ᕿᑐᕐᙰᑦ ᐃᓕᓴᕆᐊᖕᖓᓛᑐᐊᕐᐸᑦ ᐃᓕᓴᕐᓇᐅᓕᕐᒥᐸᑦ ᐊᓪᓚᑕᐅᒪᒍᑎᖏᓐᓂᑦ ᐊᓪᓚᒋᐊᖃᓕᕐᖁᑎᑦ ᑕᒐᑕᒐ!

ᓇᓃ: ᓄᓇᓕᑦᓯ ᐃᓕᓴᕐᕕᖓᓐᓂᑦ. ᑲᒪᔨᒻᒪᕆᒃ, ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖓᑕ ᑐᖓᓕᖓ ᐅᕝᕙᓘᓐᓃᑦ ᐃᓕᓐᓂᐊᕕᒻᒥ ᐊᒡᓚᑎ ᐅᖃᐅᓯᖃᓛᕐᑐᖅ ᐃᓕᓐᓂᐊᕕᒻᒥ ᐃᓕᓐᓂᐊᕆᐊᖕᖓᑐᑦᓴᓂᒃ ᐊᒡᓚᑕᐅᑎᑦᓯᓂᕐᒧᑦ ᐅᒃᑯᐃᖔᓛᓕᑐᐊᕐᐸᑦ. ᑕᑯᒋᐊᖃᑦᑕᓗᓯ ᐃᓕᓐᓂᐊᕕᓯ ᑕᑯᑦᓴᐅᕕᖓᓂᒃ Facebook-ᒥ ᑐᓴᐅᑎᒥᓪᓗ ᓄᓇᓕᑦᓯᓂ ᓈᓚᒐᓱᓪᓗᓯ.

ᓱᓇᒥ ᐊᑦᔭᓯᒋᐊᖃᕐᒪᖔᕐᐱᑦ: ᕿᑐᕐᖓᐅᑉ ᐃᓅᓕᕐᕕᖓᑕ ᓇᓕᓀᒃᑯᑕᖓᓂᑦ. ᐊᑑᑎᒍᓐᓇᒥᔦᑦ ᕿᑐᕐᖓᐱᑦ ᐊᓪᓚᑕᐅᒪᒍᑎᑦᓴᖏᓐᓂᑦ ᐊᓪᓚᓗᑎᑦ ᑕᒐᑕᒐ ᓇᓗᓀᕐᓯᐅᑎᒥᑦ ᑐᓂᔨᕚᓪᓗᓛᕐᓗᑎᑦ.

ᐃᓚᒋᔭᐅᑎᑕᐅᒍᓐᓇᑐᑦ ᕿᑐᕐᖓᕆᔭᐅᔪᑦ: ᕿᑐᕐᖓᕆᔭᐅᔪᓕᒫᑦ ᑕᓪᓕᒪᓂᒃ ᐅᑭᐅᓖᑦ ᐃᓕᓴᕐᓇᐅᓕᕐᒥᐸᑦ ᐊᒻᒪᓘᓐᓃᑦ ᓯᑦᑎᒻᐱᕆ 30-ᒍᓕᕐᐸᑦ, 2020.

ᐃᓕᓐᓂᐊᕆᐊᖕᖓᑐᕐᓯᐅᑎᓂᒃ ᐱᒋᐊᑲᐱᓐᓂᖅ: ᖃᖓᓂᒃᑯᐊ ᕿᑐᕐᖓᓖᑦ ᕿᑐᕐᖓᒥᓄᑦ ᐊᓯᐊᒎᕐᑎᑕᐅᖁᔨᒍᑎᒥᒃ ᑐᑦᓯᕋᕐᑐᓴᐅᕙᑦ?

ᐱᐅᓯᑎᒍᑦ ᐱᐊᕋᖅ ᐃᓕᓐᓂᐊᕆᐊᖕᖓᓯᒐᔭᕐᑐᖅ ᓯᑉᑎᒻᐱᕆ 30 ᓇᓪᓕᐅᑎᓚᐅᕐᑎᓇᒍ 5-ᓂᒃ ᐅᑭᐅᖃᓕᕐᓂᐊᕈᓂ. 

ᐃᓚᖏᑦ ᕿᑐᕐᖓᒥᓂᒃ ᐃᓕᓐᓂᐊᕆᐊᖕᖓᑐᕐᓯᐅᑎᓂᒃ ᐱᒋᐊᑦᓴᐅᑎᒋᑎᑕᐅᖁᔨᑐᐃᓐᓇᕆᐊᓖᑦ ᑖᓐᓇ ᕿᑐᕐᖓᖓ 5-ᓂᒃ ᐅᑭᐅᖃᓕᕐᓂᖏᒃᑲᓗᐊᕐᑎᓗᒍ ᓯᑉᑎᒻᐱᕆ 30-ᐅᓕᕐᑎᓗᒍ.  ᕿᑐᕐᖓᒥᓂᒃ ᐃᓕᑦᓯᒍᐊᕐᑐᒪᕆᐅᒋᐊᖓ ᐃᑉᐱᒍᓱᑐᐃᓐᓇᕆᐊᓖᑦ, ᐱᕈᕐᓯᒪᓂᖓᒍᓪᓗ ᓈᒻᒪᑐᕆᑦᓱᒍ ᐊᑐᐃᓐᓇᐅᓕᕆᐊᖓᓗ ᐃᓕᓐᓂᐊᕕᒻᒧᑦ.

ᑯᐯᒃ ᑲᕙᒪᖓ ᐱᕕᖃᕐᑎᓯᓲᖑᒻᒪᑦ ᐱᐊᕋᕐᓂᒃ (ᑲᒃᑲᓛᓂᒃ) ᓯᕗᒧᐊᕐᓯᒪᒍᑎᖃᓪᓚᕆᑦᑐᓂᒃ ᐱᕈᕐᐸᓕᐊᓂᕐᒥᓂᒃ ᐊᒻᒪᓗ ᐱᒃᑲᕆᑦᓯᒍᑎᖃᓕᕇᕐᑐᓂᒃ ᐱᒍᓐᓇᑕᐅᒋᐊᓕᓐᓂᒃ ᐃᓕᓐᓂᐊᕆᐊᖕᖓᑐᕐᓯᐅᑎᓂᒃ ᐱᒋᐊᑲᐱᑦᑎᑕᐅᓂᕐᒧᑦ ᐊᕐᕌᒍᓕᒫᒧᑦ.  ᑕᒪᓐᓇ ᐊᓯᐊᒍᑦ ᐱᕕᖃᕈᓐᓇᑎᑦᓯᓂᖅ ᐊᑐᕈᓐᓇᓲᖅ ᑕᑯᑦᓴᐅᑎᑕᐅᑐᐊᕐᒪᑦ ᐃᒫᒃ ᓱᒃᑯᓇᕋᔭᕆᐊᖓ ᑖᑦᓱᒧᖓ ᐱᐊᕋᕐᒧᑦ (ᑲᒃᑲᓛᒧᑦ) ᐃᓕᓴᕐᑎᑕᐅᖕᖏᑐᐊᕈᓂ.  ᐆᒃᑐᕋᐅᑎᒋᓗᒍ, ᐱᐊᕋᕐᒥᒃ (ᑲᒃᑲᓛᒥᒃ) ᑐᓂᕐᕈᓯᐊᖃᕐᑐᖃᑐᐊᕐᐸᑦ, ᐃᓕᓴᕆᐊᑲᐱᖕᖏᑐᐊᕈᓂ ᐱᕈᕐᐸᓕᐊᓂᖓᓂᒃ ᓱᒃᑯᐃᑐᐃᓐᓇᕆᐊᓕᒃ.

ᓱᕐᖁᐃᑕᐅᓚᖓᒍᓂ ᐱᐊᕋᖅ (ᑲᒃᑲᓛᖅ) ᐃᓕᑦᓯᒍᐊᕐᑐᔭᒻᒪᕆᐅᒻᒪᖔᑦ ᐱᕈᕐᓂᖓᓗ ᓈᒻᒪᓯᓯᒪᒻᒪᖔᑦ, ᑖᓐᓇᓭᓐᓇ ᐱᐊᕋᖅ ᐊᓂᒎᑎᒋᐊᓕᒃ ᐊᓯᐊᒎᕐᑎᑕᐅᖁᔨᒍᑏᑦ ᖃᐅᔨᓴᕐᑕᐅᒍᑎᖏᓐᓂᒃ.

ᐱᒋᐊᑲᐱᑦᑎᑕᐅᒍᓐᓇᓂᐊᕈᓂ ᐃᓴᕆᐊᖕᖓᑐᕐᓯᐅᑎᓂᒃ ᐊᕐᕌᒍᓕᒫᒧᑦ ᐱᒋᐊᑲᐱᓪᓗᓂ, ᐱᐊᕋᖅ (ᑲᒃᑲᓛᖅ) ᓯᕗᒧᐊᕐᓯᒪᓂᕐᓴᓚᕆᐅᒋᐊᓕᒃ ᑌᒣᒃᑯᐊᒥᓂᒃ ᐱᐊᕋᐅᖃᑎᒥᓂᒃ ᑖᒃᑯᐊ 4 ᐱᕈᕐᐸᓕᐊᒍᓰᑦ ᐃᓘᓐᓇᖏᑎᒍᑦ. 

  1. ᐅᖃᐅᓯᕐᒥᒍᑦ ᐊᒻᒪᓗ ᐅᖄᒍᓐᓇᓂᕐᒥᒍᑦ: ᖃᓄᖅ ᑖᓐᓇ ᐱᐊᕋᖅ (ᑲᒃᑲᓛᖅ) ᐅᖃᓕᒪᒍᓯᖃᕐᒪᖔᑦ, ᓱᓇᓂᒃ ᑐᑭᓯᒍᓐᓇᒪᖔᑦ, ᐊᓯᖏᓪᓗ.
  2. ᐅᖃᐅᓯᒃᑰᖏᑦᑐᓂᒃ ᑐᑭᓕᐅᕆᓂᖅ: ᐱᒍᓐᓇᓂᖓ ᐱᐊᕋᐅᑉ (ᑲᒃᑲᓛᑉ) ᐃᓱᒪᒐᓱᐊᕐᓂᑯᑦ, ᐋᕐᕿᓱᕆᐊᓕᓐᓂᒃ ᐋᕐᖀᓂᒃᑯᑦ, ᐊᓯᖏᓪᓗ.
  3. ᓄᑭᒥᓂᒃ ᐊᑐᑦᓯᐊᕈᓐᓇᓂᕐᒥᒍᑦ: ᖃᓄᐃᓘᕐᓱᓂ ᑖᓐᓇ ᐱᐊᕋᖅ (ᑲᒃᑲᓛᖅ) ᐊᒡᓚᓲᖑᒻᒪᖔ ᐊᒻᒪᓗ ᑭᑦᔭᐅᑏᑦᓐᓄᑦ ᑭᑦᔭᓲᖑᒻᒪᖔᑦ, ᓂᒪᒍᓯᖃᓲᖑᒻᒪᖔᑦ, ᐊᓯᖏᓪᓗ.
  4. ᐃᓅᖃᑎᒌᓄᐊᖓᔪᓄᑦ-ᐃᑉᐱᓂᐊᕐᓂᒥᒍᑦ ᐱᕈᕐᐸᓕᐊᓂᖓ: ᐱᐊᕋᐅᑉ (ᑲᒃᑲᓛᑉ) ᐱᓇᓱᐊᕈᓐᓇᓂᖓ ᐃᒻᒥᓂᕐᓱᓗᓂ, ᐊᑐᐃᓐᓇᐅᓂᖓ ᐱᕈᕐᓯᒪᓂᒥᒍᑦ, ᐃᓱᒪᖓᑕ ᓴᖑᔭᕋᕐᑌᓕᒍᓐᓇᓂᖓ, ᐱᓂᐊᕐᓂᖓ, ᐊᓯᒥᓄᑦ ᐱᖕᖑᐊᖃᑎᐅᑦᓯᐊᕈᓐᓇᓂᖓ, ᐊᓯᖏᓪᓗ. 

ᑖᒃᑯᐊ 4 ᐱᕙᓪᓕᐊᒍᓯᖏᑦ ᐊᑕᖏᕐᓯᔪᑦ ᐱᐊᕋᐅᑉ ᐱᒃᑲᕆᑦᓯᓯᒪᓂᕆᒋᐊᓕᖏᓐᓂᒃ ᓇᓗᕐᖁᓀᓪᓕᓂᐊᕈᓂ ᐱᔭᖃᕐᓂᐊᕈᓂᓗ ᐃᓕᓐᓂᐊᕕᒻᒥ.

ᐱᐊᕋᖅ ᐊᑐᐃᓐᓇᐅᖏᑐᐊᕈᓂ ᐃᓕᓐᓂᐊᓂᕐᒧᑦ ᐃᓕᓐᓂᐊᕆᐊᖕᖓᑐᕐᓯᐅᑎᓂᒃ ᐱᒋᐊᓕᕐᓗᓂ, ᑕᒪᓐᓇ ᑐᕌᒍᑐᐃᓐᓇᕆᐊᓕᒃ ᐃᓕᑦᓯᓂᖓᓂ, ᐱᓂᐊᕐᓂᖓᓂ ᐊᒻᒪᓗ ᐃᒻᒥᓂᒃ-ᐅᐱᒋᒍᓐᓇᓂᖓᓂ ᐱᓀᓗᑕᒻᒪᕆᓐᓄᑦ.

ᐅᑉᐱᕆᔭᖃᑐᐊᕈᕕᑦ ᕿᑐᕐᖓᓂᒃ ᐃᓕᑦᓯᒍᐊᕐᑐᓚᕆᐅᒋᐊᖓ ᐱᕈᕐᓯᒪᓂᕐᒥᒍᓪᓗ ᓈᒻᒪᓯᐊᕆᐊᖓ ᑌᒣᒃᑯᐊᒥᑕ ᓴᓂᐊᓂ, ᑐᑦᓯᕋᒍᓐᓇᑐᑎᑦ ᐊᓯᐊᒎᕐᑎᑕᐅᖁᔨᒍᑎᒥᒃ ᕿᑐᕐᖓᓅᓕᖓᔪᒥᒃ.

ᐅᑯᐊ ᑕᒐ ᒪᓕᑦᑕᐅᒋᐊᓖᑦ:

  1. ᐊᓯᐊᒎᕐᑎᑕᐅᖁᔨᒍᑎᒃ ᐊᒡᓚᑕᐅᒋᐊᓕᒃ ᐃᓕᓐᓂᐊᕕᓯᓐᓂ ᐊᑐᐃᓐᓇᐅᑎᑕᐅᔪᖅ ᐊᒡᓚᒌᕐᓗᒍ.
  2. ᑐᓂᓗᒍ ᐊᓯᐊᒎᕐᑎᑕᐅᖁᔨᒍᑎᒃ ᐁᕆᓕ 15 ᓯᕗᓂᖓᒍᑦ (ᒣ 22, 2020 ᓯᕗᓂᖓᒍᑦ ᑕᒡᒐᓂ ᐊᕐᕌᒍᒥ ᑭᓯᐊᓂ), ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖓᓄᑦ ᐅᕝᕙᓘᓐᓃᑦ ᖃᕆᑕᐅᔭᒃᑯᑦ ᐊᐅᓪᓚᑎᓗᒍ ᐅᕗᖓ.
  3. ᕿᑐᕐᙰᑦ ᖃᐅᔨᓴᕐᑕᐅᒍᑎᒋᒋᐊᓕᒻᒥᓂᒃ ᖃᐅᔨᓴᕐᑕᐅᑎᑦᓯᐊᓗᒍ ᑖᓐᓇᓗ ᐃᓕᓐᓂᐊᕕᓯᓐᓂ ᐊᑑᑎᓛᕐᓱᓂ ᐁᕆᓕ 15 ᐊᒻᒪᓗ ᒣ 15 ᐊᑯᓐᓂᖓᓂ (ᒣ 22, 2020ᓗ ᐊᑯᓐᓂᖓᓂ ᑕᒡᒐᓂ ᐊᕐᕌᒍᕐᒥ ᑭᓯᐊᓂ).
  4. ᖃᓂᒻᒪᓯᖅ-19 ᓄᓇᕐᔪᐊᒥ ᐊᑑᑎᓂᖓ ᓇᒧᓪᓗ ᐊᐅᓪᓚᖃᔭᖕᖏᑑᑎᑕᐅᓂᖅ ᐱᑦᔪᑎᐅᑎᓪᓗᒋᑦ, ᕿᑐᕐᙰᑦ ᖃᐅᔨᓴᕐᑕᐅᒍᓐᓇᒐᔭᕐᑐᖅ ᓄᓇᓕᒻᒥ ᖃᐅᔨᓴᕈᓐᓇᑐᕐᑕᖃᕐᐸᑦ ᑭᓯᐊᓂ. ᒣ 13, 2020-ᒥ ᐱᒋᐊᕐᓗᑎᒃ, ᐊᓯᐊᒎᖁᔨᒍᑎᓂᒃ ᖃᐅᔨᓴᕈᑏᑦ ᐊᑐᐃᓐᓇᐅᔪᑦ ᓯᑕᒣᓐᓇᓂᑦ ᓄᓇᓕᓐᓂᑦ: ᐃᓄᒃᔪᐊᒃ, ᑲᖏᕐᓱᐊᓗᒃᔪᐊᖅ, ᑰᒃᔪᐊᖅ ᐊᒻᒪᓗ ᓴᓪᓗᐃᑦ.   ᐊᐅᓪᓚᖃᔭᖕᖏᑑᑎᑕᐅᒍᓐᓀᓂᐅᑉ ᖃᖓᐅᒐᔭᕐᓂᖓ ᒪᓕᓪᓗᒍ, ᐃᓕᓴᕐᓂᓕᕆᓂᖅ ᕿᒥᕐᕈᓚᖓᔪᖅ ᖃᓄᐃᓘᕐᑕᐅᓗᑎᒃ ᐱᓇᓱᐊᕐᑕᐅᒍᓐᓇᒐᔭᕐᒪᖔᑕ ᑖᒃᑯᐊ ᐊᓯᐊᒎᕐᑎᑕᐅᖁᔨᒍᑎᒥᒃ ᖃᐅᔨᓴᕈᑏᑦ ᐃᓕᓐᓂᐊᓇᐅᑉ ᐊᕐᕌᒍᒋᓛᕐᑕᖓ ᐱᒋᐊᓚᐅᕐᑎᓇᒍ.

ᖃᐅᔨᓴᕐᑕᐅᒌᕐᐸᑦ ᕿᑐᕐᙰᑦ, ᖃᐅᔨᔭᐅᒍᑎᖏᑦ ᐊᐅᓪᓚᑎᑕᐅᒐᔭᕐᑐᑦ ᐱᒍᑦᔨᒋᐊᓪᓛᒍᑎᓂᒃ ᓴᑐᕐᓇᑐᓂᓪᓗ ᐃᓕᓐᓂᐊᕕᖃᕐᓂᒧᑦ ᐱᓇᓱᕝᕕᒧᑦ ᑰᒃᔪᐊᒥ.  ᑐᑭᑖᕐᑕᐅᓯᒪᑦᓴᓕᑐᐊᕐᐸᑦ, ᑐᓴᐅᒪᑎᑕᐅᒍᑎᒋᒐᔭᕐᑌᑦ ᐊᒡᓚᑖᕐᕕᑰᕐᑐᒥᒃ ᐊᒡᓚᑖᕐᑎᑕᐅᒍᑎᒋᓗᒍ.

ᐱᒻᒪᕆᐅᕗᖅ ᕿᑐᕐᖓᓖᑦ ᑐᑭᓯᒪᒋᐊᖃᕐᓂᖓ ᐃᒫᒃ ᐱᐊᕋᕐᒥᒃ ᐃᓕᓴᕆᐊᖕᖓᑐᓂ ᐱᒋᐊᑲᐱᓐᓂᒧᑦ ᐊᖏᕐᑕᐅᖏᑦᑑᔪᖃᑐᐊᕐᒪᑦ, ᐃᒣᓕᖓᒻᒪᑦ ᑕᒪᓐᓇ ᐱᔭᖃᖕᖏᓂᐅᖕᖏᑐᖅ ᖃᓄᕐᓘᓃᑦ.

ᐊᓪᓛᑦ, ᑐᑭᖃᑐᐃᓐᓇᓂᖓ ᓇᓗᓇᖕᖏᑐᖅ ᕿᑐᕐᙰᑦ ᐱᕈᕐᐸᓕᐊᒐᐅᒐᑦᓯᐊᑐᐃᓐᓇᕆᐊᖓ, ᐱᕙᓪᓕᓂᐊᕐᓱᓂᓗ ᐊᕐᕌᒍᓕᒫᒋᐊᓪᓚᒥᒃ ᐊᓂᕐᕋᓯᒪᓚᐅᑲᒻᒥᓗᓂ ᐃᓕᓐᓂᐊᓯᓚᐅᕋᓂ.  ᐃᓕᓐᓂᐊᕕᒻᒧᑦ ᖁᕕᐊᒋᔭᐅᑦᓯᐊᒐᔭᕐᒥᔪᖅ ᑐᖕᖓᓱᑦᑎᑕᐅᓗᓂ ᕿᑐᕐᙰᑦ ᑐᖓᓕᐊᓄᑦ ᐃᓕᓐᓂᐊᓇᐅᑉ ᐊᕐᕌᒍᖓᓄᑦ.

ᐊᐱᕐᓲᑎᐅᕋᓕᓲᑦ

ᓇᓗᖕᖏᓚᖓ ᕿᑐᕐᖓᕋ ᐊᑐᐃᓐᓇᐅᓕᕆᐊᖓ ᐃᓕᓐᓂᐊᕆᐊᖕᖓᓂᕐᒧᑦ ᐊᕐᕌᒎᓚᖓᔪᒥ.  ᑭᓯᐊᓂ, ᕿᑐᕐᖓᕋ ᐅᑭᐅᕐᑖᓯᒪᕋᑕᓛᖕᖏᑐᖅ 5-ᓂᒃ ᓯᑉᑎᒻᐱᕆ 30-ᓕᕐᑎᓗᒍ.  ᐊᓯᐊᒎᕐᑎᑕᐅᕕᓖᒃ?

ᐋ, ᐊᑐᕆᐊᕈᓐᓇᑐᑎᑦ ᐊᓯᐊᒎᕐᑎᑕᐅᖁᔨᒍᑎᒥᒃ ᕿᑐᕐᙰ ᐃᒣᑦᑑᑐᐊᕐᐸᑦ :

  • ᓯᕗᒧᐊᕐᓯᒪᓪᓚᕆᑐᐊᕐᐸᑦ ᐱᕈᕐᐸᓕᐊᓂᕐᒥᓂ
  • 5-ᓂᑦ ᐅᑭᐅᕐᑖᓯᒪᓕᓛᑐᐊᕐᐸᑦ ᑏᓯᒻᐱᕆ 31-ᖑᓕᕐᑎᓗᒍ

ᓱᓇᐅᓈ ᐊᓯᐊᒎᕐᑎᑕᐅᖁᔨᓂᖅ?

ᐊᓯᐊᒎᕐᑎᑕᐅᖁᔨᓂᖅ ᑐᑭᓕᒃ ᐃᒫᒃ ᐊᑕᓐᓂᐅᒍᑎᓕᐅᕐᑐᑎᑦ ᐃᓕᓴᕐᓂᓕᕆᓂᕐᒥᒃ ᒪᓕᑦᑕᐅᓲᑦ ᐊᓯᐊᒎᕐᓗᑎᒃ ᐊᖏᖁᑦᓱᒋᑦ ᕿᑐᕐᖓᓂᒃ ᐱᒋᐊᕈᓐᓇᑎᑦᓯᓗᑎᒃ ᐃᓕᓐᓂᐊᕆᐊᖕᖓᑐᕐᓯᐅᑎᓂᒃ 5-ᓂᒃ ᐅᑭᐅᕐᑖᓯᒪᕋᑕᖕᖏᑲᓗᐊᕐᑎᓗᒍ.

ᑖᓐᓇ ᕿᑐᕐᖓᓅᓕᖓᔪᒥᒃ ᐊᓯᐊᒎᕐᑎᑕᐅᖁᔨᒍᑎ ᐱᒐᓱᐊᕐᓗᒍ, ᐅᑯᓂᖓ ᒪᓕᑦᑕᐅᒋᐊᓕᓐᓂᒃ ᐊᑐᕆᐊᖃᕐᑐᑎᑦ :

  1. ᑐᓂᔨᓗᑎᑦ ᐊᑕᓐᓂᐅᒍᑎᒥᒃ ᐊᒡᓚᓯᒪᑎᓪᓗᒍ ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖓᓄᑦ ᐁᕆᓕ 15 ᓯᕗᓂᐊᒍᑦ. ᐱᑦᔪᑎᐅᑎᓪᓗᒍ ᖃᓂᒻᒪᓯᖅ-19 ᓄᓇᕐᔪᐊᒥ ᐊᑑᑎᓂᖓ, ᑖᓐᓇ ᐅᓪᓗᖅ ᑭᖑᓪᓕᐹᖓ ᐅᖓᓯᓪᓕᒋᐊᕐᑕᐅᓯᒪᔪᖅ ᒣ 22, 2020-ᒧᑦ.
  2. ᐊᑕᓐᓂᐅᒍᑎᓕᐊᑎᑦ ᑐᑭᓯᓇᕐᑎᓯᒋᐊᓖᑦ ᕿᑐᕐᖓᐱᑦ ᐱᓯᑎᐅᒍᑎᖏᓐᓂᒃ ᐊᒻᒪᓗ ᖃᓄᖅ ᐃᓕᓐᓂᐊᕆᐊᖕᖓᑐᓄᑦ ᐃᓚᐅᑦᓴᐅᑎᒋᖕᖏᑯᓂ ᕿᑐᕐᖓᓂᒃ ᓱᒃᑯᐃᒐᔭᕐᒪᖔᑦ.
  3. ᕿᑐᕐᙰᑦ ᐊᑐᐃᓐᓇᐅᑎᑦᓯᐊᓗᒍ ᑕᒃᑯᒧᑦ ᖃᐅᔨᓴᕐᑕᐅᒍᑎᒋᒋᐊᓕᒻᒥᓂᒃ ᐱᔭᕇᕈᓐᓇᓯᓗᓂ. ᐊᒥᓲᓂᕐᓴᑎᒍᑦ, ᖃᐅᔨᓴᕈᑏᑦ ᐊᑐᕐᑕᐅᓲᖅ ᐁᕆᓕ 15 ᐊᒻᒪᓗ ᒣ 15 ᐊᑯᓐᓂᖓᓂ.  ᐅᓪᓗᓗᑐᖓ ᖃᐅᔨᑎᑦᓯᒍᑎᐅᓛᕐᒥᔪᖅ ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖓᓄᑦ.  ᐱᑦᔪᑎᐅᑎᓪᓗᒍ ᖃᓂᒻᒪᓯᖅ-19 ᓄᓇᕐᔪᐊᒥ ᐊᑑᑎᓂᖓ, ᑖᓐᓇ ᐅᓪᓗᖅ ᑭᖑᓪᓕᐹᖓ ᐅᖓᓯᓪᓕᒋᐊᕐᑕᐅᓯᒪᔪᖅ ᒣ 22, 2020-ᒧᑦ.  ᓇᒧᓪᓗ ᐊᐅᓪᓚᖃᔭᖕᖏᑑᑎᑕᐅᓂᖅ ᐱᑦᔪᑎᐅᑎᓪᓗᒋᑦ, ᕿᑐᕐᙰᑦ ᖃᐅᔨᓴᕐᑕᐅᒍᓐᓇᒐᔭᕐᑐᖅ ᓄᓇᓕᒻᒥ ᖃᐅᔨᓴᕈᓐᓇᑐᕐᑕᖃᕐᐸᑦ ᑭᓯᐊᓂ.  ᒣ 13, 2020-ᒥ ᐱᒋᐊᕐᓗᑎᒃ, ᐊᓯᐊᒎᖁᔨᒍᑎᓂᒃ ᖃᐅᔨᓴᕈᑏᑦ ᐊᑐᐃᓐᓇᐅᔪᑦ ᓯᑕᒣᓐᓇᓂᑦ ᓄᓇᓕᓐᓂᑦ: ᐃᓄᒃᔪᐊᒃ, ᑲᖏᕐᓱᐊᓗᒃᔪᐊᖅ, ᑰᒃᔪᐊᖅ ᐊᒻᒪᓗ ᓴᓪᓗᐃᑦ.   ᐊᐅᓪᓚᖃᔭᖕᖏᑑᑎᑕᐅᒍᓐᓀᓂᐅᑉ ᖃᖓᐅᒐᔭᕐᓂᖓ ᒪᓕᓪᓗᒍ, ᐃᓕᓴᕐᓂᓕᕆᓂᖅ ᕿᒥᕐᕈᓚᖓᔪᖅ ᖃᓄᐃᓘᕐᑕᐅᓗᑎᒃ ᐱᓇᓱᐊᕐᑕᐅᒍᓐᓇᒐᔭᕐᒪᖔᑕ ᑖᒃᑯᐊ ᐊᓯᐊᒎᕐᑎᑕᐅᖁᔨᒍᑎᒥᒃ ᖃᐅᔨᓴᕈᑏᑦ ᐃᓕᓐᓂᐊᓇᐅᑉ ᐊᕐᕌᒍᒋᓛᕐᑕᖓ ᐱᒋᐊᓚᐅᕐᑎᓇᒍ.
  4. ᖃᐅᔨᓴᕐᑕᐅᒌᕐᓯᒪᓕᕐᐸᑦ, ᑭᐅᔭᐅᒍᑎᓄᑦ ᑎᑭᑕᐅᒐᔭᕐᑐᑎᑦ ᐊᒡᓚᓯᑎᓪᓗᒋᑦ ᑕᕐᕿᓕᒫᖅ ᐊᓂᒎᑎᓚᐅᕐᑎᓇᒍ, ᐱᑎᓪᓗᒍ ᐱᒍᑦᔨᒋᐊᓪᓛᒍᑎᓂᒃ ᓴᑐᕐᓇᑐᓂᓪᓗ ᐃᓕᓐᓂᐊᕕᖃᕐᓂᒧᑦ ᐱᓇᓱᕝᕕᒥᑦ ᑰᒃᔪᐊᒥ.

 ᖃᓄᐃᓕᔭᐅᓛᕐᖃᑦ ᐊᓯᐊᒎᕐᑎᑕᐅᖁᔨᒍᑎᒥᒃ ᐃᓕᓐᓂᐊᕕᒻᒧᑦ ᑐᓂᔨᒌᑐᐊᕈᒪ?

ᕿᑐᕐᖓᓅᓕᖓᔪᒥᒃ ᐊᓯᐊᒎᕐᑎᑕᐅᖁᔨᒍᑎᒥᒃ ᑐᑦᓯᕋᕐᓯᒪᒍᕕᑦ, ᐃᓕᓐᓂᐊᕕᒻᒧᑦ ᖃᐅᔨᑎᑕᐅᒐᔭᕐᑐᑎᑦ ᐊᑕᓐᓂᐅᒍᑎᑎᑦ ᐱᔭᐅᑦᓯᐊᕆᐊᖏᑦ (ᐊᒡᓚᓯᒪᔪᒃᑯᑦ ᐅᖃᐅᑎᔭᐅᑐᐃᓐᓇᓗᑎᓘᓐᓃᑦ).  ᐊᓱᐃᓛ ᑐᖓᓕᐊᓂ ᐊᑑᑎᓗᓂ ᕿᑐᕐᙰᑦ ᑕᒃᑯᒧᑦ ᖃᐅᔨᓴᕐᑕᐅᓯᓗᓂ.

ᖃᓄᐃᓘᕐᑎᐅᕙ ᐃᓕᓭᔩᑦ ᐊᖓᔪᕐᖄᖓ ᑕᒪᒃᑯᐊ ᐱᓇᓱᐊᕐᑕᐅᓂᖏᑎᒐᑦ?

ᐃᓕᓭᔩᑦ ᐊᖓᔪᕐᖄᖓ ᑲᒪᒋᔭᖃᕆᐊᓕᒃ ᐊᑕᓐᓂᐅᒍᑎᓂᒃ ᐋᑎᕆᕕᐅᓗᓂ ᐊᓱᐃᓛᓪᓗ ᐱᒍᑦᔨᒋᐊᓪᓛᒍᑎᓂᒃ ᓴᑐᕐᓇᑐᓂᒃ ᐃᓕᓐᓂᐊᕕᖃᕐᓂᒧᑦ ᐱᓇᓱᕝᕕᒨᕆᓗᓂ.

ᓇᓪᓕᖏᑦ ᐱᐊᕃᑦ (ᑲᒃᑲᓛᑦ) ᑐᑦᓯᕋᐅᑎᓕᐅᕈᑎᐅᒍᓐᓇᐸᑦ ᐊᓯᐊᒎᕐᑎᑕᐅᖁᔨᒍᑎᓄᓪᓗ ᖃᐅᔨᓴᕐᑕᐅᓗᑎᒃ?

ᐱᐊᕃᑦ (ᑲᒃᑲᓛᑦ) 5-ᓂᒃ ᐅᑭᐅᕐᑖᓯᒪᓛᕐᑐᑦ ᐆᒃᑑᐱᕆ 1 ᐊᒻᒪᓗ ᑏᓯᒻᐱᕆ 31 ᐊᑯᓐᓂᖓᓂ ᖃᐅᔨᓴᕐᑕᐅᒍᓐᓇᑐᑦ ᐊᓯᐊᒎᕐᑎᑕᐅᖁᔨᒍᑎᓂᒃ.  ᕿᑐᕐᙰᑦ 5-ᓂᒃ ᐅᑭᐅᕐᑖᓛᑐᐊᕐᐸᑦ ᑏᓯᒻᐱᕆ 31 ᑭᖑᓂᖓᒍᑦ, ᐊᒡᓚᑕᐅᑎᒍᓐᓇᓛᕐᑌᑦ ᑖᓐᓇ ᐃᓕᓐᓂᐊᕆᐊᖕᖓᓂᕐᒧᑦ ᐊᕐᕌᒍᓛᕐᒧᑦ ᑭᓯᐊᓂ.

ᕿᑐᕐᖓᕋ ᖃᐅᔨᓴᕐᑕᐅᓛᕐᖄ ᐃᓄᒃᑎᑐᑦ?

ᕿᑐᕐᙰᑦ ᖃᐅᔨᓴᕐᑕᐅᓛᕐᑐᖅ ᐊᑐᕐᓗᒍ ᐅᖃᐅᓯᕐᖄᖓ (ᐃᓄᒃᑎᑐᑦ, ᒍᐃᒍᐃᑎᑐᑦ ᐅᕝᕙᓘᓐᓃᑦ ᖃᓪᓗᓈᑎᑐᑦ).

ᓱᓇ ᐊᓯᐊᒎᕐᑎᑕᐅᖁᔨᒍᑎᓂᒃ ᖃᐅᔨᓴᕈᑎᐅᑉ ᐱᑦᔪᑎᖓ?

ᖃᐅᔨᓴᕈᑎ ᑖᓐᓇ ᐱᑦᔪᑎᓕᒃ ᓱᕐᖁᐃᓯᒍᑎᐅᑦᓱᓂ ᕿᑐᕐᙰᑦ ᐊᑐᐃᓐᓇᐅᒪᖔᑦ ᐃᓕᓴᕆᐊᓯᓂᕐᒧᑦ.  ᑕᒪᓐᓇ ᐱᓇᓱᐊᕐᑕᐅᓲᖅ ᕿᑐᕐᙰᑦ ᖃᐅᔨᓴᕐᑕᐅᑎᓪᓗᒍ 4-ᓂᑦ ᐱᕙᓪᓕᐊᒍᓯᓂᑦ ᐱᕈᕐᐸᓕᐊᓂᕐᒥᓂᑦ:

  1. ᐅᖃᐅᓯᕐᒥᒍᑦ ᐊᒻᒪᓗ ᐅᖄᒍᓐᓇᓂᕐᒥᒍᑦ: ᖃᓄᖅ ᑖᓐᓇ ᐱᐊᕋᖅ (ᑲᒃᑲᓛᖅ) ᐅᖃᓕᒪᒍᓯᖃᕐᒪᖔᑦ, ᓱᓇᓂᒃ ᑐᑭᓯᒍᓐᓇᒪᖔᑦ, ᐊᓯᖏᓪᓗ.
  2. ᐅᖃᐅᓯᒃᑰᖏᑦᑐᓂᒃ ᑐᑭᓕᐅᕆᓂᖅ: ᐱᒍᓐᓇᓂᖓ ᐱᐊᕋᐅᑉ (ᑲᒃᑲᓛᑉ) ᐃᓱᒪᒐᓱᐊᕐᓂᑯᑦ, ᐋᕐᕿᓱᕆᐊᓕᓐᓂᒃ ᐋᕐᖀᓂᒃᑯᑦ, ᐊᓯᖏᓪᓗ.
  3. ᓄᑭᒥᓂᒃ ᐊᑐᑦᓯᐊᕈᓐᓇᓂᕐᒥᒍᑦ: ᖃᓄᐃᓘᕐᓱᓂ ᑖᓐᓇ ᐱᐊᕋᖅ (ᑲᒃᑲᓛᖅ) ᐊᒡᓚᓲᖑᒻᒪᖔ ᐊᒻᒪᓗ ᑭᑦᔭᐅᑏᑦᓐᓄᑦ ᑭᑦᔭᓲᖑᒻᒪᖔᑦ, ᓂᒪᒍᓯᖃᓲᖑᒻᒪᖔᑦ, ᐊᓯᖏᓪᓗ.
  4. ᐃᓅᖃᑎᒌᓄᐊᖓᔪᓄᑦ-ᐃᑉᐱᓂᐊᕐᓂᒥᒍᑦ ᐱᕈᕐᐸᓕᐊᓂᖓ: ᐱᐊᕋᐅᑉ (ᑲᒃᑲᓛᑉ) ᐱᓇᓱᐊᕈᓐᓇᓂᖓ ᐃᒻᒥᓂᕐᓱᓗᓂ, ᐊᑐᐃᓐᓇᐅᓂᖓ ᐱᕈᕐᓯᒪᓂᒥᒍᑦ, ᐃᓱᒪᖓᑕ ᓴᖑᔭᕋᕐᑌᓕᒍᓐᓇᓂᖓ, ᐱᓂᐊᕐᓂᖓ, ᐊᓯᒥᓄᑦ ᐱᖕᖑᐊᖃᑎᐅᑦᓯᐊᕈᓐᓇᓂᖓ, ᐊᓯᖏᓪᓗ.

ᑭᓇ ᑲᒪᒋᔭᖃᕆᐊᓕᒃ ᖃᐅᔨᓴᕐᑕᐅᓂᖓᓂᒃ ᕿᑐᕐᖓᒪ ᐊᓯᐊᒎᕐᑎᑕᐅᖁᔨᒍᑎᓂᒃ ᐊᑕᓐᓂᐅᒍᑎᖃᑐᐊᕈᒪ?

ᖃᐅᔨᓴᕈᑎᖏᑦ ᐱᓇᓱᐊᕐᑕᐅᓲᑦ ᐃᓕᓴᕐᕕᒥᑦ, ᐃᓕᒃᑯᑦ ᐃᓕᓭᒍᑎᓂᒃ ᐃᓕᓴᕐᑕᐅᒋᐊᓕᓐᓂᒃ ᐃᓕᓭᔨᒧᑦ.  ᓄᓇᓕᒻᒥ ᐊᑐᐃᓐᓇᖃᖕᖏᑐᐊᕐᐸᑦ ᐃᓕᒃᑯᑦ ᐃᓕᓭᒍᑎᓂᒃ ᐃᓕᓴᕐᑕᐅᒋᐊᓕᓐᓂᒃ ᐃᓕᓭᔨᖃᖕᖏᑐᐊᕐᐸᑦ, ᖃᐅᔨᓴᕈᑏᑦ ᐱᓇᓱᐊᕐᑕᐅᒐᔭᕐᑐᑦ ᐱᒍᑦᔨᒋᐊᓪᓛᒍᑎᓂᒃ ᓴᑐᕐᓇᑐᓂᒃ ᐃᓕᓐᓂᐊᕕᖃᕐᓂᒧᓪᓗ ᐱᓇᓱᕝᕕᒥᑦ ᐃᓕᓭᔩᑦ ᐃᑲᔪᕐᑎᖓᓄᑦ.

ᖃᖓᐅᓕᕐᐸᑦ ᕿᑐᕐᖓᕋ ᖃᐅᔨᓴᕐᑕᐅᒐᔭᕐᖃ ᐊᑕᓐᓂᐅᒍᑎᖃᕈᒪ ᐊᓯᐊᒎᕐᑎᑕᐅᖁᔨᒍᑎᒥᒃ?

ᐱᐅᓯᕐᓱᑐᕐᑎᒍᑦ, ᖃᐅᔨᓴᕈᑎᓂᒃ ᐱᓇᓱᐊᓲᑦ ᐁᕆᓕ 15 ᐊᒻᒪᓗ ᒣ 15 ᐊᑯᓐᓂᖓᓂ.  ᑕᒡᒐᓂ ᐊᕐᕌᒍᒥ, ᐅᓪᓗᖓ ᑭᖑᓪᓕᐹᖅ ᐅᖓᓯᓪᓕᒋᐊᕐᑕᐅᓯᒪᔪᖅ ᒣ 22, 2020-ᒧᑦ, ᐱᑦᔪᑎᐅᑎᓪᓗᒍ ᖃᓂᒻᒪᓯᖅ-19 ᓄᓇᕐᔪᐊᒥ ᐊᑑᑎᓂᖓ.  ᑕᒃᑯᒧᑦ ᖃᐅᔨᓴᕐᑕᐅᒍᑎᒋᒋᐅᓕᖏᓐᓄᑦ ᕿᑐᕐᙰᑦ ᐊᑐᐃᓐᓇᐅᑎᑦᓯᐊᕆᐊᓖᑦ.

ᓇᓂ ᖃᐅᔨᓴᕈᑏᑦ ᐱᓇᓱᑦᑕᐅᓲᖑᕙᑦ?

ᖃᐅᔨᓴᕈᑏᑦ ᐃᓕᓴᕐᕕᒥ ᐱᓇᓱᑦᑕᐅᓲᑦ.

ᕿᑐᕐᖓᓕᒻᒦᒃ ᐃᓚᐅᔪᖃᕈᓐᓇᖃ ᖃᐅᔨᓴᕈᑎᓂᑦ?

ᕿᑐᕐᖓᓕᒻᒥᒃ ᐁᓯᒪᔪᖃᕈᓐᓇᖏᑦᑐᖅ ᑌᑲᓂ ᐱᓇᓱᐊᕐᕕᐅᔪᒥᒃ ᖃᐅᔨᓴᕈᑏᑦ ᐊᑑᑎᑎᓪᓗᒋᑦ.

ᐅᐸᓗᙰᔭᕐᑎᓯᒍᓐᓇᐳᖔ ᕿᑐᕐᖓᕋᓂᒃ ᖃᐅᔨᓴᕐᑕᐅᓂᕐᒧᑦ ᑖᑦᓱᒧᖓ?

ᐊᐅᑲ, ᐊᑐᐃᓐᓇᕈᕐᑎᒍᑎᐅᓲᖑᖕᖏᑐᖅ ᖃᐅᔨᓴᕐᑕᐅᓂᐅᑉ ᓯᕗᓂᐊᒍᑦ.

ᖃᓄᐃᓘᓱᖑᕚᑦ ᖃᐅᔨᓴᕐᓂᐅᑉ ᑭᖑᓂᐊᒍᑦ?

ᐱᒍᑦᔨᒋᐊᓪᓛᒍᑎᓂᒃ ᓴᑐᕐᓇᑐᓂᒃ ᐃᓕᓐᓂᐊᕕᖃᕐᓂᒧᓪᓗ ᐱᓇᓱᕝᕕᒃ ᑐᑭᓯᓂᐊᕐᑐᑦ ᖃᐅᔨᓴᕈᑎᓄᑦ ᓄᐃᑕᐅᔪᓂᒃ.  ᕿᑐᕐᙰᑦ ᐊᓂᒎᑎᔪᕕᓂᐅᑉᐸᑦ, ᐊᓯᐊᒎᕐᑎᑕᐅᖁᔨᒍᑎ ᐊᖏᕐᑕᐅᓂᐊᕐᑐᖅ.  ᕿᑐᕐᙰᑦ ᐱᒋᐊᕋᔭᕐᓗᓂ ᐃᓕᓐᓂᐊᕆᐊᖕᖓᑐᓂ ᐃᓕᓐᓂᐊᓇᐅᑉ ᐊᕐᕌᒍᖓ ᑐᖓᓕᐊ ᐱᒋᐊᓯᑐᐊᕐᒥᐸᑦ.

ᕿᑐᕐᙰᑦ ᐊᓂᒎᑎᔪᕕᓂᐅᖕᖏᐸᑦ, ᐊᓯᐊᒎᕐᑎᑕᐅᖁᔨᒍᑎᒥᒃ ᐊᑕᓐᓂᐅᕈᑎᒃ ᐊᐅᑳᕐᑕᐅᓂᐊᕐᑐᖅ.

ᕿᑐᕐᙰᑦ ᐅᑕᕐᕿᒋᐊᓪᓚᓚᐅᑲᒋᐊᖃᕐᓂᐊᑐᖅ ᐊᕐᕌᒍᒋᐊᓪᓚᒥᒃ ᐃᓕᓐᓂᐊᕆᐊᖕᖓᓂᑦᓴᒥᓂᒃ.

ᖃᓄᐃᓘᕐᓱᑎᒃ ᐃᓕᓴᕐᓂᓕᕆᓂᒃᑯᑦ ᑭᖑᓪᓕᐹᖓᓂᒃ ᑐᑭᑖᕆᓲᖑᕙ?

ᐊᖏᕐᑕᐅᓂᖓᓄᑦ ᐊᑑᑎᔭᐅᒋᐊᓖᑦ ᑐᖕᖓᕕᑐᐊᓪᓚᕆᓖᑦ ᕿᑐᕐᖓᐱᑦ ᖃᐅᔨᓴᕐᑕᐅᒍᑎᖏᓐᓂᒃ.  ᖃᐅᔨᓴᕐᑕᐅᒍᑎᖏᑦ ᑐᑭᓯᔭᐅᒐᓱᒍᑎᖏᑦ ᐱᓇᓱᑦᑕᐅᓲᑦ ᐱᒍᑦᔨᒋᐊᓪᓛᒍᑎᓂᒃ ᓴᑐᕐᓇᑐᓂᒃ ᐃᓕᓐᓂᐊᕕᖃᕐᓂᒧᓪᓗ ᐱᓇᓱᕝᕕᒧᑦ, ᐊᒻᒪᓗ ᐃᓕᓴᕐᕕᒧᑦ ᑲᒪᒋᔭᐅᓲᖑᒐᑎᒃ.

ᓱᓇᐅᕙᑦ ᐋᕐᕿᒋᐊᕆᒍᑎᐅᒍᓐᓇᕋᔭᕐᑐᑦ ᐊᑐᐃᓐᓇᐅᑎᑕᐅᔪᑦ ᐊᐅᓚᑦᓯᓂᓕᕆᔩᑦ ᑐᑭᑖᕐᑕᖓᓂᒃ ᐳᕐᑐᓂᕐᓴᒋᐊᓪᓚᒨᕆᒍᒪᔪᒧᑦ?

ᑐᑭᑖᕐᑕᐅᔪᒥᒃ ᐊᖏᖃᑎᖃᖕᖏᑯᕕᑦ, ᐋᑦᓯᒍᓐᓇᑐᑎᑦ ᑯᐯᒻᒥ ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᒧᑦ.  ᐊᒡᓚᕕᖃᕈᓐᓇᒥᔪᑎᑦ ᐱᒍᑦᔨᒋᐊᓪᓛᒍᑎᓂᒃ ᓴᑐᕐᓇᑐᓂᒃ ᐃᓕᓐᓂᐊᕕᖃᕐᓂᒧᓪᓗ ᐱᓇᓱᕝᕕᒧᑦ ᖃᕆᑕᐅᔭᒃᑯᑦ ᐅᖄᓚᐅᑎᒃᑯᓘᓐᓃᑦ ᐅᖄᓚᕕᒋᓗᒋᑦ ᐅᕙᓂ 1-866-964-1136 ᐅᖄᓚᐅᑎᖓ 230 ᑐᑭᓯᒋᐊᓪᓚᒍᑎᑦᓴᓄᑦ ᑕᒪᑦᓱᒪ ᐊᓯᐊᒎᕐᑎᑕᐅᖁᔨᒍᑎᒥᒃ ᐊᑕᓐᓂᐅᒍᑎᕐᐱᑦ ᑐᑭᑖᕐᑕᐅᓂᖓᓂᒃ.

ᖃᓂᒻᒪᓯᖅ-19 ᓄᓇᕐᔪᐊᒥ ᐊᑑᑎᒐᓗᐊᕐᐸᑦ, ᐊᑕᓐᓂᐅᒍᓐᓇᖏᓐᓇᖁᖔ ᐊᓯᐊᒎᕐᑎᑕᐅᖁᔨᒍᑎᒥᒃ ᐊᒻᒪᓗ ᕿᑐᕐᖓᕋ ᖃᐅᔨᓴᕐᑕᐅᒐᔭᕐᖄ?

ᐅᓪᓗᖅ ᑭᖑᓪᓕᐹᖅ ᑐᓂᔨᕕᑦᓴᖅ ᐊᓯᐊᒎᕐᑎᑕᐅᖁᔨᒍᑎᒥᒃ ᐊᑕᓐᓂᐅᕈᑎᓂᒃ ᑕᒡᒐᓂ ᐊᕐᕌᒍᒥ ᒣ 22, 2020-ᒦᑦᑐᖅ.  ᖃᓂᒻᒪᓯᖅ-19 ᓄᓇᕐᔪᐊᒥ ᐊᑑᑎᓂᖓ ᓇᒧᓪᓗ ᐊᐅᓪᓚᖃᔭᖕᖏᑑᑎᑕᐅᓂᖅ ᐱᑦᔪᑎᐅᑎᓪᓗᒋᑦ, ᕿᑐᕐᙰᑦ ᖃᐅᔨᓴᕐᑕᐅᒍᓐᓇᒐᔭᕐᑐᖅ ᓄᓇᓕᒻᒥ ᖃᐅᔨᓴᕈᓐᓇᑐᕐᑕᖃᕐᐸᑦ ᑭᓯᐊᓂ.  ᒣ 13, 2020-ᒥ ᐱᒋᐊᕐᓗᑎᒃ, ᐊᓯᐊᒎᖁᔨᒍᑎᓂᒃ ᖃᐅᔨᓴᕈᑏᑦ ᐊᑐᐃᓐᓇᐅᔪᑦ ᓯᑕᒣᓐᓇᓂᑦ ᓄᓇᓕᓐᓂᑦ: ᐃᓄᒃᔪᐊᒃ, ᑲᖏᕐᓱᐊᓗᒃᔪᐊᖅ, ᑰᒃᔪᐊᖅ ᐊᒻᒪᓗ ᓴᓪᓗᐃᑦ.  ᐊᐅᓪᓚᖃᔭᖕᖏᑑᑎᑕᐅᒍᓐᓀᓂᐅᑉ ᖃᖓᐅᒐᔭᕐᓂᖓ ᒪᓕᓪᓗᒍ, ᐃᓕᓴᕐᓂᓕᕆᓂᖅ ᕿᒥᕐᕈᓚᖓᔪᖅ ᖃᓄᐃᓘᕐᑕᐅᓗᑎᒃ ᐱᓇᓱᐊᕐᑕᐅᒍᓐᓇᒐᔭᕐᒪᖔᑕ ᑖᒃᑯᐊ ᐊᓯᐊᒎᕐᑎᑕᐅᖁᔨᒍᑎᒥᒃ ᖃᐅᔨᓴᕈᑏᑦ ᐃᓕᓐᓂᐊᓇᐅᑉ ᐊᕐᕌᒍᒋᓛᕐᑕᖓ ᐱᒋᐊᓚᐅᕐᑎᓇᒍ.

ᖃᓄᕆᓐᓈ ᕿᑐᕐᖓᕋ ᐱᕙᓪᓕᕈᓐᓇᑐᖅ ᐃᓕᓐᓂᐊᕆᐊᖕᖓᓯᓂᒃᑯᑦ ᐅᑭᐅᖃᕐᓗᓂ 4-ᓂᒃ?

ᖃᐃᔨᓴᕐᑐᑦ ᖃᐅᔨᖃᑦᑕᓯᒪᔪᑦ ᐃᒫᑦ ᐃᓕᓐᓂᐊᕆᐊᖕᖓᑐᕐᓯᐅᑎᓂᒃ ᐱᒋᐊᑲᐱᓐᓂᖅ ᐱᐊᕋᕐᓂᒃ ᐱᕙᓪᓖᒍᓐᓇᑐᖅ ᑌᒃᑯᓂᖓ ᓯᕗᒧᐊᕐᓯᒪᒍᑎᖃᓪᓚᕆᑦᑐᓂᒃ ᐃᓘᓐᓀᑎᒍᑦ ᐃᓅᖃᑎᒌᓂ-ᐃᑉᐱᓂᐊᕈᑎᓕᕆᓂᒃᑯᑦ, ᑐᓴᐅᒪᖃᑎᒌᓐᓂᑯᑦ, ᐃᖃᖕᖏᓂᕐᒥᒍᑦ, ᐊᒻᒪᓗ ᑐᑭᓯᒍᓐᓇᓂᒃᑯᑦ ᐱᕈᕐᐸᓕᐊᓂᕐᒥᒍᑦ.  ᑖᒃᑯᐊ ᐱᐊᕃᑦ (ᑲᒃᑲᓛᑦ) ᑌᔭᐅᓲᖑᒻᒥᔪᑦ “ᑐᓂᕐᕈᓯᐊᓖᑦ ᐱᐊᕃᑦ”.  ᐊᒥᓲᖕᖏᑐᑦ ᑖᒃᑯᐊ.  ᐃᓕᓐᓂᐊᕆᐊᖕᖓᑐᓂ ᐊᓯᐊᒎᕐᑎᑕᐅᖁᔨᒍᑎ ᐱᐅᓯᐅᓲᑦ ᐊᓯᐊᖒᕐᑐᓂᒃ ᐱᕕᖃᕐᑎᓯᒍᑎᓕᐊᖑᓯᒪᔪᖅ ᑐᓂᕐᕈᓯᐊᓕᓐᓂᒃ ᐱᐊᕋᕐᓂᒃ ᐱᕈᕐᐸᓕᐊᖏᓐᓇᓯᐊᕐᓂᖏᓐᓂᒃ ᑲᔪᓯᓂᕐᒥᒃ ᓈᒻᒪᓈᕐᑐᓂᒃ ᐃᑲᔪᕐᓯᒪᔭᐅᓗᑎᒃ.

ᓱᓇᐅᕙᑦ ᐊᑲᐅᖕᖏᓂᖏᑦ ᕿᑐᕐᖓᒪ ᐃᓕᓐᓂᐊᕆᐊᖕᖓᑐᕐᓯᐅᑎᓂᒃ ᐱᒋᐊᑲᐱᓐᓂᖓᓂ?

ᕿᑐᕐᙰᑦ ᐊᑐᐃᓐᓇᐅᖏᑐᐊᕐᐸᑦ, ᐃᓕᓐᓂᐊᕆᐊᖕᖓᑐᓂ ᐱᒋᐊᑲᐱᓐᓂᑯᑦ ᓱᒃᑯᑕᐅᒍᑎᖃᕈᓐᓇᑐᑦ ᐃᓅᖃᑎᒌᓂ-ᐃᑉᐱᓂᐊᕈᑎᓕᕆᓂᒃᑯᑦ, ᑐᑭᓯᒪᖃᑎᒌᓐᓂᑯᑦ, ᐃᖃᖕᖏᑑᒍᓐᓇᓂᒃᑯᑦ ᐊᒻᒪᓗ ᑐᑭᓯᒍᓐᓇᓂᖓᑕ ᐱᕈᕐᐸᓕᐊᓂᖓᒍᑦ.  ᐅᓗᕆᐊᓇᕐᑐᒨᓲᑦ ᐳᕐᑐᓂᓐᓂᑦ ᐱᒋᐊᓕᕐᕿᒋᐊᖃᕐᑕᓕᕐᓂᒧᑦ, ᑕᒪᓐᓇᓗ ᓇᖕᒥᓂᖅ-ᐅᐱᒋᒍᓐᓇᓂᕐᒥᒍᑦ ᐱᓀᓗᑕᕐᓄᑦ ᑐᕌᒍᓐᓇᓱᓂ.

ᑭᓇᒥᒃ ᐅᖄᕕᖃᕈᓐᓇᐳᖓ ᑐᑭᓯᒋᐊᓪᓚᕈᑎᑦᓴᓄᑦ?

ᐅᖄᕕᖃᕈᓐᓇᑐᑎᑦ ᐱᒍᑦᔨᒋᐊᓪᓛᒍᑎᓂᒃ ᓴᑐᕐᓇᑐᓂᓪᓗ ᐃᓕᓐᓂᐊᕕᖃᕐᓂᒧᑦ ᐱᒍᑦᔨᐅᑎᓂᒃ ᐱᓇᓱᕝᕕᒥᒃ ᐅᕙᓂ 1-866-964-1136, ᐅᖄᓚᐅᑎᖓ 230 ᐅᕝᕙᓘᓐᓃᑦ ᖃᕆᑕᐅᔭᒃᑯᑦ ᐊᒡᓚᓗᑎᑦ ᐅᕗᖓ.

Back to News