ᓴᐱᓕᕐᑌᓕᓂᖏᓪᓗ ᐱᔭᖃᖃᑦᑕᓂᖏᓪᓗ ᓄᓇᕕᒻᒥᐅᑦ ᐃᓕᓐᓂᐊᑎᖁᑎᖏᑕ

ᐃᓕᓐᓂᐊᓇᐅᑉ ᐊᕐᕌᒍᖓᑕ ᐃᓱᓕᓐᓂᖓᓂ ᐃᓕᓐᓂᐊᓂᕐᒥ ᑭᒡᒐᑐᕐᑏᑦ ᐅᐱᒋᔭᖃᕐᐳᑦ ᐃᓘᓐᓇᖏᓐᓂᒃ ᓄᓇᕕᒻᒥ ᐃᓕᓐᓂᐊᑎᓂᒃ ᐊᔪᐃᓐᓇᓯᐊᕐᓂᖏᓐᓄᑦ, ᐊᒻᒪᓗ ᐱᓗᐊᕐᑐᒥᒃ ᑌᒃᑯᓂᖓ ᐳᕐᑐᓂᕐᓴᒥ ᐃᓕᓐᓂᐊᓂᕐᒥᒃ ᐱᔭᕇᒍᑎᑖᓚᖓᔪᓂᒃ, ᐊᒻᒪᓗᑦᑕᐅᒃ ᑌᒃᑯᓂᖓ ᐃᓕᓐᓂᐊᑎᓂᒃ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᒻᒪᕆᒻᒥ ᐃᓕᓐᓂᐊᕕᕐᔪᐊᒥᓪᓗ ᐱᔭᕇᕐᑐᓂᒃ. ᑭᓯᑕᐅᒪᔪᓕᕆᒍᑏᑦ  ᐃᓕᓐᓂᐊᕇᕐᓯᒪᓕᕐᑐᑦ ᐳᕐᑐᓂᕐᓴᒥ ᐃᓕᓐᓂᐊᕕᒻᒥ ᖃᑦᓯᐅᓂᖏᓐᓂᒃ ᑲᑎᕐᓱᑕᐅᓕᕐᑐᐃᑦ ᐊᑐᐃᓐᓇᐅᓛᕐᓱᑎᓗ ᐅᑭᐊᑦᓴᒥ.

ᒪᓐᓂᓕᐅᑦ 6-ᒥ ᖁᕕᐊᓱᒍᑎᖃᓚᐅᔪᕗᒍᑦ 29 ᐃᓕᓐᓂᐊᑏᑦ ᓄᓇᕕᒻᒥᐅᑉ  ᐃᓕᓴᕐᓂᓕᕆᓂᕐᒧᑦ ᐃᓕᓐᓂᐊᓂᖏᑦ ᑮᓇᐅᔭᖃᕐᑎᑕᐅᑦᓱᑎᒃ  ᐱᔭᕇᕐᓂᖏᓐᓂᒃ.  ᐁᑦᑐᑕᐅᓚᐅᔪᔪᐃᑦ ᐱᓇᓱᒐᕐᒨᓕᖓᔪᓂᒃ ᐱᒋᐅᕐᓴᓂᕐᒥᒃ ᐃᓕᑕᕆᔭᐅᒍᑎᓂᒃ, ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᒻᒪᕆᒻᒥᑦ ᐃᓕᑕᕆᔭᐅᒍᑎᓂᒃ ᐱᔭᕇᒍᑎᓂᓪᓗ, ᐳᕐᑐᓂᕐᓴᐅᑉ ᐊᓪᓕᖓᓂᒃ ᐱᔪᓐᓇᐅᑎᓂᒃ, ᐳᕐᑐᓂᕐᓴᐅᑉ ᖁᓪᓕᖓᓂᒃ ᐊᒻᒪᓗ ᐳᕐᑐᓂᕐᐹᒥᒃ ᐱᔪᓐᓇᐅᑎᓂᒃ.  ᑖᒃᑯᐊ ᐃᓚᓖ ᑲᔪᓯᑦᓯᐊᑐᒻᒪᕆᒻᒥᒃ ᓄᓇᕕᒃ ᓯᕗᓂᑦᓴᕗᒻᒥᒃ ᐱᔭᕇᕐᑐᓂᒃ.

ᑐᕓᔭᕉᑦᒥ ᖁᕕᐊᓱᒍᑎᖃᓛᕐᒥᔪᒍᑦ ᐱᔭᕇᕐᑕᖏᓐᓂᒃ 4 ᐃᓄᐃᑦ ᐃᓕᓐᓂᐊᑎᑦᓯᔩᑦ ᐁᑦᑐᑕᐅᓛᕐᒪᑕ ᐃᓕᓐᓂᐊᑎᑦᓯᔨᐅᓂᕐᒧᑦ ᐃᓕᑕᕆᔭᐅᒍᑎᓂᒃ ᐃᓕᓐᓂᐊᓂᕐᒥ ᑐᕐᖃᑕᕐᕕᑯᓐᓂᑦ ᐊᒻᒪᓗ  ᓄᓇᖃᕐᖄᓯᒪᔪᑦ ᐃᓄᐃᓪᓗ ᐃᓕᓐᓂᐊᓂᕐᒨᓕᖓᔪᓂᒃ ᐃᓕᑕᕆᔭᐅᒍᑎᖓᓂᒃ ᒥᑭᐅᓪ ᐃᓕᓐᓂᐊᕕᕐᔪᐊᒥᑦ (ᓖᓴ ᐋᓇᓈᒃ, ᓵᓕ ᔫᓕᐅᓯ, ᕿᐱᑕ ᑭᐊᑌᓐᓇᖅ, ᓭᕋ ᕿᓐᓄᐊᔪᐊᒃ) ᐊᒻᒪᓗᑦᑕᐅᖅ 2 ᐃᓅᒃ ᐃᓕᓐᓂᐊᑎᑦᓯᔩᒃ ᐁᑦᑐᑕᐅᓛᕐᓱᑎᒃ ᐳᕐᑐᓂᕐᓴᐅᑉ ᐊᓪᓕᖓᓂᒃ ᐃᓕᓐᓂᐊᓂᕐᒨᓕᖓᔪᓂᒃ ᐃᓕᑕᕆᔭᐅᒍᑎᒥᒃ ᒥᑭᐅᓪ ᐃᓕᓐᓂᐊᕕᕐᔪᐊᒥᑦ (ᔨᓂ ᐹᓕᓴ ᐊᒻᒪᓗ ᐅᓛᔪ ᐱᓗᕐᑑᑦ).

ᐃᓘᓐᓇᑎᒃ ᑖᒃᑯᐊ ᓄᓇᕕᒻᒥᒃ ᓯᕗᒧᐊᒋᐊᕐᑎᓯᖃᑎᐅᔪᑦ ᐊᒻᒪᓗ ᐅᐱᒍᓱᓪᓚᕆᑉᐳᒍᑦ ᐃᓚᐅᒋᐊᒥᒃ ᐱᔭᕇᕐᑕᖏᓐᓄᑦ.

ᐃᓕᓴᕐᓂᓕᕆᓂᐅᑉ ᐱᓇᓱᒋᐊᓯᓚᐅᕋᓂ ᐃᓕᓐᓂᐊᕈᑎᑦᓴᖏᑦ ᐊᕐᕌᓂ ᖁᕝᕙᕆᐊᕈᑎᑖᕐᑎᑕᐅᓚᐅᔪᕗᖅ ᐃᓕᓐᓂᐊᓂᕐᒥ ᑐᕐᖃᑕᕐᕕᒧᑦ ᐱᔭᕇᓛᕐᓱᑎᓗ ᐃᓕᓐᓂᐊᑏᑦ ᐃᓚᖏᑦ ᑖᑦᓱᒥᖓ ᐃᓕᓐᓂᐊᒐᕐᒥᒃ ᑕᒡᒐᓂ ᐊᕐᕌᒍᕐᒥ.

ᑖᓐᓇ ᐱᓇᓱᓯᒋᐊᓚᐅᕋᓂ ᐃᓕᓐᓂᐊᒐᑦᓴᖅ ᐃᓇᖐᔪᖅ ᐃᒻᒥᒍᑦ ᐊᕐᖁᓯᐅᕐᓯᒪᔪᓂᒃ ᐃᓕᓐᓂᐊᒐᑦᓴᒥᒃ. ᐃᒻᒥᒍᑦ ᐊᕐᖁᓯᐅᕐᓯᒪᔪᓂᒃ ᐃᓕᓐᓂᐊᓂᖅ ᖁᕝᕙᕆᐊᕈᑎᓂᒃ ᐱᑕᖃᕐᑎᑕᐅᓯᒪᖕᖏᒪᑦ ᐃᓕᓐᓂᐊᓂᕐᒥ ᑐᕐᖃᑕᕐᕕᒧᑦ ᑌᒣᒻᒪᓗ, ᐃᓕᓐᓂᐊᑏᑦ ᐱᔭᕇᓕᑐᐊᕋᒥᒃ ᑖᑦᓱᒥᖓ ᐃᓕᑕᕆᔭᐅᒍᑎᒥᒃ ᑐᕐᖃᑕᕐᕕᑯᓐᓂᑦ ᐱᑖᓲᖑᓚᐅᔪᖕᖏᓚᑦ. ᓄᓇᓕᒻᒥ ᐃᓕᓐᓂᐊᕕᒻᒥᑦ ᐱᔪᒥᒃ ᐃᓕᑕᕆᔭᐅᒍᑎᒥᒃ ᐱᑖᖔᖃᑦᑕᑐᕕᓃᑦ.

ᑕᕐᕿᒥ ᓄᕐᕋᓕᐅᑦᒥ, ᓄᓇᕕᒻᒥ ᕿᑐᕐᖓᓖᑦ ᓇᓗᓀᕐᓯᒪᖃᑎᐅᑦᓱᓂ ᐃᒻᒥᒍᑦ ᐊᕐᖁᓯᐅᕐᓯᒪᔪᓂᒃ ᐃᓕᓐᓂᐊᒐᕐᓂᒃ ᐃᓕᓐᓂᐊᑐᒥᒃ ᐊᒡᓚᑖᕐᑎᑕᐅᓚᐅᔪᕗᑦ, ᖃᐅᔨᑎᑕᐅᑦᓱᑎᒃ ᐃᒫᒃ ᐊᕐᕌᒎᓚᖓᔪᒥ, ᑖᓐᓇ ᐃᓕᓐᓂᐊᒐᖅ ᐃᓇᖏᕐᑕᐅᓛᕐᒪᑦ ᖁᕝᕙᕆᐊᕈᑎᓕᒻᒧᑦ ᐱᓇᓱᒋᐊᓯᓚᐊᕋᓂ ᐃᓕᓐᓂᐊᒐᕐᒧᑦ.

ᐱᓇᓱᕝᕕᓂᑦ ᐱᓇᓱᒋᐅᕐᓴᕕᖃᕐᑎᑕᐅᑦᓱᑎᒃ ᓄᓇᕕᒻᒥ ᑎᒥᐅᔪᓂᑦ, ᐱᓇᓱᒋᐊᓯᓚᐅᕋᓂ ᐃᓕᓐᓂᐊᒐᖅ ᐃᓕᓐᓂᐊᑎᒥᒃ ᐱᕕᖃᕐᑎᓯᔪᖅ ᐆᒃᑐᕋᓪᓗᑐᖃᑦᑕᕈᓐᓇᑎᑦᓱᒍ ᐊᑦᔨᒌᖕᖏᑐᓂᑦ ᐱᓇᓱᐊᕐᕕᓂᑦ ᐊᑐᕐᓂᖃᓪᓚᕆᑦᑐᓂᓗ ᐱᕙᓪᓕᐊᕈᑎᒋᑦᓱᒋᑦ ᐅᐸᓗᙰᔭᕐᑎᑕᐅᒍᑎᒥᓂᒃ ᐱᓇᓱᒐᕐᑖᕆᐊᒐᓱᓯᓚᐅᕋᑎᒃ.

ᐃᓕᓐᓂᐊᓂᕐᒥ ᑭᒡᒐᑐᕐᑏᑦ ᕿᒥᕐᕈᓚᐅᔪᔪᑦ ᐱᓇᓱᕝᕖᑦ ᐃᓕᓐᓂᐊᕈᑎᓕᐅᕕᐅᑉ ᐊᑖᓃᑦᑐᐃᑦ ᑐᓴᕐᑎᓯᒍᑎᖏᓐᓂᒃ

ᕕᑦᑑᔨᐊ ᓯᒥᒐᖅ ᖁᕝᕙᓯᓂᕐᓴᒥᒃ ᐱᓇᓱᒐᕐᑖᑎᑕᐅᓚᐅᔪᔪᖅ ᐅᖃᐅᓯᕐᖄᒥ ᐃᓕᓐᓂᐊᕈᑎᓕᐅᕐᓂᒥᒃ ᑐᑭᒧᐊᑦᑎᓯᔨᐅᑉ ᐃᑲᔪᕐᑎᐅᓂᕐᒥᒃ ᐊᒻᒪᓗ ᓛᓴᓐ ᑕᒃᑲᑕᒃ ᐃᓕᓴᕐᓂᓕᕆᓂᕐᒧᑦ ᐃᓚᒋᔭᐅᓯᓚᐅᔪᑦᓱᓂ ᐃᓗᕐᕈᓯᕐᒧᑦ ᓄᓇᒥ ᐊᓐᓇᐅᒪᓂᕐᒧᓗ ᑐᑭᒧᐊᑦᑎᓯᔨᐅᑉ ᐃᑲᔪᕐᑎᐅᓂᕐᒥᒃ ᐱᓇᓱᒐᕐᑖᓱᓂ.

ᐅᖄᑦᓱᑎᒃ ᑖᒃᑯᐊ ᒪᕐᕉᒃ ᐱᓇᓱᕝᕖᒃ ᐱᓇᓱᐊᕐᓂᖏᓐᓂᒃ, ᐃᓕᓐᓂᐊᓂᕐᒥ ᑭᒡᒐᑐᕐᑏᑦ ᐃᓄᑐᖃᕐᓂᒃ ᐃᓚᐅᖁᔨᑦᓯᐊᓂᕐᒥᓂᒃ ᐃᓗᕐᕈᓯᕐᒨᓕᖓᔪᓂᒃ ᓄᓇᒥᓪᓗ ᐊᓐᓇᐅᒪᓂᕐᒧᑦ ᐃᓕᓐᓂᐊᕈᑎᑦᓴᓕᐅᕐᓂᓂᑦ ᐅᖃᐅᓯᖃᕐᑐᑦ.  ᐱᓀᓗᑕᐅᓲᒥᒃ ᐃᓄᑐᙯᑦ ᖃᐅᔨᒪᓪᓚᕆᑦᑕᒥᓂᒃ ᐊᑐᐃᓐᓇᐅᑎᑦᓯᓯᐊᕐᓱᑎᒃ ᐃᓕᓴᕐᓂᓕᕆᓂᕐᒧᑦ ᐊᑭᓕᕐᑐᑕᐅᑦᓯᐊᓲᖑᖕᖏᓂᖏᓐᓂᒃ ᐅᖄᓚᐅᔪᔪᑦ.  ᑕᒪᓐᓇ ᖃᐅᔨᒐᓱᐊᕐᑕᐅᓛᕐᑐᖅ ᐃᓕᓴᕐᓂᓕᕆᓂᐅᑉ ᑮᓇᐅᔭᓕᕆᕕᖓᓄᑦ, ᐃᑲᔪᕐᑎᖃᕐᓗᑎᒃ ᐃᓕᓐᓂᐊᕈᑎᓕᐅᕐᕕᒥᒃ ᐊᒻᒪᓗ ᐃᓕᓐᓂᐊᕖᑦ ᐊᐅᓚᑕᐅᕕᖓᓂᒃ.

ᐅᖃᕆᐊᓪᓚᓚᐅᔪᔪᑦ ᐱᒻᒪᕆᐅᓂᖓᓂᒃ ᐃᓄᒃᑎᑐᑦ ᐃᓕᓐᓂᐊᕈᑎᑦᓴᓕᐊᖑᓯᒪᔪᓕᒫᑦ ᐋᕐᕿᒋᐊᕐᑕᐅᒋᐊᖃᕐᓂᖏᑦᑕ ᐱᒻᒪᕆᐅᓂᖓᓂᒃ ᐊᒻᒪᓗ ᐅᖃᕐᓱᑎᒃ ᐱᔭᕆᐊᑐᔪᐊᓘᓲᖑᓂᖓᓂᒃ ᐃᓄᒃᑎᑑᕐᑐᓂᒃ ᕿᒥᕐᕈᔨᒻᒪᕆᖃᖕᖏᓂᑯᖓᓄᑦ ᐅᖃᐅᓯᓕᕆᔨᖃᖕᖏᓂᑯᖓᓄᓪᓗ.

ᐃᓕᓐᓂᐊᓂᕐᒥ ᑭᒡᒐᑐᕐᑏᑦ ᐅᖄᒍᑎᖃᓚᐅᔪᔪᑦ ᐱᓇᓱᑦᑎᙯᓐᓇᕈᑎᓂᒃ ᐱᐅᓯᒋᐊᕆᒍᓯᐅᒍᓐᓇᑐᓂᒃ ᐅᖃᐅᓯᖃᕐᓱᑎᓗ ᐃᓱᒫᓗᓐᓂᒥᓂᒃ 40-ᐅᒻᒪᑕ ᐃᓕᓐᓂᐊᑎᑦᓯᔩᑦ ᐃᓂᖏᑦ ᐃᓕᓐᓂᐊᓇᐅᑉ ᐊᕐᕌᒍᒋᓚᖓᔭᖓᓂᑦ ᐃᓐᓄᕆᐊᖃᖏᓐᓇᑐᐃᑦ.

ᐃᓕᓐᓂᐊᓂᕐᒥ ᑭᒡᒐᑐᕐᑏᑦ ᐅᖃᓚᐅᔪᔪᑦ ᐃᓱᒫᓗᓐᓂᕋᕐᓱᑎᒃ ᐱᓇᓱᑦᑏᑦ ᐃᓕᓴᕐᓂᓕᕆᓂᕐᒥ ᐊᓯᑦᔨᑕᕐᓂᖏᓐᓄᑦ.  ᖃᐅᔨᒍᒪᓚᐅᔪᔪᑦ ᖃᓄᐃᓘᕐᑐᓂᒃ ᐃᑲᔪᕐᓯᒋᐊᓪᓚᕈᑎᓂᒃ ᐱᑕᖃᕐᑎᓯᕈᓐᓇᒪᖔᑕ ᐃᓕᓐᓂᐊᑎᑦᓯᔨᓂᒃ ᐃᓱᕐᕆᓂᕐᓴᐅᖁᔨᒧᑦ ᐃᓚᐅᓂᕐᓴᐅᖁᔨᒧᓪᓗ ᓄᓇᕕᒻᒥ ᓄᓇᓕᓐᓂᑦ.  ᐱᓇᓱᑦᑏᑦ ᐃᑲᔪᕐᑕᐅᕕᖓ ᐅᖃᕐᑕᐅᓚᐅᔪᒻᒥᔪᖅ ᐊᑐᐃᓐᓇᐅᒪᑦ ᐃᑲᔪᕐᑕᐅᕕᑦᓴᐅᓱᓂ ᐱᓇᓱᑦᑏᑦ ᐊᑐᖁᔭᐅᖃᑦᑕᑐᑦᓴᐅᓂᖏᓐᓂᒃ.

ᒫᓐᓇᐅᓕᕐᑐᖅ, 40 ᐃᓕᓐᓂᐊᑎᑦᓯᔩᑦ ᐱᓇᓱᒐᖏᑦ ᐃᓐᓄᕆᐊᓖᑦ, ᑕᒪᓐᓇᓗ ᐃᓕᓐᓂᐊᓂᕐᒥ ᑭᒡᒐᑐᕐᑏᑦ ᐃᓱᒫᓗᒍᑎᒋᓕᕐᓱᒍ ᓄᓇᕕᒻᒥ ᓄᓇᓕᓐᓄᑦ ᐅᐃᒪᓇᕐᑐᓯᐅᕐᓂᒨᕐᑐᕆᓕᕐᓱᒍ.  ᐅᖃᕐᑕᐅᒥᔪᖅ ᑐᑭᓯᔭᐅᓯᒪᒋᐊᖃᕐᒥᒪᑦ ᐃᓕᓐᓂᐊᑎᑦᓯᔨᑦᓴᓯᐅᕐᓂᒧᑦ ᐱᔭᕐᓃᓕᐅᕐᓃᑦ ᐊᑑᑎᔪᑦ ᐃᓚᒋᔭᐅᒻᒪᑕ ᑕᒪᑦᓱᒧᖓ ᐃᓘᓐᓈᒍᑦ ᑯᐯᓕᒫᒥ ᐃᓕᓐᓂᐊᑎᑦᓯᔨᑦᓭᓂᐊᕐᓂᐅᑉ ᓱᕐᕃᓯᒪᓂᖓᓄᑦ.

ᐃᓕᓐᓂᐊᑎᑦᓯᔨᑦᓴᓯᐅᕈᑏᑦ ᑲᔪᓯᑎᓪᓗᒋᑦ, ᐃᓕᓐᓂᐊᕖᑦ ᐱᓇᓱᑦᑎᑖᕐᑎᑕᐅᓂᖏᑦ ᐊᒻᒪᓗ ᐃᓕᓴᕐᓂᓕᕆᓂᐅᑉ ᐃᓕᓐᓂᐊᑎᑦᓯᔨᑦᓴᓯᐅᕐᓂᒧᑦ ᐱᓇᓱᒍᓯᖏᑦ ᕿᒥᕐᕈᔭᐅᒋᐊᓪᓚᓛᕐᑐᑦ ᐱᓇᓱᑦᑎᓕᕆᕕᒻᒧᑦ ᐃᓕᓐᓂᐊᕖᑦ ᐊᐅᓚᑕᕕᖓᓄᓪᓗ.  ᐱᑦᔪᑎᖃᓛᕐᑐᑦ ᕿᒥᕐᕈᒋᐊᑦᓯᐊᓗᑎᒃ ᐱᕕᑦᓴᐅᒍᓐᓇᑐᓕᒫᓂᒃ ᐊᑐᑦᓯᐊᕈᓐᓇᕕᓕᒫᖏᓐᓄᑦ ᐱᑕᖃᕇᕐᑐᐃᑦ ᐱᓇᓱᑦᑎᓭᑦ ᐊᒻᒪᓗ ᒥᑭᓕᒋᐊᕐᓗᒋᑦ  ᐃᓕᓐᓂᐊᑎᑦᓯᔩᓐᓂᐊᓂᐅᑉ ᓱᕐᕃᓯᒪᒍᑎᖏᑦ ᐃᓕᓐᓂᐊᕕᓐᓂᒃ.

ᐃᓕᓴᕐᓂᓕᕆᓂᖅ ᓯᕗᒧᐊᒍᑎᖃᓕᕐᑐᖅ ᓄᓇᓕᓕᒫᓅᓕᖓᔪᓄᑦ ᐱᓇᓱᐊᖃᑎᒌᓐᓂᒧᑦ ᑲᑎᖕᖓᔩᑦ ᓄᐃᑕᐅᒋᐊᓪᓚᓂᖓᓂᒃ.

ᓄᓇᕕᒻᒥ ᑎᒥᐅᔪᓕᒫᑦ ᑲᑎᖕᖓᓂᖓᓂ ᑭᖑᓪᓕᐹᒥ, ᐃᑲᔪᕐᓯᓂᕐᒥᒃ ᐅᖃᓚᐅᔪᕗᑦ ᑖᑦᓱᒪ ᓄᓇᓕᓕᒫᓅᓕᖓᔪᓄᑦ ᐱᓇᓱᐊᖃᑎᒌᓐᓂᒧᑦ ᑲᑎᖕᖓᔩᑦ ᐱᒋᐊᕐᑎᑕᐅᒋᐊᓪᓚᓂᑦᓴᖓᓂᒃ. ᑖᓐᓇ ᑲᑎᖕᖓᔨᐅᕕᒃ ᐊᑕᐅᑦᓯᑰᕐᑎᓯᒍᑎᐅᓗᓂ ᐱᓇᓱᒍᑎᑦᓴᐅᓚᖓᔪᖅ ᐱᓇᓱᐊᕐᑕᐅᒋᐊᓕᓐᓂᒃ ᓄᓇᕕᒻᒥ ᐱᐊᕃᑦ ᖃᓄᐃᖕᖏᓯᐊᕐᓂᖏᓐᓂᒃ ᓱᕐᕃᔪᓂᒃ ᐱᓇᓱᐊᕈᑎᐅᓗᓂ ᓱᓇᒥᑦᓯᓯᐊᕐᑐᓂᒃ ᐊᒻᒪᓗ ᐃᓘᓐᓈᒍᑦ ᑕᑯᓐᓇᕈᓯᓕᓐᓂᒃ ᐱᓇᓱᒍᓯᖃᕐᓗᑎᒃ.

ᐊᑕᐅᑦᓯᑰᕐᑎᓯᔨᐅᑉ ᐱᓇᓱᒐᐅᑉ ᓄᐃᑕᐅᓂᖓ ᐃᓕᓴᕐᓂᓕᕆᓂᕐᒥ ᕿᒥᕐᕈᔭᐅᓚᖓᔪᖅ.  ᐊᑕᐅᑦᓯᑰᕐᑎᓯᔨ ᑲᒪᒋᔭᖃᕋᔭᕐᑐᖅ ᑎᒥᐅᔫᖃᑎᒌᑦ ᑲᒪᒋᒋᐊᓕᒻᒥᓂᒃ ᐱᓇᓱᓐᓂᖏᓐᓂᒃ, ᖃᐅᔨᒪᖃᑎᒌᒍᑎᖏᓐᓂᒃ ᐊᒻᒪᓗ  ᓄᓇᓕᓕᒫᓅᓕᖓᔪᓄᑦ ᐱᓇᓱᐊᖃᑎᒌᓐᓂᒧᑦ ᑲᑎᖕᖓᔩᑦ ᑲᑎᒪᓂᖏᑦᑕ ᐸᕐᓇᑕᐅᓂᖏᓐᓂᒃ.

ᖃᓄᐃᓘᕈᑎᑦᓴᖃᕐᓂᒧᑦ ᐸᕐᓀᒍᑎᐅᑉ ᐊᑐᓕᕐᑎᑕᐅᓂᖏᓐᓄᑦ, ᐃᓕᓴᕐᓂᓕᕆᓂᖅ ᐱᕙᓪᓕᐊᕗᖅ ᐋᕐᕿᓱᐃᓂᕐᒥᒃ ᓄᐃᑎᕆᓂᕐᒥᓗ ᑐᑭᓯᒪᒍᑎᑦᓭᑦ-ᐳᑯᑦᑕᐅᓯᒪᔪᑦ ᑐᑭᑖᕐᑕᐅᒋᐊᓕᓐᓄᑦ-ᑐᖕᖓᕕᐅᒍᓐᓇᕈᑎᑦᓴᖏᓐᓂᒃ.

ᓯᕗᓪᓕᐹᒥ ᑌᒪᖕᖓᓂᑦ ᖃᓄᐃᓘᕈᑎᑦᓴᖃᕐᓂᒧᑦ ᐸᕐᓀᒍᑎᒥᒃ ᐊᑐᓕᕐᑎᓯᒍᑏᑦ ᐱᒋᐊᓕᕐᓂᒪᑕᓂᑦ, ᐃᓕᓐᓂᐊᓂᕐᒥ ᑭᒡᒐᑐᕐᑏᑦ ᐊᑐᐃᓐᓇᖃᕈᓐᓇᓕᓚᐅᕐᑐᑦ ᑭᓯᑕᐅᒪᔪᓕᕆᒍᑎᓂᒃ ᐃᓕᓐᓂᐊᑎᓂᒃ ᐃᓕᓐᓂᐊᕕᒻᒦᖏᓐᓇᑎᑦᓯᓂᕐᒧᑦ, ᐱᔭᕇᕐᑐᑦ ᖃᑦᓯᐅᕙᓐᓂᖏᓐᓄᑦ ᐱᔭᖃᖃᑦᑕᓂᖏᓐᓂᓗ ᐃᓕᖓᔪᓂᒃ.

ᐳᑯᑕᐅᒪᔪᐃᑦ ᐊᕐᕌᒍᕐᓂᑦ 5-ᓂᑦ ᖄᖏᕐᑐᓂᑦ ᑭᓯᒍᑎᐅᓕᓂᕕᓃᑦ ᓄᐃᑕᐅᓚᐅᔪᕗᑦ.  ᓄᐃᑕᑎᑦᓯᔪᑦ ᐊᕐᕌᒍᑕᒫᖅ ᐃᓕᓐᓂᐊᑏᑦ ᐃᓕᓐᓂᐊᕕᒻᒦᖏᓐᓇᖃᑦᑕᓂᖏᓐᓂᒃ 93%-ᒦᑦᑎᓗᒍ ᐊᒻᒪᓗ ᐃᓕᓐᓂᐊᑕᒥᓂᒃ ᐱᔭᕇᖃᑦᑕᓂᖏᑦ 30%-ᒦᑦᑎᓗᒍᑦ ᐊᕐᕌᒍᕐᓂᒃ ᓯᑕᒪᐅᔪᖏᒐᕐᑐᓂᒃ ᐳᕐᑐᓂᕐᓴᒥ ᐃᓕᓐᓂᐊᕕᒻᒦᒌᕐᓱᑎᒃ.

ᐃᓕᓐᓂᐊᓂᕐᒥ ᑭᒡᒐᑐᕐᑏᑦ ᐅᖃᐅᓯᖃᓚᐅᔪᔪᑦ ᑐᓂᒪᓂᕐᒥᓂᒃ ᐱᓇᓱᒍᑎᑦᓴᖃᕐᑎᓯᒍᑎᑦᓴᓄᑦ ᑕᒪᒃᑯᓂᖓ ᐳᑯᑕᐅᒪᔪᓂᒃ ᕿᒥᕐᕈᓂᕐᓂᒃ ᐳᑯᒍᓯᕐᓂᓗ ᐊᑦᑕᓀᓪᓕᑎᕆᒍᑎᐅᒐᔭᕐᑐᓂᒃ. ᐋᕐᖀᒍᑎᑦᓭᑦ ᒪᓂᔭᐅᓚᐅᔪᕗᑦ ᐃᓕᓴᕐᓂᓕᕆᓂᐅᑉ ᐳᑯᑕᐅᒪᔪᓂᒃ ᖃᐅᔨᓴᕐᑎᖓᓄᑦ ᖃᐅᔨᓴᕐᑕᐅᒋᐊᓕᓐᓂᒃ ᐊᑕᐅᑦᓯᑰᕐᑎᓯᔨᒧᑦ ᑌᒃᑯᐊ ᓄᐃᑕᐅᕙᓪᓕᐊᔪᑦ ᖃᕆᑕᐅᔭᒃᑯᑦ ᐳᑯᒍᑎᓂᒃ ᐱᓇᓱᒍᑎᖏᑦ ᐃᓕᓐᓂᐊᕕᓐᓄᑦ ᐊᑐᕐᑕᐅᓯᐊᕈᓐᓇᖃᑦᑕᖁᓪᓗᒋᑦ ᖃᕆᑕᐅᔦᑦ ᐱᑐᑦᓯᒪᖃᑎᒌᒍᑎᖏᑦ ᐊᑐᑦᓯᐊᖃᔭᖕᖏᑲᓗᐊᕐᐸᑕ.

ᐃᓘᓐᓈᒍᑦ ᑐᕌᒐᖏᑦ ᑕᒪᒃᑯᐊ ᖃᓄᕐᑑᕈᑎᐅᖃᑦᑕᑐᐃᑦ ᒪᑐᒥᖓ ᐱᑦᔪᑎᓖᑦ ᐃᓕᓴᕐᓂᓕᕆᓂᖅ, ᐃᓕᓐᓂᐊᓂᕐᒥ ᑭᒡᒐᑐᕐᑎᖏᑦ, ᑲᒪᔨᖏᑦ ᐊᒻᒪᓗ ᐃᓕᓐᓂᐊᕕᓐᓂᑦ ᐊᐅᓚᑦᓯᓂᓕᕆᔨᖏᑦ ᐊᑐᕈᓐᓇᖃᑦᑕᖁᓗᒋᑦ ᐊᑑᑎᓪᓗᑐᕐᑐᓂᒃ-ᐅᓪᓗᒥᓯᐅᑎᓂᒃ ᐳᑯᑦᓯᒪᔪᓂᒃ ᑐᑭᓯᒪᒍᑎᓂᒃ ᖃᐅᔨᒪᒍᑎᒋᓗᒋᑦ ᑐᑭᑖᕐᑕᐅᒋᐊᓕᑦᑕᓕᓐᓄᑦ ᐱᓇᓱᑦᑕᐅᒋᐊᓕᓐᓄᑦ ᐃᓘᓐᓀᓂᑦ ᑎᒥᐅᔪᒥ ᐱᓇᓱᐊᕐᕕᖏᓐᓂᑦ.

ᐃᓕᓐᓂᐊᓂᕐᒥ ᑭᒡᒐᑐᕐᑏᑦ ᑐᑭᑖᕈᑎᒥᒃ ᐊᖏᓚᐅᔪᕗᑦ ᐃᑲᔪᕐᓯᓂᕐᒧᑦ ᐸᕐᓀᒍᑎᓕᐅᕐᓂᒥᒃ ᓄᐃᑦᓯᒍᑎᐅᓚᖓᔪᒥᒃ ᓄᓇᕕᒻᒥ ᓄᓇᓕᓕᒫᓅᓕᖓᔪᓂᒃ ᖃᐅᔨᓴᕐᓂᒧᑦ ᐊᖓᔪᕐᖃᐅᕕᒻᒥᒃ.

ᓄᓇᕕᒻᒥ ᓄᓇᓕᓕᒫᓅᓕᖓᔪᓂᒃ ᖃᐅᔨᓴᕐᓂᒧᑦ ᐊᖓᔪᕐᖃᐅᕕᒃ ᐱᑕᖃᕐᑎᓯᒐᔭᕐᑐᖅ ᓄᓇᕕᒻᒥᒃ ᑐᖕᖓᕕᐅᒐᔭᕐᑐᒥᒃ ᐱᓇᓱᐊᕐᕕᐅᓗᓂ ᖃᐅᔨᓴᕐᓂᒨᓕᖓᔪᓂᒃ ᐱᑕᖃᕐᑎᓯᑦᓯᐊᓗᑎᒃ ᐃᓘᓐᓈᒍᑦ-ᑎᒥᐅᔪᓕᒫᑦ ᑐᑭᓯᒪᐅᑎᖃᑎᒌᑦᓯᐊᕈᑎᑦᓴᖏᓐᓂᒃ ᐊᑕᐅᑦᓯᑰᑦᓯᐊᓂᕐᓴᐅᒍᑎᑦᓴᖏᓐᓂᓗ.

ᑖᓐᓇ ᑐᑭᑖᕈᑎᒃ ᓇᓗᓀᕐᓯᔪᖅ ᐃᓕᓴᕐᓂᓕᕆᓂᕐᒥᒃ ᐃᓂᖃᕋᔭᕐᑎᓗᒍ ᓄᓇᕕᒻᒥ ᓄᓇᓕᓕᒫᓅᓕᖓᔪᓂᒃ ᖃᐅᔨᓴᕐᓂᒧᑦ ᐊᖓᔪᕐᖃᐅᕕᐅᑉ ᐱᓇᓱᑦᑕᐅᒋᐊᓕᓐᓄᑦ ᑲᑎᖕᖓᔨᖏᓐᓂ ᑮᓇᐅᔭᖃᕐᑎᓯᖃᑎᐅᓗᑎᓗ ᑎᒥᐅᔪᓄᑦ ᐃᑲᔪᕐᓯᒍᑎᓂᒃ ᑕᒪᑦᓱᒪ ᐱᒋᐊᕐᑎᑕᐅᓂᖓᑕ ᐸᕐᓀᑕᐅᓂᖓᓂᒃ.

ᓄᓇᕕᒃ ᓯᕗᓂᑦᓴᕗᒻᒧᑦ ᑮᓇᐅᔦᓕᕿᒍᑏᑦ ᐊᖏᕐᑕᐅᓚᐅᔪᔪᑦ ᐊᒻᒪᓗ ᑖᓐᓇ ᐱᓇᓱᐊᕐᑕᖅ ᑮᓇᐅᔭᕐᑖᑎᑕᐅᓚᖓᑦᓱᓂ ᓄᓇᖃᕐᖄᓯᒪᔪᓅᓕᖓᔪᓂᒃ ᐅᑭᐅᕐᑕᑐᒥᓪᓗ ᐱᕙᓪᓕᐊᓂᕐᒧᑦ ᑲᓇᑕᒥ ᐊᒡᓚᕕᖓᓂᑦ ᐊᕐᕌᒎᓐᓄᑦ ᒪᕐᕉᓄᑦ (2018-2020)

ᑖᒃᑯᐊ ᐊᕐᕌᒎᒃ ᒪᕐᕉᒃ ᐱᕕᑦᓴᖃᕈᑎᒋᓚᖓᔭᒋᒃ ᓄᓇᕕᒃ ᓯᕗᓂᑦᓴᕗᑦ ᐃᓂᕐᕋᓯᑦᓯᐊᕈᑎᒋᓗᒋᑦ ᓯᕕᑐᓂᕐᓴᒧᑦ-ᓯᕗᓂᕐᒥ ᑮᓇᐅᔭᖃᕐᑎᓯᓗᑎᒃ ᐱᓇᓱᐊᖃᑎᑦᓴᒋᐊᓪᓚᓂᒃ ᑯᐯᒃ ᐃᓕᓐᓂᐊᓂᕐᒥ ᑐᕐᖃᑕᕐᕕᖓᓗ ᐱᕕᑦᓴᓯᐅᖃᑎᒌᓐᓂᖏᓐᓂᑦ. ᐱᓇᓱᐊᖃᑎᖃᕐᓃᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ, ᒪᑭᕝᕕᑯᓐᓂᒃ, ᐊᕙᑕᒃᑯᓂᒃ ᐊᒻᒪᓗ ᔮᓐ ᐋᐸᑦ ᐃᓕᓐᓂᐊᕕᒻᒪᕆᒻᒥᒃ ᑲᔪᓯᕗᑦ.

Back to News