ᐊᕐᕌᒍ ᑲᔪᓯᑦᓯᐊᓂᖃᓚᐅᕐᑎᓗᒍ, ᑐᖓᓕᖏᑦ ᐃᓕᓐᓂᐊᑏᑦ ᓄᓇᕕᒃ ᓯᕗᓂᑦᓴᕘᒃᑯᓂ ᐱᔭᕇᕈᓯᓚᐅᕐᑐᑦ ᒣ 10-ᒥ. ᑲᑎᓯᓚᐅᕐᑐᒍᑦ ᓖᓴ ᒥᐊᓱᒥᒃ, ᑐᑭᒧᐊᑦᑎᓯᔨᖓᓂᒃ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᑏᑦ ᐱᒍᑦᔭᐅᕕᖓᓂ, ᖃᐅᔨᓴᕐᕕᒋᑦᓱᒍ ᖃᓄᐃᓕᖓᓕᕐᓂᖓᓂᒃ ᐃᓕᓐᓂᐊᕕᒃ.

ᑲᑎᕕᒃ ᐃᓕᓴᕐᓂᓕᕆᓂᖅ: ᐅᖃᐅᑎᒍᓐᓇᖃᑦᑎᒎᑦ ᓱᓇᐅᒻᒪᖔᑦ ᓄᓇᕕᒃ ᓯᕗᓂᑦᓴᕘᑦ?
ᓖᓴ ᒥᐊᓱ: ᒪᓐᑐᔨᐊᒦᑦᑐᖅ, ᓄᓇᕕᒃ ᓯᕗᓂᑦᓴᕘᑦ ᐊᕐᕌᒍᓕᒫᒥ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᑎᑦᓯᓂᐅᓲᖅ ᐃᓕᓐᓂᐊᑎᓂᒃ ᐱᒍᓐᓇᑎᑦᓯᓱᓂ ᐱᕙᓪᓕᐊᑎᑦᓯᓂᕐᒥᒃ ᖃᐅᔨᒪᓂᖏᓐᓂᒃ ᐊᒻᒪᓗ ᐱᓇᓱᐊᕐᓂᖏᓐᓂᒃ ᓯᕗᓕᕐᑎᐅᒍᓐᓇᓂᕐᒧᑦ ᐃᓗᓕᓕᓐᓂᒃ ᑐᖕᖓᕕᖃᕐᓱᑎᒃ ᐃᓄᐃᑦ ᐃᓗᕐᖁᓯᖓᓂᒃ. ᐃᓕᓐᓂᐊᑕᐅᔪᑦ ᐃᓕᓐᓂᐊᑏᑦ ᐱᔭᕇᓲᖏᑦ ᖁᕝᕙᕆᐊᕈᑎᑖᕈᑎᐅᓲᑦ ᐊᒻᒪᓗ ᖁᕝᕙᕆᐊᕈᑎᒋᔭᐅᒍᓐᓇᓱᑎᒃ ᐃᓕᓐᓂᐊᕕᒻᒧᑦ ᐳᕐᑐᓂᕐᓴᒋᐊᓪᓚᒧᑦ ᐱᔭᕇᕈᑎᑖᕐᓂᒧᑦ ᐃᓕᓐᓂᐊᑎᓄᑦ ᓯᕗᓂᕐᒥ ᐱᔭᕇᕈᑎᑖᕈᒪᔪᓄᑦ.

ᑲᑎᕕᒃ ᐃᓕᓴᕐᓂᓕᕆᓂᖅ: ᓇᓃᓕᕐᕿᑖ ᐱᖓᔪᖏᓐᓂ ᐃᓕᓐᓂᐊᕆᐊᓛᕐᑐᓂ ᓇᓪᓕᑳᕐᑕᐅᓂᖏᓐᓂ ᓄᓇᕕᒃ ᓯᕗᓂᑦᓴᕘᒃᑯᓄᑦ?
ᓖᓴ ᒥᐊᓱ: ᐃᓕᓐᓂᐊᑏᑦ ᐃᓕᓐᓂᐊᕆᐊᕈᒪᓂᕐᒥᓄᑦ ᐃᓕᒐᓱᐊᕐᓯᒪᔪᑦ ᐊᕐᕌᒍᓚᖓᔪᒧᑦ ᓂᕆᐅᒍᓐᓇᑐᑦ ᑐᓴᕐᑎᑕᐅᓛᕐᓂᒥᓂᒃ ᓄᓇᕕᒃ ᓯᕗᓂᑦᓴᕘᒃᑯᓂ ᐱᓇᓱᑦᑎᖏᓐᓂ ᖃᒻᒥᑯᑦ, ᓇᓪᓕᑳᕐᓂᖅ ᐱᔭᕇᕐᐸᓕᐊᓕᕐᒪᑦ.

ᑲᑎᕕᒃ ᐃᓕᓴᕐᓂᓕᕆᓂᖅ: ᓱᓇᐅᕚᑦ ᓄᓇᕕᒃ ᓯᕗᓂᑦᓴᕘᒃᑯᑦ ᐊᑯᓃᕐᑐᒥᒃ ᑐᕌᒐᕆᒐᓱᐊᕐᑕᖓ?
ᓖᓴ ᒥᐊᓱ:  ᓯᕗᓪᓕᐹᒥ, ᐱᕙᓪᓖᓂᖃᕈᒪᔪᒍᑦ ᐃᓕᓐᓂᐊᑎᓂᒃ ᐱᒐᓱᐊᕐᓂᖏᓐᓂᒃ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᓂᕐᒥᒃ. ᓯᕗᓪᓕᐹᒥ ᖃᐅᔨᓴᕐᓂᕆᓯᒪᔭᕗᑦ ᑐᑭᓯᓇᕐᑎᓯᓯᒪᒻᒪᑦ ᐱᓇᓱᐊᕐᑕᕗᓐᓂᒃ ᓈᒻᒪᓈᕐᓂᑎᓐᓂᒃ. ᐃᓕᓐᓂᐊᑏᑦ ᐃᓘᓐᓇᒐᓚᑎᒃ ᐃᓕᓐᓂᐊᓂᕐᒥᓂᒃ ᑲᔪᓯᒍᒪᕙᓪᓗᓲᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᒻᒥ ᐃᓕᓐᓂᐊᕇᑐᐊᕋᒥᒃ ᓄᓇᕕᒃ ᓯᕗᓂᑦᓴᕘᕐᒥ.

ᑐᕌᒐᕆᒋᐊᓪᓚᒥᔭᕗᑦ ᐃᑉᐱᒋᔭᖃᕐᓂᒧᑦ ᓄᓇᕕᒃ ᓯᕗᓂᑦᓴᕘᑦ ᐊᑯᓃᕐᑐᒥᒃ ᑲᔪᓯᑦᓯᐊᓂᕆᓚᖓᔭᖓ ᓴᐳᒻᒥᔭᐅᓂᖃᕐᓗᓂ ᑯᐯᒻᒥ ᑐᕐᖃᑕᕐᕕᖓᓄᑦ ᐃᓕᓐᓂᐊᓂᓕᕆᓂᕐᒧᑦ. ᑯᐯᒃᑯᑦ ᑲᕙᒪᖓ ᐱᐅᔪᒥᒃ ᐊᓪᓗᕆᐊᕐᓂᖃᓚᐅᕐᑐᖅ ᓯᕗᓂᕐᒧᑦ ᑕᒃᑲᓂ ᐊᕐᕌᒍᒥ ᐱᑕᖃᕐᑎᓯᑦᓱᓂ ᑮᓇᐅᔭᖃᕐᑎᓯᓂᕐᒥᒃ ᐃᖏᕐᕋᑎᑕᐅᓂᖓᓄᑦ ᐊᑭᖏᓐᓂᒃ.

ᑖᑦᓱᒪᐅᑉ ᐅᖓᑖᓄᑦ, ᐃᓕᓴᕐᓂᓕᕆᓂᖅ ᒫᓐᓇᐅᔪᖅ ᐱᓇᓱᐊᕐᑐᖅ ᐊᕐᕌᒍᓂ ᑕᓪᓕᒪᓂ ᐸᕐᓀᓂᕐᒧᑦ. ᓯᕗᓂᕐᒥ, ᐃᓕᓐᓂᐊᑎᓂᒃ 20 ᐅᖓᑖᓄᑦ

ᐃᓕᓐᓂᐊᕆᐊᕐᑎᓯᖃᕐᑕᕈᒪᔪᒍᑦ, ᐱᒋᐊᕐᑎᓗᒋᑦ ᐊᕕᑦᑐᓯᒪᑎᓪᓗᒋᑦ ᐃᓕᓐᓂᐊᑎᑦᓯᒍᑏᑦ ᓄᓇᕕᒻᒥ ᓄᓇᓕᖏᓐᓂ ᐊᒻᒪᓗ ᐱᓇᓱᐊᕐᓗᑕ ᑮᓇᐅᔭᖃᕐᑎᑕᐅᒋᐊᓪᓛᓂᖓᓄᑦ ᐊᑦᑕᓇᕈᓐᓀᑎᑦᓯᓂᕐᒧᑦ ᐊᕐᕌᒍᓄᑦ ᐊᕙᑎᓐᓄᑦ. ᓄᓇᕕᒃ ᓯᕗᓂᑦᓴᕗᑦ ᓯᕗᓪᓕᐹᖑᖃᑕᐅᔪᖅ ᐊᓪᓗᕆᐊᕈᑎᐅᑦᓱᓂ ᐱᕙᓪᓕᐊᑎᑦᓯᓂᕐᒧᑦ ᐳᕐᑐᓂᕐᓴᒥᒃ ᐃᓕᓐᓂᐊᓂᕐᒧᑦ ᓄᓇᕕᒻᒥ ᓄᓇᓕᖏᓐᓂ.

Back to News