ᐊᑐᐃᓐᓇᕈᕐᑎᐸᓪᓕᐊᓕᕐᓱᑕ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᓐᓄᑦ ᐅᐱᕐᖔᒥ ᐃᓕᓐᓂᐊᑎᑦᓯᓂᕐᒧᑦ, ᐃᑦᓯᕙᖃᑕᐅᒋᑦ ᐅᕙᑦᑎᓄᑦ ᐃᓚᖏᓪᓗ ᐃᓕᓐᓂᐊᑎᑦᓯᔨᐅᓚᐅᔪᑦ ᐊᕐᕌᓂ ᐃᓕᓐᓂᐊᑕᐅᔪᓂ. ᔪᓓ 2018-ᒥ, ᐊᐱᕆᓚᐅᔪᔪᒍᑦ ᕉᑕ ᐃᔨᑭᐅᓪᒥᒃ, ᕕᓂ ᐹᕋᓐᒥᒃ, ᓕᓯ ᑑᒪᓯᒥᒃ, ᖂᑉᐱᐊ ᑫᑦᑕᖅ ᐊᒻᒪᓗ ᑳᓓ ᐃᓄᑉᐸᖅ. ᐅᕙᑦᑎᓂᒃ ᐅᖃᐅᑦᔩᓚᐅᔪᑦ ᓱᓇᓂᒃ ᐃᓕᓐᓂᐊᑎᑦᓯᒍᑎᖃᓛᕐᓂᒥᓂᒃ, ᐊᒻᒪᓗ ᐅᖄᕐᓱᑎᒃ ᐃᓱᒪᒋᔭᒥᓂᒃ ᖃᓄᖅ ᐱᒻᒪᕆᐅᓂᕕᓂᖏᓐᓂᒃ ᐃᓄᐃᑦ ᐃᓕᓐᓂᐊᑎᑦᓯᔨᐅᖃᑎᒌᑦ ᐊᕐᕌᒍᓂ ᐊᓂᒍᕐᑐᓂ. ᐅᓪᓗᒥ ᑲᑎᓯᓚᖓᕗᒍᑦ ᕕᓂ ᐱᐊᔭᓐᒥᒃ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᐅᖃᐅᑎᓚᐅᕐᑎᒍᑦ ᑭᓇᐅᒻᒪᖔᕐᐱᑦ ᐊᒻᒪᓗ ᓇᓂᒥᐅᖑᒻᒪᖔᕐᐱᑦ …
ᕕᓂ ᐱᐊᔭᓐ: ᕕᓂ ᐱᐊᔭᓐᖑᕗᖓ. ᑲᖏᕐᓱᐊᓗᑦᔪᐊᒥᐅᖑᑦᓱᖓ ᐊᒻᒪᓗ ᑕᒫᓂ ᐃᓕᓐᓂᐊᑦᓯᔨᐅᓕᕐᓱᖓ 18-ᓂᒃ ᐊᕐᕌᒍᕐᓂᒃ. ᐊᕐᕌᓂ ᐱᓇᓱᐊᓚᐅᔪᖓ ᐃᓕᓐᓂᐊᓂᓕᕆᓂᕐᒥ ᐃᓱᐊᕐᓭᔨᐅᑦᓱᖓ. ᐊᓕᐊᒋᓚᐅᔭᕋ ᐊᑑᑎᑦᓱᒍ, ᑭᓯᐊᓂ ᖃᐅᔨᑎᑦᓯᓚᐅᔪᖅ ᐅᕙᓐᓂᒃ ᐆᒻᒪᑎᒐ ᐃᓕᓐᓂᐊᕕᒻᒦᒍᒪᓂᕐᓴᐅᓂᖓᓂᒃ, ᐃᓕᓐᓂᐊᑎᓂᒃ ᐱᓇᓱᐊᖃᑎᖃᕐᓗᖓ. ᑌᒣᒻᒪᑦ ᐊᐅᒡᒍᓯᒥ ᐱᒋᐊᕐᓗᒍ, ᐃᓕᓐᓂᐊᑎᑦᓯᓂᕐᒧᑦ ᐅᑎᓛᕐᑐᖓ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᓱᓇᓃᒃ ᐃᓕᓐᓂᐊᑎᑦᓯᓚᐅᔪᕕᑦ ᐅᐱᕐᖔᖑᓚᐅᔪᒥ?
ᕕᓂ ᐱᐊᔭᓐ: ᐃᓕᓐᓂᐊᑎᑦᓯᓚᐅᔪᖓ ᐅᖃᐅᓯᓕᕆᓂᕐᒧᑦ ᓴᓇᖕᖑᐊᓂᕐᒥᒃ, ᑳᓓ ᐃᓄᑉᐸᓗ ᐊᒻᒪᓗ ᑲᑐᕇᓐ ᑎᐊᓐᑦᔅ ᐃᓕᓐᓂᐊᒐᕐᒥᒃ ᖃᐅᔨᒋᐊᕐᕕᐅᓱᓂ. ᐃᓕᓐᓂᐊᑕᐅᔪᖅ ᑐᕌᒐᖓ ᐃᓚᐅᔪᓂᒃ ᐃᓕᓐᓂᐊᑎᑦᓯᓂᐅᑦᓱᓂ ᖃᓄᐃᓘᕐᓗᑎᒃ ᐃᑲᔪᕐᓯᒍᓐᓇᓂᖏᓐᓂᒃ ᐃᓕᓐᓂᐊᑎᓂᒃ ᐱᕙᓪᓕᐊᑎᑦᓯᑎᓪᓗᒋᑦ ᐅᖄᒍᓐᓇᓂᕐᒥᒃ, ᐊᓪᓚᓂᐊᕐᓂᑯᑦ, ᑐᓵᓂᒃᑯᑦ ᐊᒻᒪᓗ ᐊᓪᓚᓂᒃᑯᑦ ᐊᒻᒪᓗ ᐊᓯᒋᐊᓪᓚᖏᑎᒍᑦ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᑕᑯᓐᓇᓱᒍ ᐃᓕᓐᓂᐊᒐᖅ ᑭᖑᓂᕐᒥ, ᓱᓇᒦᒃ ᐊᐅᓚᔨᔭᖃᓗᐊᖕᖑᐊᕿᑦ?
ᕕᓂ ᐱᐊᔭᓐ: ᐃᓕᓐᓂᐊᕆᐊᖕᖓᑎᓪᓗᒋᑦ ᐅᓗᓂᒃ ᐃᑭᑦᑐᓂᒃ ᓱᖏᐅᓯᓴᕆᐊᖃᓚᐅᔪᒍᑦ. ᑭᖑᓂᐊᓂ, ᐃᓚᐅᔪᐃᑦ ᐃᓚᐅᓂᖃᑦᓯᐊᓯᓚᐅᔪᑦ. ᐊᓕᐊᓇᓚᐅᔪᖅ ᑌᒣᓕᒻᒪᑕ, ᐃᓘᓐᓇᑎᒃ ᐃᓕᓐᓂᐊᓂᕐᒦᓕᕐᑎᓗᒋᑦ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᖃᓅᖅ ᐃᓚᐅᓯᓐᓂᕿᑦ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᓐᓄᑦ ?
ᕕᓂ ᐱᐊᔭᓐ: ᓯᕗᓪᓕᐹᒥ ᑕᒪᓐᓇ ᐃᓕᓐᓂᐊᑎᑦᓯᓂᑦ ᐊᑑᑎᒋᐅᓚᐅᔭᕋ. ᐊᐱᕆᔭᐅᒋᐊᖕᖓᓯᒪᔪᖓ ᐃᓕᓐᓂᐊᑎᑦᓯᒍᒪᒻᒪᖔᕐᒪ… ᑕᐃᒪ ᐊᐅᑳᕈᓐᓇᕈᓐᓀᓚᐅᔪᖓ (ᐃᔪᕐᓱᓂ)!

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᐊᐅᑳᕐᓂᖏᒋᐊᒦᑦ ᐅᒃᑯᐊᓕᓚᐅᔪᕕᑦ?

ᕕᓂ ᐱᐊᔭᓐ: ᐱᒋᐊᖕᖓᓂᖓᓂ, ᐊᐊ! ᐱᒋᐊᓚᐅᕐᑎᓇᒋᑦ ᐅᐱᕐᖔᒥ ᐃᓕᓐᓂᐊᓂᕐᒥᒃ, ᐃᓱᒫᓗᒐᓚᓚᐅᔪᖓ ᐃᓘᓐᓇᖏᓐᓂᒃ. ᑭᓯᐊᓂ ᓯᕗᓪᓕᐹᖓᓂ ᐅᓪᓗᖓᓂ ᐃᓕᓐᓂᐊᑎᑦᓯᑎᓪᓗᑕ, ᐃᓱᒪᒋᓚᐅᔭᕋ ᐊᓕᐊᓇᕐᑑᒋᐊᖓ ᐃᓕᓐᓂᐊᑎᑦᓯᒋᐊᒥᒃ ᐱᓇᓱᖃᑎᑦᑎᓂᒃ. ᐃᓘᓐᓈᒍᑦ, ᐃᓕᓐᓂᐊᑎᑦᓯᓂᕆᓚᐅᔭᕗᑦ ᐊᓕᐊᓇᓚᐅᔪᖅ ᐊᒻᒪᓗ ᓂᕆᐅᓚᐅᔪᖕᖏᑐᖓ ᐊᓕᐊᓱᓚᖓᒋᐊᒥᒃ ᑖᑦᓱᒥᖓ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᓱᓇᒦᒃ ᐊᓕᐊᒋᔭᖃᕐᓂᐸᐅᓚᔪᕕᑦ?
ᕕᓂ ᐱᐊᔭᓐ: ᐊᒥᓱᓂᒃ ᐊᓕᐊᓱᓚᐅᔪᖓ… ᐊᓕᐊᒋᓚᐅᔭᕋ ᐃᓕᓐᓂᐊᑎᑦᓯᔨᓂᒃ ᖃᐅᔨᒻᒫᑕᕆᐊᒥᒃ ᐃᓕᓐᓂᐊᓚᐅᔪᓂᒃ. ᐊᕐᕌᒍᐃᑦ ᐊᒥᓲᓕᕐᑐᑦ ᐱᔭᕇᕈᑎᑖᕐᓯᒪᑎᓪᓗᖓ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᓐᓄᑦ. ᐊᓕᐊᒋᒻᒥᔭᕋ ᐃᓕᓐᓂᐊᒐᐅᕐ ᐃᓗᓕᖏᓐᓂᒃ ᕿᒥᕐᕈᒋᐊᒥᒃ ᐊᑐᐃᓐᓇᕈᕐᑎᓱᖓ ᐃᓕᓐᓂᐊᑎᑦᓯᒍᑎᑦᓴᑲᓂᒃ. ᐃᑲᔪᕐᓯᓚᕆᓚᐅᔪᖅ ᖃᐅᔨᒪᔭᒃᑲᓂᒃ ᓄᑕᐅᓯᓕᑎᕆᓂᕐᒧᑦ ᐃᓚᖏᓐᓂᒃ ᐃᓕᓯᒪᔭᒃᑲᓂᒃ ᑌᑦᓱᒪᓂᐊᓘᓕᕐᑐᖅ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᐱᔭᕇᕈᑎᑖᕐᓯᒪᕖᑦ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᓐᓄᑦ?
ᕕᓂ ᐱᐊᔭᓐ: ᐊᐊ, ᐃᓕᓐᓂᐊᑎᑦᓯᔨᐅᓂᕐᒧᑦ ᓇᓗᓀᕐᑕᐅᒍᑎᑖᕐᓯᒪᔪᖓ ᐊᕐᕌᒍᕐᓂ 8 ᓈᓕᕐᑐᑦ. ᐊᒻᒪᓗ ᐃᓚᐅᓚᐅᕐᓯᒪᓇᖓ ᑌᒪᖕᖓᓂᑦ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᓐᓄᑦ!

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᐃᓕᓐᓂᐊᑎᐅᑦᓱᑎᑦ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᓐᓄᑦ, ᓱᓇᒦᒃ ᐱᕚᓪᓕᔭᐅᒍᑎᖃᕐᓂᕿᑦ?
ᕕᓂ ᐱᐊᔭᓐ: ᐊᕐᕌᒍᐃᑦ ᐊᒥᓲᓕᕐᑐᑦ… ᐊᐅᓚᔨᔪᖓ ᑖᐃᑦᓱᒪᓂ ᐃᓕᓐᓂᐊᕈᑏᑦ ᓄᑕᐅᖕᖏᑑᓂᖏᓐᓂᒃ. ᐃᓚᐅᓕᕐᒥᒐᒪ ᐃᓕᓐᓂᐊᑎᑦᓯᔨᐅᑦᓱᖓ, ᑕᑯᒍᓐᓇᑐᖓ ᐃᓕᓐᓂᐊᑎᑦᓯᒍᑏᑦ ᓄᑕᐅᓯᓕᕐᑕᐅᓯᒪᓕᕆᐊᖏᑦ. ᐃᓗᓕᖏᑦ ᒫᓐᓇᓂᑕᐅᓂᖏᓐᓂᒃ ᐊᒻᒪᓗ ᐃᑲᔪᕐᓯᓂᕐᒧᑦ ᐃᓕᓐᓂᐊᑎᑦᓯᔨᓂᒃ ᐱᑕᖃᕐᓱᑎᒃ ᐊᑐᕋᑦᓴᖏᓐᓂᒃ ᐃᓕᓐᓂᐊᑎᑦᓯᒍᑎᑦᓴᖏᓐᓂᓗ ᐊᑐᑦᓴᐅᑎᒋᒍᓐᓇᑕᖏᓐᓂᒃ ᐃᓕᓐᓂᐊᕕᒻᒥᓂ. ᐊᓕᐊᒋᓚᐅᕐᑕᕋ ᖃᐅᔨᒋᐊᖓ ᐃᓕᓐᓂᐊᑦᓯᔩᑦ ᐱᒋᐅᕐᓴᑎᑕᐅᓂᖏᑦ ᓄᑕᐅᓯᓕᕐᓯᒪᓂᕆᐊᖏᑦ ᐃᓗᓕᖏᓐᓂᒃ ᐊᒻᒪᓗ ᐃᓕᓐᓂᐊᑎᑦᓯᒍᓯᖏᑦ, ᐊᒻᒪᓗ ᐃᓚᐅᑎᓪᓗᒋᑦ ᖃᕆᑕᐅᔭᓕᕆᐅᑎᓄᑦ ᐱᑐᒍᑎᓄᑦ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᐃᓕᓐᓂᐊᑎᑦᓯᒋᐊᓪᓚᕈᓇᐅᕖᑦ ᓯᕗᓂᕐᒥ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᓐᓄᑦ?
ᕕᓂ ᐱᐊᔭᓐ: ᐅᐱᕐᖔᖅ ᐃᓄᓐᓄᑦ ᐱᒻᒪᕆᐊᓗᒃ! ᐃᓚᒌᖑᑦᓱᑕ, ᓄᓇᓕᐊᕆᐊᒥᒃ ᐊᓕᐊᒋᔭᖃᓪᓚᕆᑦᑐᒍᑦ… ᑌᒣᒻᒪᑦ ᒪᓐᓇ ᖃᐅᔨᒪᑦᓯᐊᖏᑦᑐᖓ ᐊᕐᕌᒍᓚᖓᔪᒥ ᕆᐊᓪᓚᓚᖓᒋᐊᒥᒃ! ᑌᒣᒻᒥᔪᖅ ᐃᓕᓐᓂᐊᑎᑦᓯᔨᓄᑦ ᐊᒥᓱᓄᑦ ᐃᓕᓐᓂᐊᓚᐅᔪᓄᑦ ᐱᓇᓱᐊᕈᓰᓐᓂ ᒪᕐᕉᓂ. ᐃᓚᒥᓃᓐᓂᓴᒥᓂᒃ ᑭᖑᕙᕐᑎᑕᐅᓲᑦ ᒪᙯᓐᓂᓴᕐᒥᓄᑦ. ᐅᑭᐅᕐᒥ ᐅᕙᓐᓄᑦ ᐱᐅᓂᕐᓴᐅᕋᔭᕐᑐᖅ… ᑖᓐᓇ ᑭᐅᕐᖃᔭᖕᖏᑕᕋ ᒫᓐᓇ! ᐅᑕᕐᕿᓚᐅᑲᑦᑕ ᖃᐅᔨᓛᕋᑦᑕ…

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᖃᓄᐃᓘᕈᒪᒐᔭᕐᖃᑏᑦ ᐅᕕᒐᕐᑐᐃᑦ ᓄᓇᕕᒻᒥᐅᑦ ᐃᓕᓐᓂᐊᑎᑦᓯᔨᐅᒍᒪᕋᔭᕐᑐᐃᑦ ᐱᓇᓱᒐᕆᓗᒍ ?
ᕕᓂ ᐱᐊᔭᓐ: ᐱᓇᓱᐊᖃᑎᖃᕐᓱᑎᑦ ᐃᓕᓐᓂᐊᑎᓂᒃ, ᐃᕝᕕᓚᕆᐅᒍᓐᓇᑐᑎᑦ. ᑖᓐᓇ ᐱᓇᓱᐊᒐᕐᒪ ᐃᓚᖓ ᐃᓕᓐᓂᐊᑎᑦᓯᔨᐅᑦᓱᖓ ᐊᓕᐊᒋᔭᕋ ᐊᒻᒪᓗ ᑖᑦᓱᒥᖓ ᐊᓯᖏᓐᓂ ᐱᓇᓱᒐᕐᒥ ᐱᒍᓐᓇᖏᑦᑕᑎᑦ. ᐃᓕᓐᓂᐊᑏᑦ ᓲᓱᒋᔭᐅᑦᓯᐊᕈᒪᔪᑦ. ᓲᓱᒋᑦᓯᐊᑐᐊᕈᕕᒃᑭᑦ ᐃᓕᓐᓂᒃ ᓲᓱᑦᓴᓯᐊᓚᖓᒻᒥᔪᑦ. ᐱᓇᓱᐊᖃᑎᖃᑦᓯᐊᑐᐊᕈᕕᑦ ᐃᓕᓐᓂᐊᑎᓂᒃ, ᐃᓕᓐᓂᐊᑎᑦᓯᓃᑦ ᐊᒻᒪᓗ ᑌᒃᑯᓇᓃᓐᓃᑦ ᐱᔭᕆᐊᑭᓐᓂᓴᐅᓚᖓᔪᖅ. ᑭᓇᐅᓂᕐᓂᒃ ᐊᑐᑦᓯᐊᕈᓐᓇᑐᑎᑦ ᐃᓕᓐᓂᐊᑎᓂᒃ ᐃᓕᓐᓂᐊᑎᑦᓯᓗᑎᑦ ᐃᓅᖃᑎᒋᓗᒋᑦ ᐱᔭᕆᐊᑭᓐᓂᓴᓪᓚᕆᒃ ᐃᓄᒻᒪᕆᓐᓂᒃ ᐃᓄᖃᑎᖃᕐᓂᒥᒃ! ᐊᒻᒪᓗ ᐱᑦᓯᐊᕕᒋᑐᐊᕈᕕᒃᑭᑦ ᐱᑦᓯᐊᓚᖓᒻᒥᔪᑦ. ᐅᖃᕋᔭᕐᒥᔪᖓ ᐱᒻᒪᕆᐅᓂᖓᓂᒃ ᐃᓕᓐᓂᐊᑎᓃᒍᓐᓇᕈᕕᑦ ᖃᐅᑕᒫᑦ ᐃᓕᓐᓂᐊᑎᑦᓯᔨᐅᒍᒪᑐᐊᕈᕕᑦ ᖃᐅᔨᒪᒋᐊᓖᑦ ᑕᒪᓐᓇ. ᐅᒃᑯᐃᖔᑦᓯᐊᕆᐊᖃᕐᑐᑎᑦ ᐊᑦᔨᒌᖕᖏᑐᓄᑦ ᐃᓄᓐᓄᑦ ᐃᒻᒥᒎᕐᑐᓄᑦ ᐃᓕᓐᓂᐊᕆᐊᖃᑦᑕᑐᓄᑦ. ᐃᓚᖏᑦ ᐱᔭᕐᓃᓕᐅᕐᑐᑦ ᐊᓂᕐᕋᒥᓂ, ᐊᓯᑦᔨᕆᐊᓖᑦ ᐱᐅᓰᑦ ᐊᑦᔨᒌᖕᖏᑐᓄᑦ ᐃᓕᓐᓂᐊᑎᓄᑦ.

Back to News