ᐱᒋᐅᕐᓴᑎᑕᐅᓂᕐᒧᑦ ᐊᕐᖁᓯᐅᕐᓂᖅ, ᐱᓇᓱᒐᕐᒨᓕᖓᔪᓄᑦ ᐱᒋᐅᕐᓴᑎᑕᐅᓂᕐᒧᑦ ᐊᕐᖁᓯᐅᕐᓂᖅ, ᒪᕐᕉᓂᒃ ᐱᒋᐅᕐᓴᑎᑦᓯᒍᑎᓕᒃ ᐃᓕᑕᕆᔭᐅᒍᑎᑖᕐᑎᑕᐅᔪᕕᓃᓐᓄᑦ ᑯᐯᒻᒥ ᑐᕐᖃᑕᕐᕕᖓᓄᑦ ᐃᓕᓐᓂᐊᓂᓕᕆᓂᕐᒧᑦ ᔪᓓ 2017-ᖑᑎᓐᓗᒍ. ᓯᕗᓪᓕᖅ ᐃᓕᓐᓂᐊᕋᑦᓴᖅ, ᐱᓇᓱᓚᐅᕋᓂ ᐱᒋᐅᕐᓴᑎᑕᐅᓂᖅ (ᐱᓇᓱᒐᕐᒥᒃ ᖃᐅᔨᓴᕐᓂᖅ), ᓇᓗᓀᕐᑕᐅᒍᑎᖃᕐᓱᓂ ᐱᓇᓱᓚᐅᕋᓂ ᐱᒋᐅᕐᓴᑎᑕᐅᓂᖅ. ᒫᓐᓇ ᐊᑐᐃᓐᓇᐅᑎᑕᐅᔪᖅ ᐃᓕᓐᓂᐊᕕᓕᒫᑲᓴᕗᓐᓂ. ᑐᖓᓕᖓ ᐃᓕᓐᓂᐊᕋᑦᓴᖅ ᐱᓇᓱᕝᕕᒥ ᓱᖏᐅᓯᓴᕐᓂᖅ (ᐱᓇᓱᒐᕐᒧᑦ ᐱᒋᐅᕐᓴᓂᖅ), ᓇᓗᓀᕐᑕᐅᒍᑎᖃᕐᓱᓂ ᐱᒋᐅᕐᓴᑎᑕᐅᓂᖅ ᐱᓇᓱᒐᕐᒧᑦ. ᐊᑐᐃᓐᓇᐅᑎᑕᐅᓛᕐᑐᖅ ᐱᓇᓱᐊᖃᑎᖃᕐᓗᑎᒃ ᓄᓇᕕᒻᒥ ᐱᓇᓱᕝᕕᓂᒃ ᐊᒻᒪᓗ ᑎᒥᐅᔪᓂᒃ. ᑐᕌᒐᕆᔭᕗᑦ ᐊᑐᐃᓐᓇᐅᑎᑦᓯᓗᑕ ᐃᓕᓐᓂᐊᕋᑦᓴᓂᒃ ᐃᓕᓐᓂᐊᕕᓕᒫᑦᑎᓂ, ᐊᑐᐃᓐᓇᐅᑎᑕᐅᔪᑦ ᐊᑦᔨᒌᖕᖏᑑᖃᑦᑕᓛᕐᑐᖅ ᓄᓇᓕᓐᓂ, ᖃᓄᐃᓕᖓᓂᖏᑦ ᓄᓇᓖᑦ ᒪᓕᓪᓗᒋᑦ ᐊᒻᒪᓗ ᓄᓇᓕᓐᓂ ᐱᓇᓱᖃᑎᕗᑦ ᒪᓕᓪᓗᒋᑦ.

“ᐊᓕᐊᓱᑉᐳᒍ ᐊᑦᔨᒌᖕᖏᑐᓂᒃ ᐊᑐᐃᓐᓇᐅᑎᑦᓯᒐᑦᑕ ᑖᒃᑯᓅᖓ ᒪᕐᕉᓄᑦ ᓇᓗᓀᕐᑕᐅᒍᑎᓖᓐᓄᑦ ᐃᓕᓐᓂᐊᕋᑦᓴᓄᑦ. ᐱᓇᓱᓚᐅᕋᓂ ᐱᒋᐅᕐᓴᑎᑕᐅᓂᖅ (ᐱᓇᓱᒐᕐᒥᒃ ᖃᐅᔨᓴᕐᓂᖅ) ᐊᒻᒪᓗ ᐱᓇᕝᕕᒥ ᓱᖏᐅᓯᓴᕐᓂᖅ (ᐱᓇᓱᒐᕐᒧᑦ ᐱᒋᐅᕐᓴᓂᖅ) ᐱᕕᖃᕐᑎᓯᓚᖓᔪᖅ ᐅᕙᑦᑎᓂᒃ ᐊᑐᐃᓐᓇᐅᑎᑦᓯᑎᓪᓗᑕ ᑭᖕᖒᒪᒋᔭᖏᓐᓄᑦ ᐃᓕᓐᓂᐊᑏᑦ ᐱᒍᓐᓇᓯᑎᑕᐅᓗᑎᒃ ᐱᓇᓱᐊᕐᓗᑎᒃ  ᐱᓇᓱᕝᕖᑦ ᐊᑐᐃᓐᓇᐅᑎᑕᖏᓐᓄᑦ,” ᐅᖃᕐᑐᖅ ᐄᑐᐊ ᓯᓅᐹ, ᑐᑭᒧᐊᑦᑎᓯᔨ ᐃᓕᓐᓂᐊᑐᓕᕆᕕᒻᒥ ᑲᑎᕕᒃ ᐃᓕᓴᕐᓂᓕᕆᓂᕐᒥ,

ᐱᓇᓱᓚᐅᕋᓂ ᐱᒋᐅᕐᓴᑎᑕᐅᓃᑦ (ᐱᓇᓱᒐᕐᒧᑦ ᖃᐅᔨᓴᕐᓂᖅ) ᐊᕐᕌᒍᓂ ᐱᖓᓱᓂ ᐃᓕᓐᓂᐊᑕᐅᓲᖅ. ᐱᓇᓱᕝᕕᒥ ᓱᖏᐅᓯᓴᕐᓂᖅ (ᐱᓇᓱᒐᕐᒧᑦ ᐱᒋᐅᕐᓴᓂᖅ) ᐊᕌᒍᓕᒫᒥ ᐃᓕᓐᓂᐊᑕᐅᑎᓪᓗᒍ. ᐱᔭᕇᑐᐊᕋᒥᒃ ᑖᒃᑯᓂᖓ ᐊᑐᓂᑦ, ᐃᓕᓐᓂᐊᑎ ᐱᑖᕐᑎᑕᐅᒐᔭᕐᑐᖅ ᐃᓕᑕᕆᔭᐅᒍᑎᒥᒃ ᑯᐯᒃᑯᑦ ᑐᕐᖃᑕᕐᕕᖓᓂᑦ ᐃᓕᓐᓂᐊᓂᓕᕆᓂᕐᒧᑦ ᓱᓕᑎᑦᓯᓗᑎᒃ ᐱᒍᓐᓇᓯᓂᖓᓂᒃ. ᑕᒪᖏᒃ ᐃᓕᓐᓂᐊᒑᒃ ᐱᕕᖃᕐᑎᓯᓚᖓᔪᑦ ᐃᓕᓐᓂᐊᑎᓂᒃ ᐃᓕᑦᓯᑎᑦᓯᓗᑎᒃ ᐱᓇᓱᒐᕐᒧᑦ ᐱᒍᓐᓇᓯᑎᑦᓯᓗᑎᒃ ᐊᑐᕐᑕᐅᒍᓐᓇᑐᑦ ᐱᓇᓱᒐᑦᓴᑖᕐᓂᒧᑦ. ᐃᓕᓐᓂᐊᒑᒃ ᐃᓕᓐᓂᐊᑎᓂᒃ ᐃᓕᓐᓂᐊᒐᑐᐃᓐᓇᓂᒃ ᑲᔪᓯᒍᓐᓇᑎᑦᓯᒥᔫᒃ ᖁᕝᕙᕆᐊᕐᑎᓯᓗᑎᒃ ᐊᓪᓚᓯᒪᔪᕐᓂᐊᓂᕐᒥᒃ ᐊᒻᒪᓗ ᑭᓯᑦᓯᒍᑎᓐᓂᐊᓂᕐᒥᒃ ᐱᒍᓐᓇᓯᑎᑦᓯᓗᑎᒃ.

ᑕᑯᓐᓇᓱᓂ ᑭᖑᒧᑦ ᐊᑐᓕᕐᑎᑕᐅᓂᖏᓐᓂᒃ ᐱᓇᓱᓚᐅᕋᓂ ᐱᒋᐅᕐᓴᑎᑕᐅᓃᑦ ᑕᒃᑲᓂ ᐊᕐᕌᒍᒥ, ᐄᑐᐊ ᐅᖃᕐᑐᖅ ᐱᕙᓪᓕᑎᑕᐅᓂᖏᓐᓂᒃ ᐃᑲᔪᕐᓂᖏᓐᓄᑦ ᓄᓇᕕᒻᒥ ᐱᓇᓱᖃᑎᖏᑦ. “ᐃᓕᓴᕐᓂᓕᕆᓂᕐᒥ ᑭᒡᒐᑐᕐᓗᖓ, ᓇᑯᒦᕈᒪᕗᖓ ᐃᓚᒌᓴᒃᑯᓂᒃ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ ᐊᒻᒪᓗ ᐃᓚᐅᔪᓂᒃ ᓄᓇᓕᓐᓂ ᑲᕙᒫᐱᒃᑯᖏᑦ. ᐱᒻᒪᕆᒻᒥᒃ ᐱᒍᑦᔨᓂᖏᑦ ᓄᓇᕕᒻᒥᐅᑉ ᐅᕕᒐᕐᑐᖏᑦ ᑲᔪᓯᑦᓯᐊᓂᖏᓐᓄᑦᒡ,” ᐅᖃᕆᐊᓪᓚᑐᖅ.

2017-2018-ᖑᑎᓪᓗᒍ, ᐱᓇᓱᓚᐅᕋᓂ ᐱᒋᐅᕐᓴᑎᑕᐅᓃᑦ (ᐱᓇᓱᒐᕐᒧᑦ ᖃᐅᔨᓴᕐᓂᖅ) ᐊᑐᐃᓐᓇᐅᑎᑕᐅᓚᐅᔪᖅ ᐱᓇᓱᖃᑎᖃᕐᓱᑎᒃ ᐯᕆᑦᓯᕕᓐᓂᒃ ᑲᖏᕐᓱᒥ, ᑰᑦᔪᐊᒥ ᐊᒻᒪᓗ ᓴᓪᓗᓂ. ᓄᓇᓕᖓᑕ ᑲᕙᒫᐱᒃᑯᑦ ᐊᐅᓚᔪᓕᕆᕕᖓᓂᒃ ᓴᓪᓗᓂ ᐃᓚᐅᓯᒪᒻᒥᔪᖅ ᑲᔪᓯᑎᑕᐅᓂᖓᓄᑦ ᐃᓕᓐᓂᐊᒐᖅ, ᐃᓚᐅᒻᒥᑎᓪᓗᒋᑦ ᑯᐊᐸᒃᑯᑦ ᓂᐅᕕᕐᓂᐊᕕᖓ ᐅᒥᐅᔭᕐᒥ.

Back to News