ᐃᓕᓴᕐᓂᓕᕆᔩᑦ ᓂᕈᐊᕐᑕᐅᓲᑦ ᓄᓇᓕᒻᒥ ᕿᑐᕐᖓᖃᕐᓱᑎᒃ, ᐊᔪᖀᒋᐊᕐᑎᒋᔭᐅᑦᓱᑎᒃ ᐃᓕᓐᓂᐊᓂᕐᒥᒃ ᑭᒡᒐᑐᕐᑎᓄᑦ. ᑲᑎᒪᔩᑦ ᑖᒃᑯᐊ ᐱᓪᓚᕆᐅᑦᓱᑎᒃ ᖃᓄᐃᓘᕐᑎᐅᓂᓖᑦ ᐃᓕᓐᓂᐊᕕᓐᓄᑦ ᓄᓇᕕᒻᒥᓗ ᓄᓇᓕᓐᓄᑦ. ᐃᓕᓴᕐᓂᓕᕆᔩᑦ ᐊᕐᕌᒎᓐᓂ ᒪᕐᕉᓂ ᓂᕈᐊᕐᑕᐅᓯᒪᓲᑦ.

ᐃᓕᓴᕐᓂᓕᕆᔩᑦ ᐱᓇᓱᐊᕈᑎᑦᓴᖏᑦ

ᐃᓕᓴᕐᓂᓕᕆᔨᓂᒃ ᓂᕈᐊᕐᓃᑦ: ᐊᐱᕆᒍᑎᐅᖏᓐᓇᓲᓂᒃ ᑭᐅᑦᔪᑏᑦ

 

ᐃᓕᓴᕐᓂᓕᕆᔩᑦ ᖃᓄᐃᓘᕐᑎᐅᕙᑦ?

ᐃᓕᓴᕐᓂᓕᕆᔩᑦ ᐱᔭᑦᓴᖁᑎᖃᕐᐳᑦ ᐅᖃᐅᑦᔨᒋᐊᕐᑎᐅᓂᕐᒥᒃ ᐃᒣᓕᒋᓕᖓᒐᔭᕐᖁᒫᕐᑎᐅᓂᕐᒥᓗ ᐃᓕᓐᓂᐊᕖᑦ ᐊᐅᓚᑦᓯᓂᓕᕆᔨᖏᓐᓂᒃ ᐃᓕᓴᕐᓂᓕᕆᓂᕐᒥᓗ (ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖏᓐᓂᒃ ᐊᒻᒪᓗ ᑐᖓᓕᖏᓐᓂᒃ, ᑲᒪᔨᒻᒪᕆᓐᓂᓗ, ᐱᓇᓱᑦᑐᓕᕆᕕᒻᒥᓗ) ᐱᑦᔪᑎᖃᕐᓱᑎᒃ ᖃᓄᑐᐃᓐᓇᖅ ᐱᔭᑦᓴᖁᑕᐅᓕᕐᑐᓂᒃ ᐃᓕᖓᑦᓱᑎᒃ ᐃᓕᓐᓂᐊᓂᕐᒧᓗ ᐱᓇᓱᑦᑎᓴᖏᓐᓂᓗ ᐃᓕᓐᓂᐊᕕᐅᑉ ᐱᔭᖃᕋᓱᓐᓂᓄᑦ.

ᐃᓕᓴᕐᓂᓕᕆᔨᐅᖃᑕᐅᓕᕈᒫ, ᑮᓇᐅᑦᔭᓴᕋᔭᕐᐳᖓ ᐃᓕᓴᕐᓂᓕᕆᓂᕐᒥᑦ?

ᑲᑎᖕᖓᔨᐅᒍᑎᑖᕐᑕᓲᑦ ᑕᕐᕿᑕᒫᑦ $130-ᓂᒃ, ᐊᒥᓱᕕᓪᓗᑎᒃ ᑕᕐᕿᓕᒫᒥ ᑲᑎᖕᖓᒐᓗᐊᕋᒥᒃ ᐊᑕᐅᓯᕕᑐᐃᓐᓇᓂᕈᑎᓪᓗᓃᑦ ᑮᓇᐅᔭᕐᑖᖏᑦ ᑕᕐᕿᓕᒫᒧᓕᖓᔪᑦ. ᓲᕐᓗ: ᑕᕐᕿᓕᒫᒥ ᒪᕐᕈᕕᓪᓗᑎᒃ ᑲᑎᖕᖓᓂᖃᑐᐃᓐᓇᕆᐊᓖᑦ, ᑕᕐᕿᐅᓗ ᑭᖑᓪᓕᖓᓂ ᑕᓪᓕᒪᕕᓪᓗᑎᒃ. ᑮᓇᐅᔭᕐᑖᑕᒐᖏᑕ ᐅᓄᕐᓂᖏᑦ ᐊᓯᑦᔨᓲᖑᖕᖏᑐᑦ.

ᑕᕐᖀᑦ ᐃᓚᖓᓐᓂ ᑲᑎᖕᖓᔪᕕᓂᐅᖕᖏᑐᐊᕋᒥᒃ (ᑲᑎᖕᖓᔪᑦᓭᑦ ᐅᓄᕐᓂᖏᑦ ᓈᒻᒪᓯᕐᖃᔭᖕᖏᓂᑯᖏᓐᓄᑦ), ᑲᑎᖕᖓᔨᐅᒍᑎᑖᓱᖑᖕᖏᑐᑦ ᑌᑲᓂ ᑕᕐᕿᒥ ᑲᑎᖕᖓᕕᐅᓐᓂᖏᑦᑐᒥ.

ᖃᑦᓯᕕᓪᓗᖔ ᑲᑎᖕᖓᔪᓄᑦ ᐃᓚᐅᒋᐊᖃᕋᔭᕐᖁᖓ?

ᑕᕐᕿᑕᒫᑦ ᐊᑕᐅᓯᐊᖃᑦᑕᓗᑎᒃ, ᑭᓯᐊᓂ ᖃᑦᓯᕕᓐᓂᒥᒃ ᑐᖕᖓᕕᖃᓲᖑᖕᖏᑐᑦ. ᑲᑎᖕᖓᓃᑦ ᑐᖕᖓᕕᖃᓲᖑᒻᒪᑕ ᑭᖕᖒᒪᓇᕐᓂᒥᓂᒃ ᐅᐃᒪᓇᕐᓯᔪᖃᑐᐊᕐᒪᓗ ᐃᓕᓐᓂᐊᕕᒻᒥ ᐊᑑᑎᔭᐅᒋᐊᖃᓲᖑᑦᓱᑎᒃ.

ᑭᓇᒃᑰᑦ ᐃᓕᓴᕐᓂᓕᕆᔨᐅᓚᖓᓗᑎᒃ ᓂᕈᐊᕐᑕᐅᑎᒐᓱᒍᓐᓇᐸᑦ?

ᑭᓇᒃᑯᑐᐃᓐᓀᑦ (ᐱᕙᓪᓕᖁᑎᑖᕐᑕᑐᓪᓗ ᐱᕙᓪᓕᖁᑎᑖᑕᖏᑦᑐᓗ) ᓄᓇᓯᒪᓗᑎᒃ ᓄᓇᓖᑦ ᓇᓪᓕᖏᓐᓂ ᑕᕐᕿᓂ 12-ᓂ ᐅᖓᑖᓂᓗᓐᓃᑦ ᐅᑭᐅᖃᓚᐅᕈᓂ 18-ᓂᒃ ᐅᖓᑖᓂᓗ.

18-ᓂᒃ ᐅᑭᐅᕐᑖᓯᒪᕋᑕᖕᖏᑐᖓ ᑭᓯᐊᓂ ᕿᑐᕐᖓᖃᕐᑐᖓ. ᓂᕈᐊᕐᑕᐅᑎᒐᓱᒍᓐᓇᕈᓇᑦᓴᖁᖓ ᐃᓕᓴᕐᓂᓕᕆᔨᓄᑦ?

ᐊᐅᑲ, 18-ᓂᒃ ᐅᑭᐅᖃᕆᐊᖃᕋᕕᑦ ᓂᕈᐊᕋᑦᓴᐅᒍᓐᓇᖏᓪᓚᑎᑦ ᓯᕗᓂᖓᒍᑦ.

ᐊᖏᖃᑎᒌᓐᓂᒧᑦ ᐃᓚᐅᔫᖕᖏᓗᖓ, ᓂᕈᐊᕐᑕᐅᑎᒐᓱᐊᕈᓐᓇᕈᓇᑦᓴᑐᖓ ᐃᓕᓴᕐᓂᓕᕆᔨᓄᑦ ᐃᓚᐅᓂᐊᕐᓗᖓ?

ᐋ, ᑭᓯᐊᓂ ᓄᓇᓕᒻᒥ ᑕᕐᕿᓂ 12-ᓂ ᓄᓇᓯᒪᒋᐊᖃᕐᑐᑎᑦ ᑖᒃᑯᓇᖕᖓᑦ ᐃᑭᓐᓂᓴᐅᖕᖏᑐᓂᒃ

ᖃᓄᑎᒋᒃ ᐊᑯᓂᕆᔪᒥᒃ ᐃᓕᓴᕐᓂᓕᕆᔩᑦ ᓂᕈᐊᕐᑕᐅᒪᓂᖃᓲᑦ?

ᐊᕐᕌᒍᓐᓂᒃ ᒪᕐᕉᓂᒃ.

ᖃᑦᓯᐅᒋᐊᖃᓱᖑᕚᑦ ᐃᓕᓴᕐᓂᓕᕆᔩᑦ ᐊᑐᓂᑦ ᓄᓇᓕᓐᓂ?

ᑕᒪᓐᓇ ᑐᖕᖓᕕᓕᒃ ᓄᓇᓕᐅᑉ ᖃᓄᑎᒋᒃ ᐃᓄᒋᐊᓐᓂᖓᓂᒃ. ᐊᑐᓂᑦ ᓄᓇᓖᑦ, ᖃᑦᓯᓂᒃ ᐃᓕᓴᕐᓂᓕᕆᔨᖃᓲᖑᒻᒪᖔᑕ ᐊᓪᓚᓯᒪᕗᑦ ᐃᒫᒃ:

ᐊᑯᓕᕕᒃ: 6 ᐃᓕᓴᕐᓂᓕᕆᔩᑦ | ᐊᐅᐸᓗᒃ: 5 ᐃᓕᓴᕐᓂᓕᕆᔩᑦ | ᐃᓄᑦᔪᐊᖅ: 8 ᐃᓕᓴᕐᓂᓕᕆᔩᑦ | ᐃᕗᔨᕕᒃ: 5 ᐃᓕᓴᕐᓂᓕᕆᔩᑦ | ᑲᖏᕐᓱᐊᓗᒃᔪᐊᖅ: 7 ᐃᓕᓴᕐᓂᓕᕆᔩᑦ | ᑲᖏᕐᓱᔪᐊᖅ: 6 ᐃᓕᓴᕐᓂᓕᕆᔩᑦ | ᑲᖏᕐᓱᒃ: 6 ᐃᓕᓴᕐᓂᓕᕆᔩᑦ | ᑰᒃᔪᐊᖅ: 8 ᐃᓕᓴᕐᓂᓕᕆᔩᑦ | ᑰᒃᔪᐊᕌᐱᒃ: 7 ᐃᓕᓴᕐᓂᓕᕆᔩᑦ | ᐳᕕᕐᓂᑐᖅ: 8 ᐃᓕᓴᕐᓂᓕᕆᔩᑦ | ᖁᐊᕐᑕᖅ: 5 ᐃᓕᓴᕐᓂᓕᕆᔩᑦ | ᓴᓪᓗᐃᑦ: 7 ᐃᓕᓴᕐᓂᓕᕆᔩᑦ | ᑕᓯᐅᔭᖅ: 5 ᐃᓕᓴᕐᓂᓕᕆᔩᑦ | ᐅᒥᐅᔭᖅ: 5 ᐃᓕᓴᕐᓂᓕᕆᔩᑦ

ᖃᓅᖅ ᓂᕈᐊᕐᑕᐅᓲᒃ ᐃᓕᓴᕐᓂᓕᕆᔩᑦ ᐊᖓᔪᕐᖄᖓᓪᓗ ᑐᖓᓕᖓᓗ?

ᐃᓕᓴᕐᓂᓕᕆᔨᐅᖃᑎᒌᑦ ᑲᑎᖕᖓᒋᐊᖕᖓᓕᕋᒥᒃ ᓂᕈᐊᕐᑕᐅᓚᐅᕐᓱᑎᒃ ᓂᕈᐊᕐᓂᖃᓲᑦ ᐊᑯᕐᖓᒥᓐᓂ ᐊᖓᔪᕐᖄᓴᕐᒥᓂᒃ ᑐᖓᓕᑦᓴᖓᓂᓪᓗ. ᐃᓕᓐᓂᐊᕕᐅᑉ ᑲᒪᔨᒻᒪᕆᖓ ᑎᒃᑯᐊᓯᑎᑦᓯᑲᑦᑕᑎᓪᓗᒍ.

ᐊᖏᖃᑎᒌᓐᓂᒧᑦ ᐃᓚᐅᔫᖕᖏᓗᖓ. ᓂᕈᐊᕈᓐᓇᕈᓇᑦᓴᖁᖓ?

ᐋ, ᓂᕈᐊᕈᓐᓇᐅᑎᖃᕐᐳᑎᑦ, ᐃᒣᒋᐊᖃᑐᐃᓐᓇᑐᑎᑦ:

  • ᐅᑭᐅᑎᑦ ᓈᒻᒪᓯᓯᒪᒋᐊᓖᑦ (18-ᖑᓗᑎᑦ ᐅᕝᕙᓗᓐᓃᑦ ᐅᖓᑖᓂ);
  • ᓄᓇᓕᒻᒥ ᑌᑲᓂᑦᓭᓇᖅ ᓄᓇᓯᒪᒋᐊᖃᕐᑐᑎᑦ ᑕᕐᕿᓂ 12-ᓂ ᐅᖓᑖᓄᓗᓐᓃᑦ;
  • ᑲᓇᑕᒥᐅᖑᒋᐊᖃᕐᑐᑎᑦ;
  • ᓂᕈᐊᕈᓐᓇᑐᑦ ᐊᑎᖏᑕ ᐊᓪᓚᑕᐅᓯᒪᕕᖓᓐᓂ ᐊᓪᓚᑕᐅᓯᒪᒋᐊᖃᕐᑐᑎᑦ.

18-ᓂᒃ ᓱᓕ ᐅᑭᐅᖃᕋᑕᖕᖏᓚᖓ. ᓂᕈᐊᕈᓐᓇᖁᖔ?

ᐊᐅᑲ, ᐅᑭᐅᖃᕆᐊᖃᕐᑐᑎᑦ 18-ᓂᒃ ᐅᖓᑖᓂᓗᓐᓃᑦ.

ᐃᓚᐅᔫᕗᖓ ᑭᓯᐊᓂ ᓄᓇᕕᒻᒦᖏᑦᑐᖓ. ᓂᕈᐊᖃᑕᐅᒍᓐᓇᖁᖔ ᓇᒨᑦ ᓂᕈᐊᕆᐊᕐᑐᕈᓐᓇᖁᖓ?

ᐊᐅᑲ ᓂᕈᐊᖃᑕᐅᒍᓐᓇᖏᓪᓚᑎᑦ. ᐃᓕᓴᕐᓂᓕᕆᔩᑦ ᓄᓇᓕᒻᒥᓂ ᐊᐅᓚᑦᓯᔨᐅᒻᒪᑕ ᑌᒣᒃᑲᒥᓪᓗ ᓄᓇᕕᒻᒥ ᑭᓯᐊᓂ ᓂᕈᐊᕐᑕᐅᓂᖃᕈᓐᓇᓱᑎᒃ.

ᓄᓇᕕᒻᒦᓚᖕᖏᓇᒪ ᓂᕈᐊᕐᓇᖅ ᓇᓪᓕᐅᑎᑎᓪᓗᒍ. ᓂᕈᐊᕐᓇᐅᑉ ᐅᓪᓗᖓᑕ ᓯᕗᓂᖓᓂ ᓂᕈᐊᕈᓐᓇᕈᓇᑦᓴᖁᖓ?

ᐊᐅᑲ, ᓂᕈᐊᕐᓇᐅᑉ ᐅᓪᓗᖓᑕ ᓯᕗᓂᖓᓂ ᓂᕈᐊᕈᓐᓇᖏᓪᓚᑎᑦ. ᑭᓯᐊᓂ ᑕᒪᓐᓇᐅᒐᓗᐊᕐᑎᓗᒍ ᑎᓕᔨᒍᓐᓇᑐᑎᑦ ᐃᓕᓐᓂᒃ ᓂᕈᐊᕐᑎᓯᒐᔭᕐᑐᒥᒃ, ᐊᑐᕐᓗᓯ ᓯᑯᑦᓴᔭᒥᒃ ᐊᓪᓚᓯᒪᔪᖕᖑᐃᕕᑦᓴᔭᐅᑦᓱᓂ ᐃᓕᓐᓂᐊᕕᐅᑉ ᑲᒪᔨᒻᒪᕆᖓᑕ ᙯᑕᖓᓂᒃ ᓂᕈᐊᕐᓇᐅᑉ ᐅᓪᓗᖓᑕ ᓯᕗᓂᖓᓂ. ᐊᑎᓕᐅᕐᕕᒋᒋᐊᓖᑦ ᑖᓐᓇ ᐊᓪᓚᓯᒪᔪᖕᖑᐃᕕᑦᓴᔭ.

ᐃᓕᓴᕐᓂᓕᕆᔩᑦ ᑲᑎᖕᖓᔨᖏᑦᑕ ᑐᓴᕐᑕᐅᑎᑦᓯᒍᑎᖏᑦ

ᐃᓕᓐᓂᐊᓂᕐᒧᑦ ᑲᑎᒪᓂᕐᔪᐊᖅ ᐊᑐᕐᑕᐅᓲᖑᕗᖅ ᐊᕐᕌᒎᒃ ᒪᕐᕉᒃ ᑕᒫᑦ, ᓂᕈᐊᕐᑕᐅᔪᒥ ᓄᓇᓕᒻᒥ. ᐃᓕᓐᓂᐊᓂᕐᒧᑦ ᑲᑎᒪᓂᕐᔪᐊᖅ ᐃᓱᒪᑦᓴᓯᐅᕐᑐᓄᑦ ᐅᖃᕐᕕᐅᕗᖅ, ᐃᓛᒃᑰᑐᑦ ᓄᓇᓕᐅᑉ ᐃᓕᓐᓂᐊᓂᓕᕆᓂᕐᒧᑦ ᑲᑎᒪᔨᐊᐱᖏᑦ ᐁᑦᑐᑑᑎᑎᓪᓗᒋᑦ ᖃᐅᔨᒪᒍᑎᓂᒃ ᐊᑦᑐᐊᔪᓂᒃ ᐱᐊᕋᓖᑦ ᐃᓱᒪᒋᔭᖏᓐᓄᑦ ᐊᒻᒪᓗ ᓄᓇᓕᒻᒥᐅᑦ ᑯᒻᒪᓲᑎᖏᓐᓄᑦ ᐃᓕᓐᓂᐊᓂᐅᑉ ᑐᑭᐊᒍᑦ. ᐃᓕᓴᕐᓂᓕᕆᓂᕐᔨᒃᑯᓄᑦ, ᑖᓐᓇ ᑲᑎᒪᓂᖅ ᐱᔪᓐᓇᓯᒍᑕᐅᕗᖅ ᐃᓱᒪᑦᓴᓯᐅᕐᓂᒥᒃ ᑭᒡᒐᓂᒃ ᓄᓇᕕᒻᒥ ᓄᓇᓕᓕᒫᓄᑦ ᐱᑦᔪᑎᖃᕐᓗᓂ ᓄᑖᓂᒃ ᑐᕌᕐᑕᐅᔪᑦᓴᓂᒃ, ᕿᒥᕐᕈᓂᕐᒥᓗ ᐱᒋᐊᓕᓐᓂᒃ, ᓄᐊᑦᓯᓂᕐᒥᓗ ᓄᑖᓂᒃ ᐃᓱᒪᓂᒃ ᐊᑦᑐᐊᔪᓂᒃ ᐃᓕᓐᓂᐊᕈᑎᓂᒃ ᐱᒋᐊᕐᑎᓯᒍᑎᑦᓴᓄᑦ ᐊᒻᒪᓗ ᑎᒍᓚᓂᕐᒥᒃ ᐅᖃᐅᓯᑦᓴᖏᓐᓂᒃ ᐅᓪᓗᒥ ᐱᓂᐊᕐᓂᐅᔪᑦ ᐊᒻᒪᓗ ᐱᒍᑦᔨᒍᑕᐅᔪᑦ ᒥᑦᓵᓄᑦ.

ᐃᓕᓐᓂᐊᓂᕐᒧᑦ ᑲᑎᒪᓂᕐᔪᐊᖅ ᓵᖕᖓᒍᑕᐅᕗᖅ ᐅᖄᓂᕐᒥᒃ ᑕᐅᑐᒐᕐᒥᒃ ᐊᒻᒪᓗ ᑐᕌᕐᑕᐅᔪᓂᒃ ᐃᓕᓐᓂᐊᓂᕐᒥᒃ ᐱᑦᔪᔨᒍᑎᖏᓐᓄᑦ ᐃᓕᓴᕐᓂᓕᕆᔨᒃᑯᑦ. ᑲᒪᒋᔭᑦᓭᑦ ᐱᑦᔪᑎᓖᑦ ᖃᐅᑕᒫᕐᓯᐅᑎᑎᒍᑦ ᐊᐅᓚᑦᓯᓂᕐᒥᒃ ᐃᓕᓐᓂᐊᕕᓐᓂᒃ ᐅᕝᕙᓘᓐᓃᑦ ᓴᓇᒪᑎᑦᓯᓯᐊᕐᓂᒥᒃ ᐱᓇᓲᑏᓂᒃ ᐃᓕᓐᓂᐊᕖᓪᓗ ᐱᐅᓕᓐᓂᐊᒐᖏᓐᓂᒃ ᐃᓱᐊᖁᑎᖏᓐᓂᓗ.

ᑲᒃᑯᓇᓂ ᑭᖑᓪᓕᓂ, ᑕᑯᓚᖓᕗᑎᑦ ᑐᓴᕐᑎᓯᒍᑎᓕᐊᖑᓯᒪᔪᓂᑦ ᑖᒃᑯᓇᖕᖓᑦ ᑲᑎᖕᖓᓂᕐᓂᑦ ᐱᔭᐅᓯᒪᑦᓱᑎᒃ.

ᐃᓕᓴᕐᓂᓕᕆᔩᑦ ᑲᑎᖕᖓᔨᖏᑦᑕ ᑐᓴᕐᑕᐅᑎᑦᓯᒍᑎᖏᑦ | 2018