ᐊᐱᕆᔭᐅᔪᖅ ᒪᓕᓴ ᐊᑭᒪᓇᒧᑦ

ᐃᓕᓴᕐᓂᓕᕆᓂᖅ ᐃᓕᑕᕐᓯᓂᖃᕈᒪᕗᖅ ᐱᓇᓱᐊᑦᓯᐊᓯᒪᓂᖏᓐᓄᑦ ᐱᓇᓱᑦᑎᒋᓕᕐᑕᕗᑦ ᐊᕐᕌᒍᓂ ᐊᒥᓱᓂ. ᐃᑦᓯᕙᖃᑎᖃᓚᐅᕐᑐᒍᑦ ᑐᓴᕐᑎᑕᐅᑦᓱᑕ ᖃᓄᖅ ᑎᒥᐅᔪᒥᒃ ᑕᑯᓯᒪᓕᕐᒪᖔᑕ ᐊᓯᑦᔨᓂᖓᓂᒃ, ᓱᓇᓂᒃ ᐅᖁᒣᓐᓂᐹᓂᒃ ᐊᑑᑎᓯᒪᔭᖏᓐᓂᒃ ᐊᒻᒪᓗ ᓱᓇᓂᒃ ᐱᐅᔪᓂᒃ ᐊᑐᕐᓯᒪᔭᖏᓐᓂᒃ. ᖃᓄᓪᓗᐊᑎᒋ ᐊᑐᕐᓯᒪᔭᖏᓐᓂᒃ ᐊᒻᒪᓗ ᓂᕆᐅᒋᔭᖏᓐᓂᒃ ᓯᕗᓂᕐᒥ! ᒪᐅᓇ ᓇᕐᓂᓗᒍ ᐊᓪᓚᓂᐊᕈᒪᒍᕕᐅᒃ ᐊᐱᕐᓱᑕᐅᓂᕕᓂᖅ.

ᐊᑎᖓ: ᓕᓐᑕ ᕗᑦ

ᐱᓇᓱᕝᕕᖓ: ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᑏᑦ ᐃᓕᓐᓂᐊᑎᑕᐅᓂᖏᑦ

ᐊᕐᕌᒍᓂ ᐱᓇᓱᑦᓯᒪᓂᖓ: 32 ᐊᕐᕌᒍᐃᑦ

ᑭᓇᒃᑯᑐᐃᓐᓇᓄᒃ ᑐᓴᐅᒪᖃᑎᒌᑦᑎᓯᔨ: ᓱᓇᓃᒃ ᐊᑦᔨᒌᖕᖏᑐᓂᒃ ᐱᓇᓱᒐᖃᕐᓯᒪᓕᕐᕿᑦ ᐊᒻᒪᓗ ᑲᒪᒋᔭᖃᕐᓯᒪᓕᕐᕿᑦ ᐊᕐᕌᒍᓂ ᐊᓂᒍᕐᑐᓂ?

ᓕᓐᑕ ᕗᑦ (ᓕᕗ): ᐊᓪᓚᑎᐅᑦᓱᖓ, ᐊᓪᓚᕕᒻᒥ ᐱᓇᓱᑦᑎ ᐱᒋᐊᖕᖓᓂᕐᒥ ᐳᕐᑐᓂᓕᒃ, ᐊᐅᓚᑦᓯᓂᓕᕆᓂᕐᒥ ᐱᓪᓗᑯᒋᐊᓕᓕᕆᔨ, ᐊᐅᓚᑦᓯᓂᓕᕆᕕᒻᒥ ᐱᓇᓱᑦᑎ.

ᑭᑐ: ᓱᓇᒨᑦ ᐱᓇᓱᑦᑎᐅᖏᓐᓇᓚᕿᓲᖑᕕᑦ ᑲᑎᕕᒃ ᐃᓕᓴᕐᓂᓕᕆᓂᕐᒥ?

ᓕᕗ: ᐱᕙᓪᓕᖁᑎᖏᑦ ᐃᓚᐅᓪᓚᕆᑦᑐᑦ. ᓚᖕᖑᐊᖁᖓ. ᓚᖕᖑᐊᖏᓪᓗᖓ, ᐃᓕᓐᓂᐊᓂᕐᒧᑦ ᑲᔪᓯᑦᓯᐊᓂᖏᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᑏᑦ ᐱᔭᕇᕐᕈᓯᕐᓂᖏᑦ ᐊᑭᓕᕐᑐᑕᐅᔪᑦ ᐃᓕᓴᕐᓂᓕᕆᓂᕐᒧᑦ. ᐃᓚᐅᓂᕐᒧᑦ ᑕᒪᑦᓱᒧᖓ ᐃᑲᔪᕐᓯᓂᕐᒧᑦ ᑲᔪᓯᑦᓯᐊᓂᖏᓐᓄᑦ ᑕᒪᓐᓇ ᐅᕙᓐᓂᒃ ᑲᔪᓯᒪᑎᑦᓯᓯᐊᓲᖅ ᑕᒃᑲᓂ.

ᑭᑐ: ᖃᓅᖅ ᑕᑯᓯᒪᕕᑦ ᐃᓕᓴᕐᓂᓕᕆᓂᕐᒥ ᐊᓯᑦᔨᓂᖓᓂᒃ ᐊᕐᕌᒍᓂ 10-ᓂ, 20-ᓂ ᐊᒻᒪᓗ 30-ᓂ?

ᓕᕗ: 10-ᓂ ᐊᕐᕌᒍᓂ: ᐊᓪᓚᕕᒻᒪᕆᒃ ᐃᓂᖃᕐᓯᒪᔪᖅ ᐃᓕᓐᓂᐊᕕᒻᒥᒃ ᐃᓄᖃᖕᖏᑐᒥ ᑐᐊᕚᓪᒥ ᐊᒻᒪᓗ ᓈᑦ-ᑖᒻ-ᑎ-ᑲᕌᔅᒥ (NDG). ᐃᓕᓐᓂᐊᑏᑦ ᐱᒍᑦᔭᐅᕕᖓ ᐊᓪᓚᕕᒻᒪᕆᒻᒦᖃᑦᑕᓯᒪᔪᖅ ᑭᓯᐊᓂ ᓅᑕᐅᓯᒪᔪᖅ ᓭᑦ-ᐋᓐ-ᑎ-ᐱᐊᓪᕘ ᐊᓪᓚᕕᖓᓄᑦ. ᐊᓯᑦᔨᓂᐅᓯᒪᒻᒥᔪᖅ ᖃᕆᑕᐅᔦᑦ ᓄᐃᑕᐅᓂᖓ, ᖃᕆᑕᐅᔭᑎᒍᑦ ᐱᑐᑦᓯᒪᐅᑎ ᐊᒻᒪᓗ ᐊᑦᔨᒌᖕᖏᑐᑦ ᓄᑖᑦ ᐃᓱᕐᕆᐅᑏᑦ ᓄᑕᐅᓯᓕᑎᕐᑕᐅᓂᖏᑦ.

20-ᓂ ᐊᕐᕌᒍᓂ: ᐊᓪᓚᕕᒻᒪᕆᒃ ᓅᑕᐅᓯᒪᔪᖅ ᕖᓪ ᓭᑦ ᓚᕌᓐᒧᑦ. ᐃᓕᓐᓂᐊᑐᓕᕆᕕᒃ ᐱᓇᓱᕝᕕᖓ ᓅᑕᐅᑎᓪᓗᒍ ᑰᑦᔪᐊᒧᑦ. ᐃᓘᓐᓇᖏᑦ ᐱᓇᓱᕝᕖᑦ ᐱᕈᕐᓯᒪᓕᕐᑐᑦ, ᒪᕐᕉᒃ ᐱᖓᓱᓪᓘᓃᑦ ᐱᓇᓱᑦᑏᑦ ᐃᓚᖓᓂ ᖁᓖᑦ ᐅᖔᑖᓄᑦ ᐱᓇᓱᑦᑏᑦ. ᐊᒻᒪᓗ ᑭᖑᓪᓕᐹᒥ, ᓄᑖᑦ ᐃᓕᓐᓂᐊᕖᑦ ᐊᒻᒪᓗ ᐃᓄᒻᒪᕇᑦ ᐃᓕᓐᓂᐊᕕᖏᑦ ᐅᒃᑯᐃᑕᐅᓯᒪᔪᑦ ᓄᓇᕕᒻᒥ.

30-ᓂᒃ ᐊᕐᕌᒍᓂ: ᑭᖑᓂᕐᒥ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᑏᑦ ᐱᔭᕇᕐᓯᒪᔪᑦ ᒫᓐᓇ ᐱᒻᒪᕆᓐᓂᒃ ᐳᕐᑐᓂᕐᓴᓂᒃ ᑲᒪᔨᐅᓕᕐᑐᑦ ᐃᓕᓴᕐᓂᓕᕆᓂᕐᒥ. ᐅᓄᕐᓂᖏᑦ ᐊᑭᓕᕐᑐᑕᐅᔪᑦ ᐃᓕᓐᓂᐊᑏᑦ ᐳᕐᑐᓯᒋᐊᓪᓚᕆᑦᓯᒪᓕᕐᑐᖅ ᐊᒻᒪᓗ ᓄᑖᖅ ᓄᐃᑕᐅᓂᖓ ᓄᓇᕕᒃ ᓯᕗᓂᑦᓴᕘᒃᑯᓂ ᐃᓘᓐᓇᑎᒃ ᐱᐅᔪᐃᑦ ᐱᕙᓪᓕᐊᓯᒪᓕᕐᑐᑦ.

ᑭᑐ: ᓱᓇᐅᕚ ᐅᐱᒋᓂᕐᐹᕆᓯᒪᔦᑦ ᐱᓇᓱᐊᕐᓱᑎᑦ ᑲᑎᕕᒃ ᐃᓕᓴᕐᓂᓕᕆᓂᕐᒥ?

ᓕᕗ: ᓵᓚᐅᓯᒪᖕᖏᓂᕋ ᑲᑕᑦᔭᓕᐅᑎᑦᓱᑕ (5-ᓂᒃ ᑖᕐᓵᐱᑲᓴᓐᓂ). ᐊᒻᒪᓗ ᓇᑯᕐᒦᑕᐅᓂᖅ ᐱᔭᕇᕐᑐᓄᑦ ᐃᑲᔪᕐᓯᓯᒪᓂᕋᓄᑦ ᐊᑑᑎᔭᖏᓐᓂ.

ᑭᑐ: ᖃᓄᖅ ᐅᖃᐅᑦᔩᒐᔭᕐᕿᑦ ᓄᑖᓄᑦ ᐱᓇᓱᑦᑎᓄᑦ?

ᓕᕗ: ᐊᐅᒪᔮᕈᓐᓀᓗᑎᑦ ᐃᓕᑦᓯᒐᓱᐊᑦᓯᐊᓗᒋᑦ ᓲᓱᒋᑦᓯᐊᓗᒋᓪᓗ ᐃᓗᕐᖁᓯᖏᑦ.

ᑭᑐ: ᓱᓇᓱᐊᕆᐊᒦᒃ ᐊᓕᐊᒋᔭᖃᕐᕿᑦ ᐱᒍᓐᓇᓯᑐᐊᕋᕕᑦ (ᓱᖃᑦᓯᒍᑎᒋᑦᓱᒋᑦ, ᐊᓕᐊᒋᑦᓱᒋᑦ, ᐱᒍᒪᓪᓚᕆᑦᓱᒋᑦ)?

ᓕᕗ: ᖃᕐᖃᒥ ᓯᑐᕋᐅᓯᔭᕆᐊᒥᒃ, ᐊᐅᓪᓚᕆᐊᒥᒃ, ᓱᑲᓕᐅᑎᔩᑦ F1-ᓚᔭᐅᓲᑦ

ᑭᑐ: ᐃᑲᐅᕐᓂᖅ, ᑮᓇᐅᔦᑦ ᐊᒻᒪᓗ ᐃᑉᐱᒋᒋᐊᓕᑎᑦ ᐃᓱᒫᓗᓐᓇᖏᑉᐸᑕ….ᓱᕋᔭᕐᕿᑦ?

ᓕᕗ: ᐃᓅᓯᕐᒥ ᐃᓅᒐᔭᕐᖁᖓ ᐱᒍᓐᓇᕕᓕᒫᕋᓄᑦ ᐃᓚᒃᑲᓗ ᐊᒻᒪᓗ ᐱᖃᑎᒃᑲ… ᐊᐅᓪᓚᑲᑕᓪᓗᖓ, ᓯᑐᕋᐅᓯᔭᕐᓗᖓ ᐊᒻᒪᓗ ᐃᓚᐅᓗᖓ ᓯᓚᕐᔪᐊᓕᒫᒥ ᖃᔫᑦᑕᑖᕋᓱᐊᕐᑐᓄᑦ ᓯᑐᕋᐅᓯᔭᕐᓱᑎᒃ ᐊᒻᒪᓗ ᓱᑲᓕᐅᑎᔪᓄᑦ ᓯᓚᕐᔪᐊᓕᒫᒥ!

 

Back to News