ᑲᑎᕕᒃ ᓄᓇᓕᓕᒫᓂ ᐳᓖᓯᖏᑦ ᐊᒻᒪᓗ ᑲᑎᕕᒃ ᐃᓕᓴᕐᓂᓕᕆᓂᖅ ᐊᑎᓕᐅᕐᓂᖓ ᐱᓇᓱᖃᑎᒌᓚᖓᓂᕐᒥᓄᑦ ᐊᖏᖃᑎᒌᒍᑎᒥᒃ

ᑰᑦᔪᐊᖅ, ᑯᐯᒃ. (ᐁᕆᓕ 26, 2019) – ᑲᑎᕕᒃ ᓄᓇᓕᓕᒫᖏᓐᓂ ᐳᓖᓯᖏᑦ ᑲᑎᕕᒃ ᐃᓕᓴᕐᓂᓕᕆᓂᕐᓗ ᐅᐱᒍᓱᑉᐳᑦ ᐊᖏᖃᑎᒌᓐᓂᖃᓯᕐᒪᓂᒥᓄᑦ ᑐᑭᓯᒪᖃᑎᒌᓐᓂᒥᒃ ᐱᕕᖃᕐᑎᓯᔪᒥᒃ ᖃᓂᑕᕇᓪᓗᑎᒃ ᐱᓇᓱᐊᖃᑎᒌᓚᖓᓂᕐᒥᓂᒃ. ᐊᖏᖃᑎᒌᒍᑎ ᐱᐅᓯᐅᒥᑎᑦᓯᓚᖓᔪᖅ ᐳᓖᓯᒃᑯᑦ ᓄᓇᓕᓐᓂ ᐱᓇᓱᐊᕈᑦᔨᓂᖓᓂᒃ, ᓱᒃᑯᑎᑦᓯᑌᓕᓂᕐᒥᒃ ᐊᑐᕐᓗᑎᒃ ᐅᐃᒪᓇᕐᑐᓯᐅᕐᓂᒨᓚᕿᑎᑦᓯᑌᓕᓂᕐᒨᓕᖓᔪᓂᒃ. ᐊᑎᓕᐅᕐᑕᐅᓯᒪᔪᖅ ᐃᓘᓐᓇᖏᓐᓄᑦ ᐱᓇᓱᐊᖃᑎᒌᑦᑐᓄᑦ, ᐊᖏᖃᑎᒌᒍᑎ ᐊᑐᓕᕐᑎᑕᐅᔪᕕᓂᖅ ᐁᕆᓕ 12, 2019-ᒥ.

ᐊᖏᖃᑎᒌᒍᑎ ᑐᕌᕐᓂᓕᒃ ᑫᓪᓗᑐᐃᓂᕐᒥᒃ ᐊᑦᑕᓇᖕᖏᑐᓂᒃ ᐃᓕᓐᓂᐊᕕᖃᕐᑎᓯᓂᕐᓂᒃ, ᐋᕐᕿᓱᐃᖃᑎᒌᓪᓗᑎᒃ ᐃᓕᓴᕐᓂᓕᕆᓂᖅ, ᐃᓕᓐᓂᐊᕖᑦ ᑲᑎᕕᐅᓪᓗ ᐳᓖᓯᖏᑦ ᐱᓂᕐᓗᑌᓕᑎᑦᓯᓂᕐᒧᑦ ᐃᓕᓐᓂᐊᑎᓂᓪᓗ ᓴᐳᒻᒥᓯᓂᕐᒧᑦ ᐳᓖᓰᑦ ᐱᓇᓱᐊᓕᑐᐊᕐᐸᑕ ᐅᕝᕙᓘᓐᓃᑦ ᖃᐅᔨᓴᕐᓂᖃᕆᐊᖃᓕᑐᐊᕐᐸᑕ. “ᑖᓐᓇ ᐱᐅᔪᒥᒃ ᐊᓪᓗᕆᐊᕐᓂᐅᕗᖅ ᐱᓗᐊᕐᑐᒥᒃ ᓱᒃᑯᑎᑦᓯᑌᓕᓂᕐᒧᑦ, ᑕᒪᓐᓇ ᐱᓇᓱᐊᕋᓱᐊᕐᑕᕗᑦ ᓄᓇᓕᓐᓂ ᐱᒍᒪᔭᐅᓕᕐᑎᒐᓱᐊᕐᑕᕗᑦ”, ᐅᖃᕐᑐᖅ ᔮᓐ-ᐱᐊᕐ ᓚᕉᔅ, ᑲᑎᕕᒃ ᓄᓇᓕᓕᒫᑦ ᐳᓖᓯᖏᑦᑕ ᐊᖓᔪᕐᖄᖓ ᑐᑭᒧᐊᑦᑎᓯᔨᐅᑦᓱᓂᓗ ᐃᓄᓕᒫᓄᑦ ᐊᑦᑕᓇᕐᑐᒨᕐᑎᓯᑦᑌᓕᓂᕐᒥᒃ.

ᐊᖏᖃᑎᒌᒍᑎ ᐃᓕᑕᕆᔭᓕᒃ ᑭᖕᖒᒪᓇᕐᓂᖓᓂᒃ ᖃᓂᑦᑕᕇᓪᓗᑎᒃ ᖃᐅᔨᒋᐊᕐᕕᖃᕐᓂᒥᒃ ᐱᓇᓱᐊᖃᑎᒌᓐᓂᒥᓪᓗ ᐃᓕᓴᕐᓂᓕᕆᓂᖅ ᑲᑎᕕᐅᓪᓗ ᐳᓖᓯᖏᑦ ᐱᕙᓪᓕᐊᑎᑕᐅᓂᖓᓄᑦ ᓱᒃᑯᑎᑦᓯᑌᓕᓂᕐᒧᑦ ᑲᑎᒪᓂᐊᕈᓰᑦ  ᐱᓇᓱᐊᕐᑕᐅᓂᖓᓗ. “ᐊᓕᐊᓱᒻᒪᕆᑉᐳᒍᑦ ᐱᓇᓱᐊᕈᑎᖃᕈᓐᓇᓕᕐᓂᑎᓐᓂᒃ ᐋᕐᕿᓯᒪᔪᒥᒃ ᐃᑲᔪᕐᓯᓚᖓᔪᒥᒃ ᑲᑎᕕᐅᑉ ᐳᓖᓯᖏᑦᑕ ᐱᒍᑦᔨᓂᖓᓂᒃ ᑭᖕᖒᒪᒋᔭᖏᓐᓄᑦ ᓄᓇᕕᒻᒥᐅᑦ ᐃᓕᓐᓂᐊᑎᖏᑦ, ᐃᓱᒪᒋᔭᖃᕐᒥᓗᓂᓗ ᖁᐊᕐᓵᓇᕐᑐᑰᕐᓯᒪᓂᕐᒥᒃ-ᑐᓴᐅᒪᑎᑦᓯᓂᕐᒥᒃ ᐃᓕᓐᓂᐊᑎᑦᓯᒍᑎᐅᓲᓂᒃ ᐊᑐᕐᑕᐅᓲᓂᒃ ᐃᓕᓴᕐᓂᓕᕆᓂᕐᒧᑦ”, ᐅᖃᕐᑐᖅ ᐅᔮᐱ ᒍᐊᑦ, ᐊᖓᔪᕐᖄᖓ ᑲᑎᕕᒃ ᐃᓕᓴᕐᓂᓕᕆᓂᐅᑉ.

ᐊᖏᖃᑎᒌᓐᓂᖅ ᐱᑕᖃᕐᑎᓯᒻᒥᔪᖅ ᒪᓕᑦᑕᐅᒋᐊᓕᓐᓂᒃ ᐅᐃᒪᓇᕐᑐᖃᑲᓪᓚᑐᕕᓂᐅᑉᐸᑦ. “ᑕᑯᓐᓇᑕᕗᑦ ᑖᓐᓇ ᐊᖏᖃᑎᒌᒍᑎ ᐊᑐᕐᑕᐅᓚᖓᓂᖓᓂᒃ ᖃᓂᓪᓕᑎᕆᓂᕐᒥᒃ ᑕᒪᖏᓐᓂᒃ ᑎᒥᐅᔫᓐᓂᒃ ᐱᓇᓱᐊᕐᑕᖏᓐᓂᒃ. ᐊᑐᓕᕐᑎᑕᐅᓂᖓ ᐊᑐᕐᓂᖃᓚᖓᔪᖅ ᐃᑉᐱᒋᔭᖃᕐᓂᒧᑦ ᖃᓄᐃᖕᖏᓯᐊᕐᓂᖏᓐᓂᒃ ᐃᓕᓐᓂᐊᑎᖏᑦ, ᐃᓘᓐᓈᒍᓪᓗ ᖃᓄᐃᖕᖏᓯᐊᕐᓂᖏᑦ ᓄᓇᓖᑦ ᓄᓇᕕᒻᒥ”, ᐅᖃᕐᑐᖅ ᓚᔫᔅ.

ᐃᓕᓴᕐᓂᓕᕆᓂᖅ:

ᑲᑎᕕᒃ ᓄᓇᓕᓕᒫᑦ ᐳᓖᓯᒃᑯᖏᑦ ᐳᓖᓯᖃᕐᑎᓯᓂᕐᒥᒃ ᐱᒍᑦᔨᔨᐅᕗᑦ ᓄᓇᓕᓐᓂ 14-ᓂ ᓄᓇᕕᒻᒥ. ᐊᓪᓚᕕᒻᒪᕆᖓ ᑲᑎᕕᒃ ᐳᓖᓯᒃᑯᖏᑦᑕ ᑰᑦᔪᐊᒦᑦᑐᖅ, ᐊᒻᒪᓗ ᐳᓖᓯᖃᕐᓱᑎᒃ ᐊᑐᓂ ᓄᓇᓕᓐᓂ. ᑲᑎᕕᒃ ᐳᓖᓯᖏᑦ ᓄᐃᑕᐅᔪᕕᓃᑦ 1996-ᒥ, ᐃᓚᐅᑎᓪᓗᒍ ᐃᕐᖃᑐᐃᔨᒻᒪᕆᖓ ᑲᓇᑕᒥ ᐊᒻᒪᓗ ᑐᕐᖃᑕᕐᕕᖓ ᑭᓇᓕᒫᒃᑯᓄᑦ ᐊᑦᑕᓇᕐᑐᒨᕐᑎᓯᑦᑌᓕᔨᖏᑦ ᒪᓕᑦᓱᒋᑦ ᔦᒥᔅ ᐯ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᖓ. ᖃᐅᔨᒋᐊᑦᓯᐊᕈᒪᒍᕕᑦ ᑕᑯᔭᐅᒍᓐᓇᑐᑦ ᐅᕙᓂ: www.krpf.ca

ᑲᑎᕕᒃ ᐃᓕᓴᕐᓂᓕᕆᓂᖅ ᓄᐃᑕᐅᓯᒪᔪᖅ 1975ᒥ, ᔦᒥᓯ ᐯᒥ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᒧᑦ. 1978ᒥᓂᑦ, ᓄᓇᕕᒻᒥᐅᓕᒫᑦ ᐃᓕᓴᕐᓂᓕᕆᔨᑐᐊᕆᓯᒪᔭᖏᑦ. ᔦᒥᓯ ᐯᒥ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᐅᑉ ᐅᖃᐅᓯᕐᑕᖏᑎᒍᑦ, ᐃᓕᓴᕐᓂᓕᕆᓂᖅ ᐊᑦᔨᒋᔭᐅᖕᖏᓂᕐᓴᓂᒃ ᓄᑭᖃᕐᕕᓕᒃ ᑐᑭᑖᕈᓐᓇᕕᖃᕐᓱᓂᓗ ᐱᐅᓕᐊᕐᑕᐅᒋᐊᖃᕐᓂᖏᓐᓄᑦ ᐱᕙᓪᓕᐊᑎᑕᐅᒋᐊᖃᕐᓂᖏᓐᓄᓗ ᐃᓄᐃᑦ ᐅᖃᐅᓯᖓᑕ, ᐃᓕᕐᖁᓯᖓᑕ, ᐃᓅᓯᖓᑕᓗ, ᐃᓕᓐᓂᐊᓂᖃᕐᑎᓯᓂᒃᑯᑦ ᐃᓄᓐᓅᓕᖓᔪᓂᒃ ᐃᓕᓴᕋᑦᓴᖃᕐᑎᓯᓂᒃᑯᓗ. ᐃᓕᓴᕋᑦᓴᓕᐊᕆᔭᐅᓯᒪᔪᑦ ᐃᓕᓴᕐᓂᓕᕆᕕᒻᒥ ᐃᓕᓭᒍᑕᐅᓲᑦ ᖁᓕᓪᓗ ᓯᑕᒪᓪᓗᓂ ᓄᓇᕕᒻᒥ ᓄᓇᓕᓐᓂ, ᐃᓄᒃᑎᑐᑦ ᐅᖃᐅᓯᕐᖄᒍᑎᓪᓗᒍ ᑌᒪ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᖓᓂᒃ. ᐃᓕᓴᕐᓂᓕᕆᓂᖅ ᐊᐅᓚᑦᓯᔪᖅ ᖁᓕᓪᓗ ᓯᑕᒪᐅᔪᖕᖏᒐᕐᑐᓗᓐᓂᒃ ᐃᓕᓴᕐᕕᓂᒃ ᒥᑭᓂᕐᓴᓄᑦ ᐳᕐᑐᓂᕐᓴᓄᓪᓗ ᐊᒻᒪᓗ ᑕᓪᓕᒪᓂᒃ ᐃᓄᒻᒪᕆᓐᓄᑦ ᐃᓕᓴᕐᕕᓂᒃ ᐊᒻᒪᓗ ᐃᓕᓐᓂᐊᕕᒻᒪᕆᒻᒧᑦ ᐃᓕᓴᕐᑐᓭᑦ ᐱᒋᐅᕐᓴᔭᐅᕕᖓᓂᒃ. ᑐᑭᓯᒋᐊᑦᓯᐊᕕᑦᓴᖅ ᖃᕆᑕᐅᔭᒃᑯᑦ:  www.kativik.qc.ca

— 30 —

 

ᑐᑭᓯᒋᐊᕈᒪᓐᓂᕈᕕᑦ, ᐅᖄᓚᕕᒋᒍᓐᓇᑌᑦ:

ᔮᑦ ᐱᐊᕐᓃ ᑐᔅᓅ

ᑐᓴᐅᒪᖃᑎᒌᓐᓂᒥ ᐊᑕᐅᑦᓯᑰᕐᑎᓯᔨ

ᑲᑎᕕᒃ ᐃᓕᓴᕐᓂᓕᕆᓂᖅ

514 482-8220 ext. : 309

publicrelations@kativik.qc.ca

 

or

 

ᔫᓕᐊᓐ ᕕᐊᐅ-ᐱᑏᑦ

ᑐᓴᐅᒪᖃᑎᒌᑦᑐᓕᕆᔨ

ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᐅᖄᓚᐅᑎᖓ. 819-964-2961, ext. 2388

media@krg.ca

Back to Press release