ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᓂᕐᒥᒃ ᐱᓇᓱᖃᑎᒌᑦ ᐃᑦᓯᕙᖃᑎᖃᕈᓐᓇᓯᓚᐅᕐᖁᑦ ᓖᓴ ᒥᐊᓱᒥᒃ (ᑐᑭᒧᐊᑦᑎᓯᔨ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᑦ ᐊᒻᒪᓗ ᐱᓇᓱᒐᕐᒧᑦ ᐱᒋᐅᕐᓴᑎᑕᐅᓂᖅ), ᑎᓂ ᑌᐊᒃ (ᐃᑲᔪᕐᑎ ᑐᑭᒧᐊᑦᑎᓯᔨᒧᑦ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᑦ ᐊᒻᒪᓗ ᐱᓇᓱᒐᕐᒧᑦ ᐱᒋᐅᕐᓴᑎᑕᐅᓂᖅ) ᐊᒻᒪᓗ ᑌᕝ ᒪᒃᒪᓚᓐ (ᐊᑕᐅᑦᓯᑰᕐᑎᓯᔨ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᑦ ᐊᒻᒪᓗ ᐱᓇᓱᒐᕐᒧᑦ ᐱᒋᐅᕐᓴᑎᑕᐅᓂᖏᑦ) ᑲᔪᓰᓐᓇᑐᒥᒃ ᐊᒻᒪᓗ ᐊᓕᐊᓇᕐᑑᓱᓂ ᐊᐱᕆᔭᐅᓂᕐᒧᑦ. ᐃᓕᑦᓯᓕᐅᒥᓚᐅᔭᕗᑦ ᖃᓄᖅ ᐱᓇᓱᒋᐊᓯᓐᓂᒪᖔᑖ ᐃᓕᓴᕐᓂᓕᕆᓂᕐᒧᑦ, ᐅᖁᒣᓪᓕᐅᕈᑎᖏᑦ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᑦᑕ ᐱᓇᓱᐊᕐᑕᖏᑦ ᐊᒻᒪᓗ ᑕᑯᓐᓇᑕᖏᑦ ᓯᕗᓂᕐᒥ!

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᓂᖅ (ᑭᑐ): ᐊᓕᐊᓇᕐᑑᓱᓯ ᐊᑦᔨᐅᖏᑦᑑᓱᓯ ᐱᓇᓱᖃᑎᒌᖑᕗᓯ! ᖃᓅᖅ ᐱᖓᓲᑦᓱᓯ ᐱᓇᓱᒋᐊᓯᓐᓂᕿᓯ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᓐᓂ ᐊᒻᒪᓗ ᐱᓇᓱᒐᕐᒧᑦ ᐱᒋᐅᕐᓴᑎᑕᐅᓂᕐᒧᑦ ᐱᓇᓱᕝᕕᖓᓂ?

ᓖᓴ ᒥᐊᓱ (ᓖᒥ):  ᒪᓐᑐᔨᐊᒧᑦ ᓅᑐᐊᕋᒪ, ᐱᓇᓱᐊᕐᓯᒪᔪᖓ ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᑲᔪᕐᑎᐅᓱᖓ ᑐᑭᒧᐊᑦᑎᓯᔨᒧᑦ, ᓄᓇᕕᒻᒥᐅᓂᒃ ᐋᓐᓂᐊᕕᓕᐊᕐᓯᒪᔪᓕᕆᔨᒃᑯᑦ ᒪᓐᑐᔨᐊᒥ. ᐱᕈᕐᓴᓱᖓ ᓄᓇᕕᒻᒥ, ᖃᐅᔨᒪᓪᓗᐊᓯᒪᖕᖏᑐᖓ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᓐᓂᒃ. ᖃᐅᔨᒪᓯᒪᔪᖓ ᐱᓇᓱᑦᑏᑦ ᐱᐅᔫᒋᐊᖏᑦ ᑕᒃᑲᓂ, ᑭᓯᐊᓂ ᐃᓕᓐᓂᐊᑎᑦᓯᒍᑎᕗᑦ ᑕᑯᓐᓇᑕᐅᕙᓪᓗᖃᑦᑕᓯᒪᔪᑦ ᐃᓕᓐᓂᐊᑎᑦᓯᒍᑎᐅᒋᐊᖏᑦ ᓄᕐᙯᓇᕐᓯᒪᔪᓄᑦ, ᑭᓯᐊᓂ ᑌᒣᖕᖏᑐᖅ. ᐊᓯᑦᔩᓂᕐᒥᒃ ᑕᑯᓐᓇᑕᐅᒍᓯᖓᓂᒃ ᐱᒻᒪᕆᐊᓗᒃ. ᐱᕙᓪᓕᐊᔪᖅ ᓱᒃᑫᑐᒥᒃ ᒫᓐᓇ ᐊᒻᒪᓗ ᐱᕙᓪᓕᐊᑐᐃᓐᓇᑐᖅ ᐃᓕᑦᓯᒪᔭᐅᒍᓯᕗᑦ ᐃᓄᓐᓄᑦ ᐱᒍᓐᓇᑕᒥᓂᒃ ᖁᕝᕙᕆᐊᕐᑎᓯᒋᐊᓪᓚᓂᕐᒧᑦ, ᐃᓄᒻᒪᕆᓐᓄᑦ ᐃᓕᓐᓂᐊᕆᐊᓪᓚᕈᒪᔪᓄᑦ ᐅᕝᕙᓘᓐᓃᑦ ᐃᓕᓐᓂᐊᓂᕐᒧᑦ ᐱᓇᓱᒐᕐᒨᓕᖓᔪᓂᒃ ᐱᒋᐅᕐᓴᑎᑕᐅᓂᕐᒧᑦ ᑖᒃᑯᐊ ᐃᓓᓐᓇᖏᑦ ᐅᖃᕐᑕᖓ!

ᑏᓂ ᑌᒃ (ᑎᑌ): ᐱᓇᓱᒐᖃᕐᓯᒪᔪᖓ ᐊᑦᔨᒌᖕᖏᑐᓂᒃ ᐃᓕᓴᕐᓂᓕᕆᓂᕐᒥ. ᐱᒋᐊᖕᖓᓚᐅᕐᓯᒪᔪᖓ ᐃᓕᓐᓂᐊᑎᑦᓯᔨᐅᓂᕐᒥᒃ 2001-ᒥ, ᑕᐃᒪ ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖓᓄᑦ ᐃᓕᑦᓱᖓ, ᐊᑕᐅᑦᓯᑰᕐᑎᓯᔨᐅᑦᓱᖓ ᐃᓕᓐᓂᐊᕖᑦ ᐃᖏᕐᕋᑎᑕᐅᒍᑎᖏᓐᓄᑦ ᐊᒻᒪᓗ ᐃᓕᔭᐅᓚᐅᕐᓯᒪᔪᖓ ᐃᑲᔪᕐᑎᕈᕐᓱᖓ ᑐᑭᒧᐊᑦᑎᓯᔨᒧᑦ ᑕᒃᑲᓂ ᐱᓇᓱᕝᕕᒥ, ᐃᑲᔪᕐᓯᓂᕐᒧᑦ ᐊᓯᑦᔨᑕᐅᓂᖓᓄᑦ ᐊᒻᒪᓗ ᓄᑖᓂᒃ ᑕᑯᓐᓇᓂᕐᒧᑦ ᑐᕌᕐᑕᖓᓂᒃ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᑦ.

ᑌᕝ ᒪᒃᒥᓚᓐ (ᑌᒪ): ᐱᒋᐊᖕᖓᓚᐅᕐᓯᒪᔪᖓ ᐃᓕᓐᓂᐊᑎᑦᓯᔨᐅᑦᓱᖓ, ᑎᓃᔅᓗ ᐱᓇᓱᐊᖃᑎᒌᓚᐅᕐᓯᒪᔪᒍᒃ ᐃᓕᓐᓂᐊᕕᒻᒥ.

ᑭᑐ: ᐊᓲ ᐱᓇᓱᐊᖃᑎᒌᓯᒪᕕᓯ ᓯᕗᓂᐊᓂ!

ᑌᒪ: ᐊᐊ, ᐃᓕᓐᓂᐊᑎᑦᓯᓯᒪᕗᖓ ᓴᓇᑦᑐᓴᐅᑎᓕᕆᓂᕐᒥᒃ ᐊᒻᒪᓗ ᓱᑯᐃᔦᓂᕐᒥᒃ. ᐃᓕᓐᓂᐊᑎᑦᓯᔨᓄᑦ ᐊᖓᔪᕐᖄᕆᔭᐅᓯᒪᔪᖓ ᐊᒻᒪᓗ ᓯᐊᕉᓕᕐᒪᑦ ᐱᓇᓱᕝᕕᒧᑦ ᐃᓕᑦᓱᖓ.

ᑭᑐ: ᓱᓇᐅᓯᒪᕚᑦ ᐱᓀᓗᑕᕆᓯᒪᔭᓯ ᐊᑐᕐᓯᒪᔭᓯ ᐱᓇᓱᖃᑎᒌᓕᑌᓐᓇᓱᓯ.

ᓖᒥ: ᐱᓇᓱᐊᖃᑎᒌᓐᓂᕆᓯᒪᔭᕗᑦ ᐱᓇᓱᖃᑎᕗᓐᓂᒃ ᐊᓯᐅᔨᓯᒪᔭᒍᑦ. ᑕᑯᓐᓇᑕᐅᒍᓯᕗᑦ ᐱᐅᔪᓪᓚᕆᐅᓯᒪᖕᖏᑐᖅ. ᐱᒐᓱᐊᒻᒪᕆᑦᓯᒪᔪᒍᑦ ᑐᑭᓯᒐᓱᐊᕐᓂᒧᑦ ᐱᐅᓯᐅᒥᑎᑦᓯᓂᕐᒧᑦ ᐱᓇᓱᐊᖃᑎᒌᓐᓂᑎᓐᓂᒃ ᐊᓯᖏᓐᓂᒃ ᑎᒥᐅᔪᓂᒃ ᓄᓇᓕᓕᒫᓂ ᐊᒻᒪᓗ ᑯᐯᒻᒥ ᐊᒻᒪᓗ ᖃᓄᖅ ᐱᓇᓱᐊᖃᑎᒌᒍᓐᓇᓂᑦᑎᓂᒃ.

ᑎᑌ: ᐊᐊ, ᐋᕐᕿᒋᐊᕆᓂᖅ ᐱᓇᓱᐊᖃᑎᒌᓐᓂᑎᓐᓂᒃ ᐊᓯᐅᔨᓯᒪᔭᑦᑎᓂᒃ ᐱᓇᓱᐊᖃᑎᖃᕐᓂᒧᑦ ᒫᓐᓇᐅᔪᖅ ᑎᒥᐅᔪᓂᒃ ᐱᓇᓱᐊᖃᑎᖃᕈᒪᓕᕐᑐᓂᒃ ᐅᓪᓗᒥ ᐊᒻᒪᓗ ᖃᐅᔨᒐᓱᐊᖃᑦᑕᓕᕐᓂᖏᓐᓄᑦ ᐅᕙᑦᑎᓄᑦ. ᐃᓕᑕᕐᓯᔭᐅᓂᕐᒥᒃ ᐃᒻᒥᒎᕐᑑᓂᑦᑎᓂᒃ ᑎᒥᐅᔫᑦᓱᑕ ᐱᓀᓗᑕᓪᓚᕆᐅᓚᐅᔪᖅ; ᑖᕐᓰᓂᕐᒥᒃ ᐱᓇᓱᕝᕕᑎᓐᓂᒃ, ᑕᑯᑦᓴᐅᓯᐊᕐᓂᑎᓐᓂᒃ ᐊᒻᒪᓗ ᖃᐅᔨᓴᕐᕕᐅᒍᓐᓇᓂᑦᑎᓂᒃ. ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᑦ Facebook-ᑯᑦ ᓄᐃᑕᑎᑦᓯᕕᖓ ᓯᕗᓪᓕᐸᐅᑦᓱᓂ ᐃᓕᓴᕐᓂᓕᕆᓂᕐᒥ ᓄᐃᓯᒪᔪᖅ ᑐᓴᐅᒪᖃᑎᒌᒍᑎᑎᒍᑦ ᖃᕆᑕᐅᔭᒃᑯᑦ!

ᑌᒪ: ᐱᒍᑦᔨᒍᑏᑦ ᐱᒍᑦᔨᔭᑦᑎᓂᒃ ᐊᒻᒪᓗ ᐱᑕᖃᕐᑎᓯᓂᖅ ᐱᓇᓱᒐᕐᒨᓕᖓᓗᐊᖕᖑᐊᑐᓂᒃ ᐱᒋᐅᕐᓴᑎᑦᓯᓂᕐᒧᑦ ᐱᔭᕆᐊᑐᔫᓯᒪᒻᒥᔪᖅ ᐱᓇᓱᐊᕋᑦᓴᕆᑦᓱᒍ. ᓯᕗᓪᓕᐹᒥ ᐃᓂᒐᓂ, ᐅᖄᓚᐅᑎᒨᕆᐊᖕᖓᓱᖓ ᐊᓯᖏᓐᓄᑦ ᑎᒥᐅᔪᓄᑦ ᐱᔭᕆᐊᑐᔫᓯᒪᒻᒥᔪᖅ ᑐᓴᓚᐅᕐᓯᒪᖕᖏᒪᑕ ᐊᑯᓂ ᐅᕙᑦᑎᓂᑦ.

ᑭᑐ: ᓱᓇᓃᒃ ᐱᒍᓐᓇᓯᓯᒪᕙᑦ ᐱᓇᓱᖃᑎᓯ?

ᑎᑌ: ᑌᕝ ᒥᒃᒪᓚᓐ ᐊᒻᒪᓗ ᔮᓐ ᑲᒥᓐᔅ ᐱᒋᐊᕐᑎᓯᓯᒪᔫᒃ ᓯᕗᓂᕐᒧᑦ ᐱᓇᓱᒐᑦᓴᓯᐅᕐᓂᒥᒃ. ᐱᕕᑦᓴᖃᕐᑎᓯᓯᒪᔪᖅ ᑕᑯᔭᐅᑎᑦᓯᓂᕐᒥᒃ ᐊᑦᔨᒌᖕᖏᑐᓂᒃ ᐱᓇᓱᒐᕐᒧᑦ ᐱᕕᖃᕐᕕᐅᒍᓐᓇᑐᓂᒃ ᐊᑐᐃᓐᓇᐅᔪᓂᒃ ᓄᓇᕕᐅᑉ ᓄᓇᓕᖓᓂ.

ᑌᒪ: ᐱᔭᕆᐊᑐᔪᕋᑕᐅᓯᒪᔪᖅ ᐃᓚᐅᑎᑦᓯᒐᓱᐊᕆᐊᒥᒃ ᓯᕗᓂᕐᒥ ᐱᓇᓱᒐᑦᓴᓯᐅᕐᓂᒧᑦ ᐃᓱᒪᒋᔭᐅᓂᖓᓂᒃ ᐊᓯᖏᓐᓄᑦ ᓄᓇᕕᒻᒥ ᑎᒥᐅᔪᓄᑦ. ᐱᓇᓱᒐᕐᒧᑦ ᓄᐃᑕᑎᑦᓯᑐᐃᓐᓇᕈᒪᓯᒪᖕᖏᓇᑦᑕ, ᐅᖄᖃᑎᒌᓐᓂᖃᑦᓯᐊᑑᖁᓯᒪᒐᑦᑎᒍ ᑖᓐᓇ. ᑐᓴᕐᑎᓯᓂᖃᖃᑦᑕᑎᓪᓗᒋᑦ ᐊᒻᒪᓗ ᑲᑎᒪᓂᐊᕈᓯᖃᖃᑦᑕᑎᓪᓗᒋᑦ ᑕᒃᑲᓂ ᐱᓇᓱᒐᑦᓴᓯᐅᕐᓂᒥ. ᓯᕗᓪᓕᐹᖅ ᑲᔪᓯᓂᖃᑦᓯᐊᓯᒪᔪᖅ, 120 ᐃᓄᐃᑦ ᓄᐃᓯᒪᔪᑦ! ᑖᓐᓇ ᐃᑲᔪᕐᓯᓯᒪᔪᖅ ᐃᓚᐅᒍᒪᓂᖏᓐᓄᑦ, ᐃᓕᓐᓂᐊᑏᑦ ᖃᐅᔨᓴᕈᓐᓇᓯᒪᔪᑦ ᐊᒻᒪᓗ ᑕᑯᓐᓇᕈᓐᓇᓯᑦᓱᑎᒃ ᐊᒥᓱᓂᒃ ᐊᑦᔨᒌᖕᖏᑐᓂᒃ ᐱᓇᓱᒐᕐᓂᒃ ᓄᐃᑕᑎᑕᐅᔪᓂᒃ.

ᓖᒥ: ᑲᔪᓯᑦᓯᐊᑐᒥᒃ ᓄᓇᓕᓐᓂᒃ ᑐᓴᐅᒪᑎᑦᓯᓂᕐᒥᒃ ᓄᓇᕕᒻᒥᐅᓂᒃ ᐱᔭᖃᑦᓯᐊᓯᒪᓂᕗᓐᓂᒃ ᐅᐱᒍᓱᑉᐳᒍᑦ ᐱᓇᓱᕝᕕᐅᓱᑕ. ᑐᕌᕐᑕᕗᑦ ᐱᑕᖃᕐᑎᓯᓂᕐᒧᑦ ᐊᑦᔨᒌᑦᓯᐊᒥᒃ ᐱᒍᓐᓇᓂᕐᒥᒃ ᐱᒋᐅᕐᓴᑎᑕᐅᓂᕐᒧᑦ ᐊᑐᐃᓐᓇᐅᑎᑕᑦᑎᓄᑦ. ᐃᓚᐅᓯᑎᓪᓗᖓ ᐱᓇᓱᕝᕕᒧᑦ ᑖᑦᓱᒧᖓ, ᒥᑭᓂᕐᓭᑦ ᓄᓇᓖᑦ ᐃᓚᐅᑎᑕᐅᖕᖏᓂᕐᒥᓂᒃ ᐃᑉᐱᒍᓱᖃᑦᑕᓯᒪᔪᑦ. ᐱᒻᒪᕆᐅᓯᒪᔪᖅ ᐃᑉᐱᒍᓱᑦᑎᓯᒐᓱᓐᓂᖅ ᐱᒻᒪᕆᐅᑎᑕᐅᓂᖏᓐᓂᒃ ᐊᒻᒪᓗ ᐃᓚᐅᑎᑕᐅᓂᖏᓐᓂᒃ ᐃᓕᓐᓂᐊᑎᑕᐅᒍᑎᖏᓐᓄᑦ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᑦ ᐱᑕᖃᕐᑎᓲᖏᓐᓄᑦ.

ᑌᒪ: ᓄᓇᒃᑰᔪᕐᓚᓂᒃ ᐊᖁᒋᐅᕐᓴᓂᖅ ᐱᔭᐅᒍᒪᓪᓚᕆᖃᑦᑕᑐᖅ ᐊᒻᒪᓗ ᐃᓚᐅᔪᕕᓂᕐᓄᓗ ᐱᐅᔪᓂᒃ ᐅᖄᕕᐅᖃᑦᑕᓱᑕ ᐊᒻᒪᓗ ᓄᓇᕕᒻᒥ ᐱᓇᓱᕝᕕᐅᔪᓄᑦ. ᐊᕐᕌᒍᓂ ᓯᑕᒪᓂ ᐊᑐᐃᓐᓇᐅᑎᑕᐅᓲᖑᓕᕐᑐᖅ ᐊᒻᒪᓗ ᐱᓇᓱᖃᑎᖃᑦᓯᐊᑎᑦᓯᓲᖑᔪᖅ ᐊᑦᔨᒌᖕᖏᑐᓂᒃ ᑎᒥᐅᔪᓂᒃ. ᒫᓐᓇ ᐱᒋᐅᕐᓴᓂᖅ ᓇᓗᓀᕐᑕᐅᒍᑎᑖᕐᑎᓯᓲᖑᓕᕐᑐᖅ ᐊᒻᒪᓗ ᐃᓕᑕᕆᔭᐅᓂᖃᕐᓱᓂ ᑯᐯᒃᑯᑦ ᑐᕐᖃᑕᕐᕕᖓᓂᑦ ᐃᓕᓐᓂᐊᓂᓕᕆᓂᕐᒥ.

ᑭᑐ: ᓱᓇᐅᕚᑦ ᓄᑖ ᐱᓇᓱᐊᕐᑕᓯ ᐊᒻᒪᓗ ᐱᒋᐅᕐᓴᑎᑦᓯᒍᑎᒋᑦᓱᒋᑦ ᐱᓇᓱᕝᕕᓯᓐᓂ ᐱᓇᓱᐊᕐᑕᓯ?

ᓖᒥ: ᑲᔪᓯᑎᑦᓯᓂᖅ ᓄᓇᓕᓐᓂ ᐱᒍᑦᔨᓂᕗᑦ ᓯᕗᓪᓕᐸᐅᑦᔨᔭᕗᑦ. ᑕᑯᓐᓇᕆᐊᖃᕐᑐᒍᑦ ᐃᑎᓂᕐᓴᒥᒃ ᓇᓗᓀᕐᓯᓗᑕ ᑭᖕᖒᒪᒋᔭᖏᓐᓂᒃ ᓄᓇᓖᑦ ᐊᒻᒪᓗ ᐃᓕᓐᓂᐊᑎᑦᓯᒍᑎᕗᑦ ᑖᒃᑯᓄᖓ ᑭᖕᖒᒪᒋᔭᐅᔪᓄᑦ ᐱᑕᖃᕐᑎᓯᓗᑕ. ᐱᓇᓱᐊᕐᒥᔪᒍᑦ ᒫᓐᓇ ᐊᕐᕌᒍᓄᑦ ᑕᓪᓕᒪᓄᑦ ᐸᕐᓀᒍᑎᒥᒃ ᐃᓘᓐᓈᒍᑦ ᐃᓕᓐᓂᐊᓂᕐᒨᓕᖓᔪᒥᒃ, ᐱᑐᑦᓯᒪᔪᒥᒃ ᐃᓕᓴᕐᓂᓕᕆᓂᐅᑉ 2016-2023 ᐋᕐᕿᓱᕐᓯᒪᑎᑦᓯᓂᕐᓄᑦ ᐸᕐᓀᒍᑎᓄᑦ.

ᑭᑐ: ᑐᓴᕐᑎᑫᓐᓇᕈᓐᓇᖃᕐᑎᒎᑦ ᐊᕐᕌᒍᓄᑦ ᑕᓪᓕᒪᓄᑦ ᐸᕐᓀᓯᒪᓂᑦᓯ ᒥᑦᓵᓄᑦ?

ᓖᒥ: ᐊᐊ, ᐱᑕᖃᕐᑎᓯᓂᖅ ᐱᒋᐅᕐᓴᑎᑕᐅᒍᓐᓇᓂᕐᒥᒃ ᓄᓇᕕᐅᑉ ᐱᓇᓱᒐᖏᓐᓅᓕᖓᔪᓂᒃ. ᖃᐅᔨᓴᕐᓂᒥᒃ ᓱᓇᐅᒻᒪᖔᑕ ᑭᖕᖑᒪᒋᔭᐅᔪᐃᑦ ᐊᒻᒪᓗ ᐋᕐᕿᓱᐃᓂᖅ ᐱᓇᓱᒐᕐᒨᓕᖓᔪᓂᒃ ᐱᒋᐅᕐᓴᑎᑕᐅᓂᕐᒥᒃ ᓇᓗᓀᕐᑕᐅᒍᑎᖃᕐᑑᒥᓗᓂ! ᑖᓐᓇᑕᒐ ᐱᓇᓱᐊᓚᖓᒻᒥᔭᕗᑦ ᐃᓚᒋᔭᐅᑎᓪᓗᒍ ᑕᓪᓕᒪᓂ ᐊᕐᕌᒍᓂ ᐸᕐᓀᒍᑎᑦᑎᓄᑦ.

ᑌᒪ: ᐊᓯᐊᖑᒻᒥᔪᖅ ᐱᒻᒪᕆᐅᒻᒥᔪᖅ ᐃᓕᓐᓂᐊᑎᓂᒃ ᐊᑕᑎᑦᓯᓂᖅ; ᖃᐅᔨᓴᕐᓂᖅ ᓄᑖᓂᒃ ᐊᑐᕋᑦᓴᓂᒃ ᐊᑐᐃᓐᓇᕈᕐᑎᕆᓂᕐᒧᑦ ᐃᓕᓐᓂᐊᑎᓂᒃ ᐱᓇᓱᒐᖃᕐᓂᒧᑦ. ᑲᔪᓯᑦᓯᐊᑎᑦᓯᓂᕐᒧᑦ ᐱᓇᓱᒐᕐᒨᑐᓂᒃ ᐊᖏᔫᓂᖏᓐᓂᒃ ᐃᓕᓐᓂᐊᑎᕕᓂᑦᑎᓂᒃ ᐊᒻᒪᓗ ᐱᔭᕇᕈᑎᑖᕋᑖᓂᒃ.

ᓖᒥ: ᑖᒃᑯᐊᑕᒐ ᐃᓓᓐᓇᑐᐃᓐᓇᖏᑦ ᐱᓇᓱᐊᖃᑦᑕᑕᑦᑕ. ᑲᔪᓯᕗᒍᑦ ᓄᐃᑦᓯᖃᑦᑕᓂᑦᑎᓂᒃ ᐊᒻᒪᓗ ᐱᓇᓱᐊᕈᑦᔨᓂᑦᑎᓂᒃ ᓄᓇᓕᓐᓂ ᓄᓇᕕᒻᒥ ᐱᒐᓱᐊᕐᓂᑎᒍᑦ ᐃᓕᓐᓂᐊᑎᑦᓯᓂᕐᓄᑦ ᐊᒻᒪᓗ ᐱᒋᐅᕐᓴᑎᑦᓯᓂᕐᓄᑦ ᐱᒍᒪᔭᖏᓐᓂᒃ.

ᑭᑐ: ᑕᑯᓐᓇᓱᒋᑦ ᑭᖑᓂᕐᒥ, ᓱᓇᓃᒃ ᐅᐱᒋᔭᖃᓗᐊᖕᖑᐊᕿᓯ?

ᓖᒥ: ᐊᒥᓲᕗᑦ ᐊᓕᐊᒋᓯᒪᔭᕗᑦ! ᐅᐱᒋᔭᕋ ᓯᕗᓂᕐᒥ ᐱᓇᓱᒐᑦᓴᓯᐅᕐᓂᖃᕐᑎᓯᓂᖅ – ᓄᐃᑕᑎᑦᓯᓯᒪᒻᒪᑦ ᓄᓇᓕᓐᓂ ᐅᕙᑦᑎᓂᒃ, ᐱᓇᓱᐊᖃᑎᖃᕐᑎᓯᑦᓱᓂ ᐱᐅᔪᓂᒃ ᐊᓯᖏᓐᓂᒃ ᑎᒥᐅᔪᓂᒃ ᓄᓇᕕᒻᒥᐅᓕᒫᓄᓪᓗ ᐱᐅᔫᓂᖃᕐᓱᓂ ᐃᓘᓐᓇᖏᓐᓄᑦ.

ᑎᑌ: ᐅᐱᒋᔭᕋᓕ ᐱᓇᓱᒐᕐᒨᓕᖓᔪᓂᒃ ᐱᒋᐅᕐᓴᑎᑦᓯᓂᖅ ᐊᑐᐃᓐᓇᐅᑎᓲᕗᑦ. ᐊᖏᓕᒋᐊᕐᓯᒪᓕᕐᑐᖅ ᐱᖓᓱᕕᓪᓗᐊᓱᓂ ᐱᓇᓱᐊᕐᑕᕗᑦ 2013-ᒥᑦ 2018-ᒧᑦ. ᓄᐃᑕᓂᕗᑦ ᐊᖏᓕᕙᓪᓕᐊᑐᐃᓐᓇᑐᖅ ᐊᑐᐃᓐᓇᐅᑎᑕᕗᑦ ᐊᖏᓕᕙᓪᓕᐊᓂᖏᓐᓄᑦ!

ᑌᒪ: ᐊᑕᐅᓯᓗᐊᖕᖑᐊᖅ ᐊᓕᐊᒋᓯᒪᔭᕋ ᐃᓕᓐᓂᐊᑎᑦᓯᒋᐊᒥᒃ ᐃᓕᓐᓂᐊᑎᐅᑉ ᐃᓅᓯᖓᓂᒃ ᐊᓯᑦᔩᒋᐊᒥᒃ. ᒥᑭᔫᒐᓗᐊᒥᒃ ᐃᓚᐅᓂᖃᓲᖑᒐᑦᑕ ᐊᕐᖁᓯᐅᕐᓂᒥᒃ ᐃᓅᓯᖏᓐᓄᑦ. ᑕᑯᒋᐊᒥᒃ ᐱᓇᓱᐊᕐᑕᑎᑦ ᐅᐱᒋᔭᐅᓂᖏᓐᓂᒃ ᐊᒻᒪᓗ ᑕᑯᓐᓇᕆᐊᒥᒃ ᐃᑲᔪᕐᓯᔭᑎᓐᓂᒃ ᑭᓇᑐᐃᓐᓇᑯᓐᓂᒃ. ᒫᓐᓇᐅᔪᖅ ᐱᓇᓱᒐᕋᓂᐊᓪᓛᑦ, ᑖᓐᓇᑕᒐ ᑲᔪᓯᑎᑦᓯᓲᖅ ᐅᕙᓐᓂᒃ, ᐱᑕᖃᕐᑎᓯᒋᐊᒥᒃ ᐱᕕᑦᓴᑖᕐᑎᓯᓂᕐᒥᒃ ᓄᓇᕕᒻᒥᐅᓄᑦ.

ᓖᒥ: ᐱᒻᒪᕆᐅᔪᖅ ᐃᓕᑕᕐᓯᓂᖃᕆᐊᒥᒃ ᐃᓄᓐᓂᒃ ᐱᓇᓱᐊᖃᑎᖃᓲᓂᒃ ᐅᕙᑦᑎᓂᒃ. ᐅᐱᒍᓱᒃᑯᒍᑦ ᐱᓇᓱᑦᑎᖃᕋᑦᑕ ᐱᓇᓱᐊᕈᒪᓂᖃᑦᓯᐊᑐᓂᒃ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᓐᓂ. ᑐᓂᒪᑦᓯᐊᑐᓂᒃ ᐱᓇᓱᖃᑎᖃᕐᑐᒍᑦ ᐊᒻᒪᓗ ᐃᓘᓐᓇᑕ ᐊᑕᐅᑦᓯᑯᑦ ᐱᒍᓐᓇᑎᑦᓯᖃᑦᑕᕋᑦᑕ!

ᑎᑌ: ᐃᑉᐱᒋᔭᖃᖃᑦᑕᑐᒍᑦ ᐅᑉᐱᕆᔭᐅᑦᓯᐊᓂᕐᒥᒃ ᐊᒻᒪᓗ ᐅᒃᑯᐃᖔᑦᓯᐊᓂᖏᓐᓂᒃ ᐃᓕᓴᕐᓂᓕᕆᓂᕐᒥ ᐊᐅᓚᑦᓯᔨᒻᒪᕆᓐᓄᑦ ᐊᒻᒪᓗ ᐃᓕᓴᕐᓂᓕᕆᓂᕐᒥ ᑭᒡᒐᑐᕐᑎᓄᑦ. ᐱᓇᓱᐊᕐᓯᒪᓪᓚᕆᑦᑐᒍᑦ ᑕᒪᐅᖓ ᑎᑭᐅᑎᒐᓱᐊᕐᓱᑕ ᐊᒻᒪᓗ ᑲᔪᓯᑦᓱᑕ ᐱᕈᕐᐸᓕᐊᑦᓱᑕ. ᐃᓄᐃᑦ ᐱᓇᓱᑦᑎᕗᑦ ᐱᓇᓱᕝᕕᑎᓐᓂ ᐊᑐᐃᓐᓇᐅᔪᑦ ᐱᓇᓱᐊᕆᐊᒥᒃ ᐊᒻᒪᓗ ᐅᑉᐱᕈᓲᑎᑦᓯᐊᓱᑕ. ᑲᑉᐱᐊᓱᖕᖏᑐᒍᑦ ᓄᑖᓂᒃ ᐅᑦᑐᕋᕆᐊᒥᒃ ᐊᒻᒪᓗ ᐊᑦᔨᐅᖏᑦᑐᓂᒃ ᐊᑐᕐᓗᑕ. ᐅᑉᐱᕈᓲᑎᑦᓯᐊᓂᖅ ᐊᒻᒪᓗ ᐊᑐᐃᓐᓇᐅᓯᐊᕐᓂᖅ ᐱᓇᓱᐊᕆᐊᓕᑦᑎᓄᑦ ᓲᖑᓂᕆᕙᖏᑦ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᑦ ᐱᓇᓱᖃᑎᒌᖕᖏᑦᑕ.

ᑭᑐ: ᖃᓄᐃᓕᖓᕚ ᐊᕐᕌᒍᓂ 20-ᓂ ᑕᑯᓗᒍ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᑦ?

ᑎᑌ: ᐱᔭᕆᐊᑐᔫᒻᒪᕆᒃ ᐊᐱᕆᐅᑏᑦ!

ᑭᑐ: ᓚᖔᕈᓐᓇᒥᔪᖅ ᐊᕐᕌᒍᓂ 10-ᓂ ᐅᓪᓗᒥ ᐱᒋᐊᕐᓗᒍ?

ᓖᒥ: ᐊᑐᐃᓐᓇᕈᓚᖓᓂᕗᑦ ᐱᑕᖃᕐᑎᓯᔨᐅᓪᓚᕆᓐᓂᐸᐅᓗᑕ ᐱᒋᐅᕐᓴᑎᑦᓯᓂᕐᒥᒃ ᐊᒻᒪᓗ ᐱᒍᓐᓇᐅᑎᑖᕐᑎᓯᓂᕐᒥᒃ ᓇᓗᓀᕐᑕᐅᒪᔪᓂᒃ ᐊᑐᐃᓐᓇᐅᑎᑕᐅᔪᓂᒃ ᓄᓇᕕᒻᒥ. ᓄᓇᕕᒻᒥ ᑎᒥᐅᔪᐃᑦ ᙯᖃᑦᑕᓚᖓᓂᖏᓐᓄᑦ ᐅᖄᖃᑎᖃᕆᐊᕐᑐᓗᑎᒃ ᖃᓄᖅ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᑦ ᐊᑐᐃᓐᓇᐅᑎᑦᓯᒍᓐᓇᒪᖔᑦ ᐱᒋᐅᕐᓴᑎᑦᓯᓂᕐᓂᒃ ᑭᖕᖒᒪᒋᔭᖏᓐᓅᓕᖓᔪᓂᒃ.

ᑎᑌ: ᖃᐅᔨᒪᔨᒻᒪᕆᕈᕈᒪᔪᒍᑦ ᐱᒋᐅᕐᓴᑎᑕᐅᓂᕐᒧᑦ ᐊᒻᒪᓗ ᐱᒍᓐᓇᐅᑎᑖᕐᓂᒧᑦ ᓇᓗᓀᕐᑕᐅᒍᑎᓕᓐᓂᒃ ᐊᑐᐃᓐᓇᐅᔪᓂᒃ ᐃᓄᒻᒪᕆᓐᓄᑦ ᓄᓇᕕᒻᒥ, ᐊᒻᒪᓗ ᑕᑯᓐᓇᑕᐅᓂᖃᕐᓗᑕ ᑌᒣᓐᓂᑎᓐᓂᒃ ᐊᓯᖏᓐᓄᑦ ᓄᓇᕕᒻᒥ ᑎᒥᐅᔪᓄᑦ. ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᑦ ᐱᓇᓱᕝᕕᖓ ᐅᐸᑦᑕᐅᖃᑦᑕᓕᕐᑎᓗᒍ ᓇᐅᑐᐃᓐᓇᓄᑦ ᑎᒥᐅᔪᓄᑦ ᐸᕐᓀᑐᓄᑦ ᐃᖏᕐᕋᑎᑦᓯᓂᕐᒥᒃ ᐱᒋᐅᕐᓴᑎᑦᓯᓂᕐᒧᑦ ᐃᓕᓐᓂᐊᑎᑦᓯᓂᕐᒥᒃ ᓄᓇᕕᒻᒥ.

ᑌᒪ: ᐅᖓᑖᓄᑦ ᐃᓘᓐᓈᒍᑦ ᐃᓕᓐᓂᐊᓂᓕᕆᓂᕐᒥᒃ ᐊᒻᒪᓗ ᐱᓇᓱᒐᕐᒧᑦ ᐱᒋᐅᕐᓴᑎᑕᐅᓂᕐᒥᒃ, ᐊᖏᓕᒋᐊᖁᔨᔪᖓ ᐅᓄᕐᓂᖏᓐᓂᒃ ᐳᕐᑐᓂᕐᓴᒥ ᐃᓕᓐᓂᐊᓂᕐᒥᒃ ᐱᒋᐅᕐᓴᑎᑕᐅᓂᕐᒧᑦ ᐃᓕᓐᓂᐊᑎᑦᓯᒍᑎᓂᒃ ᓄᐃᑕᑎᑕᕗᓐᓂᒃ ᐅᕝᕙᓘᓐᓃᑦ ᐊᑐᐃᓐᓇᐅᑎᑕᕗᓐᓂᒃ ᓄᓇᕕᒻᒥ, ᐆᑦᑐᑎᒋᓗᒍ, ᐳᕐᑐᓂᕐᓴᒋᐊᓪᓚᒥ ᓇᓗᓀᕐᓯᒍᑎᓂᒃ ᐊᒻᒪᓗ ᐊᒥᓱᑦ ᐊᓯᖏᑦ.

ᑭᑐ: ᐊᓕᐊᓇᕐᑐᒥᒃ ᓱᓕᔪᒥᒃ ᐅᖃᐅᑎᓚᐅᕐᑎᒍᑦ ᐃᓕᑦᓯ ᐱᖓᓱᑦ ᒥᑦᓵᓄᑦ!

ᑕᑭᔪᐃᓐᓈᓗᔪᒍᑦ. ᐱᓇᓱᑦᑎᕗᑦ ᐅᖃᓲᑦ “ᑕᑭᔪᐃᑦ ᐱᓇᓱᖃᑎᒌ”!

ᑭᑐ: ᓇᑯᕐᒦᒃ, ᐊᓕᐊᓇᕐᑑᑫᓐᓇᖁᖅ. ᕿᓚᓈᕐᓇᑐᖅ ᑕᑯᒋᐊᒥᒃ ᑲᔪᓯᔪᒥᒃ ᐊᖏᓕᕙᓪᓕᐊᓂᑦᓯᓂᒃ ᐊᒻᒪᓗ ᐱᐅᓯᐅᒥᑎᑦᓯᒐᓱᐊᕐᓂᓯᓐᓂᒃ ᐱᒍᑦᔨᒍᑎᓂᒃ ᐊᑐᐃᓐᓇᐅᑎᑕᐅᔪᓂᒃ ᐃᓄᒻᒪᕆᓐᓄᑦ ᓄᓇᕕᒻᒥ.

ᐱᓇᓱᖃᑎᒌᑦ: ᓇᑯᕐᒦᒃ!

Back to News