ᑰᑦᔪᐊᖅ (ᑯᐯᒃ.), ᐊᐅᒡᒍᓯ 25, 2025 – ᑲᑎᕕᒃ ᐃᓕᓴᕐᓂᓕᕆᓂᖅ ᐅᐱᒍᓱᑉᐳᑦ ᓂᓪᓕᕈᑎᖃᕆᐊᒥᒃ ᐅᒃᑯᐃᑕᐅᓂᕆᓚᖓᔭᖓᓂᒃ ᑲᔪᓯᕕᒃ ᐃᓕᓐᓂᐊᑏᑦ ᑐᔪᕐᒥᐅᕕᖓ, ᐊᑑᑎᔭᐅᓛᕐᑐᖅ ᐊᐅᒡᒍᓯ 26, 2025, 2:00-ᖑᐸᑦ ᑰᑦᔪᐊᒥ. ᑰᑦᔪᐊᒥᐅᓕᒫᑦ ᑐᖕᖓᓱᑦᑎᑕᐅᔪᑦ ᐁᓯᒪᒋᐊᕐᑐᖁᔭᐅᑦᓱᑎᑦ ᑖᑦᓱᒥᖓ ᐱᒻᒪᕆᐅᔪᒥᒃ ᓄᓇᓕᐅᑉ ᐱᓂᐊᕐᓂᖃᕈᑎᒋᔭᖓᓂᒃ.

ᐅᒃᑯᐃᑕᐅᓂᕐᒧᑦ ᖁᕕᐊᓱᒍᑕᐅᓂᖓ ᐃᓚᖃᖕᖑᓱᑦᑐᖅ ᐅᒃᑯᐃᓯᓂᐅᑉ ᐅᖃᐅᓯᖃᕈᑕᐅᒋᐊᖕᖓᓂᖓᓂᒃ, ᓇᑲᑦᓯᓂᕐᒥᓗ ᐊᑦᓱᓈᖑᔭᒥᒃ, ᐊᒻᒪᓗ ᕿᒥᕐᕈᑎᑕᐅᓂᖃᕐᓗᑎᑦ ᓄᑖᒥᒃ ᐃᓪᓗᔪᐊᒥᒃ. ᑐᓴᕋᑦᓭᑦ ᐊᑐᐃᓐᓇᐅᑎᑕᐅᖕᖑᓱᒻᒥᔪᑦ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᑦᑕ ᐊᒻᒪᓗ ᐃᓕᓐᓂᐊᕈᒪᔭᕐᒥᑕ ᐱᒋᐅᕐᓴᔭᐅᓂᕐᒧᑦ (AEVT) ᐃᓕᓐᓂᐊᑎᑦᓯᒍᑎᑦᓴᖏᑦ.

ᓄᑖᖅ ᐃᓕᓐᓂᐊᑏᑦ ᑐᔪᕐᒥᐅᕕᖓ ᐱᒻᒪᕆᐹᒻᒥᒃ ᐊᓪᓗᕆᐊᕐᓂᖃᕈᑕᐅᕗᖅ ᓴᐳᑦᔨᓂᕐᒥᒃ ᐃᓄᓐᓂᒃ ᑲᔪᓯᐅᑦᔨᒍᒪᔪᓂᒃ ᐃᓕᓐᓂᐊᓂᕐᒥᓂᒃ ᖃᓂᓐᓂᓴᐅᓗᑎᑦ ᐊᓂᕐᕋᒥᓄᑦ. ᐱᕕᕐᓴᖃᕐᓱᑎᑦ ᑐᔪᒥᐊᖃᕈᓐᓇᓂᕐᒥᒃ 84-ᓄᑦ ᐃᓄᓐᓄᑦ – ᐃᓚᐅᑎᓪᓗᒋᑦ ᐃᓚᒌᖑᔪᑦ ᐊᒻᒪᓗ ᐊᖓᔪᕐᖄᑐᐊᕆᔭᐅᔪᑦ – ᑐᔪᕐᒥᐅᕕᒃ ᐋᕐᕿᓱᕐᑕᐅᓯᒪᔪᖅ ᐱᑦᓴᑕᖃᕐᑎᓯᒍᑕᐅᑦᓱᓂ ᐊᑦᔨᒌᖕᖏᑐᓂᒃ ᑭᖕᖒᒪᒋᕙᑦᑕᖏᓐᓂᒃ ᐃᓄᒻᒪᕇᑦ ᐃᓕᓐᓂᐊᑎᐅᔪᑦ ᓄᓇᕕᒻᒥ ᐱᓯᒪᔪᑦ. ᓄᑖᔭᓂᒃ ᐳᓛᕐᕕᓕᒃ, ᐃᓕᓐᓂᐊᑕᒥᓂᒃ ᐃᓕᓐᓂᐊᕕᖃᕐᓱᓂ ᐊᒻᒪᓗ ᐃᓕᕐᖁᓯᕐᒧᐊᖓᔪᓂᒃ ᓱᖃᑦᓯᕕᖃᕐᓱᓂ, ᐯᕆᑦᓯᕕᓕᒃ, ᐃᙯᓕᓴᕐᕕᓕᒃ, ᐊᒻᒪᓗ ᐊᒥᓱᒋᐊᓪᓚᓂᒃ ᐱᑕᖃᕐᒥᓱᓂ.

ᐊᓕᐊᓱᑉᐳᒍᑦ ᐃᑲᔪᖃᑎᒌᖃᑎᖃᓚᐅᕋᑦᑕ ᐱᖓᓱᓂᒃ ᓄᓇᕕᒻᒥ ᓴᓇᖕᖑᐊᑎᐅᔪᓂᒃ, ᓵᒥ ᑲᓪᓚᒃ, ᐅᓛᔪ ᐱᓗᕐᑑᖅ ᐊᒻᒪᓗ ᓈᓐᓯ ᓵᓐᑕ, ᐱᕕᑦᓴᖃᕐᑎᓯᓚᐅᕐᑐᑦ ᐃᓕᔭᐅᒍᓐᓇᓯᓂᖏᓐᓂᒃ ᓴᓇᖕᖑᐊᑕᕕᓂᖏᑦ ᐃᓪᓗᔪᐊᑉ ᓴᓇᓯᒪᓂᖓᓄᑦ. ᓴᓇᖕᖑᐊᑕᕕᓂᖏᑦ ᑲᓪᓚᐅᑉ ᑕᑯᔭᐅᒍᓐᓇᑐᑦ ᑐᔪᕐᒥᐅᕕᐅᑉ ᓯᓚᑖᖓᓂᒃ, ᐃᑎᕆᐊᕕᖓᓃᑦᑐᑦ. ᓴᓇᖕᖑᐊᑕᕕᓂᖏᑦ ᓵᓐᑕᐅᑉ ᐊᒻᒪᓗ ᐱᓗᕐᑑᑉ ᐃᓕᔭᐅᓯᒪᓂᖃᕐᑎᓗᒋᑦ ᐅᐸᑦᑕᐅᓯᒪᕕᓗᐊᖕᖑᐊᕆᔭᖏᓐᓂᒃ, ᐃᓪᓗᔪᐊᑉ ᐃᓗᐊᖓᓂ.

ᑲᔪᓯᕕᒃ ᐃᓕᓐᓂᐊᑏᑦ ᑐᔪᕐᒥᐅᕕᖓ ᐱᔭᕇᕐᓯᒪᓕᕐᑎᓗᒍ, ᓴᓇᔭᐅᓂᑦᓴᖓᑕ ᓄᑖᖅ ᑲᔪᓯᕕᒃ AEVT ᒫᓐᓇᐅᑎᓪᓗᒍ ᐸᕐᓇᕈᑕᐅᔪᖅ, ᓴᓇᔭᐅᓂᑦᓴᖓ ᓂᕆᐅᒋᔭᐅᑎᓪᓗᒍ ᐱᒋᐊᕐᑕᐅᓂᑦᓴᖓ ᓯᕗᓂᑦᑕ ᖃᓂᒋᔭᖓᓂᒃ.

ᒫᓐᓇᐅᑎᓪᓗᒍ, ᐃᓕᓐᓂᐊᕕᖏᑦ ᐊᑐᕐᓂᓖᑦ ᒫᓐᓇᓯᐅᑎᓂᒃ ᐃᓕᓐᓂᐊᕕᓐᓂᒃ, ᓴᓇᔭᐅᔪᕕᓂᕐᒥᒃ 2023-ᒥ. ᑖᓐᓇ ᒫᓐᓇᓯᐅᑎᒃ ᐃᓪᓗᔪᐊᖅ ᐱᕕᑦᓴᖃᕐᑎᓯᓕᕇᕐᑐᖅ ᐃᓕᓐᓂᐊᕕᒻᒥᒃ ᐊᒥᓱᖕᖑᒋᐊᕆᒍᓐᓇᓯᓂᕐᒥᒃ ᐊᒻᒪᓗ ᐱᒍᑦᔨᓯᐊᕐᓂᓴᐅᒍᓐᓇᓕᕐᓱᓂ ᐊᒥᓱᖕᖑᐸᓪᓕᐊᔪᓂᒃ ᐃᓄᒻᒪᕆᓐᓂᒃ ᐃᓕᓐᓂᐊᑎᓂᒃ ᑰᑦᔪᐊᒥ ᓄᓇᕕᒻᒥᓗ.

ᐃᓚᒋᔭᐅᔪᑦᓴᒥᒃ ᐱᓇᓱᐊᒐᑦᓴᒥᒃ ᓴᓇᔭᐅᓂᑦᓴᖏᓐᓄᑦ ᓄᑖᑦ ᑲᑎᒪᓂᐊᕈᓯᖃᕐᕕᓴᐅᔪᑦ ᑐᓂᔭᐅᖕᖑᓱᑦᑐᑦ ᑕᒃᑲᓂ ᐅᑭᐊᒥ MEQ-ᑯᓄᑦ ᐊᖏᕐᑕᐅᔪᑦᓴᐅᑎᓪᓗᒋᑦ ᐊᒻᒪᓗ ᑮᓇᐅᔭᖃᕐᑎᑕᐅᓂᑦᓴᖓᑕ ᓱᕐᖁᐃᑕᐅᓂᑦᓴᖏᓐᓄᑦ. ᑖᑦᓱᒪᐅᑉ ᑮᖑᓪᓕᐹᕐᓯᐅᕈᑕᐅᓂᕆᒐᔭᕐᑕᖓ ᐱᐅᓯᒋᐊᓪᓛᕆᒐᔭᕐᒥᔪᖅ ᑲᔪᓯᕕᐅᑉ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᑦᑕ ᐃᓕᓐᓂᐊᕈᒪᔭᕐᒥᑕ ᐱᒋᐅᕐᓴᔭᐅᓂᕐᒧᑦ ᐱᒍᓐᓇᓂᕆᒐᔭᕐᑕᖓᓂᒃ ᐃᓕᓐᓂᐊᑎᑦᓯᒍᓐᓇᓯᓂᕐᒥᒃ ᐃᓕᓐᓂᐊᑕᐅᒍᒪᔪᓂᒃ ᐱᒋᐅᕐᓭᓂᕐᒥᒃ. ᑖᒃᑯᐊ ᐃᓪᓗᔪᐊᑦᓭᑦ ᐃᓚᒋᔭᐅᔪᑦ ᐊᖏᓂᕐᓴᒥᒃ ᑕᑯᓐᓇᑕᐅᓂᖃᕐᓂᓄᑦ ᐊᖏᓕᒋᐊᕐᑕᐅᓂᑦᓴᖏᓐᓄᑦ ᐱᕕᑦᓴᖃᕐᑎᓯᐅᑎᑦᓭᑦ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᑎᑦᓯᓂᒍᓐᓇᓯᓂᕐᒧᑦ ᓄᓇᕕᒻᒥ. ᐱᒋᐊᕐᑎᑕᐅᕐᖃᒥᐅᔪᖅ ᐃᓕᑕᕐᓯᔭᐅᒍᑎᒃ ᐃᓕᓐᓂᐊᓂᓕᕆᔨᐅᓂᕐᒥᒃ ᓄᓇᖃᕐᖄᓯᒪᔪᓄᑦ ᐃᓄᓐᓄᓗ (CEFNI) ᑲᑐᑦᔨᖃᑎᒌᒍᑕᐅᑦᓱᓂ ᒥᑭᐅᓪ ᐃᓕᓐᓂᐊᕕᕐᔪᐊᖓᓄᑦ ᐱᑦᔪᑎᒋᔭᐅᓂᖓᓄᑦ ᑕᑯᓐᓇᑕᕆᔭᐅᔫᑉ. ᑖᓐᓇ ᓄᑖᖅ ᐃᓕᓐᓂᐊᑏᑦ ᑐᔪᕐᒥᐅᕕᖓ ᐱᑕᖃᕐᓂᖏᑉᐸᑦ, ᐊᒥᓱᐃᑦ ᐃᓕᓐᓂᐊᑎᑦᓯᒍᑕᐅᔪᓄᑦ ᐃᓚᐅᔪᑦ ᑰᑦᔪᐊᒥᐅᖑᒐᑎᑦ ᐃᓚᐅᒍᓐᓇᕕᖃᕋᔭᓚᐅᖕᖏᑐᑦ.

ᑖᓐᓇ ᐱᓇᓱᐊᕈᑕᐅᔪᖅ ᑮᓇᐅᔭᖃᕐᑎᑕᐅᔪᕕᓂᖅ ᑯᐯᒃᑯᑦ ᑐᕐᖃᑕᕐᕕᖓᓄᑦ ᐃᓕᓐᓂᐊᓂᓕᕆᓂᕐᒥᒃ. ᓇᑯᕆᔭᕗᑦ ᐃᑲᔪᕐᓯᓯᒪᓂᖏᑦ ᑯᐯᒃ ᑐᕐᖃᑕᕐᕕᖓ ᐃᓕᕐᖁᓯᓕᕆᓂᕐᒥᒃ ᑐᓴᐅᒪᖃᑎᒌᓐᓂᓕᕆᓂᕐᒥᓗ ᑲᒪᒋᔭᖃᓚᐅᕐᓂᖏᓐᓄᑦ  ᐊᑐᕐᑎᑕᐅᓂᖓ Politique d’intégration des arts à l’architecture et à l’environnement des bâtiments et des sites gouvernementaux et publics ᑖᑦᓱᒪᐅᑉ ᓴᓇᔭᐅᓂᖓᑕ ᐱᓇᓱᐊᕐᑕᐅᒍᑎᖏᑦ.

ᐱᓂᐊᕐᓂᐅᑉ ᖃᓄᐃᓕᖓᓂᑦᓴᖏᑦ:
📍 ᑲᔪᓯᕕᒃ ᐃᓕᓐᓂᐊᑏᑦ ᑐᔪᕐᒥᐅᕕᖓ, ᑰᑦᔪᐊᖅ
📅 ᐊᐅᒡᒍᓯ 26, 2025
🕑 2:00 ᐅᓐᓄᓴ – 5:00 ᐅᓐᓄᓴ

ᐅᒃᑯᐃᓯᓂᖃᕐᓂᐅᑉ ᖃᓄᐃᓕᖓᓂᑦᓴᖏᑦ:

• 2:00 ᐅᓐᓄᓴ – ᙯᖁᔭᐅᓯᒪᔪᑦ ᙯᓂᖏᑦ ᐊᒻᒪᓗ ᑕᒧᓪᓗᒐᑦᓭᑦ
• 2:30 ᐅᓐᓄᓴ – ᐅᒃᑯᐃᓯᒋᐊᖕᖓᐅᑏᑦ ᐅᖃᐅᓰᑦ ᐅᖃᓕᒪᔪᐃᓪᓗ
• 3:15 ᐅᓐᓄᓴ – ᐊᑦᓱᓈᖑᔭᒥ-ᓇᑲᑕᐅᓂᖓᑕ ᐊᑑᑎᔭᐅᓂᖓ
• 3:30 ᐅᓐᓄᓴ – ᐅᒃᑯᐃᖔᕐᑐᑦ ᐃᓪᓗᖅ, ᕿᒥᕐᕈᑎᑕᐅᓂᖅ ᐊᒻᒪᓗ ᑐᓴᕐᑎᓯᐅᑎᓖᑦ ᕿᒥᕐᕈᐊᕕᐊᐱᓖᑦ

ᑭᓇᒃᑰᓂᕗᑦ:

ᑲᑎᕕᒃ ᐃᓕᓴᕐᓂᓕᕆᓂᖅ, ᐃᓕᓐᓂᐊᓂᓕᕆᕕᖓ ᓄᓇᕕᐅᑉ, ᓄᐃᑕᐅᔪᕕᓂᖅ 1975-ᖑᑎᓪᓗᒍ ᐊᑖᒎᕐᓱᓂ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖓ (JBNQA). ᐊᕐᕌᒍᖓᓃᕇᕐᓯᒪᓕᕐᑎᓗᑕ 1978, ᐱᒍᑦᔨᔪᑑᓂᖃᕐᓯᒪᓕᕐᑐᖅ ᐃᓕᓐᓂᐊᓂᓕᕆᓂᕐᒨᓕᖓᔪᓂᒃ ᐱᒍᑦᔨᓂᐅᔪᓂᒃ ᓄᓇᕕᒻᒥᐅᓕᒫᓄᑦ. ᐊᑖᒎᕐᓱᓂ JBNQA, ᐃᓕᓴᕐᓂᓕᕆᓂᖅ ᐱᓂᐊᕐᓂᖃᓲᖑᒻᒥᔪᖅ ᐱᓇᓱᐊᕐᕕᒪᕆᐅᓂᒃᑯᑦ ᐊᑦᔨᒋᔭᐅᖕᖏᑐᓂᒃ ᓄᑭᖃᕐᓱᓂ ᐊᒻᒪᓗ ᓄᑭᐅᕕᖃᕐᓱᓂ ᑐᕌᖓᔪᓂᒃ ᓴᐳᑎᔭᐅᒍᑎᖏᓐᓄᑦ ᐊᒻᒪᓗ ᐱᕙᓪᓕᐊᕈᑕᐅᓂᖏᓐᓄᑦ ᐃᓄᐃᑦ ᐅᖃᐅᓯᖓ, ᐃᓕᕐᖁᓯᖓ ᐊᒻᒪᓗ ᐃᓅᒍᓯᖏᑦ ᐊᕐᖁᑎᒋᑦᓱᒋᑦ ᐋᕐᕿᓱᕐᑕᐅᓯᒪᓂᓖᑦ ᐃᓕᓐᓂᐊᓂᓕᕆᓂᕐᒧᑦ ᐱᒍᑦᔨᐅᑏᑦ ᐊᒻᒪᓗ ᐃᓕᓐᓂᐊᑎᑦᓯᒍᑏᑦ. ᐃᓕᓐᓂᐊᑎᑦᓯᓂᕐᒧᑦ ᐃᓕᓭᒍᑏᑦ ᐋᕐᕿᓱᕐᑕᐅᓯᒪᔪᑦ ᐃᓕᓴᕐᓂᓕᕆᓂᕐᒧᑦ ᑐᓂᔭᐅᓂᖃᓲᑦ ᐃᓘᓐᓇᖏᓐᓂᑦ ᐃᓕᓐᓂᐊᕕᓐᓂᒃ 14 ᓄᓇᕕᒻᒦᑐᑦ ᓄᓇᓖᑦ, ᐃᓄᒃᑎᑐᑦ ᓯᕗᓪᓕᐸᐅᑎᓪᓗᒍ ᐅᖃᐅᓯᕐᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᑐᖓᓕᐅᕆᔭᐅᑎᓪᓗᒋᑦ ᐅᖃᐅᓯᒃᑯᑦ. ᐃᓕᓴᕐᓂᓕᕆᓂᖅ ᐊᐅᓚᑦᓯᓂᖃᓲᖅ 18-ᓂᒃ ᐳᒃᑭᓂᕐᓴᓂᒃ ᐳᕐᑐᓂᕐᓴᓂᓪᓗ ᐃᓕᓐᓂᐊᕕᓐᓂᒃ, ᐃᓚᐅᑎᓪᓗᒋᑦ 6 ᐃᓄᒻᒪᕇᑦ ᐃᓕᓐᓂᐊᑎᑕᐅᕕᖏᑦ. ᑐᓴᕆᐊᓪᓛᕈᒪᒍᕕᑦ, ᐳᓛᕆᐊᕐᓗᒍ kativik.qc.ca.

— 30 —

ᑐᓴᕆᐊᓪᓛᕈᒪᒍᕕᑦ, ᖃᐅᔨᒋᐊᕐᕕᒋᓗᒍ ᐅᓇ:

ᔮᑦ ᑐᓯᓅ-ᐱᕐᓀ
ᑐᓴᕋᑦᓴᓕᕆᕕᒻᒥ ᐊᑕᐅᑦᓯᑰᕐᑎᓯᔨ
514 797-8220 | 1 800 360-2244 ᓵᖓᓃᑦᑐᖅ ᑭᓯᑦᔪᑎᖓ 309
publicrelations@kativik.qc.ca