ᑕᒡᒐᓂ ᐱᓇᓱᐊᕈᓯᕐᒥ, ᑲᑎᕕᒃ ᐃᓕᓴᕐᓂᓕᕆᓂᖅ ᖁᕕᐊᓱᒍᑎᖃᓚᖓᕗᖅ ᐃᓕᓐᓂᐊᑎᑦᓯᔩᑦ ᐅᐱᒍᓲᑕᐅᓂᖏᓐᓄᑦ ᐱᓇᓱᐊᕈᓯᒥ.

ᑕᒪᓐᓇ ᑌᒣᑦᑎᓗᒍ, ᓇᑯᕐᒦᕙᓪᓛᕈᒪᕗᖓ ᐃᑲᔪᕐᓯᒪᓂᑦᓯᓄᑦ ᐱᓇᓱᕝᕕᑎᓐᓄᑦ. ᐅᓪᓗᑕᒫᖅ, ᐃᓘᓐᓇᓯ ᐊᑐᓂ ᐊᓯᑦᔩᕙᓪᓕᐊᕗᓯ ᐃᓕᓐᓂᐊᑎᖁᑎᕗᑦᑕ ᐃᓅᓯᖏᓐᓂᒃ. ᓇᑯᕐᒦᓗᐊᖕᖑᐊᖁᖓ ᐱᓇᓱᐊᕋᑦᓴᓂᒃ ᐊᐅᓚᑦᓯᓲᓂᒃ, ᐅᓪᓛᕈᒥᑕᕐᓂᒧᑦ ᑲᑎᒪᔨᐊᐲᑦ ᐊᒻᒪᓗ ᐃᓕᓐᓂᐊᓇᐅᑉ ᓈᓂᖓᓂ ᐱᔭᑦᓴᖃᕐᑎᓯᓲᑦ ᐅᕝᕙᓘᓐᓃᑦ ᓄᓇᓕᐅᑉ ᐃᓗᐊᓂ ᐃᑲᔪᕐᓯᓲᑦ ᓱᕐᕃᓯᒪᓪᓚᕆᑦᓱᑎᒃ ᐃᓕᓐᓂᐊᑏᑦ ᐃᓅᓱᑦᑐᐃᓗ ᖃᓄᐃᖕᖏᓯᐊᕐᓂᖏᓐᓂᒃ.

ᐅᑭᐊᕈᓚᐅᔪᒻᒪᓂᑦ ᑕᕐᖀᑦ ᐊᓂᒎᑎᕐᖃᒥᕗᑦ ᐱᔭᕆᐊᑭᑦᑑᖃᑦᑕᓚᐅᖕᖏᓚᑦ. ᓇᑯᕐᒦᒃ ᐃᓕᓐᓂᐊᑎᑦᓯᔨᓕᒫᑦ ᑐᓂᒪᑦᓯᐊᓂᖏᓐᓄᑦ ᐱᓇᓱᐊᑦᓯᐊᓂᖏᓐᓄᓗ!

ᓇᑯᕐᒦᒃ,

ᖄᔨᐊ ᑭᓕᐅᑕᖅ

ᑲᔪᓯᒃᑫᔨ