ᑲᒪᔨᒻᒪᕆᐅᑉ ᐅᖃᐅᓯᑦᓴᖏᑦ ᖄᔨᐊ ᑭᓕᐅᑕᖅ (ᓯᑦᑎᒻᐱᕆ 2025)

ᓇᑯᕐᓴᖁᖓ ᖃᐅᔨᑎᑦᓯᒍᓐᓇᒋᐊᒥᒃ ᐱᒻᒪᕆᐅᔪᓂᒃ ᐱᕙᓪᓕᐊᓯᒪᓕᕐᑐᓂᒃ ᐱᑦᔪᑎᖃᕐᑐᓂᒃ ᐃᓘᓐᓇᖓᒍᑦ ᐱᕙᓪᓕᐊᓂᑦᑎᓂᒃ ᐊᒻᒪᓗ ᐊᔪᐃᓐᓇᓂᕆᔭᑦᑎᓂᒃ ᐃᓕᓐᓂᐊᓂᓕᕆᓂᕐᒥᒃ ᓄᓇᕕᒻᒥ.

ᓯᕗᓪᓕᒥ, ᓇᑯᕐᒦᕈᒪᔪᖓ ᐱᓇᓱᑦᑎᑎᓐᓂᒃ ᐊᖏᔪᐹᓗᒻᒥᒃ ᐃᑲᔪᕐᓯᒪᕆᓚᐅᕐᑕᖏᓐᓂᒃ ᓄᑖᒧᑦ ᐱᓇᓱᑦᑏᑦ ᐊᖏᖃᑎᒌᒍᑎᖏᓐᓂᒃ. ᐅᖓᑖᓅᕐᑎᓗᒋᑦ 90% ᐊᖏᕈᑎᖃᕐᓯᒪᔪᑦ ᐱᓇᓱᑦᑎᖏᓐᓂᒃ ᐱᔪᓐᓇᐅᑎᓕᓐᓂᒃ, ᐃᓕᓐᓂᐊᑎᑦᓯᔨᓂᒃ, ᐱᓇᓱᑦᑎᑐᐃᓐᓇᓂᓪᓗ, ᐅᐱᒍᓱᑉᐳᒍᑦ ᓯᕗᒧᐊᕈᓐᓇᕆᐊᒥᒃ ᓄᑕᐅᓯᓕᕐᓯᒪᓕᕐᑎᓗᒋᑦ ᐊᖏᖃᑎᒌᒍᑏᑦ ᐊᕐᕌᒍᕐᓅᓕᖓᓚᖓᔪᑦ 2023-ᒥ 2028-ᒧᑦ. ᑖᒃᑯᐊ ᐊᖏᖃᑎᒌᒍᑏᑦ ᓄᐃᑦᓯᓚᖓᔪᑦ ᐱᐅᔪᕋᑕᕐᓂᒃ ᓄᑖᓂᒃ ᐃᑲᔪᕐᓯᐅᑎᑦᓴᓂᒃ, ᐃᓚᐅᑎᓪᓗᒋᑦ ᐱᐅᓯᒋᐊᕐᓯᒪᔪᑦ ᐸᐸᑦᓯᓂᕐᒧᑦ ᐊᑭᓕᐅᑏᑦ, ᓭᓂᕆᐊᖕᖓᐅᑏᑦ ᐅᑎᒃᓂᒧᓪᓗ ᑮᓇᐅᔭᕐᑕᓯᔭᐅᒍᑎᒋᐊᓪᓓᑦ, ᐊᒻᒪᓗ ᐱᐅᓯᒋᐊᕐᓯᒪᔪᑦ ᐃᓪᓗᖃᕐᑎᑕᐅᓂᕐᒧᑦ ᐅᓯᔭᐅᒍᑎᓄᓪᓗ ᑮᓇᐅᔦᑦ.ᑖᑯᐊ ᐊᒥᓱᐃᑦ ᖃᓄᕐᑑᕈᑏᑦ ᓴᓇᔭᐅᕙᓪᓕᐊᓯᒪᓕᕐᑐᑦ ᑐᖕᖓᕕᖃᕐᓱᑎᑦ 2020-2023 ᐊᖏᖃᑎᒌᒍᑎᖏᓐᓂᒃ ᐊᒻᒪᓗ ᐱᕕᑦᓴᖃᕐᑎᑕᐅᑦᓱᑎᑦ ᐊᕐᖁᑎᖃᕐᓱᑎᑦ ᐊᑦᔨᒌᖏᓪᓕᑎᕐᓯᒪᔪᓂᒃ ᑮᓇᐅᔭᓂᒃ ᑐᖕᖓᕕᖃᕐᑎᓯᒍᑏᑦ ᐋᕐᕿᓱᕐᑕᐅᓯᒪᔪᑦ 2022 ᒪᓕᒐᓕᐊᖑᓯᒪᔪᑦ ᐊᖏᖃᑎᒌᒍᑎᖓᓄᑦ. ᐱᓇᓱᐊᒻᒪᕆᑉᐳᒍᑦ ᐊᑐᓕᕐᑎᓯᓚᖓᒋᐊᒥᒃ ᑕᒪᒃᑯᓂᖓ ᐊᓯᑦᔨᓯᒪᓚᖓᓕᕐᑐᓂᒃ, ᐱᓇᓱᑦᑏᑦ ᐊᖏᖃᑎᒌᒍᑎᖏᑦ ᓭᓂᕐᑕᐅᓯᒪᔪᕕᓂᐅᓕᕐᐸᑦ ᐅᑭᐊᖑᓚᖓᔪᒥᒃ.

ᐊᓕᐊᒋᔭᖃᕐᖁᒍᑦ ᖃᐅᔨᑎᑦᓯᒍᓐᓇᕆᐊᒥᒃ ᓄᑖᒥᒃ ᐊᑌᓐᓇᓚᖓᔪᒥᒃ ᐃᓕᓐᓂᐊᕕᕐᔪᐊᑉ-ᓇᓪᓕᖁᐊᖓᓂᒃ ᐃᓕᓐᓂᐊᑎᑦᓯᔨᓂᒃ ᐱᒋᐅᕐᓭᓂᕐᒧᑦ ᐃᓕᓐᓂᐊᑎᑦᓯᒍᑎᒥᒃ, ᐱᕙᓪᓕᐊᔭᐅᓯᒪᔪᑦ ᑲᑐᑦᔨᖃᑎᒌᒍᑕᐅᑦᓱᓂ ᒥᑭᐅᓪ ᐃᓕᓐᓂᐊᕕᕐᔪᐊᖓᓄᑦ. ᐱᒋᐊᕐᓗᒍ ᑕᒃᑲᓂ ᐅᑭᐊᑦᓴᒥ ᑰᑦᔪᐊᒥ, ᐃᓕᑕᕆᔭᐅᒍᑎᒃ ᐃᓕᓐᓂᐊᓂᓕᕆᓂᕐᒥᒃ ᓄᓇᖃᕐᖄᓯᒪᔪᓄᑦ ᐊᓪᓚᓄᑦ ᐃᓄᓐᓄᓗ (CEFNI) ᐊᑐᐃᓐᓇᕈᕐᑎᕆᓚᖓᔪᖅ ᓄᓇᕕᒻᒥᐅᓂᒃ ᐱᒍᓐᓇᐅᑎᖃᕐᓂᑯᑦ ᐃᓕᓭᔨᖕᖑᕈᓐᓇᓂᕐᒥᒃ – ᐃᓄᒃᑎᑐᑦ ᐃᓕᓐᓂᐊᑎᑦᓯᑐᐃᓐᓇᕈᓐᓀᓗᑎᑦ, ᑭᓯᐊᓂ ᐊᑦᔨᒌᖕᖏᑐᓂᒃ ᐃᓕᓭᒍᑎᓂᒃ ᓇᒻᒥᓂᖅ ᐅᖃᐅᓯᕐᒥᒃ ᐊᑐᕐᓗᑎᑦ. ᑖᓐᓇ ᐱᒋᐊᕐᑎᓯᒍᑎᐅᔪᖅ ᐊᖏᔪᒥᒃ ᐊᓪᓗᕆᐊᕈᑎᐅᓚᖓᔪᖅ ᐃᑲᔪᕐᓯᒍᓐᓇᓂᕐᒥᒃ ᐃᓕᓐᓂᐊᑎᑦᓯᔨᖃᖕᖏᓗᐊᕐᓂᖓ ᓄᓇᓕᑦᑎᓂ, ᓄᒃᑭᓯᒣᓗᓂ ᐃᓄᓐᓂ ᐃᓕᓭᔨᑦᑎᓂᒃ ᓄᐃᑦᓯᒍᓐᓇᓯᒪᓂᒃᑯᑦ ᓄᑖᓂᒃ ᖃᐅᔨᒪᔭᓪᓚᕆᒻᒥᓂᒃ ᐊᒻᒪᓗ ᐃᓗᕐᕈᓯᑦᑎᓂᒃ ᐅᐱᒋᔭᖃᕐᓂᒥᒃ ᐃᑎᕐᓯᓯᒪᒍᓐᓇᓯᓗᑎᒃ ᐃᓕᓐᓂᐊᕕᒋᔭᑦᑎᓄᑦ.

ᐱᒋᐊᕐᑎᓯᒍᑎᐅᒻᒥᔪᖅ ᐅᐱᒋᒻᒥᔭᕗᑦ ᑕᒪᒃᑯᓄᖓ ᓄᐃᑎᑕᐅᕙᓪᓕᐊᔪᓄᑦ ᐅᐃᒪᓇᕐᑐᓕᕆᓂᖅ ᐯᕆᑦᓯᕖᑦ ᐱᑦᔪᔭᐅᕕᖏᓐᓂᒃ ᐊᒥᓱᒐᓛᓂᒃ ᓄᓇᕕᐅᑉ ᓄᓇᓕᖏᓐᓂᒃ. ᑖᒃᑯᐊ ᐱᑦᔪᔨᒍᑏᑦ ᐃᑲᔪᕐᓯᓚᖓᔪᑦ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐱᓇᓱᑦᑎᖏᓐᓂᒃ ᐃᓕᓐᓂᐊᑎᖏᓐᓂᓗ ᐊᖓᔪᕐᖄᕆᔭᐅᔪᓂᒃ, ᐃᑲᔪᕐᓯᓂᖃᕐᓗᓂ ᐱᓇᓱᒋᐊᕐᑐᑲᑦᑕᖏᓐᓂᐅᓲᓂᒃ ᐊᒻᒪᓗ ᐃᓕᓐᓂᐊᑎᑦᓯᔩᑦ ᐱᓇᓱᒋᐊᕐᖃᔭᖕᖏᓂᖏᓐᓂᒃ ᐯᕆᑦᓯᕖᑦ ᐃᓱᐃᓪᓕᖓᐅᑎᖏᓐᓄᑦ. ᑮᓇᐅᔭᖃᕐᑎᑕᐅᑦᓱᓂ ᐱᐊᕋᕐᒥ ᓯᕗᓪᓕᐸᐅᑦᔨᓂᕐᒧᑦ ᐱᒋᐊᕐᑎᓯᒍᑎᒃ ᐊᕐᖁᑎᒋᑦᓱᒍ ᔪᐊᑕᓐ ᐳᐃᓐᓯᐳᓪ (Jordan’s Principle) ᑮᓇᐅᔭᖃᕐᑎᓯᒍᑎᖏᑦ, ᑖᓐᓇ ᐃᓕᓐᓂᐊᑎᑦᓯᒍᑎᒃ ᓄᐃᑦᓯᓯᒪᓕᕇᕐᑐᖅ ᑐᑭᒧᐊᑦᓯᐊᑐᓂᒃ ᐊᓯᑦᔨᑐᕐᓯᒪᓂᐅᔪᓂᒃ. ᑭᓯᐊᓂ, ᐊᖏᔪᒥᒃ ᐃᓱᒫᓗᒋᔭᖃᕐᖁᒍᑦ ᖃᐅᔨᑦᓴᐅᓯᐊᖕᖏᑑᓂᖏᓐᓂᒃ ᖃᓄᐃᓕᖓᐅᓯᕆᔭᖏᑦ ᓯᕗᓂᕐᒥᒃ ᔪᐊᑕᓐᔅ ᐳᐃᓐᓯᐳᓪ (Jordan’s Principle) ᑮᓇᐅᔭᖃᕐᑎᓯᒍᑎᖏᑦ, ᓇᖏᐊᕐᓇᑐᒨᕐᑎᓯᑐᐃᓐᓇᕆᐊᓕᒃ ᑲᔪᓯᐅᑦᔭᐅᒍᓐᓇᓂᖓᓂᒃ ᑕᒪᑦᓱᒪᐅᑉ ᐱᕕᒋᓪᓗᑐᐊᓗᓲᕆᔭᑦᑎᓂᒃ ᐱᑦᔪᔨᒍᑎᖏᑦ. ᑲᓇᑕᓕᒫᒥ ᐊᓯᑦᔨᑐᕐᑕᐅᓯᒪᓂᖏᑦ ᐃᓚᐅᒍᓐᓇᓂᐅᑉ ᒪᓕᒐᖏᑦ ᐊᒻᒪᓗ ᐊᓪᓗᐃᑲᑦᑕᓂᖏᑦ ᑐᓂᐅᕐᙯᒍᑎᓂᒃ ᑮᓇᐅᔭᖃᕐᑎᓯᒍᑎᓂᒃ ᓱᕐᕃᓯᒪᓕᕇᕐᑐᖅ ᓄᓇᖃᕐᖄᓯᒪᔪᐃᑦ ᐃᓕᓐᓂᐊᓂᓕᕆᓂᖏᓐᓂᒃ, ᐃᓚᐅᑎᓪᓗᒋᑦ ᐱᓇᓱᑦᑎᑐᐃᓐᓀᑦ ᐱᓇᓱᒐᖏᑦ ᐊᓯᕆᔭᖏᓐᓂᒃ ᓄᓇᒋᔭᐅᔪᓂᒃ. ᐃᑉᐱᒋᑦᓯᐊᖏᓐᓇᓕᒫᕐᑕᕗᑦ ᑕᒪᒃᑯᐊ ᐱᕙᓪᓗᐊᔪᑦ ᐊᒻᒪᓗ ᑭᒡᒐᑐᕐᓂᐅᔪᑦ ᑲᔪᓯᑦᓯᐊᑐᒥᒃ ᐃᑲᔪᕐᓯᒍᓐᓇᓂᕐᒥᒃ ᐱᕕᑦᓴᖃᑦᓯᐊᖁᒧᑦ ᐱᐊᕋᕗᑦ ᐊᒻᒪᓗ ᐃᓚᒌᑦ ᑲᔪᓯᔪᒥᒃ ᐱᒍᓐᓇᑎᑕᐅᑦᓯᐊᓂᖏᑦ ᐱᑦᔪᔭᐅᒍᑎᓂᒃ ᑭᖕᖒᒪᒋᔭᕐᒥᓂᒃ.

ᐊᓯᐊᒎᕐᒥᔪᒥᒃ ᐱᕙᓪᓕᐊᓂᖃᕐᒥᔪᒥᒃ, ᑲᒥᓯᓀᑦ ᑲᑎᒪᔨᖏᑦ ᐊᖏᕈᑎᖃᕐᓯᒪᓕᕐᑐᑦ ᐱᖁᔭᕐᑎᒍᑦ ᑲᔪᓯᐅᑦᔨᓂᕐᒥᒃ ᐊᑭᓴᕐᑐᓂᕐᒥᒃ ᐱᖁᔭᒥᑦ 14-ᒥ, ᐱᐅᑦᓯᐊᖏᑦᑐᑎᒍᑦ ᓱᕐᕃᓯᒪᓕᕐᑐᒥᒃ ᐃᓄᐃᑦ ᐃᓕᓐᓂᐊᑎᖏᓐᓂᒃ ᑲᔪᓯᐅᑦᔨᒐᓱᐊᕐᑐᓂᒃ ᐳᕐᑐᓂᕐᓴᒥᒃ ᐃᓕᓐᓂᐊᓂᕐᒥᓂᒃ ᑯᐯᒃᒥ. ᐅᑉᐱᕆᔭᖃᕐᑐᒍ ᑖᓐᓇ ᐱᖁᔭᖅ ᓯᖁᒥᑦᓯᓯᒪᒋᐊᖓᓂᒃ ᐱᔪᓐᓇᐅᑎᒋᔭᑦᑎᓂᒃ, ᐊᒻᒪᓗ ᐊᐅᓚᑦᔭᒋᐊᕈᑎᒋᓯᒪᓕᕐᓱᒋᑦ ᐃᓚᐅᑎᑕᐅᖁᔨᖕᖏᓂᕐᒥᒃ ᐊᖏᖃᑎᒌᓐᓂᒧᑦ ᐃᓚᐅᔫᔪᓂᒃ. ᑲᑎᒪᔩᑦ ᐱᖁᔭᓕᕆᔨᒥᒃ ᐱᓇᓱᑦᑎᓯᓕᕐᑐᑦ, ᐊᒻᒪᓗ ᑲᔪᓯᐅᑦᔨᓚᖓᑦᓱᑕ ᐱᓇᓱᖃᑎᙯᓐᓇᓂᕐᒥᒃ ᒪᑭᕝᕕᑯᓐᓂᒃ ᐊᓯᖏᓐᓂᓗ ᐱᓇᓱᖃᑎᑦᑎᓂᒃ ᐱᕕᑦᓴᖃᑦᓯᐊᑎᓗᒋᑦ ᐃᓕᓐᓂᐊᑎᕗᑦ ᐃᓕᓐᓂᐊᕈᒪᒐᔭᕐᑕᒥᓂᒃ ᐅᖃᐅᓯᕐᒥᒃ ᑎᒃᑯᐊᓯᒪᔭᕐᒥᓂᒃ.

ᓄᕐᖃᒋᐊᕈᑎᖃᓚᐅᕐᒥᔪᒍᑦ ᐊᕐᕌᒍᓕᒫᒥ-ᑕᑭᓂᓕᒃ ᐃᓱᒪᑦᓴᓯᐅᕈᑎᖃᕐᓂᒥᒃ ᐃᑲᔪᕐᑎᒌᓐᓂᒥᓪᓗ ᐊᕐᖁᑎᒋᓗᒍ ᓯᕗᒧᐊᑦᑏᑦ ᖃᓄᕐᑑᓂᕐᒧᑦ ᐸᕐᓇᓂᖏᑦᑕ ᓯᕗᒧᐊᕐᓂᖓᓂᒃ. ᑖᑦᓱᒪᐅᑉ ᐱᒋᐊᕐᑎᓯᒍᑎᐅᑉ ᐃᓚᐅᔨᖃᓚᐅᕐᑐᖅ 1,000 ᑲᓵᓂᒃ – ᐱᓇᓱᑦᑎᓂᒃ, ᐃᓕᓐᓂᐊᑎᓂᒃ, ᐊᖓᔪᕐᖄᕆᔭᐅᔪᓂᒃ, ᐊᒻᒪᓗ ᓄᓇᓕᒻᒥ ᐱᓯᒪᔪᓂᒃ – ᓄᓇᕕᓕᒫᒥ ᒪᓐᑐᔨᐊᒥᓗ. ᔫᓂ 2025-ᖑᑎᓪᓗᒍ, ᑲᒥᓯᓀᑦ ᑲᑎᒪᔨᖏᑦ ᐊᖏᕈᑎᓕᕕᓃᑦ ᓄᐃᓚᕿᓯᒪᔪᒥᒃ ᖃᓄᕐᑑᓂᕐᒧᑦ ᐸᕐᓇᕈᑎᒥᒃ 2025-2030 ᐊᕐᕌᒍᖏᓐᓄᑦ, ᑕᓯᐅᕐᓯᒍᑎᒋᓚᖓᔭᕗᑦ ᐱᓇᓱᐊᕐᑕᑎᓐᓂᒃ ᑕᓪᓕᒪᓄᑦ ᐊᕐᕌᒍᕐᓄᑦ ᙯᔪᓄᑦ. ᐸᕐᓇᓯᒪᐅᑎ ᐋᕐᕿᓱᕐᓯᒪᔪᖅ ᐱᖓᓱᐃᓕᖓᔪᒥᒃ ᓇᐸᔪᓂᒃ:

• ᓅᓱᐃᑦᑐᖅ – ᐊᑕᐅᑦᓯᑯᑦ ᑕᑯᓐᓇᑕᕗᑦ ᐃᓕᓐᓂᐊᑏᑦ ᑲᔪᓯᑦᓯᐊᕈᓐᓇᓂᖏᓐᓂᒃ, ᑐᖕᖓᕕᓖᑦ ᐃᓄᐃᑦ ᑭᓇᒃᑰᓂᖏᓐᓂᒃ, ᐅᖃᐅᓯᖓᓂᒃ, ᓄᓇᓕᐅᓪᓗ ᖃᓄᐃᖕᖏᓯᐊᕐᓂᖓᓂᒃ.
• ᓯᕗᒧᑦ – ᖃᓄᕐᑑᓂᕐᒧᑦ ᓯᕗᓪᓕᐸᐅᑦᔨᔭᕗᑦ ᐊᐅᓚᑦᔭᒋᐊᕈᑎᒋᔭᕗᓪᓗ, ᐃᓚᐅᑎᓪᓗᒋᑦ ᐱᐅᓯᒋᐊᕆᓃᑦ ᐃᑲᔪᖃᑎᒌᓐᓂᒥᒃ, ᓲᖑᓯᒋᐊᕆᓂᕐᒥᒃ ᐃᓚᒋᔭᑦᑎᓂᒃ, ᐊᒻᒪᓗ ᐱᓇᓱᑦᑎᑖᕐᓃᑦ ᐱᓇᓱᑦᑎᙯᓐᓇᓂᕐᓗ ᓄᓇᕕᒻᒥᐅᑦ ᐱᓇᓱᑦᑎᖏᓐᓂᒃ.
• ᐊᑏ – ᐊᔪᐃᓐᓇᓂᕆᔭᕗᑦ ᐱᓇᓱᖃᑎᒌᓐᓂᑯᑦ ᐊᑕᐅᑦᓯᑯᑦ ᑲᑦᓱᙰᑦᑐᓯᐊᖑᓂᒃᑯᑦ, ᐊᓯᒥᓂᒃ ᐃᑉᐱᒋᔭᖃᑦᓯᐊᓂᒃᑯᑦ, ᐊᒻᒪᓗ ᐱᑦᓴᑖᕐᕕᐅᓯᐊᕈᓐᓇᓂᒃᑯᑦ, ᐃᓕᑕᕆᑦᓱᒋᑦ ᑭᓇᓕᒫᒃᑯᑦ ᖃᓄᐃᓘᕐᑎᐅᒍᓐᓇᓂᖏᑦ ᐃᓕᓐᓂᐊᑏᑦ ᑲᔪᓯᑦᓯᐊᕈᓐᓇᓂᖏᓐᓂᒃ.

ᑭᖑᓪᓕᐹᒥ, ᐅᐱᒍᓱᑉᐳᖓ ᑐᓴᕐᑎᓯᒋᐊᒥᒃ ᑲᑎᒪᔩᑦ ᐊᖏᕈᑎᖃᕐᓯᒪᓂᖏᓐᓂᒃ ᓇᓪᓕᖁᐊᒌᓕᕐᑎᓯᒪᔪᒥᒃ ᑐᕌᒐᕐᓂᒃ ᐊᕐᕌᒍᕐᓄᑦ 2025-2026. ᑕᒪᓐᓇ ᓇᓗᓀᕐᓯᔪᖅ ᐱᐅᔪᕐᑎᒍᑦ ᓴᖑᓂᕐᒥᒃ ᐊᒥᓱᒐᓓᑦ ᐊᕐᕌᒍᐃᑦ ᓈᓕᕐᑎᓗᒋᑦ ᐊᑭᓕᕐᓴᖃᓃᑦ ᑐᕌᒐᕐᑎᒍᑦ ᐊᒻᒪᓗ ᓄᐃᑕᑎᑦᓯᖏᓐᓇᓱᓂ ᑲᔪᓯᔪᒥᒃ ᐊᔪᐃᓐᓇᓂᑦᑎᓂᒃ ᐊᑦᑕᓀᓪᓕᑎᑦᓯᓂᕐᒥᒃ ᓈᒻᒪᑐᓂᒃ ᑮᓇᐅᔭᖃᕐᑎᑕᐅᓂᕐᒥᒃ. ᑕᒪᓐᓇᑕᐅᖅ, ᐅᑕᕐᕿᖏᓐᓇᑐᒍᑦ ᑭᖑᓪᓕᐹᒥ ᐊᖏᕈᑕᐅᓂᑦᓴᖓᓂᒃ ᓄᑕᓯᓕᕐᓯᒪᔪᖅ ᑐᕌᒉᑦ ᐱᖁᔭᖏᑦ ᑐᕐᖃᑕᕐᕕᑯᓄᑦ ᐃᓕᓐᓂᐊᓂᓕᕆᓂᕐᒥᒃ ᐊᒻᒪᓗ ᒫᓐᓇᑯᑦ ᐊᐅᓚᓂᖃᓲᑦ ᑐᕌᒐᕐᓂᒃ ᐱᖁᔭᖃᕐᑎᓯᓂᒃᑯᑦ ᐊᖏᕈᑕᐅᔪᕕᓂᕐᓂᒃ 2029-ᒥ ᐃᓱᓕᑦᑐᕕᓂᖅ ᔫᓂ 30, 2023. ᒫᓐᓇᐅᑎᓪᓗᒍ, ᐊᔪᐃᓐᓇᓂᙯᓐᓇᑐᒍᑦ ᑮᓇᐅᔭᕐᑎᒍᑦ ᓇᖏᐊᕐᓇᖏᑦᑐᒦᒋᐊᒥᒃ ᑲᑭᐊᑦᑐᒦᑦᑎᓯᖏᓐᓇᕆᐊᒥᓗ.

ᓇᑯᕐᒦᒃ ᑲᔪᓯᔪᒥᒃ ᐊᔪᐃᓐᓇᓂᕆᔭᑦᓯᓂᒃ ᑐᕌᒐᑦᑎᓄᑦ ᐊᒻᒪᓗ ᓄᓇᓕᓐᓄᑦ ᐱᑦᔪᔨᔭᑦᑎᓄᑦ. ᐊᑕᐅᑦᓯᑯᑦ, ᓴᓇᒐᑕ ᓲᖑᓂᕐᓴᒥᒃ, ᐃᓚᐅᑎᑦᓯᓂᕐᓴᒥᒃ ᓯᕗᓂᕐᒥᒃ ᓄᓇᕕᒻᒥᐅᓂᒃ.