ᐃᓕᓐᓂᐊᓂᕐᒥᒃ ᑭᒡᒐᑐᕐᑏᑦ

ᑲᒥᓯᓀᑦ ᑲᑎᓲᑦ ᐃᓄᑦᑎᒍᑦ ᓯᑕᒪᕕᑦᓱᑎ ᐊᕐᕌᒍᑕᒫᑦ, ᐅᑯᓇᓂ ᑕᕐᕿᓂ ᐅᑦᑑᐱᕆ, ᑎᓯᐱᕆ, ᒫᑦᓯ ᐊᒻᒪᓗ ᔫᓂ. ᐃᓚᖓᒍᑦ ᑲᑎᓪᓚᕆᒋᐊᖃᓕᕋᒥ ᑲᑎᓲᒍᒻᒥᓱᑎᒃ, ᐅᖄᓚᐅᑎᒃᑯᑦ ᐅᕝᕙᓘᓐᓃᑦ ᐃᓄᑦᑎᒍᑦ.

ᐊᑖᓂ ᑕᑯᓚᖓᔭᑎᑦ ᓀᓪᓕᑎᕐᓯᒪᔪᑦ ᐳᐃᒍᕇᒃᑯᑏᑦ ᐅᖄᔭᐅᓚᐅᔪᑦ ᖃᒻᒥᐅᓂᕐᐹᒥ ᑲᑎᖕᖓᓂᐅᓚᐅᔪᒥ ᑲᒥᓯᓇᓄᑦ. ᐱᒻᒪᕆᐅᓂᕐᐹᖏᑦ ᑲᑎᒪᓂᕐᒥ ᐃᓇᖐᑦᔭᖏᑦᑐ ᑲᑎᒪᐅᑎᕕᓂᖏᓐᓂ ᑲᒥᓯᓀᑦ.

ᐱᒻᒪᕆᐅᓂᕐᐹᖏᑦ ᖃᒻᒥᐅᓂᕐᐹ ᑲᑎᖕᖓᓂᕕᓂᖏᓐᓂ ᑲᒥᓯᓀᑦ

ᐆᑦᑑᐱᕆ 22-ᒥᑦ24-ᒧᑦ ᐃᓕᓴᕐᕕᓂᑦ ᑭᒡᒐᑐᕐᑏᑦ ᑲᑎᖕᖓᓚᐅᔪᐃᑦ ᐃᓄᑦᔪᐊᓂᑦ. ᑕᑯᓚᖓᕗᑎᑦ ᑕᑲᓇᓃᑦᑐᓂᑦ ᑐᓴᕐᑕᐅᓗᑐᒋᐊᓕᓐᓂᑦ ᐅᖄᔭᐅᔪᕕᓂᕐᓂᑦ.

ᑭᒡᒐᑐᕐᑏᑦ ᓀᓪᓕᑎᕐᓯᒪᔪᓂᑦ ᑐᓴᕐᑎᑕᐅᔪᑦ ᐃᓕᓴᒐᑦᓵᓂᒃ ᐱᖕᖑᑎᑕᐅᔫᓐᓂᒃ ᓇᓪᓕᑳᒐᑦᓵᓂᒃ ᒪᓂᔭᐅᔫᓐᓂᒃ ᐃᓕᓴᕐᕕᔪᐊᓐᓂᒃ ᒪᕐᕉᓂᑦ ᑕᒐᑕᒐ ᐃᓚᒋᔭᐅᔫᓐᓂᒃ ᐊᑐᐃᓐᓇᐅᑎᑦᓯᓂᕐᒥᑦ ᐃᓄᐃᑦ ᐃᓕᓭᔩᑦ ᐃᓕᓴᓲᖏᓐᓂᑦ ᓄᓇᕕᒻᒥᑦ(ᒪᑭᐊᓪ ᐊᒻᒪᓗ UQAT). ᐃᑲᔪᕐᑏᑦ ᑲᔪᓯᓚᖓᔪᑦ ᓱᕐᑯᐃᑎᑦᓯᓗᑎᒃ ᑖᒃᑯᓂᖓ ᐃᓕᓴᒐᑦᓴᓂᑦ ᑭᖕᖒᒪᒋᔭᖏᑎᒍᑦ ᐃᓄᐃᑦ ᐃᓕᓭᔩᑦ. 

ᐃᓕᓴᕐᓂᓕᕆᓂᖅ ᑕᒐᑕᒐ ᐱᓇᓱᖃᑎᖃᕐᑐᖅ ᒪᕐᕉᓂᒃ ᐃᓕᓴᕐᕕᔪᐊᓐᓂᒃ, ᐊᑐᐃᓐᓇᐅᑎᑦᓯᓂᕐᒥᑦ ᐃᓄᐃᑦ ᐃᓕᓭᔩᑦ ᐃᓕᓴᕐᓂᕆᓲᖏᓐᓂᑦ ᓄᓇᕕᒻᒥᑦ: ᒪᑭᐊᓪ ᐃᓕᓴᕐᕕᔪᐊᖅ ᐊᒻᒪᓗ ᐃᓕᓴᕐᕕᔪᐊᖅ ᑯᐯᒃᑯᓂᑦ ᐋᐱᑎᐱ-ᑎᒥᔅᑯᒣ-ᑯᓂᑦ (UQAT).

ᒪᑭᐊᓪ ᐃᓕᓴᕐᕕᔪᐊᖅ ᓴᕐᕿᑎᑦᓯᓯᒪᕗᖅ ᐊᒥᓱᓂᑦ ᐆᑦᑑᑎᓂᑦ ᐋᕐᖀᒋᐊᒍᒪᑦᓱᑎᒃ ᐃᓕᓴᕐᑕᐅᓲᓂᑦ. ᐱᔭᑦᓴᖓ ᐊᑑᑎᖁᔨᑦᓱᑎᒃ ᐃᓕᓭᔨᓂᑦ ᐃᓄᓐᓂᑦ ᐱᔭᕇᑲᐱᒍᓐᓇᖁᓗᒋᑦ. ᑕᒪᓐᓇ ᐱᔭᑦᓴᖓ ᑐᓂᕐᕈᑎᒋᔭᐅᔪᕕᓂᖅ ᒪᑭᐊᓪ ᐃᓕᓴᕐᕕᔪᐊᒧᑦ 1978-ᒥᓂᑦ. ᔪᓂ 2019-ᒍᑎᓪᓗᒍ, ᐱᔭᑦᓴᖅ ᓄᐃᑦᓯᒍᑎᐅᓐᓂᖁᖅ 189-ᓂᑦ ᐃᓕᑕᕆᔭᐅᓂᕐᑖᑐᓂᑦ (ᐊᑕᐅᓯᖅ ᐃᓕᑕᕆᔭᐅᓂᕐᑖᑐᖅ ᓄᓇᓕᒻᒥᑦ ᐊᕐᕌᒎᒃ ᒪᕐᕉᒃ ᓇᑉᐸᒥᓪᓗ). ᑖᓐᓇ ᐱᔭᑦᓴᖅ ᐅᐸᑦᑕᐅᒍᓐᓇᕕᖃᕐᑐᖅ ᐃᓕᓭᔨᓄᑦ ᓄᓇᓕᓐᓂᑦ 12-ᓄᑦ 14-ᒍᑎᓪᓗᒋᑦ ᓄᓇᕕᒻᒥᑦ ᓄᓇᓖᑦ.

UQAT-ᑯᑦ ᓴᕐᕿᑎᑦᓯᓂᖃᕐᑐᑦ ᐱᔭᑦᓴᓂᑦ ᑕᒐᑕᒐ ᐊᑐᐃᓐᓇᐅᑎᑕᒥᓂᑦ. ᑲᔪᓰᓐᓇᑐᒥᑦ ᐱᕙᓪᓕᐊᓂᕐᑎᒍᑦ ᐃᓚᖃᕐᐳᑦ ᑐᑦᓯᕋᐅᑎᓕᐅᕐᓯᒪᓂᕐᒥᑦ ᒥᓂᔅᑕᖓᓄᑦ ᐃᓕᓴᕐᓂᓕᕆᓂᕐᒧᑦ ᐊᐃᕐᑕᐅᖁᔨᑦᓱᑎᒃ ᐳᕐᑐᓂᕐᓴᒥᑦ ᐃᓕᑕᕆᔭᐅᒍᑎᒥᑦ ᐃᓕᓴᕐᓂᓕᕆᓂᕐᒧᑦ, ᐱᑖᕆᔭᐅᒐᔭᕐᑎᓗᒍ ᑲᑎᕐᓯᐊᕕᓂᑦᑎᒍᑦ ᖃᕝᕙᒋᐊᒍᑎᑦᑎᒍᑦ.

ᐱᔭᑦᓴᖅ ᑐᓂᕐᕈᑎᒋᔭᐅᓯᒪᔪᖅ UQAT-ᑯᓄᑦ 1984-ᒥᓂᑦ. ᔫᓂ 2019-ᒍᑎᓪᓗᒍ, ᑖᓐᓇ ᐱᔭᑦᓴᖅ ᓄᐃᑦᓯᒍᑎᖃᕐᓂᖁᖅ 39-ᓂᑦ ᐃᓕᑕᕆᔭᐅᓂᕐᑖᑐᓂᑦ (ᐊᑕᐅᓯᖅ ᐃᓕᑕᕆᔭᐅᓂᕐᑖᑐᖅ ᓄᓇᓕᒻᒥᑦ ᐊᕐᕌᒍᕐᒥᑦ ᑕᕐᕿᓂᓪᓗ ᓯᑕᒪᐅᔪᕐᑐᓂᑦ) ᐱᔭᑦᓴᖅ ᐅᐸᑦᑕᐅᒍᓐᓇᕕᖃᕐᑐᖅ ᐃᓕᓭᔨᓄᑦ ᓄᓇᓕᓐᓂᑦ ᒪᕐᕉᓄᑦ 14-ᒍᑎᓪᓗᒋᑦ ᓄᓇᕕᒻᒥᑦ ᓄᓇᓖᑦ(ᐃᕗᔨᕕᒃ ᐊᒻᒪᓗ ᐳᕕᕐᓂᑐᖅ).

ᑕᒐᑕᒐ, ᐃᓕᓴᕐᓂᓕᕆᓂᖅ ᒥᑦᓴᐅᓵᕐᓂᖃᕐᑐᖅ ᕿᑎᕐᖃᓵᖏᑦ ᐃᓄᐃᑦ ᐃᓕᓭᔩᑦ ᐱᓇᓱᑦᑎᖏᑦ ᐱᔭᕇᓐᓂᖃᕐᓂᒪᑕ ᐃᓕᓴᓲᒥᓂᑦ UQAT-ᑎᒍᓪᓘᓐᓃᑦ ᒪᑭᐊᓪᑎᒍᓪᓘᓐᓃᑦ.

ᑭᒡᒐᑐᕐᑏᑦ ᐊᖏᖃᑎᖃᕐᐳᑦ ᐋᕐᕿᒋᐊᕐᑕᐅᓂᖓᓂᑦ ᐃᓕᓴᕐᓂᓕᕆᓂᐅᑉ ᐳᕐᑐᓂᕐᓴᒋᐊᓪᓚᒥᑦ ᐃᓕᓴᕐᓂᓕᕆᓂᖓᓂᑦ ᐊᑭᓕᕐᑐᑕᐅᓂᐅᑉ ᒪᓕᒐᖏᓐᓂᑦ. ᑖᒃᑯᐊ ᐊᓯᑦᔨᒍᑎᐅᔪᑦ ᐱᒋᐊᓪᓚᑎᑦᓯᓚᖓᒻᒪᑕ ᐊᑐᐃᓐᓇᐅᓂᖏᓐᓂᑦ ᓴᐳᒻᒥᔭᐅᓂᒃᑯᑦ, ᐅᒃᑯᐃᖔᓕᐅᒥᑎᑦᓯᓗᑎᒃ ᐱᑐᒍᓐᓇᓂᕐᒥᑦ ᐳᕐᑐᓂᕐᓴᒋᐊᓪᓚᒥᑦ ᐃᓕᓴᕐᓂᓕᕆᓂᕐᒥᑦ ᐊᒻᒪᓗ ᐱᒍᒪᐅᑏᑦ ᑲᔪᓯᓂᖃᓐᓂᓴᐅᑎᓪᓗᒋᑦ.

ᐊᓯᑦᔨᑕᐅᓯᒪᔪᑦ ᐊᖏᕈᑕᐅᔪᑦ ᑭᒡᒐᓱᕐᑎᓄᑦ ᓄᐃᑦᓯᓂᖃᕐᑐᑦ ᐃᑲᔪᕐᑕᐅᓃᑦ ᐃᓕᓵᓂᑦ, ᐱᓇᓱᑦᑏᑦ ᐳᕐᑐᓂᕐᓴᒋᐊᓪᓚᒥᑦ ᐃᓕᓵᑦ ᐱᒍᑦᔭᐅᕕᖓᓃᑦᑐᐃᑦ ᐊᒻᒪᓗ ᐳᕐᑐᓂᕐᓴᒥᑦ ᐊᐅᓚᑦᓯᓂᓕᕆᓂᕐᒥᑦ.

ᐱᒍᒪᐅᑏᑦ ᑲᔪᓯᓂᖃᓐᓂᓴᐅᓂᖏᓐᓂᑦ: ᐃᓱᓕᕐᕕᖏᑦ ᐊᑭᓕᕐᑕᐅᓗᑎᑦ ᐃᓕᓴᕐᑕᖏᑦ ᐱᒍᒪᐅᑎᓂᑦ ᐊᑦᔨᒋᔭᐅᓕᕐᑐᑦ ᐳᕐᑐᓂᕐᓴᒋᐊᓪᓚᓂᑦ ᐃᓕᓴᕐᕕᔪᐊᓂᑦ ᑐᖓᓕᕇᓂᑦ (ᒫᕆ 1 ᐊᒻᒪᓗ ᓅᕕᒻᐱᕆ 1).

ᐅᒃᑯᐃᖔᓕᐅᒥᑎᑦᓯᓂᕐᒥᑦ ᐱᑐᒍᓐᓇᓂᕐᒥᑦ ᐳᕐᑐᓂᕐᓴᒋᐊᓪᓚᒥᑦ ᐃᓕᓴᕐᓂᓕᕆᓂᕐᒥᑦ: ᐃᓕᓵᑦ ᐃᓕᓴᕐᕕᑐᐃᓐᓇᓂᑦ ᐳᕐᑐᓂᕐᓴᒥᑦ ᐃᓕᑕᕆᔭᐅᒍᑎᒥᑦ ᐱᑕᖃᖕᖏᑐᑦ (ᐃ.ᐳ.ᐃ.) ᐱᑐᒍᓐᓇᓕᕐᑐᑦ ᐊᑭᓕᕐᑐᑕᐅᓗᑎᒃ ᐃᓕᓴᕐᑕᖏᑦ ᐱᕈᒌᕐᓯᒪᓂᕋᕐᑕᐅᓗᑎᒃ ᐃᓕᓵᒍᓗᑎᒃ ᐊᕙᑎᓪᓗ ᐊᑕᐅᓯᕐᓘᓂᑦ ᐅᑭᐅᖃᓗᑎᒃ ᐊᖓᔪᑦᓯᐅᓗᑎᓪᓘᓐᓃᑦ.

ᐊᑦᔨᒋᔭᐅᓗᑎᒃ ᐊᓯᖏᓐᓂᑦ ᐃᓕᓵᓂᑦ ᐊᑭᓕᕐᑐᑕᐅᔨᐊᓕᓂᑦ ᐃᓕᓴᕐᑕᖏᑦ, ᐱᕈᒌᕐᓯᒪᔪᑦ ᐃᓕᓵᑦ ᐱᑕᖃᒋᐊᖃᕐᐳᑦ ᐃᓚᒋᔭᐅᓂᕐᒧᑦ ᐱᔭᑦᓴᒧᑦ ᓇᓪᓕᑳᕐᓯᒪᔭᕐᒥᓄᑦ ᓱᓕᓂᐸᕐᑕᐅᒋᐊᓖᑦ ᐃᓕᓭᕕᓐᓄᑦ ᒪᓂᒪᑎᑦᓯᔪᓄᑦ (ᐱᒋᐅᑦᓴᕕᒻᒧᑦ, ᐳᕐᑐᓂᕐᓵᓂᒃ ᐃᓕᓴᕐᕕᔪᐊᓐᓄᒃ)

ᐱᒋᐊᓪᓚᑎᑦᓯᓂᖅ ᓴᐳᒻᒥᔭᐅᓂᖅ: ᑮᓇᐅᔭᕐᑎᒍᑦ ᓴᐳᒻᒥᔭᐅᓂᖅ ᐱᐅᓯᐅᒥᑎᑕᐅᓯᒪᔪᖅ ᐊᑦᔨᒌᖕᖏᑐᕐᑎᒍᑦ ᑐᖕᖓᕕᐅᔪᒃᑯᑦ ᐃᑉᐱᒋᑦᓱᒋᑦ ᑕᒐᑕᒐ ᐃᓅᒐᓱᐊᕐᓂᒧᑦ ᐊᑭᖏᑦ ᐊᒻᒪᓗ ᐃᓕᓵᑦ ᕿᑐᕐᖓᓖᑦ ᑭᖕᖒᒪᒋᓲᖏᑦ (ᐃᖏᕐᕋᐅᑎᒃᑰᒋᐊᖃᕐᓃᑦ ᑭᓇᑐᐃᓐᓇᑯᑦ ᐃᑭᒪᕕᒋᓲᖏᑦᑎᒍᑦ, ᓇᔪᕐᓯᑎᖃᕐᓃᑦ, ᐃᓱᒣᓐᓇᕿᐅᑎᑦᓭᑦ, ᑮᓇᐅᔭᖃᕐᑎᑕᐅᓃᓪᓗ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐃᓪᓗᖁᑎᖏᓐᓃᖏᑦᑐᓂᑦ, ᑮᓇᐅᔭᕐᑎᒍᑦ ᓴᐳᒻᒥᔭᐅᓂᖅ ᐃᓚᐅᒍᓐᓇᖁᓗᒋᑦ ᐃᓕᓴᕐᕕᒥᑕ ᓯᓚᑖᓂᑦ ᓱᖃᑦᓯᖃᑕᐅᓂᕐᒧᑦ ᐃᓕᓴᕐᑕᖓᓅᓕᖓᑦᓱᓂ, ᐱᒍᑦᔨᓂᕐᒧᑦ ᖃᑦᓯᐅᓂᖏᑦ ᐊᒻᒪᓗ ᐃᓪᓘᑉ ᐱᐅᒃᑯᑎᖏᓐᓅᓕᖓᔪᑦ ᐃᓕᓵᖅ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐃᓪᓗᖁᑎᖏᓐᓃᖏᑦᑐᓂᑦ, ᐊᓯᖏᓐᓂᓗ).

ᐃᓱᕐᕆᓕᐅᒥᖁᓪᓗᒋᑦ ᐃᓕᓵᑦ ᑮᓇᐅᔭᕐᑎᒍᑦ ᐃᓱᒫᓘᑎᒋᓲᖏᓐᓂᑦ, ᐊᐅᓚᑦᓯᕕᒃ ᐊᑐᐃᓐᓇᐅᑎᑦᓯᓚᖓᒻᒥᔪᖅ ᑮᓇᐅᔭᓂᑦ ᐊᑑᑎᖔᒍᓐᓀᓗᑎᒃ ᐊᑭᓖᕐᖄᑎᓪᓗᒍ ᐃᓕᓵᖅ ᐃᓪᓘᑉ ᐱᐅᒃᑯᑎᖏᓐᓂᑦ. ᐃᒣᓕᖓᓚᖓᔪᖅ, ᐆᑦᑑᑎᒋᓗᒍ, ᐃᓪᓘᑉ ᐱᐅᒃᑯᑎᓂᓐᓂᑦ ᐱᑖᕐᓂᒥᑦ, ᓄᑦᑎᑎᒍᑎᑦᓭᓗ ᐊᑭᓕᕐᑐᒋᐊᐊᕐᓂᖏᑦ, ᐊᓯᖏᓪᓗ.

ᐊᐅᓚᑦᔭᕆᐊᓪᓚᕕᖃᕐᓂᓴᐅᓕᕐᑐᖅ ᒪᓕᒐᕐᑎᒍᑦ ᐱᕕᖃᕐᑎᓯᓗᑎᒃ ᐃᓕᓵᓂᑦ ᐃᒫᒃ:

  • ᐊᑕᐅᓯᕕᓪᓗᑎᒃ ᓄᓇᕕᓕᐊᒍᓐᓇᓗᑎᒃ ᓄᓇᓕᒋᖕᖏᑕᒥᓗᑦ ᑭᓯᐊᓂ ᐊᑭᖃᑎᒋᒋᐊᓕᖓ ᓄᓇᓕᖓᑕ ᖃᖓᑦᑕᐅᑎᖓᑕ ᐊᑭᖓᓂᑦ.
  • ᐅᖃᒍᓐᓇᕕᖃᕐᑎᑕᐅᓂᕐᓴᐅᓗᑎᒃ ᓇᓃᒍᒪᓂᕐᒥᓂᑦ ᓯᕗᓪᓕᐹᖓᓂᑦ ᐊᕐᕌᒍᖓᓂᑦ ᐃᓕᓴᕐᕕᒥᑕ.

ᑭᒡᒐᑐᕐᑏᑦ ᕿᒥᕐᕈᒋᐊᑦᓯᐊᓂᕐᖁᑦ ᐊᖏᕐᓱᑎᓪᓗ ᓄᑕᐅᓯᓕᕐᑎᑕᐅᓂᖏᓐᓂᑦ ᐸᕐᓇᑕᐅᓯᒪᔪᓂᑦ 2019-2020-ᒦᑦᑐᓂᑦ (ᑕᓪᓕᒪᐅᔪᖕᖏᒐᑦᑐᑦ ᓄᓇᓖᑦ) ᐊᒻᒪᓗ 2020-2021-ᒦᑦᑐᑦ (ᑕᓪᓕᒪᑦ ᓄᓇᓖᑦ). ᐊᖑᒻᒪ-ᑎᑦᓯᒋᐊᒍᑏᑦ 2019-2024-ᒦᑦᑐᓂᑦ ᐊᑐᕐᑐᓴᓕᐅᕐᓂᒥᑦ ᐸᕐᓇᓯᒪᐅᑎᒃ ᖃᐅᔨᑎᑦᓯᒍᑎᐅᒻᒥᓱᓂ ᐅᖄᖃᑎᒌᒍᑕᐅᒋᐊᖃᕐᓂᖓᓂᑦ.

ᐊᕐᕌᒍᓐᓄᑦ ᑕᓪᓕᒪᓄᑦ ᐊᑐᕐᑐᓴᓕᐅᕐᓂᒥᑦ ᐸᕐᓇᓯᒪᐅᑎᒃ ᕿᒥᕐᕈᒋᐊᑦᓯᐊᑕᐅᔪᕕᓂᖅ ᑭᒡᒐᑐᕐᑎᓄᑦ ᐃᓱᒪᒋᔭᐅᒋᐊᓖᑦ ᐃᒣᓛᕐᓂᕃᓂᖏᓐᓂᑦ ᐃᓕᓵᑦ ᐅᓄᕐᓂᖏᑦ ᐊᒥᓱᖕᖑᐸᓪᓕᐊᓂᖏᓐᓂᑦ, ᐃᓪᓗᐃᓘᕐᓂ ᐊᒻᒪᓗ ᓱᕐᕃᓯᒪᓂᖅ ᐱᓇᓱᑦᑎᙯᓐᓇᓂᕐᒥᑦ, ᓱᕐᖁᐃᓇᕐᑐᑎᒍᑦ ᐃᓕᓴᕐᕖᑦ ᐱᐅᒃᑯᑎᖃᖁᓪᓗᒋᑦ ᓈᒻᒪᑐᓂᑦ ᐅᒃᑯᐃᖔᕐᑎᓯᖁᔨᒧᑦ ᐃᓕᓴᕐᑕᐅᒋᐊᓕᓐᓂᑦ (ᓱᑯᐃᔦᕖᑦ,ᐊᑐᐊᒐᖃᐅᑏᑦ, ᐊᑦᑕᓇᖕᖏᑐᒥᑦ ᓈᒻᒪᑐᒥᑦ ᐃᓂᖃᕐᓂᒥᑦ ᐱᑦᔪᑎᒋᓗᐊᖕᖑᐊᓱᒍ ᐃᓕᕐᕈᓯᓕᕆᕕᒃ ᐊᒻᒪᓗ ᓄᓇᒦᓪᓗᑎᒃ ᐊᓐᓇᐅᒪᒐᓱᐊᕐᓂᒥᑦ).

ᑭᖕᖒᒪᒋᔭᐅᔪᓂᑦ ᖃᐅᔨᓴᕐᓃᑦ ᑲᔪᓯᓚᖓᔪᑦ ᖃᐅᔨᒋᐊᕐᕕᑎᒍᑦ ᓄᓇᓕᓕᒫᓂᑦ ᑭᖑᓪᓕᐹᖓᓂᑦ ᐸᕐᓇᒍᑕᐅᔪᒥᑦ ᑐᓂᔨᒐᔭᕐᒪᑕ ᑭᒡᒐᑐᕐᑎᓄᑦ ᕿᒥᕐᕈᒐᔭᕐᑎᓗᒋᑦ ᐊᖏᒍᑎᒋᓗᒍᓗ.

ᑕᕝᕙᓂ ᐊᕐᕌᒍᕐᒥᑦ, ᐃᓪᓗᖁᑎᓕᒫᖏᑦ ᑲᒪᒋᔭᐅᔪᐃᑦ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ ᐱᑕᖃᕐᑎᑕᐅᓚᖓᓕᕐᒪᑕ ᑎᐸᑦᓴᔭᒋᖕᖏᑕᖏᓐᓂᑦ ᐃᓘᑉ ᐃᓗᐊᓂ ᖃᐅᔨᒍᑎᒥᑦ.

ᑭᒡᒐᑐᕐᑏᑦ ᕿᒥᕐᕈᒋᐊᑦᓯᐊᓂᕐᖁᑦ ᐊᖏᕐᓱᑎᓪᓗ ᑮᓇᐅᔭᓕᕆᓂᕐᑎᒍᑦ ᑕᒻᒪᓯᒪᔪᕐᓂᐊᑎᐅᑉ ᑐᓴᕐᑎᓯᐅᑎᖏᓐᓂᑦ 2018-2019-ᒦᑦᑐᓂᑦ, ᓀᓪᓕᑎᑦᓯᒪᔪᓂᓪᓗ ᑲᑎᕕᒃ ᐃᓕᓴᕐᓂᓕᕆᓂᐅᑉ ᑮᓇᐅᔭᕐᑑᑎᕕᓂᖏᑦᑕ ᐊᓪᓚᓯᒪᔪᖁᑎᖏᓐᓂᑦ.

ᑕᒻᒪᓯᒪᔪᕐᓂᐊᑎ ᓱᕐᖁᐃᓯᓯᒪᕗᒃ ᖃᓄᐃᖕᖏᓂᕃᑦᓱᓂ ᑮᓇᐅᔭᕐᑎᒍᑦ ᐊᐅᓚᑦᓯᕕᓕᕆᕕᖓᓐᓂᑦ ᐊᑑᑎᔭᐅᓲᓂᑦ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ.

ᑭᒡᒐᑐᕐᑏᑦ ᓀᓪᓕᑎᕐᓯᒪᔪᓂᑦ ᑐᓴᕐᑎᑕᐅᔪᑦ ᓄᓇᕕᒃ ᓯᕗᓂᑦᓴᕘᒃᑯᓂᑦ ᖃᓄᕐᓗ ᑐᓂᕐᕈᑎᖃᕐᓂᖏᓐᓂᑦ. ᐃᓕᓵᑦ ᐊᔪᐃᓐᓇᓂᖏᓐᓂᑦ ᐳᕐᑐᓂᕐᓴᒋᐊᓪᓚᒥᑦ ᐃᓕᓴᕐᓂᒥᑦ. ᐅᖄᖃᑎᒋᑦᓱᒍᓗ ᐃᒣᒋᐊᖁᔨᒍᑎᒥᓂᑦ ᑲᔪᓯᖁᔨᑦᓱᑎᒃ ᓯᑎᐊᕙᓂ ᖃᓴᓪᓗᐊᒥᑦ, ᐱᔭᕇᕐᑐᕕᓂᕐᒥᑦ ᑖᑦᓱᒥᖓ ᐃᓕᓴᒐᑦᓴᒥᑦ, ᐅᖄᖃᑦᑕᓂᕐᒪᑦ ᐱᓪᓚᕆᐅᓂᖓᓂᑦ ᑲᔪᓯᑦᓯᐊᓇᕐᓂᓴᒃᑯᑦ ᓄᓇᕕᒻᒥᑦ ᐃᓕᓴᕐᕕᓂᑦ ᖃᓪᓗᓈᑦ ᓄᓇᖓᓐᓄᑦ ᑯᐯᒃᑯᑦ ᐃᓕᓴᕐᓂᓕᕆᓂᖓᑕ ᐊᐅᓚᑦᓯᕕᖓᓐᓄᑦ.

ᓄᓇᕕᒃ ᓯᕗᓂᑦᓴᕘᒃᑯᑦ ᐃᓕᓴᐅᑎᖓ ᓄᐃᒋᐊᖕᖓᑐᕕᓂᐅᕗᒃ ᓯᑦᑎᒻᐱᕆ 2017-ᒥᑦ ᑕᒐᑕᒐᓗ ᑲᔪᓯᑦᓱᓂ ᐊᕐᕌᒎᕐᓂᑦ ᒪᕐᕉᓂᑦ.

ᑲᑎᑦᓱᒋᑦ, ᐊᕙᑎᓪᓗ ᑕᓪᓕᒪᐅᔪᕐᑐᓗ ᒪᕐᕉᓗ ᐃᓕᓵᑦ ᐱᔭᕇᕐᓯᒪᓕᕐᑐᑦ ᑖᑦᓱᒥᖓ ᐃᓕᓴᐅᑎᒥᑦ. ᕿᑎᕐᖃᖏᑦ ᐱᔭᕇᕐᑐᕕᓃᑦ ᑐᑭᑖᕐᑐᕕᓃᑦ ᐃᓕᓴᒍᒪᑦᓱᑎᒃ ᐊᑌᓐᓇᑐᒥᑦ ᓇᓪᓕᑐᐃᓐᓇᖏᓐᓂᑦ ᐳᕐᑐᓂᕐᓴᒋᐊᓪᓚᒥᑦ ᐃᓕᓴᕐᕕᓂᑦ ᓄᓇᐅᑉ ᐊᕕᑦᑐᓯᒪᓂᖓᓃᑦᑐᓂᑦ. ᐆᑦᑑᐱᕆ 2019-ᒥᑦ ᕿᑎᕐᖃᓗ ᕿᑎᕐᖃᓵᓪᓗ ᑲᔪᓰᓐᓈᓚᐅᔪᔪᑦ ᐊᑌᓐᓇᑐᒥᑦ ᐃᓕᓵᒍᓂᕐᒥᑦ.

ᓄᓇᕕᒃ ᓯᕗᓂᑦᓴᕘᒃᑯᓂᑦ ᐱᔭᕇᕐᓯᒪᔪᖅ ᓯᑎᐊᕙᓂ ᖃᓴᓪᓗᐊᖅ ᐅᖄᔪᕕᓂᖅ ᐱᓪᓚᕆᐅᒋᐊᖓᓂᑦ ᓄᒃᑭᓭᓂᕐᒥᑦ ᓄᑲᕐᓰᑦ ᐃᓕᓴᐅᑎᖏᓐᓂᑦ ᓱᖏᐅᓴᒋᐊᖃᕐᓂᖏᓐᓂᑦ ᐃᓕᓵᑦ ᐅᖄᓗᑎᒃ ᓄᐃᑦᓯᒍᓐᓇᓂᕐᒥᑦ, ᐅᓂᒃᑳᑐᐊᓂᓪᓗ ᐊᓪᓚᓂᕐᒥᑦ, ᖃᐅᔨᓴᒍᓐᓇᓂᕐᒥᓗ ᐃᓕᓴᕐᑕᖏᓐᓅᓕᖓᔪᓂᑦ.

ᑭᐅᒍᑎᖃᕐᓂᖅ ᐊᐱᕐᓲᑎᐅᔪᓂᑦ ᑭᒡᒐᑐᕐᑎᓄᑦ ᒪᓐᑐᔨᐊᒥᑦ ᓇᓃᓐᓂᖓᓂᑦ ᓄᓇᕕᒃ ᓯᕗᓂᑦᓴᕘᒃᑯᑦ. ᐃᓕᓴᕐᕕᖓᓂᑦ, ᓯᑎᐊᕙᓂ ᖃᓴᓪᓗᐊᖅ ᐅᖃᕐᑐᕕᓂᖅ ᐃᓱᐃᑦᑑᒐᓗᐊᕐᑎᓗᒍ ᕿᒪᐅᒪᑦᓯᒋᐊᒥᑦ ᐃᓚᒋᔭᖅ, ᐅᐱᒍᓱᓐᓂᖃᕐᐳᖅ(ᐊᓯᖏᓪᓗ ᐃᓕᓵᑦ) ᐅᓪᓗᓕᒫᕐᓯᐅᑎᒥᓂᑦ ᐃᓚᒥᓂᓪᓗ ᓇᔪᑦᔭᖏᓐᓇᒥᒃ. ᐃᑲᔪᕐᓯᓂᖃᕐᒪᑦ ᐃᑉᐱᒋᔭᑐᐊᖃᒋᐊᒥᑦ ᐃᓕᓴᐅᑎᒥᓂᑦ.

ᑭᒡᒐᑐᕐᑏᑦ ᑲᔪᓯᓂᖃᓚᐅᕐᑐᑦ ᐱᕕᑦᓴᖃᖁᔨᑦᓱᑎᒃ ᑐᑭᒧᐊᒍᑎᑦᑎᒍᑦ ᓂᑦᑕᑎᑦᓯᓂᕐᒥᑦ ᐊᑐᓂᑦ ᓄᑲᕐᓰᑦ ᐃᓕᓴᕐᕕᖏᓐᓂᑦ. ᑐᓴᐅᒪᑎᑦᓯᓂᖅ ᑲᑕᓪᓗᖓᓐᓇᖏᑦᑐᖅ, ᓄᐃᑕᑎᑦᓯᓱᓂᓗ ᑲᖐᒋᔭᐅᓂᕐᓴᐅᓂᖏᓐᓂᑦ ᓈᒻᒪᓈᕐᑐᑎᒍᑦ ᐱᒋᐅᑦᓴᓂᕐᒥᑦ. ᑫᓪᓗᑐᕐᑕᐅᓱᑎᓪᓗ ᐅᖄᖃᑎᒌᓐᓂᑯᑦ ᐊᑑᑎᔭᐅᒍᓐᓇᒐᔭᕐᑐᓂᑦ ᑐᑭᑖᒍᑕᐅᒍᓐᓇᑐᓂᑦ ᐃᓱᐃᓗᑕᒋᔭᐅᓲᓂᑦ ᐊᑕᐅᓯᕐᒧᑦ ᓄᓇᓕᒻᒨᓕᖓᔪᓂᑦ, ᐊᒻᒪᓘᓐᓃᑦ ᐊᒥᓱᓄᑦ ᐊᑑᑎᔭᐅᔪᓂᑦ.

ᐆᑦᑑᐱᕆᐅᑎᓪᓗᒍ, ᑭᒡᒐᑐᕐᑏᒃ ᑕᓯᐅᔭᕐᒥᑦ ᑰᑦᔪᐊᕌᐱᒻᒥᓗ ᓄᐃᑕᑎᑦᓯᓂᖃᓚᐅᕐᖂᒃ ᐃᓕᓴᕐᕕᒥᑕ ᐊᑑᑎᓲᖏᓐᓂᑦ ᓲᓱᑦᓴᓂᕐᑎᒍᑦ ᓄᓇᓕᒻᒥᓂᑦ.

ᐱᒻᒪᕆᐅᓂᕐᐹᖏ ᑲᑎᖕᖓᓂᐅᓚᐅᔪᒥ ᑲᒥᓯᓇᓄᑦ

2019-03 | 2019-06 | 2019-10

2018-03 | 2018-06 | 2018-10 | 2018-12 (ᐊᑐᐃᓐᓇᐅᖏᑦᑐᖅ)

2017-03 | 2017-06 | 2017-10 | 2017-12 

2016-04 | 2016-06 | 2016-10 | 2016-12

2015-03 | 2015-06 | 2015-10 | 2015-12

2014-03 | 2014-06 (ᐊᑐᐃᓐᓇᐅᖏᑦᑐᖅ) | 2014-10 | 2014-12