ᐃᓕᓐᓂᐊᓂᕐᒥᒃ ᑭᒡᒐᑐᕐᑏᑦ

ᑲᒥᓯᓀᑦ ᑲᑎᓲᑦ ᐃᓄᑦᑎᒍᑦ ᓯᑕᒪᕕᑦᓱᑎ ᐊᕐᕌᒍᑕᒫᑦ, ᐅᑯᓇᓂ ᑕᕐᕿᓂ ᐅᑦᑑᐱᕆ, ᑎᓯᐱᕆ, ᒫᑦᓯ ᐊᒻᒪᓗ ᔫᓂ. ᐃᓚᖓᒍᑦ ᑲᑎᓪᓚᕆᒋᐊᖃᓕᕋᒥ ᑲᑎᓲᒍᒻᒥᓱᑎᒃ, ᐅᖄᓚᐅᑎᒃᑯᑦ ᐅᕝᕙᓘᓐᓃᑦ ᐃᓄᑦᑎᒍᑦ.

ᐊᑖᓂ ᑕᑯᓚᖓᔭᑎᑦ ᓀᓪᓕᑎᕐᓯᒪᔪᑦ ᐳᐃᒍᕇᒃᑯᑏᑦ ᐅᖄᔭᐅᓚᐅᔪᑦ ᖃᒻᒥᐅᓂᕐᐹᒥ ᑲᑎᖕᖓᓂᐅᓚᐅᔪᒥ ᑲᒥᓯᓇᓄᑦ. ᐱᒻᒪᕆᐅᓂᕐᐹᖏᑦ ᑲᑎᒪᓂᕐᒥ ᐃᓇᖐᑦᔭᖏᑦᑐ ᑲᑎᒪᐅᑎᕕᓂᖏᓐᓂ ᑲᒥᓯᓀᑦ.

ᐱᒻᒪᕆᐅᓂᕐᐹᖏᑦ ᖃᒻᒥᐅᓂᕐᐹ ᑲᑎᖕᖓᓂᕕᓂᖏᓐᓂ ᑲᒥᓯᓀᑦ

ᔫᓂ 3-ᒥᑦ 6-ᒧᑦ, ᐃᓕᓐᓂᐊᓂᕐᒥᒃ ᑭᒡᒐᑐᕐᑏᑦ ᑲᑎᓚᐅᔪᕗᑦ ᒪᓐᑐᔨᐊᒥ. ᑕᒃᑲᓂ ᑲᑎᖕᖓᓂᕐᒥ, ᑭᒡᒐᑐᕐᑏᑦ ᕿᒥᕐᕈᓂᖃᓚᐅᔪᕗᑦ ᐊᒻᒪᓗ ᐊᖏᕐᓂᖃᕐᓱᑎᒃ ᐱᓇᓱᐊᕐᑕᐅᔪᕕᓂᕐᓂᒃ ᐃᓘᓐᓇᖏᑦ ᐱᓇᓱᕝᕕᐅᔪᑦ ᑐᓴᕐᑎᓯᒍᑎᖏᓐᓂᒃ, ᐃᓚᐅᑎᓪᓗᒋᑦ ᐃᓕᓴᕐᓂᓕᕆᓂᐅᑉ 2019-2020 ᑮᓇᐅᔦᑦ ᑐᕌᒐᖏᑦ. ᐊᑖᓂ ᑕᑯᓚᖓᕗᑎᑦ ᐃᓘᓐᓈᒍᑦ ᐅᖃᐅᓯᑦᓴᕆᔭᐅᕙᓪᓗᑐᕕᓃᑦ ᐅᖄᒍᑎᐅᓂᕕᓂᖏᓐᓂᒃ.

ᐱᓇᓱᐊᕐᑕᐅᔪᕕᓂᕐᓂᒃ ᑐᓴᕐᑎᓯᒍᑏᑦ ᐃᓘᓐᓇᖏᓐᓄᑦ ᐱᓇᓱᕝᕕᓄᑦ ᕿᒥᕐᕈᔭᐅᓚᐅᔪᑦ ᐊᒻᒪᓗ ᐊᖏᕐᑕᐅᓱᑎᒃ, ᐃᓚᐅᑎᓪᓗᒋᑦ ᐃᓕᓴᕐᓂᓕᕆᓂᐅᑉ 2019-2020-ᒥ ᑮᓇᐅᔦᑦ ᑐᕌᒐᖏᑦ.

ᐊᕐᕌᓂᐅᓚᐅᔪᒥ ᑕᑯᓐᓇᕈᑦᑕ, ᐃᓕᓴᕐᓂᓕᕆᓂᐅᑉ ᑮᓇᐅᔭᖏᑦᑕ ᑐᕌᒐᖏᓐᓂᒃ ᐊᖏᓕᒋᐊᕐᑐᑦ 8.88%-ᓄᑦ.

ᑐᕌᒐᖃᕐᓱᓂ ᐱᐅᓯᐅᒥᑎᑦᓯᓂᕐᒥᒃ ᐱᒍᑦᔨᒍᑎᓂᒃ ᐃᓕᓐᓂᐊᑎᓂᒃ, ᑭᒡᒐᑐᕐᑏᑦ ᐊᖏᓚᐅᔪᕗᑦ ᐋᕐᕿᒋᐊᕐᑕᐅᓂᖏᓐᓄᑦ ᒪᕐᕉᒃ ᐱᓇᓱᕝᕖᒃ: ᐱᒍᑦᔨᒋᐊᓪᓛᕕᒃ ᐊᒻᒪᓗ ᓴᑐᕐᓇᑐᓂᒃ ᐃᓕᓐᓂᐊᕕᖃᕐᓂᒧᑦ ᐱᒍᑦᔨᕕᒃ, ᐊᒻᒪᓗ ᐱᐅᓕᓂᐊᒐᓕᕆᕕᒃ.

ᐱᒍᑦᔨᒋᐊᓪᓛᕕᒃ ᐊᒻᒪᓗ ᓴᑐᕐᓇᑐᓕᓐᓂᒃ ᐃᓕᓐᓂᐊᕕᖃᕐᓂᒧᑦ ᐱᒍᑦᔨᒍᑏᑦ

ᑭᖑᓂᕐᒥ ᐃᓕᓐᓂᐊᕖᑦ ᐊᐅᓚᑕᐅᓂᖏᑦᑕ ᐊᑖᓂ, ᐱᒍᑦᔨᒋᐊᓪᓛᕕᒃ ᑲᒪᒋᔭᖃᓚᐅᔪᖅ ᐱᒍᑦᔭᐅᒍᑎᖏᓐᓂᒃ ᐃᓕᓐᓂᐊᓂᕐᒧᑦ ᐱᓀᓗᑕᓖᑦ ᐊᒻᒪᓗ ᐃᓱᒪᓕᕆᓂᕐᒧᑦ ᐃᓅᖃᑎᒌᓐᓂᒧᑦ ᐃᑲᔪᕐᓯᒍᑎᓂᒃ ᐱᒍᑦᔨᓂᕐᒧᑦ ᐃᓕᓐᓂᐊᑎᓂᒃ.

ᐱᓇᓱᕝᕕᒃ ᓄᐃᑕᐅᓯᒪᔪᖅ ᐃᓕᓐᓂᐊᓂᕐᒥ ᑭᒡᒐᑐᕐᑎᓄᑦ ᐊᑎᓕᐅᕐᑕᐅᓯᒪᔪᑦ ᐱᒍᑦᔨᒋᐊᓪᓛᕕᒃ ᐊᒻᒪᓗ ᓴᑐᕐᓇᑐᓂᒃ ᐃᓕᓐᓂᐊᕕᖃᕐᓂᒧᑦ ᐱᒍᑦᔨᕕᒃ.

ᓴᑐᕐᓇᑐᓕᓐᓂᒃ ᐃᓕᓐᓂᐊᕕᖃᕐᓂᒥ ᐱᓇᓱᖃᑎᒌᑦ ᓄᑖᒥᒃ ᐱᓇᓱᕝᕕᑖᓚᓯᔪᑦ, ᑐᕌᒐᖃᕐᓱᑎᒃ ᐃᓚᐅᓕᕐᑎᓯᒋᐊᓪᓚᕋᓱᐊᕐᓂᒧᑦ ᖁᐊᕐᓵᓇᕐᑐᑰᕐᓯᒪᓂᕐᒥᒃ ᑐᓴᐅᒪᑎᑦᓯᓂᕐᒥᒃ ᐊᑐᕐᑕᐅᓲᓂᒃ ᐃᓘᓐᓈᒍᑦ ᐃᓕᓐᓂᐊᓂᕐᒥ ᐱᓀᓗᑕᓕᓐᓄᑦ ᐊᒻᒪᓗ ᐃᓱᒪᓕᕆᓂᕐᒧᑦ ᐃᓅᖃᑎᒌᓐᓂᒧᓪᓗ ᐱᒍᑦᔨᒍᑎᓂᒃ ᐱᑕᖃᕐᑎᑕᐅᓂᖏᓐᓄᑦ.

ᐱᓇᓱᕝᕕᐅᓗᓂ, ᐱᒍᑦᔨᒋᐊᓪᓛᕕᒃ ᐊᒻᒪᓗ ᓴᑐᕐᓇᑐᓂᒃ ᐃᓕᓐᓂᐊᕕᖃᕐᓂᒧᑦ ᐱᒍᑦᔨᕕᒃ ᐊᓕᐊᒋᔭᖃᓛᕐᑐᖅ ᑐᕃᓐᓇᑐᒥᒃ ᐅᖄᖃᑎᖃᕈᓐᓇᓂᕐᒥᒃ ᐃᓕᓐᓂᐊᕕᓐᓂᒃ ᐊᒻᒪᓗ ᐱᑦᓯᐊᓕᐅᒥᑎᑦᓱᓗᓂ ᓄᓇᓕᓕᒫᓂ ᐊᑕᐅᑦᓯᑰᕐᑎᑕᐅᓂᖏᓐᓂᒃ ᐃᑲᔪᕐᓯᓂᕐᒧᑦ ᐱᒍᑦᔨᒍᑏᑦ ᐃᓕᓐᓂᐊᕕᓐᓄᑦ ᐊᒻᒪᓗ ᐃᓕᓐᓂᐊᑎᓄᑦ.

ᒪᕐᕉᒃ ᓄᑖᒃ ᐊᐅᓚᑦᓯᓂᓕᕆᔨᐅᓂᕐᒧᑦ ᐱᓇᓱᒑᒃ ᓄᐃᑕᐅᓚᐅᔫᒃ ᐃᓚᐅᑦᓱᑎᒃ ᑖᑦᓱᒧᖓ ᐋᕐᕿᒋᐊᕆᓂᕐᒧᑦ. ᑖᒃᑯᐊ ᐱᓇᓱᒑᒃ ᑰᑦᔪᐊᒦᓛᕐᑑᒃ ᓄᓇᕕᒻᒥ.

ᐱᐅᓕᓂᐊᒐᓕᕆᕕᒃ

ᐋᕐᕿᒋᐊᕐᑕᐅᓂᖓ ᑖᑦᓱᒪ ᐱᓇᓱᕝᕕᐅᑉ ᐱᑦᔪᑎᖃᓚᕿᒻᒥᔪᖅ ᑮᓇᐅᔦᑦ ᐃᖏᕐᕋᕈᑏᑦ ᐊᒡᒍᑐᕐᑕᐅᓂᖏᑦ ᐁᑦᑑᑎᐅᓯᒪᔪᑦ ᐃᓕᓴᕐᓂᓕᕆᓂᕐᒧᑦ ᐊᕐᕌᒍᓂ ᒪᕐᕉᓂ ᐊᓂᒍᕐᑐᓂ ᐊᖏᓕᒋᐊᕐᓯᒪᓕᕐᓂᖏᓐᓄᑦ ᒪᕐᕉᕕᓪᓗᐊᑐᒥᒃ ᐅᖓᑖᓄᑦ. ᐃᓚᒋᐊᕈᑎᐅᑎᓪᓗᒋᑦ ᓄᓇᒃᑰᔪᖁᑎᖏᓐᓄᑦ, ᐃᓕᓴᕐᓂᓕᕆᓂᖅ ᓇᒻᒥᓂᓕᒃ ᐊᒻᒪᓗ ᑲᒪᒋᔭᖃᕐᓱᓂ ᐅᓄᕐᓂᓕᓐᓂᒃ 247-ᓂᒃ (ᐊᒥᓱᒋᐊᓪᓓᑦ ᓴᓇᔭᐅᓛᕐᑐᑦ ᐊᕐᕌᒍᓂ ᙯᔪᓂ). ᐅᓄᕐᓂᖏᑦ ᐃᓪᓗᔪᐊᑦ ᑕᑯᓐᓇᓗᒋᑦ, ᐊᖏᓂᕐᐸᐅᖃᑕᐅᔪᖅ ᐃᓕᓴᕐᓂᓕᕆᓂᕐᓂ ᑯᐯᓕᒫᒥ.

ᐃᑉᐱᒋᔭᖃᕐᓂᖅ ᐸᕐᓇᓯᒪᑦᓯᐊᓂᕐᒧᑦ ᐊᒻᒪᓗ ᖃᐅᔨᒋᐊᕐᓂᒧᑦ ᓴᓇᔭᐅᓂᖏᑦ ᐊᒻᒪᓗ ᓴᓇᒋᐊᓪᓛᔭᐅᓂᕐᒧᒃ ᐱᓇᓱᐊᕐᑕᐅᒍᑎᖏᑦ ᐃᓚᐅᑎᓪᓗᒋᑦ ᓂᐅᕕᕐᓂᐊᓂᖅ ᐊᒻᒪᓗ ᐊᐅᓪᓚᑎᑕᐅᓂᖏᑦ, ᐱᐅᓕᓂᐊᒐᓕᕆᕕᒃ ᐋᕐᕿᒋᐊᕐᑕᐅᓚᐅᔪᖅ, ᐱᓇᓱᐊᕋᑦᓴᒪᕇᑦ (ᓴᓇᒋᐊᓪᓛᓃᑦ ᐊᒻᒪᓗ ᓴᓇᓃᑦ ᓄᑖᓂᒃ ᐃᓪᓗᓂᒃ) ᐊᒻᒪᓗ ᓯᖁᒥᑎᑦᓯᑌᓕᓂᕐᒧᑦ ᓄᐃᑕᒌᕐᑐᓂᒃ ᐱᐅᓕᓂᐊᒐᕐᓂᒃ.

ᓯᑕᒣᑦ ᓄᑖᑦ ᐊᐅᓚᑦᓯᓂᓕᕆᓂᕐᒥᒃ ᐱᓇᓱᒉᑦ ᓄᐃᑕᐅᓚᐅᔪᑦ ᐃᓚᒋᔭᐅᑦᓱᑎᒃ ᐋᕐᕿᒋᐊᕆᓂᕐᒧᑦ. ᐃᓚᖓᑦ ᑖᒃᑯᐊ ᐱᓇᓱᒉᑦ ᑰᑦᔪᐊᒦᓛᕐᑐᖅ. ᐃᓚᒋᐊᕈᑎᐅᑎᓪᓗᒍ, ᒪᕐᕉᒃ ᓄᑖᒃ ᒪᓐᑐᔨᐊᒦᑦᑑᒃ ᐱᓪᓗᑯᒋᐊᓕᓕᕆᔩᒃ ᐱᓇᓱᒑᒃ ᒪᓂᔨᒍᑎᐅᓯᒪᔫᒃ.

ᐱᒋᐅᕐᓴᑎᑦᓯᓂᕐᒧᑦ ᐱᓇᓱᐊᕐᓂᒧᑦ ᐊᖏᖃᑎᒌᒍᑎ ᕚᓂᐁ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᕕᓪᓗ ᐊᖏᕐᑕᐅᓚᐅᔪᖅ. ᑖᓐᓇ ᐱᒍᓐᓇᑎᑦᓯᓚᖓᔪᖅ ᐃᓕᓴᕐᓂᓕᕆᓂᕐᒥ ᐱᐅᓯᐅᓪᓗᑯᖕᖏᑐᒥᒃ ᑭᖕᖒᒪᒋᔭᐅᔪᓂᒃ ᐱᓪᓗᑯᒋᐊᓕᓕᕆᔩᓂᒃ ᐱᒍᓐᓇᕕᖃᕐᑎᓯᓗᓂ ᐱᓇᓱᒐᕐᒧᑦ ᐱᕙᓪᓕᐊᑎᑦᓯᓂᕐᒧᑦ ᐱᓇᓱᐊᕐᓂᒥᒃ ᑐᕌᒐᖃᕐᓗᑎᒃ ᐊᑦᔨᐅᖏᑦᑐᒥᒃ ᐃᑉᐱᒋᔭᖃᕐᓂᒧᑦ ᐃᓱᐊᕐᓭᔨᐅᓂᕐᒧᑦ ᐳᕐᑐᓂᕐᓴᒋᐊᓪᓚᒥ ᓇᓗᓀᕐᑕᐅᒍᑎᑖᕐᓂᒧᑦ.

ᐊᖏᖃᑎᒌᒍᑎ ᕚᓂᐁ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᕕᒃ ᑕᑯᓐᓇᓂᓕᒃ ᐃᓕᓐᓂᐊᑎᑦᓯᓂᕐᒥᒃ ᑕᒪᖏᓐᓂ ᓄᓇᕕᒻᒥ ᐊᒻᒪᓗ ᐃᓕᓐᓂᐊᕕᖓᓂ ᒪᓐᑐᔨᐊᒥ.

ᑖᓐᓇ ᐱᓇᓱᒐᕐᒧᑦ ᐱᕙᓪᓕᐊᑎᑦᓯᓂᕐᒥᒃ ᐱᓇᓱᐊᕐᓂᖅ ᐱᓇᓱᐊᕐᑕᐅᓚᖓᔪᖅ ᐱᒍᑦᔨᒋᐊᓪᓛᕕᒻᒧᑦ ᐊᒻᒪᓗ ᓴᑐᕐᓇᑐᓂᒃ ᐃᓕᓐᓂᐊᕕᖃᕐᓂᒧᑦ ᐱᒍᑦᔨᕕᖓᑕ ᐱᓇᓱᕝᕕᖓᓄᑦ.

ᐃᓕᓐᓂᐊᒐᐅᑉ ᐃᓗᓕᖏᑦ ᐋᕐᕿᓱᕐᑕᐅᔪᕕᓃᑦ ᐊᑐᕐᓱᑎᒃ ᐱᐅᓂᕐᐹᓂᒃ ᐊᑐᕐᑕᐅᒐᔭᕐᑐᓂᒃ ᖃᓄᐃᓕᖓᓂᐅᔪᓄᑦ ᐱᐅᓯᕆᔭᐅᓲᓄᑦ ᐊᒻᒪᓗ ᐱᐅᓯᐅᓪᓗᑯᖕᖏᑐᒥᒃ ᑭᖕᖒᒪᒋᔭᐅᔪᓂᒃ ᐱᓪᓗᑯᒋᐊᓕᓕᕆᔩᑦ ᑲᒪᒋᒋᐊᓕᖏᓐᓂᒃ ᐅᓪᓗ ᑕᒫᑦ. ᓇᓗᓀᕐᑕᐅᒍᑎᑖᕐᓂᒧᑦ ᐱᓇᓱᐊᕐᑕᐅᔪᖅ ᐱᑕᖃᕐᑎᓯᓚᖓᔪᖅ ᑖᒃᑯᓂᖓ ᐱᓇᓱᐊᕈᑎᒋᖃᑦᑕᓚᖓᔭᖏᓐᓂᒃ, ᐊᒻᒪᓗ ᐱᕕᖃᕐᑎᓯᓗᑎᒃ ᐊᑐᕐᓂᓕᓐᓂᒃ ᖃᐅᔨᒪᐅᓯᕐᓂᒃ ᐊᒻᒪᓗ ᐱᒍᓐᓇᐅᑎᓂᒃ. ᑐᕌᒐᖓ ᐱᔭᕇᕈᑎᒃ ᓇᓗᓀᕐᑕᐅᓂᕐᒧᑦ ᐱᓇᓱᐊᕐᓂᒥᒃ, ᑯᑦᓴᓇᕐᑐᒨᕐᑎᓯᑦᑌᓕᔩᑦ ᐊᒻᒪᓗ ᐱᐅᓯᐅᓪᓗᑯᖕᖏᑐᒥᒃ ᑭᖕᖒᒪᒋᔭᐅᔪᓂᒃ ᐱᓪᓗᑯᒋᐊᓕᓕᕆᔩᑦ ᐱᒍᓐᓇᓯᐊᕐᓂᒥᓂᒃ ᐃᑉᐱᒋᔭᖃᖁᓪᓗᒋᑦ ᐱᓇᓱᐊᓕᕈᑎᒃ ᐃᓕᓐᓂᐊᑎᓂᒃ ᐃᓕᑦᓯᓯᕇᑦᑑᒍᑎᓕᓐᓂᒃ ᐊᒻᒪᓗ/ᐅᕝᕙᓘᓐᓃᑦ ᐃᓱᒪᒥᓄᑦ ᐃᓅᖃᑎᖃᕐᓂᒧᑦ ᑭᖕᖒᒪᒋᔭᓕᓐᓂᒃ.

ᖁᓕᓪᓗ ᓯᑕᒪᓪᓗᐃᑦ ᑯᑦᓴᓇᕐᑐᒨᕐᑎᓯᑦᑌᓕᔩᑦ ᐊᒻᒪᓗ ᐱᐅᓯᐅᓪᓗᑯᖕᖏᑐᒥᒃ ᑭᖕᖒᒪᒋᔭᐅᔪᓂᒃ ᐱᓪᓗᑯᒋᐊᓕᓕᕐᔩᑦ ᐊᑦᔨᒌᖕᖏᑐᓂ ᓄᓇᕕᒻᒥ ᓄᓇᓕᓐᓂᒃ ᐃᓚᐅᔪᕕᓃᑦ ᐱᒋᐊᖕᖓᐅᑎᖓᓂ ᐃᓕᓐᓂᐊᑎᑦᓯᒍᑎᓂᒃ ᕚᓐᓂᐁ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᕕᖓᓂ ᔫᓂ 10-ᒥᑦ 14-ᒧᑦ, ᒪᓐᑐᔨᐊᒥ.

ᓄᐃᑕᔪᖅ ᐃᓕᓐᓂᐊᑏᑦ ᓄᕐᙯᓇᖃᑦᑕᖏᓐᓂᖏᑦ ᐱᐅᓯᐅᒥᕙᓪᓕᐊᓂᖓ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᒻᒥ. ᑲᑎᕐᓱᐊᑦ ᕿᒥᕐᕈᔭᐅᓂᖏᑦ ᐊᕐᕌᒍᓂ 3-ᒥᑦ 5-ᒧᑦ ᐱᕕᖃᕐᑎᓯᓚᖓᔪᖅ ᐃᓕᓴᕐᓂᓕᕆᓂᕐᒥᒃ ᓱᓕᑎᑦᓯᓂᖏᓐᓂᒃ ᑖᓐᓇ ᐱᐅᔪᒥᒃ ᐱᕙᓪᓕᐊᓂᖅ ᓄᐃᑕᑎᑦᓯᓂᖓᓂᒃ ᓄᑖᒥᒃ ᐱᐅᓯᕆᔭᐅᓕᕐᑐᒥᒃ ᐅᕝᕙᓘᓐᓃᑦ ᓄᐃᑕᑎᑦᓯᓂᖓᓂᒃ ᒫᓐᓇᐅᔪᑦ ᖃᓄᐃᓕᖓᓂᐅᔪᒥᒃ.

ᔭᓄᐊᕆ 2019-ᒥ, 118 ᐃᓕᓐᓂᐊᑏᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕆᐊᕐᓯᒪᔪᕕᓃᑦ ᐃᓕᓴᕐᓂᓕᕆᓂᕐᒧᑦ ᑮᓇᐅᔭᖃᕐᑎᑕᐅᑦᓱᑎᒃ. ᑖᒃᑯᓇᓂ ᐃᓕᓐᓂᐊᑎᓂ, 113 ᐃᓕᓐᓂᐊᖏᓐᓇᑐᕕᓃᑦ ᐃᓱᐊᓂ ᐅᐱᕐᖓᓴᕐᒥ ᐃᓕᓐᓂᐊᓇᐅᑎᓪᓗᒍ.

ᐅᓄᕐᓂᓖᑦ 18-ᓂᒃ ᐃᓚᐅᔫᒍᑎᓖᑦ ᐱᔭᕇᕈᑎᑖᕐᑐᕕᓃᑦ ᐱᓇᓱᒐᕐᒧᑦ, ᐳᕐᑐᓂᕐᓴᒋᐊᓪᓚᒥ ᐊᒻᒪᓗ ᐃᓕᓐᓂᐊᕕᕐᔪᐊᒥ ᐃᓕᓐᓂᐊᑕᒥᓂᒃ ᑕᒃᑲᓂ ᐊᕐᕌᒍᒥ. ᐱᔭᕇᕈᑎᑖᕐᑐᕕᓃᑦ ᐅᑯᓇᓂ ᐃᓕᓐᓂᐊᒐᕐᓂ: ᑭᒍᑎᓕᕆᔨᓂᒃ ᐃᑲᕐᔪᑎᐅᓂᕐᒧᑦ, ᓄᓇᓕᓐᓂ ᓱᖃᑦᓯᑎᑦᓯᓂᕐᒧᑦ ᓯᕗᓕᕐᑎᐅᓂᕐᒧᑦ, ᐱᕋᔭᑦᓯᒪᔪᓂᒃ ᖃᐅᔨᓴᕐᑎᐅᓂᕐᒥᒃ, ᖃᖓᑦᑕᔫᕐᑎᐅᓂᕐᒥᒃ, ᐋᓐᓂᐊᓯᐅᕐᑎᐅᓂᕐᒥᒃ, ᐃᕐᓂᓱᕐᓰᔨᐅᓂᕐᒧᑦ, ᓴᓇᖕᖑᐊᓯᒪᔪᓕᐅᕐᑎᐅᓂᕐᒧᑦ ᖃᕆᑕᐅᔭᑎᒍᑦ ᐊᒻᒪᓗ ᖃᕆᑕᐅᔭᒥ ᓄᐃᑕᑎᑦᓯᕕᖓᓂᒃ ᐋᕐᕿᓱᐃᔨᐅᓂᕐᒧᑦ ᐊᒻᒪᓗ ᐊᓯᒋᐊᓪᓚᖏᓐᓂᒃ.

ᐃᓚᒋᐊᕈᑎᐅᑎᓪᓗᒍ, 19-ᓂᒃ ᐃᓕᓐᓂᐊᑎᓂᒃ ᓄᓇᕕᒃ ᓯᕗᓂᑦᓴᕘᒃᑯᓂ ᐃᓕᓐᓂᐊᑐᕕᓂᕐᓂᒃ ᔭᓂᐊᕆ 2019-ᒥ, 19 ᐱᔭᕇᕐᑐᕕᓃᑦ ᐃᓕᓐᓂᐊᑕᒥᓂᒃ.

ᐱᒋᐊᖕᖓᓂᖓ ᖃᐅᔨᓴᕈᑎ ᓄᐃᑕᑎᑦᓯᔪᖅ ᓄᓇᕕᒃ ᓯᕗᓂᑦᓴᕘᒃᑯᑦ ᐱᐅᓯᐅᒥᑎᑦᓯᓯᒪᓂᖏᓐᓂᒃ ᐃᓘᓐᓈᒍᑦ ᐃᓕᓐᓂᐊᑏᑦ ᐊᑕᓂᖏᓐᓂᒃ ᐳᕐᑐᓂᕐᓴᒋᐊᓪᓚᓂᒥ ᐃᓕᓐᓂᐊᑎᓂᒃ.

ᓄᑖᖅ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕆᐊᕐᓂᒧᑦ ᑮᓇᐅᔭᖃᕐᑎᑕᐅᓂᕐᒧᑦ ᐱᒐᓱᐊᕐᓂᒧᑦ ᖃᓄᐃᓘᕈᑎᓕᐊᕆᔭᐅᓯᒪᔪᑦ ᐊᑐᓕᕐᑎᑕᐅᓯᒪᓂᖓ ᐊᕐᕌᒍᓂ ᒪᕐᕉᓂ ᐱᐅᔪᒥᒃ ᐊᑦᑐᐃᓂᖃᑐᐃᓐᓇᕆᐊᖃᕐᒥᔪᖅ ᐃᓕᓐᓂᐊᑏᑦ ᐊᑕᓂᖏᓐᓂᒃ. ᓱᓕᑦᓯᐊᑐᖅ, ᐃᓘᓐᓇᑎᒃ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᓂᕐᒥᒃ ᐱᒐᓱᐊᕐᓂᒧᑦ ᖃᓄᐃᓘᕈᑎᓕᐊᕆᔭᐅᒪᔪᑦ ᐃᓕᓐᓂᐊᒐᕐᓄᑦ ᐊᑐᐃᓐᓇᐅᑎᑕᐅᔪᓄᑦ ᓄᓇᕕᐅᑉ ᓯᓚᑖᓂ ᐊᓯᑦᔩᓯᒪᔪᖅ ᐱᕙᓪᓕᐊᓂᖏᓐᓄᑦ ᐱᒍᓐᓇᓯᑎᑦᓯᓱᑎᒃ ᐃᓕᓐᓂᐊᑎᓂᒃ ᐱᒐᓱᐊᕐᑎᓯᓂᕐᒥᒃ ᐃᓘᓐᓇᖏᓐᓂᒃ ᐃᓕᓐᓂᐊᑕᖏᓐᓂᒃ ᐊᒻᒪᓗ ᑮᓇᐅᔭᖃᕐᑎᑕᐅᓂᕐᒧᑦ ᐱᒐᓱᐊᕈᑎᖏᓐᓂᒃ.

ᓯᕗᓪᓕᐹᒥ ᓄᐃᑎᑕᐅᔪᑦ ᖃᓄᐃᓕᕐᐱᑖᒃᑯᑦ ᐃᓗᓯᓕᕆᓂᕐᒧᑦ ᖃᐅᔨᓴᕐᓂᖏᓐᓄᑦ ᑐᓴᕐᑎᓯᒍᑎᐅᓚᐅᔪᖅ ᑭᒡᒐᑐᕐᑎᓄᑦ ᐅᒃᑯᐊᓯᒪᑦᓱᑎᒃ ᑲᑎᖕᖓᓂᖃᕐᓱᑎᒃ. ᑕᑯᓐᓇᓱᒋᑦ ᑭᓇᓕᒫᒃᑯᑦ ᐱᕕᖃᕈᓐᓇᓂᖏᑦ ᖃᐅᔨᓴᕈᑏᑦ ᓄᐃᑎᑕᖏᓐᓄᑦ, ᑭᒡᒐᑐᕐᑏᑦ ᐅᖃᓚᐅᔪᑦ ᐱᒻᒪᕆᐅᓂᖓᓂᒃ ᑲᑎᕐᓱᐊᑦ ᖃᓄᐃᓕᖓᓂᖏᓐᓂᒃ.

ᐃᓕᓴᕐᓂᓕᕆᓂᖅ ᐃᓚᐅᖃᑕᐅᔪᖅ ᖃᓄᐃᓕᕐᐱᑖᒃᑯᓄᑦ ᐅᖃᐅᑦᔩᒋᐊᕐᑏᑦ ᑲᑎᒪᔨᐊᐱᖏᓐᓄᑦ ᐊᒻᒪᓗ ᐃᑦᓯᕙᖃᑕᐅᓲᖑᑦᓱᑎᒃ ᑲᑎᕐᓱᐊᑦ ᑲᒪᒋᔭᐅᒍᑎᖏᓐᓄᑦ ᑲᑎᒪᔨᐊᐱᖏᓐᓄᑦ. ᑌᒣᑦᓱᑎᒃ, ᐃᓚᐅᖃᑦᑕᖏᓐᓇᓚᖓᕗᒍᑦ ᐅᖄᓂᐅᔪᓄᑦ ᖃᓄᐃᓕᕐᐱᑖᒃᑯ ᑲᑎᕐᓱᐊᑦ ᐱᕕᖃᕐᕕᐅᒍᓐᓇᓂᖏᓐᓄᑦ ᐃᓘᓐᓈᒍᑦ ᑭᓇᓕᒫᒃᑯᓄᑦ ᐊᒻᒪᓗ ᖃᐅᔨᓴᕐᑎᖏᓐᓄᑦ.

ᓄᐃᑎᑕᖏᑦ ᖃᐅᔨᓴᐅᑏᑦ ᑲᑎᕐᓱᐊᖑᖏᓐᓇᑐᑦ ᐊᒻᒪᓗ ᕿᒥᕐᕈᔭᐅᖏᓐᓇᓱᑎᒃ. ᒫᓐᓇᐅᔪᖅ ᐅᓪᓗᖓ ᓱᕐᖁᐃᑕᐅᕋᑕᖕᖏᑐᖅ ᐃᓄᓕᒫᓄᑦ ᐊᑐᐃᓐᓇᕈᕐᑕᐅᓂᕆᓚᖓᔭᖓ ᖃᐅᔨᓴᕐᓂᐅᑉ ᑲᑎᕐᓱᑕᐅᓂᖏᓐᓄᑦ.

ᐃᓕᓐᓂᐊᓇᐅᑉ ᐊᕐᕌᒍᕆᓚᖓᔭᖓᓄᑦ, ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᑦ ᐊᒻᒪᓗ ᐱᓇᓱᒐᕐᒧᑦ ᐱᒋᐅᕐᓴᑎᑕᐅᓂᕐᒧᑦ ᐱᓇᓱᕝᕕᒃ ᐊᑐᐃᓐᓇᐅᑎᑦᓯᓛᕐᑐᖅ ᓄᑖᓂᒃ ᐃᓕᓐᓂᐊᒐᕐᓂᒃ ᐃᓚᒋᔭᐅᑎᓪᓗᒋᑦ ᐃᓘᓐᓈᒍᑦ ᐃᓕᓐᓂᐊᓂᓕᕆᓂᕐᒧᑦ, ᐱᓇᓱᒐᕐᒧᑦ ᐱᒋᐅᕐᓴᑎᑦᓯᓂᕐᒧᑦ ᐊᒻᒪᓗ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᓚᐅᕋᑎᒃ ᐱᒍᑦᔨᒍᑎᓂᒃ. ᐃᓚᒋᐊᕈᑎᐅᑎᓪᓗᒍ, ᐱᒍᑦᔨᒍᑎᖏᑦᑕ ᐊᑖᒍᑦ ᑮᓇᐅᔭᓕᐅᕋᓱᐊᕐᑎᐅᓂᕐᒧᑦ, ᐱᓇᓱᕝᕕᒃ ᐋᕐᕿᓱᐃᓚᖓᒻᒥᔪᖅ ᐱᒍᑦᔨᒍᑎᓂᒃ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᒻᒥ ᓇᓗᓀᕐᑕᐅᒍᑎᓂᒃ ᐃᓕᓐᓂᐊᑎᑦᓯᓂᕐᒥᒃ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᓐᓂᒃ ᐱᓇᓱᐊᖃᑎᖃᕐᓗᑎᒃ ᑯᐯᒻᒥ.

ᐱᓇᓱᒐᕐᒧᑦ ᐱᒋᐅᕐᓴᑎᑦᓯᓂᕐᒧᑦ ᐊᑐᐃᓐᓇᐅᑎᑕᐅᓚᖓᔪᖅ ᐊᕐᕌᒍᓚᖓᔪᒥ ᐅᑯᐊᖑᓚᖓᕗᑦ: ᓂᐅᕕᕐᑎᓂᒃ ᐃᑲᔪᕐᑎᐅᓂᕐᒧᑦ, ᑕᑯᒥᓇᕐᑐᓕᐅᕐᑎᐅᓂᕐᒧᑦ, ᑮᓇᐅᓕᐅᕋᓱᐊᕐᑎᐅᓂᕐᒧᑦ, ᖃᕆᑕᐅᔭᓕᕆᓂᕐᒧᑦ ᐃᑲᔪᕐᑎᐅᓂᕐᒧᑦ, ᒥᖑᐊᕆᔨᐅᓂᕐᒧᑦ ᐊᒻᒪᓗ ᐊᑭᓐᓇᓂᒃ ᐃᓗᕐᓭᔦᔨᐅᓂᕐᒧᑦ (ᓇᓗᓀᕐᑕᐅᒍᑎᑖᕐᓂᒧᑦ ᐱᓇᓱᒐᕐᒧᑦ ᐱᒋᐅᕐᓴᓂᕐᒧᑦ), ᑭᑭᐊᑦᓴᔭᓂᒃ ᓂᐳᓯᕐᑐᐃᔨᐅᓂᕐᒧᑦ (ᓇᓗᓀᕐᑕᐅᒍᑎᑖᕐᓂᒧᑦ ᐱᓇᓱᒐᕐᒧᑦ ᐱᒋᐅᕐᓴᓂᕐᒧᑦ). ᓄᓇᒃᑰᔫᕐᓚᓂᒃ ᐊᖁᑦᑎᐅᒋᐅᕐᓴᓂᕐᒧᑦ ᐱᒋᐅᕐᓴᑎᑕᐅᓂᖅ ᐊᑐᐃᓐᓇᐅᑎᑕᐅᓛᕐᑐᑦ ᐊᕐᕌᒍᓚᖓᔪᒥ.

2018-2019-ᒥ, ᐅᓄᕐᓂᓖᑦ 22 ᓄᓇᕕᒻᒥᐅᑦ ᐱᔭᕇᕈᑎᑖᓚᐅᕐᑐᑦ ᐱᓇᓱᒐᕐᒧᑦ ᐱᒋᐅᕐᓴᑎᑕᐅᓂᕐᒧᑦ ᐃᓕᓐᓂᐊᑎᑕ ᐃᓕᓴᕐᓂᓕᕆᓂᕐᒧᑦ.

ᐃᓘᓐᓈᒍᑦ ᐃᓕᓐᓂᐊᓂᓕᕆᓂᕐᒧᑦ, ᐅᑯᐊ ᓄᑖᑦ ᐃᓕᓐᓂᐊᒉᑦ ᐊᑐᐃᓐᓇᐅᑎᑕᐅᓚᖓᔪᑦ: ᐃᓅᖃᑎᒌᓕᕐᑎᓯᓂᕐᒧᑦ, ᐃᓅᖃᑎᒌᓐᓂᒧᑦ-ᐱᓇᓱᒐᕐᒧᑦ ᐱᒋᐅᕐᓴᑎᑕᐅᓂᖅ, ᐊᑐᐃᓐᓇᕈᕐᑎᓂᖅ ᐱᓇᓱᖓᕐᒧᑦ ᐱᒋᐅᕐᓴᑎᑦᓯᓂᖅ.

2018-2019-ᒥ, ᐅᓄᕐᓂᓖᑦ 185 ᐃᓕᓐᓂᐊᑏᑦ ᐊᑎᓕᐅᕐᓯᒪᓚᐅᕐᑐᑦ ᐃᓘᓐᓈᒍᑦ ᐃᓕᓐᓂᐊᓂᕐᒥᒃ. ᑖᒃᑯᓇᓂ, 42 ᐃᓕᓐᓂᐊᑐᕕᓃᑦ ᖃᓂᖕᖏᑐᒥ ᐃᓕᓐᓂᐊᓂᕐᒥᒃ. ᑭᓯᑕᐅᒪᒍᑏᑦ ᐃᓘᓐᓈᒍᑦ ᐃᓕᓐᓂᐊᓂᕐᒥᒃ ᐱᔭᕇᕈᑎᑖᕐᑐᕕᓃᑦ ᐊᑐᐃᓐᓇᐅᓛᕐᑐᑦ ᓯᐊᕈᒋᐊᖅ ᑕᒃᑲᓂ ᐊᕐᕌᒍᕐᒥ.

ᐱᒍᑦᔨᒍᑎᒥᑕ ᐊᑖᒍᑦ ᑮᓇᐅᔭᓕᐅᕋᓱᐊᕐᓂᒧᑦ, ᐱᓇᓱᕝᕕᒃ ᐸᕐᓀᑐᖅ ᐊᑐᐃᓐᓇᐅᑎᑦᓯᓂᕐᒥᒃ ᑕᓪᓕᒪᓂᒃ ᐳᕐᑐᓂᕐᓴᒋᐊᓪᓚᒥ ᐳᕐᑐᓂᓕᓐᓂᒃ ᓇᓗᓀᕐᑕᐅᒍᑎᓂᒃ (ᓇᓗᓀᕐᑕᐅᒍᑎᑖᕐᓂᒧᑦ ᐱᓇᓱᒐᕐᒧᑦ ᐱᒋᐅᕐᓴᓂᕐᒧᑦ) ᓄᓇᕕᒻᒥ: ᓂᐅᕕᕐᑎᓂᒃ ᐃᑲᔪᕐᓯᒍᑎᓂᒃ, ᒥᕐᖁᓕᕆᒋᐅᕐᓴᓂᕐᒥᒃ, ᐯᕆᑦᓯᔨᐅᓂᕐᒥᒃ, ᐅᑭᐅᕐᑕᑐᒥ ᒪᙯᑦᑎᓯᔨᐅᓂᕐᒥᒃ, ᑲᒪᔨᐅᓂᕐᒥᒃ ᐯᕆᑦᓯᕕᓐᓂᒃ. ᐃᓚᒋᐊᕈᑎᐅᑎᓪᓗᒍ, ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᒻᒥ ᐱᔭᕇᕈᑎᑖᕈᑎ ᓴᓇᖕᖑᐊᑎᐅᓂᕐᒧᑦ, ᐊᓪᓚᓯᒪᔪᓕᕆᓂᕐᒧᑦ ᐊᒻᒪᓗ ᐅᖄᖃᑎᒌᒍᑎᓄᑦ ᒫᓐᓇᐅᔪᖅ ᐋᕐᕿᓱᕐᑕᐅᔪᐃᑦ.

2018-2019-ᖑᑎᓪᓗᒍ, ᐅᓄᕐᓂᓖᑦ 33-ᓂᒃ ᓄᓇᕕᒻᒥᐅᑦ ᐱᔭᕇᕈᑎᑖᓚᐅᔪᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᒻᒥ ᐋᕐᕿᓱᕐᑕᐅᓯᒪᔪᓂ ᐃᓕᓴᕐᓂᓕᕆᓂᕐᒧᑦ ᐊᒻᒪᓗ ᐱᒍᑦᔨᒍᑎᐅᑦᓱᑎᒃ

ᐳᕐᑐᓂᕐᓴᒋᐊᓪᓚᒧᑦ ᐃᓕᓐᓂᐊᕆᐊᓚᐅᕋᑎᒃ ᐃᓕᓐᓂᐊᒉᑦ ᐊᑐᐃᓐᓇᐅᑎᑕᐅᔪᑦ ᐃᓄᒻᒪᕇᑦ ᐃᓕᓐᓂᐊᕕᖏᓐᓂ ᑲᖏᕐᓱᔪᐊᒥ ᑕᑯᓐᓇᓂᖃᓚᖓᔪᑦ ᓴᓇᑦᑐᓴᐅᑎᓕᕆᓂᕐᒥᒃ ᐊᒻᒪᓗ ᓱᑯᐃᔦᓂᕐᒥᒃ ᐱᑕᖃᕆᐊᓕᓐᓂᒃ ᐱᓇᓱᒐᕐᒨᓕᖓᔪᓂᒃ ᐳᕐᑐᓂᕐᓴᒋᐊᓪᓚᓂ ᐃᓕᓐᓂᐊᒐᕐᓂ. ᑖᒃᑯᐊ ᐃᓕᓐᓂᐊᒉᑦ ᒫᓐᓇ ᐊᑐᐃᓐᓇᐅᑎᑕᐅᖕᖏᑐᑦ ᐳᕐᑐᓂᕐᓴᒥ ᐃᓕᓐᓂᐊᑎᓄᑦ ᐅᓪᓗᓕᒫᕐᑐᒥ ᐃᓕᓐᓂᐊᕕᓐᓂ.

ᐃᓕᓐᓂᐊᓇᐅᑉ ᐊᕐᕌᒍᕆᓚᖓᔭᖓᓂ ᙯᔪᒥ, ᐃᓕᓐᓂᐊᑎᑖᕐᓂᖅ ᐊᒻᒪᓗ ᐊᑕᑎᑦᓯᓂᖅ ᐱᒻᒪᕆᐅᑎᑕᐅᖏᓐᓇᓚᖓᔪᖅ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᓐᓄᑦ ᐊᒻᒪᓗ ᐱᓇᓱᒐᕐᒧᑦ ᐱᒋᐅᕐᓴᑎᑕᐅᓂᕐᒧᑦ ᐱᓇᓱᕝᕕᖓᓄᑦ.

ᑲᑎᕕᒃ ᐃᓕᓴᕐᓂᓕᕆᓂᖅ ᑎᓕᔨᓯᒪᔪᖅ ᑲᕈᓕᓐ ᓕᒣᒥᒃ ᐃᓕᓐᓂᐊᑎᓄᑦ ᐅᓐᓂᓗᕝᕕᓕᐊᕆᑦᓱᒍ. ᑎᓕᔭᐅᒪᐅᑎᖓ ᐃᑲᔪᕐᓂᒥᒃ ᐃᓕᓐᓂᐊᑎᓂᒃ ᐊᒻᒪᓗ ᐊᖓᔪᕐᖄᖏᓐᓂᒃ ᐋᕐᕿᓱᐃᑎᑦᓯᓂᕐᒥᒃ ᖃᓄᐃᓕᖓᐅᑎᐅᔪᓂᒃ ᐃᓱᐊᕆᖕᖏᑕᖏᓐᓂᒃ ᐱᒍᑦᔨᒍᑎᓂᒃ ᐊᑑᑎᖃᑦᑕᑕᒥᓂᒃ ᐃᓕᓴᕐᓂᓕᕆᓂᕐᒥ ᐅᕝᕙᓘᓐᓃᑦ ᐊᑐᕐᑕᐅᑎᑕᐅᓂᖏᓐᓂᒃ ᐊᑑᑎᖁᔨᒍᑏᑦ, ᐊᑐᕐᑕᐅᑎᑦᓯᒍᑏᑦ ᐅᕝᕙᓘᓐᓃᑦ ᐱᓇᓱᐊᕈᑎᐅᖃᑦᑕᑐᑦ.

ᐱᒍᑦᔨᒍᑏᑦ ᐱᑕᖃᕐᑎᑕᐅᔪᑦ ᐃᓕᓐᓂᐊᑏᑦ ᐅᓐᓂᓗᕝᕕᖓᓄᑦ ᑐᓴᕐᑎᓯᒍᑎᐅᓲᖑᖕᖏᑐᑦ ᑭᓇᑐᐃᓐᓇᑯᓐᓄᑦ, ᐃᓕᓐᓂᐊᑏᑦ ᐅᓐᓂᓗᕝᕕᖓ ᑭᒡᒐᑐᖕᖏᑐᖅ ᐃᓕᓴᕐᓂᓕᕆᓂᕐᒥᒃ, ᐃᓕᓐᓂᐊᑎᓂᓪᓘᓃᑦ ᐊᒻᒪᓗ ᐊᖓᔪᕐᖄᖏᓐᓂᒃ. ᐱᖓᑦᓯᐅᑎᑦᓱᓂ ᐃᒻᒥᒎᕐᑑᓱᓂ ᐱᓇᓱᐊᓲᖅ.

ᕕᕈᐊᕆᒥ ᐊᒻᒪᓗ ᒫᑦᔨᒥ, ᐃᓕᓐᓂᐊᑏᑦ ᐅᓐᓂᓗᕝᕕᖓ ᐅᓂᒃᑲᐅᓯᖃᓚᐅᔪᖅ ᐱᓇᓱᒐᕐᒥᓂᒃ ᐊᒻᒪᓗ ᑎᓕᔭᐅᒪᐅᑎᒥᓂᒃ ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖏᓐᓄᑦ, ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖏᑦᑕ ᑐᖓᓕᖏᓐᓄᑦ ᐊᒻᒪᓗ ᑲᒪᔨᒻᒪᕆᓐᓄᑦ.

ᐃᓕᓴᕐᓂᓕᕆᓂᐅᑉ ᖃᕆᑕᐅᔭᑎᒍᑦ ᓄᐃᑕᑎᑦᓯᕕᖓᓂ, ᐊᖓᔪᕐᖄᕆᔭᐅᔪᑦ ᐊᒻᒪᓗ ᐃᓕᓐᓂᐊᑏᑦ ᖃᐅᔨᒋᐊᑦᓯᐊᕈᓐᓇᑐᑦ ᑐᓴᐅᒪᔭᐅᒋᐊᓕᓐᓂᒃ ᖃᓄᐃᓘᕐᓗᑎᒃ ᐅᓐᓂᓗᒍᑎᓕᐅᕈᓐᓇᓂᕐᒥᓂᒃ. ᐅᕗᖕᖓᓗᑎᒃ www.kativik.qc.ca. ᓇᕐᓂᓗᒍ ᐃᓕᓴᕐᓂᓕᕆᓂᖅ. ᑕᐃᒪ ᓇᕐᓂᓗᒍ ᐃᓕᓐᓂᐊᑏᑦ ᐅᓐᓂᓗᕝᕕᖓ.

ᐃᓕᓐᓂᐊᑏᑦ ᐅᓐᓂᓗᕝᕕᖓ ᖃᐅᔨᒋᐊᕐᕕᐅᒍᒪᑐᐊᕈᓂ ᐊᓪᓚᓯᒪᐅᑎᖏᑦ ᓄᐃᑕᒻᒥᔪᐃᑦ ᐃᓕᓴᕐᓂᓕᕆᓂᐅᑉ ᖃᕆᑕᐅᔭᑎᒍᑦ ᓄᐃᑕᑎᑦᓯᕕᖓᓂ. ᐅᑯᐊᖑᕗᑦ: 514 716-6468 | info@omega-ombs.ca. ᐃᓄᑦᑎᑐᑦ ᑭᓯᐊᓂ ᐅᖄᓱᖑᒍᕕᑦ ᑐᓵᔨᒧᑦ ᐱᒍᑦᔭᐅᒍᒪᒍᓐᓇᑐᑎᑦ, ᐱᑕᖃᕐᑎᑕᐅᒐᔭᕐᑐᖅ ᑭᓇᑐᐃᓐᓇᑯᓐᓄᓗ ᑐᓴᐅᒪᑎᑦᓯᒋᐊᖃᕋᓂ. ᐅᓐᓂᓗᕝᕕ ᐱᓇᓱᐊᕈᑦᔨᓂᖃᓲᖑᖕᖏᑐᖅ ᐹᕐᓯᖓᐅᑎᒍᑎᖏᓐᓂᒃ ᐱᓇᓱᑏᑦ.

ᐱᔭᕇᕈᑎᑖᕐᑐᑦ ᐅᓄᕐᓂᖏᑦ ᐃᓕᓐᓂᐊᑏᑦ ᐅᓪᓗᓕᒫᕐᑐᒥ ᐃᓕᓐᓂᐊᕕᓐᓂ ᓱᕐᕋᓯᒪᖕᖏᑐᖅ ᑌᒫᑦᓭᓇᓕᔪᖅ ᐅᓄᕐᓂᖏᑦᑕ ᐊᑦᔨᐸᓱᒋᑦᓱᓂᐅᒃ ᑯᔩᒃᑯᑦ ᐃᓕᓴᕐᓂᓕᕆᓂᖓᑕ.

ᑲᑎᕐᓱᐊᑦ ᐊᓪᓚᓯᒪᔪᑦ ᑐᓴᕐᑎᓯᒍᑎᐅᓚᐅᔪᑦ ᑕᑯᓐᓇᓂᓕᕕᓃᑦ ᐃᓕᓐᓂᐊᑎᓂᒃ ᐃᓕᓐᓂᐊᑐᕕᓂᕐᓂᒃ ᐳᕐᑐᓂᕐᓴᒥ 1-ᒥ ᐊᑯᓐᓂᖏᓐᓂᒃ 2006 ᐊᒻᒪᓗ 2010.

ᑖᒃᑯᓇᓂ ᐊᕐᕌᒍᓂ, ᐃᒻᒥᒎᕐᑐᒥᒃ ᐊᕐᖁᓯᐅᕐᓂᖅ ᐃᓕᓐᓂᐊᓂᕐᒧᑦ ᓇᓗᓀᕐᑕᐅᒍᑎᖃᕐᓂᖏᑦᑐᖅ ᑐᕐᖃᑕᕐᕕᖓᓄᑦ ᐃᓕᓐᓂᐊᓂᓕᕆᓂᕐᒧᑦ, ᑌᒣᒻᒪᑦ ᐃᓕᓐᓂᐊᑏᑦ ᐱᔭᕇᕐᑐᕕᓃᑦ ᑖᑦᓱᒥᖓ ᐃᓕᓐᓂᐊᑕᒥᓂᒃ ᐃᓕᑕᕆᔭᐅᓂᕐᑖᓂᖕᖏᑐᑦ ᑐᕐᖃᑕᕐᕕᒥᑦ. 2017-2018-ᖑᓕᕐᑎᓗᒍ ᐃᓕᓐᓂᐊᓇᐅᑉ ᐊᕐᕌᒍᖓ, ᐃᒻᒥᒎᕐᑐᒥᒃ ᐊᕐᖁᓯᐅᕐᓂᒧᑦ ᐃᓕᓐᓂᐊᓂᖅ ᓯᖏᑕᐅᓚᐅᔪᖅ ᓇᓗᓀᕐᑕᐅᓂᕐᒧᑦ ᐱᓇᓱᐊᓚᐅᕋᓂ ᐃᓕᓐᓂᐊᒐᕐᒧᑦ.

ᐊᑯᓐᓂᖏᓐᓂ 2012 ᐊᒻᒪᓗ 2016, ᐃᓕᓐᓂᐊᑏᑦ ᐱᔭᕇᕈᑎᑖᕐᑐᑦ ᐅᓄᕐᓂᖏᑦ ᐅᓪᓗᓕᒫᕐᑐᒥ ᐃᓕᓐᓂᐊᕕᓐᓂ ᐊᑦᔨᒌᖕᖏᑑᔪᕕᓃᑦ ᐊᑯᓐᓂᖏᓐᓂ 22.5% ᐊᒻᒪᓗ 26.4%. ᐱᐅᓯᕆᔭᐅᓕᕐᑐᑦ ᓄᐃᑕᑎᑕᐅᖕᖏᑐᑦ ᓱᕐᕋᓯᒪᒐᑎᒃ ᐊᒻᒪᓗ ᓱᒃᑫᑑᑦᓱᑎᒃ ᐊᖏᓕᐊᒥᓂᖏᑦ, ᑭᓯᐊᓂ ᐊᓯᑦᔨᑲᑦᑕᓂᖏᑦ ᐃᑭᓪᓕᒋᐊᖃᑦᑕᓱᑎᒃ ᐊᒥᓱᖕᖑᕆᐊᖃᑦᑕᓱᑎᓪᓗ ᑖᒃᑯᐊ ᐅᓄᕐᓂᖏᑦ. ᑖᒃᑯᐊ ᐅᓄᕐᓂᖏᑦ ᐃᑭᓐᓂᓴᐅᒫᐱᑦᑐᑦ ᑯᔩᒃᑯᑦ ᐃᓕᓴᕐᓂᓕᕆᓂᖓᑕ ᐱᔭᕇᕈᑎᑖᖃᑦᑕᓂᖏᓐᓂᒃ ᐊᒻᒪᓗ ᐱᒍᓐᓇᓯᖃᑦᑕᓂᖏᑦᑕ ᐅᓄᕐᓂᖏᓐᓂᒃ.

ᐃᓕᑕᕆᔭᐅᒍᑎᑖᖃᑦᑕᓂᕐᒧᑦ ᐱᓇᓱᐊᓚᐅᕋᓂ ᐃᓕᓐᓂᐊᒉᑦ ᓄᐃᑎᑕᐅᔪᕕᓂᐅᑉᐸᑕ ᑖᒃᑯᓇᓂ ᐊᕐᕌᒍᓂ, ᐃᓕᓴᕐᓂᓕᕆᓂᐅᑉ ᐱᔭᕇᕈᑎᑖᕐᓂᖏᑦᑕ ᐅᓄᕐᓂᖏᑦ ᐊᓯᑦᔨᕋᔭᕐᑐᕕᓃᑦ ᐊᑯᓐᓂᖏᓐᓂ 24.6% ᐊᒻᒪᓗ 33.2%, ᐅᓄᕐᓂᖏᑦ ᐊᑦᔨᒐᓚᕆᒐᔭᕐᑕᖏᑦ ᑯᔩᒃᑯᑦ ᐃᓕᓴᕐᓂᓕᕆᓂᖓᑕ ᐱᔭᕇᕈᑎᑖᖃᑦᑕᓂᖏᑦᑕ ᐊᒻᒪᓗ ᐱᒍᓐᓇᓯᖃᑦᑕᓂᖏᑦᑕ ᐅᓄᕐᓂᖏᑦ.

ᑕᒃᑲᓂ ᐊᕐᕌᒍᒥ, ᐃᓕᓴᕐᓂᓕᕆᓂᖅ ᐊᑐᓯᓚᐅᕐᒥᔪᖅ ᓄᑖᒥᒃ ᐃᓕᓐᓂᐊᑎᓂᒃ ᖃᐅᔨᒪᒍᑎᒥᒃ ᑲᒪᒍᑎᐅᑦᓱᓂ, DASH, ᐊᑐᕐᑕᐅᓕᕐᑐᖅ ᒫᓐᓇ ᐅᕕᒐᕐᑐᓂ ᐃᓕᓐᓂᐊᕕᓕᒫᖏᓐᓂ. DASH ᐱᕕᖃᕐᑎᓯᓚᖓᔪᖅ ᐱᐅᓂᕐᓴᒥᒃ ᓄᐊᑦᓯᑎᑦᓯᓗᓂ ᐊᒻᒪᓗ ᑲᒪᒋᔭᖃᕐᑎᓯᓗᓂ ᐃᓕᓐᓂᐊᑎᓂᒃ ᐊᓪᓚᓯᒪᔪᓂᒃ ᑲᑎᕐᓱᐃᓂᕐᒥᒃ, ᑌᒪ ᐊᑐᕐᑕᐅᓯᒍᓐᓇᒥᔪᖅ ᑐᓴᐅᒪᑎᑦᓯᓯᐊᕐᓗᓂ ᑐᑭᑖᕆᓂᕐᒥᒃ ᐃᓘᓐᓇᖏᓐᓂ ᐳᕐᑐᓂᕐᓂ. ᐃᓚᒋᐊᕈᑎᐅᑎᓪᓗᒍ, DASH ᐃᑲᔪᕐᓯᓚᖓᔪᖅ ᐃᓕᓴᕐᓂᓕᕆᓂᕐᒥᒃ ᐃᑉᐱᒋᔭᖃᑦᓯᐊᓂᕐᒥᒃ ᐃᓚᖏᓐᓂᒃ ᑐᕌᒐᐅᔪᓂᒃ ᐊᓪᓚᑕᐅᒪᔪᓂᒃ ᐋᕐᕿᓱᕐᓯᒪᓂᕐᒧᑦ ᐸᕐᓇᓯᒪᐅᑎᓂᒃ, ᐱᓗᐊᕐᑐᒥ ᐃᓕᓐᓂᐊᑏᑦ ᑲᔪᓯᑦᓯᐊᓂᖏᓐᓂᒃ (ᐆᑦᑐᑎᒋᓗᒍ, ᐱᐅᓂᕐᓴᒥᒃ ᐊᓪᓚᓯᒪᔪᓂᒃ ᑲᑎᕐᓱᐊᓂᒃ ᐃᓕᓐᓂᐊᕖᑦ ᐅᒃᑯᐊᓯᒪᓂᖏᓐᓂᒃ ᐊᒻᒪᓗ ᐃᓕᓐᓂᐊᑏᑦ ᐃᓕᓐᓂᐊᕆᐊᖃᑦᑕᖏᓐᓂᖏᓐᓂᒃ).

ᐱᒻᒪᕆᐅᓂᕐᐹᖏ ᑲᑎᖕᖓᓂᐅᓚᐅᔪᒥ ᑲᒥᓯᓇᓄᑦ