ᑕᒃᑲᓂ ᐊᕐᕌᒍᒥ, ᐃᑲᔪᕐᑕᐅᓱᑎᒃ ᐃᓕᓐᓂᐊᑎᑦᓯᓂᕐᒧᑦ ᐃᓱᐊᕐᓭᔨᓄᑦ, ᐃᓄᒻᒪᕇᑦ, ᐊᖓᔪᕐᖄᑦ ᐊᒻᒪᓗ ᓄᓇᓕᒻᒥᐅᑦ, 500 ᐅᖓᑖᓄᑦ ᐃᓕᓐᓂᐊᑐᑦᓭᑦ ᐱᐅᓯᐅᒥᑎᑦᓯᓛᕐᖁᑦ ᐊᓪᓚᓂᐊᕈᓯᒥᓂᒃ ᐊᒻᒪᓗ ᐊᖏᓕᐅᒥᑎᑦᓯᓗᑎᒃ ᐊᓪᓚᓂᐊᕐᓂᒥᒃ ᐊᓕᐊᓱᓐᓂᒥᓂᒃ ᐅᓂᒃᑳᑐᐊᕐᓂᑯᑦ, ᐊᕕᑦᑐᓯᒪᓗᑎᒃ ᐊᓪᓚᓂᐊᕐᓂᒧᑦ, ᓴᓇᖕᖑᐊᓂᕐᒧᑦ ᐊᒻᒪᓗ ᑕᑯᒥᓇᕐᑐᓕᐅᕐᓂᒧᑦ, ᐊᓪᓚᓂᕐᒧᑦ ᐊᒻᒪᓗ ᒪᙯᖕᖑᐊᓂᕐᒧᑦ.

ᐃᓕᓐᓂᐊᓃᑦ ᓄᓇᓕᒻᒥᐅᖑᓂᕐᒧᑦ ᓲᖑᓯᐅᒥᑎᑦᓯᓂᖃᓲᑦ ᑲᑦᓱᙰᓕᓴᕐᑎᓯᑦᓱᑎᒃ ᐃᓗᕐᖁᓯᖃᑎᒌᓐᓂᒥᒃ ᐊᓪᓚᓯᒪᔪᓕᕆᓂᕐᒥᒃ ᐊᒻᒪᓗ ᐃᓕᓐᓂᐊᓂᕐᒥᒃ ᐱᕙᓪᓕᑎᑦᓯᔪᒥᒃ ᐃᓘᓐᓇᖓᓂᒃ ᓄᓇᓕᒻᒥᒃ. ᐃᓚᒋᐊᕈᑎᐅᑎᓪᓗᒍ, ᐱᕕᖃᕐᑎᓯᓲᑦ ᐱᐊᕋᕐᓂᒃ ᐅᑭᐅᓕᓐᓂᒃ 5-ᒥᑦ 12-ᒧᑦ ᐱᒋᐅᕐᓴᑎᑦᓯᓂᕐᒥᒃ ᐃᓄᑦᑎᑐᑦ, ᖃᓪᓗᓈᑎᑐᑦ ᐊᒻᒪᓗ ᐅᐃᒍᐃᑎᑐᑦ ᐊᓪᓚᓂᐊᕈᓐᓇᓂᖏᓐᓂᑦ ᐱᒍᓐᓇᓯᔭᕕᓂᖏᓐᓂᒃ ᐃᓕᓐᓂᐊᓇᐅᑉ ᐊᕐᕌᒍᖓᓂ. “ᑖᒪᓐᓇ ᐃᑲᔪᕐᓯᓂᖃᓪᓚᕆᓚᖓᔪᖅ ᐃᓕᑦᓯᔭᕕᓂᖏᓐᓂᒃ ᐊᓯᐅᔨᑎᑦᓯᑌᓕᓂᕐᒧᑦ ᐊᓯᐅᔨᔭᐅᒍᓐᓇᑐᓂᒃ ᐅᐱᕐᖔᒥ ᕿᑲᕐᓇᖃᕐᑎᓗᒋᑦ,” ᐅᖃᕐᑐᖅ ᐄᑐᐊ ᓯᓅᐹ, ᑐᑭᒧᐊᑦᑎᓯᔨ ᐃᓕᓐᓂᐊᑐᓕᕆᕕᒻᒥᓯ ᑲᑎᕕᒃ ᐃᓕᓴᕐᓂᓕᕆᓂᕐᒥ.

ᑲᑎᔭᐅᔪᕕᓂᖅ ᑰᑦᔪᐊᒥ ᔫᓂ 27-ᖑᑎᓪᓗᒍ, ᒥᓚᓂ ᕚᓪᓯᓐ ᓄᓇᓕᓕᒫᓂ ᑐᑭᒧᐊᑦᑎᓯᔨ ᑯᐯᒻᒥ, ᓄᓇᕗᑦᒥ ᐊᒻᒪᓗ ᐊᑦᓛᓐᑎᒃᖓᓂ ᑲᓇᑕᐅᑉ ᕗᔭᓐᑎᐊ ᐃᓕᓐᓂᐊᕕᒻᒪᕆᖓᓂ ᐅᖃᕐᑐᖅ ᐃᒫᒃ “ᐃᓱᓕᓂᖏᓐᓂᒃ ᐅᐱᕐᖔᒥ ᐃᓕᓐᓂᐊᑎᑦᓯᓂᕐᒥ, ᐊᖓᔪᕐᖄᕆᔭᐅᔪᑦ ᐊᓕᐊᒋᔭᖃᓲᑦ ᐅᖃᐅᓯᑦᓴᒥᓂᒃ ᐅᖄᒋᐊᒥᒃ ᐱᐊᕋᖏᑦᑕ ᐊᓪᓚᓂᐊᕈᓐᓇᓯᓕᐅᒥᓂᖏᓐᓂᒃ ᐃᓕᓐᓂᐊᑎᑕᐅᓂᕐᒥᓂ.”

ᐊᓪᓚᓯᒪᔪᓕᕆᓂᕐᒥ ᐃᓕᓐᓂᐊᑎᑕᐅᓂᖅ ᐊᖏᓕᐅᒥᓯᒪᓕᕐᑐᖅ ᑰᑦᔪᐊᕌᐱᒻᒥ ᖁᓕᓪᓗ ᒪᕐᕈᓗᓄᑦ ᖁᓕᓪᓗ ᓯᑕᒪᓪᓗᓂᑦ ᓄᓇᕕᒻᒥ ᓄᓇᓕᖏᓐᓂᑦ. “ᐊᓕᐊᓱᑦᑐᒍᑦ ᐅᖃᕆᐊᒥᒃ ᕿᑎᕐᖃᑲᓴᖏᑦ 40 ᐊᓪᓚᓯᒪᔪᓕᕆᓂᕐᒥ ᐃᓕᓐᓂᐊᑎᑦᓯᔩᑦ ᐱᓇᓱᑦᑎᑖᕆᔭᐅᓚᐅᔪᑦ ᓄᓇᓕᓐᓂᑦ ᑕᒃᑲᓂ ᐊᕐᕌᒍᒥ,” ᐅᖃᕐᑐᖅ ᒥᓚᓂ ᕚᓪᓯᓐ. “ᓯᕗᓂᒋᐊᕐᒥ ᑐᕌᒐᕆᔭᕗᑦ ᐱᓇᓱᑦᑎᑖᕐᓂᒥᒃ ᐅᐱᕐᖔᒥ ᐃᓕᓐᓂᐊᑎᑦᓯᔨᓂᒃ ᓄᓇᓕᓐᓂᑦ ᑭᓯᐊᓂ ᐱᓯᒪᔪᓂᒃ,” ᐃᓚᒋᐊᕆᔪᖅ. ᐃᓘᓐᓇᑎᒃ ᐅᐱᕐᖔᒥ ᐃᓕᓐᓂᐊᑎᑦᓯᔩᑦ ᑲᑎᒍᓐᓇᓯᓚᐅᔪᐃᑦ ᐃᓕᓐᓂᐊᑎᑦᓯᓂᖅ ᐱᒋᐊᓚᐅᕐᑎᓇᒍ ᐊᑐᐃᓐᓇᐅᑎᑕᐅᔪᖅ ᕗᔭᓐᑎᐊ ᐃᓕᓐᓂᐊᕕᒻᒪᕆᖓᓂᑦ ᑰᑦᔪᐊᒥ, ᐱᓇᓱᐊᕈᓯᒥ ᑭᖑᓪᓕᕌᖓᓂ ᔫᓂᒥ.

ᑕᒃᑲᓂ ᐅᐱᕐᖔᒥ ᑕᓪᓕᒪᐅᒍᑎᒋᓕᕐᑕᖓ ᐱᓇᓱᐊᖃᑎᒌᑦᓯᐊᓂᖏᑦᑕ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐊᒻᒪᓗ ᕗᔭᓐᑎᐊ ᐃᓕᓐᓂᐊᕕᒻᒪᕆᖓᑕ. ᐄᑐᐊ ᓯᓅᐹ, ᐅᖄᔪᖅ ᑖᑦᓱᒪ ᐱᓇᓱᐊᖃᑎᒌᓐᓂᒧᑦ ᐱᑦᓯᐊᓂᖓᓂᒃ ᐊᒻᒪᓗ ᐱᕙᓪᓕᑎᑦᓯᓂᖓᓂᒃ ᓄᓇᕕᒻᒥ ᐃᓕᓐᓂᐊᑎᓂᒃ, “ᐃᓚᒋᐊᕈᑎᐅᑎᓪᓗᒍ ᐊᓪᓚᓯᒪᔪᓕᕆᓂᕐᒧᑦ ᐃᓕᓐᓂᐊᑎᑕᐅᓂᖅ ᐅᐱᕐᖔᒥ, ᐱᓇᓱᐊᖃᑎᒌᓐᓂᕗᑦ ᐱᕙᓪᓕᐊᑎᑦᓯᒪᔭᕗᑦ ᕗᔭᓐᑎᐊ ᐃᓕᓐᓂᐊᕕᒻᒪᕆᖓᓗ ᐱᕕᖃᕐᑎᓯᓯᒪᔪᖅ ᐊᕐᕌᒍᓂ ᐱᖓᓱᓂ ᓴᓇᑦᑐᓴᐅᑎᓕᕆᓂᕐᒧᑦ ᐱᓇᓱᐊᖃᑎᒌᓐᓂᑎᓐᓂᒃ ᐃᓘᓐᓇᑲᓴᖏᓐᓂ ᓄᓇᕕᐅᑉ ᐃᓕᓐᓂᐊᕕᖏᓐᓂ ᐅᑭᐊᑦᓴᐅᓚᐅᔪᖅ ᐊᕐᕌᓂ. ᐃᑲᔪᕐᑏᑦ ᐃᓕᓐᓂᐊᑐᓂᒃ ᐱᕕᖃᕐᑎᓯᓚᐅᔪᑦ ᐃᑲᔪᕐᑕᐅᒍᑎᒋᒋᐊᓕᓪᓚᕆᕗᓐᓂᒃ ᐳᕐᑐᓂᕐᓴᒥ 3, 4 ᐊᒻᒪᓗ 5-ᒥ ᐃᓕᓐᓂᐊᑎᓂᒃ ᐃᓕᓐᓂᐊᓇᐅᑉ ᐊᕐᕌᒍᖓᓂ, ᓄᑖᓄᑦ ᐃᓕᓐᓂᐊᑎᑦᓯᒍᑎᓄᑦ ᐱᕙᓪᓕᐊᑎᓪᓗᑕ”, ᐅᖃᕐᑐᖅ. ᓴᓇᑦᑐᓴᐅᑎᓕᕆᓂᕐᒥ ᐃᑲᔪᕐᑕᐅᒍᑏᑦ ᐱᓇᓱᐊᕐᑕᐅᓂᖓ ᐱᑦᓯᐊᓂᖃᓚᐅᔪᖅ ᐊᒻᒪᓗ ᑲᔪᓯᓚᖓᑦᓱᓂ ᐊᕐᕌᒎᓚᖓᔪᒥ.

ᐊᓪᓚᓯᒪᔪᓕᕆᓂᕐᒧᑦ ᐅᐱᕐᖔᒥ ᐃᓕᓐᓂᐊᑎᑕᐅᓃᑦ ᐱᒋᐊᓛᕐᑐᑦ ᔫᓓ 9-ᒥ, ᓄᓇᓕᖏᓐᓂ ᑰᑦᔪᐊᕌᐱᒻᒥ, ᐅᒥᐅᔭᒥ, ᐃᓄᑦᔪᐊᒥ, ᐳᕕᕐᓂᑐᒥ, ᐃᕗᔨᕕᒻᒥ, ᓴᓪᓗᓂ, ᑲᖏᕐᓱᔪᐊᒥ, ᖁᐊᕐᑕᒥ, ᑲᖏᕐᓱᒥ, ᐊᐅᐸᓗᒻᒥ, ᑕᓯᐅᔭᒥ ᐊᒻᒪᓗ ᑰᑦᔪᐊᒥ. ᕗᔭᓐᑎᐊ ᐃᓕᓐᓂᐊᕕᒻᒪᕆᖓ ᐱᑕᖃᕐᑎᓯᓚᖓᒻᒥᔪᖅ 3,000 ᐅᖓᑖᓄᑦ ᓄᑖᓂᒃ ᐊᓪᓚᓂᐊᒐᕐᓂᒃ ᐃᓕᓐᓂᐊᑎᓄᑦ ᐊᒻᒪᓗ ᓄᓇᓕᓐᓄᑦ ᑕᒃᑲᓂ ᐅᐱᕐᖔᒥ. ᑕᐃᒪᖕᖓᒐᓚᒃ, ᑖᒃᑯᐊ ᐊᓪᓚᓂᐊᒉᑦ ᓯᕗᓪᓕᐹᑦ ᐃᓕᓐᓂᐊᑏᑦ ᐊᖏᕐᕋᐅᑎᓲᖏᑦ ᐃᒻᒥᓄᑦ ᐊᓪᓚᓂᐊᒐᕐᒥᓄᑦ ᓄᐊᑕᒥᓅᕋᑦᓴᕆᑦᓱᒋᑦ.

ᐊᓪᓚᓯᒪᔪᓕᕆᓂᕐᒧᑦ ᐃᓕᓐᓂᐊᑎᑕᐅᓂᖅ ᐱᒍᓐᓇᑎᑕᐅᓲᖅ ᐃᑲᔪᕐᑕᐅᓱᑎᒃ ᓄᓇᓕᓐᓄᑦ ᐅᐸᑦᓯᒪᔭᒥᓄᑦ, ᐃᓚᐅᑎᓪᓗᒋᑦ ᑮᓇᐅᔭᖃᕐᑎᑕᐅᒍᑎᖏᑦ ᐊᒻᒪᓗ ᐃᑲᔪᓯᒍᑎᖏᑦ ᑲᑎᕕᒃ ᐃᓕᓴᕐᓂᓕᕆᓂᐅᑉ, ᒪᑭᕝᕕᒃ ᑯᐊᐳᕇᓴᐅᑉ (ᐅᖓᓗᒃᑯᑦ ᑮᓇᐅᔭᖃᕐᑎᓯᒍᑎᖏᑦ) ᐊᒻᒪᓗ ᐃᓄᐃᑦ ᖃᖓᑦᑕᔫᖏᑦ.

ᐊᑎᓕᐅᕈᒪᑐᐊᕈᕕᑦ ᐱᐊᕋᕐᓄᑦ, ᐃᓕᓐᓂᐊᕕᑦᓯᓄᑦ ᑕᑯᓂᐊᕈᓐᓇᖁᑎᑦ.

ᖃᐅᔨᒋᐊᑦᓯᐊᕈᒪᒍᕕᑦ ᕗᔭᓐᑎᐊ ᐃᓕᓐᓂᐊᕕᕐᔪᐊᖓᓂᒃ, ᐅᕗᖓ ᑕᑯᒋᐊᕈᓐᓇᖁᑎᑦ www.frontiercollege.ca

Back to News