ᑭᓇᒃᑯᑦ ᐃᓚᐅᒍᓐᓇᑐᑦ?

ᐃᓄᐃᑦ ᐊᑭᓕᕐᑐᐃᒍᑦᔭᐅᒍᒪᔪᑦ ᑲᑎᕕᒃ ᐃᓕᓴᕐᓂᓕᕆᓂᒧᑦ (KI) ᐃᓕᓐᓂᐊᓂᐊᕋᒥᒃ ᐳᕐᑐᓂᕐᓭᑦ ᑭᖑᓂᐊᒍᑦ ᐳᕐᑐᓂᓕᓐᓂᒃ ᓂᐳᕐᑎᓯᒋᐊᓖᑦ ᐃᑭᓐᓂᐹᖓᓄᑦ ᐅᑯᓃᖓ ᒪᕐᕉᓂᒃ ᐱᑕᖃᕆᐊᓖᓐᓂᒃ:

  1.  ᐃᓚᐅᔫᓂᖅ* ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᒧᑦ (JBNQA), ᐊᑐᕐᓗᓂᓗ ᓄᓇᓕᐅᑉ ᐃᓚᐅᔪᓂᒃ ᐊᑐᕐᑐᓂᒃ ᓈᓭᒪᒍᑎᖓᓂ;*ᐃᑉᐱᒋᔭᐅᓕ: ᐃᓄᒃ ᐃᓚᐅᔫᓂᕐᒥᒃ ᐃᓕᑕᕆᔭᐅᒍᑎᑖᕐᓯᒪᔪᖅ ᑲᑎᑎᑕᐅᓂᒃᑰᑎᓪᓗᒍ ᐊᑭᓕᕐᑐᐃᒍᑦᔭᐅᒍᓐᓇᑐᖅ ᓄᓇᕕᒻᒥ ᓄᓇᖃᓚᐅᕈᓂ ᐃᑭᓐᓂᐹᖓᓄᑦ 12-ᓂᒃ ᑕᕐᕿᓂᒃ ᐊᑭᓕᕐᑐᐃᒍᑦᔭᐅᓂᕐᒥᒃ ᑐᑦᓯᕋᖕᖏᓂᕐᒥᓂ.
  2.  ᓂᐳᕐᑎᓯᓂᖅ ᐃᓕᓐᓂᐊᓯᒪᓂᒃᑯᑦ ᐊᒻᒪᓗ ᐃᑎᕐᑎᑕᐅᓚᖓᓗᓂ ᐱᑕᖃᕆᐊᓕᓐᓂᒃ ᑎᒥᒥ(ᓂ) ᐃᓕᓐᓂᐊᕕᒋᒍᒪᔭᕐᓂ;

ᐊᓯᒋᐊᓪᓚᖏᑦ ᓂᐳᕐᑎᒋᐊᓖᑦ ᐊᑐᑐᐃᓐᓇᕆᐊᖃᕐᒥᔪᑦ ᐊᒻᒪᓗ ᐅᖃᕐᑕᐅᓱᑎᒃ ᐊᑭᓕᕐᑐᐃᒍᑦᔨᓂᕐᒧᑦ ᒪᓕᒐᕐᒥ ᐊᒻᒪᓗ ᑕᒪᒃᑯᐊ ᑕᑯᑦᓴᐅᕗᑦ ᐅᕙᓂ.

ᖃᓄᐃᑦᑐᒥᒃ ᐃᑲᔪᕐᓯᒪᓂᕐᒥᒃ ᓄᐃᑕᑦᓯᕙᑦ ᐊᒻᒪᓗ ᑲᒪᒋᒋᐊᓕᒃᑲ ᓱᓇᐅᕙᑦ?

ᐳᕐᑐᓂᕐᓭᑦ ᑭᖑᓂᐊᒍᑦ ᐃᓕᓐᓂᐊᑎᓂᒃ ᐱᒍᑦᔨᕕᒃ ᑲᑎᕕᒃ ᐃᓕᓴᕐᓂᓕᕆᓂᕐᒥ ᐊᐅᓚᑦᓯᔨᐅᕗᖅ ᐃᓕᓐᓂᐊᓂᓕᕆᔨᒃᑯᑦ ᐳᕐᑐᓂᕐᓭᑦ ᑭᖑᓂᐊᒍᑦ ᐊᑭᓕᕐᑐᐃᒍᑦᔨᒍᑎᖏᓐᓂᒃ. ᑐᕌᕐᑕᐅᔪᖅ ᐊᑭᓕᕐᑐᐃᒍᑦᔨᓂᐅᑉ ᒪᓕᒐᖓᓄᑦ ᐃᓕᖓᕗᖅ ᓴᐳᒻᒥᓂᕐᒧᑦ, ᑲᑦᓱᙰᓕᑎᕆᓂᕐᒧᑦ ᐊᒻᒪᓗ ᐃᑲᔪᕐᓂᒧᑦ ᐃᓄᓐᓂᒃ ᐃᓚᐅᔪᓂᒃ ᐱᓇᓱᓐᓂᖏᓐᓂ ᐳᕐᑐᓂᒃᓭᑦ ᑭᖑᓂᐊᒍᑦ ᐃᓕᓐᓂᐊᓂᕐᒥᓂᒃ.

ᒪᓕᒐᖅ ᑐᑭᓕᐊᕐᓯᔪᖅ ᐃᓚᐅᒍᓐᓇᓂᐅᑉ ᒪᓕᒐᖏᓐᓂᒃ ᐊᑭᓕᕐᑐᐃᒍᔭᐅᓚᖓᓗᓂ, ᓱᓇᓂᓪᓗ ᐊᑭᓕᕆᐊᓕᓐᓂᒃ ᐊᒻᒪᓗ ᐱᐅᓕᓐᓂᐊᒐᕐᓂᒃ ᐊᑭᓖᒻᒪᖔᑕ, ᐊᒻᒪᓗ ᐱᑦᔪᔭᐅᒍᑎᓂᒃ ᐱᔪᓐᓇᑕᕐᓂᐅᕕᑦ ᐃᓕᓐᓂᐊᑎᐅᓗᑎᑦ.

ᐊᑭᓕᕐᑐᐃᒍᑦᔭᐅᓱᓂ ᐃᓕᓐᓂᐊᑎᐅᓂᖅ ᒪᓕᑦᑎᖃᕐᒥᔪᖅ ᐃᕝᕕᑦ ᑲᒪᒋᒋᐊᓕᑎᓐᓂᒃ.

ᑕᑯᒍᓐᓇᑐᑎᑦ ᐊᓪᓚᓂᐊᕐᓗᑎᓪᓗ ᐱᑦᓯᐊᕈᑎᒋᒋᐊᓕᓐᓄᑦ ᒪᓕᒐᕐᓂᒃ ᐃᓕᓐᓂᐊᑎᓄᑦ ᐊᑭᓕᕐᑐᐃᒍᑦᔭᐅᔪᓄᑦ ᐊᒻᒪᓗ ᐊᑭᓕᕐᑐᐃᒍᑦᔨᓂᐅᑉ ᒪᓕᒐᖓᓂᒃ ᑐᑭᓯᒋᐊᑦᓯᐊᓚᖓᓗᑎᑦ.

ᖃᐅᔨᒪᒍᑎᒋᐊᓪᓚᓂᒃ ᐱᒋᐊᖃᕐᕿᑦ? ᐊᐱᕐᓲᑎᑦᓴᖃᕐᕿᑦ?

ᐋᖃᐅᑐᐊᕐᐸᑦ, ᐅᕙᑦᑎᓄᑦ ᐅᖃᕐᓗᑎᑦ, ᐊᓕᐊᓚᖓᒐᑦᑕ ᐃᓕᓐᓂᒃ ᐃᑲᔪᕆᐊᖅ!

ᐊᓪᓗᕆᐊᕐᓂᒪᕆᖏᑦ ᐊᒻᒪᓗ ᐅᓪᓗᐃᑦ ᐃᓱᓕᕕᖏᑦ

ᑐᑭᑖᕐᓂᖅ ᐃᓕᓐᓂᐊᓚᖓᓗᓂ ᐳᕐᑐᓂᕐᓭᑦ ᑭᖑᓂᐊᒍᑦ ᐃᓕᓐᓂᐊᕈᑎᓂᒃ ᐱᒻᒪᕆᒻᒥᒃ ᑐᑭᑖᕐᓂᐅᕗᖅ. ᐱᕕᖃᕐᑎᓯᐊᕖᖕᖓᓗᑎᑦ ᐊᒻᒪᓗ ᐅᐃᒪᒍᓐᓀᓗᑎᑦ ᐃᓚᐅᒍᒪᐅᑎᓕᐅᕐᓗᑎᑦ ᑕᒪᖏᓐᓄᑦ ᐊᑭᓕᕐᑐᐃᒍᑦᔭᐅᓂᕐᒧᑦ ᐊᒻᒪᓗ ᐃᓕᓐᓂᐊᕕᒋᒍᒪᔭᕐᓄᑦ ᐊᒻᒪᓗ ᐃᓕᓐᓂᐊᕈᒪᔭᑎᓐᓄᑦ.

ᐅᑯᓂᖓ ᐊᓪᓗᕆᐊᕐᑕᕈᑎᓂᒃ ᐊᑐᕆᐊᖃᕐᑐᑎᑦ ᐃᓕᓐᓂᐊᕈᒪᒍᕕᑦ ᐳᕐᑐᓂᕐᓭᑦ ᑭᖑᓂᐊᒍᑦ ᐳᕐᑐᓂᓕᓐᓂ ᐊᒻᒪᓗ ᐊᑭᓕᕐᑐᐃᔨᖃᕈᒪᒍᕕᑦ ᑲᑎᕕᒃ ᐃᓕᓴᕐᓂᓕᕆᓂᕐᒥᒃ.

1

ᓂᕈᐊᕐᓗᑎᑦ ᐃᓕᓐᓂᐊᕈᒪᔭᕐᓂᒃ ᐊᒻᒪᓗ ᐃᓕᓐᓂᐊᕕᒻᒥᒃ ᒥᓂᒻᒥᑎᑦᓯᔪᒥᒃ:

ᒪᓕᓪᓗᓂ ᓱᓇᓂᒃ ᐃᓕᓐᓂᐊᕈᒪᓂᕐᓂᒃ ᐊᒻᒪᓗ ᐃᓕᓐᓂᐊᕈᑎᓂᒃ ᓂᕈᐊᕐᑕᑎᓐᓂᒃ, ᐁᒍᓐᓇᐳᑎᑦ ᐱᓇᓱᒐᕐᒥᒃ ᐃᓕᓐᓂᐊᕕᒻᒧᑦ, ᐃᓕᓐᓂᐊᕕᒻᒪᕆᒻᒧᓘᓐᓃᑦ CEGEP-ᒧᑦ ᐅᕝᕙᓘᓐᓃᑦ ᓯᓚᑦᑐᓴᕐᕕᒧᑦ. ᖃᐅᔨᒪᒍᑎᒋᐊᓪᓓᑦ ᐃᓕᓐᓂᐊᕈᑎᓂᒃ ᓇᓪᓕᑳᕋᑦᓴᓂᒃ ᑕᑯᑦᓴᐅᕗᑦ ᐅᕙᓂ “ᓱᓇᒥᒃ ᐃᓕᓐᓂᐊᕈᓐᓇᐳᖓ”.

2

ᐊᑭᓕᕐᑐᐃᒍᑦᔭᐅᓂᕐᒥᒃ ᑐᑦᓯᕋᐅᑎᓕᐅᕐᓗᑎᑦ:

ᐊᑭᓕᕐᑐᐃᔨᖃᕐᓂᒥᒃ ᑐᑦᓯᕋᐅᑎᐅᓕᐅᕐᓂᖅ ᐃᓱᓕᕕᓕᒃ ᕕᕈᐊᕆ 1-ᒥᒃ ᐅᑭᐊᒃᑯᑦ ᐃᓕᓐᓂᐊᕈᑎᓄᑦ ᐊᒻᒪᓗ ᐅᒃᑑᐱᕆ 1-ᒥᒃ ᐅᑭᐅᒃᑯᑦ ᐃᓕᓐᓂᐊᕈᑎᓄᑦ. ᐊᑭᓕᕐᑐᐃᔨᖃᕐᓂᒥᒃ ᑐᑦᓯᕋᐅᑎᐅᑉ ᐊᓪᓚᕕᑦᓴᖓᓂᒃ ᐊᓪᓚᒍᓐᓇᑐᑎᑦ ᐅᕙᓂ. ᐳᐃᒍᕐᑌᓕᓗᑎᑦ, ᐊᑭᓕᕐᑐᐃᒍᑦᔭᐅᓂᕐᒥᒃ ᑐᑦᓯᕋᐅᑎᓕᐅᕇᕈᕕᑦ ᑐᑦᓯᕋᕆᐊᖃᕐᒥᒐᕕᑦ ᐃᑎᕈᓐᓇᑎᑕᐅᓂᕐᒥᒃ ᐃᓕᓐᓂᐊᕈᑎᒧᑦ ᓂᕈᐊᕐᑕᓄᑦ ᑐᕃᓐᓇᓗᑎᑦ ᐃᓕᓐᓂᐊᕕᒻᒧᑦ ᒪᓂᒻᒥᕕᖓᓄᑦ. ᖃᐅᔨᒋᐊᕐᓗᒍ ᐅᓇ “ᓱᓇᒥᒃ ᐃᓕᓐᓂᐊᕈᓐᓇᐳᖓ” ᐃᓚᖓ ᐅᖃᕐᒪᑦ ᐃᓱᓕᕕᓐᓂᒃ ᐱᓇᓱᒐᕐᒥᒃ ᐱᒋᐅᕐᓴᐅᑎᓄᑦ, CEGEP-ᒥᓗ ᐊᒻᒪᓗ ᓯᓚᑦᑐᓴᕐᕕᒥ ᐃᓕᓐᓂᐊᕈᑎᓄᑦ.

3

ᑎᑭᑎᑦᓯᓗᑎᑦ ᐊᑐᕆᐊᓕᓐᓂᒃ ᐊᓪᓚᓂᒃ:

ᐊᑭᓕᕐᑐᐃᒍᑦᔭᐅᓂᕐᒥᒃ ᑐᑦᓯᕋᐅᑏᑦ ᑲᔪᓯᑎᑕᐅᓂᐊᕐᐸᑦ, ᐃᓚᐅᑎᑦᓯᒋᐊᖃᕐᑐᑎᑦ ᐊᑦᔨᓂᒃ ᐅᑯᓄᖓ ᐊᓪᓚᓯᒪᔪᓄᑦ: ᐃᓅᓕᕐᓂᒧᑦ ᓇᓗᓀᒃᑯᑕᖅ, ᐋᓐᓂᐊᕕᒻᒥ ᑲᒪᒋᔭᐅᒍᑎ ᓵᑦᑐᔮᖅ, ᐃᓕᓐᓂᐊᕕᐅᑉ ᐃᓕᓐᓂᐊᑎᒧᑦ ᐊᓪᓚᖁᑎᖏᑦ ᐊᒻᒪᓗ ᐃᓚᐅᔫᒍᑎ ᓵᑦᑐᔮᖅ.

4

ᐊᒻᒪᖏᓐᓇᓗᑎᑦ ᐅᕙᑦᑎᓄᑦ:

ᐅᕙᑦᑎᓄᑦ ᐅᖃᓗᒪᖃᑦᑕᓗᑎᑦ ᐅᕗᖓ: 514 457-1178