ᐋᕐᕿᓯᒪᑎᑦᓯᓂᕐᓄᑦ ᐸᕐᓀᒍᑏᑦ
ᓱᒧᑦ ᖃᓄᐃᓘᒍᑎᑦᓴᖃᕐᓂᒧᑦ ᐸᕐᓀᓯᒪᐅᑎᖃᕆᐊᓕᒃ?
ᖃᓄᐃᓘᒍᑎᑦᓴᖃᕐᓂᒧᑦ ᑐᕌᕐᓂᖏᑦ ᐊᒻᒪᓗ ᑐᕌᒐᓱᐊᕐᑕᖏᑦ ᓇᓗᓀᕐᑕᐅᒪᔪᑦ ᑕᒫᓂ ᐃᑲᔪᕐᓯᓚᖓᒻᒪᑕ ᐃᓕᓴᕐᓂᓕᕆᓂᐅᑉ ᐃᑉᐱᒍᓱᓐᓂᖓᑕ ᐱᕙᓪᓕᐊᓂᖓᓂᑦ ᐊᒻᒪᓗ ᐊᓪᓗᑕᐅᓯᒪᔪᓂᑦ ᐱᑕᖃᒋᐊᓕᓐᓂᑦ. ᓱᕐᖁᐃᓇᕐᑎᓯᐅᑕᐅᓚᖓᒻᒥᔪᑦ ᐱᓇᓱᐊᕈᑕᐅᔪᑦ ᐱᑐᑦᓯᒪᐅᑎᓂᖏᓐᓂᒃ ᐊᒻᒪᓗ ᑲᔪᓯᑎᑕᐅᑦᓯᐊᕆᐊᖃᕐᓂᖏᓐᓂᒃ ᑕᒪᐅᙰᓐᓈᑎᑕᐅᑦᑌᓕᓗᑎᒃ.
ᑲᑎᕕᒃ ᐃᓕᓴᕐᓂᓕᕆᕕᒃ ᐃᖏᕐᕋᓯᑦᓱᓂ 1978-ᒥ, ᕿᒻᒪᖁᓯᕐᑕᐅᓯᒪᕗᖅ ᐃᓕᒃᑰᑎᕐᑐᓂᒃ ᐃᓕᓴᕐᓂᒥᒃ ᐋᕐᕿᓱᐃᓯᒪᕕᐅᔪᓂᒃ ᐃᓕᓴᕐᕕᖁᑎᒋᔭᐅᓯᒪᔪᓂᒃ ᑲᕙᒪᑐᖃᒃᑯᓄᑦ ᐊᒻᒪᓗ ᑯᐯᒻᒧᑦ.
ᓴᓇᔭᐅᖃᑦᑕᓯᒪᔪᑦ ᐊᕐᕌᒍᐃᑦ 40 ᓴᓂᐊᓂᒐᓚᒃ, ᓄᐃᑕᑎᑦᓯᓕᕐᑐᑦ ᓄᓇᕕᒻᒥ ᐃᓕᓴᕐᓂᓕᕆᓂᐅᑉ ᐋᕐᕿᓱᕐᓯᒪᐅᑎᖏᑦ ᑕᑯᑦᓴᐅᑎᑦᓯᒪᑕ ᐊᔪᐃᓐᓇᒍᑕᐅᓯᒪᓂᖓᓂᒃ ᑲᓱᑦᑎᓯᓂᕐᒥᑦ ᖃᓪᓗᓈᑦ ᐃᓕᓭᒍᓯᖏᓐᓂᑦ ᐆᑦᑐᕋᐅᑎᐅᑦᓱᓂ ᐱᐅᓯᑐᖃᕐᑎᒍᑦ ᐃᓄᐃᑦ ᐃᓕᓭᒍᓯᖏᓐᓂᒃ ᐆᑦᑐᕋᐅᑎᒧᑦ. ᑕᒪᓐᓇ ᐱᒻᒪᕆᐅᕗᑦ ᐱᔭᕐᓃᑐᒻᒪᕆᐅᑦᓱᓂᓗ ᐱᓇᓱᐊᕋᑦᓴᖅ, ᑌᒪᖕᖓᓕᒫᕐᓗ ᐋᕐᕿᒋᐊᕐᑕᐅᖏᓐᓇᐸᑦᓱᓂ ᑌᒣᒋᐊᖃᓚᕿᕙᑦᓱᓂ ᓱᑲᒃᑐᒥᒃ ᐊᓯᑦᔨᕙᓪᓕᐊᓂᖏᓐᓄᑦ ᑭᖕᖒᒪᔭᖏᑦᑕ ᐅᕕᒃᑲᐅᓂᕐᓴᖁᑎᑦᑕ.
ᑲᑎᕕᒃ ᐃᓕᓴᕐᓂᓕᕆᕕᒃ ᐃᖏᕐᕋᑎᑦᓯᔪᖅ ᐃᓕᓴᕐᕕᖁᑎᒥᓂᒃ ᐊᒻᒪᓗ ᐃᓕᓭᕕᖁᑎᒥᓂᒃ ᐊᕙᑎᒦᑦᑎᓗᒋᑦ ᐃᓕᒃᑰᓚᕆᑦᑐᓂᒃ ᐊᑦᔨᒋᔭᐅᖕᖏᑐᓂᒃ ᐱᒐᓱᐊᒻᒪᕆᐅᑎᑕᖃᕐᑎᓗᒋᑦ. ᐃᓗᒡᒍᓯᒧᐊᖓᔪᑦ, ᐱᓂᐊᕐᓂᓕᕆᓂᕐᓄᐊᖓᔪᑦ, ᐃᓅᖃᑎᒌᓄᐊᖓᔪᑦ ᐊᒻᒪᓗ ᒪᑭᑕᒐᓱᐊᕈᑎᑦᓴᓄᐊᖓᔪᑦ ᐃᓕᐅᕐᖃᑕᐅᓯᒪᑦᓱᑎᒃ ᐃᓄᓐᓅᖃᕐᑕᐅᓱᑎᒃ ᓄᓇᕕᒻᒥᐅᓄᑦ ᐊᐅᓚᑦᓯᔪᓄᑦ ᓱᕙᓪᓕᖃᔭᕐᑑᔮᕈᓐᓀᑐᓂᒃ ᐅᑎᕐᑕᕕᐅᑐᐃᓐᓇᐸᓕᕐᑎᓗᒋᑦ ᓄᓇᓕᖁᑎᕗᑦ. ᐊᔪᐃᓐᓇᓂᖃᒐᑦᑕ ᐱᑕᖃᕐᑎᓯᓂᕐᒥᑦ ᓄᓇᕕᒻᒥᐅᑦ ᐱᐅᔪᓪᓚᕆᐊᓗᓐᓂᑦ ᐃᓕᓴᕐᓂᓕᕆᓂᖓᓂᑦ ᐱᒍᑦᔨᓂᕐᒥᑦ ᐊᑑᑎᒍᓐᓇᖁᓗᒋᑦ ᐊᓂᒎᑎᑦᓯᐊᓂᕐᒧᑦ ᑎᑭᐅᑎᒐᓱᐊᕐᑕᒥᓄᑦ ᐱᒍᓐᓇᓯᐊᕐᓂᒥᓂᑦ, ᑲᔪᓯᑦᓱᑕᓗ ᓵᖕᖓᓯᒋᐊᒥᑦ ᓱᕐᕋᑕᐅᓯᒪᓂᕐᒥᑦ ᐊᑑᑎᔪᕕᓂᕐᓂᑦ ᐃᓕᕐᕈᓯᑦᓴᔭᕆᖕᖏᑕᒥᓂᑦ ᐃᓕᕐᕈᓯᑦᑖᑎᑕᐅᓂᕐᒥᑦ ᐃᓕᕐᕈᓯᖓᓗ ᐱᒻᒪᕆᐅᑎᑕᐅᒐᓂ ᓱᒃᑯᔨᐊᒍᑦᓱᑎᒃ.
ᐃᓕᓐᓂᐊᓂᓕᕆᕕᒻᒥ, ᑐᕌᕐᓂᖃᕐᑐᒍᑦ ᐃᓕᓐᓂᐊᓂᓕᕆᓂᖅ ᐊᑕᐅᓯᐅᓕᖓᑎᑦᓱᒍ. ᐱᒍᑦᔨᐅᑏᑦ ᐱᑕᖃᕐᑎᑕᕗᑦ ᐃᓚᒋᔭᐅᑎᓪᓗᒋᑦ ᐃᓕᓐᓂᐊᕈᑎᓕᐊᖑᓲᑦ ᑐᖕᖓᕕᖃᕐᑎᑕᐅᔪᑦ ᐃᓄᐃᑦ ᐅᖃᐅᓯᖓᓂᑦ ᐱᔪᒥᒃ ᐃᓄᒍᐃᓂᕐᒥᒃ, ᐃᓕᓐᓂᐊᓂᓕᕆᓂᐅᑉ ᐃᓗᐊᓂ ᐱᕈᕐᐸᓕᐊᑎᑦᓯᓂᐅᑦᓱᓂ ᐃᓄᒻᒥᒃ ᐊᓂᕐᑎᕆᔪᒥᒃ, ᐃᓚᐅᑎᑦᓱᒍ ᑐᕋᐃᓐᓇᑐᒥᒃ ᐊᕙᑎᖓᓄᑦ ᓄᓇᓕᖓᓄᓪᓗ.
