ᓯᐊᓯ ᑐᓂᓯᒪᑦᓯᐊᓚᐅᕐᑐᖅ 42-ᓂᒃ ᐊᕐᕌᒍᓂᒃ ᐃᓅᓯᖓ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ, ᐱᒍᑦᔨᓯᒪᑦᓱᓂ ᑐᓂᒪᑦᓯᐊᓂᕐᒥᒍᑦ ᐃᓕᓐᓂᐊᑎᑦᓯᔨᐅᓂᕐᒧᑦ ᐊᒻᒪᓗ ᓄᓇᓕᓕᒫᓂ ᐱᐅᓯᕐᓲᑎᐅᖕᖏᑐᒥᒃ ᐃᓕᓐᓂᐊᕈᑎᑦᓴᓕᐅᕐᓂᓄᑦ ᖃᐅᔨᒋᐊᕐᕕᒃ. ᐱᓇᓱᐊᕐᓯᒪᓂᓕᒫᒥᓂ, ᑖᓐᓇ ᑕᓯᐅᕐᓯᓂᖓ ᑐᑭᓯᓇᑦᓯᐊᖏᓐᓇᖃᑦᑕᓚᐅᔪᖅ: ᐃᑲᔪᕈᒪᓂᖃᑦᓂᐊᓂᕐᒥᒃ ᓄᓇᕕᒻᒥᐅᑉ ᐱᐊᕋᖏᓐᓂᒃ, ᐱᓗᐊᕐᑐᒥᒃ ᐊᕐᓱᕈᓐᓇᑐᒃᑰᑐᓂᒃ ᑲᒪᒋᔨᖃᑦᓯᐊᖕᖏᑐᓂᒃ ᐃᓅᓯᒥᓂᒃ ᐅᑉᐱᕆᔭᐅᒍᓐᓇᑐᕆᖕᖏᑐᓂᒃ.
ᐱᓇᓱᖃᑎᒌᑦᑐᑎᒍᑦ, ᐱᓇᓱᖃᑎᖃᕈᓐᓇᑐᑦᓯᐊᖑᓚᕐᑐᒍᑦ ᓯᐊᓯᒥᒃ ᓄᓇᕕᓕᒫᒥ: ᖃᐅᔨᓴᕐᓂᒥᒃ ᐃᓕᓐᓂᐊᑎᓂᒃ, ᐱᕙᓪᓕᐊᑎᑦᓯᓂᖅ ᐃᓕᓐᓂᐊᕈᑎᑦᓴᓂᒃ, ᓴᐳᑦᔨᓂᖅ ᖃᐅᔨᓴᕐᓂᒥᒃ ᑲᒪᒋᔭᖃᕐᓂᒥᓪᓗ, ᐱᐅᓂᕐᓴᑰᕐᑎᓯᒐᓱᐊᓂᒥᒃ ᐊᒻᒪᓗ ᐃᓕᓐᐊᑎᑦᓯᔨᓂᒃ ᐱᒋᐅᕐᓴᑎᑦᓯᓂᖅ. ᐊᒥᓲᑦᓱᑕᓗ ᐊᐅᓪᓚᖃᑎᒋᖃᑦᑕᓚᐅᔪᒻᒥᔭᕗᑦ ᕿᒥᕐᕈᖃᑎᐅᑦᓱᑕ ᐃᓕᓐᓂᐊᑎᓂᒃ ᖃᐅᔨᓴᕐᓂᖃᕐᑎᓗᒋᑦ ᓄᓇᕕᒻᒥ ᐃᓕᓐᓂᐊᑎᑦᓯᔨᓂᓪᓗ ᐱᒋᐅᕐᓴᑎᑦᓯᖃᑦᑕᑎᓪᓗᒋᑦ ᐱᐅᓯᕐᓲᑎᐅᖕᖏᑐᒥᒃ ᐃᓕᓐᓂᐊᓂᓕᕆᓂᕐᒧᑦ. ᐱᓇᓱᐊᒻᒪᕆᑦᓯᐊᓯᒪᔪᖅ ᐊᑐᓂᓪᓗ ᐱᓇᓱᐊᕆᓕᒥᓂᒃ ᐱᓇᓱᐊᑦᓯᐊᓯᒪᑦᓱᓂ ᑲᒪᑦᓯᐊᓂᒃᑯᑦ, ᐱᔪᓐᓇᑐᓪᓚᕆᐅᑦᓱᓂ ᐱᓇᓱᐊᓪᓚᕆᑦᓯᐊᓯᒪᑦᓱᓂ, ᐊᒻᒪᓗ ᐱᓇᓱᐊᕐᑕᒥᓂᒃ ᐃᑉᐱᒍᓱᒍᓐᓇᓯᐊᕐᓱᓂ. ᐊᓕᐊᒋᔭᖃᑦᓯᐊᓯᒪᔪᖅ ᖃᐅᔨᒪᔭᒥᓂᒃ ᐃᓕᓐᓂᐊᑎᑦᓯᒍᑎᖃᕆᐊᒥᒃ, ᕿᓄᐃᓵᕐᓱᓂ ᐃᓄᑦᓯᐊᖑᑦᓱᓂᓗ.
“ ᐃᓕᓐᓂᐊᑏᑦ ᖃᐅᔨᓴᕐᑕᐅᑎᓪᓗᒋᑦ, ᕿᓄᐃᓵᕈᓐᓇᓯᐊᓚᐅᔪᕗᖅ, ᖃᐅᔨᒪᑦᓯᐊᕋᓱᐊᕐᓂᖅ ᐱᐊᕋᕐᓂᒃ ᐅᑕᕐᕿᔭᐅᒋᐊᖃᕐᓂᓴᓂᒃ ᑌᒫᑦᓭᓇᖅ ᐱᕕᖃᕐᑎᑕᐅᖁᓪᓗᒋᑦ ᐃᓕᑦᓯᓂᖏᑦ ᓱᑲᓐᓂᓭᑎᑐᑦ. ᐱᐊᕋᓕᒫᓂᒃ ᐱᓇᓱᐊᕐᓱᓂ ᓲᓱᑦᓴᓯᐊᖃᑦᑕᓯᒪᔪᖅ ᐊᑦᔨᒌᑦᑎᓯᑦᓯᐊᓱᓂᓗ, ᑲᔪᓯᑦᓯᐊᑎᑦᓯᔪᒥᒃ ᐃᑉᐱᒍᓱᑦᓯᐊᓱᓂ ᐊᑐᓂ ᐱᕈᕐᐸᓕᐊᓂᖏᓐᓂᒃ ᑭᖕᖒᒪᒋᔭᖏᓐᓂᓗ. ”
ᒥᐊᔨ ᑫᓐ, ᒥᕐᓱᓂᕐᒥᒃ ᐃᓕᓐᓂᐊᑎᑦᓯᔨ ᐊᒻᒪᓗ ᐱᓇᓱᐊᕐᓯᒪᔪᖅ ᐱᐅᓯᕐᓲᑎᐅᖕᖏᑐᓂᒃ ᐃᓕᓐᓂᓕᕆᓂᕐᒧᑦ ᐃᓕᓐᓂᐊᑎᑦᓯᔨᒥᒃ ᐊᒻᒪᓗ ᓄᓇᓕᓕᒫᓅᓕᖓᔪᓂᒃ ᐃᓱᐊᕐᓭᔨ, ᑕᓯᐅᔭᖅ
ᐱᓇᓱᐊᖃᑎᖏᑦ ᓄᑖᖑᑐᐊᕐᒪᑕ ᓄᓇᕕᒻᒧᑦ, ᐃᓕᓐᓂᐊᑎᑦᓯᖃᑦᑕᓚᐅᔪᕗᖅ ᐃᓄᐃᑦ ᐃᓗᕐᕈᓯᖓᓂᒃ ᐃᓄᒃᑎᑐᓪᓗ ᐅᖃᐅᓯᖓᓂᒃ, ᑐᑭᓯᒪᑦᓯᐊᖁᑦᓱᒋᑦ ᓄᓇᓕᓐᓂ ᖃᓄᕐᓗ ᐱᒍᑦᔨᒍᓐᓇᓂᐊᕐᒪᖔᑦ ᓲᓱᑦᓴᓯᐊᕐᓂᒦᓪᓗᓂ. ᐃᓄᒃᑎᑑᓕᑎᑕᐅᓯᒪᔪᑦ ᑕᒻᒪᓯᒪᑐᐊᕐᒪᑕ, ᓇᒻᒥᓂᖅ ᕿᒥᕐᕈᒋᐊᑦᓯᐊᓱᒋᑦ ᐋᕐᕿᒋᐊᕐᓱᒋᓪᓗ, ᐃᑉᐱᒋᑦᓯᐊᓱᒋᑦ ᐱᓇᓱᐊᕐᓱᒋᑦ ᑕᒪᒋᒃ ᖃᓪᓗᓈᑎᑑᕐᑐᐃᑦ ᐃᓄᒃᑎᑑᕐᑐᐃᓪᓗ. ᐅᖄᒍᓐᓇᓯᐊᕐᓂᖓ ᐃᑲᔪᕐᓯᒪᕆᓚᐅᔪᖅ ᐱᓇᓱᑦᑎᐅᖃᑎᒌᓄᑦ ᐱᐅᓂᕐᓴᕈᕐᓯᒪᓚᕿᑎᑦᓱᒍ ᐱᓇᓱᕝᕕᒃ.
ᓯᐊᓯ ᐱᓇᓱᖃᑎᖃᒍᓐᓇᓯᐊᓚᐅᕐᒥᔪᖅ. ᐃᓕᓐᓂᐊᑏᑦ ᖃᐅᔨᓴᕐᑕᐅᓚᐅᕐᑎᓗᒋᑦ, ᐅᓂᒃᑲᐅᓯᑦᓴᖃᑦᓯᐊᖃᑦᑕᓚᐅᔪᑦ ᐃᓱᒪᑦᓴᓯᐅᕐᓯᐊᓯᒪᔪᓂᒃ ᐊᓪᓚᑕᖏᑦ. ᐱᑦᓯᐊᓯᒪᓂᖓ ᖃᓪᓗᓈᕐᑎᑑᕐᓂᒥᒃ ᐃᑲᔪᕐᓯᒪᒍᓐᓇᓯᓯᒪᔪᖅ ᑐᑭᓯᓇᑦᓯᐊᑐᒥᒃ ᐅᖃᐅᓯᖃᖃᑎᒌᓐᓂᑯᑦ ᖃᐅᔨᒪᔨᒻᒪᕆᓐᓂᒃ ᖃᐅᔨᒪᔪᒻᒪᕆᓐᓂᓗ ᓄᓇᕕᐅᑉ ᓯᓚᑖᓃᑦᑐᓂᒃ, ᓲᖑᓯᒋᐊᕐᑎᓯᓯᒪᔪᖅ ᐱᓇᓱᐊᖃᑎᒌᓐᓂᒥᒃ ᓴᐳᑦᔨᐅᑎᓂᕐᒥᓗ ᐃᓕᓐᓂᐊᑎᓄᑦ.
“ ᐃᓕᓐᓂᐊᑎᑦᓯᔨᓂᒃ ᐱᓇᓱᖃᑎᖃᑐᐃᓐᓇᓚᐅᔪᖕᖏᑐᖅ ᑭᓯᐊᓂ ᑕᑯᑦᓴᐅᑎᑦᓯᓚᐅᔪᒻᒥᔪᖅ ᐱᒻᒪᕆᐅᓂᖓᓂᒃ ᑲᑎᖃᑎᖃᖃᑦᑕᕐᓂᕐᒥᒃ ᐊᖓᔪᕐᕐᑳᕆᔭᐅᔪᓂᒃ, ᓈᓚᑦᓱᒋᑦ ᐅᖃᐅᓯᑦᓴᖏᑦ, ᓲᖑᓯᑎᒋᐊᕐᓗᒋᓪᓗ ᐃᑲᔪᕐᓯᓂᐅᔪᑦ ᐃᓕᓐᓂᐊᑎᓄᑦ. ᑌᒫᒃ ᑐᓴᐅᒪᖃᑎᒌᓐᓂᖅ ᐱᕙᓪᓕᑎᑦᓯᓚᕆᒍᓐᓇᑐᖅ. ᐅᓪᓗᒥᒧᑦ, ᐊᒥᓲᓗᐊᖕᖏᑐᑦ ᐱᓪᓗᑯᒋᐊᓕᓕᕆᔩᑦ ᐃᓄᒃᑎᑐᑦ ᐱᓇᓱᐊᕈᓐᓇᑐᑦ, ᕿᒣᑦᓱᓂ ᐊᖏᔪᑲᓪᓚᒥᒃ ᓄᐃᑎᑦᓯᓱᓂ ᐊᖏᔪᑲᓪᓚᖕᒥᒃ ᐱᑕᖃᖕᖏᓂᐅᔪᒥᒃ ᓯᐊᓯ ᐃᑲᔪᕐᓯᒪᓚᕿᓯᒪᔪᖅ. ”
ᖂᓯ ᐃᑦᑐᖅ, ᐱᐅᓯᕐᓲᑎᐅᖕᖏᑐᓂᒃ ᐃᓕᓐᓂᐊᓂᓕᕆᓂᕐᒧᑦ ᐱᓪᓗᑯᑦᑐᓕᕆᔨ, ᑲᖏᕐᓱᐊᓗᒃᔪᐊᖅ
ᓯᐊᓯ ᐊᓕᐊᒋᔭᐅᑦᓯᐊᓚᐅᔪᖅ ᐊᒻᒪᓗ ᓲᓱᒋᔭᐅᑦᓯᐊᓯᒪᑦᓱᓂ ᐃᓘᓐᓇᖏᓐᓄᑦ. ᖃᐅᔨᒪᔭᐅᓚᐅᔪᖅ ᐃᓄᑦᓯᐊᒍᓂᕐᒥᓂᒃ, ᐅᒃᑯᐃᖔᑦᓯᐊᓂᖓᓂᒃ, ᑐᖕᖓᓇᑦᓯᐊᓱᓂᓗ ᐱᓇᓱᖃᑎᒥᓄᑦ. ᐅᐸᑦᑕᓕᒫᒥᓄᑦ, ᑐᖕᖓᓇᕐᑐᑕᖃᑦᓯᐊᓚᐅᔪᖅ. ᐃᓅᒍᓐᓀᓚᐅᔪᑎᓪᓗᒍᓂᒃ, ᐊᒥᓱᑦ ᐃᕐᖃᐅᒪᔪᑦ ᐊᐅᓚᔨᔪᑦ ᐊᑑᑎᓯᒪᔭᖏᓐᓂᒃ ᐱᕙᓪᓕᑕᐅᓯᒪᓂᕕᓂᖏᓐᓂᒃ, ᐃᓚᐅᑎᓪᓗᒋᑦ ᐃᓄᒻᒪᕇᑦ ᐃᕐᖃᐅᒪᑦᓯᐊᑐᑦ ᐃᓕᓐᓂᐊᑎᑦᓯᔨᖃᖃᑦᑕᓯᒪᒐᒥᒃ ᐃᓕᓐᓂᐊᒋᐊᖓᓱᑎᒃ. ᐱᓇᓱᐊᕐᓯᒪᔭᖏᑦ ᐊᑦᑐᑕᐅᓯᒪᕗᑦ ᐊᒥᓱᓂᒃ ᐃᓚᒌᓂᒃ, ᐃᓕᓐᓂᐊᑎᓂᒃ, ᐃᓚᒌᓂᒃ, ᐱᓇᓱᐊᖃᑎᕕᓂᖏᓄᓗ.
“ ᓯᐊᓯᐅᑉ ᐊᐅᓪᓚᖃᑎᒋᓲᕕᓂᖏᑦ ᐃᕐᖃᐅᒪᒋᔭᖃᕐᖁᑦ ᖁᖓᓐᓇᑑᖃᑦᑕᓚᐅᕐᓂᖓᓂᒃ. ᐃᓚᖓᓂ ᐱᒻᒪᕆᓲᖑᓯᒪᒐᓗᐊᕐᓱᓂ, ᐊᓕᐊᓱᓐᓂᖃᑦᓯᐊᓚᐅᔪᖅ. ᐁᑉᐸᒋᑦᓱᒍ, ᐱᓇᓱᐊᕐᑕᖏᑦ ᐱᑦᓯᐊᓯᒪᖃᑦᑕᓚᐅᔪᑦ ᐊᓕᐊᓇᕐᑑᓱᑎᒃ ᐊᒻᒪᓗ ᐳᐃᒍᒐᑦᓴᐅᒍᓐᓀᓱᑎᒃ ᐊᑑᑎᓲᖑᑦᓱᓂ ᖁᕕᐊᓇᕐᑐᒥᒃ ᖃᐅᒻᒪᓇᑦᓯᐊᓱᑎᒃ ᐅᓪᓗᒃ ᐱᔭᑦᓴᓕᐹᓘᒐᓗᐊᕐᒪᑦ. ”
ᑳᑐᕆᓐ “Kit” ᑎᐊᓐᔅ, Speech-Language Pathologist, ᒪᓐᑐᔨᐊ
ᐃᓚᖓᑦ ᓲᖑᔪᒥᒃ ᐃᓕᓐᓂᐊᑎᑦᓯᒍᕈᑎᒋᓚᐅᕐᑕᖓ ᐅᕙᑦᑎᓂᒃ ᓯᐊᓯᐅᑉ ᓴᐱᓕᕐᖃᔭᖕᖏᓂᖅ. ᐊᑦᓱᕈᕐᓇᑐᒃᑰᖃᑦᑕᑐᕕᓂᐅᒐᓗᐊᕐᓱᓂ ᐃᓅᓯᕐᒥᓂ, ᐃᓚᐅᑎᓪᓗᒍ ᐃᓕᓐᓂᐊᕆᐊᕐᑎᑕᐅᓯᒪᔪᕕᓂᐅᓂᖓ Winnipeg-ᒧᑦ, ᓱᓕ ᓲᖑᔪᐊᓘᓚᐅᕐᑐᖅ, ᓇᓪᓕᒍᓱᑦᓯᐊᓱᓂ, ᐊᒻᒪᓗ ᑐᓂᓯᒪᑦᓯᐊᓱᓂ ᐱᓇᓱᒐᕐᒥᓄᑦ, ᐱᓇᓱᖃᑎᒥᓄᑦ, ᐊᒻᒪᓗ ᓄᓇᓕᒻᒥᓄᑦ. ᓲᖑᓂᓕᒻᒪᕆᐅᓚᐅᕐᑐᖅ ᓂᑦᔮᖏᒃᑲᓗᐊᕋᒥ ᐊᒻᒪᓗ ᓱᓕᑦᓯᐊᑑᑦᓱᓂ, ᐊᒻᒪᓗ ᐃᑦᔭᕋᑦᓴᓯᐊᖑᓚᐅᔪᖅ ᐃᓘᓐᓇᑎᓄᑦ ᑐᓂᒪᑦᓯᐊᓂᕐᒥᓄᑦ ᐊᒻᒪᓗ ᑲᔪᓯᒍᓐᓇᓯᐊᕐᓂᒥᓄᑦ.
“ ᓯᐊᓯ ᐅᐃᒻᒪᔮᓚᐅᔪᖕᖏᑐᖅ, ᑭᓯᐊᓂ ᐊᓂᕐᓂᒥᒍᑦ ᓱᖑᓂᖃᑦᓯᐊᓱᓂ. ᐱᔪᓐᓇᐅᑎᖃᕐᓱᓂ, ᐱᐅᔪᒻᒪᕆᐊᓗᒻᒥᒃ ᐱᑦᓯᐊᖃᑦᑕᓯᒪᔪᖅ ᐊᒻᒪᓗ ᐃᓄᑦᓯᐊᖑᓯᒪᔪᖅ — ᑲᒪᓲᖑᑦᓱᓂ ᐊᓯᒥᓂᒃ, ᕿᓄᐃᓵᓐᓂᖃᑦᓯᐊᒪᕆᑦᓱᓂ, ᓂᖕᖓᓚᐅᕐᓯᒪᒐᓂ, ᐃᑲᔪᕐᓯᒪᖏᓐᓇᓱᓂᓗ ᐱᓇᓱᐊᖃᑎᒥᓂᒃ ᐱᓇᓱᐊᕐᓱᓂ. ᐃᑲᔪᕐᓯᒪᓂᕆᓚᐅᕐᑕᖓ ᐱᓇᓱᒐᐅᑉ ᐅᖓᑖᓅᓚᐅᔪᖅ. ᐆᒻᒪᑎᒐᓅᓚᐅᔪᖅ ᖃᒧᖔᓗᒃ, ᓇᓪᓕᓂᖓ ᓱᓕ ᐅᕙᓐᓃᖏᓐᓇᑐᖅ. ”
ᐄᕙ ᐃᓄᑉᐸᖅ, ᐱᐅᓯᕐᓲᑎᐅᖕᖏᑐᓂᒃ ᐃᓕᓐᓂᐊᓂᓕᕆᓂᕐᒧᑦ ᐃᓕᓐᓂᐊᑎᑦᓯᔨ, ᐃᓄᒃᔪᐊᖅ
ᓯᐊᓯ ᐱᕝᕙᓚᑦᑕᐅᓯᐊᕐᑐᖅ. ᐅᐱᒍᓱᑉᐳᒍᑦ ᐊᕐᕌᒍᓂᒃ ᐊᒥᓱᓂᒃ ᐃᓕᓐᓂᐊᓂᓕᕆᓂᕐᒧᑦ ᓄᓇᕕᒻᒥ ᓱᓂᓯᒪᑦᓯᐊᓚᐅᕐᓂᖓᓄᑦ ᐊᒻᒪᓗ ᐊᓯᓕᒫᖏᓐᓄᓗ ᐃᓕᑦᓯᓯᒪᔭᑦᑎᓂᒃ ᐃᓚᐅᑎᓪᓗᒋᑦ ᐊᕐᖁᑎᒋᓂᐊᕐᑕᑎᓐᓄᑦ. ᕿᒣᓂᕆᓯᒪᔭᖓ ᑲᔪᓯᔪᖅ ᓱᓕ ᐊᒥᓱᓂᒃ ᐃᓄᓐᓂᒃ ᐊᑦᑐᐃᓂᖃᓚᐅᕐᒪᑦ ᐊᒻᒪᓗ ᑌᒣᖏᓐᓇᓱᓂ ᐊᑦᑐᐃᓂᖃᓚᐅᕐᒪᑦ ᐃᑲᔪᕐᓂᕆᓚᐅᕐᑕᖓᓄᑦ.