ᐳᕕᕐᓂᑐᒥ ᕿᒥᕐᕈᐊᕋᖃᐅᑎ ᐅᒃᑯᐃᖔᓕᕐᑐᖅ ᐃᓄᖁᑎᖏᓐᓄᑦ

ᐳᕕᕐᓂᑐᖅ, ᑯᐯᒃ (ᕕᕗᐊᕆ 26, 2020) – ᐊᖏᔪᐊᓗᒻᒥᒃ ᖁᕕᐊᓱᓪᓚᕆᑦᓱᑎᒃ ᑲᑎᕕᒃ ᐃᓕᓴᕐᓂᓕᕆᓂᕐᒥ ᑭᒡᒐᑐᕐᑏᑦ—ᓄᓇᕕᒻᒥ ᐃᓕᓴᕐᓂᓕᕆᕕᖓᑦ, ᐳᕕᕐᓂᑐᒥᐅᑦ ᐊᒻᒪᓗ ᖃᕆᑕᐅᔭᒃᑯᑦ ᕿᒥᕐᕈᐊᕋᖃᕐᑎᓯᕕᒃ ᐊᐱᑎᐱ-ᑎᒧᐊᓂᔅᑰᒥ ᐊᒻᒪᓗ ᑯᐯᒃ ᑕᕐᕋᖏᓐᓄᑦ ᐅᒃᑯᐃᓯᑫᓐᓇᑐᑦ ᐅᓪᓗᒥ ᐃᓕᓴᕐᕕᐅᑉ ᓄᓇᓕᐅᓪᓗ ᕿᒥᕐᕈᐊᕋᖃᑕᐅᑎᖓᓂᒃ ᐃᓱᐊᕐᓯᕕᒻᒥ ᐃᓕᓴᕐᕕᐅᑉ ᐃᓗᐊᓂ ᐳᕕᕐᓂᑐᒥ. ᐃᓄᓕᒫᑦ ᓄᓇᓕᒻᒥ ᐊᑐᐃᓐᓇᐅᕕᖃᕐᓂᐊᓕᕐᑐᑦ ᕿᒥᕐᕈᐊᕋᕐᓂᒃ ᐊᓪᓚᖁᑎᓂᓪᓗ ᐱᖓᓱᓂᒃ ᐅᖃᐅᓯᓕᓐᓂᒃ, ᐊᑦᑕᑐᕐᕕᐅᒋᐊᕐᑐᒍᓐᓇᓱᓂ ᐅᕝᕙᓘᓐᓃᑦ ᐊᑐᐊᕐᓯᒋᐊᕐᑐᕕᐅᓗᓂ.

ᐳᕕᕐᓂᑐᒥ, ᐃᓕᓴᕐᕕᐅᑉ ᕿᒥᕐᕈᐊᕋᖃᐅᑎᖓ ᐱᓇᓱᐊᕐᑕᐅᒋᐊᖕᖓᓯᒪᔪᖅ ᐅᑭᐅᖑᑎᓪᓗᒍ 2018-ᒥ. ᐃᓕᓭᔩᑦ ᐃᓕᓵᓪᓗ ᐆᑦᑐᕋᕐᖄᓚᐅᑲᑦᑐᕕᓂᐅᑎᓪᓗᒋᑦ, ᕿᒥᕐᕈᐊᕋᖃᐅᑎ ᐅᒃᑯᐃᑕᐅᔪᕕᓂᖅ ᓄᓇᓕᒻᒥᐅᓄᑦ. “ᑕᒪᓐᓇ ᐊᖏᔪᐊᓗᒻᒥᒃ ᐱᓇᓱᐊᕐᑕᐅᔪᖅ ᐱᐅᔪᕐᔪᐊᖅ ᐃᓱᐊᕐᓯᕕᐅᑉ ᐃᓕᓴᕐᕕᖓᓄᑦ,” ᐅᖃᕐᑐᖅ ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖓ ᕌᐳᑦ ᓴᐅᕙᐅ “ᕿᒥᕐᕈᐊᕋᖃᐅᑎ ᑐᖕᖓᓇᕐᑑᖁᔭᕗᑦ ᐊᑦᑕᑐᕐᕕᓴᑦᓯᐊᖑᓗᓂᓗ. ᓯᕗᓂᕐᒥ ᓱᒐᓚᑦᑎᓯᖃᑦᑕᓛᕈᒪᕗᒍᑦ ᐊᖓᔪᕐᖄᕆᔭᐅᔪᓂᒃ, ᑲᒃᑲᓛᓂᒃ, ᐊᒻᒪᓗ ᐃᓄᒻᒪᕆᓐᓂᒃ ᑲᑎᖃᑎᒌᑦᑎᓯᓗᑕ ᐃᓱᒪᒋᔭᒥᓂᒃ ᐊᑑᑎᑎᓪᓗᒋᑦ. ᑕᒪᓐᓇ ᑐᕌᒐᕗᑦ ᐱᓇᓱᐊᕐᑕᐅᔪᒥ ᐊᕐᖁᓯᐅᕆᖁᑦᓱᒍ ᓄᐃᑕᐅᓯᒪᔪᖅ ᐃᓕᓴᕐᕕᐅᓗ ᐊᒻᒪᓗ ᓄᓇᓕᐅᓪᓗ ᐃᓄᖁᑎᖏᓐᓄᑦ,” ᐅᖃᕆᐊᓪᓚᓱᓂ.

ᕿᒥᕐᕈᐊᕋᖃᐅᑎ ᓱᒐᓚᓐᓂᐅᔪᓂᒃ ᐊᓪᓚᖃᑦᑕᓂᐊᕐᑐᑦ ᖃᕆᑕᐅᔭᒃᑯᒃ ᕓᔅᐳᒃ-ᑯᑦ ᐅᕙᓂ Iguarsivik School Facebook page ᐊᒻᒪᓗ ᐅᖃᕐᑕᐅᖃᑦᑕᓗᑎ ᑐᓴᐅᑎᒃᑯᑦ. ᕿᒥᕐᕈᐊᕋᖃᐅᑏᑦ ᑫᕙᓪᓚᒍᓯᖏᑦ ᒪᑯᐊ:

  • ᐱᖓᑦᓯᑐᑦ 5 – 7 ᐅᓐᓄᓴᒃᑯᑦ
  • ᐊᓪᓕᖏᓱᖓᕐᑐᑦ 1 – 3 ᕿᑎᕋᓕᕇᒃᑯᑦ

“ᐅᐱᒍᓱᒃᑯᒍᑦ ᐱᓗᐊᕐᑐᒥ ᐱᓇᓱᐊᖃᑎᖃᕐᑐᕕᓂᐅᒋᐊᒥᒃ ᕿᒥᕐᕈᐊᕋᖃᕐᑎᓯᕕᒻᒥ Réseau BIBLIO ATNQ-ᑯᓂᒃ. 2015 ᐱᒋᐊᓕᕐᓂᒪᑦ, ᓄᑕᐅᓯᓕᕐᑐᐃᖃᑦᑕᓯᒪᔪᑦ ᐃᓕᓴᕐᕖᑦ ᕿᒥᕐᕈᐊᕋᖃᐅᑎᖏᓐᓂᒃ ᐃᓚᖏᓐᓂ ᐃᓕᓴᕐᕕᑎᓐᓂ, ᐊᑐᐃᓐᓇᐅᕕᖃᕐᑎᓯᑦᓱᑎᑦ ᖃᓄᐃᑦᑐᑐᐃᓐᓇᓂᒃ ᕿᒥᕐᕈᐊᓂᒃ ᐊᒥᓱᖕᖑᓕᕐᑎᓯᒪᔪᓂᒃ ᐊᒻᒪᓗ ᖃᕆᑕᐅᔭᑎᒍᑦ ᐊᑐᕋᑦᓴᓂᒃ ᐃᓕᓵᑦᑎᓄᑦ,” ᐅᖃᕐᑐᖅ ᖄᔨᐊ ᑭᓕᐅᑕᖅ, ᑲᔪᓯᒃᑫᔨ ᑲᑎᕕᒃ ᐃᓕᓴᕐᓂᓕᕆᓂᕐᒥ.

Réseau BIBLIO ATNQ ᕿᒥᕐᕈᐊᕋᖃᕐᑎᓯᕕᒃ ᐅᐱᒍᓱᓪᓚᕆᑦᑐᖅ ᑐᓂᔨᒍᓐᓇᑐᕕᓂᐅᒋᐊᒥᒃ ᐱᔪᓐᓇᐅᑎᒋᔭᕐᒥᓂᒃ ᑐᑭᒧᐊᕐᑎᓯᓂᕐᒥᒃ ᐊᐅᓚᑦᓯᓂᕐᒥᓗ ᐃᑲᔪᒋᐊᒥᒃ ᓄᓇᕖᑦ ᕿᒥᕐᕈᐊᕋᖃᐅᑎᖏᓐᓂ. ᐊᓂᒎᑎᑦᓯᐊᓗᑯᒃᑯᒍᑦ ᐊᕐᓱᕈᕐᓇᑐᕕᓂᐅᒐᓗᐊᕐᒪᑦ ᖃᓂᖕᖏᑑᓂᖓ 55 ᓇᑉᐸᖓᑕ ᑕᕐᕋᖓᓂ, ᐊᒻᒪᓗ ᑕᒪᓐᓇ ᐊᑑᑎᒍᓐᓇᓱᒍ ᓲᓱᒋᔭᖃᕐᓂᑯᑦ ᐃᓗᕐᖁᓯᖃᑎᒌᖕᖏᑐᑎᒍᑦ ᐊᒻᒪᓗ ᐅᖃᐅᓯᖃᑎᒌᖕᖏᑐᑎᒍᑦ,” ᐅᖃᕐᑐᖅ ᕆᑦᓱᑦ ᑐᓱᕈᓪᑦ, ᕿᒥᕐᕈᐊᕋᖃᕐᑎᓯᕕᐅᑉ (Réseau BIBLIO de l’Abitibi-Témiscamingue et du Nord-du-Québec) ᐊᖓᔪᕐᖄᖓ.

ᐱᓇᓱᐊᖃᑎᒌᓐᓂᖅ, ᐱᒋᐊᓚᐅᕐᓯᒪᔪᖅ 2015-ᖑᑎᓪᓗᒍ ᐊᐅᐸᓗᒻᒥ, ᐃᓕᓴᕐᕕᓗ ᐊᒻᒪᓗ ᕿᒥᕐᕈᐊᕋᖃᕐᑎᓯᕕᒃ (Réseau BIBLIO) ᓄᐃᕙᓪᓕᐊᓚᐅᕐᓯᒪᔪᖅ ᐱᓇᓱᐊᖃᑎᖃᕐᓂᑯᑦ ᐃᓕᓴᕐᕕᓂ ᐃᓕᓭᔩᑦ ᐊᖓᔪᕐᖄᖏᓪᓗ. ᐃᓕᓴᕐᕕᐅᑉ ᓄᓇᓕᐅᓪᓗ ᕿᒥᕐᕈᐊᕋᖃᐅᑎᖓᑕ ᐱᕙᓪᓕᐊᑕᐅᒍᑎᖏᑦᑕ ᐃᓗᓕᖏᑦ ᒪᑯᐊ 1000-ᒐᓛᓂᒃ ᕿᒥᕐᕈᐊᓂᒃ ᐃᓄᑦᑎᑑᕐᑐᓂᒃ, ᖃᓪᓗᓈᑎᑐᑦ ᐊᒻᒪᓗ ᐅᐃᒍᐃᑎᑐᑦ, ᑲᔪᓯᑎᑕᐅᕙᓪᓕᐊᓂᖓ ᓄᑖᓂᒃ ᐊᓪᓚᖁᑎᓂᒃ ᐊᐅᓚᑦᓯᒍᑎᐅᔪᖅ ᖃᕆᑕᐅᔭᒃᑯᑦ ᐊᒻᒪᓗ ᐱᒋᐅᕐᓴᑎᑕᐅᓃᑦ ᐊᒻᒪᓗᒋᐊᓪᓚᖅ ᐃᑲᔪᕐᑐᐃᑦ ᐱᓇᓱᑦᑏᑦ ᐊᐅᓚᑦᓯᔨᐅᔪᑦ ᑲᔪᓯᑦᓯᐊᒪᖔᑕ ᕿᒥᕐᕈᐊᕋᖃᐅᑎ.

“ᐃᓕᓭᔩᑦ ᐃᑲᔪᕐᓯᒪᖕᖏᐸᑕ ᐃᓕᓴᕐᕕᒥ ᐱᓇᓱᑦᑏᓗ, ᑕᒪᒃᑯᐊ ᐱᓇᓱᐊᕐᑕᐅᔪᐃᑦ ᐱᒋᐊᓚᐅᕐᓯᒪᕋᔭᕐᓂᖏᑦᑐᑦ,” ᐅᖃᕐᑐᖅ ᑭᓕᐅᑕᖅ. “ᐅᐱᒍᓲᑦᔨᕗᖓ ᐊᖏᔪᐊᓗᒻᒥᒃ ᐱᓇᓱᐊᕐᑐᕕᓂᐅᒻᒪᑕ ᐳᕕᕐᓂᑐᒥ, ᐅᕙᓂᓗ ᐊᐅᐸᓗᒃ, ᑰᑦᔪᐊᒃ, ᓴᓪᓗᐃᑦ ᐊᒻᒪᓗ ᐊᓪᓚᖁᑎᖃᐅᑎᒃᑯᕕᕗᓐᓂ ᒪᓐᑐᔨᐊᓪᒥ, ᐱᓇᓱᑦᑏᑦ ᐱᓇᓱᐊᕐᕋᑦᓴᓂᒃ ᑲᔪᓯᐅᑦᔨᓯᒪᔪᐃᑦ ᐱᒍᓐᓇᕕᓕᒫᕐᒥᒍᑦ ᐊᒻᒪᓗ ᐱᓇᓱᖏᓐᓇᑐᐃᓪᓗ ᐊᐅᓚᑦᓯᐊᒐᓗᐊᕐᒪᖔᑕ ᑲᒪᑦᓱᑎᒃ ᕿᒥᕐᕈᐊᕋᖃᐅᑎᐅᔪᓂᒃ,” ᐅᖃᕆᐊᓪᓚᓱᓂ.

ᑲᑎᕕᒃ ᐃᓕᓴᕐᓂᓕᕆᓂᖅ ᐊᒻᒪᓗ ᕿᒥᕐᕈᐊᕋᖃᕐᑎᓯᕕ Réseau BIBLIO ᓇᑯᕐᒦᒍᒪᔪᑦ ᐳᕕᕐᓂᑐᒥᐅᓂᒃ. ᑕᒪᑦᓱᒪ ᐱᓇᓱᐊᕐᑕᐅᓂᖓ ᐊᑑᑎᒍᓐᓇᖏᓯᒪᔪᖅ ᑮᓇᐅᔭᑎᒍᑦ ᐃᑲᔪᕐᓂᖏᑐᐊᕐᐸᑕ ᓄᑖᒥ ᐊᓪᓗᕆᐊᕐᓂᖅ ᐃᓕᓴᕐᓂᒧᑦ (New Paths for Education), ᐱᒍᑦᔨᕕᐅᔪᖅ ᓄᓇᖃᕐᖄᓯᒪᔪᓂᒃ ᐱᒍᑦᔨᕖᑦ ᑲᓇᑕᒥ, ᐊᒻᒪᓗ ᒥᓂᔅᑕᖓ ᐃᓗᕐᖁᓯᓕᕆᓂᕐᒥᒃ ᐊᒻᒪᓗ ᐅᖄᖃᑎᒌᕝᕖᑦ ᑯᐯᒃᒥ.

ᕿᒥᕐᕈᒋᐊᓪᓛᕈᒪᒍᕕᑦ ᐊᑐᕋᑦᓴᐅᔪᓂᒃ ᐊᑐᐃᓐᓇᐅᑎᑕᐅᔪᓂ ᕿᒥᕐᕈᐊᕋᖃᐅᑎᒥ, ᑕᑯᒋᐊᕐᓗᒍ ᐅᓇ ᐊᓪᓚᓯᒪᔪᖅ sheet.

ᐃᓕᓴᕐᓂᓕᕆᓂᖅ:

ᑲᑎᕕᒃ ᐃᓕᓴᕐᓂᓕᕆᓂᖅ, ᐃᓕᓐᓂᐊᓂᓕᕆᔨᒃᑯᑦ ᓄᓇᕕᒻᒥ, ᓄᐃᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ). 1978-ᒥᓂᑦ ᑲᑎᕕᒃ ᐃᓕᓴᕐᓂᓕᕆᓂᖅ ᑖᓐᓇᑐᐊᖑᑦᓱᓂ ᐱᑕᖃᕐᑎᓯᔪᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ.  ᐃᓕᓐᓂᐊᓂᕐᒨᓕᖓᔪᑦ ᐱᓇᓱᐊᕐᑕᐅᔪᑦ ᐱᕙᓪᓕᐊᑎᓯᒪᔭᖏᑦ ᐃᓕᓐᓂᐊᓂᓕᕆᓂᐅᑉ ᐊᑐᐃᓐᓇᐅᑎᑕᐅᕗᑦ ᐃᓘᓐᓇᖏᓐᓂᑦ ᐃᓕᓐᓂᐊᕕᖏᓐᓂᑦ 14-ᓂᑦ ᓄᓇᕕᒻᒥ ᓄᓇᓕᓐᓂ, ᐃᓄᒃᑎᑑᕐᖄᓱᑎᒃ ᐅᖃᐅᓯᕐᖄᒥᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐁᑉᐱᐅᑎᖃᕐᑎᓪᓗᒍ ᐅᖃᐅᓯᖓ.  ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 17-ᓂᒃ ᐃᓕᓐᓂᐊᕕᓐᓂᒃ ᐳᒃᑭᓂᕐᓴᓂᒃ ᐳᕐᑐᓂᕐᓴᓂᓪᓗ ᐊᒻᒪᓗᑦᑕᐅ 6-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ. ᑐᑭᓯᒋᐊᑦᓯᐊᕕᑦᓴᖅ ᖃᕆᑕᐅᔭᒃᑯᑦ:  www.kativik.qc.ca

ᕿᒥᕐᕈᐊᕋᖃᕐᑎᓯᕕᒃ ᐊᐱᑎᐲᑎᒥᓂᔅᑲᒣᖕ ᐊᒻᒪᓗ ᑯᐯᒃ ᑕᕐᕋᖓᓂ (ATNQ)

ᕿᒥᕐᕈᐊᕋᖃᕐᑎᓯᕗᒍᑦ ᐃᓄᓕᒫᓄᐊᖓᔪᓂᒃ 70-ᓂᒃ ᓄᓇᓕᓐᓂᒃ ᐊᒥᓱᓂᒃ ᐱᒍᑦᔨᕕᑦᑕᓕᓐᓂᒃ ᐃᑲᔪᕐᓱᒋᑦ ᕿᒥᕐᕈᐊᕋᖃᐅᑏᑦ ᐋᕐᕿᓯᒪᒍᓯᖏᓐᓂᒃ ᐊᒻᒪᓗ ᐃᑲᔪᕐᓱᒋᑦ ᕿᒥᕐᕈᐊᕋᖃᐅᑏᑦ ᐊᐅᓚᑕᐅᒍᓯᖏᓐᓂᒃ ᓇᐅᑐᐃᓐᓇᑯᑦ. ᐊᒻᒪᓗᒋᐊᓪᓚᖅ ᕿᒥᕐᕈᐊᖃᕐᑎᓱᒋᑦ, ᖃᕆᑕᐅᔭᒃᑯᑦ ᐱᒍᑦᔨᕖᑦ ᐅᒃᑯᐃᖔᕐᓱᑎᒃ 24-ᓂᒃ ᑫᕙᓪᓚᒍᓯᕐᓂ ᐱᓇᓱᐊᕈᓯᑕᒫᑦ ᐃᓚᐅᑎᓪᓗᒋᑦ 5,000 ᖃᕆᑕᐅᔭᒃᑯᑦ ᕿᒥᕐᕈᐊᕃᑦ ᖃᓪᓗᓈᑎᑑᕐᑐᑦ ᐅᐃᒍᐃᑎᑐᓪᓗ, ᐊᒥᓱᐊᓗᓐᓂᒃ ᖃᕆᑕᐅᔭᒃᑯᑦ ᑕᑯᑦᓴᐅᔪᓂᒃ ᕿᒥᕐᕈᐊᕈᕐᓂᒃ ᑐᓴᕋᑦᓴᑕᓕᓐᓂᒃ 60-ᓂᒃ ᐅᖃᐅᓯᖃᑎᒌᖕᖏᑐᓂᒃ, ᑎᑭᑎᑕᐅᒍᓐᓇᑐᑦ ᑐᑦᓯᕋᐅᑎᑎᒍᑦ, ᐊᒻᒪᓗ ᓯᓚᕐᔪᐊᓕᒫᒥ ᕿᒥᕐᕈᐊᑦ, ᕿᒥᕐᕈᕕᒃ ᐅᕕᒃᑲᓄᑦ. ᑐᑭᓯᒋᐊᑦᓯᐊᕈᒪᒍᕕᑦ: www.mabiblio.quebec.

— 30 —

ᑐᑭᓯᒋᐊᓪᓛᒍᒪᕈᕕᑦ, ᐅᖄᖃᑎᒋᓗᒋᑦ:

ᔮᑦ ᑐᓯᐊᔅᓇᐅ-ᐱᐊᕐᓃ

ᐊᑕᐅᑦᓯᑰᕐᑎᓯᔨ ᑐᓴᐅᒪᖃᑎᒌᒍᑎᓂᒃ

publicrelations@kativik.qc.ca

 

ᑯᓘᐃ ᔦᖕᑲᕋ, ᕿᒥᕐᕈᐊᕋᖃᕐᑎᓯᕕᒃ Réseau BIBLIO ATNQ,

581-888-3215

cloe.gingras@reseaubiblioatnq.qc.ca

 

ᒥᓯᐊᓪ ᑌᕙᓭ, ᕿᒥᕐᕈᐊᕋᖃᕐᑎᓯᕕᒃ Réseau BIBLIO ATNQ

819-290-8413

michel.desfosses@reseaubiblioatnq.qc.ca

Back to Press release