ᓇᓪᓕᐅᓂᕐᓯᐅᓂᖃᕐᑎᓗᒋᑦ ᐅᕕᒃᑲᓂ ᐃᑉᐱᒍᓱᓕᐅᒥᑎᑦᓯᓂᕐᒥ ᓯᕗᓂᑦᓴᖏᓐᓄ ᐃᓕᓴᕐᓂᓕᕆᓂᕐᒥ, ᐃᓕᒌᑦ ᐃᓕᓴᕐᕕᓂ ᐱᖓᓱᓂᑦ ᐱᓯᒪᔪᑦ ᓄᓇᕕᒻᒥᑦ  ᐱᒍᓐᓇᓯᓚᐅᕐᑐᑦ  ᓇᒻᒥᓂᖅ ᓀᑦᑐᓂ ᐊᐅᓚᔫᓕᐅᕆᓂᕐᒥ/ᐊᐅᓚᔫᕐᕕᓄᐊᓕᖓᔪᓂ. ᐃᓕᑕᕐᓇᐅᑎᖃᕐᓱᑎᒃ  ᐆᒥᖓ “ᓯᓚᕐᔪᐊᕗᑦ”,  ᐃᓕᓵᑦ ᐃᓕᑕᕆᔭᐅᖁᔨᓗᐊᖕᖑᑐᕕᓃᑦ ᐊᑦᔨᒌᖕᖏᑐᓂ ᐃᓄᐃᑦ ᐃᓕᕐᕈᓯᖓᓄᐊᓕᖓᔪᓂᒃ ᐃᓅᓯᖏᓐᓄᐊᓕᖓᔪᓂᓪᓗ.

ᓀᑦᑐᖅ ᑕᑯᓐᓇᕋᑦᓴᓕᐊᖑᓯᒪᔪᖅ ᑲᓄᓴᒃ  2019, ᐳᕐᑐᓂᕐᐸᐅᑎᓪᓗᒍ ᓵᓚᖃᐅᑎᕕᓂᖅ ᓵᓚᖃᖃᑕᐅᒐᓱᐊᕐᑐᓂ, ᐊᑦᓯᓯᒪᔭᖏᑦ ᒪᙯᑦᑎᐊᐲᑦ ᐊᐅᓚᔫᓕᐊᕕᓂᖏᑦ ᔪᐊᓇᓯ ᑐᒃᑐ, ᐱᓃᓇ ᐊᓄᒑᒃ, ᐊᑯᓕᐊᖅ ᐊᓄᒑᒃ ᐊᒻᒪᓗ ᑌᕕᑎ ᓈᓚᑦᑐᖅ. “ᓂᕈᐊᕐᓯᒪᓚᐅᕐᑐᒍᑦ ᒪᙯᓐᓂᒧᐊᓕᖓᔪᒥ ᐊᐅᓚᔫᓕᐅᕐᓂᒥ ᐃᓱᒪᖃᓚᐅᕋᑦᑕ ᐊᕙᑎᒻᒥᐅᑕᑦᑎᓂᒃ, ᓄᓇᓕᑦᑎᓂ ᒪᙯᓐᓂ ᖃᐅᑕᒫᕐᓯᐅᑎᑦᑎᓄ ᐊᖏᓂᕐᐸᐅᑎᓪᓗᒍ ᐃᓚᒋᔭᐅᒻᒪᑦ – ᐊᑐᕐᓂᖃᕐᓂᐸᐅᖃᑕᐅᑦᓱᓂᓗ ᐃᓅᑦᓱᑕ ᐃᓕᕐᕈᓯᑦᑎᓄᑦ ᐊᒻᒪᓗ ᑌᒪᖕᖓᓂᐊᓗ ᐃᓅᑦᔪᓯᕆᑦᓱᒍ ᐊᕐᕌᒍᕋᓵᓗᓐᓂ ᑕᐅᓴᓂ. (…) ᑭᖑᕚᑦᓴᑎᓐᓂ ᐅᕙᑦᑎᓂ ᓄᑲᕐᓯᓂ ᖃᐅᔨᒪᖁᔨᒐᑦᑕ ᐱᐅᓯᕕᓂᑦᑎᓂ ᐊᒻᒪᓗ ᐃᓕᕐᕈᓯᑦᑎᓂ  ᐃᓅᑦᔪᓯᑦᑎᓂ. ᒪᙯᓐᓂᖅ = ᐃᓅᓯᖅ.” ᒪᙯᑦᑎᐊᐲᑦ ᓴᓇᔭᐅᓯᒪᔪᖅ ᑭᓘᑕᖅ ᐅᒥᐅᔭᐅᑉ ᐃᓕᓴᕐᕕᖓᓂ, ᓴᐳᒻᒥᔨᖃᕐᓱᑎᒃ ᕇᐱᑲ ᓕᓵᑦᒥ (ᓯᕗᓕᕐᑎ, ᓴᓇᖕᖑᐊᓯᒪᔪᑦ ᐊᒻᒪᓗ  ᐱᕙᓪᓕᐊᔪᓕᕆᔩᑦ ᐊᑕᐅᑦᓯᑰᑎᓯᔨᖓ, ᐅᕕᒃᑲᓂ ᐃᑉᐱᒍᓱᓕᐅᒥᑎᑦᓯᓂᕐᒥ). ᔪᐊᓇᓯ ᑐᒃᑐ ᐃᓕᑕᕆᔭᐅᒍᑎᑖᕐᓂᒥᔪᖅ ᐊᑭᔭᐅᖕᖏᑐᒥ ᐊᔪᐃᓐᓇᓯᑎᐅᓂᕐᒥᓄᑦ ᐱᓇᓱᐊᕐᑕᒥᓂ.

ᐅᑉᐱᒃ ᐊᒻᒪᓗ ᑐᓗᒐᖅ ᓵᓚᓕᕕᓂᖅ ᐊᑭᔭᐅᖕᖏᑐᒥ ᐃᓕᑕᕆᔭᐅᒍᑎᒥ ᐱᓇᓱᐊᕐᓯᒪᓂᕐᒥᓄ ᐊᕐᕌᒍᕐᓂ ᖁᓕᓂ/ᑕᓪᓕᒪᐅᔪᕐᑐᓂ ᓄᓇᖃᕐᖄᓯᒪᔪᑦ ᓄᓇᓕᖏᓐᓂ. ᐊᐅᓚᔫᑦ ᓀᑦᑐᐃᑦ ᑕᑯᓐᓇᕋᑦᓴᓕᐊᕕᓂᖏᑦ ᐊᓯᒪᐅᑕᖅ ᐃᓕᓴᕐᕕᒃ (ᑰᑦᔪᐊᕌᐱᒃ), ᐃᓕᓵᑦ ᓵᒥᐊᓪ ᐃᑦᑐᓵᑦ, ᑖᕕᑦ ᐸᐱᐊᓗᒃ, ᑎᐊᔭᓐ ᑐᒃᑐ, ᔫᓯᐱ ᐊᐅᑦᓚᕈᒃ, ᓵᓕ ᐊᔭᒍᑕᖅ, ᖄᔨᐊᑦ ᐸᓚᒥ, ᐹᓪ ᕈᓯᐊᓪ, ᐋᓕᕙ ᐅᐃᑖᓗᑦᑐᖅ, ᒥᐊᔨ ᔮᒃ ᓄᕙᓕᖕᖓᖅ, ᑌᔮᓐ ᐸᓚᒥ, ᐁᕆᓕ-ᓕᓐ ᓄᕙᓕᖕᖓᖅ, ᔨᓕᓇ ᒫᔅᑎ, ᐊᒻᒪᓗ ᐃᔪᖓ ᒫᔅᑎ. “ᐃᓱᒪᑦᓴᓯᐅᕆᐊᖕᖓᓱᑕ ᐊᐅᓚᔫᓕᐊᕆᒐᑦᓴᑎᓐᓂ ᐊᒻᒪᓗ ᓯᓚᕐᔪᐊᕗᓐᓂ, ᐃᓱᒪᖃᓚᐅᔪᕗᒍᑦ ᐃᓄᐃᑦ ᐅᓂᒃᑲᐅᓯᖏᓐᓂ. ᑖᒃᑯᐊ ᐅᓂᒃᑳᑐᐊᑦ ᐃᓚᓖᑦ  ᐃᓗᓕᖏᓐᓂ ᐃᓅᓯᑦᑎᓄᑦ ᐱᒻᒪᕆᐅᖏᓐᓈᑐᓂ, ᐆᑦᑑᑎᒋᓗᒍ ᐆᒪᔪᐃᑦ ᐊᒻᒪᓗ ᓄᓇ, ᑭᓯᐊᓂ ᑕᑯᑦᓴᐅᓗᐊᕈᓐᓀᓱᑎᒃ ᓄᓇᕕᒻᒥ. ᐅᓂᒃᑳᑐᐊᕐᒥ ᐊᓯᑦᔨᑐᐃᑦᓱᑕ ᐅᑉᐱᒃ ᐊᒻᒪᓗ ᑐᓗᒐᖅ ᐅᓪᓗᒥᐅᓕᕐᑐ ᐱᐅᓯᕆᓕᕐᑕᕗᓐᓄ ᐊᓯᑦᔨᑐᕐᓱᒍ ᐅᕕᒃᑫᑦ ᐃᓪᓗᖁᑎᖓᓂ, ᑐᒐᖕᖑᐊᓱᓄᒃ, ᐊᒻᒪᓗ ᐱᒻᒪᕆᐅᓂᕐᐸᐅᑎᓪᓗᒍ ᖃᒧᑎᑲᓪᓚ. ”

ᑭᖑᓪᓕᐸᐅᑎᓪᓗᒍ, ᓄᓗᐊᓕᐅᕐᓂᖅ ᐃᓕᑕᕆᔭᐅᒍᑎᑖᕐᑐᕕᓃ ᓵᓚᖃᐅᑎᒥ ᐊᑐᕐᓂᖃᑦᓯᐊᓂᕐᐹᒥ ᓄᐃᑕᑎᑦᓯᓂᖅ. ᓯᕗᓕᕐᑎᖃᕐᓱᑎᒃ ᐃᓕᓭᔨᒥᓂ ᐃᐹᕐ ᑎᕈᓪᑦ, ᐃᓕᓵᑦ ᑐᑭᓯᓂᐊᕐᕕ ᐃᓕᓴᕐᕕᒥ (ᐊᑯᓕᕕᒃ) ᐃᓕᓴᕐᕕᒥᓂ ᓄᓗᐊᓕᐅᕐᕕᓚᕆᖕᖑᑎᑦᓯᓱᑎᒃ. ᑕᑯᓐᓇᕋᑦᓴᓕᐊᕕᓂᖏᓐᓂ ᑕᑯᑦᓴᐅᑎᑕᖏᑦ ᐊᑦᔨᒌᖕᖏᑐᓂᑦ  ᓄᓗᐊᓕᐅᕈᓰᑦ ᖃᓄᐃᓘᕐᑕᐅᓲᒍᒻᒪᖔᑕ ᒪᓕᑦᑕᐅᒋᐊᓕᓐᓂ ᓄᐃᑕᑎᑦᓯᓱᑎᒃ ᐊᒻᒪᓗ ᐅᓂᒃᑳᒥᑦᓱᓂ ᓱᓇᓄᑦ ᐊᑐᕐᓂᖃᕐᒪᖔᑕ. ᑐᑭᒧᐊᑦᑎᓯᔪᕕᓃᑦ ᐊᐅᓚᔫᓕᐅᕐᓂᒥ ᐃᓕᓵᑦ ᑌᔮᓐ ᐊᒫᒪᑦᑐᐊᖅ,ᓵᑭᕆᐊᓯ ᐊᒫᒪᑦᑐᐊᖅ, ᒫᑯᓯ ᐃᔦᑦᑐᖅ, ᐋᓗᐸ ᖁᓪᓕᐊᓗᒃ, ᐋᓕᒃ ᐊᓓᑯ ᐊᒻᒪᓗ ᔩᒥ ᖁᓪᓕᐊᓗᒃ.

ᐅᐱᒍᓲᑦᔨᕙᕗᑦ ᐃᓕᓵᓕᒫᑦ ᐱᒐᓱᐊᒻᒪᕆᓐᓂᕕᓂᖏᓐᓄᑦ, ᓴᓇᑐᔫᓂᖏᓐᓄ ᐱᒍᓐᓇᓯᐊᕐᓂᖏᓐᓄᓗ. ᐅᐱᒪᕈᑦᔨᒪᕆᑉᐳᒍᑦ ᐃᓕᑦᓯᓂᓕᒫᖅ ᐱᒍᓐᓇᓯᔭᕕᓂᑦᓯᓂᓗ! ᓇᑯᕐᒦᒍᒪᒻᒥᓱᒋᓪᓗ ᐅᕕᒃᑲᓂ ᐃᑉᐱᒋᔭᐅᖁᔨᓗᐊᖕᖑᐊᓂᕐᒧ ᐱᓇᓱᑦᑎᖏᓐᓂ ᐃᓚᒋᔭᐅᒍᓐᓇᓚᐅᕐᒪᑕ ᖁᓕᐅᖕᖏᒐᕐᑐᓄ ᓄᓇᓕᓐᓄ ᓄᓇᕕᒻᒥ: ᐱᓇᓱᐊᖃᑎᖃᖃᑦᑕᓛᕆᐊᒥ ᓂᕆᐅᓐᓂᖃᑦᓯᐊᐳᒍᑦ ᓯᕗᓂᕐᒥ.

Back to News