ᖃᓂᒪᓇᖅ ᐁᑦᑐᑑᑕᐅᓲᖅ COVID-19-ᓚᔭᐅᔪᖅ ᐱᓪᓗᒍ - ᓄᓇᕕᒻᒥᐅᑦ ᐊᑕᐅᑦᓯᑰᕈᑎᖃᕐᐳᑦ ᓄᓇᕕᒻᒥ ᐅᒃᑯᐃᑎᕆᕙᓪᓕᐊᓂᐅᓚᖓᔪᒥᒃ

ᑰᑦᔪᐊᖅ, ᒣ 26, 2020 – ᓄᓇᕕᒻᒥ ᓄᓇᓕᓕᒫᓂ ᐱᓇᓱᕖᑦ ᑲᑐᑦᔨᓱᑎᒃ ᐊᑐᐃᓐᓇᕈᕐᑎᕆᕙᓪᓕᐊᓕᕐᑐᑦ ᖃᓂᒪᓇᖅ ᐁᑦᑐᑑᑕᐅᓲᖅ COVID-ᓚᔭᐅᔪᖅ ᐱᓪᓗᒍ ᐊᑑᑎᔭᐅᒋᐊᓕᓐᓂᒃ ᐊᑑᑎᔭᐅᒍᓐᓀᑎᑦᓯᕙᓪᓕᐊᑕᕐᓂᒥᒃ. ᐸᕐᓀᕈᑎᖃᕐᐸᓕᐊᓕᕐᑑᒐᓗᐊᑦ ᐅᒃᑯᐃᑎᕆᕙᓪᓕᐊᓂᑦᓴᒥᒃ ᐊᑯᓂᖕᖑᕋᑕᕐᓗᒍ ᐊᓯᑦᔨᒪᕆᑦᑐᖃᓚᖓᖕᖏᓚᖅ. ᕿᓄᐃᓵᕈᑎᖃᑦᓯᐊᕆᐊᖃᓚᖓᕗᑦ ᐃᓄᓕᒫᑦ ᓄᓇᕕᒻᒥ ᐱᓇᓱᐊᕐᐸᓕᐊᓯᒻᒥᔭᑦᑎᓂᒃ ᓯᓚᕐᔪᐊᓕᒫᒥ ᖃᓂᒪᓇᖃᕐᑌᓕᒍᑎᑦᓴᓂᒃ ᐁᑦᑐᑑᑕᐅᓲᒥᒃ COVID-19 -ᓚᔭᐅᔪᒥᒃ.

ᑲᑎᕕᒃ ᓄᓇᓕᓕᒫᑦ ᑲᕙᒪᖓ, ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ, ᑲᑎᕕᒃ ᐃᓕᓴᕐᓂᓕᕆᔩᑦ, ᑲᑎᕕᒃ ᓄᓇᓕᓕᒫᓂ ᐃᓪᓗᓕᕆᔨᕐᔪᐊᑯᑦ ᑲᕙᒫᐲᓪᓗ ᐊᑕᐅᓯᕐᒥᒃ ᓂᐸᖃᓚᖓᕗᑦ ᓄᓇᕕᒻᒥᐅᓄᑦ ᐃᑲᔪᕐᑕᐅᒍᒪᓂᕐᒥᓂᒃ ᐅᒃᑯᐃᑎᕆᕙᓪᓕᐊᑕᕐᓂᒥᒃ ᐱᓇᓱᐊᓯᒍᑎᒃ ᓄᓇᓕᒥᓂ ᓄᓇᓕᓕᒫᓂᓪᓗ ᓱᓇᓱᐊᕐᓂᐅᓲᓂᒃ.

ᑐᕌᒐᖃᕐᑐᑦ ᐱᓇᓱᐊᕈᓯᐅᓚᖓᔪᓂ, ᐊᑑᑎᒐᑦᓴᓕᐊᒍᓯᒪᔪᑦ ᐊᑑᑎᑎᑕᐅᒍᓐᓀᕙᓪᓕᐊᓚᖓᑎᓪᓗᒋᑦ ᐱᒍᑦᔨᐅᑏᓪᓗ ᐅᒃᑯᐃᑕᐅᕙᓪᓕᐊᓂᖃᓚᖓᑎᓪᓗᒋᑦ. ᐱᓇᓱᕝᕖᑦ, ᐯᕆᑦᓯᕖᑦ ᑮᓇᐅᔭᓕᐅᕐᕖᓗ ᐅᒃᑯᐃᑎᕐᑕᐅᖃᑦᑕᓚᖓᓕᕐᒥᔪᑦ. ᓄᓇᓕᓐᓂᑦ ᓄᓇᓕᓐᓄᑦ ᐊᕐᕕᑕᕐᓃᑦ ᐅᒃᑯᐃᑕᐅᕙᓪᓕᐊᓂᖃᓚᖓᔪᑦ, ᐊᓯᖏᓪᓗ. ᐊᑦᑕᓀᑦᑐᒦᒋᐊᖃᕐᓂᖏᑦ ᖃᓄᐃᖕᖏᓯᐊᕆᐊᖃᕐᓂᖏᓪᓗ ᐃᓄᐃᑦ ᖃᐅᔨᓴᕐᑕᐅᖃᑦᑕᓚᖓᔪᑦ ᐃᑉᐱᒋᔭᐅᓂᖃᕐᓗᑎᓪᓗ ᑐᑭᑖᕋᓱᐊᕐᑐᓄᑦ ᖃᐅᔨᒪᒍᑎᑦᓴᐅᓂᐊᕋᒥᒃ. ᓄᓇᓖᑦ ᐃᓚᐅᑦᓯᐊᖃᑦᑕᓚᖓᔪᑦ ᑕᒪᑐᒧᖓ. ᖃᖓᓪᓗᑑᓂᕆᖃᑦᑕᓚᖓᔭᖏᑦ ᓇᓗᓀᕐᑕᐅᓯᒪᖃᑦᑕᓚᖓᖕᖏᑐᑦ ᑐᑭᑖᕈᑎᒋᓯᒪᔭᑦᑕᓗ ᐃᓚᖏᓐᓂᒃ ᐅᑎᕆᐊᕐᕕᖃᖃᑦᑕᕆᐊᖃᓚᖓᑦᓱᑕ ᓱᒃᑯᓕᐅᒥᖔᑐᐃᓐᓇᐸᑦ ᐊᑑᑎᔭᕗᑦ.

ᐊᒥᓱᑦ ᑲᑎᒪᔨᑦᓭᑦ ᓄᐃᑕᐅᓯᒪᓕᕐᑐᑦ ᕿᒥᕐᕈᑐᑦᓴᐅᑎᓪᓗᒋᑦ ᓱᕐᕋᑕᐅᓯᒪᒍᑎᓂᒃ ᓄᓇᕕᒻᒥ ᐃᓅᓯᒃᑯᑦ ᑮᓇᐅᔭᓕᐅᕋᓱᐊᕐᓃᓗ ᓄᓇᓖᓪᓗ ᐅᒃᑯᐃᑕᐅᕙᓪᓕᐊᓂᕆᓚᖓᔭᖏᓐᓄᑦ ᐱᓇᓱᕝᕕᖃᕐᕕᓕᒫᑦ. ᑖᒃᑯᐊ ᑲᑎᒪᔨᓕᐊᒍᓯᒪᔪᑦ ᑭᒡᒐᑐᕐᑎᑕᓖᑦ ᓄᓇᓕᓕᒫᓂ ᐱᓇᓱᕝᕕᓂᑦ ᐱᓯᒪᔪᓂᒃ ᖃᓄᐃᓘᖁᔨᒍᑎᓕᐅᕐᐸᓕᐊᓛᕐᑐᑦ ᖃᒻᒥᑯᑦ ᑌᒪ ᐊᑑᑎᔭᐅᒋᐊᓕᓐᓂᒃ ᐊᑑᑎᔭᐅᒍᓐᓀᑎᑦᓯᕙᓪᓕᐊᑎᑦᓯᓃᑦ ᑐᑭᑖᕈᑕᐅᓂᐊᓕᕐᒪᑕ.

ᓄᓇᓕᓕᒫᓂ ᐱᓇᓱᕝᕕᒥ ᐱᓇᓱᑦᑎᐅᓱᑕ, ᐊᑕᐅᓯᕐᒥᒃ ᑐᕌᒐᖃᕐᑐᒍᑦ: ᐃᑉᐱᒋᔭᖃᕆᐊᖃᕐᓂᒥᒃ ᐃᓄᓕᒫᑦ ᖃᓄᐃᖕᖏᓯᐊᕆᐊᖃᕐᓂᖏᓐᓂᒃ ᐊᑦᑕᓀᑦᑐᒦᒋᐊᖃᕐᓂᖏᓐᓂᓗ ᑐᑭᒧᐊᑦᑎᓯᔨᐅᓂᕐᒥᓗ ᐱᔭᕆᐊᑐᔪᒃᑰᓂᑦᑎᓂ. ᕿᓄᐃᓵᑦᓯᐊᖁᔨᔪᒍᑦ ᐃᓄᓐᓂᒃ. ᓴᓗᒪᑦᓯᐊᖁᔨᒍᑎᓂᒃ ᐊᑑᑎᔭᐅᑦᓯᐊᒪᕆᖁᔨᔪᒍᑦ ᓴᐳᒻᒥᓯᐊᖁᓪᓗᓯ ᐃᒻᒥᓂᒃ, ᐃᓚᑦᓯᓂᓪᓗ ᐃᓚᓐᓈᓯᓐᓂᓗ.

ᐃᕐᕈᑐᑦᓴᐅᑎᒋᖃᑦᑕᓗᓯ ᖃᓂᑕᕇᑦᑌᓕᓗᓯᓗ 2-ᒦᑕᓄᑦ.

ᐃᓘᓐᓇᑎᒃ ᖃᐅᔨᒪᒋᐊᖃᕐᒥᔪᑦ ᐊᑑᑎᔭᐅᒋᐊᓖᑦ ᐊᑑᑎᔭᐅᒍᓐᓀᕙᓪᓕᐊᓂᕋᓗᐊᕈᑎᒃ ᐊᑑᑎᔭᐅᑎᑕᐅᕙᓪᓕᐊᓯᑐᐃᓐᓇᕈᓐᓇᒥᒻᒪᑕ ᑲᑐᑦᔨᓗᑕ ᐃᕐᐸᑎᑦᓯᑌᓕᒍᓐᓇᓂᖕᖏᑯᑦᑕ ᖃᓂᒪᓇᕐᒥᒃ ᐁᑦᑐᑑᑕᐅᓲᒥᒃ COVID-19 -ᓚᔭᐅᔪᒥᒃ.

ᐱᓇᓱᕝᕕᓂ ᐱᓇᓱᑦᑎᐅᓱᑕ ᓄᓇᕕᒻᒥᐅᓂᒃ ᑲᑐᑦᔨᖃᑎᒌᑦᓯᐊᖁᔨᕗᒍᑦ ᒪᓕᑦᓯᐊᕆᐊᖃᕐᓂᒧᑦ ᓇᐅᓕᒫᓂᒃ ᖃᓄᐃᖕᖏᓯᐊᕐᓂᓕᕆᔨᒃᑯᑦ ᐊᑑᑎᔭᐅᖁᔭᖏᓐᓂᒃ ᑲᑐᑦᔨᖃᑎᒌᒍᑎᖃᕐᓗᑕᓗ ᓄᓇᕕᒻᒥ ᐅᒃᑯᐃᑎᕆᕙᓪᓕᐊᓂᐅᒐᔭᕐᑐᒥᒃ.

ᑫᐋᔩ ᕿᓄᒍᑎᖃᓚᐅᕐᑐᖅ ᐱᓇᓱᐊᖃᑎᒌᑦᑎᓴᓂᒃ ᓄᐃᑕᐅᖁᔨᑦᓱᓂ ᐃᑲᔪᕐᑐᓴᓂᒃ ᑲᕙᒪᒃᑯᓂᒃ ᐃᓱᒪᒋᔭᐅᒋᐊᖃᕐᓂᖏᓐᓄᑦ ᐃᓄᐃᑦ ᐱᓀᓗᑕᖃᕐᐸᓕᕐᑐᑦ ᐋᕐᕿᒋᐊᕈᑦᔭᐅᒍᑎᑦᓴᖏᓐᓄᑦ ᐊᒻᒪᓗ ᓯᓚᐅᑉ ᐊᓯᑦᔨᕙᓪᓕᐊᓂᖓ ᐃᑉᐱᒋᓗᒍ ᑲᒪᒋᐊᕈᑎᑦᓴᓂᒃ. ᓴᕆᐊᑦ ᐃᓚᐅᖁᔨᓂᕐᒥᓂᒃ ᑐᑭᓯᑎᑦᓯᓯᐊᓚᐅᕐᑐᖅ ᓄᓇᕕᒻᒥ ᐅᖃᐅᓯᕆᔭᐅᓕᕐᐸᑕ ᐆᑦᑐᕋᐅᑎᓕᐅᕐᓃᑦ ᑯᐯᑉ ᑲᕙᒪᖓᑕ ᐱᓇᓱᐊᕈᑎᖃᕆᐊᒃᑲᓂᕆᐊᖃᓕᕐᓂᖓᓄᑦ ᐊᒻᒪᓗ ᓯᓚᐅᑉ ᐊᓯᑦᔨᕙᓪᓕᐊᓂᖓᓄᑦ ᐸᕐᓀᓯᒪᐅᑏᑦ.

-30-

ᑐᓴᕐᑎᓯᔪᑦ:               

ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ
ᑲᑎᕕᒃ ᓄᓇᓕᓕᒫᑦ ᑲᕙᒪᖓ

 

ᑐᑭᓯᒋᐊᓪᓛᒍᒪᕈᕕᑦ, ᐅᖄᖃᑎᒋᓗᒋᑦ:

ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ

ᔪᓭ ᓕᕕᐊᒃ

ᐊᑕᐅᑦᓯᑰᕐᑎᓯᔨ ᑐᓴᕋᑦᓴᓕᕆᓂᕐᒥᒃ, ᓄᓇᕕᒻᒥ ᐃᓗᓯᓕᕆᕕᒻᒥ

ᐅᖄᓚᐅᑎᖓ: 819-964-2222

 

ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᕆᐊᓪ ᓭᑫᓐ

ᑐᓴᐅᒪᐅᑎᓕᕆᓂᕐᓄᑦ ᑲᒪᔨᒻᒪᕆ

ᐅᖄᓚᐅᑎᖓ: 819-964-2961 ext. 2358

 

 

ᑲᑎᕕᒃ ᐃᓕᓴᕐᓂᓕᕆᓂᖅ

ᔮᑦ ᑐᓯᓅ-ᐱᕐᓀ

ᐊᑕᐅᑦᓯᑰᕐᑎᓯᔨ ᑐᓴᕋᑦᓴᓕᕆᓂᕐᒥᒃ

ᐅᖄᓚᐅᑎᖓ: 514 797-8220

 

ᑲᑎᕕᑦ ᓄᓇᓕᓐᓂ ᐃᓪᓗᓕᕆᔨᕐᔪᐊᑯᓐᓂ

ᒪᕆ-ᑭᕆᔅᑏᓐ ᕚᓀ

ᑐᓴᕋᑦᓴᓕᕆᕕᒻᒥ ᑐᑭᒧᐊᑦᑎᓯᔨ

ᐅᖄᓚᐅᑎᖓ:  438-884-0502

Back to Press release