ᑲᑎᕕᒃ ᐃᓕᓴᕐᓂᓕᕆᓂᕐᒥ ᐃᓕᓐᓂᐊᓂᕐᒥᒃ ᓄᓇᓕᓐᓂ ᑭᒡᒐᑐᕐᑏᑦ ᓈᒻᒪᓴᖕᖏᑐᑦ ᐊᑦᔨᒌᖕᖏᒍᑎᖏᑦ ᑲᑐᑦᔨᖃᑎᒌᓐᓂᒧᑦ ᐃᓚᐅᑦᓱᑎᒃ ᐱᓇᓱᑦᑏᑦ ᐱᓇᓱᒐᖏᑦᑕ ᖃᓄᐃᓕᖓᓂᖏᑦᑕ ᐊᑦᔨᒌᓕᕐᑎᑕᐅᓂᑦᓴᖏᑦ ᐱᓇᓱᑦᑕᐅᖏᓗᐊᕐᓂᖏᓐᓂᒃ

ᒪᓐᑐᔨᐊᓪ, ᑯᐯᒃ (ᔫᓂ 15, 2021) – ᔫᓂ 10ᒥ, ᑰᒃᔪᐊᕌᐱᒻᒥ ᑲᑎᒪᑦᓱᑎᒃ, ᑲᑎᕕᒃ ᐃᓕᓴᕐᓂᓕᕆᓂᕐᒥ ᐃᓕᓐᓂᐊᓂᕐᒥᒃ ᓄᓇᓕᓐᓂ ᑭᒡᒐᑐᕐᑏᑦ ᐅᖃᐅᓯᖃᓚᐅᔪᕗᑦ ᐊᑦᔨᒌᖕᖏᑎᑦᓯᒍᑏᑦ ᑲᑐᑦᔨᖃᑎᒌᓐᓂᒧᑦ ᐃᓚᐅᑦᓱᑎᒃ ᐱᓇᓱᑦᑏᑦ ᐱᓇᓱᒐᖏᑦᑕ ᖃᓄᐃᓕᖓᓂᖏᑦᑕ ᐊᑦᔨᒌᓕᕐᑎᑕᐅᓂᑦᓴᖏᑦ ᐱᓇᓱᑦᑕᐅᖏᓗᐊᕐᓂᖏᓐᓂᒃ ᓈᒻᒪᓴᖕᖏᓂᕐᒥᓂᒃ.  ᑕᒪᒃᑯᐊ ᐊᑦᔨᒌᖕᖏᑑᒍᑎᖏᑦ ᐱᒋᐊᕐᕕᖃᕐᓯᒪᒻᒪᑕ ᐱᓇᓱᑦᑏᑦ ᑲᑐᑦᔨᖃᑎᒌᓐᓂᖏᑦᑕ ᐊᖏᖃᑎᒌᓐᓂᖏᓐᓂᒃ ᓄᓇᕕᒻᒥᐅᑦ ᑲᑐᑦᔨᖃᑎᒌᓐᓂᒧᑦ ᐃᓚᐅᔪᑦ ᐱᒍᒪᔭᖏᓐᓂᒃ ᐱᑕᖃᕐᑎᓯᖕᖏᑐᓂᑦ ᐊᒻᒪᓗ ᐃᓕᓴᕐᓂᓕᕆᓂᕐᒥ ᐱᓇᓱᑦᑎᖏᓐᓂᒃ ᐃᓗᕐᕈᓯᖓᑕ ᖃᓄᐃᑦᑐᔭᐅᓂᖏᑦ ᐱᓪᓗᒋᑦ ᐊᕕᑦᑐᑎᕆᑦᓱᑎᒃ.

“ᑕᒪᓐᓇ ᐱᓀᓗᑕᖅ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐋᕐᕿᒐᓱᐊᓕᕐᑕᖓ ᐊᕐᕌᒍᑦ 20 ᐅᖓᑖᓄᑦ,” ᐅᖃᓚᐅᕐᑐᖅ ᓯᐊᔭ ᐋᓗᐸ, ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐊᖓᔪᕐᖄᖓ.  “ᐱᓇᓱᐊᕐᕕᐅᓱᑕ, ᐱᓇᓱᒐᐅᑉ ᖃᓄᐃᓕᖓᑎᑕᐅᒍᑎᖏᓐᓂᒃ ᐊᑦᔨᒌᑦᓯᐊᑐᓂᒃ ᒪᓂᔨᒍᓐᓇᕈᒪᕗᒍᑦ ᐱᓇᓱᑦᑎᓕᒫᕗᓐᓄᑦ, ᐱᓇᓱᑦᑎᑖᕆᒐᓗᐊᕈᑦᑎᒋᑦ ᓄᓇᓕᒻᒥᑦ ᐅᕝᕙᓘᓐᓃᑦ ᓄᓇᕕᐅᑉ ᓯᓚᑖᓂᑦ,” ᐅᖃᕆᐊᓪᓚᒥᑦᓱᓂ.

ᐃᓕᓐᓂᐊᓂᕐᒥᒃ ᓄᓇᓕᓐᓂ ᑭᒡᒐᑐᕐᑏᑦ ᓂᕆᐅᒍᒥᓇᕐᓂᕃᔪᕕᓃᑦ ᑕᒪᓐᓇ ᑎᑭᐅᑎᔭᐅᒍᓐᓇᓛᖁᑦᓱᒍ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐊᖏᖃᑎᒌᒐᓱᐊᕐᓂᒥᒃ ᑲᒪᔩᑦ ᑲᑎᖕᖓᔨᖏᑦᑕ ᑭᒡᒐᑐᕐᑎᖏᑎᒍᑦ (CPNCSK).  “ᓱᓕᑦᓯᐊᓱᑕ ᐊᖏᖃᑎᒌᒐᓱᐊᖃᑦᑕᑐᒍᑦ, ᑭᓯᐊᓂ ᑐᑦᓯᕋᕐᑕᕗᑦ ᓱᓕᔪᖁᑎᒋᔭᐅᖃᑦᑕᖏᒻᒪᑕ,” ᐅᖃᓚᐅᔪᔪᖅ ᐋᓗᐸ.  “ᑖᒃᑯᐊ ᐱᓇᓱᒍᑎᒋᖃᑦᑕᑕᕗᑦ ᑲᑐᑦᔨᖃᑎᒌᓐᓃᑦ ᐊᖏᖃᑎᒌᓐᓂᖏᑦ ᑕᑯᑦᓴᐅᑎᑦᓯᓯᐊᕐᓂᐹᑦ ᐱᓇᓱᐊᕐᕕᑎᒍᑦ ᑕᑯᒥᕐᕈᓂᒃᑯᑦ ᐊᑦᔨᒌᑦᑎᓯᖕᖏᓂᕐᒥᒃ.  ᐃᓄᑐᐃᓐᓇᓄᑦ ᐋᕐᕿᓱᕐᑕᐅᓯᒪᖕᖏᓇᒥᒃ; ᐃᓄᑐᐃᓐᓀᑦ ᓂᐱᖏᑦ ᑐᑦᓯᕌᖏᓪᓗ ᑐᓴᕐᑕᐅᓂᖕᖏᑐᑦ ᐊᓱᐃᓛᓪᓗ, ᓄᓇᕕᒻᒥᐅᑦ ᑭᖕᖒᒪᒋᔭᖏᓐᓂᒃ ᐱᑕᖃᕐᑎᓯᒍᑎᐅᖕᖏᓚᕿᔪᒃ.  ᐆᒃᑐᓯᒪᓕᕋᓗᐊᕐᓱᑕ ᐊᖏᖃᑎᒌᒍᑎᓂᒃ ᐊᖏᖃᑎᒌᒍᑎᖃᕋᓱᐊᕐᓱᑕ ᐅᑭᐅᓂᒃ ᐊᒥᓱᓂᒃ, ᑕᒪᑦᓱᒥᖓ ᐋᕐᖀᓯᒪᕋᑕᖕᖏᑐᒍᑦ,” ᐋᓗᐸ ᐅᖃᕆᐊᓪᓚᑐᕕᓂᖅ.

ᐃᓕᓐᓂᐊᓂᕐᒥᒃ ᓄᓇᓕᓐᓂ ᑭᒡᒐᑐᕐᑏᑦ ᑐᑭᑖᕐᓯᒪᔪᑦ ᑲᔪᓯᒋᐊᓪᓚᓚᖓᓂᕐᒥᒃ ᑲᑎᕕᒃ ᐃᓕᓴᕐᓂᓕᕆᓂᐅᑉ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ ᐱᔪᓐᓇᐅᑎᒥᓂᒃ (17.0.68) ᐊᑐᕐᓗᑎᒃ, ᐱᔪᓐᓇᐅᑎᖃᕐᕕᒋᒐᒥᐅᒃ ᑐᕃᓐᓇᓗᑎᒃ ᓇᖕᒥᓂᖅ ᐱᓇᓱᑦᑎᒥᓄᑦ ᐱᓇᓱᒐᖏᑦᑕ ᖃᓄᐃᓕᖓᓂᖏᓐᓂᒃ ᐊᖏᖃᑎᒌᒐᓱᐊᕈᓐᓇᓂᕐᒥᒃ (ᐊᖏᖃᑎᒌᒐᓱᐊᕈᑕᐅᔪᓄᑦ ᐃᓚᒋᔭᐅᖕᖏᑐᑑᑎᓪᓗᒋᑦ ᐊᓯᐊᓂᒃ ᐃᓚᒋᐊᕐᑕᐅᒍᑎᖃᖕᖏᑐᑦ ᑮᓇᐅᑦᔭᓵᖏᑦ, ᐱᓇᓱᒐᕐᒨᓖᖓᑦᓱᑎᒃ ᑮᓇᐅᑦᔭᓵᖏᓄᑦ ᐱᕙᓪᓕᖁᑎᒋᔭᐅᓲᑦ ᐱᓇᓱᒐᖏᑦᑕᓗ ᐱᔭᑦᓴᑕᖓᑕ ᖃᓄᐃᓪᓗᐅᑎᒋᓂᖏᑦ).  ᓱᓕᒋᐊᓪᓚᖅ, ᐃᓕᓐᓂᐊᓂᕐᒥᒃ ᓄᓇᓕᓐᓂ ᑭᒡᒐᑐᕐᑏᑦ ᐅᖃᓪᓚᕆᑦᑐᕕᓃᑦ ᑖᑦᓱᒪ ᑎᑭᐅᑎᔭᐅᒐᓱᐊᕐᓂᖓ ᐱᖁᔭᓕᕆᓂᒃᑯᑦ ᐱᓇᓱᐊᕐᑕᐅᔪᑦᓴᐅᒋᐊᖓ, ᑕᒪᑦᓱᒧᖓ ᐃᓕᖓᒻᒥᔪᖅ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᑯᐯᒃ ᐃᕐᖃᑐᐃᕕᒻᒪᕆᖓᓄᑦ ᐃᕐᖃᑐᐃᕕᒻᒨᑎᓯᒪᔭᖓᑦ 2016-ᒥ ᐃᓚᒋᔭᐅᑎᓪᓗᒍ.

ᑭᓇᒃᑰᓂᕗᑦ:

ᑲᑎᕕᒃ ᐃᓕᓴᕐᓂᓕᕆᓂᖅ, ᐃᓕᓐᓂᐊᓂᓕᕆᔨᒃᑯᑦ ᓄᓇᕕᒻᒥ, ᓄᐃᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ). 1978-ᒥᓂᑦ ᑲᑎᕕᒃ ᐃᓕᓴᕐᓂᓕᕆᓂᖅ ᑖᓐᓇᑐᐊᖑᑦᓱᓂ ᐱᑕᖃᕐᑎᓯᔪᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ.  ᐃᓕᓐᓂᐊᓂᕐᒨᓕᖓᔪᑦ ᐱᓇᓱᐊᕐᑕᐅᔪᑦ ᐱᕙᓪᓕᐊᑎᓯᒪᔭᖏᑦ ᐃᓕᓐᓂᐊᓂᓕᕆᓂᐅᑉ ᐊᑐᐃᓐᓇᐅᑎᑕᐅᕗᑦ ᐃᓘᓐᓇᖏᓐᓂᑦ ᐃᓕᓐᓂᐊᕕᖏᓐᓂᑦ 14-ᓂᑦ ᓄᓇᕕᒻᒥ ᓄᓇᓕᓐᓂ, ᐃᓄᒃᑎᑑᕐᖄᓱᑎᒃ ᐅᖃᐅᓯᕐᖄᒥᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐁᑉᐱᐅᑎᖃᕐᑎᓪᓗᒍ ᐅᖃᐅᓯᖓ.  ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 17-ᓂᒃ ᐃᓕᓐᓂᐊᕕᓐᓂᒃ ᐳᒃᑭᓂᕐᓴᓂᒃ ᐳᕐᑐᓂᕐᓴᓂᓪᓗ ᐊᒻᒪᓗᑦᑕᐅ 6-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ. ᑐᑭᓯᒋᐊᑦᓯᐊᕕᑦᓴᖅ ᖃᕆᑕᐅᔭᒃᑯᑦ: kativik.qc.ca.

— 30 —

ᑐᑭᓯᒋᐊᑦᓯᐊᕈᒪᒍᕕᑦ, ᐅᒥᖓ ᐅᖄᕕᖃᕐᓗᑎᑦ:

ᔮᑦ ᑐᓯᓅ-ᐱᐊᕐᓃ

ᐅᖄᖃᑎᒌᓐᓂᒥ ᐊᑕᐅᑦᓯᑰᕐᑎᓯᔨ

publicrelations@kativik.qc.ca

Back to Press release