ᐅᖃᐅᓯᕆᔭᖅ: ᐃᓕᓐᓂᐊᓂᓕᕆᓂᕐᒥ ᑭᒡᒐᑐᕐᑏᑦ ᕿᒥᕐᕈᒋᐊᓪᓚᑐᑦ ᐱᒍᒪᓕᕐᓭᒍᑎᓕᐊᖑᓯᒪᔪᓂᒃ ᐃᑭᓪᓕᒋᐊᕐᑎᓯᓯᒪᒍᑎᐅᒐᓱᐊᕐᓱᑎᒃ ᐊᐅᓪᓚᑲᑦᑕᓂᐊᕐᑐᓂᒃ ᓄᓇᕕᐅᑉ ᓯᓚᑖᓄᑦ ᓯᓚᑖᓂᑦ ᖁᕕᐊᓱᕝᕕᐅᑉ ᐊᒻᒪᓗ ᐊᕐᕌᒍᕐᕕᐅᑉ ᐅᓪᓗᖏᓐᓂᑦ ᑖᓐᓇ ᖃᓂᒻᒪᓯᖅ-19 ᓄᓇᕐᔪᐊᒥ ᐊᑑᑎᑎᓪᓗᒍ

ᐃᓕᓐᓂᐊᓂᓕᕆᓂᕐᒥ ᑭᒡᒐᑐᕐᑏᑦ ᐱᔭᕆᐊᑭᖕᖏᑐᒨᕐᓂᒥᓂᒃ ᐃᑉᐱᒋᔭᓖᑦ ᐃᒣᓕᖓᔪᒃᑯᑦ ᐊᓂᒍᕐᑎᓯᓂᕆᓚᐅᕐᑕᖏᑦ ᓄᓇᕕᒻᒥ ᓄᓇᓕᓐᓂᒃ ᖃᓂᒻᒪᓯᖅ-19-ᒥᑦ ᓴᐳᒻᒥᓯᒍᑎᐅᑎᓪᓗᒋᑦ ᐊᒻᒪᓗ ᐃᓕᓐᓂᐊᓂᓕᕆᓂᕐᒥ ᐱᒍᑦᔨᐅᑏᑦ ᐱᑕᖃᕐᑎᑕᐅᓂᖏᑦᑕ ᑲᔪᓯᑦᓯᐊᑎᑕᐅᒍᑎᖏᓐᓄᑦ ᖃᓄᐃᓕᒋᐊᕈᑎᓂᒃ, ᓄᐃᑦᓯᓱᑎᓘᕐᒪᑕ ᐱᓇᓱᑦᑎᒥᑕ ᐱᓇᓱᒐᖏᑦᑕ ᖃᓄᐃᓕᖓᓂᖏᓐᓂᒃ ᐊᑦᔨᒌᖕᖏᑎᑦᓯᒋᐊᓪᓚᕈᑎᓂᒃ.  ᑕᒪᒃᑯᐊ ᐊᑦᔨᒌᖕᖏᑑᒍᑎᖏᑦ ᐱᒋᐊᕐᕕᖃᕐᓯᒪᔪᑦ ᐱᓇᓱᑦᑏᑦ ᑲᑐᑦᔨᖃᑎᒌᓐᓂᖏᑦᑕ ᐊᖏᖃᑎᒌᓐᓂᖏᓐᓂᒃ ᓄᓇᕕᒻᒥᐅᑦ ᑲᑐᑦᔨᖃᑎᒌᓐᓂᒧᑦ ᐃᓚᐅᔪᑦ ᑭᖕᖒᒪᒋᔭᖏᓐᓂᒃ ᑭᒡᒐᑐᖕᖏᑐᓂᒃ ᐅᖓᓯᑦᑕᕇᓚᕿᑎᑦᓯᓱᑎᓗ ᐱᓇᓱᑦᑎᕗᓐᓂᒃ ᐃᓗᕐᕈᓯᕐᒧᐊᖓᔪᑎᒍᑦ.

ᐃᓕᓐᓂᐊᓂᓕᕆᓂᕐᒥ ᑭᒡᒐᑐᕐᑏᑦ ᑌᒪᖕᖓᑦ ᑐᕌᒐᙯᓐᓇᑐᑦ ᐱᓇᓱᒐᐅᑉ ᖃᓄᐃᓕᖓᓂᖏᓐᓂᒃ ᐊᑦᔨᒌᑦᓯᐊᑎᓪᓗᒋᑦ ᐱᑕᖃᕐᑎᓯᒍᓐᓇᓂᕐᒥᒃ ᑲᑎᕕᒃ ᐃᓕᓴᕐᓂᓕᕆᓂᕐᒥ ᐱᓇᓱᑦᑎᓕᒫᓄᑦ.  ᑕᒡᒐᓂ ᑎᓕᔭᐅᓯᒪᕕᒻᒥᓂ, ᐃᓕᓐᓂᐊᓂᓕᕆᓂᕐᒥ ᑭᒡᒐᑐᕐᑏᑦ ᓄᕐᖃᓚᐅᕐᓯᒪᒐᑎᒃ ᐅᖄᒍᑦᔨᖃᕐᑕᓚᐅᔪᔪᑦ ᑯᐯᒃ ᑲᕙᒪᒃᑯᖏᓐᓄᑦ ᑐᕌᒐᖃᕐᓱᑎᒃ ᐃᓘᓐᓇᓯᐊᖏᓐᓂᒃ ᐱᓇᓱᑦᑏᑦ ᑲᑐᑦᔨᖃᑎᒌᓐᓂᖏᓐᓄᑦ ᐃᓚᐅᔫᑦᓱᑎᒃ ᐱᓇᓱᑦᑎᓂᒃ ᐃᓪᓗᖃᕐᑎᓯᒍᓐᓇᓯᒍᒪᑦᓱᑎᒃ ᐊᐅᓪᓚᕈᓐᓇᐅᑎᖃᕐᑎᓯᓗᑎᓗ.

ᑕᒪᒃᑯᐊ ᐱᓇᓱᐊᒍᑎᐅᒪᕆᖏᓐᓇᑐᑦ ᐅᓪᓗᒥᒧᑦ.

ᐱᓇᓱᐊᕐᑕᐅᕗᑦ ᐊᒥᓱᐃᑎᒍᑦ, ᐃᓚᒋᔭᐅᑎᓪᓗᒋᑦ:

  1. ᐱᓇᓱᑦᑏᑦ ᑲᑐᑦᔨᖃᑎᒌᓐᓂᖓᑕ ᐊᖏᖃᑎᒌᒍᑎᖓ ᐊᖏᖃᑎᒌᒐᓱᐊᕈᑕᐅᓂᖓ ᓱᓕ ᐱᓇᓱᐊᕐᑕᐅᔪᖅ.
  2. ᑯᐯᒃ ᐃᕐᖃᑐᐃᕕᒻᒪᕆᖓᓃᑦᑎᓯᒍᑎᒃ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐊᑐᕈᓐᓇᓯᒍᑎᑖᕆᒐᓱᑦᑕᖓ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᓄᑦ ᐱᑕᖃᕆᐊᖃᕐᑎᑕᐅᔪᑦ ᐱᔪᓐᓇᐅᑏᑦ ᐊᑐᕈᓐᓇᓯᒍᒪᑦᓱᒋᑦ ᐃᒫᒃ ᑐᕃᓐᓇᓗᑎᒃ ᐊᖏᖃᑎᒌᒐᓱᐊᕈᑎᖃᕐᓗᑎᒃ ᐱᓇᓱᑦᑎᒥᑕ ᐱᓇᓱᒐᖏᑦᑕ ᖃᓄᐃᓕᖓᓂᖏᓐᓂᒃ.

ᐊᕐᕌᒍᑕᒫᖅ, ᑲᑎᕕᒃ ᐃᓕᓴᕐᓂᓕᕆᓂᖅ ᑲᒪᒋᔭᖃᓲᖅ 500 ᐅᖓᑖᓃᑦᑐᑦ ᓄᓇᕕᒻᒥ-ᐱᓇᓱᑦᓱᑎᒃ ᐱᓇᓱᑦᑏᑦ ᐊᐅᓪᓚᓂᖏᓐᓄᑦ ᐱᓇᓱᑦᑕᐅᒋᐊᖃᓲᓂᒃ, ᐊᑕᐅᑦᓯᑯᑲᓪᓚᒃ ᐊᐅᓚᑎᒋᐊᖃᓲᕆᑦᓱᒋᑦ (ᐃᓕᓐᓂᐊᓇᐅᑉ ᐊᕐᕌᒍᖓᑕ ᐱᒋᐊᕐᓂᖓᓂ, ᖁᕕᐊᓱᕝᕕᒥ ᐊᕐᕌᒍᕐᕕᒥᓪᓗ ᕿᑲᕐᓇᐅᑎᓪᓗᒍ, ᒫᑦᔨᒥ ᓄᕐᖃᖓᓚᐅᕐᑐᓇᐅᑎᓪᓗᒍ ᐊᒻᒪᓗ ᐃᓕᓐᓂᐊᓇᐅᑉ ᐊᕐᕌᒍᖓ ᐃᓱᓕᑐᐊᕐᒪᑦ).  ᓅᕕᒻᐱᕆ 9, 2020-ᐅᑎᓪᓗᒍ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐃᓕᓐᓂᐊᓂᓕᕆᓂᕐᒥ ᑭᒡᒐᑐᕐᑎᖏᑦ ᐊᖏᓚᐅᔪᕗᑦ ᐱᒍᒪᓕᕐᓭᒍᑎᓕᐊᖑᓯᒪᔪᓂᒃ ᐃᑭᓪᓕᒋᐊᕐᑎᓯᓯᒪᒍᑎᐅᒐᓱᐊᕐᓱᑎᒃ ᐱᓇᓱᑦᑎᒥᓂᒃ ᐊᐅᓪᓚᑲᑦᑕᓂᐊᕐᑐᓂᒃ ᓄᓇᕕᐅᑉ ᓯᓚᑖᓄᑦ ᓯᓚᑖᓂᑦ ᖁᕕᐊᓱᕝᕕᐅᑉ ᐊᒻᒪᓗ ᐊᕐᕌᒍᕐᕕᐅᑉ ᐅᓪᓗᖏᓐᓂᑦ ᑖᓐᓇ ᖃᓂᒻᒪᓯᖅ-19 ᓄᓇᕐᔪᐊᒥ ᐊᑑᑎᑎᓪᓗᒍ

ᑖᒃᑯᐊ ᐱᒍᒪᓕᕐᓭᒍᑏᑦ ᐊᖏᕐᑕᐅᔪᕕᓃᑦ ᖃᓂᒻᒪᓯᖅ-19 ᓄᓇᕐᔪᐊᒥ ᐊᑑᑎᓂᖓ ᑐᖕᖓᕕᒋᑦᓱᒍ, ᑐᕌᒐᖃᕐᓱᑎᓗ ᓄᓇᕕᒻᒥ ᓄᓇᓕᓐᓂᒃ ᓴᐳᒻᒥᓯᒍᑎᐅᓂᐊᕐᑎᓗᒋᑦ ᖃᓂᒻᒪᓯᖅ-19-ᒥᒃ ᐃᕐᐸᑎᑦᓯᑌᓕᒪᓂᒃᑯᑦ.

ᖃᓂᒻᒪᓯᖅ-19-ᒥᑦ ᓄᓇᓕᓐᓂᒃ ᓴᐳᒻᒥᒍᑎᑦᓴᖃᕐᑎᓯᓂᐅᑉ ᐅᖓᑖᒍᒋᐊᓪᓚᒃ, ᐃᓕᓐᓂᐊᓂᓕᕆᓂᕐᒥ ᑭᒡᒐᑐᕐᑏᑦ ᐱᓂᐊᕐᓂᖃᕋᓱᓚᐅᔪᕗᑦ ᖃᓄᐃᖕᖏᓯᐊᕐᓂᒧᑦ ᒪᓕᒉᑦ ᐊᑐᕐᑕᐅᒋᐊᓖᑦ ᐅᑎᓕᕐᐸᑕ ᓄᓇᕕᒻᒧᑦ ᐊᐅᓪᓚᕆᐊᖃᓕᕐᐸᑕ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᓂᕐᓂᒃ ᓱᕐᕃᓂᖏᓐᓂᒃ ᐃᑯᓪᓚᑎᑦᓯᒍᑎᐅᒐᓱᑦᓱᑎᒃ.  ᐱᓇᓱᑦᑏᑦ ᓄᓇᕕᒻᒧᑦ ᐊᐅᓪᓚᑐᐃᑦ ᑭᖑᓪᓕᕇᑦᑕᑎᑕᐅᓂᖏᑦ, ᐊᓂᑦᑌᓕᓚᐅᑲᓯᒪᒋᐊᖃᕐᓂᖏᑦ ᑎᑭᓯᒪᓕᕈᑎᒃ ᐊᒻᒪᓗ ᐃᓕᓐᓂᐊᕕᒻᒥ ᐃᓕᓐᓂᐊᑐᓂᒃ ᑭᖑᓪᓕᕇᑦᑕᑎᓪᓗᒋᑦ ᐅᑎᕐᐸᓕᐊᖕᖒᔭᕐᑎᓯᓂᖅ ᓇᖏᐊᕐᓇᓯᑎᑦᓯᑐᐃᓐᓇᕆᐊᖃᕐᒪᑕ ᐃᓕᓐᓂᐊᓇᐅᑉ ᐊᕐᕌᒍᓕᒫᖓᓂᒃ ᐃᓗᐃᒃᑲᐅᑎᓪᓗᒍ ᑕᑯᓐᓇᓱᒍ ᑖᒃᑯᐊ ᖁᕕᐊᓱᕝᕕᐅᑉ ᐊᕐᕌᒍᕐᕕᐅᓗ ᐅᓪᓗᖏᓐᓂ ᓄᕐᖃᖓᕕᖏᓐᓂᒃ ᐋᕐᕿᓱᐃᓯᒪᖃᕐᓂᐊᑐᐊᕐᐸᑕ.

ᑖᒃᑯᐊ ᐱᒍᒪᓕᕐᓭᒍᑏᑦ ᐃᓕᓐᓂᐊᓂᓕᕆᓂᕐᒥ ᑭᒡᒐᑐᕐᑎᓄᑦ ᐊᖏᕐᑕᐅᔪᕕᓃᑦ ᐱᓇᓱᑦᑎᓕᒫᓄᑦ, ᐃᓄᑐᐃᓐᓄᑦ ᖃᓪᓗᓈᓄᓪᓗ, ᐱᔪᓐᓇᐅᑎᖃᕐᓱᑎᒃ ᐊᐅᓪᓚᕈᓐᓇᐅᑎᓄᑦ ᐱᕙᓪᓕᖁᑎᓕᓐᓄᑦ ᑐᓂᔦᑦ ᒪᓕᑦᓱᒋᑦ ᑲᑐᑦᔨᖃᑎᒌᓐᓂᖏᑦᑕ ᐊᖏᖃᑎᒌᒍᑎᖏᑦ.  ᐅᓪᓗᓂᑦ ᖃᖕᒥᑯᑦ ᖄᖏᕐᑐᓂᑦ, ᓄᓇᕕᒻᒥᐅᑦ ᐊᒥᓱᑦ ᑲᑎᕕᒃ ᐃᓕᓴᕐᓂᓕᕆᓂᕐᒧ ᐱᓇᓱᑦᑎᒋᔭᐅᔪᑦ ᑖᒃᑯᓂᖓ ᐱᒍᒪᓕᕐᓭᒍᑎᐅᑦᓱᑎᒃ ᐊᑭᓕᐅᑎᓂᒃ ᓈᒻᒪᓴᖕᖏᓂᕐᒥᓂᒃ ᐅᖃᐅᓯᖃᖃᑦᑕᓚᐅᕐᒪᑕ.  ᐱᐅᓯᕐᓲᑎᐅᒐᓂ ᑲᑎᒪᓂᕐᒥ ᐊᑑᑎᔭᐅᓚᐅᕐᑐᒥ ᓅᕕᒻᐱᕆ 16-ᖑᑎᓪᓗᒍ, ᑖᒃᑯᐊ ᐱᒍᒪᓕᕐᓭᒍᑎᐅᑦᓱᑎᒃ ᐊᑭᓖᒍᑏᑦ ᐃᓕᓐᓂᐊᓂᓕᕆᓂᕐᒥ ᑭᒡᒐᑐᕐᑎᓄᑦ ᕿᒥᕐᕈᔭᐅᒋᐊᓪᓚᓚᐅᕐᑐᑦ.  ᐋᕐᕿᒋᐊᕐᑕᐅᓚᐅᕐᑐᑦ ᐃᓕᓐᓂᐊᓂᓕᕆᓂᕐᒥ ᑭᒡᒐᑐᕐᑏᑦ ᐊᑦᔨᒌᑦᑎᓯᓂᕐᒧᐊᖓᔪᓂᒃ ᐱᑦᔪᑎᒋᓚᐅᔪᔭᖏᓐᓂᒃ ᒪᓕᑦᓯᐊᓂᕐᓴᐅᓕᕐᑎᑕᐅᑦᓱᑎᒃ.

ᓅᕕᒻᐱᕆ 16-ᖑᑎᓪᓗᒍ ᐊᓂᒍᕐᑎᑕᐅᔪᕕᓃᑦ ᑐᑭᑖᕈᑏᑦ ᒪᓕᑦᓱᒋᑦ, ᑲᑐᑦᔨᖃᑎᒌᓐᓂᒧᑦ ᐃᓚᐅᔪᑦ ᐱᓇᓱᑦᑏ ᐱᔪᓐᓇᐅᑎᖃᕐᓱᑎᒃ ᐊᐅᓪᓚᕈᓐᓇᐅᑎᓂᒃ ᐊᑐᕈᓐᓇᓂᕐᒥᒃ ᒪᓕᑦᓱᒋᑦ ᑲᑐᑦᔨᖃᑎᒌᓐᓂᒥᑕ ᐊᖏᖃᑎᒌᒍᑎᖏᑦ ᐊᐱᕆᔭᐅᕗᑦ ᐃᓱᒪᑦᓴᓯᐅᕈᑎᒋᓗᒍ ᑐᑭᑖᖁᔭᐅᑦᓱᑎᒃ ᐊᓂᕐᕋᒥᓄᑦ ᐊᐅᓪᓚᖏᑦᑑᒐᔭᕐᓂᒥᒃ ᐃᓚᒥᓃᒋᐊᕐᑐᒐᔭᖕᖏᓂᕐᒥᒃ ᖁᕕᐊᓱᕝᕕᐅᑉ ᐊᕐᕌᒍᕐᕕᐅᓗ ᐅᓪᓗᖏᓐᓂᑦ. ᑕᐅᕐᒋᔭᐅᑎᓪᓗᒋᑦ, ᑲᑎᕕᒃ ᐃᓕᓴᕐᓂᓕᕆᓂᖅ ᑖᒃᑯᓂᖓ ᐊᑭᓖᒍᒪᔪᖅ ᑖᒃᓯᔭᕐᓯᒪᔪᓂᒃ ᐃᓗᐃᒃᑲᐅᓗᑎᒃ ᐊᑭᓕᐅᑎᓂᒃ.  ᑖᒃᑯᐊ ᑖᒃᓰᔭᕐᑕᐅᓚᖓᔪᑦ ᐃᓗᐃᒃᑫᑦ ᖃᑦᓯᐅᓂᖏᑦ ᓱᕐᖁᐃᑕᐅᒐᔭᕐᑐᑦ ᑌᑲᖕᖓᑦ ᓄᓇᕕᒻᒥ ᐱᓇᓱᐊᕐᕕᖓᓂᑦ ᓄᓇᓕᒻᒥᑦ ᐅᑎᒧᓪᓗ ᖃᖓᑦᑕᐅᑎᒋᒐᔭᕐᑕᖓᑕ ᐊᑭᖏᓐᓄᑦ.

ᐃᓕᓐᓂᐊᓂᓕᕆᓂᕐᒥ ᑭᒡᒐᑐᕐᑏᑦ ᐃᓕᑕᕐᓯᒪᕗᑦ ᐱᓇᓱᑦᑏᑦ ᑲᑎᕕᒃ ᐃᓕᓴᕐᓂᓕᕆᓂᕐᒥ ᐊᒥᓱᑦ ᑲᑐᑦᔨᖃᑎᒌᓐᓂᒧᑦ ᐃᓚᐅᔫᑦᓱᑎᒃ ᐱᔪᓐᓇᐅᑎᖃᖕᖏᒪᑕ ᐊᐅᓪᓚᕈᓐᓇᐅᑎᓂᒃ ᐱᕙᓪᓕᖁᑎᓂᒃ ᑲᑐᑦᔨᖃᑎᒌᓐᓂᒥᑕ ᐊᖏᖃᑎᒌᓐᓂᖏᑎᒍᑦ.  ᑭᒡᒐᑐᕐᑏᑦ ᐃᓕᑕᕐᓯᒥᔪᑦ ᐊᕐᓱᕈᕐᓇᒋᐊᓪᓚᒍᑎᐅᔪᓂᒃ ᖃᓂᒻᒪᓯᖅ-19 ᓄᐃᑎᑕᖏᓐᓂᒃ ᐱᓇᓱᑦᑎᓄᑦ ᓄᓇᕕᒻᒥ ᓄᓇᓕᒻᒥ ᐊᓂᕐᕋᖃᕐᑐᓄᑦ ᓄᓇᒋᑦᓱᒍ.  ᑕᒪᓐᓇ ᐃᓱᒪᒋᑦᓱᒍ, ᐃᓕᓐᓂᐊᓂᓕᕆᓂᕐᒥ ᑭᒡᒐᑐᕐᑏᑦ ᐊᖏᕈᑎᓕᕕᓃᑦ  ᐃᓗᐃᒃᑲᐅᓗᑎᒃ ᑖᒃᓰᔭᕐᓯᒪᓗᑎᒃ ᑮᓇᐅᔦᑦ ᐃᓕᖓᔪᑦ ᖃᓄᐃᖕᖏᓯᐊᕐᓂᒧᑦ ᖃᓂᒻᒪᓯᖅ-19 ᐊᑑᑎᓂᖓᓂ ᐊᑭᓖᒍᑎᐅᓂᖏᓐᓂᒃ ᐱᓇᓱᑦᑎᓄᑦ ᐊᐅᓪᓚᕈᓐᓇᐅᑎᓂᒃ ᐱᕙᓪᓕᖁᑎᖃᕐᑎᑕᐅᓂᕐᒥᒃ ᐱᔪᓐᓇᐅᑎᖃᖕᖏᑐᓄᑦ ᑲᑐᑦᔨᖃᑎᒌᓐᓂᒥᑕ ᐊᖏᖃᑎᒌᒍᑎᖏᓐᓂᑦ.  ᐃᓗᐃᒃᑲᐅᓱᑎᒃ ᑭᓇᐅᔦᑦ ᐊᑭᓕᐅᑏᑦ ᖃᑦᓯᐅᓂᖏᑦ ᐊᒻᒪᓗ ᖃᓄᐃᓕᖓᑎᓪᓗᒋᑦ ᐊᑭᖏᑦ ᑐᑭᑖᕐᑕᐅᒍᓯᖏᑦ ᐋᕐᕿᒋᐊᕐᑕᐅᔪᕕᓃᑦ ᑐᑭᑖᕈᑎᒥ ᐊᓂᒍᕐᑎᑕᐅᔪᕕᓂᕐᒥ ᓅᕕᒻᐱᕆ 16-ᖑᑎᓪᓗᒍ.

ᑲᑎᕕᒃ ᐃᓕᓴᕐᓂᓕᕆᓂᒃᑯᓂ, ᑮᓇᐅᑦᔭᓵᑦ ᖁᕝᕙᓯᕙᓪᓕᐊᓂᖏᑦ ᐱᕙᓪᓕᖁᑎᑖᖏᓪᓗ ᐱᓇᓱᑦᑎᓕᒫᓄᑦ ᐃᓄᑐᐃᓐᓇᓄᑦ ᖃᓪᓗᓈᓄᓪᓗ ᐊᑦᔨᒌᖑᕗᑦ.  ᑲᑎᕕᒃ ᐃᓕᓴᕐᓂᓕᕆᓂᖅ ᓇᓪᓕᐊᓂᓘᓐᓃᑦ ᑭᓇᐅᓂᖓ ᐊᑐᕐᓗᒍ ᐱᓂᕐᓴᐅᖏᑦᑑᑎᑦᓯᓂᕐᒥᒃ ᐃᑲᔪᕐᓯᒪᓲᖑᖕᖏᓚᖅ.

ᐱᓇᓱᑦᑏᑦ ᑮᓇᐅᑦᔭᓵᖏᑦ ᑐᑭᑖᕐᑕᐅᓲᑦ ᐃᓕᓐᓂᐊᓯᒪᓂᖏᑦ ᐊᕐᕌᒍᐃᓪᓗ ᐱᓇᓱᑦᑎᐅᕕᒋᓯᒪᓕᕐᑕᖏᑦ ᒪᓕᑦᓱᒋᑦ.  ᐱᓇᓱᑦᑎᓕᒫᑦ ᐊᑌᓐᓇᑐᒥᒃ ᐱᓇᓱᓐᓂᒧᑦ ᐊᖏᖃᑎᒌᓐᓂᑯᑦ ᐱᓇᓱᒐᓖᑦ ᐊᑐᕈᓐᓇᑎᑕᐅᒻᒥᔪᑦ ᐱᕙᓪᓕᖁᑎᓂᒃ ᐅᑯᓂᖓ:  ᕿᑐᕐᖓᑖᕐᓂᒧᑦ ᐱᔪᓐᓇᐅᑏᑦ, ᐱᐅᓯᕐᓲᑎᐅᖕᖏᑐᒧᑦ ᓄᕐᖃᖓᑫᓐᓇᓃᑦ, ᐅᐸᒋᐊᑐᔪᕐᒥᐅᖑᓂᕐᒧᑦ ᐊᑭᓕᕐᑕᐅᒋᐊᓪᓚᒍᑏᑦ, ᓂᕿᓂᒃ ᐅᑦᓯᔭᐅᒍᑎᖃᕈᓐᓇᐅᑏᑦ, ᖃᓂᒪᓂᕐᒧᑦ ᓄᕐᖃᖓᒍᓐᓇᐅᑏᑦ, ᓇᓪᓕᐅᑯᒫᓂᒃ ᐃᒻᒪᖃᐅᑎᖃᕐᓃᑦ ᐊᒻᒪᓗ ᐱᓇᓱᒍᓐᓀᒍᒫᕐᓂᓴᒥᓄᑦ ᑲᑎᕐᓱᒐᕐᓄᑦ ᐱᓇᓱᒐᖃᕐᓂᒧᓪᓗ ᓴᐳᒻᒥᔭᐅᒍᑏᑦ ᒪᓕᒐᖃᕐᑎᑕᐅᓂᖏᑦ.

ᓱᓕᒋᐊᓪᓚᒃ, ᐱᓇᓱᑦᑏᑦ ᐱᓇᓱᓐᓂᒥᓄᒃ ᓄᑦᑎᒋᐊᖃᓚᕿᔪᐃᑦ ᐱᓇᓱᑦᑎᑖᕆᔭᐅᓂᕐᒥᓄᑦ 50km-ᓂᒃ ᐅᖓᓯᓐᓂᓴᕐᓂᑦ ᐱᓇᓱᒐᕐᒥᑕ ᓇᓃᓐᓂᖓᓂᑦ ᐃᓪᓗᖃᕐᑎᑕᐅᓲᑦ ᐊᒻᒪᓗ ᐊᐅᓪᓚᕈᓐᓇᐅᑎᖃᕐᑎᑕᐅᑦᓱᑎᒃ.  ᐆᒃᑐᕋᐅᑎᒋᓗᒍ, ᐱᓇᓱᑦᑎᒃ ᐃᓄᒃᔪᐊᒥᐅᖑᓗᓂ ᐱᓇᓱᒃᑎᑖᕆᔭᐅᒍᓂ ᐱᓇᓱᒐᖓ ᑰᒃᔪᐊᒦᑦᑎᓗᒍ, ᐳᕕᕐᓂᑐᒥᓪᓘᓐᓃᑦ, ᓴᓪᓗᓂᓘᓐᓃᑦ ᐊᓯᐊᓂᓘᓐᓃᑦ ᓄᓇᓕᒻᒥ ᓄᓇᕕᒻᒥ ᐱᔪᓐᓇᐅᑎᓕᒃ ᑖᓐᓇ ᐃᓪᓗᖃᕐᑎᑕᐅᓂᕐᒥ ᐊᐅᓪᓚᕈᓐᓇᐅᑎᖃᕐᑎᑕᐅᓂᕐᒥᓗ.

ᐃᓕᓐᓂᐊᓂᓕᕆᓂᕐᒥ ᑭᒡᒐᑐᕐᑏᑦ ᖃᐅᔨᒪᑦᓯᐊᑐᑦ ᑖᓐᓇ 50 km-ᓂᒃ ᒪᓕᒐᖃᕈᑎᖓ ᓄᐃᑦᓯᓲᖑᒻᒪᑦ ᐱᓇᓱᑦᑎᒥᑕ ᐱᓇᓱᒐᖏᑦᑕ ᖃᓄᐃᓕᖓᓂᖏᓐᓂᒃ ᐊᑦᔨᒌᖕᖏᑎᑦᓯᒍᑎᓂᒃ; ᐱᓇᓱᑦᑏᑦ ᓄᓇᓕᒻᒥᓂ ᐱᓇᓱᑦᑎᑖᕆᔦᑦ ᐃᓄᑐᐃᓐᓇᐅᓂᕐᓴᐅᓲᑦ ᐊᒻᒪᓗ ᐱᓇᓱᑦᑏᑦ ᐱᓇᓱᑦᑎᑖᕆᔦᑦ 50 km-ᓂᒃ ᐅᖓᓯᓐᓂᓴᕐᒥᒃ ᐱᓇᓱᕝᕕᒋᓚᖓᔭᒥᓄᑦ ᐅᖓᓯᓐᓂᓕᓐᓂᒃ ᖃᓪᓗᓈᖑᓂᕐᓴᐅᓲᑦ.  ᑕᒪᓐᓇ ᐱᐅᓯᕆᔭᐅᓲᖅ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ (ᐊᓯᖏᑦᑕᓗ ᓄᓇᕕᒻᒥ ᑎᒥᐅᔪᐃᑦ) ᐱᑖᕆᑐᐃᓐᓇᓯᒪᔭᖓᑦ ᐊᕐᕌᒍᓂᑦ ᐊᒥᓱᓂᑦ ᐱᓇᓱᑦᑏᑦ ᑲᑐᑦᔨᖃᑎᒌᓐᓂᖏᑦᑕ ᐊᖏᖃᑎᒌᓐᓂᖏᓐᓄᑦ ᐊᖏᖃᑎᒌᒐᓱᐊᕈᓯᐅᓕᓂᕐᓂᑦ ᓄᓇᕕᒻᒥᐅᑦ ᑲᑐᑦᔨᖃᑎᒌᓐᓂᒧᑦ ᐃᓚᐅᔪᑦ ᐱᔪᒪᖏᓐᓂᒃ ᓱᔭᖃᖕᖏᓭᓐᓇᓯᒪᓕᒫᕐᓱᑎᒃ.

ᐃᓕᓐᓂᐊᓂᓕᕆᓂᕐᒥ ᑭᒡᒐᑐᕐᑏᑦ ᑐᕌᒐᖃᖏᓐᓇᓕᒫᕐᓯᒪᔪᑦ ᑐᕌᒐᖃᑦᓭᓇᕐᓱᑎᓗ ᑲᑎᕕᒃ ᐃᓕᓴᕐᓂᓕᕆᓂᕐᒥ ᐱᓇᓱᑦᑎᓕᒫᓄᑦ ᐱᓇᓱᒉᑦ ᖃᓄᐃᓕᖓᑎᑕᐅᒍᑎᖏᓐᓂᒃ ᐊᑦᔨᒌᑦᓯᐊᑐᓂᒃ ᐱᑕᖃᕐᑎᓯᓂᕐᒥᒃ, 50 km-ᓂᒃ ᐅᖓᓯᓐᓂᖃᕐᓂᒥᒃ ᒪᓕᒐᕐᒥᒃ ᒪᓕᓪᓗᑯᐊᐱᑦᑎᑕᐅᒍᓐᓀᓗᑎᒃ.

ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐱᓇᓱᑦᑎᓄᑦ ᓈᒻᒪᒋᔭᐅᖕᖏᕙᓪᓛᓂᖅ ᑕᒐᑕᒐᐅᔪᖅ ᓵᖕᖓᓕᕐᑕᖓ ᑌᒃᑯᓇᖕᖓᑦ ᐊᐅᓪᓚᕈᓐᓇᐅᑎᓄᑦ ᐃᓪᓗᖃᕐᑎᑕᐅᓂᕐᓄᓗ ᑲᑐᑦᔨᖃᑎᒌᓐᓂᒥᑕ ᐊᖏᖃᑎᒌᓐᓂᖏᑎᒍᑦ ᐱᔪᓐᓇᐅᑎᖃᕐᑎᑕᐅᖕᖏᑐᓂᑦ ᓄᐃᑕᑎᑦᓯᓯᐊᕐᒪᑦ ᐱᓇᓱᒍᓯᐅᔪᒥᒃ ᓄᓇᕕᒻᒥᐅᓂᒃ ᑲᑐᑦᔨᖃᑎᒌᓐᓂᒧᑦ ᐃᓚᐅᔪᓂᒃ ᐊᑦᔨᒋᔭᐅᑎᑦᓯᖏᑦᓯᐊᑐᒥᒃ ᐊᓯᑦᔨᑐᐃᑦᓴᐅᑎᒋᒋᐊᖃᓕᕐᓂᒥᒃ.  ᑯᐯᒃ ᑲᕙᒪᖓᓂᒃ ᐊᔭᐅᕐᑐᐃᓚᕆᑦᑐᒍᑦ ᑐᓴᕐᑕᐅᓯᐊᒍᒪᓕᕐᓱᑕ ᐅᖃᕇᑦᓯᐊᑎᑕᐅᓗᑕ, ᐃᑲᔪᖁᑦᓱᒋᑦ ᑲᑎᕕᒃ ᐃᓕᓴᕐᓂᓕᕆᓂᕐᒥᒃ ᑖᒃᑯᓂᖓ ᐱᓀᓗᑕᓂᒃ ᐱᒋᐊᕐᕕᓚᕆᖏᓄᑦ ᐋᕐᕿᒋᐊᕐᑕᐅᓂᖏᓐᓂᒃ ᐱᓇᓱᑦᑎᓗᒋᑦ, ᐃᒫ ᐱᓇᓱᑦᑎᖃᕐᓂᕗᑦ ᐊᑭᓕᕐᑐᐃᒍᓯᕗᓪᓗ ᓇᓪᓕᖁᐊᕆᔭᐅᒋᐊᕐᓂᓴᐅᓕᕐᓂᐊᒪᑕ ᐊᓯᖏᓐᓄᑦ ᓄᓇᕕᒻᒥ ᑎᒥᐅᔪᓄᑦ  ᑕᒪᒃᑯᓂᖓ ᐊᕝᕕᐊᓗᑕᕐᓂᒃ ᐱᑕᖃᕈᓐᓀᓕᕐᑎᓯᓂᕐᒥᒃ ᐱᓇᓱᑦᑎᓕᒫᒥᓂᒃ ᐊᑦᔨᒌᑦᓯᐊᒥᒃ ᐱᓂᐊᕐᓂᖃᕐᕕᖃᕈᓐᓇᓂᕐᒥᒃ ᐱᔭᖃᑦᓯᐊᕈᓐᓇᓯᓯᒪᔪᓄᑦ.

ᑭᖑᓪᓕᐹᒥ, ᓄᓇᕕᒻᒥ ᐃᓕᓐᓂᐊᑏᑦ ᑲᑎᕕᒃ ᐃᓕᓴᕐᓂᓕᕆᓂᕐᒥ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᑏᑦ ᑮᓇᐅᔭᖃᕐᑎᑕᐅᓂᒃᑯᑦ ᐃᑲᔪᕐᑕᐅᒍᑎᖏᓐᓄᑦ ᐃᓚᐅᔪᑦ ᖃᓄᐃᓕᖓᔪᒦᓐᓂᖓ ᐅᖃᐅᓯᐅᖃᑦᑕᓯᒪᒻᒥᔪᖅ ᖃᕿᐊᕐᑕᐅᓂᒃᑯᑦ.  ᐃᓕᓐᓂᐊᓂᓕᕆᓂᕐᒥ ᑭᒡᒐᑐᕐᑏᑦ ᓇᓗᓀᕐᓯᒍᒪᕗᑦ ᐃᒫᒃ ᐃᓕᓐᓂᐊᑏᑦ ᑮᓇᐅᖃᕐᑎᑕᐅᓂᒃᑯᑦ ᐃᓕᓐᓂᐊᓂᕐᒥᓂ ᐃᑲᔪᕐᑕᐅᔪᑦ  ᖁᕕᐊᓱᕝᕕᒥ ᐊᕐᕌᒍᕐᕕᒥᓪᓗ ᓄᕐᖃᖓᓐᓇᓕᕐᐸᑦ ᐊᐅᓪᓚᓛᖕᖏᑐᐊᕈᑎᒃ ᒪᓂᔨᕕᐅᓚᐅᔪᕗᑦ ᐃᓗᐃᒃᑲᐅᑎᓪᓗᒍ ᑖᒃᓰᔭᕐᑕᒥᒃ ᐊᑭᓕᐅᑎᒥᒃ.  ᑖᑦᓱᒪ ᐊᑭᓕᐅᑎᐅᑉ ᖃᑦᓯᐅᓂᖓ ᐃᑉᐱᒋᔭᖃᕐᒥᔪᖅ ᐃᓕᓐᓂᐊᑎᐅᑉ ᐆᒪᑕᖏᑦᑕ ᖃᑦᓯᐅᓂᖏᓐᓂᒃ.  ᐱᒻᒪᕆᐅᒋᕗᖅ ᐅᖃᐅᓯᕆᓗᒍ ᒪᓐᓇ ᐃᓕᓐᓂᐊᑏᑦ ᐃᓕᓐᓂᐊᓂᕐᒥᓂ ᐃᑲᔪᕐᑕᐅᔪᐃᑦ ᓇᓪᓕᐅᑎᑦᑕᑐᓂᒃ ᑮᓇᐅᔭᕐᑖᑎᑕᐅᓂᕆᓲᖏᑦ ᑭᑦᑐᕋᕐᑎᑕᐅᓲᖑᖕᖏᑐᑦ ᖁᕕᐊᓱᕝᕕᒥ ᐊᕐᕌᒍᕐᕕᒥᓪᓗ ᓄᕐᖃᖓᕖᑦ ᐅᓪᓗᖏᓐᓂᑦ, ᐊᐅᓪᓚᓂᐊᕋᓗᐊᕐᐸᑕ ᐊᐅᓪᓚᓂᐊᖕᖏᑲᓗᐊᕐᐸᑕᓗ.

Back to Press release