ᐳᕐᑐᓂᕐᓴᒥᒃ ᐃᓕᓐᓂᐊᑏᑦ ᐱᔭᕇᕈᑎᑖᖏᑦ ᐁᑦᑐᑑᑎᐅᓚᐅᕐᖁᑦ ᓄᓇᕕᒻᒥ ᐃᓕᓐᓂᐊᑎᓄᑦ ᐱᑖᕐᑎᑕᐅᔪᕕᓂᕐᓄᑦ ᓱᓕᑎᑦᓯᒍᑎᒥᒃ ᐱᔭᕇᕐᓂᒧᑦ ᐊᑦᔨᐸᓱᖓᓂᒃ ᐳᕐᑐᓂᕐᓴᒥᒃ ᐃᓕᓐᓂᐊᓂᕐᒧᑦ ᑐᕐᖃᑕᕐᕕᖓᓂᑦ ᐃᓕᓐᓂᐊᓂᓕᕆᓂᐅᑉ ᐊᑯᓐᓂᖏᓐᓂ 2015 ᐊᒻᒪᓗ 2017

ᒪᓐᑐᔨᐊ, ᑯᐯᒃ (ᐁᕆᓕ 12, 2018) – ᐅᑎᕐᕕᒋᓗᒍ ᐅᖃᕐᑕᐅᓚᐅᔪᖅ ᓅᕕᒻᐱᕆ 2017-ᒥ, ᑲᑎᕕᒃ ᐃᓕᓴᕐᓂᓕᕆᓂᖅ ᐊᓕᐊᓱᑉᐳᖅ ᐅᖃᕆᐊᒥᒃ ᑯᐯᒻᒥ ᑐᕐᖃᑕᕐᕕᖓ ᐃᓕᓐᓂᐊᓂᓕᕆᓂᕐᒧᑦ ᐱᑖᕐᑎᓯᓯᒪᓕᕐᖁᖅ ᐳᕐᑐᓂᕐᓴᒥ ᐃᓕᓐᓂᐊᓂᕐᒧᑦ ᐱᔭᕇᕈᑎᒥᒃ (SSD) ᐃᓘᓐᓇᖏᓐᓄᑦ ᓄᓇᕕᒻᒥ ᐃᓕᓐᓂᐊᑎᓄᑦ ᐁᑦᑐᑕᐅᔪᕕᓂᕐᓄᑦ ᓱᓕᑎᑦᓯᒍᑎᒥᒃ ᐊᑦᔨᐸᓱᖓᓂᒃ ᐳᕐᑐᓂᕐᓴᒥ ᐃᓕᓐᓂᐊᓂᕐᒧᑦ ᐱᔭᕇᕈᑎᒥᒃ ᑐᕐᖃᑕᕐᕕᖓᓂᑦ ᐃᓕᓐᓂᐊᓂᓕᕆᓂᐅᑉ ᐊᑯᓐᓂᖓᓂ 2015 ᐊᒻᒪᓗ 2017. ᐱᔭᕇᕈᑏᑦ ᐊᓪᓚᑎᒍᑦ ᐊᐅᓪᓚᑎᑕᐅᔪᑦ ᐃᓕᓐᓂᐊᑎᓄᑦ ᐊᑐᓂᑦ. ᐊᐅᓪᓚᑎᑦᓯᓂᖅ ᐱᔭᕇᕐᑕᐅᓚᐅᔪᖅ ᒫᑦᔨ 23, 2018-ᒥ.

ᔭᓄᐊᕆ 2018-ᖑᑎᓪᓗᒍ, ᐃᓕᓐᓂᐊᓂᓕᕆᓂᕐᒧᑦ ᑐᕐᖃᑕᕐᕕᖓ ᓄᐅᓯᓕᑎᕆᓚᐅᔪᕗᖅ ᐊᓪᓚᓯᒪᐅᑎᒻᒪᕆᖓᓂᒃ, ᖃᕆᑕᐅᔭᑎᒍᑦ ᐃᓕᓐᓂᐊᓂᕐᒧᑦ ᐊᓪᓚᑕᐅᒪᒍᑎᖓᓂᒃ ᐊᑐᓂᑦ ᐃᓕᓐᓂᐊᑎᓄᑦ ᑕᑯᑦᓴᐅᑎᑦᓯᓱᑎᒃ ᐊᑐᓂᑦ ᐃᓕᓐᓂᐊᑏᑦ ᒫᓐᓇ ᐱᔭᕇᕈᑎᖃᓕᕐᓂᖏᓐᓂᒃ ᐳᕐᑐᓂᕐᓴᒥ ᐃᓕᓐᓂᐊᕕᒻᒥ. ᑖᓐᓇ ᐊᓪᓚᓯᒪᐅᑎ ᐊᑐᕐᑕᐅᓲᖅ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᓐᓂ, ᐃᓕᓐᓂᐊᕕᕐᔪᐊᒥ ᐊᒻᒪᓗ ᐱᓇᓱᒐᕐᒧᑦ ᐱᒋᐅᕐᓴᑎᑕᐅᕕᖏᓐᓂ ᐃᓕᓐᓂᐊᕖᑦ ᖃᐅᔨᓴᓕᕋᒥᒃ ᐃᑎᕈᑎᓂᒃ ᐊᐱᕆᐅᑎᓂᒃ ᐃᓕᓐᓂᐊᑎᑦᓯᒍᑎᒥᓄᑦ ᐊᑐᐃᓐᓇᐅᑎᑕᒥᓄᑦ.

2015-ᖑᓚᐅᕐᑎᓇᒍ, ᓄᓇᕕᒻᒥ ᐳᕐᑐᓂᕐᓴᒥᒃ ᐃᓕᓐᓂᐊᕕᒻᒥ ᐱᔭᕇᕐᑐᑦ ᐁᑦᑐᑕᐅᖃᑦᑕᓯᒪᔪᑦ ᐳᕐᑐᓂᕐᓴᒥᒃ ᐃᓕᓐᓂᐊᓂᕐᒧᑦ ᐱᔭᕇᕈᑎᒥᒃ (SSD) ᑐᕐᖃᑕᕐᕕᖓᓂᑦ ᐃᓕᓐᓂᐊᓂᓕᕆᓂᐅᑉ. ᐊᑯᓐᓂᖓᓂ 2015 ᐊᒻᒪᓗ 2017, ᓄᓇᕕᒻᒥ ᐃᓕᓐᓂᐊᑏᑦ ᐱᔭᕇᕐᑐᕕᓃᑦ ᐳᕐᑐᓂᕐᓴᒥ ᐃᓕᓐᓂᐊᓂᕐᒥᒃ ᐁᑦᑐᑕᐅᖃᑦᑕᓯᒪᔪᑦ ᓱᓕᑎᑦᓯᒍᑎᒥᒃ ᐊᑦᔨᐸᓱᖓᓂᒃ ᐳᕐᑐᓂᕐᓴᒥᒃ ᐃᓕᓐᓂᐊᓂᕐᒧᑦ ᐱᔭᕇᕈᑎᒥᒃ AESS ᐃᓕᓐᓂᐊᑎᑕᐅᖃᑦᑕᓯᒪᒐᓗᐊᕋᒥᒃ ᐊᑦᔨᖏᓐᓂᒃ ᓴᓇᑦᑐᓴᐅᑎᓕᕆᓂᕐᒥᒃ ᐊᒻᒪᓗ ᓱᑯᐃᔦᓂᕐᒥᒃ ᐃᓕᓐᓂᐊᑕᐅᓲᓂᒃ ᐃᓕᓐᓂᐊᑎᓄᑦ ᐁᑦᑐᑕᐅᖃᑦᑕᑐᕕᓂᕐᓄᑦ ᐳᕐᑐᓂᕐᓴᒥ ᐃᓕᓐᓂᐊᓂᕐᒧᑦ ᐱᔭᕇᕈᑎᓂᒃ SSD 2015-ᖑᓚᐅᕐᑎᓇᒍ.

“ᐃᓕᓐᓂᐊᓂᖅ ᐅᖄᓗᒍ ᐊᒻᒪᓗ ᐃᓗᓕᖏᑦ ᐃᓕᓐᓂᐊᑕᐅᔪᑦ, ᐱᑕᖃᕐᓯᒪᖕᖏᑐᖅ ᑐᕌᕐᑕᐅᔪᒥᒃ ᐱᑦᔪᑎᖓᓂᒃ ᑐᑭᖃᕐᑎᓯᔪᒥᒃ ᐊᑦᔨᐸᓱᖓᓂᒃ ᐳᕐᑐᓂᕐᓴᒥ ᐃᓕᓐᓂᐊᕕᒻᒥ ᐱᔭᕇᕈᑎᒥᒃ AESS ᐊᒻᒪᓗ ᓱᒐᒥ ᐳᕐᑐᓂᕐᓴᒥ ᐃᓕᓐᓂᐊᓂᕐᒧᑦ ᐱᔭᕇᕈᑎᓪᓚᕆᒻᒥᐅᖏᓐᓂᓴᖅ SSD ᐁᑦᑐᑑᑎᐅᖔᓯᒪᒻᒪᖔᑕ ᑐᕐᖃᑕᕐᕕᖓᓂᑦ ᐃᓕᓐᓂᐊᓂᓕᕆᓂᕐᒧᑦ ᐃᓕᓐᓂᐊᑎᓄᑦ ᐱᔭᕇᕐᑐᕕᓂᕐᓄᑦ ᐊᑯᓐᓂᖓᓂ 2015 ᐊᒻᒪᓗ 2017,” ᐅᖃᕐᑐᖅ ᐅᔮᐱ ᕗᐊᑦ, ᐊᖓᔪᕐᖄᖓ ᑲᑎᕕᒃ ᐃᓕᓴᕐᓂᓕᕆᓂᕐᒥ. “ᐊᓕᐊᓱᑉᐳᒍᑦ ᑐᕐᖃᑕᕐᕕᖓ ᐃᓕᓐᓂᐊᓂᓕᕆᓂᐅᑉ ᐋᕐᕿᒋᐊᕆᒍᓐᓇᓚᐅᕐᒪᑦ ᖃᓄᐃᓕᖓᐅᑎᖓᓂᒃ ᐊᐱᕆᐅᑎᑦᑕ”, ᐃᓚᒋᐊᕆᔪᖅ.

ᑭᓇᒃᑰᓂᕗᑦ:

ᑲᑎᕕᒃ ᐃᓕᓐᓂᐊᓂᓕᕆᓂᖅ (ᑲᑎᕕᒃ) ᑎᒥᖕᖑᑎᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ).  1978-ᒥᓂᑦ ᐱᑕᖃᕐᑎᓯᔪᑐᐊᖑᓯᒪᕗᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ.  ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ, ᐃᓕᓐᓂᐊᓂᓕᕆᓂᖅ ᐱᔪᓐᓇᓂᖃᕐᑎᑕᐅᔪᖅ ᐊᐅᓚᑦᓯᔨᐅᕕᖃᕐᑎᑕᐅᑦᓱᓂᓗ ᐃᓄᐃᑦ ᐃᓗᕐᕈᓯᖓᓂᒃ ᒪᓕᑦᓯᐊᑐᓂᒃ ᐃᓕᓐᓂᐊᕈᑎᑦᓴᓕᐅᕐᓂᒥ ᐃᓕᓐᓂᐊᑎᑦᓯᓂᕐᒥᓗ.  ᑐᕌᒐᖓ ᑎᓕᔭᐅᒪᒍᑎᒋᑦᓱᒍ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᑌᒣᒻᒪᑦ ᒪᕐᕈᐃᓕᕿᖓᕗᖅ.  ᓯᕗᓪᓕᖅ, ᓄᓇᓕᓕᒫᓂ ᐃᓕᓐᓂᐊᓂᓕᕆᔨᐅᑦᓱᓂ ᓄᓇᕕᒻᒥᐅᓕᒫᓄᑦ.  ᐁᑉᐹᒍᓪᓗ, ᑎᒥᖁᑎᒋᔭᐅᕗᖅ ᐊᑦᔨᒋᔭᐅᖕᖏᑐᓂᒃ ᐱᔪᓐᓇᐅᑎᖃᕐᓱᓂ ᐊᐅᓚᑦᓯᔨᐅᕕᖃᕐᓱᓂᓗ ᓴᐳᑦᔨᒍᑎᐅᒋᐊᕐᑐᓂᒃ, ᐱᑕᖃᕐᑎᓯᖏᓐᓇᕈᑎᐅᒋᐊᕐᑐᓂᒃ, ᐊᒻᒪᓗ ᐱᕙᓪᓕᐊᑎᑦᓯᒍᑎᓂᒃ ᐃᓄᐃᑦ ᐅᖃᐅᓯᖓᓂᒃ, ᐃᓗᕐᕈᓯᖓᓂᒃ, ᐃᓅᑦᔪᓯᖓᓂᓪᓗ.  ᐃᓕᓐᓂᐊᕈᑎᑦᓭᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᐃᓕᓐᓂᐊᕈᑎᓕᐊᑦ ᐃᓕᓐᓂᐊᑎᑦᓯᒍᑎᐅᕗᑦ ᐃᓘᓐᓇᖏᓐᓂᑦ ᑖᒃᑯᐊ 14-ᐃᑦ ᓄᓇᓖᑦ ᐃᓕᓐᓂᐊᕕᖏᓐᓂᑦ, ᐃᓄᒃᑎᑐᑦ ᐅᖃᐅᓯᕐᖄᖓᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᖓᓂᒃ.  ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 17-ᓂᒃ ᐳᒃᑭᓂᕐᓴᓂ ᐳᕐᑐᓂᕐᓴᓂᓪᓗ ᐃᓕᓐᓂᐊᕕᓐᓂᒃ ᐊᒻᒪᓗᑦᑕᐅᖅ 5-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ.  ᑐᑭᓯᒋᐊᓪᓚᕈᑎᑦᓭᑦ ᑕᑯᔭᐅᒍᓐᓇᑐᑦ ᐅᕙᓂ:  www.kativik.qc.ca

— 30 —

ᑐᑭᓯᒋᐊᑦᓯᐊᕈᒪᒍᕕᑦ, ᐅᒥᖓ ᐅᖄᕕᖃᕐᓗᑎᑦ: ᔮᑦ ᑐᓯᓅ-ᐱᐊᕐᓃ, ᐅᖄᖃᑎᒌᓐᓂᒥ ᐊᑕᐅᑦᓯᑰᕐᑎᓯᔨ

514-482-8220 ext. 309 | publicrelations@kativik.qc.ca

Back to News