ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᑯᑦ ᓄᑖᓂᒃ ᖃᓄᐃᖕᖏᓯᐊᕐᓂᒧᑦ ᒪᓕᒐᕐᓂᒃ ᐊᐅᒡᒍᓯ 10, 2020-ᒥ ᑐᓴᕐᓴᐅᒍᑎᖃᓚᐅᔪᓂᖓᑕ ᑭᖑᓂᖓᒍᑦ. ᐃᓕᓴᕐᓂᓕᕆᓂᒃᑯᑦ ᐋᕐᕿᒋᐊᕆᐊᓯᒪᓕᕐᑐᑦ ᖃᓄᐃᖕᖏᓯᐊᕐᓂᒧᑦ ᒪᓕᒐᕐᓂᒃ ᐊᑐᕐᑎᑕᐅᓚᖓᔪᓂᒃ ᐃᓕᓐᓂᐊᕕᓐᓂᑦ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᓗ.  ᑕᒪᑦᓱᒪ ᐱᓇᓱᐊᕐᑕᐅᓂᖓ ᐱᔭᕇᕐᑕᐅᓚᐅᕐᑐᖅ ᓄᓇᕕᒻᒥ ᐃᓗᓯᓕᕆᔨᒃᑯᑦ ᐱᓇᓱᖃᑎᒋᑦᓱᒋᑦ.

ᐅᒃᑯᐃᑕᐅᒋᐊᓪᓚᓂᖏᑦ ᐃᓕᓐᓂᐊᕖᑦ ᐃᓄᒻᒪᕇᑦ ᐃᓕᓐᓂᐊᕕᖏᓪᓗ, ᑫᕙᓪᓚᒍᓯᒋᓂᐊᕐᑕᖏᑦ ᐊᒻᒪᓗ ᐃᓕᓐᓂᐊᖃᑎᒌᑦᑐᑦ ᖃᑦᓯᐅᒋᐊᖃᕐᓂᖏᑦ ᐊᑐᓂᑦ ᐃᓕᓐᓂᐊᕕᓐᓄᑦ ᐃᓄᒻᒪᕇᑦ ᐃᓕᓐᓂᐊᕕᖏᓐᓄᓗ ᐸᕐᓇᑕᐅᓯᒪᔪᑦ ᐃᑉᐱᒋᔭᐅᑦᓯᐊᑎᓪᓗᒋᑦ ᓄᓇᓕᒻᒥ ᐊᑐᐃᓐᓇᖃᕐᓂᖏᑦ, ᐃᒡᓗᔪᐊᖏᑦ, ᐃᓕᓐᓂᐊᑏᑦ ᖃᑦᓯᐅᓂᖏᑦ ᐊᒻᒪᓗ ᖃᓄᐃᓘᖁᔨᒍᑎᖏᑦ ᐅᑯᐊ:

  • ᓄᓇᕕᒻᒥ ᑯᐯᒻᒥᓗ ᖃᓄᐃᖕᖏᓯᐊᕐᓂᓕᕆᓂᕐᒥ ᐊᖓᔪᕐᖃᐅᕕᓖᑦ;
  • ᑯᐯᒃ ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᖓ (MEES);
  • ᖃᐅᔨᓴᕐᑏᑦ ᐱᓇᓱᕝᕕᒥ ᐱᐅᓯᐅᒋᐊᓕᓐᓂᒃ, ᐊᑦᔨᒌᑦᑎᓯᒋᐊᖃᕐᓂᒥᒃ, ᖃᓄᐃᖕᖏᓯᐊᕐᓂᒥᒃ ᐊᑦᑕᓇᕐᑌᓕᒋᐊᖃᕐᓂᒥᓪᓗ (CNESST).

ᐊᐅᒡᒍᓯ 24, 2020-ᐅᑎᓪᓗᒍ, ᓄᓇᕕᒻᒥ ᖃᓂᒻᒪᓯᕐᒥᒃ COVID-19-ᒥᒃ ᐱᑕᖃᖕᖏᑐᖅ.  ᑭᓯᐊᓂ, ᑕᒪᓐᓇ ᐊᒻᒪᓗ ᖃᓄᐃᖕᖏᓯᐊᕐᓂᓕᕆᓂᕐᒥ ᓇᐅᓕᒫᓅᓕᖓᔪᑦ ᒪᓕᒐᖏᑦ ᐊᑐᕐᑎᑕᐅᔪᑦ ᐊᓯᑦᔨᓴᐅᑎᒋᑐᐃᓐᓇᕆᐊᓖᑦ.

ᑕᒪᓐᓇ ᐃᓱᒪᒋᓗᒍ, ᐅᑯᐊ ᖃᓄᐃᖕᖏᓯᐊᕐᓂᒧᑦ ᒪᓕᒉᑦ ᐃᓕᓐᓂᐊᕕᓐᓂᑦ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᓗ ᐊᑐᕐᑎᑕᐅᓚᖓᔪᑦ, ᐱᓇᓱᑦᑎᓄᑦ, ᐃᓕᓐᓂᐊᑎᓄᑦ ᐊᒻᒪᓗ ᑖᒃᑯᓄᖓ ᐳᓛᕆᐊᕐᑐᓄᑦ.

 

ᓂᐅᕐᖃᕇᒃᑯᑏᑦ:  ᑭᓇᒃᑯᓅᑦ ᑖᒃᑯᐊ ᐊᑐᕐᑕᒋᐊᓖᑦ?

ᐃᓕᓐᓂᐊᕖᑦ ᐊᒻᒪᓗ ᐃᓄᒻᒪᕇᑦ ᐃᓕᓐᓂᐊᕕᖏᑦ ᐊᑐᐃᓐᓇᖃᕐᑎᓯᓂᐊᕐᑐᑦ ᐃᓕᓐᓂᐊᑎᓄᑦ ᐱᓇᓱᑦᑎᓄᓪᓗ ᑭᖕᖒᒪᑦᓯᔪᓄᑦ ᐊᑕᐅᓯᐊᕐᓗᑎᒃ ᐊᑐᕐᑕᐅᓲᓂᒃ ᓂᐅᕐᖃᕇᒃᑯᑎᓂᒃ.  ᐃᓕᓐᓂᐊᑏᑦ ᐱᓇᓱᑦᑏᓗ ᓇᖕᒥᓂᕐᒥᓂᒃ ᐊᑐᕆᐊᓕᕐᕿᒍᓐᓇᑐᓂᒃ ᓂᐅᕐᖃᕇᒃᑯᑎᓯᒪᒍᓐᓇᑐᑦ.

ᐃᓕᓐᓂᐊᑏᑦ

ᐃᓕᓐᓂᐊᕆᐊᖕᖓᑐᓂᑦ ᐳᕐᑐᓂᓕᕐᓄᑦ 4-ᒧᑦ ᐊᑐᕆᐊᑐᕐᑎᑕᐅᖕᖏᑐᑦ ᓂᐅᕐᖃᕇᒃᑯᑎᓂᒃ:

  • ᐅᖓᓯᑦᑕᕇᑦᑎᖏᑦᑑᓗᑎᒃ
  • ᐱᓇᓱᑦᑏᑦ ᑖᒃᑯᓂᖓ ᐱᓇᓱᖃᑎᓖᑦ ᐊᑐᕐᑎᓗᒋᑦ ᓇᖕᒥᓂᖅ ᓴᐳᒻᒥᓯᒪᒍᑎᓂᒃ

ᐳᕐᑐᓂᓕᓐᓂᑦ 5-ᒥᑦ ᐳᕐᑐᓂᕐᐹᖏᓐᓄᑦ ᐊᑐᕆᐊᓖᑦ ᓂᐅᕐᖃᕇᒃᑯᑎᓂᒃ:

  • ᓅᑲᑦᑕᓕᕈᑎᒃ ᓇᒧᑐᐃᓐᓇᖅ ᐃᓕᓐᓂᐊᕕᐅᑉ ᐃᓗᐊᓂ
  • ᐅᓯᔭᐅᓕᕈᑎᒃ ᐃᓕᓐᓂᐊᑎᓂᒃ ᐅᓯᑲᑦᑕᐅᑎᒧᑦ
  • ᐃᓕᓐᓂᐊᕕᒻᒥᓂ ᐃᑦᓯᕙᕕᒻᒥᓃᒍᓐᓀᑐᐊᕈᑎᒃ

ᐃᓕᓐᓂᐊᑏᑦ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᑦ:

  • ᓇᒧᑐᐃᓐᓇᖅ ᓅᑲᑦᑕᓕᑐᐊᕈᑎᒃ ᐃᓄᒻᒪᕇᑦ ᐃᓕᓐᓂᐊᕕᖓᑕ ᐃᓕᓐᓂᐊᑏᑦ ᓯᓂᑦᑕᕕᖏᑦᑕᓘᓐᓃᑦ ᐃᓗᐊᓂ
  • ᐅᓯᔭᐅᓕᑐᐊᕈᑎᒃ ᐃᓕᓐᓂᐊᑎᓂᒃ ᐅᓯᑲᑦᑕᐅᑎᒧᑦ
  • ᐃᑦᓯᕙᕕᒻᒥᓃᒍᓐᓀᑐᐊᕈᑎᒃ ᐃᓕᓐᓂᐊᕕᒻᒥ ᖃᓂᑕᖃᑐᐊᕈᓂ ᐃᓕᓐᓂᐊᖃᑎᒥᓂᒃ 1.5m ᓱᕐᖄᑎᕈᑏᑦ ᐅᖓᓯᓐᓂᓴᐅᖕᖏᑐᒥᒃ

ᐱᓇᓱᑦᑏᑦ

ᐱᓇᓱᑦᑏᑦ ᐊᑐᕆᐊᓖᑦ ᓂᐅᕐᖃᕇᒃᑯᑎᒥᒃ:

  • ᓅᑲᑦᑕᓕᑐᐊᕈᑎᒃ ᐃᓕᓐᓂᐊᕕᐅᑉ, ᐃᓄᒻᒪᕇᑦ ᐃᓕᓐᓂᐊᕕᖓᑕ ᐅᕝᕙᓘᓐᓃᑦ ᐃᓕᓐᓂᐊᑏᑦ ᓯᓂᑦᑕᕕᖏᑦᑕ ᐃᓗᐊᓂ
  • 2m ᓱᕐᖄᑎᕈᑏᓐᓂᒃ ᐃᓕᓐᓂᐊᑎᓄᑦ ᖃᓂᓐᓂᓴᐅᑐᐊᕈᑎᒃ
  • ᐊᖁᓕᑐᐊᕈᑎᒃ ᐅᓯᔭᐅᓕᑐᐊᕈᑎᓘᓐᓃᑦ ᐃᓕᓐᓂᐊᑎᓂᒃ ᐅᓯᑲᑦᑕᐅᑎᒥᒃ

ᐳᓛᕆᐊᕐᑐᑦ

ᐳᓛᕆᐊᕐᑐᑦ ᐊᑐᕆᐊᓖᑦ ᓂᐅᕐᖃᕇᒃᑯᑎᓂᒃ:

  • ᐃᑎᕐᓯᒪᓕᑐᐊᕈᑎᒃ ᐃᓕᓐᓂᐊᕕᓐᓂᑦ, ᐃᓄᒻᒪᕇᑦ ᐃᓕᓐᓂᐊᕕᖏᓐᓂᑦ ᐃᓕᓐᓂᐊᑏᓪᓗ ᓯᓂᑦᑕᕕᖏᓐᓂᑦ.
  • ᓂᐅᕐᖃᕇᒃᑯᑎᒥᓂᒃ ᐲᕐᓯᓯᒪᒍᓐᓇᑐᖅ ᓴᓂᓪᓕᖓ ᐅᖓᓯᓐᓂᖃᑐᐊᕐᐸᑦ 1.5m ᓱᕐᖄᑎᕈᑏᓐᓂᒃ (ᐆᒃᑐᕋᐅᑏᑦ, ᐃᓕᓐᓂᐊᕕᒻᒥ ᐱᑦᔪᑎᖃᕐᓱᑎᒃ ᐱᓂᐊᕐᓂᖃᕐᑎᓗᒋᑦ: ᑐᓴᕐᓂᔮᕐᑐᑦ, ᑕᑯᓐᓇᐅᔮᕐᑐᑦ, ᐅᓂᒃᑳᕕᐅᔪᑦ, ᐊᓯᖏᓪᓗ)

 

ᐃᓅᖃᑎᒌᑦ ᐅᖓᓯᑦᑕᕇᒋᐊᖃᕐᓂᖏᑦ:  ᓱᓀᑦ ᐊᑐᕐᑎᑕᐅᕙᑦ?

ᐃᓕᓐᓂᐊᕕᑐᐃᓐᓇᓂ

  • ᐃᓕᓐᓂᐊᑎᒃ-ᐃᓕᓐᓂᐊᑎᒃ ᑕᒡᒐᓂᑦᓭᓇᖅ ᖃᕆᐊᒥ ᐃᓕᓐᓂᐊᕕᓖᒃ = 0m ᓱᕐᖄᑎᒍᑏᑦ
  • ᐃᓕᓐᓂᐊᑎᒃ-ᐃᓕᓐᓂᐊᑎᒃ ᖃᕆᐊᖃᑎᒌᖕᖏᑑᒃ ᐃᓕᓐᓂᐊᕕᒻᒥ ᒡ 1m ᓱᕐᖄᑎᒍᑎᒃ
  • ᐃᓕᓐᓂᐊᑎᒃ-ᐱᓇᓱᑦᑎᒃ = 2m ᓱᕐᖄᑎᕈᑏᒃ
  • ᐱᓇᓱᑦᑎᒃ-ᐱᓇᓱᑦᑎᒃ = 2m ᓱᕐᖄᑎᕈᑏᒃ

ᐃᓄᒻᒪᕇᑦ ᐃᓕᓐᓂᐊᕕᖏᓐᓂ

  • ᐃᓕᓐᓂᐊᑎᒃ-ᐃᓕᓐᓂᐊᑎᒃ = = 1.5m ᓱᕐᖄᑎᕈᑏᒃ
  • ᐃᓕᓐᓂᐊᑎᒃ-ᐱᓇᓱᑦᑎᒃ = 2m ᓱᕐᖄᑎᕈᑏᒃ
  • ᐱᓇᓱᑦᑎᒃ-ᐱᓇᓱᑦᑎᒃ = 2m ᓱᕐᖄᑎᕈᑏᒃ

ᐱᑦᔪᑎᖓ: ᓄᓇᕕᒻᒥ ᐃᓕᓴᕐᓇᐅᑉ ᐊᕐᕌᒍᖓᑕ ᐱᒋᐊᕐᕕᖓ

ᐅᒃᑯᐃᕆᐊᓪᓚᓂᖏᑦ ᐃᓕᓴᕐᕖᑦ ᐊᒻᒪᓗ ᐃᓄᒻᒪᕇᑦ ᐃᓕᓴᕐᑕᐅᕕᖏᑦ, ᓈᒻᒪᓯᑦᑕᕈᑎᖏᑦ ᐊᒻᒪᓗ ᐅᓄᕐᓂᖏᑦ ᐃᓕᓭᕕᐅᑉ ᐃᓗᐊᓃᒍᓐᓇᖃᑦᑕᓂᐊᕐᑐᑦ ᐸᕐᓀᑕᐅᓯᒪᔪᑦ ᑐᕌᖓᑎᓪᓗᒋᑦ ᐃᓘᓐᓀᓄᑦ ᐃᓕᓴᕐᕕᓄᑦ ᐃᓕᓐᓂᐊᑎᑦᓯᕕᓐᓄᓗ ᐃᓱᒪᒋᑦᓱᒋᑦ ᓄᓇᓕᖏᑦᑕ ᖃᓄᐃᓕᖓᓪᓚᕆᓐᓂᖏᑦ, ᐃᓪᓗᖏᑦ, ᐃᓕᓵᑦ ᐅᓄᕐᓂᖏᑦ ᐊᒻᒪᓗ ᒪᓕᒐᓕᐊᖏᑦ ᐅᑯᐊ:

  • ᓄᓇᕕᒻᒥ ᐊᖓᔪᕐᖄᑦ
  • ᑯᐯᒻᒥ ᐃᓕᓴᕐᓂᓕᓂᕆᕐᒧᑦ ᑐᕐᖃᑕᕐᕕᒃ (MEES)
  • Commission des normes, de l’équité, de la santé et de la sécurité du travail (CNESST).

ᐃᓕᓴᕐᓂᓕᕆᓂᐅᑉ ᑐᓴᕐᑎᓯᖃᑦᑕᓛᕐᓂᖏᑦ ᐱᒋᐊᓚᖓᔪᑦ ᐊᐅᒍᓯᑎᒥ, ᓇᓗᓀᕐᓯᓗᑎᒃ ᖃᓄᐃᖕᖏᓯᐊᕐᑎᓯᒋᐊᕐᓂᓄᑦ ᐊᒻᒪᓗ ᐊᑦᑕᓀᑦᑐᒦᑦᑎᓯᓂᕐᓄᑦ ᒪᓕᒐᕐᓄᐊᖓᔪᓂᒃ ᒪᓕᑦᑕᐅᒋᐊᖃᖃᑦᑕᓂᐊᕐᑐᓄᑦ ᐃᓕᓴᕐᕕᓂ ᐊᒻᒪᓗ ᐃᓄᒻᒪᕇᑦ ᑭᒡᒐᑐᕐᑕᐅᕕᖏᓐᓂ.

ᑕᒪᓐᓇ ᐱᓪᓗᒍ, ᐃᓕᓴᕐᓇᐅᑉ ᐊᕐᕌᒍᖓ ᐅᕕᒃᑫᑦ ᑲᒪᒋᔭᐅᕕᖓᓂ ᐅᓪᓗᖁᑎᖏᑦ ᐃᒣᓕᖓᓚᖓᔪᑦ:

  • ᐃᓕᓴᕐᕖᑦ ᐅᒃᑯᐃᐸᓪᓕᐊᓛᕐᑐᑦ ᐱᒋᐊᕐᓗᑎᒃ ᐊᐅᒍᓯᑎ 31-ᒥ ᓯᑉᑎᒻᐱᕆ 14-ᒧᑦ.
  • ᐅᒃᑯᐃᖄᕐᑐᑦ ᐳᕐᑐᓂᖏᑦ ᓯᕗᓪᓕᐹᒥ ᐊᑦᔨᒌᖕᖏᑑᖃᑦᑕᓛᕐᑐᑦ ᐃᓕᓴᕐᕕᓂ, ᐃᑉᐱᒋᓗᒋᑦ ᖃᓄᐃᓕᖓᑎᓪᓗᒋᑦ ᐃᓕᓴᕐᕖᑦ ᐸᕐᓀᓂᓯᒪᓂᖏᑦ ᐃᓕᓭᔨᖏᑦᑕ ᑎᑭᓐᓂᖏᓐᓂᒃ.
  • ᐊᖓᔪᕐᖄᖏᑦ ᓈᓚᖃᑦᑕᕆᐊᖃᓛᕐᑐᑦ ᑐᓴᐅᑎᒥᒃ ᐅᔨᒪᒐᓱᐊᕐᓗᑎᓗ ᑕᑯᒐᓱᐊᖃᑦᑕᓗᒋᑦ ᐃᓕᓴᕐᕕᖏᑦᑕ Facebook-ᖓᓂᒃ ᑐᑭᓯᒋᐊᖃᑦᑕᓗᒋᑦ ᓇᓪᓕᖏᑦ ᐳᕐᑐᓃᑦ ᐱᒋᐊᓚᖓᓕᕐᒥᒪᖔᑕ ᖃᖓ ᐊᒻᒪᓗ ᓈᒻᒪᓯᑦᑕᕈᑎᖏᑦ.
  • ᓯᑉᑎᒻᐱᕆ 14-ᓂ ᐃᓘᓐᓀᓂᒃ ᐳᕐᑐᓂᓖᑦ ᐅᕕᒃᑲᓂᒃ ᐱᒋᐊᕐᓯᒪᓛᕐᑐᓴᐅᔪᑦ ᐃᓕᓴᕐᓇᐅᑉ ᐊᕐᕌᒍᖏᑦ.
  • ᖃᐅᔨᒪᒋᑦᓯ ᐃᓕᓴᕐᕕᖏᑦ ᓄᑕᐅᓪᓕᑎᕐᑕᐅᒪᑕ, ᐃᓕᓴᕐᓇᐅᑉ ᐊᕐᕌᒍᖓᑕ ᐱᒋᐊᕐᓂᖓ ᑭᖑᕙᕆᐊᕐᓯᒪᓛᕐᑐᑦ ᓄᓇᓕᖏᓐᓂ ᖁᐊᖅᑕᐅᑉ, ᑲᖏᕐᓱᔪᐊᑉ ᐊᒻᒪᓗ ᓴᓪᓗᐃᑦ. ᑖᒃᑯᓇᓂᒥᐅᑦ ᐃᓕᓵᑦ ᐋᕐᕿᓱᕐᓯᒪᒍᑎᒋᑫᓐᓇᓚᖓᔭᖏᑦ ᓄᐃᑕᐅᕙᓪᓕᐊᔪᑦ.

ᐃᓄᒻᒪᕇᑦ ᑲᒪᒋᔭᐅᕕᖏᓐᓂ, ᐃᓕᓴᕐᓇᐅᑉ ᐊᕐᕌᒍᖓᑕ ᐅᓪᓗᖁᑎᖏᑦ ᐃᒣᓕᖓᓚᖓᔪᑦ:

  • ᐃᓄᒻᒪᕇᑦ ᐃᓕᓐᓂᐊᑎᑕᐅᕕᖏᑦ ᐊᒻᒪᓗ ᐊᓇᕐᕋᖏᑦ ᐅᒃᑯᐃᐸᓪᓕᐊᓚᖓᔪᑦ ᐃᓕᓵᓄᑦ ᐱᒋᐊᕐᕕᐅᑎᓪᓗᒍ ᐊᐅᒍᓯᑎ 31.
  • ᐃᓕᓵᑦ ᐃᓚᐅᔪᑦ ᐃᓕᓐᓂᐊᑎᑦᓯᒍᑎᒧᑦ ᒪᓂᔭᐅᓯᒪᔪᒧᑦ ᓄᓇᓕᒥᓂ ᐃᓄᒻᒪᕆᓐᓂᒃ ᐃᓕᓐᓂᐊᑎᑦᓯᕕᖏᓐᓄᑦ ᓄᓇᓕᒥᓂ ᑐᓴᕐᑎᑕᐅᒫᕐᑐᑦ ᖃᖓᓪᒪᕆᒃ ᐃᓕᓐᓂᐊᑎᑦᓯᓃᑦ ᐱᒋᐊᓛᕐᒪᖔᑕ ᐊᐅᒍᓯᑎ 24-ᒥ.
  • ᐃᓕᓵᑦ ᐃᓚᐅᔪᑦ ᐃᓕᓐᓂᐊᑎᑦᓯᒍᑎᒧᑦ ᒪᓂᔭᐅᓯᒪᔪᒧᑦ ᓄᓇᓕᒥᓂ ᐃᓄᒻᒪᕆᓐᓂᒃ ᓄᓇᓕᓐᓂ ᐊᓯᐊᓃᑦᑐᓂ ᑐᓴᕐᑎᑕᐅᓛᕐᑐᑦ ᐃᓕᓐᓂᐊᑎᑦᓯᓃᑦ ᐱᒋᐊᕐᕕᓴᖏᓐᓂᒃ ᓄᓇᒥᓂᑦ ᐊᐅᓪᓚᓚᐅᕋᑎᒃ.

ᓄᑕᐅᓪᓕᑎᕐᑕᐅᓂᖏᑦ ᑭᓇᓕᒫᒃᑯᑦ ᐃᓗᓯᕐᓱᓂᖏᑦ ᐱᑦᔪᑎᒋᓗᒋᑦ ᒪᓕᒐᑦᓭᑦ ᐃᓕᖓᓚᖓᔪᑦ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐱᓇᓱᑦᑎᖏᓐᓄᑦ ᓄᓇᕕᓕᐊᕐᑐᓄᑦ ᐃᓕᓴᕐᓇᐅᑉ ᐊᕐᕌᒍᖓ ᐱᒋᐊᓯᑎᓗᒍᓗ ᐅᕕᒃᑫᑦ ᐊᒻᒪᓗ ᐃᓄᒻᒪᕇᑦ ᑲᒪᒋᔭᐅᕕᖏᓐᓂ

ᑐᕌᒐᐅᑎᓗᒍ ᐃᑭᓪᓕᑎᕆᒋᐊᕐᓂᖅ ᐱᔪᓐᓇᕕᓕᒫᓄᑦ ᓯᐊᒻᒪᑎᑦᓯᑌᓕᓂᖅ ᐳᕙᓕᕆᓐᓈᓗᒃ 19-ᒥᒃ ᓄᓇᕕᒻᒥ, ᐃᓕᓴᕐᓂᓕᕆᓂᖅ ᐱᒋᐊᕐᑎᒥᓕᐊᕐᓯᒪᔪᖅ ᐃᓕᓴᕐᓇᐅᑉ ᐊᕐᕌᒍᖓᓂᒃ ᐅᕕᒃᑫᑦ ᐊᒻᒪᓗ ᐃᓄᑐᙯᑦ ᑲᒪᒋᔭᐅᕕᖏᓐᓂ ᐱᓇᓱᐊᕈᓯᕐᓂ 4-ᓂ ᑕᐅᕐᓰᑕᕐᓗᑎᒃ.

ᐅᒃᑯᐃᕆᐊᓪᓚᓂᖏᑦ ᐃᓕᓴᕐᕖᑦ ᐊᒻᒪᓗ ᐃᓄᒻᒪᕇᑦ ᐃᓕᓴᕐᕕᖏᑦᑕ ᐊᐅᓚᑎᑦᓯᓂᖃᓚᖓᔪᖅ ᐊᒥᓱᐃᓂᒃ ᐱᓇᓱᑦᑎᓂᒃ. ᐱᓇᓱᐊᕈᓯᓂ ᐊᓂᒍᕐᓯᒪᓕᕐᑐᓂ, ᑲᑎᕕᒃ ᐃᓕᓴᕐᓂᓕᕆᓂᖅ ᐸᕐᓀᒍᑎᓕᐅᕐᓯᒪᔪᖅ ᑖᒃᑯᐊ ᐊᐅᓚᑕᐅᓂᕆᒋᐊᓕᖏᓐᓂᒃ ᐃᑉᐱᒋᔭᐅᑦᓯᐊᓗᑎᒃ ᑐᕌᒐᐅᑎᓪᓗᒍ ᐅᖑᒪᔭᐅᒋᐊᖃᕐᓂᖏᑦ ᓄᓇᕕᒻᒥᐅᑦ.

ᐃᓕᓴᕐᓂᓕᕆᓂᖅ ᐃᓘᓐᓀᓂᒃ ᐱᓇᓱᑦᑎᓂᒃ ᓄᓇᕕᓕᐊᕐᑐᓂᒃ ᐃᓄᑑᑎᖃᑦᑕᕆᐊᖃᕐᑎᓯᔪᖅ ᐊᓂᑦᑌᓕᓗᑎᒃ ᓄᓇᓕᓐᓄᑦ ᑎᑭᒍᑎᒃ ᐱᓇᓱᐊᕐᕕᒋᓂᐊᕐᑕᒥᓄᑦ. ᓄᓇᕕᒻᒧᑦ ᑎᑭᐅᖃᑦᑕᓚᖓᔪᑦ ᐱᓇᓱᐊᕈᓰᑦ 4 ᐃᓗᐊᓂ. ᐅᓪᓗᖏᑦ ᐊᐅᓚᒋᐊᖃᕐᓂᖏᑦᑕ ᐋᕐᕿᒋᐊᕐᑕᐅᓯᒪᓚᖓᔪᑦ ᒪᓕᑦᑕᐅᒋᐊᓕᓐᓄᑦ ᐊᐅᓚᓪᓚᓚᐅᕋᑎᒃ ᐳᕙᓕᕆᓐᓈᓗᒃ 19-ᒥ ᖃᓂᒪᒍᑎᖃᕐᒪᖔ ᑐᓴᕐᑕᐅᑎᑕᐅᓯᒪᔪᒥᒃ ᓄᓇᕕᒻᒥ ᐃᓗᓯᓕᕆᔨᒃᑯᓄᑦ ᔪᓓ 17, 2020-ᒥ.

ᐅᑯᐊᑕᒐ ᒪᓕᑦᑕᐅᒋᐊᓖᑦ ᐃᓕᖓᔪᑦ ᐃᓕᓴᕐᓂᓕᕆᓂᐅᑉ ᐱᓇᓱᑦᑎᖏᓐᓄᑦ ᓄᓇᕕᓕᐊᕐᓗᑎᒃ ᐊᐅᓚᔪᓄᑦ ᐱᓇᓱᐊᕆᐊᕐᓗᑎᒃ ᔪᓓ 22, 2020 ᐱᒋᐊᕐᕕᐅᑎᓪᓗᒍ:

  • ᓯᐊᒻᒪᑎᑕᐅᑦᑌᓕᓂᖓᓄᑦ ᐳᕙᓕᕆᓐᓈᓗᒃ 19 ᓄᓇᕕᒻᒥ, ᐃᓕᓴᕐᓂᓕᕆᓂᖅ ᐸᕐᓀᒍᑎᓕᐅᕐᓯᒪᔪᖅ ᐃᓕᓴᕐᓇᐅᑉ ᐊᕐᕌᒍᖓᓂᒃ ᐱᒋᐊᕐᑎᓯᓚᖓᑦᓱᓂ ᐅᕕᒃᑫᑦ ᐊᒻᒪᓗ ᐃᓄᒻᒪᕇᑦ ᑲᒪᒋᔭᐅᕕᖏᓐᓂ ᐱᓇᓱᐊᕈᓯᓂ 4-ᓂ ᐃᓕᒪᖃᑦᑕᓚᖓᔪᓂᒃ.
  • ᐱᓇᓱᐊᕈᓯᑕᒫᑦ ᐊᐅᒍᔅᑎᐅᑉ ᑕᕐᕿᖓᓂ, ᐱᓇᓱᑦᑏᑦ ᐊᒥᓲᓈᕐᑎᒍᓐᓀᓗᑎᒃ ᓄᓇᕕᒻᒥ ᓄᓇᓕᓐᓂ ᑎᑭᐅᕐᖃᑐᑦ.
  • ᑲᑎᓂᖏᑦ 4-ᒍᖃᑦᑕᓂᐊᕐᑐᑦ, ᑎᑭᐅᕐᖃᑐᑦ ᐊᐅᒍᓯᑎ 1 ᐊᒻᒪᓗ ᐊᐅᒍᓯᑎ 29, 2020 ᐊᑯᓐᓂᖓᓂ.
  • ᐱᓇᓱᐊᕈᓯᑕᒫᑦ ᐊᐅᒍᓯᑎᒥ, 8-ᒍᓈᕐᑎᖃᑦᑕᓂᐊᕐᑐᑦ ᐃᓕᒃᑰᑎᕐᑐᑦ (ᐱᓇᓱᑦᑏᑦ, ᐁᑉᐸᖏᓪᓗ ᐊᒻᒪᓗ ᐃᓚᖏᑦ) ᑎᑭᐅᕐᖃᑐᑦ 14-ᓄᑦ ᓄᓇᕕᒻᒥ ᓄᓇᓕᓐᓄᑦ. ᐱᖓᓱᓂ ᓄᓇᕕᒻᒥ ᓄᓇᕐᓚᐅᓂᕐᐹᓂ ᑖᒃᑯᐊ ᑲᑎᒪᔪᑦ ᐅᓄᕐᓂᖏᑦ ᑎᑭᐅᑎᒍᓐᓇᖃᑦᑕᓂᐊᕐᑐᑦ 25-ᓄᑦ ᐃᓄᓐᓄᑦ.
  • ᐃᓕᓴᕐᓂᓕᕆᓂᕐᒧᑦ ᐊᐅᓚᒍᓐᓇᕕᖃᕐᑎᑕᐅᓚᖓᒍᑎᒃ ᐱᓇᓱᐊᕆᐊᕐᓗᑎᒃ, ᐊᒻᒪᓗ ᑭᖑᓂᖓᒍᑦ ᑐᓴᕐᑎᑕᐅᒋᐊᓪᓚᖏᓐᓂᒥᓂ, ᐃᓕᓴᕐᓂᓕᕆᓂᐅᑉ ᐱᓇᓱᑦᑎᓕᒫᖏᑦ ᒪᓕᑦᓯᐊᖃᑦᑕᖁᔭᐅᔪᑦ ᑭᓇᓕᒫᒃᑯᑦ ᐃᓗᓯᕐᓱᓂᖏᓐᓄᑦ ᒪᓕᒐᑦᓴᓕᐊᒍᓯᒪᔪᓂᒃ ᓇᓗᓀᕐᑕᐅᓯᒪᑦᓱᑎᒃ ᑖᒃᑯᐊ ᐊᑖᓂ. 

ᐊᐅᓪᓚᓚᐅᕋᑎᒃ ᐱᕙᓕᕆᓐᓈᓗᒃ 19-ᒥᒃ ᖃᓂᒻᒪᓯᖃᕐᒪᖔᑕ ᖃᐅᔨᓴᕐᑕᐅᔪᑦ ᐊᒻᒪᓗ ᖃᐅᔨᓴᕐᑕᐅᓱᑎᒃ ᖃᓄᐃᖕᖏᓂᕋᕐᑕᐅᔪᑦ

  • ᐃᓕᓴᕐᓂᓕᕆᓂᖅ ᑲᔪᓯᑎᑦᓯᖃᑦᑕᓚᖓᔪᖅ ᐊᐅᓪᓚᓚᐅᕐᑎᓇᒋᑦ ᖃᐅᔨᓴᕐᓂᓂᒃ ᐃᓘᓐᓀᓂᒃ ᐱᓇᓱᑦᑎᓂᒃ ᐊᒻᒪᓗ ᐆᒪᑕᖏᓐᓂᒃ (ᐁᑉᐸᖏᑦ ᐊᒻᒪᓗ ᕿᑐᕐᖓᖏᑦ).
  • ᖃᐅᔨᓴᕐᑕᐅᒌᕐᐸᑕ ᐳᕙᓕᕆᓐᓈᓗᒃ 19 ᖃᕐᒪᖔᑕ, ᐱᓇᓱᑦᑏᑦ ᐃᓕᓴᕐᓂᓕᕆᓂᕐᒧᑦ ᓇᔪᓚᖓᔭᖏᓐᓅᑕᐅᖃᑦᑕᓂᐊᕐᑐᑦ ᐊᓂᑦᑌᓕᕕᒋᓂᐊᕐᑕᖓᓄᑦ ᖃᐅᔨᓴᕐᑕᐅᒍᑎᖏᑦ ᐱᔭᐅᖕᖏᓂᓕᒫᖏᓐᓂ.
  • ᐱᓇᓱᑦᑏᑦ ᐳᕙᓕᕆᓐᓈᓗᒃ 19-ᒥᒃ ᖃᐅᔨᓴᕐᑕᐅᓗᑎᒃ ᐱᑕᖃᕆᐊᖕᖏᒋᐊᖏᑦ ᖃᐅᔨᔭᐅᓯᒪᖃᑦᑕᕆᐊᖃᓚᖓᔪᑦ ᑎᒻᒥᔫᒧᑦ ᐃᑭᓚᐅᕋᑎᒃ. ᐳᕙᓕᕆᓐᓈᓗᒃ 19-ᒥᒃ ᐱᑕᖃᕐᒪᖔᑕ ᖃᐅᔨᓴᕐᑕᐅᖃᑦᑕᕆᐊᖃᓚᖓᔪᑦ 96-ᓂ ᐃᑲᐅᕐᓂᓂ ᐃᑭᓐᓂᓴᓂᓘᓐᓃᑦ ᐊᐅᓪᓚᓚᐅᕋᑎᒃ. 

ᓄᓇᕕᓕᐊᕐᑐᑦ

  • ᓀᒪᒌᒃᑯᓯᔭᕆᐊᓖᑦ ᑌᒪᖕᖓᑦ ᓄᓇᕕᓕᐊᓕᕈᑎᒃ, ᐆᑦᑑᑎᒋᓗᒋᑦ ᐅᑯᓇᓂ ᑖᒃᑯᒥ, ᓄᓇᒃᑰᔫᒥ, ᐅᓯᒍᑎᒥ ᐅᕝᕙᓘᓐᓃᑦ ᐃᓄᓐᓂᒃ ᐅᓯᑲᑦᑕᐅᑎᒥ, ᑎᒻᒥᔫᕐᓂᐊᕕᒻᒥ (ᓐᓂ), ᑎᒻᒥᔫᒥ ᐊᒻᒪᓗ ᐊᐅᓚᓗᑎᒃ ᐅᓯᔭᐅᓗᑎᒃ ᓄᓇᕕᒻᒥ ᐊᓇᕐᕋᕆᓂᐊᕐᑕᖏᓐᓄᑦ. 

ᓄᓇᕕᒻᒧᑦ ᓄᓇᓕᓐᓄᑦ ᑎᑭᒍᑎᒃ

  • ᐊᑦᑕᓀᑦᑑᒋᐊᖃᕐᓂᓄᑦ ᒪᓕᒉᑦ ᐃᓕᒪᖃᑦᑕᓂᐊᕐᑐᑦ ᓄᓇᓕᒥᐅᑦ ᐅᖑᒪᓯᑦᓴᐅᑎᒋᓗᒋᑦ ᑎᑭᓪᓗᑎᓗ ᐊᒻᒪᓗ ᐱᓇᓱᑦᑏᑦ ᐊᓇᕐᕋᕆᓂᐊᕐᑕᖏᓐᓄᑦ ᐅᓯᔪᑦ.

14-ᓂ ᐅᓪᓗᓂ ᐃᓄᑑᕐᖄᕆᐊᖃᕐᓂᖅ

  • 14-ᓂ ᐅᓪᓗᓂ ᐃᓄᑑᑎᖃᑦᑕᕆᐊᖃᓚᖓᒧᑦ ᓄᓇᕕᒻᒧᑦ ᑎᑭᒍᑎᒃ ᐃᓘᓐᓇᑎᒃ ᐃᓕᓴᕐᓂᓕᕆᓂᐅᑉ ᐱᓇᓱᑦᑎᖏᑦ. ᐅᓪᓗᒥ, ᐃᓕᓴᕐᓂᓕᕆᓂᖅ ᑲᔪᓯᒍᓐᓇᑎᑦᓯᓯᒪᖕᖏᑐᖅ ᓇᓪᓕᑳᕐᑕᐅᒍᓐᓇᑐᓂᒃ ᐊᐅᓪᓚᓚᐅᕋᑎᒃ ᐃᓄᑑᑎᖃᑦᑕᕆᐊᖃᕐᓂᖏᓐᓂᒃ ᐱᓇᓱᑦᑎᖏᑦᑕ, ᐅᕝᕙᓘᓐᓃᑦ ᐊᕕᑦᑎᓯᒪᒍᓐᓇᓂᖏᓐᓂᒃ ᓄᓇᕕᐅᑉ ᐊᒻᒪᓗ ᓄᓇᕕᐅᑉ ᓯᓚᑖᓂ.
  • ᐃᓄᑑᑎᓕᕈᑎᒃ, ᐱᓇᓱᑦᑏᑦ ᐊᓇᕐᕋᓯᒣᓐᓇᖃᑦᑕᕆᐊᖃᓚᖓᔪᑦ ᑌᒪᖕᖓᓕᒫᖅ.
  • ᐱᓇᓱᑦᑏᑦ ᐃᓄᑑᑎᓕᕈᑎᒃ ᓯᓚᒦᒍᓐᓇᖃᑦᑕᓚᖓᔪᑦ ᐱᓱᖕᖑᐊᓗᑎᒃ. ᐱᓱᓕᕈᕕᒃ, ᐃᓚᒥᓄᑦ ᒪᓕᑦᑕᐅᒍᓐᓇᖃᑦᑕᓚᖓᔪᑦ ᑖᒃᑯᑑᖃᑎᒋᖃᑦᑕᑕᒥᓄᑦ. ᑌᒪᖕᖓᓕᒫᖅ ᓄᓇᓕᒥᐅᓂᒃ ᑲᑎᒪᑦᓯᖃᑦᑕᕆᐊᖃᓚᖓᖕᖏᑐᑦ. ᐃᓕᓴᕐᓂᓕᕆᓂᖅ ᓀᒪᒌᒃᑯᓯᔭᖁᔨᓪᓚᕆᑦᑐᖅ ᓯᓚᒥ ᐱᓱᖕᖑᐊᓕᕈᕕᑦ, ᓄᓇᓕᒥᐅᓂᒃ ᑕᑯᑎᑦᓯᒋᐊᕈᑎᒋᓗᒍ ᑌᒣᑦᑐᒥᒃ ᐊᑐᕐᓂᓅᕕᑦ ᐃᑲᔪᕐᓯᒪᒐᕕᑦ. ᐱᓱᖕᖑᐊᑐᑦ ᐊᓯᒥᓂᒃ ᐅᖓᓯᑦᑕᖃᖃᑦᑕᕆᐊᓖᑦ ᑌᒪᖕᖓᑦ (2 ᒦᑌᑦ).

ᐃᓄᑑᑎᒌᕐᓯᒪᓕᕐᓗᑎᒃ ᓄᓇᓕᒥᐅᒍᓂᖅ

  • ᐱᓇᓱᑦᑏᑦ ᓀᒪᒌᒃᑯᓯᔭᕆᐊᓖᑦ ᐃᓘᓐᓀᓂ ᐃᓄᑦᑕᖃᓲᓕᒫᓂ. ᔪᓓ 18, 2020-ᒥᓂᑦ, ᓀᒪᒌᒃᑯᓯᔭᕆᐊᖃᕐᓯᒪᓕᕐᒪᑕ ᐃᓄᑦᑕᖃᓲᓕᒫᓂ ᑯᐯᒻᒥ. ᓄᓇᕕᒻᒧᑦ ᑕᒪᓐᓇ ᐊᑐᕐᒥᔪᖅ.

ᐊᐱᕐᓲᑕᐅᓗᑭᖃᑦᑕᑐᑦ

ᖃᓄᐃᓘᕐᓯᒪᓚᖓᕚᑦ ᓱᓇᑐᐃᓐᓀᑦ ᐊᑦᑐᑕᐅᓲᑦ ᖁᐱᕐᕆᓯᒪᓂᕐᒧᑦ ᐅᓗᕆᐊᓇᕐᓯᑌᓕᒪᑎᓗᒋᑦ?

  • ᐃᓕᓐᓂᐊᕕᐅᑉ ᐃᓗᐊᓂ ᐊᑦᑐᑕᐅᕋᓕᓲᑦ ᐱᐅᒃᑯᑏᓪᓗ ᐃᓕᓐᓂᐊᑏᑦ ᐊᑦᑕᒥᕋᐅᑎᓲᖏᑦ ᓴᓗᒻᒪᓴᕐᑕᐅᖃᑦᑕᓚᖓᔪᑦ ᖁᐱᕐᕈᐃᔭᕐᑕᐅᖃᑦᑕᓗᑎᓗ.
  • ᐃᓕᓐᓂᐊᕕᑐᐃᓐᓀᑦ ᐃᓄᒻᒪᕇᑦ ᐃᓕᓐᓂᐊᕕᖏᓪᓗ ᐅᒃᑯᐊᑕᐅᖃᑦᑕᓚᖓᔪᑦ ᐱᓇᓱᐊᕆᐊᓖᑦ ᖃᓄᐃᖕᖏᓯᐊᕐᓂᒧᑦ ᐊᑦᑕᓇᕐᑌᓕᓂᕐᒧᓗ ᒪᓕᒐᖏᑦ ᒪᓕᑦᓱᒋᑦ ᐱᓇᓱᑦᑕᐅᖏᑐᐊᕐᐸᑕ.

ᓱᓇᒥᒃ ᑐᕌᒐᓖᑦ ᑖᒃᑯᐊ ᖃᓄᐃᖕᖏᓯᐊᕐᓂᒧᑦ ᒪᓕᒉᑦ ᐊᑐᕐᑕᐅᒋᐊᓖᑦ ᐃᓕᓐᓂᐊᕕᓐᓂᑦ ᐃᓄᒻᒪᕇᓪᓗ ᐃᓕᓐᓂᐊᕕᖏᓐᓂᑦ?

  • ᓴᐳᑎᓯᒪᓗᒋᑦ ᓄᓇᕕᒻᒥᐅᑦ ᖃᓂᒻᒪᓯᖅ COVID-19-ᒧᑦ ᖃᓂᒻᒪᓂᕐᒥᑦ.
  • ᐃᓘᓐᓇᖏᑦ ᐃᓕᓐᓂᐊᑏᑦ 100%-ᒥᒃ ᐃᓕᓐᓂᐊᕕᒻᒧᐊᔭᕐᑎᐸᓪᓕᐊᓗᒋᑦ ᐱᒋᐊᕐᑎᓗᒍ ᐊᐅᒡᒍᓯ 31-ᒥᑦ ᓯᑉᑎᒻᐱᕆ 14, 2020 ᑎᑭᓪᓗᒍ ᐃᓕᓐᓂᐊᕕᑐᐃᓐᓇᓂ, ᐊᒻᒪᓗ ᐊᐅᒡᒍᓯ 31-ᒥ ᐃᓄᒻᒪᕇᑦ ᐃᓕᓐᓂᐊᕕᖏᓐᓂ.
  • ᐱᑕᖃᕐᑎᓯᑦᓯᐊᓗᓂ ᓱᓇᒥᑦᑎᓗᒋᑦ 100% ᐃᓕᓐᓂᐊᒉᑦ ᐃᓕᓐᓂᐊᕕᑐᐃᓐᓇᓂ ᐃᓄᒻᒪᕇᓪᓗ ᐃᓕᓐᓂᐊᕕᖏᓐᓂ.
  • ᓂᓐᓂᐅᓗᐊᕐᓂᖅ ᐃᑯᓪᓚᑎᓗᒍ (ᐃᓕᓐᓂᐊᕕᒻᒧᑦ ᐃᑎᓯᑉᐸᑕ, ᐊᓂᖕᖑᐊᓕᕐᐸᑕ, ᐃᓕᓐᓂᐊᕕᐅᑉ ᐃᓗᐊᓂ ᓂᒪᔭᕐᓂᖏᑦ, ᐊᓯᖏᓪᓗ)
  • ᐃᓕᓐᓂᐊᑏᑦ ᑲᑎᐅᑎᖃᑦᑕᑎᑦᑌᓕᒪᓗᒋᑦ ᖃᕆᐊᖃᑎᒌᖑᖕᖏᑐᐊᕐᐸᑕ.
  • ᐊᑐᕐᑕᐅᒋᐊᓪᓚᓯᐊᕐᑎᖃᑦᑕᓗᒋᑦ ᐃᓗᓯᖃᕐᓯᐊᓂᕐᒧᑦ ᐱᐅᓯᑦᓯᐊᑦ (ᐃᕐᕈᑐᕋᓕᓐᓂᖅ, ᐃᐳᒻᒥᖓᓗᓂ ᐃᑯᓯᒧᑦ ᖁᐃᕐᑐᖃᑦᑕᓂᖅ, ᑲᒃᑭᒍᑎᑦᓴᔭᒥᒃ ᐊᑐᕐᓗᓂ ᑕᒋᐅᕐᓴᓕᕈᓂ, ᓴᓂᒃᑯᕕᒻᒨᓴᐅᑎᒋᓗᒍ ᐊᒻᒪᓗ ᑭᖑᓂᐊᒍᑦ ᐃᕐᕈᑐᕐᓗᓂ).

ᖃᓄᐃᓕᒐᔭᕐᖃᑦ ᐃᓕᓐᓂᐊᑎᒥᒃ ᐊᑑᑎᔪᖃᑐᐊᕐᐸᑦ ᖃᓂᒻᒪᓯᐅᑉ COVID-19 ᖃᐅᔨᒪᓇᕈᑎᖏᓐᓂᒃ?

ᐃᓕᓐᓂᐊᕕᕗᑦ ᐊᒻᒪᓗ ᐃᓄᒻᒪᕇᑦ ᐃᓕᓐᓂᐊᕕᖏᑦ ᒪᓕᑦᑕᐅᒋᐊᖃᓪᓚᕆᑦᑐᓂᒃ ᖃᓄᐃᖕᖏᓯᐊᕐᓂᒧᑦ ᐊᑦᑕᓇᕐᑌᓕᒪᓂᕐᒧᓗ ᒪᓕᒐᕐᓂᒃ ᓄᐃᑕᐅᓯᒪᔪᓂᒃ ᒪᓕᑦᓱᑎᒃ ᓄᓇᕕᒻᒥ ᖃᓄᐃᖕᖏᓯᐊᕐᓂᓕᕆᓂᕐᒥ ᐊᖓᔪᕐᖃᐅᕕᓕᓐᓄᑦ, ᑯᐯᒃ ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᖓᓄᑦ (MEES) ᐊᒻᒪᓗ ᖃᐅᔨᓴᕐᑏᑯᓐᓄᑦ ᐱᓇᓱᕝᕕᒥ ᐱᐅᓯᐅᒋᐊᓕᓐᓂᒃ, ᐊᑦᔨᒌᑦᑎᓯᒋᐊᖃᕐᓂᒥᒃ, ᖃᓄᐃᖕᖏᓯᐊᕐᓂᒥᒃ ᐊᑦᑕᓇᕐᑌᓕᒋᐊᖃᕐᓂᒥᓪᓗ (CNESST).

ᑖᓐᓇ ᒪᓕᒐᖅ ᐃᒣᓕᖓᑎᑦᓯᔪᖅ:

  • ᐃᓄᑑᑎᑕᐅᓗᓂ ᖃᕆᐊᕐᒥ ᐃᓄᑑᑎᑦᓯᕕᑦᓕᐊᖑᒪᔪᒥ, ᓇᖕᒥᓂᖅ ᓴᐳᒻᒥᓯᒪᒍᑎᖃᕐᓗᑎᒃ ᐱᓇᓱᑦᑏᑦ ᐱᓇᓱᖃᑎᓖᑦ ᐃᓕᓐᓂᐊᑎᒥᒃ ᑌᑦᓱᒥᖓ ᖃᓂᒻᒪᓯᖅ COVID-19 ᒪᓗᓐᓇᕈᑎᖏᓐᓂᒃ ᐊᑐᕐᑐᒥᒃ.
  • ᑌᓐᓇ ᐃᓕᓐᓂᐊᑎᒃ ᐁᔭᐅᓗᓂ ᐊᖓᔪᕐᖄᒥᓄᑦ ᐅᕝᕙᓘᓐᓃᑦ ᐊᓂᕐᕋᐅᑎᔭᐅᓗᓂ ᐱᓇᓱᑦᑎᒧᑦ ᐋᓐᓂᐊᓯᐅᕐᑕᐅᕕᒻᒧᓘᓐᓃᑦ, ᐊᓱᐃᓛ ᑌᓐᓇ ᖃᕆᐊᖅ ᖁᐱᕐᕈᐃᔭᕐᑕᐅᓗᓂ.
  • ᑌᓐᓇ ᐃᓕᓐᓂᐊᑎᒃ ᐱᓇᓱᑦᑏᓘᓐᓃᑦ ᖃᐅᔨᓴᕐᑕᐅᓱᓂ ᖃᓂᒻᒪᓯᖅ COVID-19ᒥᒃ ᐱᑕᖃᕐᓂᕋᕐᑕᐅᑐᐊᕐᐸᑦ, ᐃᓕᓴᕐᓂᓕᕆᓂᒃᑯᑦ ᐱᓇᓱᖃᑎᖃᑦᓯᐊᕋᔭᕐᑐᑦ ᓄᓇᕕᒻᒥ ᐃᓗᓯᓕᕆᓂᕐᒥ ᐊᖓᔪᕐᖃᐅᕕᓕᓐᓂᒃ ᓇᓗᓀᕐᓯᓗᑎᒃ ᖃᓄᐃᓘᕐᑐᓴᐅᓕᕐᒪᖔᕐᒥᒃ.
  • ᑌᒫᑦᓭᓇᖅ ᐱᓇᓱᐊᕐᑕᐅᒐᔭᕐᑐᖅ ᐱᓇᓱᑦᑎᒥᒃ ᐊᑑᑎᔪᖃᕐᓂᐸᑦ ᖃᓂᒻᒪᓯᖅ COVID-19 ᒪᓗᓐᓇᕈᑎᖏᓐᓂᒃ.

ᑐᑭᓯᒋᐊᓪᓚᕈᒪᒍᕕᑦ, ᑕᑯᒋᐊᕈᓐᓇᑐᑎᑦ ᓄᓇᕕᒻᒥ ᐃᓗᓯᓕᕆᔨᒃᑯᑦ ᖃᕆᑕᐅᔭᒃᑯᑦ ᑕᑯᑦᓴᐅᑎᑦᓯᕕᖓᓂ.  ᖃᓂᒻᒪᓯᖃᕐᓂᐊᖒᕈᕕᑦ ᐅᕝᕙᓘᓐᓃᑦ ᖃᓂᒻᒪᓯᓕᒻᒥᒃ ᖃᓂᑕᖃᕐᑐᕕᓂᐅᔪᕆᒍᕕᑦ, ᐅᖄᓚᒋᑦ ᐅᕗᖓ 1-888-662-7482 (ᐊᓪᓕᑐᖃᕇᒥᑦ ᓂᕿᑦᓯᕕᒻᒧᑦ 12:00 pm – 7:00 pm).

 

ᖃᓂᒪᓇᕐᑐᒨᓕᖓᔪᖅ COVID-19

ᖃᓂᒪᓇᕐᑐᖅ COVID-19 ᓱᕐᕃᒍᓐᓇᑐᖅ ᐊᓂᕐᑎᕆᓂᐅᔪᓂᒃ ᐆᓈᕿᓚᕿᑎᑦᓯᒍᓐᓇᓱᓂ, ᖁᐃᕐᑐᑎᑦᓯᒍᓐᓇᓱᓂ ᐊᒻᒪᓗ ᐊᓂᕐᓵᓯᐊᖕᖏᑑᑎᑦᓯᓗᓂ. ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᑕᒪᑦᓱᒥᖓ ᐋᓐᓂᐊᖑᔪᒥᒃ ᐱᖕᖑᐊᖃᖕᖏᓚᕆᑦᑐᑦ. ᑲᕙᒪᒃᑯᑦ ᐱᒍᑦᔨᔨᖏᑦ, ᐃᓚᐅᑎᓪᓗᒋᑦ ᖃᓄᐃᖕᖏᓯᐊᕐᓂᓕᕆᔨᒃᑯᑦ ᐊᒻᒪᓗ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᑐᓴᕐᑕᐅᒋᐊᓕᓐᓂᒃ ᑲᑎᕕᒃ ᐃᓕᓴᕐᓂᓕᕆᓂᒃᑯᓂᒃ ᑐᓴᕐᑎᓯᖃᑦᑕᑐᑦ ᖃᓄᐃᓘᖁᔨᒍᑎᓂᒃ ᐊᒻᒪᓗ ᑐᑭᒧᐊᒍᑎᑦᓴᓂᓪᓗ ᑕᒪᑦᓱᒪ ᖃᓂᒻᒪᓇᐅᑉ ᒥᑦᓵᓅᓕᖓᔪᓂᒃ.

ᐁᑦᑐᑑᑕᐅᑦᑌᓕᒪᓃᑦ ᐃᕐᙯᑎᑦᓯᒋᐊᕈᑏᑦ

ᐃᓄᓕᒫᑦ ᐊᑐᓂ ᑲᒪᑦᓯᐊᕆᐊᓖᑦ ᐁᑦᑐᑑᑎᐅᖁᓇᒍ ᖃᓂᒻᒪᓯᖅ. ᖃᓄᐃᖕᖏᓯᐊᕋᓱᐊᕐᓃᑦ ᐅᓐᓂᑑᑏᑦ ᑐᓴᐅᒪᔭᐅᒋᐊᓖᑦ ᐊᑖᓂᑦᑐᑦ ᐊᑐᐃᓐᓇᐅᑎᑕᐅᔪᑦ ᑯᐯᒃᑯᑦ ᑲᕙᒪᖓᓄᑦ.

ᑯᐯᒃᑯᑦ ᖃᓄᐃᖕᖏᓯᐊᕐᓂᒨᓕᖓᔪᓂᒃ ᑐᓴᕐᑎᓯᐅᑎᖏᑦ ᐱᕕᒋᓗᒋᑦ ᐅᕙᓂ.

ᓄᓇᕕᒻᒥᐅᓄᑦ ᖃᓄᐃᖕᖏᓯᐊᕐᓂᒧᑦ ᑐᓴᐅᒪᒍᑎᑦᓴᖏᑦ ᐅᕙᓂ.

Back to Press release