ᐃᓕᓐᓂᐊᑎᓂᒃ ᓴᐳᒻᒥᔨ

ᐁᕆᓕ 2016-ᒥ, ᑲᑎᕕᒃ ᐃᓕᓴᕐᓂᓕᕆᓂᖅ ᐊᑐᓕᕐᑎᓯᓚᐅᔪᔪᖅ ᒪᓕᒐᕐᒥᒃ ᐃᓕᓐᓂᐊᑎᓂᒃ ᓴᐳᒻᒥᓂᐅᑉ ᐱᕐᕈᓯᖓᓄᑦ. ᑕᒪᓐᓇ ᑐᕌᖓᕗᖅ ᐃᑲᔪᕐᓂᒧᑦ ᐃᓕᓐᓂᐊᑎᓂᒃ ᐅᕝᕙᓘᓐᓃᑦ ᐱᐊᕋᓕᓐᓂᒃ ᐋᕐᕿᓱᐃᓂᖓᑎᒍᑦ ᐃᓱᐃᓗᑕᕐᒥᒃ ᐊᑦᑐᐊᔭᖓᓂᒃ ᐊᓱᐃᓛᒃ ᑖᒃᑯᐊ ᐊᒻᒪᓗ ᐃᓕᓐᓂᐊᕕᒃ ᐅᕝᕙᓘᓐᓃᑦ ᐱᒍᑦᔨᕕᒃ ᑲᔪᓯᒍᓐᓇᖁᓗᒋᑦ ᐱᓇᓱᖃᑎᒌᑦᓯᐊᓂᕐᒥᒃ ᐃᓕᓐᓂᐊᑎᓄᑦ ᐱᐅᓂᕐᐹᒧᑦ ᑐᕌᖓᑎᓪᓗᒍ ᐊᒻᒪᓗ, ᐃᓱᐊᓂ, ᐃᓘᓐᓀᓄᑦ ᐱᐅᓂᕐᐹᒧᑦ ᑐᕌᖓᑎᓪᓗᒍ.

ᑌᒣᓕᖓᔪᒥᒃ ᑎᒍᒥᐊᕐᓱᓂ, ᑲᑎᕕᒃ ᐃᓕᓴᕐᓂᓕᕆᓂᖅ ᑎᒡᒍᐊᓯᓯᒪᔪᖅ ᐃᓕᓐᓂᐊᑏᑦ ᓴᐳᒻᒥᔨᖓᓂᒃ. ᑖᓐᓇ ᑭᖑᓪᓕᖅ ᐃᓪᓗᐃᓈᓃᒐᓂ ᐊᒻᒪᓗ ᐃᒻᒥᓂᕿᑦᓱᓂ ᐱᖓᑦᓯᐅᑎᔪᖅ. ᑭᒡᒐᐅᔭᖏᑦᑐᖅ ᐱᐊᕋᓕᓐᓄᑦ ᐃᓕᓐᓂᐊᑎᓄᓪᓘᓃᑦ ᑭᒡᒐᐅᒥᒐᓂᓗ ᐃᓕᓴᕐᓂᓕᕆᓂᕐᒧᑦ. ᐱᓇᓱᑦᑎᐅᖏᒻᒥᔪᖅ ᐃᓕᓴᕐᓂᓕᕆᔨᒃᑯᓄᑦ.

ᐃᓕᓐᓂᐊᑎᓂᒃ ᓴᐳᒻᒥᔨ ᐱᓇᓱᓲᖑᕗᖅ ᐅᖃᔭᒪᓐᓂᖃᖕᖏᓗᑐᕐᓱᓂ. ᕿᒥᕐᕈᓲᖅ ᐅᓐᓂᓘᑎᓂᒃ ᒪᓂᑦᔨᕕᐅᒍᑎᒥᓂᒃ ᐊᑕᐅᓯᐅᓈᕐᑎᓱᓂᒋᑦ. ᓄᑭᓕᒃ ᓱᖁᔨᓂᕐᒥᓂᒃ ᑫᒥᑦᓯᓂᑐᐃᓐᓇᒥᒃ ᑭᒡᒐᑐᕐᑏᑦ ᑲᑎᒪᔨᖏᓐᓄᑦ, ᑐᑭᑖᕐᑎᐅᒐᓂ.

ᐃᓕᓐᓂᐊᑎ ᐅᕝᕙᓘᓐᓃᑦ ᐱᐊᕋᓕᒃ ᓈᒻᒪᓴᖕᖏᑯᓂ ᐱᒍᑦᔭᐅᒍᑎᒥᒃ ᐱᔭᒥᓂᒃ ᐅᕝᕙᓘᓐᓃᑦ ᐊᑐᕐᑎᑕᐅᓂᖓᓂᒃ ᒪᓕᒐᐅᑉ, ᐱᕐᕈᓯᐅᑉ ᐅᕝᕙᓘᓐᓃᑦ ᐱᐅᓯᐅᑉ ᒪᓕᖁᔭᐅᕗᖅ ᐅᑯᓂᖓ 3-ᓂᒃ ᐊᓪᓗᕆᐊᕐᑕᕈᑎᓂᒃ.

1. ᐃᓱᐃᓪᓕᐅᕈᑎ ᐋᕐᕿᕋᓱᓪᓗᒍ ᐃᓄᒃ ᐱᑦᔪᑕᐅᔪᖅ ᐃᓚᒋᓗᒍ

ᐃᓕᓐᓂᐊᑎ ᐅᕝᕙᓘᓐᓃᑦ ᐱᐊᕋᓕᒃ ᓈᒻᒪᓴᖕᖏᑐᖅ ᐱᒍᑦᔭᐅᓂᕐᒥᒃ ᐱᔭᒥᓂᒃ ᐅᕝᕙᓘᓐᓃᑦ ᐊᑐᕐᑎᑕᐅᓂᖓᓂᒃ ᒪᓕᒐᐅᑉ, ᐱᕐᕈᓯᐅᑉ ᐅᕝᕙᓘᓐᓃᑦ ᐱᐅᓯᐅᑉ ᓂᕆᐅᕝᕕᐅᕗᖅ ᓯᕗᓪᓕᐹᒥᒃ ᐋᕐᕿᓱᐃᓚᖓᑎᓪᓗᒍ ᐃᓱᐃᓗᑕᕐᒥᒃ ᐃᓄᒃ ᐱᑦᔪᑎᖓ ᐃᓚᒋᓗᒍ, ᐆᑦᑑᑎᒋᓗᒍ, ᐃᓄᒃ ᑐᑭᑖᕐᑐᕕᓂᖅ ᐃᓱᐃᒋᔭᐅᔪᒥᒃ.

ᑭᖑᓂᐊᒍᑦ, ᐃᓱᐃᓪᓕᐅᕈᑎ ᐋᕐᕿᖏᑐᐊᕐᐸᑦ, ᐱᕐᕈᓯᐅᒋᐊᓕᒃ ᐃᒣᓕᖓᔪᖅ:

  • ᐅᓐᓂᓘᑎ ᐱᑦᔪᑎᖃᕐᐸᑦ ᐱᓇᓱᑦᑎᒥᒃ ᐃᓕᓐᓂᐊᕕᒻᒧᑦ ᐅᕝᕙᓘᓐᓃᑦ ᐱᒍᑦᔨᕕᒻᒧᑦ, ᑐᕌᕐᑎᒋᐊᑦᓯᐊᕆᐊᓕᒃ ᐃᓕᓐᓂᐊᕕᐅᑉ ᐊᖓᔪᕐᖄᖓᓄᑦ ᐅᕝᕙᓘᓐᓃᑦ ᑲᒪᔨᒻᒪᕆᖓᓄᑦ. ᐃᓕᓐᓂᐊᑎ ᐅᕝᕙᓘᓐᓃᑦ ᐱᐊᕋᓕᒃ ᓂᐳᕈᑎᖃᖕᖏᑯᓂ ᐅᓐᓂᓘᑎᖓᑕ ᑲᒪᒋᔭᐅᓂᖓᓂᒃ ᐅᕝᕙᓘᓐᓃᑦ ᓱᒍᑕᐅᓂᖓᓂᒃ, ᐅᓐᓂᓘᑎᒥᒃ ᑎᑭᑎᑦᓯᖔᕈᓐᓇᑐᖅ ᑐᑭᒧᐊᑦᑎᓯᔨᒧᑦ ᐃᓕᓐᓂᐊᕕᓐᓂᒃ ᐊᐅᓚᑦᓯᓂᒥᒃ ᐅᕝᕙᓘᓐᓃᑦ ᑐᑭᒧᐊᑦᑎᓯᔨᒧᑦ ᐃᓄᒻᒪᕆᓐᓂᒃ ᐃᓕᓐᓂᐊᑎᑦᓯᓂᕐᒥᒃ, ᓇᓪᓕᐅᖑᒋᐊᖃᕐᓂᖓ ᒪᓕᓪᓗᒍ, ᐅᕝᕙᓘᓐᓃᑦ ᑐᕌᕐᑎᑕᐅᖁᔨᓗᓂ ᐸᐸᑦᓯᔨᒻᒪᕆᐅᑉ ᐁᑉᐸᖓᓄᑦ.
  • ᐅᓐᓂᓗᒍᑏᑦ ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖓᓂᒃ ᐅᕝᕙᓘᓐᓃᑦ ᑲᒪᔨᒻᒪᕆᖓᓂᒃ ᐃᓕᓐᓂᐊᕕᒻᒥ ᑐᓂᔭᐅᒋᐊᓖᑦ ᑐᑭᒧᐊᑦᑎᓯᔨᖓᓄᑦ ᐃᓕᓐᓂᐊᕖᑦ ᐊᐅᓚᑕᐅᓂᖏᑦ ᐅᕝᕙᓘᓐᓃᑦ ᐃᑲᔪᕐᑎᖓᓄᑦ ᑲᔪᓯᒃᑫᔨᐅᑉ, ᑌᒣᑐᐊᕐᐸᑦ.
  • ᐅᓐᓂᓘᑏᑦ ᐱᑦᔪᑎᓖᑦ ᑐᑭᒧᐊᑦᑎᓯᔨᒥᒃ ᐃᓄᒻᒪᕇᑦ ᐃᓕᓐᓂᐊᕕᖓᓂ ᐊᒻᒪᓗ ᐱᓇᓱᒐᕐᓂᒃ ᐱᒋᐅᕐᓴᕕᒻᒥ ᐋᑕᐅᒋᐊᓖᑦ ᑐᑭᒧᐊᑦᑎᓯᔨᒧᑦ ᐃᓄᒻᒪᕇᑦ ᐃᓕᓐᓂᐊᓂᖓᓄᑦ ᐊᒻᒪᓗ ᐱᓇᓱᒐᕐᓂᒃ ᐱᒋᐅᕐᓴᐅᑎᓄᑦ ᐱᑦᔪᔨᕕᒻᒥ.
  • ᐃᓘᓐᓈᒍᑦ ᐅᖃᕐᓗᓂ, ᐅᓐᓂᓘᑏᑦ ᓈᒻᒪᓴᖕᖏᑐᑦ ᓇᓪᓕᐊᓂᒃ ᐱᑦᔪᔨᕕᒻᒥᒃ ᐃᓕᓴᕐᓂᓕᕆᓂᕐᒥ ᐅᕝᕙᓘᓐᓃᑦ ᐱᓇᓱᑦᑎᖏᓐᓂᒃ ᐋᑕᐅᔪᑦᓴᐅᕗᑦ ᑐᑭᒧᐊᑦᑎᓯᔨᒧᑦ ᑌᑲᓂ ᐱᑦᔪᔨᕕᒻᒥ.

ᑌᒣᓕᔪᕕᐅᑉᐸᑦ, ᐃᓕᓐᓂᐊᑎ ᐅᕝᕙᓘᓐᓃᑦ ᐊᖓᔪᕐᖄᖓ ᐊᓕᐊᓱᖕᖏᐸᑎᒃ ᑲᒪᒋᔭᐅᒍᑎᕕᓂᖓᓂᒃ ᐅᓐᓂᓗᒍᑎᖓᑕ, ᐅᓐᓂᓗᒍᑎᒥᓂᒃ ᑐᕌᕐᑎᓯᒍᓐᓇᑐᑦ ᑲᔪᓯᒃᑫᔨᒧᑦ ᐅᕝᕙᓘᓐᓃᑦ ᑭᒡᒐᑐᕐᑎᖓᓄᑦ.

ᐃᓕᓐᓂᐊᑎ ᐅᕝᕙᓘᓐᓃᑦ ᐱᐊᕋᓕᒃ ᓱᓕ ᓂᐳᕈᑎᖃᖕᖏᐸᑦ ᑖᒃᑯᓂᖓ ᐊᓪᓗᕆᐊᕐᑕᕈᑎᓂᒃ, ᐅᓐᓂᓘᑎᖓ ᑐᕌᕐᑎᑕᐅᒍᓐᓇᑐᖅ ᐸᐸᑦᓯᔨᒻᒪᕆᐅᑉ ᐁᑉᐸᖓᓄᑦ ᑕᒪᑐᒪ ᐅᖃᕐᑕᐅᓂᖓ ᑭᖑᓪᓕᖓᓂ ᐃᓚᖓᓂ ᑕᒡᒐᓂ ᒪᓕᓪᓗᒍ.

2. ᐅᖃᕐᓗᓂ ᐃᓄᒻᒧᑦ ᐅᓐᓂᓘᑎᓂᒃ ᑲᒪᒋᐊᓕᒻᒧᑦ

ᐃᓕᓐᓂᐊᑎ ᐅᕝᕙᓘᓐᓃᑦ ᐱᐊᕋᓕᒃ ᓂᐳᕈᑎᖃᖕᖏᐸᑦ ᐅᓐᓂᓘᑎᖓᑕ ᑲᒪᒋᔭᐅᓂᖓᓂᒃ ᐅᕝᕙᓘᓐᓃᑦ ᓱᒍᑕᐅᓂᖓᓂᒃ ᓯᕗᓪᓕᒥᒃ ᑲᒪᒍᑕᐅᑎᓪᓗᒍ, ᑖᓐᓇ ᐃᓕᓐᓂᐊᑎ ᐅᕝᕙᓘᓐᓃᑦ ᐱᐊᕋᓕᒃ ᐅᖃᕈᓐᓇᑐᖅ ᐃᓄᒻᒧᑦ ᐅᓐᓂᓘᑎᓂᒃ ᑲᒪᒋᐊᓕᒻᒧᑦ, ᐆᑦᑑᑎᒋᓗᒍ ᐸᐸᑦᓯᔨᒻᒪᕆᐅᑉ ᐁᑉᐸᖓᓄᑦ, ᐅᓐᓂᓘᑎᒥᒃ ᓄᐃᑦᓯᕕᒋᓚᖓᓗᒍ ᐊᓪᓚᓯᒪᔪᕐᑎᒍᑦ.

ᑖᓐᓇ ᑭᖑᓪᓕᖅ ᓇᓗᓀᕐᓯᓚᖓᔪᖅ ᐅᓐᓂᓘᑎᐅᑉ ᓄᐃᑕᑦᓴᐅᓂᖓᓂᒃ ᐊᒻᒪᓗ, ᐋᖃᐅᑐᐊᕐᐸᑦ, ᑐᕌᕐᑎᓗᒍ ᐃᓕᓐᓂᐊᑎᓂᒃ ᓴᐳᒻᒥᔨᒧᑦ ᐊᓱᐃᓛᒃ ᑭᓪᓕᓯᓂᐊᕈᑕᐅᓂᐊᕐᒪᑦ. ᐸᐸᑦᓯᔨᒻᒪᕆᐅᑉ ᐁᑉᐸᖓ ᐊᐳᕐᑎᓯᑐᐊᕐᐸᑦ ᐅᓐᓂᓘᑎᒥᒃ ᑕᒡᒐᓂ, ᐃᓕᓐᓂᐊᑎ ᐅᕝᕙᓘᓐᓃᑦ ᐱᐊᕋᓕᒃ ᑐᑭᑖᖓᓂᒃ ᐅᑎᕐᕕᐅᖁᔨᒍᓐᓇᑐᖅ, ᑕᒪᑐᒪ ᐅᖄᔭᐅᓂᖓ ᐃᓚᖓᓂ 3-ᒥ ᑕᒡᒐᓂ ᒪᓕᓪᓗᒍ.

ᐸᐸᑦᓯᔨᒻᒪᕆᐅᑉ ᐁᑉᐸᖓᓄᑦ ᑐᕌᕈᑏᑦ

514 482-8220, ext. 302 | associatesecretarygeneral@kativik.qc.ca

ᐅᖄᒍᑏᑦ ᐸᐸᑦᓯᔨᒻᒪᕆᐅᑉ ᐁᑉᐸᖓᓄᑦ, ᐅᖄᓂᒃᑰᒐᓗᐊᕐᐸᑕ ᐊᓪᓚᓯᒪᒐᓗᐊᕐᐸᑕᓗ, ᐃᓄᒃᑎᑑᕈᓐᓇᑐᑦ, ᖃᓪᓗᓈᑎᑐᓪᓘᓃᑦ ᐅᕝᕙᓘᓐᓃᑦ ᐅᐃᒍᐃᑎᑐᑦ, ᐃᓕᓐᓂᐊᑎᐅᑉ ᐅᕝᕙᓘᓐᓃᑦ ᐱᐊᕋᓕᐅᑉ ᐃᓱᐊᕆᓂᕐᓴᖓ ᒪᓕᓪᓗᒍ.

3. ᑐᕌᕐᓂᖅ ᐃᓕᓐᓂᐊᑎᓂᒃ ᓴᐳᒻᒥᔨᒧᑦ

ᐃᓕᓐᓂᐊᑎᓂᒃ ᓴᐳᒻᒥᔨ ᑲᒪᓯᓲᖑᕗᖅ ᐃᒣᑦᑐᖃᓕᕐᒪᑦ:

  • ᐸᐸᑦᓯᔨᒻᒪᕆᐅᑉ ᐁᑉᐸᖓ ᑎᑭᑎᑦᓯᑐᐊᕐᒪᑦ ᐅᓐᓂᓘᑎᒥᒃ ᓄᐃᑕᑦᓴᖁᑎᒋᔭᐅᔪᒥᒃ.
  • ᐃᓕᓐᓂᐊᑎ ᐅᕝᕙᓘᓐᓃᑦ ᐱᐊᕋᓕᒃ ᐅᑎᕐᕕᐅᖁᔨᑉᐸᑦ ᐅᓐᓂᓘᑎᐅᑉ ᐊᐳᕐᑎᑕᐅᓂᖓᓂᒃ ᐸᐸᑦᓯᔨᒻᒪᕆᐅᑉ ᐁᑉᐸᖓᓄᑦ. ᑕᒪᓐᓇᐅᑐᐊᕐᐸᑦ, ᐊᓪᓚᕕᑦᓴᖅ ᐅᓇ “ᑐᑦᓯᕋᐅᑎ ᑲᒪᒋᔭᐅᓂᕐᒥᒃ ᐃᓕᓐᓂᐊᑎᓂᒃ ᓴᐳᒻᒥᔨᒧᑦ” ᑕᑕᓴᕐᑕᐅᒋᐊᓕᒃ  ᑎᑭᑎᑕᐅᓗᓂᓗ ᐸᐸᑦᓯᔨᒻᒪᕆᐅᑉ ᐁᑉᐸᖓᓄᑦ, ᑖᑦᓱᒪ ᑎᑭᑎᓂᐊᕐᒪᐅᑉ ᐃᓕᓐᓂᐊᑎᓂᒃ ᓴᐳᒻᒥᔨᒧᑦ.

ᐃᓕᓐᓂᐊᑎ ᐅᕝᕙᓘᓐᓃᑦ ᐱᐊᕋᓕᒃ ᐅᖃᕈᓐᓇᒥᔪᖅ ᐃᓕᓐᓂᐊᑎᓂᒃ ᓴᐳᒻᒥᔨᒧᑦ ᑐᕃᓐᓇᓗᓂ ᖃᖓᓕᒫᑦᓯᐊᖅ ᐃᑲᔪᕐᑕᐅᒍᒪᒍᓂ ᐅᓐᓂᓘᑎᒥᒃ ᐊᐅᓚᑦᓯᓂᕐᒥᒍᑦ.

ᐃᓕᓐᓂᐊᑎᓂᒃ ᓴᐳᒻᒥᔨᒧᑦ ᑐᕌᕈᑏᑦ

ᑳᕈᓕᓐ ᓕᒣ | 514 716-6468 | info@omega-ombs.ca

ᐅᓪᓗᐃᑦ 45 ᐅᖓᑖᓅᖕᖏᑐᖅ ᑭᖑᓂᕐᒥ ᐅᓐᓂᓘᑎᒧᑦ ᑎᑭᑕᐅᓂᕐᒥᓄᑦ, ᐃᓕᓐᓂᐊᑎᓂᒃ ᓴᐳᒻᒥᔨ ᑭᒡᒐᑐᕐᑏᑦ ᑲᑎᒪᔨᖏᓐᓄᑦ ᓄᐃᑦᓯᒋᐊᓕᒃ ᐃᓱᒪᒥᓂᒃ ᐱᑦᔪᑎᖃᕐᑎᓗᒍ ᐅᓐᓂᓘᑎᒥ ᓱᓪᓕᑎᓂᒃ ᐊᒻᒪᓗ, ᒥᑦᓯᖃᕐᓂᖓᑎᒍᑦ, ᑫᒥᑕᐅᖁᔨᓗᓂ ᓈᒻᒪᑐᓂᒃ ᐋᕐᕿᒋᐊᕐᑎᓯᒍᑎᓂᒃ.

ᑖᒃᑯᓭᓐᓀᑦ ᐅᓪᓗᐃᑦ ᐃᓗᐊᓂ, ᐊᑦᔨᖏᑦ ᑌᒣᑦᑐᒧᑦ ᖃᐅᔨᑎᑦᓯᒍᑎᒧᑦ ᐊᒻᒪᓗ ᑫᒥᑕᐅᖁᔨᒍᑎᓄᑦ, ᐱᑕᖃᕐᐸᑕ, ᑐᔫᑕᐅᒋᐊᓖᑦ ᐸᐸᑦᓯᔨᒻᒪᕆᐅᑉ ᐁᑉᐸᖓᓄᑦ ᐊᒻᒪᓗ ᐃᓕᓐᓂᐊᑎᒧᑦ ᐅᕝᕙᓘᓐᓃᑦ ᐱᐊᕋᓕᒻᒧᑦ.

ᑭᒡᒐᑐᕐᑏᑦ ᑲᑎᒪᔨᖏᑦ ᖃᐅᔨᑎᑦᓯᓴᐅᑎᒋᒋᐊᓖᑦ ᐃᓕᓐᓂᐊᑎᒥᒃ ᐅᕝᕙᓘᓐᓃᑦ ᐱᐊᕋᓕᒻᒥᒃ ᖃᓄᖅ ᐊᐅᓚᑦᔭᖕᖑᓱᓐᓂᒥᓂᒃ ᐃᓕᓐᓂᐊᑎᓂᒃ ᓴᐳᒻᒥᔨᐅᑉ ᑫᒥᑕᐅᖁᔭᖏᑦ ᐱᑦᔪᑎᒋᓗᒋᑦ.

ᑕᑕᕐᓴᕋᑦᓴᒥᒃ ᐱᒍᒪᒍᕕᑦ ᑐᑦᓯᕋᕈᑎ ᐱᖓᑦᓯᐅᑎᔭᐅᒍᒪᐅᑎᒥᒃ ᐃᓕᓐᓂᐊᑏᑦ ᐅᓐᓂᓗᕝᕕᖓᓄᑦ ᑲᑎᕕᒃ ᐃᓕᓴᕐᓂᓕᕆᓂᕐᒥ, ᐅᕗᖓ ᓇᕐᓂᓗᑎᑦ.

ᖃᐅᔨᒋᐊᕐᕕᐅᒍᓐᓇᑐᖅ ᐊᓪᓚᓯᒪᔪᖅ