᒻᒥ (TLS), ᐱᓇᓱᖃᑎᖃᕐᑎᓗᒍ ᓈᒃᑯᒋᔭᓕᓐᓂ ᐃᓕᓐᓂᐊᕕᓐᓂ ᐃᓕᓐᓂᐊᑎᑦᓯᔨᒥᒃ ᓈᓐᓯ ᓂᑯᓴᓐ ᐊᒻᒪᓗ ᐃᓕᓐᓂᐊᕕᐅᑉ ᐊᖓᔪᕐᖄᖓᑕ ᑐᖓᓕᐊᓂᒃ ᓯᐊᕈᓪ ᓴᐅᒧᐊ, ᑖᓐᓇ ᐱᓂᐊᕈᑎ ᓴᓇᒪᔪᖅ ᓇᓗᓇᖕᖏᑐᐊᐱᒻᒧᑦ ᓱᓕ ᐊᓯᖕᖑᑎᑦᓯᓯᐊᕐᓱᓂ ᐃᓱᒪᒧᑦ: ᐃᓱᒪᒋᔭᕗᑦ ᐃᑉᐱᓂᐊᒍᑎᑦᑎᓂᒃ ᓴᓇᕗᑦ. ᐃᑉᐱᓂᐊᒍᑎᕗᑦ ᓱᕐᕃᕗᑦ ᐆᒻᒪᕆᓐᓂᑎᓐᓂᒃ, ᐊᒻᒪᓗ ᐆᒻᒪᕆᓐᓂᕗᑦ ᓱᓂᑦᑎᓂᒃ ᑫᓪᓗᐊᐳᖅ.
ᐊᑐᓂ ᐱᓇᓱᐊᕈᓯᕐᒥ, ᐃᓕᓐᓂᐊᑏᑦ ᐁᑦᑐᑕᐅᔪᑦ ᓄᑖᒥᒃ ᐅᖃᓪᓗᕆᐅᑎᒥᒃ. ᑖᒃᑯᐊ ᐅᖃᕈᑏᑦ ᐊᓪᓚᓯᒪᔪᑦ ᐃᓘᓐᓇᖏᓐᓄᑦ ᐱᖓᓱᐃᓄᑦ ᐅᖃᐅᓯᕐᓄᑦ ᐊᒻᒪᓗ ᑕᑯᑦᓴᐅᑎᐅᑕᑦᓱᑎᒃ ᓇᓂᓕᒫᖅ ᐃᓕᓐᓂᐊᕕᐅᑉ ᐃᓗᐊᓂ ᓲᖑᓯᒋᐊᕈᑕᐅᑎᓪᓗᒍ ᐅᖃᕐᑕᐅᓂᖓᓄᑦ. ᐱᓂᐊᕈᑎᖓ ᒪᓕᑦᑐᖅ ᐊᓯᑦᔨᑕᖕᖏᑐᒥᒃ ᐱᓇᓱᐊᕈᓯᑕᒫᑦ ᐃᓂᓪᓚᖓᐅᑎᒥᒃ ᐃᑲᔪᕐᓯᒍᑕᐅᑎᓪᓗᒍ ᐃᓕᓐᓂᐊᑏᑦ ᐊᒻᒪᓗ ᐃᓕᓐᓂᐊᑎᑦᓯᔩᑦ ᓴᓇᓂᖓᓂᒃ ᐊᑕᖏᓐᓇᓂᐊᕐᑐᒥᒃ ᐱᐅᓯᖃᕈᑎᒥᒃ.
“ᐱᒻᒪᕆᐅᓂᖓ ᐃᒣᓕᖓᔪᖅ ᐃᒫᒃ ᓯᓚᕐᔪᐊᖅ ᐊᕙᑎᓕᒫᑦᑎᓂ ᓴᔪᑦᑐᐊᓘᔮᓕᕋᓗᐊᕐᐸᑦ, ᖃᐅᔨᒪᖁᔨᓂᑦᑎᓄᑦ ᐃᓕᓐᓂᐊᑎᓂᒃ ᓄᑭᖃᕆᐊᖏᓐᓂᒃ ᐊᓯᑦᔨᑎᑦᓯᒍᓐᓇᓂᕐᒥᒃ ᖃᓄᖅ ᐃᑉᐱᓂᐊᓂᕐᒥᓂᒃ”
ᐅᓪᓛᑕᒫᑦ, ᐅᖃᓪᓗᕆᐅᑎ ᐊᑐᐊᕐᑕᐅᓲᖅ ᐅᖄᔭᐅᑦᓱᓂ ᖃᓂᖕᖒᑎᒃᑯᑦ ᐃᓕᓐᓂᐊᑏᑦ ᑌᒫᑦᓭᓇᖅ ᐅᖃᕆᐊᓪᓚᖃᑦᑕᑎᓪᓗᒋᑦ ᐃᓕᓐᓂᐊᕕᐅᑉ ᐃᓘᓐᓇᖓᓂ. ᐊᓪᓚᓯᒪᔪᐃᑦ ᐅᖃᐅᓯᕐᑕᖏᑦ, ᓄᐃᑕᔪᑦ ᓇᓂᑐᐃᓐᓇᖅ ᐃᓕᓐᓂᐊᕕᐅᑉ ᐃᓗᓕᒫᖓᓂ, ᑕᑯᑦᓴᐅᒥᔪᑦ ᐃᓪᓗᕕᒐᐅᑉ ᐃᓗᐊᓂ—ᓄᐃᑕᑦᓯᖑᐊᕐᑐᒥ ᐃᑉᐱᓂᐊᒍᑎᑎᒍᑦ ᐊᑦᑕᓇᕐᑐᖃᖕᖏᓂᖓᓂᒃ ᐊᒻᒪᓗ ᓴᐳᒻᒥᔨᖃᕐᓂᖓᓂᒃ. ᑖᓐᓇ ᐃᓪᓗᕕᒐᖅ “ᐃᓪᓗᕗᑦ”, ᐃᓂᐅᑎᓪᓗᒍ ᑭᓇᒃᑯᓕᒫᓄᑦ ᓴᑑᒪᓂᕐᒥᒃ ᐃᑉᐱᒍᓱᕝᕕᓴᐅᑦᓱᓂ.
ᑭᓯᐊᓂ ᐱᓂᐊᕈᑎᖓ ᐅᖃᐅᓯᑐᐃᓐᓀᑦ ᐅᖓᑖᓅᕐᒥᔪᖅ. ᐃᓚᐅᕐᑐᓯᒪᔪᖅ ᓂᒪᓐᓂᒥᒃ, ᐊᓂᕐᑎᕆᑦᓯᐊᕈᓯᕐᓂᒃ, ᐊᒻᒪᓗ ᑎᒥᐅᑉ ᖃᓄᐃᓕᖓᓂᖓᓂᒃ ᐊᓯᑦᔨᑎᑦᓯᖃᑦᑕᓂᕐᒥᒃ ᐃᑲᔪᕐᓯᐅᑎᒋᑦᓱᒋᑦ ᐃᓕᓐᓂᐊᑏᑦ ᐅᖑᒪᑦᓯᒐᓱᐊᕐᓂᖓᓂᒃ ᐃᑉᐱᓂᐊᒍᑎᒥᓐᓂᒃ. ᐃᓕᓐᓂᐊᑎᑦᓯᔩᑦ ᐃᓕᓐᓂᐊᑎᓂᒃ ᑕᓯᐅᕐᓯᔪᑦ ᓱᓇᓐᓂᐊᕈᑎᑎᒍᑦ ᑲᑦᓱᙰᓕᑎᕆᑦᓱᑎᒃ ᐃᑉᐱᒍᓱᑦᓯᐊᓂᕐᒥᒃ, ᐃᑉᐱᓂᐊᒍᑎᒋᔭᓂᒃ ᑲᖐᒋᔭᖃᕐᓂᒥᒃ, ᐊᒻᒪᓗ ᐃᓱᒪᒋᔭᕆᔭᓂᒃ-ᐅᖃᖃᑦᑕᓂᕐᒥᒃ—ᑕᒪᓐᓇ ᓲᖑᓯᑎᑦᓯᑎᓪᓗᒍ ᐱᑐᑦᓯᒪᐅᑎᑦᓯᐊᓂᕐᒥᒃ ᑎᒥᒧᑦ ᐊᒻᒪᓗ ᐃᓱᒪᒧᑦ.
“ᐊᑐᓂ ᐅᖃᕈᑎᓕᐊᑦ ᐱᓇᓱᐊᕈᓯᕐᒧᑦ ᐊᑐᓚᖓᔪᑦ ᐃᓚᒋᔭᖏᓐᓂ, ᐱᓂᐊᕐᓂᖃᕈᑎᒥᒃ ᒪᓕᑦᑎᖃᕐᒥᔪᖅ. ᑌᒪᖕᖓᑦ ᐃᓱᒪᒋᔭᑦᓴᓂᒃ ᐱᑕᖃᓲᑦ ᖃᓄᐃᑦᑐᓂᒃ ᓱᓇᓐᓂᐊᕈᑎᓂᒃ ᐃᓕᓐᓂᐊᑎᑦᓯᔩᑦ ᐊᑐᕈᓐᓇᓂᖓᑎᒍᑦ ᐃᓕᓐᓂᐊᑎᑦᓯᕕᒻᒥᓂ ᐊᑦᑐᐊᑎᓪᓗᒋᑦ ᑖᒃᑯᓄᖓ ᐅᖃᑦᓯᐊᕈᑎᓄᑦ.”
ᓈᓐᓯ ᐊᒻᒪᓗ ᓯᐊᕈᓪ ᓇᒻᒥᓂᖅ ᑕᑯᓯᒪᔫᒃ ᖃᓄᖅ ᑕᒪᒃᑯᐊ ᒥᑭᔪᖑᐊᑦ ᐋᕐᕿᒋᐊᕈᑏᑦ ᐊᖏᔪᒥᒃ ᓱᕐᕃᓂᖃᕐᒪᖔᑕ. ᐃᓕᓐᓂᐊᑏᑦ ᖁᓄᖕᖏᓂᕐᓴᐅᓕᕐᑐᑦ ᐅᖄᒋᐊᒥᒃ ᐃᑉᐱᓂᐊᒍᑎᒥᓂᒃ, ᐃᒻᒥᓂᓪᓗ ᓄᓪᓚᕆᐊᕈᓐᓇᓂᕐᓴᐅᓕᕐᓱᑎᒃ ᐊᓕᐊᓱᒍᓐᓀᕋᒥᒃ. ᑕᒪᑐᒪ ᐱᓂᐊᕈᑎᖓ ᓱᓕ ᐋᕐᕿᓱᕐᓂᒦᖏᓐᓇᑐᖅ, ᑭᓯᐊᓂ ᐃᓕᓐᓂᐊᑏᑦ ᐃᓕᓐᓂᐊᑎᑦᓯᔩᓪᓗ ᖃᓄᐃᓐᓂᖓᓂᒃ ᐅᖄᒍᑎᖏᑦ ᓴᓇᖃᑕᐅᓕᕐᑐᑦ ᐱᕙᓪᓕᐊᒍᑎᖏᓐᓂᒃ. ᐃᓕᓐᓂᐊᓇᐅᑉ ᐊᕐᕌᒍᒐᑕ ᐊᒥᐊᒃᑯᖓᓂ ᐋᓐ ᒫᑦᓯᐅ (TLS) ᐱᓇᓱᖃᑎᕆᐊᓪᓚᓚᖓᔪᖅ ᐃᓕᓐᓂᐊᑎᑦᓯᔨᓂᒃ ᐱᐅᓴᕆᐊᓪᓚᓗᒋᑦ ᐱᖁᑎᖏᑦ ᓱᕐᖁᐃᓗᒋᓪᓗ ᓂᐳᕐᑎᓯᒋᐊᖏᓐᓂᒃ ᐃᓕᓐᓂᐊᑏᑦ ᐱᒋᐊᓕᖏᓐᓂᒃ. ᑕᒪᓐᓇ ᑐᕌᕐᑐᖅ ᐱᖕᖑᐃᓂᕐᒧᑦ ᒪᑭᑕᔭᓪᓗᐊᒥᒃ, ᐃᓗᕐᖁᓯᕐᒥᒃ ᐃᑉᐱᒍᓱᑦᓯᐊᑐᒥᒃ ᐱᓂᐊᕈᑎᒥᒃ ᐊᑐᕈᓐᓇᕋᔭᕐᑐᒥᒃ ᐃᓘᓐᓇᖏᓐᓂ ᓄᓇᕕᒻᒥ ᐃᓕᓐᓂᐊᕕᓐᓂ.
ᐃᓕᓐᓂᐊᑎᓂᒃ ᖃᓄᐃᓘᖃᑎᖃᕐᓱᓂ ᖃᒻᒥᖅ, ᓈᓐᓯ ᐊᐱᕐᓱᓚᐅᔪᔪᖅ ᓱᓇᓂᒃ ᐊᐅᓚᔨᓂᕐᐹᖃᕐᒪᖔᑕ ᐊᕐᕌᓂ ᖃᓂᖕᖒᑎᒃᑯᑦ ᐅᖃᓗᕆᖃᑦᑕᓚᐅᔪᔪᓂᒃ. ᐱᒋᐊᕐᓱᒍ ᐃᓕᓐᓂᐊᕆᐅᕐᑐᓂᒃ ᐳᕐᑐᓂᕐᒧᑦ ᐱᖓᔪᐊᓐᓄᑦ ᑎᑭᑦᓱᒍ, ᑭᐅᒍᑎᖓ ᑖᓐᓇᓭᓐᓇᓯᐊᖑᓚᐅᔪᔪᖅ. ᖃᕆᐊᒥ ᐃᓅᓱᑦᑐᐃᑦ ᓂᐱᖏᓐᓄᑦ ᑕᑕᑦᓯᐊᑐᒥ, ᐅᖃᓪᓗᕆᐅᑎ ᐊᑕᐅᓯᖅ ᑐᓴᕐᓴᐅᓂᕐᐹᖑᓚᐅᔪᔪᖅ: “ᐃᒻᒥᓂᒃ ᓇᓪᓕᒋᕗᖓ”.
ᐅᖃᕐᑕᐅᖃᑦᑕᑐᕕᓂᖅ ᐃᓕᓐᓂᐊᑏᑦ ᓇᑦᓴᓕᕐᑕᖓᑦ ᑖᓐᓇᐅᑐᐊᕐᐸᑦ, ᐱᑦᓯᐊᓂᐊᐲᑦ ᓇᓪᓕᐅᑎᑦᑕᓂᖓᓂᒃ ᐱᓂᐊᕈᑎ ᐊᑕᖏᓐᓇᓚᖓᔪᒥᒃ ᓱᕙᓪᓕᖁᑕᐅᓕᕇᕐᖁᖅ.
