ᑲᑎᕕᒃ ᐃᓕᓴᕐᓂᓕᕆᓂᖅ ᑐᓴᕐᑎᓯᒍᒪᔪᖅ ᓄᑕᐅᓯᓕᕐᑕᐅᒪᔪᒧᑦ ᐱᒍᑦᔨᓂᕐᓂᑦ ᐃᓚᐅᖁᓪᓗᒋᑦ ᓄᓇᖃᕐᖄᓯᒪᔪᐃᑦ ᐃᓗᓕᒋᔭᖏᑦ ᐊᒻᒪᓗ ᑕᑯᓐᓇᑕᐅᓂᖏᑦ ᐃᓕᓐᓂᐊᑎᑦᓯᒍᑏᑦ ᐱᐅᒃᑯᑎᖏᑦ ᓄᐃᑕᐅᔪᕕᓃᑦ ᑯᐯᒃᑯᑦ ᐃᓕᓴᕐᓂᓕᕆᓃᑦ ᑐᕐᖃᑕᕐᕕᖓᓄᑦ

ᒪᓐᑐᔨᐊᓪ, ᑯᐯᒃ (ᓅᕕᒻᐱᕆ 29, 2018) – ᐱᓇᓱᐊᕈᓯᐅᓚᐅᔪᒥ, ᑐᓴᕐᑎᓯᕖᑦ ᓄᐃᑦᓯᔪᕕᓃᑦ ᐊᓯᑦᔨᑕᐅᓂᕕᓂᖏᓐᓂᒃ ᑯᐯᒃ ᐃᓗᕐᕈᓯᕐᓂᐊᓂᐅᑉ ᕿᒥᕐᕈᐊᒐᖏᑦ ᓱᓇᒨᖕᖏᑐᖅ ᑮᓇᐅᔭᕐᑑᑎᐅᔪᖁᑎᒋᑦᓱᒋᑦ, ᓄᓇᐅᑉ ᐊᕕᑦᑐᓯᒪᓂᖏᑎᒍᑦ ᓄᓇᖃᕐᖄᓯᒪᔪᐃᑦ ᐃᓄᐃᑦ ᐸᓯᔭᐅᑦᓱᑎᑦ. ᐃᓗᓕᖏᑦ ᐱᐅᖕᖏᓕᕐᑎᕆᔪᐃᑦ ᐃᓄᓕᒫᓄᑦ ᑐᓴᕐᑎᓯᐅᑎᐅᑦᓱᑎᑦ ᐊᓪᓚᑕᐅᒪᔪᑦ ᑐᕌᕐᓱᑎᑦ ᓄᓇᖃᕐᖄᓯᒪᔪᓄᑦ, ᑲᑎᕕᒃ ᐃᓕᓴᕐᓂᓕᕆᓂᖅ ᓴᐳᒻᒥᒍᒪᓂᕐᒥᓂᒃ ᓄᐃᑦᓯᒍᒪᔪᑦ ᐊᓪᓚᑕᐅᔪᕕᓂᐅᑉ ᒥᑦᓵᓄᑦ ᑐᕌᖓᔪᒧᑦ ᓄᓇᖃᕐᖄᓯᒪᔪᐃᑦ ᑲᑐᑦᔨᖃᑎᒌᑦᑐᖏᑦ ᑯᐯᒃ-ᓛᐸᑐᐊᒥ (AFNQL) ᐊᒻᒪᓗ ᓄᓇᖃᕐᖄᓯᒪᔪᐃᑦ ᐃᓕᓴᕐᓂᓕᕆᔨᖏᑦ (FNEC) ᓅᕕᒻᐱᕆ 22, 2018-ᖑᑎᓪᓗᒍ.

“ᐅᐱᓇᖕᖏᒪᕆᑦᑐᑦ ᐊᓪᓚᑏᑦ ᐃᓗᕐᕈᓯᕐᓂᐊᑏᓪᓗ ᐊᐱᕐᓲᔭᕐᑕᕕᓃᑦ ᑐᓴᕐᑎᓯᒍᑎᒃᑯᑦ ᐱᓇᓱᐊᕈᓯᐅᓚᐅᔪᒥ ᐃᓗᓕᒋᔭᐅᔪᓂᑦ ᐃᓱᒪᒋᔭᖃᕐᓂᖏᒻᒪᑕ, ᐸᓯᑦᓯᖔᕐᓱᑎᑦ ᓄᓇᖃᕐᖄᓯᒪᔪᐃᑦ ᐱᔪᓐᓇᑐᖁᑎᖏᓐᓂᑦ ᑐᑭᓯᔭᐅᖔᕆᐊᖃᕐᑎᓗᒋᑦ ᓯᕗᓪᓕᒥ ᐱᐅᓯᐅᒥᓯᒪᓂᖓᓂᒃ ᐃᓗᕐᕈᓰᑦ ᐱᓇᓱᐊᕐᑕᐅᔪᑦᓴᖏᑦ,” ᑐᑭᓯᑎᑦᓯᒋᐊᕐᑐᕕᓂᖅ ᕌᐱ ᒍᐊᑦ, ᑲᑎᕕᒃ ᐃᓕᓴᕐᓂᓕᕆᓂᐅᑉ ᐊᖓᔪᕐᖄᖓ.

ᓄᓇᖃᕐᖄᓯᒪᔪᐃᑦ ᒪᓕᑦᓱᒋᑦ, ᐃᓄᐃᑦ ᐊᑐᐃᓐᓇᐅᑎᑦᓯᔪᕕᓃᑦ ᐱᔪᓐᓇᐅᑎᓂᑦ ᑯᐯᒃ ᐃᓗᕐᕈᓯᕐᓂᐊᓂᐅᑉ ᐱᓇᓱᐊᕐᑕᐅᓂᖓᓂᒃ ᑎᓕᔭᐅᑦᓱᑎᑦ ᑯᐯᒃᑯᑦ ᐃᓕᓴᕐᓂᓕᕆᓂᕐᒧᑦ ᑐᕐᖃᑕᕐᕕᖓᓄᑦ. ᒣ 2017-ᖑᑎᓪᓗᒍ, ᑲᑎᕕᒃ ᐃᓕᓴᕐᓂᓕᕆᓂᖅ ᐊᓪᓚᓯᒪᔪᓕᐅᓯᒪᔪᖅ ᑐᑭᓯᑎᑦᓯᒋᐊᕐᓱᓂ ᖃᐅᔨᒋᐊᕈᑎᓂᒃ ᐃᓗᕐᕈᓯᕐᓂᐊᓂᐅᑉ ᐱᓇᓱᐊᕋᑦᓴᖏᓐᓂᑦ ᐊᓪᓚᖁᑎᖏᓐᓂᓗ ᐊᑐᕐᑕᐅᔪᑦᓴᐅᑎᓪᓗᒋᑦ ᑫᕙᓪᓚᒍᓯᐅᑉ ᐃᓗᐊᓂ, ᑌᑲᓂ ᐃᓗᕐᕈᓯᕐᓂᐊᓃᑦ ᐃᓕᓐᓂᐊᑕᐅᔪᑦᓴᖏᑦ ᐊᑐᐃᓐᓇᐅᓕᕐᑎᓗᒋᑦ ᐊᒻᒪᓗ ᐋᕐᕿᒋᐊᕐᑕᐅᓂᕕᓂᖏᑦ ᐊᓪᓚᖁᑏᑦ ᑐᓴᕐᑎᓯᐅᑎᐅᓯᒪᓕᕐᑎᓗᒋᑦ. “ᐃᓱᐃᓗᑕᕐᑖᓯᒪᔪᒍᑦ ᑯᐯᒃᑯᑦ ᐃᓕᓴᕐᓂᓕᕆᓂᕐᒧᑦ ᑐᕐᖃᑕᕐᕕᖓᓂᒃ ᑐᑭᓯᒐᓱᐊᕆᐊᒥᒃ ᐃᓗᕐᕈᓯᕐᓂᐊᓂᐅᑉ ᐱᓇᓱᐊᕋᑦᓴᖏᓐᓂᒃ ᐊᖏᕋᓱᐊᕐᓂᒥᒃ ᐋᕐᕿᓯᒪᓂᖓᒍᑦ, ᐱᓇᓱᐊᖃᑎᖃᖔᕋᓱᐊᕐᑐᓴᐅᓕᕋᒥ ᐋᕐᖀᒋᐊᕈᑎᑦᓴᓂᒃ,” ᐊᐅᓚᔨᔪᖅ ᒍᐊᑦ.

ᐊᓂᒎᑎᑎᑦᓯᒐᓱᐊᕐᓂᖅ ᖃᓄᐃᖕᖏᓯᐊᕐᑎᓯᓂᕐᓗ ᓄᓇᕖᑦ ᐃᓕᓐᓂᐊᑎᖏᓐᓂᒃ ᐱᒻᒪᕆᐅᒍᑎᐅᓗᐊᖕᖑᐊᒪᑦ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ. ᑎᒥᐅᔫᑦᓱᓂ, ᐃᓕᓐᓂᐊᓂᓕᕆᓂᒃ ᖃᓪᓗᓈᓂᑦ ᐱᔪᓐᓇᐅᑎᓕᓐᓄᑦ ᐱᓇᓱᑦᑎᑖᒥᓂᒃ ᓄᐃᑕᑎᑕᐅᓕᐅᒥᓯᒪᒻᒪᑕ ᓄᓇᖃᕐᖄᓯᒪᔪᐃᑦ ᐃᓗᓕᖏᑦ ᐃᓕᓐᓂᐊᕈᑎᒍᓗᑐᐃᓐᓇᐅᓂᖏᓐᓂᒃ ᐃᓕᓐᓂᐊᕈᑎᐅᑦᓱᑎᑦ. “ᐃᓗᓕᖏᑦ ᑐᑭᓯᒪᓂᕐᓴᕆᓕᕐᓱᒋᑦ, ᐱᔪᓐᓇᐅᑏᑦ ᐊᑐᓕᕐᑎᑕᐅᕙᓪᓕᐊᓚᖓᔪᐃᑦ. ᑐᑭᓯᔭᐅᑦᓯᐊᕆᐊᓕᒃ ᐃᓕᓐᓂᐊᑎᕗᑦ ᐱᕚᓪᓕᕈᑎᖃᓱᖑᒻᒪᑕ ᑐᕃᓐᓇᑐᒥᒃ ᐃᓗᕐᕈᓯᓐᓂᐊᓂᐅᑉ ᐱᓇᓱᐊᕐᑕᐅᓂᖓᒍᑦ ᐃᓚᐅᑎᓪᓗᒋᑦ ᓄᓇᖃᕐᖄᓯᒪᔪᐃᑦ ᓯᓚᕐᔪᐊᒥ, ᑭᖑᕚᓅᓕᖓᔪᑦ ᐊᒻᒪᓗ ᓂᖏᕐᑎᓯᒍᑏᑦ ᐃᓗᕐᕈᓯᑎᒍᑦ ᐊᑐᐃᓐᓇᐅᑎᑕᐅᔪᓂᑦ,” ᐅᖃᕐᑐᖅ ᕌᐱ ᒍᐊᑦ.

ᐃᓱᐃᓗᑕᖅ ᐋᕐᕿᖁᓪᓗᒍ ᑯᐯᒃ ᐃᓗᕐᕈᓯᕐᓂᐊᓂᐅᑉ ᐱᓇᓱᐊᕐᑕᐅᔪᑦᓭᑦ ᐊᓪᓚᖁᑏᓪᓗ, ᐃᓕᓴᕐᓂᓕᕆᓂᖅ ᐃᒻᒥᓂᒃ ᓄᐃᑦᓯᒐᓱᐊᕐᑐᖅ ᐃᓗᕐᕈᓯᕐᒨᓕᖓᔪᒥᒃ ᐃᓕᓐᓂᐊᑕᐅᔪᑦᓴᓂᑦ, ᑐᖕᖓᕕᖃᕐᓱᓂ ᐅᑭᐅᕐᑕᑑᑉ ᐊᑑᑎᓲᖏᓐᓂᒃ, ᑯᐯᒃ ᑕᕐᕋᖓᓂ, ᑲᓇᑕᒥ ᐊᒻᒪᓗ ᓯᓚᕐᔪᐊᒥ ᒫᓐᓇ ᐊᑐᕐᑕᐅᔪᓂᑦ ᐃᓗᓕᖃᕐᑎᓗᒍ. “90%-ᒥ ᐊᒥᓲᓂᕐᓭᑦ ᐃᓕᓐᓂᐊᑏᑦ ᐃᓅᕗᑦ ᐊᓪᓚᐅᓱᑎᓪᓘᓃᑦ; ᑖᒃᑯᐊ ᐃᓕᓐᓂᐊᑏᑦ ᐃᓕᓐᓂᐊᔪᑦᓴᐅᕗᑦ ᐃᓗᕐᕈᓯᕐᒥᓅᓕᖓᔪᓂᒃ ᐱᓇᓱᐊᕋᑦᓴᓂᒃ ᐊᓪᓚᖁᑎᓂᓪᓗ,” ᓄᕐᖃᕆᐊᕈᓯᕐᑐᖅ ᒍᐊᑦ.

ᑭᓇᒃᑰᓂᕗᑦ:

ᑲᑎᕕᒃ ᐃᓕᓐᓂᐊᓂᓕᕆᓂᖅ (ᑲᑎᕕᒃ), ᑎᒥᖕᖑᑎᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ).  1978-ᒥᓂᑦ ᐱᑕᖃᕐᑎᓯᔪᑐᐊᖑᓯᒪᕗᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ.  ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ, ᐃᓕᓐᓂᐊᓂᓕᕆᓂᖅ ᐱᔪᓐᓇᓂᖃᕐᑎᑕᐅᔪᖅ ᐊᐅᓚᑦᓯᔨᐅᕕᖃᕐᑎᑕᐅᑦᓱᓂᓗ ᐃᓄᐃᑦ ᐃᓗᕐᕈᓯᖓᓂᒃ ᒪᓕᑦᓯᐊᑐᓂᒃ ᐃᓕᓐᓂᐊᕈᑎᑦᓴᓕᐅᕐᓂᒥ ᐃᓕᓐᓂᐊᑎᑦᓯᓂᕐᒥᓗ.  ᑐᕌᒐᖓ ᑎᓕᔭᐅᒪᒍᑎᒋᑦᓱᒍ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᑌᒣᒻᒪᑦ ᒪᕐᕈᐃᓕᕿᖓᕗᖅ.  ᓯᕗᓪᓕᖅ, ᓄᓇᓕᓕᒫᓂ ᐃᓕᓐᓂᐊᓂᓕᕆᔨᐅᑦᓱᓂ ᓄᓇᕕᒻᒥᐅᓕᒫᓄᑦ.  ᐁᑉᐹᒍᓪᓗ, ᑎᒥᖁᑎᒋᔭᐅᕗᖅ ᐊᑦᔨᒋᔭᐅᖕᖏᑐᓂᒃ ᐱᔪᓐᓇᐅᑎᖃᕐᓱᓂ ᐊᐅᓚᑦᓯᔨᐅᕕᖃᕐᓱᓂᓗ ᓴᐳᑦᔨᒍᑎᐅᒋᐊᕐᑐᓂᒃ, ᐱᑕᖃᕐᑎᓯᖏᓐᓇᕈᑎᐅᒋᐊᕐᑐᓂᒃ, ᐊᒻᒪᓗ ᐱᕙᓪᓕᐊᑎᑦᓯᒍᑎᓂᒃ ᐃᓄᐃᑦ ᐅᖃᐅᓯᖓᓂᒃ, ᐃᓗᕐᕈᓯᖓᓂᒃ, ᐃᓅᑦᔪᓯᖓᓂᓪᓗ.  ᐃᓕᓐᓂᐊᕈᑎᑦᓭᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᐃᓕᓐᓂᐊᕈᑎᓕᐊᑦ ᐃᓕᓐᓂᐊᑎᑦᓯᒍᑎᐅᕗᑦ ᐃᓘᓐᓇᖏᓐᓂᑦ ᑖᒃᑯᐊ 14-ᐃᑦ ᓄᓇᓖᑦ ᐃᓕᓐᓂᐊᕕᖏᓐᓂᑦ, ᐃᓄᒃᑎᑐᑦ ᐅᖃᐅᓯᕐᖄᖓᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᖓᓂᒃ.  ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 17-ᓂᒃ ᐳᒃᑭᓂᕐᓴᓂ ᐳᕐᑐᓂᕐᓴᓂᓪᓗ ᐃᓕᓐᓂᐊᕕᓐᓂᒃ ᐊᒻᒪᓗᑦᑕᐅᖅ 5-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ.  ᑐᑭᓯᒋᐊᓪᓚᕈᑎᑦᓭᑦ ᑕᑯᔭᐅᒍᓐᓇᑐᑦ ᐅᕙᓂ:  www.kativik.qc.ca

— 30 —

ᑐᑭᓯᒋᐊᑦᓯᐊᕈᒪᒍᕕᑦ, ᐅᒥᖓ ᐅᖄᕕᖃᕐᓗᑎᑦ:

ᔮᑦ ᑐᓯᓅ-ᐱᐊᕐᓃ, ᐅᖄᖃᑎᒌᓐᓂᒥ ᐊᑕᐅᑦᓯᑰᕐᑎᓯᔨ

514-482-8220 ext. 309

Back to Press release