ᓱᓇᐅᓂᖓ

ᑲᑎᕕᒃ ᐃᓕᓴᕐᓂᓕᕆᓂᖅ, ᐃᓕᓐᓂᐊᓂᓕᕆᔨᒃᑯᑦ ᓄᓇᕕᒻᒥ, ᓄᐃᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ).

ᐊᖏᖃᑎᒌᓐᓂᐅᑉ ᐊᑖᒍᑦ, ᑲᑎᕕᒃ ᐃᓕᓴᕐᓂᓕᕆᓂᖅ ᐱᔪᓐᓇᐅᑎᖃᕐᑎᑕᐅᔪᖅ ᐊᐅᓚᑦᓯᔨᐅᕕᖃᕐᑎᑕᐅᑦᓱᓂᓗ ᐱᕙᓪᓕᐊᑎᑦᓯᓂᕐᒥᒃ ᐱᑕᖃᕐᑎᓯᓂᕐᒥᓗ ᐱᓪᓗᑯᑦᑐᓂᒃ ᐃᓕᓐᓂᐊᓂᓕᕆᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᐱᓇᓱᐊᕐᑕᐅᔪᓂᓪᓗ ᑐᖕᖓᕕᖃᑦᓭᓇᕐᑐᓂᒃ ᐃᓄᐃᑦ ᐃᓗᕐᕈᓯᖓᓂᒃ.  ᑲᑎᕕᒃ ᐃᓕᓴᕐᓂᓕᕆᓂᐅᑉ ᑐᕌᒐᒋᑦᓱᒍ ᑐᖕᖓᕕᖓ ᑌᒣᒻᒪᑦ ᒪᕐᕈᐃᓕᕿᖓᕗᖅ.  ᓯᕗᓪᓕᖓ, ᐱᐅᓯᖃᓲᖅ ᐃᓕᓐᓂᐊᓂᓕᕆᔨᒋᔭᐅᑦᓱᓂ ᓄᓇᓕᓕᒫᓂ ᐃᓘᓐᓇᖏᓐᓄᑦ ᓄᓇᕕᒻᒥᐅᓄᑦ.  ᐁᑉᐹᒍᓪᓗ, ᐱᐅᓯᖃᓲᖑᒻᒥᔪᖅ ᐃᓄᓐᓄᐊᖓᑐᐃᓐᓇᑑᑦᓱᓂ ᑎᒥᐅᔫᑦᓱᓂ ᐊᑦᔨᐅᖏᑦᑑᒍᑎᓕᓐᓂᒃ ᐱᔪᓐᓇᐅᑎᖃᕐᓱᓂ ᐊᐅᓚᑦᓯᔨᐅᕕᖃᕐᓱᓂᓗ ᑐᕌᕐᓂᓕᓐᓂᒃ ᓴᐳᒻᒥᓯᓂᕐᒥ, ᐱᑕᙯᓐᓇᑎᑦᓯᓂᕐᒥᒃ, ᐊᒻᒪᓗ ᐱᕙᓪᓕᐊᑎᑦᓯᓂᕐᒥᒃ ᐃᓄᐃᑦ ᐅᖃᐅᓯᖓᓂᒃ, ᐃᓗᕐᕈᓯᖓᓂᒃ ᐊᒻᒪᓗ ᐃᓅᑦᔪᓯᖓᓂᒃ.

1978-ᒥᓂᑦ ᑲᑎᕕᒃ ᐃᓕᓴᕐᓂᓕᕆᓂᖅ ᑖᓐᓇᑐᐊᖑᑦᓱᓂ ᐱᑕᖃᕐᑎᓯᔪᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ.  ᐃᓕᓐᓂᐊᓂᕐᒨᓕᖓᔪᑦ ᐱᓇᓱᐊᕐᑕᐅᔪᑦ ᐱᕙᓪᓕᐊᑎᓯᒪᔭᖏᑦ ᐃᓕᓐᓂᐊᓂᓕᕆᓂᐅᑉ ᐊᑐᐃᓐᓇᐅᑎᑕᐅᕗᑦ ᐃᓘᓐᓇᖏᓐᓂᑦ ᐃᓕᓐᓂᐊᕕᖏᓐᓂᑦ 14-ᓂᑦ ᓄᓇᕕᒻᒥ ᓄᓇᓕᓐᓂ, ᐃᓄᒃᑎᑑᕐᖄᓱᑎᒃ ᐅᖃᐅᓯᕐᖄᒥᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐁᑉᐱᐅᑎᖃᕐᑎᓪᓗᒍ ᐅᖃᐅᓯᖓ.  ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 17-ᓂᒃ ᐃᓕᓐᓂᐊᕕᓐᓂᒃ ᐳᒃᑭᓂᕐᓴᓂᒃ ᐳᕐᑐᓂᕐᓴᓂᓪᓗ ᐊᒻᒪᓗᑦᑕᐅ 5-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ.