ᐃᓕᓐᓂᐊᓇᐅᑉ ᐊᕐᕌᒍᖓ ᐃᓱᓕᕕᒻᒥᓄᑦ ᑎᑭᐅᑎᑎᓪᓗᒍ, ᑲᑎᖃᑎᒌᓐᓂᐅᓚᐅᔪᕗᖅ ᐊᒻᒪᓗ ᐅᓪᓗᖃᕐᑎᓯᓂᐅᑦᓱᓂ ᐱᓇᓱᐊᓪᓚᕆᑦᓯᒪᓂᖏᓐᓂᒃ ᐃᓕᓐᓂᐊᑏᑦ, ᒫᓐᓇᐅᔪᖅ ᐱᔭᕇᕈᓯᕐᑐᓂᒃ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᓂᕐᒥᓂ. ᐃᓄᓕᒫᓂᒃ ᑐᓴᐅᒪᑎᑦᓯᔨᐅᑦᓱᑕ ᐱᓇᓱᑦᑎᐅᓱᑕ ᙯᖁᔭᐅᒪᓚᐅᔪᕗᒍᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᑎᓄᑦ ᐱᔭᕇᕈᓯᕐᑕᐅᔪᓄᑦ ᐊᕐᕌᒍᑕᒫᑦ ᕿᑎᕋᓕᒥ ᓂᕆᑎᑕᐅᓂᖏᓐᓄᑦ, ᐊᑑᑎᔭᐅᓚᐅᔪᖅ ᐱᖓᔪᐊᓐᓂ, ᔫᓂ 6-ᒥ ᓯᓂᑦᑕᕕᖓᓂ Holiday Inn ᒪᓐᑐᔨᐊᒥ ᒥᕝᕕᐅᑉ ᓴᓂᐊᓂ. ᑲᑎᖃᑎᒌᓐᓂᖅ ᐱᒍᒪᓕᕐᑎᓯᓂᖃᑦᓯᐊᓚᐅᔪᖅ. ᕿᑎᕋᓕᕇᒥ ᐸᑎᑦᑕᓂᖃᕐᓱᓂ ᐊᒻᒪᓗ ᐊᓕᐊᓱᒍᑎᖃᕐᓱᓂ ᐱᔭᕇᕐᑕᐅᔪᓂᒃ ᑮᓇᐅᔭᖃᕐᑎᑕᕗᓐᓄᑦ ᐃᓕᓐᓂᐊᑎᓄᑦ. ᐊᐱᕐᓱᓂᖃᓚᐅᒍᑦ ᐊᒥᓲᖕᖏᑐᓂᒃ ᐱᔭᕇᕈᑎᑖᕐᑐᓂᒃ ᐊᒻᒪᓗ ᐊᖓᔪᕐᖄᖏᓐᓂᒃ ᖃᓄᐃᓚᐅᕐᒪᖔᑦ ᐊᑑᑎᔭᖓ, ᓱᓇᓂᒃ ᐃᓕᑦᓯᒪᖔᑕ ᐊᒻᒪᓗ ᐅᐱᒋᓯᒪᓂᕐᐹᖏᑦ ᐊᑐᕐᓯᒪᔭᖏᓐᓂ. ᐃᓚᐅᒋᑦ ᐅᐱᒍᓲᑦᔨᓂᖃᕐᑎᓗᑕ ᐱᔭᕇᕈᑎᑖᕐᑐᓄᑦ 2018-ᒥ! ᐱᒍᒪᓕᕐᑎᓯᒋᐊᓪᓚᖃᑦᑕᑐᑦ ᐅᕙᑦᑎᓂᒃ ᐊᒻᒪᓗ ᓯᕗᓕᕐᓱᑎᒃ ᓯᕗᓂᕐᒥ ᐃᓅᓚᖓᔪᓄᑦ.

ᐊᑎᖓ: ᓛᔨ ᐃᓓᔭᓯᐊᓗᒃ ᑕᐅ

ᐃᓕᓐᓂᐊᑕᖓ: ᑮᓇᐅᔭᓕᕆᔨᐅᓂᖅ ᐊᒻᒪᓗ ᑲᒪᔨ

ᐃᓕᓐᓂᐊᕕᒃ/ᐃᓕᓐᓂᐊᕕᕐᔪᐊᖅ: ᐃᓕᓐᓂᐊᕕᒻᒪᕆᒃ ᒫᓐᑦᒧᐊᔭᓐᓯ

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ (ᑭᑐ): ᓱᓇᐅᕚ ᐱᔭᕆᐊᑐᓂᕐᐸᐅᓯᒪᔪᖅ ᖃᖏᐅᑎᓯᒪᔦᑦ?

ᓛᔨ ᑕᐅ (ᓛᑕ): ᐱᔭᕆᐊᑐᓂᕐᐸᐅᓯᒪᔪᖅ ᐅᕙᓐᓄᑦ ᐃᓕᓐᓂᐊᑎᓪᓗᖓ ᐊᖏᕐᕋᕋᓂᒃ ᕿᒣᒪᒋᐊᒥᒃ. ᑕᕐᕿᖅ ᓯᕗᓪᓕᐹᖅ ᐱᔭᕆᐊᑐᓂᕐᐸᐅᓯᒪᔪᖅ.

ᑭᑐ: ᖃᓅᖅ ᑕᒪᓐᓇ ᖄᖏᐅᑎᒍᓐᓇᓯᓯᒪᔦᑦ?

ᓛᑕ: ᖃᐅᔨᒪᑦᓱᖓ ᐱᐅᔪᒥᒃ ᐱᓇᓱᐊᕆᐊᒥᒃ ᐊᒻᒪᓗ ᓄᑕᓂᒃ ᐊᒥᓱᓂᒃ ᐃᓕᑦᓯᐸᓪᓕᐊᓱᖓ.

ᑭᑐ: ᓱᒐᒦ ᐃᓕᓐᓂᐊᑕᕐᓂᖅ ᐃᓕᓐᓂᐊᕈᒪᓯᒪᕕᑦ?

ᓛᑕ: ᐊᓕᐊᒋᔭᖃᕐᓯᒪᒐᒪ ᑭᓯᑦᓯᒍᑎᓂᒃ ᐱᓇᓱᐊᕆᐊᒥᒃ. ᓴᓇᑦᑐᓴᐅᑎᓕᕆᒋᐊᒥᒃ ᐊᓕᐊᒋᔭᖃᕐᑐᖓ ᐊᒻᒪᓗ ᐱᔭᕆᐊᑐᓂᖏᑦ ᐊᓕᐊᒋᑦᓱᒋᑦ. ᑌᒣᒻᒪᑦ ᐃᓱᒪᒋᓯᒪᔭᕋ ᑌᒣᑦᑐᒥᒃ ᐃᓕᓐᓂᐊᑐᑦᓴᐅᓂᕋ.

ᑭᑐ: ᐅᖄᒍᓐᓇᖀᑦ ᐃᑲᔪᕐᑕᐅᓂᕐᐱᑦ ᒥᑦᓵᓄᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᑎᓂᒃ ᐱᒍᑦᔨᕕᖓᓄᑦ ᑕᒃᑲᓂ ᐊᕐᕌᒍᒥ?

ᓛᑕ: ᐃᑲᔪᕐᑕᐅᓯᒪᔪᖓ ᖃᓄᖅ ᑲᒪᒋᐊᖃᕐᓂᕋᓂᒃ ᐅᓪᓗᑲᓂᒃ ᐊᒻᒪᓗ ᐊᖏᕐᕋᒥ ᐱᓇᓱᐊᒋᐊᓕᒃᑲᓂᒃ ᐃᑲᔪᕐᑕᐅᒋᐊᖃᕐᓂᕋᓂᒃ ᐱᔭᕇᕐᓗᒋᑦ.

ᑭᑐ: ᖃᓄᐃᓕᕋᔭᕐᖀᑦ ᐃᓕᓐᓂᐊᕆᐊᕈᒪᔪᒥᒃ ᐳᕐᑐᓂᕐᓴᒋᐊᓪᓚᒧᑦ ᐃᓕᓐᓂᐊᕕᒻᒧᑦ?

ᓛᑕ: ᐊᑌ ᐃᓕᓐᓂᐊᕆᐊᓚᐅᕆᑦ! ᐱᔭᕆᐊᑐᔫᖏᓐᓇᓚᖓᖕᖏᑐᖅ, ᐱᐅᓯᐅᒥᓲᖅ!

ᐊᑎᖓ: ᐲᑐᕆᔅ ᑎᐊ

ᐃᓕᓐᓂᐊᑎᖓ: ᐊᑐᐊᒐᖕᖑᑎᑦᓯᓂᕐᒥᒃ, ᐋᕐᕿᓱᐃᔨᐅᓂᕐᒥᒃ ᐊᒻᒪᓗ ᑕᑯᓐᓇᕋᑦᓴᓕᐅᕐᓂᒥᒃ ᖃᕆᑕᐅᔭᑎᒍᑦ

ᐃᓕᓐᓂᐊᕕᒃ/ᐃᓕᓐᓂᐊᕕᕐᔪᐊᖅ: ᔮᓐ ᐋᐸᑦ ᐃᓕᓐᓂᐊᕕᒃ

ᑭᑐ: ᐅᖃᐅᑎᓚᐅᕐᑎᒍᑦ ᖃᓄᖅ ᑕᒪᐅᖕᖓᓂᕐᒪᖔᕐᐱᑦ?

ᐲᑐᕆᔅ ᑎᐊ (ᐲᑎ): ᐊᑯᓂᐊᓗᒃ ᐱᒐᓱᐊᓚᐅᔭᕋ; ᐊᖏᕐᕋᒧᑦ ᐅᑎᓚᐅᔪᖓ ᒪᕐᕉᐃᓈᓐᓂᒃ ᖁᕝᕙᕆᐊᕈᑎᑖᕆᐊᖃᓕᕐᓱᖓ ᐱᔭᕇᕈᑎᑦᓵᓂᒃ. ᐊᕐᕌᒍᓂ 7-ᓂᒃ ᕿᑲᕐᓱᖓ ᑌᒪ ᐅᑎᓯᓚᐅᔪᖓ. ᐃᓱᒪᒐᓃᖏᓐᓇᖃᑦᑕᓚᐅᔪᖅ. ᑐᕌᒐᕆᓯᒪᔭᕋ ᐱᔭᕇᕈᑎᑖᕐᓂᖅ.

ᑭᑐ: ᐊᕐᕌᓗ ᐊᕐᕌᒍᓂ 7-ᓂᒃ ᕿᑲᕐᓱᑎᑦ! ᓱᒐᒦ ᐃᓕᓐᓄᑦ ᐱᒻᒪᕆᐅᓚᐅᔪᕙ ᐅᑎᕐᓂᕐᒧᑦ ᕿᑲᓚᐅᕐᓱᑎᑦ ᐊᕐᕌᒍᓂ ᐊᒥᓱᓂ?

ᐲᑎ: ᐊᖓᔪᕐᖄᑲᓂᒃ ᐅᐱᒍᓱᖁᔨᓚᐅᔪᒐᒪ. ᐱᐊᕋᒃᑲᓂᒃ ᑕᑯᖁᔨᑦᓱᖓ ᕈᓐᓇᑐᐊᕈᒪ, ᐱᒍᓐᓇᕆᐊᖏᓐᓂᒃ!

ᑭᑐ: ᓱᓇᓃᒃ ᑐᕌᒐᖃᓚᐅᔪᕕᑦ ᐃᓕᓐᓂᐊᓱᑎᑦ?

ᐲᑎ: ᓯᑕᒪᓂᒃ ᑐᕌᒐᖃᓚᐅᔪᖓ ᐱᔭᕇᒍᒪᔭᒃᑲᓂᒃ ᐃᓕᓐᓂᐊᓱᖓ!

ᑭᑐ: ᓯᑕᒪᓂᒃ ᑐᕌᒐᖃᕐᓱᑎᑦ, ᑖᓐᓇ ᐱᐅᔪᓪᓚᕆᒃ. ᐅᖃᐅᑎᒍᓐᓇᖃᑦᑎᒎᑦ ᓱᓇᐅᒻᒪᖔᑕ?

ᐲᑎ: ᖃᓄᐃᑦᓴᖏᑦᑐᖓ. ᐃᓕᓐᓂᐊᕕᒋᐊᓪᓚᒧᑦ ᐳᕐᑐᓂᕐᓴᒧᑦ ᐃᓕᓐᓂᐊᕆᐊᕐᓗᖓ, ᐱᐊᕋᒃᑲᓂᒃ ᐱᔭᕇᖁᔨᑦᓱᖓ (ᐸᓂᒐ ᐳᕐᑐᓂᕐᓴᒥ ᐃᓕᓐᓂᐊᕕᒻᒥ ᐱᔭᕇᓯᔪᖅ ᑕᒃᑲᓂ ᐊᕐᕌᒍᒥ), ᒪᒥᓴᕐᓗᖓ ᐊᒻᒪᓗ ᐃᖕᖏᑎᐅᓂᕋᓂᒃ ᐱᒐᓱᐊᕐᓗᖓ. ᐃᓘᓐᓇᑎᒃ ᐱᓯᒪᓕᕐᑕᑲ!

ᑭᑐ: ᐅᐱᒍᓱᒍᑦᔨᕙᒋᑦ, ᐱᐅᔪᒻᒪᕆᒃ ᐱᒍᓐᓇᓯᓯᒪᔭᑎᑦ. ᓱᓇᐅᕚ ᐃᒻᒥᓂᒃ ᖃᐅᔨᒍᑎᒋᓯᒪᔦᑦ?

ᐲᑎ: ᐱᒐᓱᐊᕈᓐᓇᓂᕋ ᐊᒻᒪᓗ ᑲᔪᓯᒍᓐᓇᓂᕋ.

ᐊᑎᖓ: ᒪᕇᓇ ᐋᓇᓈᖅ ᓯᕝᕆᔩ

ᐊᖓᔪᕐᖄᖓ ᐊᓐᔪᓪ ᐋᓇᓈᖅ-ᓚᑳᔅ

ᐅᖄᖃᑎᖃᕈᓐᓇᓯᓚᐅᔪᒍᑦ ᒫᕆᐊᓇ ᓯᕝᕆᔩᒥᒃ, ᐊᓈᓇᖓ ᐋᓐᔪᓪ ᓚᑳᔅ . ᐋᓐᔪᓪ ᐱᔭᕇᕈᑎᑖᓚᐅᔪᖅ ᐃᓄᓰᑦ  ᐱᕙᓪᓕᐊᓂᖓᓂ ᑐᑭᓯᓴᕐᓂᒥᒃ ᔮᓐ ᐋᐸᑦ ᐃᓕᓐᓂᐊᕕᖓᓂ. ᑲᔪᓯᓚᖓᓂᕐᒥᓂᒃ ᐃᓕᓐᓂᐊᑕᒥᓂᒃ ᐸᕐᓇᓯᒪᔪᖅ ᑲᓐᑯᐊᑎᐊ ᐃᓕᓐᓂᐊᕕᕐᔪᐊᖓᓄᑦ ᐃᓕᓐᓂᐊᕆᐊᓚᖓᓂᕐᒥᓂᒃ.

ᑭᑐ: ᐊᓈᓇᐅᑦᓱᑎᑦ, ᑕᒪᓐᓇ ᐃᓕᓐᓄᑦ ᖃᓄᖅ ᐱᒻᒪᕆᐅᕙ?

ᒫᕆᐊᓇ ᐋᓇᓈᒃ ᓯᕝᕆᔩ (ᒫᐋᓯ): ᐱᒻᒪᕆᕋᑕᖅ ᐅᕙᓐᓄᑦ. ᐅᐱᒋᓪᓚᕆᑦᑕᕋ. ᓱᓕᒫᕈᓐᓇᒪᑦ.

ᑭᑐ: ᖃᓅᖅ ᐃᑉᐱᓂᐊᓚᐅᔪᕕᑦ ᖃᓪᓗᓈᓄᑦ ᐃᓕᓐᓂᐊᕆᐊᓚᖓᓂᕐᒥᓂᒃ ᐅᖃᐅᑦᔩᑎᓪᓗᒍ ᐃᓕᓐᓂᒃ?

ᒫᐋᓯ: ᑲᑉᐱᐊᓱᓯᒪᔪᖓ ᐊᒻᒪᓗ ᐆᒻᒪᑎᒐ ᓯᖁᒥᑦᓱᓂ. ᑭᓯᐊᓂ ᖃᐅᔨᒪᓚᐅᔪᖓ ᖃᓄᐃᓚᖓᖕᖏᒋᐊᖓ. ᓱᖑᔪᖏᓐᓇᓲᖑᒻᒪᑦ.

ᑭᑐ: ᐊᓯᑦᔨᓂᖔ ᐃᑉᐱᒋᓯᒪᔦᑦ?

ᒫᐋᓯ: ᐊᐊ, ᐱᓯᑎᐅᓂᕐᓴᕈᕆᐊᖓ ᐊᒻᒪᓗ ᒫᓐᓇ ᐃᓄᒻᒪᕆᕈᕐᔪᒥᓂᖓ ᐊᒻᒪᓗ ᐅᐱᒋᑦᓯᐊᑕᕋ.

ᑭᑐ: ᐅᖃᐅᓯᑦᓴᖃᕐᖀᑦ ᐊᖓᔪᕐᖄᕆᔭᐅᔪᓄᑦ?

ᒫᐋᓯ:  ᐱᒻᒪᕆᐊᓗᒃ ᐃᒻᒥᓂᕿᒍᓐᓇᓯᑎᓗᒋᑦ. ᓯᕗᓕᕐᑎᓴᕐᑖᕆᐊᖃᕋᑦᑕ ᐅᕙᑦᑎᓂᒃ ᐃᓇᖐᓚᖓᔪᓂᒃ. ᐃᑲᔪᕐᓯᓚᖓᔪᓂᒃ ᓄᓇᓕᑦᑎᓂ ᐋᕐᕿᓯᒪᒍᓯᖓᓂᒃ. ᐊᒻᒪᓗ ᐱᒋᐊᕆᐊᓕᒃ ᐱᐊᕋᕗᓐᓂ.

 

 

Back to News