ᐁᓐᓇᓕᐅᑉ ᐃᓕᓐᓂᐊᕕᖓ ᐃᓚᐅᓚᐅᕐᖁᖅ ᑕᑯᒥᓇᕐᑐᓕᐅᕐᓂᒧᑦ ᐱᓇᓱᐊᕐᑕᐅᔪᒧᑦ, ᐅᓂᒃᑳᑐᐊᖏᑦ ᑕᑯᑦᓴᐅᑎᑕᐅᓚᐅᕐᑐᑦ ᓄᓇᓕᖓᓂ ᑲᑎᑦᑕᕕᖓᓂ ᓂᐅᒪᐅᔾᑭᑦ, ᐊᓐᑎᐊᔨᐅᒥ, ᔫᓕ ᑳᓗᑦᓯ, ᐃᓕᓐᓂᐊᑎᑦᓯᔨ ᓂᐅᒪᐅᔾᑭᑦᒥ ᓂᑕ ᑭᓴᕙᔾᔅ-ᕌᐸᐅ ᐊᒻᒪᓗ ᒪᕐᓯᐊᓪ ᑲᐅᑎᐊᑦ-ᒥ ᖃᐅᔨᒋᐊᕐᓯᒪᕗᖅ ᐳᕐᑐᓂᕐᓴᒥ 3/4/5 ᖃᓪᓗᓈᑎᑐᑦ ᐃᓕᓐᓂᐊᑎᑦᓯᔨᓂᒃ ᖃᐅᔨᓴᕐᓱᓂ ᐃᓕᓐᓂᐊᑎᖏᑦ ᐃᑲᔪᕋᔭᕐᒪᖔᑕ ᑕᑯᒥᓇᕐᑐᓕᐅᕐᓂᒧᑦ ᐱᓇᓱᐊᕐᑕᐅᔪᒥᒃ ᖃᕆᐊᒥ ᐃᓕᓐᓂᐊᕕᖓᓂ. ᔫᓕ ᑳᓗᑦᓯ ᐱᓇᓱᐊᕐᓯᒪᔪᖅ ᐃᓄᑦᔪᐊᒥ ᓂᕕᐊᕐᓯᐊᑦ ᐃᑲᔪᕐᑕᐅᕕᖓᓂ ᓅᓚᐅᕋᓂ ᐊᓐᑎᐊᔨᐅᒧᑦ. ᐱᓇᓱᐊᖃᑎᖃᕐᓱᓂ ᐃᓕᓐᓂᐊᑎᒥᓂᒃ ᐳᕐᑐᓂᓕᓐᓂᒃ 11-ᒥ ᑕᑯᓐᓇᐅᔮᕐᑕᐅᔪᑦᓴᓂᒃ ᑕᑯᒥᓇᕐᑐᓕᐅᕐᓂᒥᒃ ᐃᓕᓐᓂᐊᓂᕐᒥᒃ ᓰᑯᔨᑦ ᖃᐅᑦ (Sacred Heart) ᑲᑐᓕᒃᑯᑦ ᐳᕐᑐᓂᕐᓴᒥᒃ ᐃᓕᓐᓂᐊᕕᖓᓄᑦ. ᐃᓕᓐᓂᐊᑎᖏᑦ ᐱᓇᓱᐊᕈᒪᔪᕕᓃᑦ ᖃᐅᔨᔭᐅᑎᑦᓯᓂᕐᒥᒃ ᓄᓇᖃᕐᖄᓯᒪᔪᓂᒃ, ᐊᓪᓚᖓᔪᓂᒃ ᐊᒻᒪᓗ ᐃᓄᓐᓂᒃ ᐃᓕᓐᓂᐊᕕᒻᒥᓂ. ᓂᕆᐅᓐᓂᖃᕐᓂᒥᔪᑦ ᓄᓇᓕᒻᒥᓂᒃ ᐃᓘᓐᓇᖓᓂᒃ ᑕᑯᓐᓇᐅᔮᕐᑎᓯᓂᕐᒥᒃ.

ᐱᓇᓱᐊᖃᑎᖃᕐᓂᒥᓄᑦ, ᔫᓕ ᐊᐱᕆᔪᕕᓂᖅ ᐁᓐᓇᓕᐅᑉ ᐃᓕᓐᓂᐊᕕᖓᓂ ᐃᓕᓐᓂᐊᑎᖏᓐᓂᒃ ᐱᑕᖃᕐᑎᓯᓂᕐᒥᒃ ᐅᓂᒃᑲᐅᓯᖏᓐᓂᒃ ᐃᒻᒥᓄᑦ ᑭᓇᐅᓂᕐᒥᓄᑦ. ᐅᖄᖁᔨᑦᓱᓂ ᖃᓄᖅ ᐃᓱᒪᓂᖏᓐᓂᒃ, ᐃᑉᐱᓂᐊᕐᓂᖏᓐᓂᒃ ᐊᒻᒪᓗ ᐊᑐᕐᓯᒪᔭᖏᓐᓂᒃ ᐃᓅᓂᕐᒥᓄᑦ ᐅᕕᒐᕐᑑᓂᕐᒥᓄᑦ ᑲᓇᑕᒥ. ᔫᓕᐅᑉ ᐃᓕᓐᓂᐊᑎᖏᑦ ᐋᕐᕿᓱᐃᔪᕕᓃᑦ ᑕᑯᒥᓇᕐᑐᓕᐅᕐᓂᒥᒃ ᑐᑭᖃᕇᑦᓴᐅᑎᒋᖕᖏᑐᓂᒃ/ᒥᖑᐊᖕᖑᐊᓂᕐᒥᒃ ᑕᑯᑦᓴᐅᑎᑦᓯᔪᓂᒃ ᐅᓂᒃᑳᑕᕕᓂᖏᓐᓂᒃ ᐊᓪᓚᓯᒪᔪᓂᒃ ᐁᓐᓇᓕᐅᑉ ᐃᓕᓐᓂᐊᑎᖏᑦᑕ. ᐊᓪᓚᖑᐊᕐᓯᒪᔪᖅ ᑕᑯᑦᓴᐅᑎᑦᓯᑐᐃᓐᓇᖏᑦᑐᖅ ᐃᓅᓯᖏᓐᓂᒃ ᑭᓯᐊᓂ ᐱᕕᖃᕐᑎᓯᔪᖅ ᑲᑎᑎᑦᓯᓂᕐᒥᒃ ᑕᕐᕋᒥ ᐊᒻᒪᓗ ᖃᓪᓗᓈᓂ ᓄᓇᓕᖏᓐᓂᒃ.

ᐃᓚᐅᔪᕕᓃᑦ ᐁᓐᓇᓕᒃ ᐃᓕᓐᓂᐊᕕᖓᓂ ᐅᖄᓚᐅᕐᑐᑦ ᐅᐱᒍᓱᓐᓂᒥᓂᒃ ᐊᑐᕐᓯᒪᔭᒥᓂᒃ ᑐᓴᕐᑕᐅᑎᑦᓯᒋᐊᒥᒃ ᖃᐅᔨᓚᐅᕐᓯᒪᖕᖏᑐᓄᑦ ᐃᓄᐃᑦ ᐅᕕᒃᑲᖏᑦ ᐅᖁᒣᓪᓕᐅᕈᑎᖏᓐᓂᒃ ᐊᒻᒪᓗ ᐊᓂᒎᑎᓯᒪᔭᖏᓐᓂᒃ. ᑖᓐᓇ ᐱᓇᓱᐊᕐᑕᐅᔪᖅ ᑲᔪᓯᑦᓯᐊᓱᓂ ᑲᑎᑎᑦᓯᓚᐅᕐᖁᖅ ᐅᕕᒐᕐᑐᓂᒃ ᐊᑦᔨᒌᖕᖏᑕᓪᓚᕆᖏᓐᓂᒃ ᐱᓯᒪᔪᓂᒃ ᐊᒻᒪᓗ ᐱᕕᖃᕐᑎᓯᑦᓱᓂ ᐃᓅᓯᖏᓐᓂᒃ ᐊᒻᒪᓗ ᐊᑦᔨᐅᖏᑦᑑᓂᖏᓐᓂᒃ ᐃᓄᐃᑦ ᐅᓂᒃᑲᐅᓯᖏᑦ ᖃᐅᔨᔭᐅᑎᑦᓯᓂᕐᒧᑦ ᐊᖏᓂᕐᓴᒥ ᑲᓇᑕᒥ ᐱᓯᒪᔪᓄᑦ.

Back to News