ᐃᓕᓐᓂᐊᑎᑦᓯᒍᓐᓇᓃᑦ ᓲᖑᓯᒋᐊᓚᖓᔪᖅ ᑲᔪᖏᕐᓭᓂᖃᕐᓗᓂᓗ ᑭᖑᕚᑦᓴᑎᓐᓂᒃ ᓄᓇᕕᒻᒥ ᐃᓕᓐᓂᐊᑎᓂᒃ. ᐃᓕᓐᓂᐊᑎᑦᓯᔨᐅᓗᑎᑦ, ᐅᐱᒍᓱᓕᓚᖓᕗᑎᑦ ᐅᖃᐅᓯᕐᒥᒃ ᐃᓕᕐᖁᓯᕐᒥᓗ, ᐅᐱᒍᓱᓐᓂᒥᓪᓗ ᑲᔪᓯᑎᑦᓯᓚᖓᑦᓱᑎᑦ ᐊᓕᐊᒋᔭᖃᓕᕐᓗᑎᓗ ᐃᓕᑦᓯᒍᒪᓂᕐᒥᒃ ᐊᕗᖓᓕᒫᒃ.

ᑕᒪᒃᑯᐊ ᐃᓕᓐᓂᐊᒐᑦᓭᑦ ᐃᓕᓐᓂᐊᕕᕐᔪᐊᒥ ᑐᖕᖓᕕᖃᑦᓯᐊᑐᑦ ᐃᓕᓐᓂᐊᑎᑦᓯᓂᕐᒧᑦ ᐃᓄᒃᑎᑐᑦ ᐊᒻᒪᓗ ᓇᓗᕐᖁᑎᖕᖏᑑᓗᓂ ᐃᓕᓐᓂᐊᕕᐅᑉ ᐃᓗᐊᓂ ᑲᒪᒋᔭᖃᕐᓂᒥᒃ. ᐱᓇᓱᐊᒐᑦᓴᓕᒫᖏᓐᓂᒃ, ᐱᔭᕇᕐᓯᒪᓚᖓᔪᑎᑦ ᐊᑐᕈᓐᓇᓯᓗᒋᓗ ᐃᓕᓐᓂᐊᕕᓐᓂ, ᐃᓕᓐᓂᐊᑎᑦᓯᕈᓐᓇᓯᒍᑎᒋᓗᒋᓗ. ᐱᕙᓪᓕᓗᓂᓗ ᐃᓕᓐᓂᐊᑎᑦᓯᓃᑦ ᐱᐅᓯᒋᐊᕐᓂᖓᓄᑦ.

ᑖᒃᑯᐊ ᐃᓕᓐᓂᐊᑕᑎᑦ ᐱᔭᕇᒍᕕᒋᑦ ᐱᓇᓱᓪᓗᑎᓪᓗ ᑲᑎᕕᒃ ᐃᓂᓴᕐᓂᓕᕆᓂᕐᒥ, ᐃᓕᓐᓂᐊᑕᑎᑦ ᑲᔪᓯᒍᓐᓇᑐᑦ ᐱᓇᓱᖏᓐᓇᓗᑎᓪᓗ. ᑲᑎᑎᒍᓐᓇᒐᔭᕐᑕᑎᑦ ᓇᓗᓀᒃᑯᑕᕐᒨᖓᔪᑦ ᓀᑦᑐᒥᓗ ᐱᓇᓱᐊᕐᑕᑎᑦ ᐃᓕᓐᓂᐊᕕᕐᔪᐊᒥ ᐱᒋᐅᕐᓴᐅᑎᑎᑦ ᐃᓕᓐᓂᐊᒋᐊᖕᖓᑐᓄᑦ ᐃᓕᓐᓂᐊᕕᒻᒧᓗ (BEPEP) ᐃᓄᒃᑎᑐᑦ (120 ᖁᕝᕙᕆᐊᕈᑏᑦ), UQAT-ᑯᓐᓂ.

ᐊᕐᕌᒍᕐᒥᒃ ᑎᕗᓪᓕᐹᒥᒃ, ᐃᓕᓐᓂᐊᑏᑦ ᑐᖕᖓᕕᓕᐅᓲᖑᕗᑦ ᐃᓕᓐᓂᐊᑎᑦᓯᒋᐅᕐᓴᓂᕐᒥᒃ: ᖃᓄᖅ ᐱᐊᕃᑦ ᐃᓕᑦᓯᕙᓪᓕᐊᓲᖑᒻᒪᖔᑕ, ᖃᓄᖅ ᐃᓕᓐᓂᐊᒐᑦᓴᓂᒃ ᐊᑐᐃᓐᓇᕈᕐᑎᓂᕐᒥᒃ, ᖃᓄᖅ ᐃᓕᓐᓂᐊᕕᒻᒥᓂ ᐊᐅᓚᑦᓯᒍᓐᓇᒪᖔᕐᒥᒃ, ᐃᓕᓐᓂᐊᑎᓂᓪᓗ ᖃᓄᖅ ᐃᑲᔪᒐᔭᕐᒪᖔᕐᒥᒃ ᐊᑦᔨᒌᖕᖏᓂᑯᖏᓐᓄᑦ ᐃᓕᑦᓯᕙᓪᓕᐊᓂᖏᑦ. ᖃᐅᔨᒪᓂᖏᑦ ᓲᖑᓯᒋᐊᓲᖑᕗᑦ ᐃᓄᒃᑎᑐᑦ – ᐋᕐᕿᓯᒪᓂᖓᓂᒃ, ᐱᔭᐅᒍᓐᓇᓂᖓᓂᒃ, ᐊᑐᕐᑕᐅᓂᖓᓂᓪᓗ ᐃᓕᓐᓂᐊᑎᑦᓯᓂᕐᒧᑦ – ᐱᔭᕇᕐᓱᑎᒃ ᐱᒋᐅᑦᓴᐅᑎᕆᒋᐊᖕᖓᑕᖏᓐᓂᒃ ᐃᓕᓐᓂᐊᓂᕆᔭᒥᓂᒃ ᓄᓇᓕᓐᓂ ᐃᓕᓐᓂᐊᕕᓐᓂᒃ. ᑖᓐᓇ ᐱᒋᐅᕐᓴᓂᖅ ᑲᑎᑎᑦᓯᔪᖅ ᐃᓱᒪᒋᔭᐅᔪᓂᒃ ᐱᒋᐅᕐᓴᓂᕐᒧᑦ, ᐃᓕᓐᓂᐊᑎᓂᒃ ᐱᕕᑦᓴᑖᕐᑎᓯᑦᓱᓂ ᐃᓕᓐᓂᐊᑎᑦᓯᔨᖕᖑᐸᓪᓕᐊᑎᓪᓗᒋᑦ.

ᐊᕐᕌᒎᑉ ᑐᖓᓕᖓᓂ, ᐃᓕᓐᓂᐊᑐᐃᑦ ᐊᖏᓕᒋᐊᖃᑦᑕᑐᑦ ᖃᐅᔨᒪᓂᖏᑦ ᐆᑦᑑᑎᒋᓗᒍ, ᑭᓯᑦᓯᑎᓐᓂᐊᒍᓐᓇᓂᖏᑦ, ᐅᖄᕈᓐᓇᓂᖏᑦ/ᐊᓪᓚᕈᓐᓇᓂᖏᑦ, ᓱᓇᑐᐃᓐᓇᓂᒃ ᖃᐅᔨᓴᕈᓐᓇᓂᖏᑦ, ᓴᓇᖕᖑᐊᓂᕐᒥᓗ. ᑐᑭᓯᒍᓐᓇᓯᓲᑦ ᓄᓇᕕᐅᑉ ᐃᓕᓐᓂᐊᕕᖏᓐᓂᒃ, ᐃᓕᕐᖁᓯᖃᑎᒌᖕᖏᑐᓂᒃ, ᐃᓅᖃᑎᒌᓐᓂᐅᔪᓂᓪᓗ ᐋᕐᕿᓱᐃᕙᑦᑐᓂᒃ ᐃᓕᓐᓂᐊᓂᓕᕆᓂᐅᕙᑦᑐᒥᓪᓗ ᐅᑭᐅᕐᑕᑐᒥ. ᐊᕐᕌᒍᖅ ᑭᖑᓪᓕᐹᒥ ᐃᓕᓐᓂᐊᑐᐃᑦ ᑕᑯᑦᓴᐅᑎᑦᓯᔪᑦ ᐃᓄᑑᒍᓐᓇᓂᕐᒥᓂᒃ ᐃᓕᓐᓂᐊᕕᒻᒥᓂ, ᐊᐅᓚᑦᓯᒍᓐᓇᓂᕐᒥᓂ, ᐊᑐᐃᓐᓇᐅᓂᕐᒥᓂᓪᓗ ᐃᓕᓐᓂᐊᑎᑦᓯᔨᐅᓂᕐᒧᑦ ᐃᓕᓐᓂᐊᕕᒻᒥᓂ ᓄᓇᓕᒻᒥᓂ.

ᐃᓕᓐᓂᐊᑕᒥᓂᒃ ᐱᔭᕇᕐᓯᒪᓕᕐᐸᑕ, ᐃᓕᓐᓂᐊᑕᒥᓂᓪᓗ ᐊᓂᒍᐃᔪᑦ ᐊᑐᐃᓐᓇᕈᕐᑎᑐᑦ:

• ᐃᓕᓐᓂᐊᑎᑦᓯᓗᓂ ᓇᓗᕐᖁᑎᖕᖏᑑᓗᓂ ᐃᓕᓐᓂᐊᕕᒻᒥᓂᒃ ᐊᑐᕐᓗᓂ ᐃᓕᓐᓂᐊᑎᑦᓯᒍᑎᐅᔪᓂᒃ ᓲᓱᑦᓴᓯᐊᕐᑐᓂᒃ ᐃᓄᐃᑦ ᐃᓗᕐᖁᓯᖓᓂᒃ, ᐅᖃᐅᓯᖓᓂᒃ, ᑭᓇᐅᓂᖏᓐᓂᓗ.
• ᐃᑲᔪᕐᓗᓂ ᐃᓕᓐᓂᐊᑎᓂᒃ ᐃᓕᓐᓂᕙᓪᓕᐊᓂᖏᓐᓂᒃ ᐊᑦᔨᒌᖕᖏᑐᑎᒍᑦ ᐃᓕᓐᓂᐊᑎᑦᓯᕈᑎᐅᔪᓂᒃ – ᐃᓚᒋᔭᐅᑎᓪᓗᒋ, ᐃᓄᒃᑎᑐᑦ, ᑭᓯᑦᓯᑎᓐᓂᐊᓂᖅ, ᖃᐅᔨᓴᕐᓂᖅ, ᓴᓇᖕᖑᐊᓂᕐᒥᓗ.
• ᓴᕐᕿᑎᑦᓯᓗᓂ ᐊᑦᑕᓇᖕᖏᑐᓂᒃ, ᐃᓚᐅᑎᑦᓯᔪᓂᒃ, ᐃᓚᓕᐅᑦᔨᓯᒪᑦᓯᐊᑐᓂᓪᓗ ᐃᓕᓐᓂᐊᕕᐅᑉ ᐃᓗᐊᓂ ᐊᕙᑎᐅᔪᓂᒃ ᑐᖕᖓᕕᖃᑦᓯᐊᑐᓂᒃ ᐃᓄᐃᑦ ᐃᓪᓕᓇᕐᑑᖁᑎᖏᓐᓂᒃ.

ᐃᑦᔭᒐᑦᓴᓯᐊᖑᓗᑎᒃ ᓄᓇᓕᒻᒥᓂᒃ ᑫᓪᓗᑐᐃᑦᓯᐊᓂᕐᒥᓄᑦ ᐃᓄᒃᑎᑐᑦ ᐅᖃᐅᓯᕐᒥᒍᑦ ᐃᓕᓐᓂᐊᑎᑦᓯᓂᒃᑯᑦ ᑭᖑᕚᑦᓴᓂᒃ ᐊᑐᕐᓗᑎᒃ.

ᐱᔪᓐᓇᐅᑎᓕᓐᓂᒃ ᐊᒥᓱᓂᒃ ᐃᓕᓐᓂᐊᑎᑦᓯᔨᑦᑖᕆᐊᓕᒃ ᐃᓄᓐᓂᒃ, ᓄᓇᕕᒻᒥᐅᓗ ᐃᓕᓐᓂᐊᑎᑦᓯᕕᒻᒨᕈᒪᔪᑦ ᐃᑎᕐᓗᑎᒃ ᐊᑐᐃᓐᓇᖃᕆᐊᖃᕐᒪᑕ ᐃᓕᓐᓂᐊᕕᕐᔪᐊᒧᑦ ᐊᕐᑎᑦᓴᒥᒃ ᐅᖃᐅᓯᖏᓐᓄᑦ, ᐃᓗᕐᖁᓯᖏᓐᓄᑦ, ᓄᓇᓕᓐᓂᓗ ᐃᓅᓯᐅᔪᓄᑦ.

ᐱᕙᕇᒍᕕᑦ ᑖᑦᓱᒥᖓ ᐃᓕᓐᓂᐊᑕᕐᓂᐅᕕᑦ, ᐃᒣᒍᓐᓇᓂᓚᖓᕗᑎᑦ:

• ᐱᓇᓱᒍᓐᓇᑐᖅ ᐃᓕᓐᓂᐊᓂᓕᕆᓂᕐᒥᒃ ᓄᓇᕕᖕᒥ.
• ᐃᓕᓐᓂᐊᑎᑦᓯᒍᓐᓇᑐᖅ ᐃᓄᒃᑎᑐᑦ, ᓄᓇᓕᖕᓂ ᐃᓕᓐᓂᐊᕕᕐᓂ.

ᑲᔪᓯᓗᒋᓪᓗ ᐃᓕᓐᓂᐊᑕᑎᑦ ᐱᓇᓱᓪᓗᑎᓗ ᐃᓕᓐᓂᐊᑎᑦᓯᓗᑎᑦ ᑲᑎᕕᒃ ᐃᓕᓴᕐᓂᓕᕆᓂᕐᒥ ᐅᓪᓗᓕᒫᑦᓯᐅᑎᐅᖕᖏᑐᒥᒃ ᐃᓕᓐᓂᐊᖏᓐᓇᓗᑎᑦ ᐃᓕᓐᓂᐊᑕᑎᓐᓂᒃ. ᑲᑎᑎᒍᓐᓇᑕᑎᑦ ᓇᓗᓀᒃᑯᑕᕐᒨᖓᔪᑦ ᓀᑦᑐᒥᓗ ᐃᓕᓐᓂᐊᑕᑎᑦ ᖁᕝᕙᕆᐊᕈᑎᒃ ᐃᓕᓐᓂᐊᑎᑦᓯᒍᓐᓇᐅᑎᑖᕋᓱᐊᕈᑎᑦᓴᓄᑦ 120 UQAT ᐃᓕᓐᓂᐊᕕᕐᔪᐊᒥ ᐱᒋᐅᕐᓴᐅᑎᒃ ᐃᓕᓐᓂᐊᒋᐊᖕᖓᑐᓄᑦ ᐃᓕᓐᓂᐊᕕᒻᒧᓗ (BEPEP) ᐃᓄᒃᑎᑐᑦ.

ᐊᓪᓚᑕᐅᓯᒪᔪᑦ ᐃᓕᓐᓂᐊᒉᑦ ᐊᑐᐃᓐᓇᐅᑎᑕᐅᔪᑦ ᐃᓕᓐᓂᐊᓇᐅᑉ ᓯᕗᓪᓕᐹᖓᓂ ᐊᕕᑦᑐᓯᒪᓂᖓᑕ ᓯᕗᓪᓕᐹᖓᓂ:

• EDU1340 – ᖃᐅᔨᓴᒍᑏᑦ ᐃᓕᓐᓂᐊᑎᑦᓯᔨᐅᓂᕐᒥᒃ ᐃᓕᓐᓂᐊᕈᑎᑦᓴᖏᓪᓗ ᐃᓕᓐᓂᐊᓂᓕᕆᓂᕐᒧᑦ ᖃᐅᔨᒪᓂᒃᑯᑦ ᐃᓕᓐᓂᐊᕈᑎᓄᑦ (3 ᖁᕝᕙᒋᐊᕈᑏᑦ)

ᐱᕙᓪᓕᐊᑎᑦᓯᓂᖅ ᑭᒡᒐᑐᕐᑎᓯᓂᕐᒥᒃ ᐃᓕᓐᓂᐊᕆᐊᖕᖓᑐᓂᒃ ᐳᒃᑭᓂᕐᓴᓂᓪᓗ ᐃᓕᓐᓂᐊᑎᑦᓯᔨᓂᒃ. ᐃᓂᓪᓚᑎᑦᓯᒪᓂᖅ ᐃᓕᓐᓂᐊᑎᑦᓯᓂᕐᒥᒃ ᐱᓇᓱᐊᕐᓂᒥᒃ ᐱᓇᓱᕝᕕᓂ, ᐱᓇᓱᕝᕕᒋᔭᐅᔪᒥ ᐊᒻᒪᓗ ᐃᓅᖃᑎᖃᕐᓂᒥᒃ. ᖃᐅᔨᒪᓂᕐᑖᓗᓂ ᐅᓪᓗᒥᐅᓕᕐᑐᖅ ᐱᓀᓗᑕᐅᓲᓂᒃ ᐃᓕᓐᓂᐊᓂᐅᑉ ᐊᕙᑎᖓᓂ. ᐱᒋᐊᕐᑎᓯᓂᖅ ᓇᒻᒥᓂᖅ ᐱᓇᓱᒐᕐᒥᓗ ᐱᒋᐅᕐᓴᑎᑦᓯᓂᕐᒥᒃ ᐃᓕᓐᓂᐊᒐᑦᓴᒥᒃ. ᐱᓗᐊᕐᑐᒥᒃ, ᖃᐅᔨᒪᑦᓯᐊᓗᓂ ᐱᔪᓐᓇᐅᑎᓕᓐᓂᒃ ᐱᔪᓐᓇᓯᐊᕐᓂᖏᓐᓂᒃ ᐊᔭᐅᕐᑐᐃᓗᓂᓗ ᑖᒃᑯᓂᖓ ᐱᔪᓐᓇᐅᑎᓕᓐᓅᖓᔪᓂᒃ ᐊᖏᖃᑎᒌᑦᑎᓯᒐᓱᐊᕐᓂᒧᑦ, ᐱᔪᓐᓇᐅᑎᓕᓐᓄᑦ ᑲᑐᑦᔨᖃᑎᒌᓄᑦ, ᑐᓴᐅᒪᖃᑎᒌᓐᓂᖅ, ᐱᑦᓯᐊᕆᐊᖃᕐᓂᒧᑦ, ᐊᒻᒪᓗ ᐱᔪᓐᓇᐅᑎᖃᕐᓂᒧᓪᓗ ᐱᕙᓪᓕᐊᓂᐅᔪᓄᑦ. ᐃᓕᓐᓂᐊᑎᓂᒃ ᖃᐅᔨᕙᓪᓕᐊᑎᑦᓯᓂᖅ ᐃᓕᓐᓂᐊᓂᕐᒥᒃ ᐊᑑᑎᖃᑦᓯᐊᑐᓂᒃ ᐊᒻᒪᓗ ᐃᓱᒪᒐᓱᐊᕐᓂᑯᑦ ᐃᓕᑦᓯᕙᓪᓕᐊᓂᕐᒥᒃ ᓄᑖᒥᒃ ᐱᔭᕆᐊᑐᔪᒥᓪᓗ ᖃᐅᔨᒪᓂᕐᒥᒃ ᐊᒻᒪᓗ ᐃᓄᑦᑕᖏᓐᓂ ᐱᓇᓱᒐᕐᒥᓗ ᐱᕙᓪᓕᐊᑎᑦᓯᓂᕐᒥᒃ (ᐃᓕᓐᓂᐊᓂᕐᒧᑦ ᐸᕐᓇᒍᑎᐅᔪᑦ, ᐱᓀᓗᑕᓂᒃ ᐋᕐᕿᓱᐃᒍᓯᖏᑦ ᐸᕐᓇᒍᑎᐅᔪᑦ, ᐃᓱᒪᒃᑯᑦ, ᐃᑉᐱᓂᐊᕐᓂᑯᑦ, ᐃᓱᒪᒋᔭᐅᔪᒧᓪᓗ ᐸᕐᓇᒍᑎᐅᔪᑦ).

______

• EDU1438 – ᐃᓗᕐᖁᓯᒥᒃ ᑭᓇᐅᓂᕐᒥᒃ ᐃᓕᖓᔪᖅ ᐃᓕᓐᓂᐊᓂᒻᒧᓗ (ᖁᕝᕙᒋᐊᕈᑏᑦ 3)

ᑐᑭᓯᒪᓂᖅ ᖃᓄᐃᓕᖓᐅᓯᖓᓂᒃ ᐃᓗᕐᖁᓯᒥᒃ ᑭᓇᐅᓂᕐᒥᓗ. ᐋᕐᕿᓱᐃᓂᖅ ᐱᒻᒪᕆᐅᔪᒥᒃ ᖃᐅᔨᓴᕐᓂᒥᒃ ᐃᑲᔫᑎᓂᑦ ᑕᒪᒃᑮᓄᑦ ᐃᓕᓐᓂᐊᓂᕐᒧᑦ ᐃᓅᖃᑎᒌᓐᓂᓗ ᐃᑲᔪᕐᓯᓂᖓᓂᒃ ᐱᕙᓪᓕᐊᑎᓗᒋᑦ ᐃᓗᕐᖁᓯᒥᒃ ᑭᓇᐅᓂᕐᒥᒃ. ᐃᓕᑕᕐᓯᓂᖅ ᑕᑯᓐᓇᑕᐅᔪᓂᒃ ᖃᓄᐃᓕᖓᓂᐅᔪᓂᒃ ᐃᓕᓐᓂᐊᕕᐅᑉ ᐃᓅᖃᑎᒌᓪᓗ ᐱᔭᕇᕐᓂᖓᓄᑦ ᐱᕙᓪᓕᐊᑎᓪᓗᒋᑦ. ᐱᕙᓪᓕᐊᑎᑦᓯᓂᖅ ᐱᔪᓐᓇᕈᑎᓂᒃ ᕿᒥᕐᕈᒍᓐᓇᓯᓂᕐᒥᒃ ᐃᓕᓐᓂᐊᓂᕐᒧᑦ ᖃᓄᐃᓕᖓᓕᕐᓂᖏᓐᓂᒃ ᓄᓇᕕᒻᒥᐅᑦ ᐃᓄᐃᓪᓗ ᓱᑲᓐᓂᓴᒥᒃ ᐃᓅᖃᑎᒌᓐᓂᖏᑦᑕ ᐊᓯᑦᔨᕙᓪᓕᐊᓂᖏᓐᓄᑦ ᐃᓄᐃᑦ ᓵᖕᖓᓯᔪᓂᒃ. ᑐᑭᓯᒪᓂᖅ ᐃᓗᕐᖁᓯᖃᑎᒌᓐᓂᑎᒍᑦ ᑐᓴᐅᒪᖃᑎᒌᓐᓂᐅᑉ ᐊᒻᒪᓗ ᐃᓱᐃᓪᓕᖓᐅᑎᐅᒍᓐᓇᑐᑦ ᐱᓇᓱᐊᕐᑕᐅᓚᖓᔪᑦ. ᐱᕙᓪᓕᐊᑎᑦᓯᓂᖅ ᖃᐅᔨᒪᓂᐅᔪᓂᒃ ᐊᑐᕆᐊᓕᓐᓂᒃ ᐃᓄᖕᖑᓕᐅᒥᑎᑦᓯᓂᕐᒧᑦ ᐃᓕᓐᓂᐊᓂᕐᒥᒃ ᓯᕗᓕᕐᑕᐅᔪᒥᒃ ᓄᓇᓕᓐᓂ.

______

• LIN1341 – ᐃᓄᒃᑎᑑᕐᓂᐅᑉ ᐋᕐᕿᓯᒪᓂᖓ (3 ᖁᕝᕙᒋᐊᕈᑏᑦ)

ᐃᓄᓐᓂᒃ ᐃᓕᓐᓂᐊᑎᑦᓯᔨᓂᒃ ᐱᑕᖃᕐᑎᓯᓂᖅ ᖃᐅᔨᒪᓂᕐᓂᒃ ᐃᓕᓭᒍᓐᓇᓂᕐᒥᒃ ᐊᓪᓚᓂᐊᕐᓂᒥᒃ, ᐊᓪᓚᓂᕐᒥᒃ, ᐅᖃᐅᓯᕐᒥᓗ ᐱᒋᐅᕐᓴᐅᑎᓂᒃ. ᐱᕙᓪᓕᐊᑎᑦᓯᓂᖅ ᐃᓗᓕᖃᕐᓂᓴᒥᒃ ᖃᐅᔨᒪᓂᕐᒥᒃ ᐃᓄᒃᑎᑑᕐᓂᐅᑉ ᐋᕐᕿᓯᒪᒍᓯᖓᓂᒃ ᒪᓕᒐᖏᓐᓂᓗ. ᑐᑭᓯᒪᓂᖅ ᐊᕕᑦᑐᓯᒪᓂᕐᓂᒃ ᖃᓄᐃᑦᑑᓂᖏᓐᓂᓗ ᐃᓄᒃᑎᑑᕐᓂᐅᑉ ᐅᖃᐅᓯᖓᑕ. ᐱᐅᓯᒋᐊᖁᓗᒍ ᐱᒋᐅᕐᓴᓂᖅ ᐊᑐᕐᓂᒥᒃ ᐃᓄᒃᑎᑐᑦ ᐊᓪᓚᕈᓯᕐᒥᒃ ᖃᓂᐅᔮᕐᐯᑎᑐᑦ. ᑲᓱᑦᑎᓯᒍᓐᓇᓗᓂ ᐃᓱᒪᒋᔭᐅᔪᓂᒃ ᐊᑑᑎᓗᓂ ᖃᐅᔨᒪᓂᖃᑦᓯᐊᓗᓂ ᐅᖃᐅᓯᐅᑉ ᐋᕐᕿᓯᒪᒍᓯᖓᓂᒃ. ᐱᕈᕐᐸᓕᐊᑎᑦᓯᒍᒪᓂᕐᒧᑦ ᐅᐱᒋᔭᖃᕐᓂᒥᒃ ᐃᓄᒃᑎᑐᑦ ᐅᖃᐅᓯᕐᒥᒃ ᑐᓴᐅᒪᖃᑎᒌᓪᓗᓂ ᐊᑐᕐᑕᐅᒍᓐᓇᓗᓂ ᓇᐅᒃᑯᓕᒫᖅ ᐃᓅᓯᕐᒥ, ᐱᓗᐊᕐᑐᒥᒃ ᐃᓕᓐᓂᐊᑎᑕᐅᖃᑦᑕᓂᕐᒧᑦ ᐃᓕᓐᓂᐊᑎᑕᐅᒍᑎᓕᐊᖑᓯᒪᔪᓂᒃ ᐃᓕᓐᓂᐊᕕᒻᒥ ᐃᓕᓐᓂᐊᕈᑕᐅᕙᑦᑐᓂᒃ.

______

• EDU1426 – ᐃᓕᑦᓯᕙᓪᓕᐊᓂᕐᒧᑦ ᐊᑑᑎᔭᐅᒋᐊᓖᑦ ᐃᓕᓐᓂᐊᕈᑎᑦᓴᓕᐅᕐᓂᒧᓪᓗ (3 ᖁᕝᕙᒋᐊᕈᑏᑦ)

ᐃᓄᐃᑦ ᐃᓕᓐᓂᐊᑎᖏᑦ ᖃᐅᔨᒪᓂᕐᑖᓚᖓᓗᑎᑦ ᐊᑦᔨᒌᖕᖏᑐᓂ ᐃᓕᓐᓂᐊᑎᑦᓯᓃᑦ ᖃᓄᐃᓕᖓᓂᖏᓐᓂᑦ, ᐃᓕᓐᓂᐊᕈᑎᑦᓴᓕᐅᕐᓂᐅᑉ ᖃᓄᐃᓘᕈᓯᖏᓐᓂᑦ, ᐃᓕᓐᓂᐊᑎᑦᓯᒍᓯᐅᓚᖓᔪᓂᑦ, ᖃᓄᐃᓘᕈᓯᕐᓂᓗ (ᓱᓇᓂᑦ ᐊᑑᑎᓲᖑᓂᖏᓐᓂᑦ) ᐃᓚᐅᑎᓗᒋᑦ ᐃᓄᐃᑦ ᐱᐅᓯᑐᖃᖏᑦ ᐃᓕᓐᓂᐊᑎᑦᓯᓂᕐᒧᑦ ᐱᐊᕋᕐᓂᒃ. ᑐᕌᒐᖃᕈᑕᐅᑦᓱᓂ ᑐᑭᓯᒪᒍᒪᓂᕐᒥᒃ ᖃᓄᖅ ᓇᒧᖕᖓᒋᐊᖃᕐᒪᖔᑕ ᓈᒻᒪᓈᕐᑐᓂᒃ ᖃᐅᔨᒪᔭᓂᒃ ᐱᐊᕋᐅᑉ ᐱᕈᕐᐸᓕᐊᓂᖓᓂᒃ ᐊᒻᒪᓗ ᐃᓕᑦᓯᕙᓪᓕᐊᓂᖓᓂᒃ ᑐᑭᓯᓴᒋᐊᓪᓚᒐᓱᐊᕐᓗᒋᑦ ᐊᒻᒪᓗ ᑐᑭᓯᓴᕈᑎᒋᓗᒋᑦ ᐃᓅᓯᕐᒨᓕᖓᔪᑦ ᖃᓄᐃᑦᑐᑰᕈᑎᐅᔪᑦ. ᑐᑭᓯᒪᓗᓂ ᐊᒻᒪᓗ ᐱᒋᐅᕐᓴᓂᐅᔪᓂ ᐃᓕᑦᓯᒪᒍᑎᓂᒃ ᐅᕝᕙᓘᓐᓃᑦ ᐱᓂᐊᕐᓂᐅᔪᓂᒃ ᑐᖕᖓᕕᐅᓯᒪᔪᓂᒃ ᐃᑲᔪᕐᓯᓚᖓᔪᓂᒃ ᐊᒻᒪᓗ ᓴᐳᑦᔨᓚᖓᔪᓂᒃ ᐃᓕᓐᓂᐊᑎᐅᑉ ᐃᓕᑦᓯᕙᓪᓕᐊᓂᖓᓂᒃ. ᑐᑭᓯᓴᒋᐊᕐᓗᒍ ᒫᓐᓇ ᐱᑐᑦᓯᒪᒍᓯᖏᓐᓂᒃ ᐊᑐᕐᑕᐅᓲᑦ ᐃᓕᓭᓃᑦ ᐊᒻᒪᓗ ᐃᓕᓐᓂᐊᑎᐅᑉ ᐃᓕᑦᓯᕙᓪᓕᐊᓂᖓᑕ ᐱᓇᓱᐊᕐᑕᐅᒍᓯᖓ ᐊᒻᒪᓗ ᖃᓄᐃᓕᖓᓕᕐᓂᖓ. ᐱᔪᓐᓇᓂᕐᑖᐸᓪᓕᐊᓂᒃᑯᑦ ᓇᓪᓕᑳᕐᓯᒪᓂᕐᒥᒃ ᐃᓕᓐᓂᐊᑎᑦᓯᒍᑎᑦᓯᐊᓂᒃ ᐃᓕᓐᓂᐊᑎᑦᓯᒍᑎᐅᒍᓐᓇᑐᓂᓪᓗ ᖃᓄᖅ ᐃᓕᓐᓂᐊᑎᐅᑉ ᑭᖕᖒᒪᒋᔭᖏᑦ ᒪᓕᓪᓗᒋᑦ.

ᐅᑯᐊᑕᒐ ᐃᓕᓐᓂᐊᕈᑎᑦᓭᑦ ᐊᑐᐃᓐᓇᐅᑎᑕᐅᔪᑦ ᑐᖓᓕᐊᓂ ᐃᓕᓐᓂᐊᓇᕐᒥ ᐊᕐᕌᒍᕐᒥ ᓯᕗᓪᓕᐹᒥ:

• EDU1439 – ᐸᕐᓀᓂᖅ ᐊᑐᐃᓐᓇᕈᕐᑎᕆᓂᕐᓗ ᐃᓕᓐᓂᐊᑎᑦᓯᒍᑎᑦᓴᓂᒃ (3 ᖁᕝᕙᒋᐊᕈᑏᑦ)

ᐃᓄᐃᑦ ᐃᓕᓐᓂᐊᑎᖏᑦ ᖃᐅᔨᒪᓂᕐᑖᓯᒪᒋᐊᖃᕐᓂᖏᑦ ᐃᓕᓐᓂᐊᑎᑦᓯᒍᑎᒋᓗᒋᑦ ᐃᓂᓪᓚᖓᐅᑎᐅᒍᓐᓇᑐᓂᒃ ᐸᕐᓇᑕᐅᒍᓯᐅᓲᓂᒃ ᐃᓱᒪᒋᔭᖃᕈᓐᓇᓂᕐᓂᒃ, ᐊᐅᓚᑦᓯᒍᑎᐅᓲᓂᓪᓗ ᐃᓕᓐᓂᐊᕕᒻᒥ ᐃᓕᓐᓂᐊᑎᑦᓯᒍᑎᖃᕐᓗᑎᒃ, ᖃᐅᔨᓴᕈᑎᒋᓗᒋᓪᓗ ᐊᑐᕐᓂᖏᓐᓂᒃ. ᐊᑐᕈᓐᓇᓯᓚᖓᓗᓂ ᐃᓕᑦᓯᔭᕕᓂᕐᒥᓂᒃ ᐱᓇᓱᐊᕐᑎᓯᒍᑎᑦᓴᓕᐅᕐᓂᒧᑦ, ᐃᓕᓐᓂᐊᑎᑦᓯᕕᒻᒥᓂ, ᕿᒥᕐᕈᓂᕐᒧᓗ.

______

• STA1430 – ᐱᒋᐅᕐᓴᓂᖅ I: ᖃᐅᔨᑎᑦᓯᒍᑏᑦ ᐃᓕᓐᓂᐊᓂᓕᕆᓂᕐᒧᑦ ᐃᓄᐃᑦ ᖃᓄᐃᓕᖓᓂᖏᑎᒍᑦ (3 ᖁᕝᕙᒋᐊᕈᑏᑦ)

ᐃᓕᑦᓯᓕᐅᒥᓗᑎᑦ ᐊᑦᔨᒌᖕᖏᑐᓂᒃ ᐃᓕᓐᓂᐊᑎᑦᓯᔨᐅᓂᕐᒧᑦ ᐱᓇᓱᐊᕆᐊᓕᓐᓂᒃ. ᖃᐅᔨᒪᓂᕐᒧᑦ ᐱᒋᐊᕐᓗᓂ ᖃᐅᔨᓴᕈᓐᓇᓂᕐᒥᒃ ᐃᓕᓐᓂᐊᑎᑦᓯᓂᕆᔭᕐᒥᓂᒃ. ᐱᕙᓪᓕᐊᑎᑦᓯᓂᖅ ᐃᓕᓐᓂᐊᑎᑦᓯᓂᐅᑉ ᕿᒥᕐᕈᔭᐅᓂᖓᓂᒃ ᖃᐅᔨᓴᕐᓂᒧᑦ ᐱᒋᐅᕐᓴᐅᑎᓂᒃ ᐊᑐᓕᕐᑎᑕᐅᓗᑎᓪᓗ ᐊᑑᑎᓪᓚᕆᑦᑐᓂᒃ ᐃᓕᓐᓂᐊᑎᑦᓯᓂᕐᒥᒃ ᐃᓕᓐᓂᐊᑎᑦᓯᕕᒻᒥ, ᐱᓗᐊᕐᑐᒥᒃ ᐃᓄᒃᑎᑐᑦ ᐃᓕᓐᓂᐊᑎᑦᓯᒋᐅᕐᓴᑐᓂᒃ. ᐅᖃᐅᓯᕆᒋᐊᓪᓚᓗᒋᑦ ᐃᓕᓭᒍᑎᓄᑦ-ᐃᓕᓐᓂᐊᓂᕐᒧᑦ ᖃᓄᐃᓕᖓᒍᑎᓂᒃ ᐱᕙᓪᓕᐊᒍᑎᖃᕐᓗᑎᒃ ᐊᒻᒪᓗ/ᐅᕝᕙᓘᓐᓃᑦ ᐆᑦᑐᕋᕐᓗᑎᒃ ᐊᒻᒪᓗ ᐋᕐᕿᒋᐊᕐᓗᑎᒃ ᐃᓕᓭᒍᑎᓄᑦ-ᐃᓕᓐᓂᐊᓂᕐᒧᑦ ᐃᓕᓐᓂᐊᕈᑎᑦᓴᓂᒃ.

______

• DID1441 – ᐃᓕᓐᓂᐊᑎᑦᓯᓂᖅ ᐊᒻᒪᓗ ᐃᓕᑦᓯᓂᖅ ᑭᓯᑦᓯᒍᑎᑐᐃᓐᓇᓕᕆᓂᕐᒥᒃ ᑭᓯᑦᓯᑎᓐᓂᐊᓂᕐᒥᓗ (3 ᖁᕝᕙᒋᐊᕈᑏᑦ)

ᑐᓴᕐᑎᓯᒋᐊᖕᖓᓂᖅ ᐃᓘᓐᓈᒍᑦ ᐊᕙᑎᒥᒃ ᐃᓕᓐᓂᐊᑎᑦᓯᓂᕐᒥᒃ ᑭᓯᑦᓯᒍᑎᓂᒃ ᐃᓚᒋᓕᐅᑎᓪᓗᒍ ᐃᓗᕐᖁᓯᐅᑉ, ᐃᓄᖕᓂᒃ, ᐊᒻᒪᓗ ᐃᓄᐃᑦ ᐱᕙᓪᓕᐊᓯᒪᓂᖏᓐᓄᑦ ᐱᓇᓱᐊᕐᑕᐅᔪᓂᒃ. ᐱᕕᖃᕐᑎᑦᓗᒍ ᐃᓕᓐᓂᐊᑎᒃ ᑲᑎᑎᑦᓯᒍᓐᓇᓗᓂ ᑐᑭᓯᐅᒪᓂᖏᓐᓂᒃ ᐱᔪᓐᓇᓂᕆᔭᖏᓐᓂᓗ ᑭᓯᑦᓯᑎᓐᓂᐊᓂᕐᒥᒃ (ᑭᓯᑦᓯᒍᑎᑐᐃᓐᓀᑦ ᑭᓯᑦᓯᑎᓐᓂᐊᓂᕐᒥᓗ) ᐊᒻᒪᓗ ᐅᖃᕐᑕᐅᒍᓯᖏᓪᓗ ᐊᓪᓚᓯᒪᔪᑦ ᐊᑎᖏᑦ. ᑐᑭᓯᒪᓂᖅ ᐱᓀᓗᑕᓂᒃ-ᐋᕐᕿᓱᐃᓂᖅ ᐱᒋᐅᕐᓴᓂᕐᒧᑦ ᐱᔪᓐᓇᕈᑎᓂᒃ ᑖᒃᑯᓄᖓ ᑭᓯᑦᓯᒍᑎᓐᓄᐊᓕᖓᔪᓄᑦ ᐱᓇᓱᐊᕐᑕᐅᓂᕐᒧᑦ ᐊᒻᒪᓗ ᐃᓕᑦᓯᕙᓪᓕᐊᓂᕐᒧᑦ ᑭᓯᑦᓯᒍᑎᓐᓂᐊᓂᕐᒥᒃ (ᑭᓯᑦᓯᑎᓐᓂᐊᓃᑦ ᑭᓯᑦᓯᕈᑎᓕᒫᓕᕆᓃᓪᓗ). ᐱᔪᓐᓇᕈᑎᑖᕐᓗᑎᒃ ᐋᕐᖀᓂᕐᒥᒃ, ᐆᑦᑐᕋᐅᑎᓂᒃ, ᐊᒻᒪᓗ ᕿᒥᕐᕈᓂᕐᒥᒃ ᐃᓕᓐᓂᑎᑦᓯᓂᕐᒨᓕᖓᔪᓂᒃ ᐃᓕᓐᓂᐊᑎᑦᓯᒍᑎᐅᔪᓂᒃ ᐃᓕᓭᒍᑎᑦᓴᖏᓐᓄᑦ ᑕᒪᑐᒪ ᐃᓕᓐᓂᐊᕈᑎᐅᑉ, ᐅᖄᔭᐅᓯᒪᔪᑎᒍᑦ ᐃᓕᓐᓂᐊᒋᐊᓯᓚᐅᕐᑎᓇᒋᑦ ᐳᒃᑭᓂᕐᓴᒥᓄᑦ ᐃᓕᓐᓂᐊᕕᖕᒥ, ᑐᑭᖃᑦᓯᐊᑐᒥᒃ ᐃᓗᓕᓕᓐᓂᒃ ᐃᓕᓐᓂᐊᕈᓐᓇᖁᓗᒋᑦ ᐃᓄᓐᓄᑦ ᐃᓕᓐᓂᐊᑎᓄᑦ. ᑐᑭᓯᒪᓂᕐᓴᐅᓂᕐᒧᑦ ᐱᓇᓱᐊᕆᐊᓕᒻᒥᓂᒃ ᐃᓕᓭᔨᐅᓂᕐᒥᓂᓪᓗ ᐃᓕᓐᓂᐊᑎᓂᒃ ᐃᓕᑦᓯᕙᓪᓕᐊᓂᖓᓅᓕᖓᔪᓂᒃ. ᐱᕙᓪᓕᐊᑎᑦᓯᓂᖅ ᐃᓕᓐᓂᐊᑎᑦᓯᒍᑎᐅᔪᓂᒃ ᐊᑦᔨᒌᖕᖏᑐᓂᒃ ᐃᓕᓐᓂᐊᑎᑦᓯᒍᑎᑦᓴᓕᐅᕐᓂᒥᒃ ᐱᔪᑦᓴᐅᔮᕐᑎᓯᒍᑎᐅᓂᐊᕐᑐᓂᒃ ᐃᓄᐃᑦ ᐃᓕᓐᓂᐊᑎᖏᑦᑕ ᐃᓕᑦᓯᕙᓪᓕᐊᕈᑎᑦᓴᖏᓐᓂᒃ. ᖃᐅᔨᒪᓕᕐᓗᓂ ᑐᖕᖓᕕᖏᓐᓂᒃ ᐃᓂᓪᓚᖓᐅᑎᖓᓂᓪᓗ ᑭᓯᑦᓯᒍᑎᓐᓂᐊᓂᐅᑉ ᐃᓕᓐᓂᐊᑎᑦᓯᒍᑎᑦᓴᖏᓐᓂᒃ ᐃᓕᑦᓯᒋᐊᓪᓚᓗᓂ ᒫᓐᓇ ᐃᓕᓐᓂᐊᑕᐅᔪᒥᒃ ᐃᓕᓐᓂᐊᑎᑦᓯᓂᒃᑯᑦ ᑕᑯᓐᓇᑕᐅᔪᒃᑯᑦ. ᖃᐅᔨᒋᐊᕐᓗᓂ ᖃᐅᔨᓴᕐᓂᒥᒃ ᐃᓕᓐᓂᐊᑎᐅᑉ ᐃᓕᑦᓯᕙᓪᓕᐊᓂᖓᓂᒃ.

______

• LIN1342 – ᓯᕗᓪᓕᐹᒥᒃ ᐅᖃᐅᓯᕐᑖᓂᖅ (3 ᖁᕝᕙᒋᐊᕈᑏᑦ)

ᐃᓄᐃᑦ ᐃᓕᓐᓂᐊᑏᑦ ᐃᓂᓪᓚᑎᕐᑕᐅᑎᓗᒋᑦ ᑐᑭᓯᒪᒍᑎᑦᓴᖏᓐᓂᒃ ᐃᓕᑦᓯᒪᓕᕐᐸᓕᐊᖁᓗᒋᑦ ᐃᓕᖓᔪᓂᒃ ᐅᖃᐅᓯᐅᑉ ᐱᕙᓪᓕᐊᓂᕆᒋᐊᓕᖓᓂᒃ ᒪᕐᕉᓂᒃ ᐅᖃᐅᓯᖃᖃᑎᒌᒍᑎᖃᕐᓱᑎᒃ.

ᐅᑯᐊᑕᒐ ᐃᓕᓐᓂᐊᕈᑎᑦᓭᑦ ᐊᑐᐃᓐᓇᐅᑎᑕᐅᔪᑦ ᐱᖓᔪᖓᓐᓂ ᐃᓕᓐᓂᐊᓇᕐᒥ ᐊᕐᕌᒍᕐᒥ ᓯᕗᓪᓕᐹᒥ:

• EDU2344 – ᓄᓇᕕᒻᒥ ᐃᓗᕐᖁᓯᖃᑎᒌᖕᖏᑐᓄᑦ ᐃᓕᓐᓂᐊᕖᑦ ᐃᓂᓪᓚᖓᓂᖏᑦ ᐊᒻᒪᓗ ᐃᓕᓐᓂᐊᓂᓕᕆᓂᐅᑉ ᐊᑐᕐᑕᐅᓂᖓ ᑯᐯᒻᒥ (3 ᖁᕝᕙᒋᐊᕈᑏᑦ)

ᖃᐅᔨᒪᓕᕐᓗᓂ ᐃᓱᒪᒋᔭᐅᓂᖓᓂᒃ ᐃᓕᓐᓂᐊᕕᒃ ᐃᓄᓕᕆᓂᕐᒧᑦ ᑲᑐᑦᔨᖃᑎᒌᖑᓂᖓᓂᒃ ᐱᓇᓱᕝᕕᐅᓂᖓᓂᓗ ᐃᓕᓐᓂᐊᓂᓕᕆᓂᕐᒧᑦ. ᐃᓕᑦᓯᒋᐊᓪᓚᕕᖃᕐᓂᖅ ᐃᓕᓐᓂᐊᓂᓕᕆᓂᐅᑉ ᐋᕐᕿᓯᒪᐅᑎᖏᓐᓂᒃ ᐅᑭᐅᕐᑕᑐᓕᒫᒥ. ᖃᐅᔨᒪᓂᖅ ᐃᓕᓐᓂᐊᓂᓕᕆᓂᐅᑉ ᐋᕐᕿᓯᒪᒍᓯᖓᓂᒃ ᑯᐯᒻᒥ ᓄᓇᕕᒻᒥᓗ. ᑐᑭᓯᒍᒪᓂᕐᒧᑦ ᐱᐅᓯᕆᔭᐅᕆᕙᓚᐅᕐᑐᓂᒃ ᐃᓕᓐᓂᐊᓂᓕᕆᓂᐅᑉ ᓄᓇᖃᕐᖄᓯᒪᔪᓄᑦ. ᑐᑭᓯᒪᓂᕐᒧᑦ ᐅᖃᐅᓯᒋᓗᒍᓗ ᐊᓯᑦᔨᓯᒪᓂᖓᓂᒃ ᐃᓕᓴᕐᓂᓕᕆᓂᐅᑉ ᐱᒍᑦᔨᓂᖓᑕ ᓄᓇᓕᓐᓂ, ᐃᓗᕐᖁᓯᖃᖃᑎᒌᖕᖏᑐᓂᒃ.

______

• ARP1741 – ᖃᐅᔨᒪᔭᐅᒋᐊᖃᓪᓚᕆᑦᑐᖅ ᕿᓪᓕᑐᓂᒃ ᓴᓇᖕᖑᐊᓂᖅᓄᓇᕕᖕᒥ ᐃᓕᓐᓂᐊᕆᐊᖕᖓᑐᓄᑦ ᐳᒃᑭᓂᕐᓴᒥᓪᓗ ᐃᓕᓐᓂᐊᑎᓄᑦ (3 ᖁᕝᕙᒋᐊᕈᑏᑦ)

ᐃᓄᐃᑦ ᐃᓕᓐᓂᐊᑏᑦ ᖃᐅᔨᒪᓂᕐᑖᑎᑕᐅᖃᑦᑕᓂᐊᕐᒪᑕ ᐱᒍᓐᓇᓯᓂᕐᒧᑦ ᐱᔪᓐᓇᐅᑎᑖᕐᓗᑎᒃ ᓯᕗᓂᕐᒥ ᐃᓕᓐᓂᐊᕕᓐᓂ ᐃᓕᓭᔨᐅᓛᕐᑐᓄᑦ ᓴᓇᖕᖑᐊᓂᕐᒥᒃ ᐱᐅᔪᓕᐅᕐᓂᒥᓪᓗ ᐱᓇᓱᐊᕈᑎᖃᕐᓗᑎᒃ. ᐃᓕᓐᓂᐊᑎᑕᐅᓗᑎᒃ ᓴᓇᕐᖁᑎᖃᕐᑎᑕᐅᓗᑎᓗ ᐃᓕᓐᓂᐊᑏᑦ ᓯᕗᓂᑦᓴᑎᓐᓂ ᑐᓂᓯᒐᔭᕐᒥᒪᑕ ᐃᓕᓐᓂᐊᑎᑦᓯᓗᑎᒃ ᓴᓇᖕᖑᐊᓂᕐᒧᑦ ᐃᓗᕐᖁᓯᕐᒥᒃ.

ᐊᓪᓚᑕᐅᒪᔪᑦ ᐃᓕᓐᓂᐊᒉᑦ ᐊᑐᐃᓐᓇᐅᑎᑕᐅᔪᑦ ᐃᓕᓐᓂᐊᓇᐅᑉ ᓯᕗᓪᓕᐹᖓᓂ ᐊᕐᕌᒍᖓᑕ ᐁᑉᐸᖓᓂ:

• DID1443 – ᐃᓕᓐᓂᐊᑎᑦᓯᓂᖅ ᐊᒻᒪᓗ ᐃᓕᑦᓯᓂᖅ ᓴᓇᒻᒪᓕᕆᓂᕐᒥᒃ ᐊᒻᒪᓗ ᓱᕐᖄᑎᕆᓂᕐᒥᒃ (3 ᖁᕝᕙᒋᐊᕈᑏᑦ)

ᑐᑭᓯᓂᕐᓴᐅᖁᓪᓗᒋᑦ ᑭᓇᑐᐃᓐᓇᐅᑉ ᐱᓇᓱᓐᓂᕆᔭᖏᓐᓂᒃ ᐃᓕᓐᓂᐊᑎᑦᓯᓂᕐᒧᓗ ᐃᓕᓐᓂᐊᑏᓪᓗ ᐃᓕᓐᓂᐊᓂᖏᓐᓂᒃ, ᐃᓚᓕᐅᑦᔨᒍᓐᓇᓗᑎᒃ ᐃᓕᕐᖁᓯᕆᔭᐅᔪᓂᒃ, ᐃᓄᖕᓂᒃ, ᐊᒻᒪᓗ ᐊᑐᕐᑕᑕᐅᓲᑐᖃᕐᒥᒃ ᑭᓯᑦᓯᑎᓐᓂᐊᓂᕐᒥᒃ. ᑲᑎᑎᑦᓯᒍᓐᓇᖁᓗᒍ ᐃᓕᓐᓂᐊᑎᒃ ᑐᑭᓯᒪᓂᖏᓐᓂᒃ ᐱᔪᓐᓇᓂᖏᓐᓂᓗ ᐃᓘᓐᓇᖏᓐᓂᒃ ᐃᓱᒪᒋᔭᖏᓐᓂᒃ ᓴᓇᒻᒪᓕᕆᓂᕐᒨᓕᖓᔪᓂᒃ ᓱᕐᖄᑎᕆᓂᕐᒨᔪᓂᓪᓗ. ᑐᑭᓯᓕᐅᒥᒋᐊᕐᓗᑎᒃ ᐱᓀᓗᑕᐅᔪᓂᒃ ᐋᕐᕿᓱᐃᓂᕐᒧᑦ ᐱᕙᓪᓕᐊᓂᖓᓄᑦ ᑭᓯᑦᓯᑎᓐᓂᐊᓂᕐᒥᒃ ᓴᓇᒻᒪᓕᕆᓂᕐᒨᖓᔪᓂᓪᓗ ᓱᕐᖄᑎᕆᓂᕐᒥᓗ.  ᐱᔪᓐᓇᕈᑎᑖᕐᓗᑎᒃ ᐋᕐᖀᓂᕐᒥᒃ, ᐆᑦᑐᕋᐅᑎᓂᒃ, ᐊᒻᒪᓗ ᕿᒥᕐᕈᓂᕐᒥᒃ ᐃᓕᓐᓂᑎᑦᓯᓂᕐᒨᓕᖓᔪᓂᒃ ᐃᓕᓐᓂᐊᑎᑦᓯᒍᑎᐅᔪᓂᒃ ᐃᓕᓭᒍᑎᑦᓴᖏᓐᓄᑦ ᑕᒪᑐᒪ ᐃᓕᓐᓂᐊᕈᑎᐅᑉ, ᐋᕐᕿᓯᒪᓂᖏᑦ ᓴᓇᒻᒪᓕᕆᐅᑏᑦ ᐊᒻᒪᓗ ᓱᕐᖄᑎᕆᓃᑦ ᐃᓕᓐᓂᐊᑎᑕᐅᓲᑦ ᐃᓕᓐᓂᐊᕆᐊᖕᖓᑐᓄᑦ ᐊᒻᒪᓗ ᐳᒃᑭᓂᕐᓴᒥᒃ ᐃᓕᓐᓂᐊᑎᓄᑦ. ᐱᔪᓐᓇᓂᕐᑖᑎᓗᒍ ᐃᓕᓐᓂᐊᑎ ᐃᓕᓐᓂᐊᑎᑦᓯᒍᓐᓇᓗᓂ ᐃᓗᓕᕐᑕᖏᓐᓂᒃ ᑖᑦᓱᒪ ᐃᓕᓐᓂᐊᕋᑦᓴᐅᑉ, ᐃᓄᒃᑎᑐᑦ, ᐃᓕᓐᓂᐊᕆᐊᖕᖓᑐᓂᒃ ᐃᓕᓐᓂᐊᕕᓐᓂ ᐳᒃᑭᓂᕐᓴᓂᓪᓗ. ᐋᕐᕿᒋᐊᕐᑕᐅᖁᓗᒋᑦ ᑐᑭᓯᒪᓂᖏᑦ ᑐᑭᓕᐅᕆᒋᐊᕐᓗᑎᓗ ᐊᓪᓚᓯᒪᔪᓂᒃ ᐱᓇᓱᐊᕐᑕᐅᔪᓂᓪᓗ ᐃᓕᓐᓂᐊᑎᑦᓯᓂᕐᒧᑦ ᐃᓕᖓᔪᓂᒃ. ᑲᑎᕐᓱᓗᒋᑦ ᐱᔪᓐᓇᓂᕆᔭᐅᔪᑦ ᖃᐅᔨᓴᕐᓗᒋᑦ ᐃᓄᐃᑦ ᐃᓕᓐᓂᐊᑏᑦ ᐃᓕᑦᓯᕙᓪᓕᐊᓂᖏᑦ.

______

• EDU2345 – ᐋᕐᕿᓱᐃᓂᖅ ᐃᓕᓐᓂᐊᑎᑦᓯᓂᕐᒥᒃ ᐃᓕᓐᓂᐊᕆᐊᖕᖓᑐᓄᑦ (3 ᖁᕝᕙᒋᐊᕈᑏᑦ)

ᐱᑎᑦᓯᓲᖑᕗᒍᑦ ᐃᓄᖕᓂᒃ ᐃᓕᓐᓂᐊᑎᓂᒃ ᖃᐅᔨᒪᓂᐅᔪᓂᒃ ᑐᑭᓯᑎᓗᒋᑦ ᐋᕐᑭᓱᐃᒍᓐᓇᖁᓪᓗᒋᑦ ᐱᕙᓪᓕᐊᓂᕐᒧᑦ ᐊᑐᕐᑕᐅᒍᓐᓇᑐᓂᒃ, ᐃᓕᓐᓂᐊᕐᓂᐅᑉ ᐱᐅᓂᖓᓂᒃ ᐃᓕᓐᓂᐊᒋᐊᖕᖓᑐᓄᑦ ᐃᓕᓐᓂᐊᑕᐅᔪᑦᓴᓂᒃ, ᐃᓚᓕᐅᑎᓯᒪᓂᕐᒥᒃ ᑐᑭᓯᒪᓂᕐᒥᒃ, ᐃᓚᓕᐅᑦᔨᓯᒪᓂᕐᒥᒃ ᐊᑐᕐᑕᐅᒍᓐᓇᑐᓂᒃ ᐊᒻᒪᓗ ᑐᖕᖓᓱᑦᑎᓯᓂᕐᒥᓗ ᐊᑦᔨᒌᖕᖏᑐᓂᒃ. ᐱᕙᓪᓕᐊᑎᑦᓯᓗᓂ ᐱᔪᓐᓇᓂᕐᒥᒃ ᐋᕐᕿᓱᐃᓗᓂ ᓇᔪᕐᑕᐅᖃᑦᑕᑐᓂᒃ ᐃᓕᓐᓂᐊᕕᐅᑉ ᐃᓗᐊᓂ ᐊᒻᒪᓗ ᐸᕐᓇᐃᓂᕐᒥᒃ ᐃᓗᕐᖁᓯᓕᕆᓂᕐᒧᑦ ᐃᓕᓐᓂᐊᓂᐅᕙᑦᑐᓂᒃ. ᖃᐅᔨᒪᔭᖃᑦᓯᐊᓂᖅ ᐃᑲᔪᕐᑎᒌᓐᓂᒥᒃ ᐃᓚᒌᓂ ᐊᒻᒪᓗ ᓄᓇᓕᖃᑎᒌᓐᓂᒥᒃ. ᐃᓕᑦᓯᒋᐊᓪᓚᓂᖅ ᐃᓕᓐᓂᐊᑎᑦᓯᒍᑎᓂᒃ ᐃᓕᓐᓂᐊᕆᐊᖕᖓᑐᓂᒃ ᐃᓕᓐᓂᐊᑎᑦᓯᓂᕐᒧᑦ. ᓇᒻᒥᓂᖃᓂᐊᕐᓗᑎᑦ ᐃᓕᓐᓂᐊᕆᐊᖓᑐᓄᑦ ᐃᓕᓐᓂᐊᕈᑎᓂᒃ ᓄᓇᕕᒻᒥ, ᑯᐯᒻᒥ, ᐊᓯᖏᓐᓂᓗ ᓄᓇᖃᕐᕕᐅᔪᓂᑦ. ᐱᒋᐊᕐᑎᓯᓗᑎᑦ ᓴᓇᓂᕐᒥᒃ ᐱᔪᓐᓇᐅᑎᓕᒻᒥᒃ ᐃᓕᑕᕐᓯᓂᖃᕐᑎᓗᒍ ᐃᓕᓐᓂᐊᕆᐊᖕᖓᑐᓂᒃ ᐃᓕᓭᔨᐅᓂᕐᒥᒃ.

______

• DID1641 – ᐃᓕᓐᓂᐊᑎᑦᓯᓃᑦ ᐊᒻᒪᓗ ᐃᓕᑦᓯᕙᓪᓕᐊᓂᖅ ᓱᑯᐃᔦᓂᕐᓂᒃ ᐱᓪᓗᑯᒋᐊᓕᓕᕆᓂᕐᒥᓗ ᓄᓇᕕᒻᒥ ᐃᓕᓐᓂᐊᕕᓐᓂ ᐃᓕᓐᓂᐊᕆᐊᖕᖓᑐᓂᒃ ᐳᒃᑭᓂᕐᓴᒥᓪᓗ (3 ᖁᕝᕙᒋᐊᕈᑏᑦ)

ᐃᓄᓐᓂᒃ ᐃᓕᓐᓂᐊᑎᓂᒃ ᐱᑕᖃᕐᑎᓯᓂᖅ ᖃᐅᔨᒪᓂᕐᓂᒃ ᐱᕙᓪᓕᐊᒍᑎᑦᓴᓂᒃ ᐱᔪᓐᓇᐅᑎᑖᕐᐸᓕᐊᒍᑎᑦᓴᓂᒃ ᐱᒋᐅᕐᓴᑎᑕᐅᒍᑎᑦᓴᓂᓪᓗ ᐊᒻᒪᓗ ᐱᑕᖃᕐᑎᓯᓂᖅ ᐱᐅᒃᑯᑎᓂᒃ ᖃᐅᔨᒪᐅᑎᑦᓴᓂᒃ ᐊᒻᒪᓗ ᐱᐅᓯᐅᓲᓂᒃ ᑐᕌᕐᓂᖏᑦ ᐃᓕᑦᓯᕙᓪᓕᐊᒍᑎᑦᓭᑦ ᐊᒻᒪᓗ ᐃᓕᓐᓂᐊᑎᑦᓯᒍᑎᑦᓭᑦ ᓱᑯᐃᔦᓂᕐᒥᒃ ᐊᒻᒪᓗ ᐱᓪᓗᑯᒋᐊᓕᓕᕆᓂᕐᒥᒃ ᐳᒃᑭᓂᕐᓴᓃᑦᑐᓂᒃ ᐃᓕᓐᓂᐊᕕᓐᓂ, ᐊᒻᒪᓗ ᐃᑉᐱᒍᓱᓕᕐᑎᓯᓂᖅ ᐃᓗᕐᕈᓯᕐᒥᒃ ᐃᓅᖃᑎᒌᓐᓂᒥᓪᓗ ᐱᑦᔪᑎᐅᔪᓂᒃ ᓱᑯᐃᔦᓂᕐᒥ ᐱᓪᓗᑯᒋᐊᓕᓕᕆᓂᕐᒥᓗ ᐅᓪᓗᑕᒫᕐᓯᐅᑎᓂ. ᐱᕙᓪᓕᐊᑎᑦᓯᓗᑎᑦ ᐃᑉᐱᒋᔭᖃᕐᓂᒥᒃ ᓱᑯᐃᔦᓂᕐᒨᓕᖓᔪᓂᒃ ᐱᓪᓗᑯᒋᐊᓕᓕᕆᓂᕐᒨᓕᖓᔪᓂᓗ ᐃᓕᓐᓂᐊᕈᑎᑦᓴᓂᑦ ᐃᓕᓐᓂᐊᕕᒻᒥ ᐳᒃᑭᓂᕐᓴᒥ ᐃᑲᔪᕐᓯᓗᑎᑦ ᐱᐊᕋᕐᓂᒃ. ᐃᓕᑦᓯᓂᖅ ᖃᓄᖅ ᐋᕐᕿᓱᐃᓲᖑᓂᕐᒥᒃ ᐊᑐᓕᕐᑎᓯᓲᖑᓂᕐᒥᓗ ᐃᓕᓐᓂᐊᑎᑦᓯᒍᑎᓂᒃ-ᐃᓕᑦᓯᔭᐅᒍᑎᓂᒃ ᑐᖕᖓᕕᓕᓐᓂᒃ ᓄᐊᑕᐅᓯᒪᔪᓂᒃ ᓱᑯᐃᔦᓂᕐᒥ ᐱᓪᓗᑯᒋᐊᓕᓕᕆᓂᕐᒥᓗ ᐃᓕᓭᒍᓯᕆᔭᐅᔪᓂᒃ.

______

• DID1343 – ᐊᓪᓚᒍᓐᓇᓂᕐᒥᒃ ᐃᓄᒃᑎᑐᑦ: ᐃᓕᓐᓂᐊᑎᑦᓯᓂᖅ ᐊᒻᒪᓗ ᐃᓕᑦᓯᕙᓪᓕᐊᓂᖅ (3 ᖁᕝᕙᒋᐊᕈᑏᑦ)

ᐃᓄᓐᓂᒃ ᐃᓕᓐᓂᐊᑎᓂᒃ ᐱᑕᖃᕐᑎᓯᓂᖅ ᖃᐅᔨᒪᓂᕐᓂᒃ ᐱᕙᓪᓕᐊᒍᑎᒋᓚᖓᔭᖏᓐᓂᒃ ᐱᐅᓂᕐᐹᓂᒃ ᐊᑐᕐᑕᐅᓲᓂᒃ ᐃᓕᓐᓂᐊᑎᑦᓯᓂᕐᒥᒃ ᐊᓪᓚᒍᓐᓇᓂᕐᒥᒃ ᐃᓕᖓᔪᓂᒃ ᐃᓱᒪᒋᔭᐅᓲᓂᒃ ᐱᐊᕋᐅᑉ ᐃᓱᒪᖓᑕ ᐱᕙᓪᓕᐊᓂᖓᓂᒃ. ᐱᔪᓐᓇᐅᑎᑖᕐᓗᒋᑦ ᐊᑐᕈᓐᓇᑐᓂᒃ ᐊᑐᕐᑕᐅᒍᓐᓇᑐᓂᒃ ᐅᖃᐅᓯᐅᑉ ᐃᓕᓐᓂᐊᑎᑦᓯᒍᑎᖏᓐᓂᒃ, ᐃᓚᐅᑎᓪᓗᒋᑦ ᐊᓪᓚᓂᕐᒥᒃ ᐃᓕᓴᕐᑕᐅᒍᑎᖏᑦ, ᐃᓕᑦᓯᕙᓪᓕᐊᑎᓗᒋᑦ ᐊᑐᐊᕐᓯᓂᕐᒥᒃ ᐅᖃᐅᓯᕐᒥᓗ ᐱᔪᓐᓇᕈᑎᓂᒃ. ᖃᐅᔨᒪᓕᖁᓪᓗᒋᑦ ᐃᓕᓐᓂᐊᕈᑎᒃᓴᓂᒃ ᐃᓱᒪᑦᓴᓯᐅᕈᑎᒋᑦᓯᐊᓗᒋᑦ. ᖃᐅᔨᒪᓕᖁᓗᒋᑦ ᐃᓕᓐᓂᐊᑏᑦ ᐱᔭᓐᓃᓕᐅᓐᓂᖏᓐᓂᒃ ᐊᓪᓚᓂᕐᒥᒃ ᖃᐅᔨᒍᓐᓇᓯᖁᓗᒋᑦ ᐊᒻᒪᓗ ᖃᓄᐃᑦᑐᒦᓐᓂᖏᓐᓂᒃ ᑲᒪᒍᓐᓇᓯᓗᓂ. ᖃᐅᔨᓴᕈᒪᓗᒋᑦ ᐃᓕᓐᐊᑏᑦ ᐃᓕᑦᓯᕙᓪᓂᐊᒥᒋᔭᖏᑦ ᐊᑐᕐᓗᒍᐊᓪᓚᓂᖅ.

ᐊᓪᓚᑕᐅᒪᔪᑦ ᐃᓕᓐᓂᐊᒉᑦ ᐊᑐᐃᓐᓇᐅᑎᑕᐅᔪᑦ ᐃᓕᓐᓂᐊᓇᐅᑉ ᑐᖓᓕᖓᓂ ᐊᕐᕌᒍᖓᑕ ᐁᑉᐸᖓᓂ:

• EDU2340 – ᐃᓕᓐᓂᐊᑎᑦᓯᕕᒻᒥ ᐊᐅᓚᑦᓯᓂᖅ (3 ᖁᕝᕙᒋᐊᕈᑏᑦ)

ᑐᑭᓯᒪᓂᖅ ᖃᓄᖅ ᐃᓕᓐᓂᐊᑎᓂᒃ ᐊᐅᓚᑦᓯᓂᖅ ᐊᓯᑦᔨᓯᒪᓕᕐᒪᖔᑦ. ᖃᐅᔨᒪᓂᖅ ᐊᒻᒪᓗ ᐊᑐᕆᐊᖃᕐᓂᖅ ᐊᑦᔨᒌᖕᖏᑐᓂᒃ ᑲᒪᒋᔭᖃᕐᓂᒧᑦ ᐃᓂᓪᓚᖓᒍᑎᓂᒃ ᐊᒻᒪᓗ ᖃᓄᕐᑑᕈᑎᓂᒃ ᐱᓇᓱᐊᕐᕕᐅᑉ ᐃᓂᓪᓚᖓᒍᓯᖓᓄᑦ ᐃᓕᓐᓂᐊᕕᐅᑉ ᐃᓗᐊᓂ, ᐃᓕᓐᓂᐊᓂᕐᒧᑦ ᐃᓅᖃᑎᒌᓐᓂᒧᓪᓗ ᓴᐳᒻᒥᓂᕐᒧᑦ, ᑲᔪᖏᕐᓭᓂᖅ, ᐊᒻᒪᓗ ᐃᓂᕐᑎᕆᐅᑎᓂᒃ ᐊᐅᓚᑦᓯᓂᖅ.

______

• EDU1425 – ᐃᓕᓐᐊᑏᑦ ᐃᓕᑦᓯᔭᖏᑦᑕ ᖃᐅᔨᓴᕐᑕᐅᒍᑎᖏᑦ (3 ᖁᕝᕙᒋᐊᕈᑏᑦ)

ᐃᓄᐃᑦ ᐃᓕᓐᓂᐊᑏᑦ ᖃᐅᔨᒪᓂᕐᑖᑎᓗᒋᑦ ᑐᑭᓯᒋᐊᓕᖏᓐᓂᒃ ᐱᑦᔪᑎᖏᓐᓂᒃ ᐃᓗᓕᖏᓐᓂᓗ ᖃᐅᔨᓴᕐᑕᐅᓂᕐᒧᑦ ᑭᖑᓪᓕᐹᑦᓯᐅᑎᓂᒃ ᐃᓕᓐᓂᐊᑏᑦ ᐃᓕᑦᓯᕙᓪᓕᐊᔭᖏᓐᓂᒃ. ᐱᒋᐅᕐᓴᓂᕐᒧᑦ ᖃᐅᔨᓴᕈᑎᑦᓴᓂᒃ ᐱᒋᐊᓕᓐᓂᒃ ᐃᓕᓐᓂᐊᑏᑦ ᐃᓕᓐᓂᐊᓂᖏᑦᑕ ᐱᕙᓪᓕᐊᓂᖓᓂᒃ. ᑐᑭᓯᒪᓗᓂ ᐊᒻᒪᓗ ᐊᑐᕐᓗᓂ ᐱᒻᒪᕆᐅᔪᓂᒃ ᐃᓱᒪᒋᔭᐅᔪᓂᒃ, ᐊᑐᕐᑕᐅᕙᑦᑐᓂᒃ, ᒪᓕᒐᕐᓂᒃ, ᐊᒻᒪᓗ ᐊᑐᐊᒐᕐᓂᒃ ᐃᓕᓐᓂᐊᓂᕐᒧᑦ ᐆᑦᑐᕋᐅᑎᓂᒃ ᐊᒻᒪᓗ ᖃᐅᔨᓴᕈᑎᓂᒃ. ᖃᐅᔨᒪᔭᖃᕐᓗᓂ ᐊᑦᔨᒌᖕᖏᑐᓂᒃ ᐆᑦᑐᕋᐅᑎᓂᒃ ᐊᑐᕐᑕᐅᓲᓂᒃ ᐃᓕᓐᓂᐊᑎᑦᓯᕕᒻᒥ. ᐱᕙᓪᓕᐊᑎᑦᓯᓗᑎᑦ ᐆᑦᑐᕋᐅᑎᓂᒃ ᐊᑐᕐᑕᐅᓗᑎᓗ. ᖃᐅᔨᓴᕐᓗᒋᑦ ᐊᒻᒪᓗ ᐋᕐᕿᓱᕐᓗᒋᑦ ᐃᓂᒥᒃ ᐱᓀᓗᑕᐅᔪᓂᒃ ᑕᑯᑦᓴᐅᑎᑕᐅᔪᓂᒃ ᐊᒻᒪᓗ ᐅᖄᔭᐅᓯᒪᔪᓂᒃ ᓴᓇᔭᐅᓯᒪᔪᓂᓪᓗ ᐃᓕᓐᓂᐊᕕᒻᒥᑦ. ᐸᕐᓀᓂᒃᑯᑦ, ᐆᑦᑐᕋᕐᓂᑯᑦ, ᕿᒥᕐᕈᓂᒃᑯᓗ ᐃᓕᓐᓂᐊᑕᖏᑦᑕ ᖃᐅᔨᓴᕐᑕᐅᒍᑎᖏᓐᓂᒃ.

______

• EDU2343 – ᐃᓕᓐᓂᐊᑏᑦ ᐃᓕᑦᓯᕙᓪᓕᐊᓂᖏᑦᑕ ᐱᐅᓯᕐᓱᓯᐊᖕᖏᒍᑎᖏᑦᑕᓗ, ᐃᓅᖃᑎᒌᓐᓂᒨᓕᖓᔪᑦ ᐱᓀᓗᑕᐅᔪᑦ, ᑲᒪᒋᔭᐅᒍᑎᑦᓭᓗ (3 ᖁᕝᕙᒋᐊᕈᑏᑦ)

ᖃᐅᔨᒪᓕᐅᒥᓂᖅ ᐊᑦᔨᒌᖕᖏᑐᓂᒃ ᐱᑦᔪᑎᐅᔪᓂᒃ ᐃᓚᐅᑎᓪᓗᒋᑦ ᐃᓕᑦᓯᕙᓪᓕᐊᓂᖅ ᐱᐅᓯᓲᑎᐅᑉ ᐱᔭᕐᓃᓕᐅᕈᑎᖏᓐᓂᒃ ᐃᓚᖏᓐᓄᑦ ᐃᓕᓐᓂᐊᑎᓄᑦ. ᐱᔪᓐᓇᓂᕐᑖᓂᖅ ᓈᒻᒪᑐᓂᒃ ᑕᑯᕈᓐᓇᕈᓐᓇᓂᕐᒥᒃ ᐃᓕᓐᓂᐊᓂᐅᑉ ᐃᖏᕐᕋᓂᖓᓂᒃ ᐊᒻᒪᓗ ᐱᓇᓱᐊᕐᓂᖏᓐᓂᒃ ᐃᓕᓐᓂᐊᑏᑦ ᐊᑦᓱᕈᕐᓇᑐᒃᑰᑐᑦ. ᐱᕙᓪᓕᐊᑎᑦᓯᓂᖅ ᐱᒋᐅᕐᑎᓯᒍᑎᓂᒃ ᖃᐅᔨᓴᕈᓐᓇᓂᕐᒥᒃ ᐃᓕᓐᓂᐊᓂᕐᒥᒃ ᐱᔭᕆᐊᑐᔪᓂᒃ ᒪᓕᓪᓗᒋᑦ ᐊᑐᓕᖁᔭᐅᓯᒪᔪᑦ ᑕᕝᕙᓂ. ᐱᒋᐅᕐᓴᑎᑦᓯᓂᖅ ᐱᒋᐅᕐᑎᓯᒍᑎᑦᓴᓂᒃ ᐸᕐᓀᓂᕐᒥᒃ, ᓯᕗᓕᕈᓐᓇᓂᕐᒥᒃ, ᐊᒻᒪᓗ ᕿᒥᕐᕈᓂᕐᒥᒃ ᖃᕆᐊᑉ ᐃᓗᐊᓂ ᐋᕐᕿᓯᒪᔪᓂᒃ ᐃᓕᓭᓂᕐᒧᑦ ᐊᒻᒪᓗ ᐃᓕᓐᓂᐊᓂᕐᒧᑦ ᐱᓇᓱᑦᑕᐅᔪᓂᒃ.

______

• STA1431 – ᐱᒋᐅᕐᓴᒐᑦᓴᖅ II: ᐃᓕᓐᓂᐊᑎᑦᓯᒍᑎᓄᑦ ᐊᑑᑎᔭᐅᓂᖏᓐᓂᒃ ᖃᐅᔨᓴᕐᓂᖅ ᐊᒻᒪᓗ ᖃᕆᐊᑉ ᐃᓗᐊᓂ ᐊᐅᓚᑦᓯᓂᕐᒥᒃ ᐃᓄᐃᑦ ᖃᓄᐃᓕᖓᓂᖏᓐᓂᒃ (3 ᖁᕝᕙᒋᐊᕈᑏᑦ)

ᐱᕙᓪᓕᐊᑎᑦᓯᓂᖅ ᐊᒻᒪᓗ ᐱᐅᓯᒋᐊᕐᓗᒋᑦ ᐃᓕᓐᓂᐊᑏᑦ ᐱᓇᓱᐊᖃᑦᑕᕆᐊᖃᕐᓂᖏᑦ ᐊᒻᒪᓗ ᑕᑯᑦᓴᐅᑎᑦᓯᓂᖏᑦ ᐃᓕᓭᔨᐅᓂᕐᒥᒃ–ᐃᓕᓐᓂᐊᓂᕐᒥᒃ ᐱᕙᓪᓕᐊᓂᖓᓂᒃ ᐊᑑᑎᓪᓚᕆᑦᑐᑯᑦ ᐃᓕᓐᓂᐊᓂᕐᒨᓕᖓᔪᓂᒃ ᐱᓇᓱᐊᕐᑕᐅᓂᕐᒥᒃ. ᑕᑯᓐᓇᓗᓂ ᖃᐅᔨᓴᕐᓗᓂᓗ ᖃᓄᖅ ᑲᔪᓯᓂᖃᓲᖑᒻᒪᖔᑦ ᐃᓕᓐᓂᐊᑎᑦᓯᓂᐅᑉ ᐃᓗᐊᓂ. ᐱᒋᐊᕐᑎᓯᓗᑎᑦ ᐱᕙᓪᓕᐊᑎᑦᓯᓂᕐᒥᒃ ᐅᖄᒍᑎᖃᕐᓂᒧᑦ ᐃᓕᓭᓂᕐᒧᑦ ᐱᓇᓱᐊᕐᑕᐅᓲᓂᑦ. ᐱᕙᓪᓕᐊᑎᑦᓯᓂᕐᒧᑦ ᐱᔪᓐᓇᐅᑎᑖᕐᐸᓕᐊᒋᐊᖃᕐᓂᖏᓐᓂᒃ ᐃᓕᓐᓂᐊᑎᑦᓯᕕᒻᒥ ᐊᐅᓚᑦᓯᓂᓕᕆᓂᕐᒥᒃ ᐱᔪᓐᓇᐅᑎᖃᕐᓂᒥᓪᓗ ᖃᓄᐃᓘᕈᑎᓂᒃ ᕿᒥᕐᕈᓂᕐᒥᒃ. ᐃᓕᑦᓯᓗᑎᒃ ᖃᓄᖅ ᐋᕐᕿᓱᐃᒍᓐᓇᓂᕐᒥᒃ ᐱᓀᓗᑕᓂᒃ ᖃᕆᐊᑉ ᐃᓗᐊᓂ ᐃᑲᔪᕐᓯᒋᐊᕐᓂᖅ ᐱᓇᓱᐊᕈᓐᓇᓂᕐᒧᑦ.

ᐊᓪᓚᑕᐅᒪᔪᑦ ᐃᓕᓐᓂᐊᒉᑦ ᐊᑐᐃᓐᓇᐅᑎᑕᐅᔪᑦ ᐃᓕᓐᓂᐊᓇᐅᑉ ᐱᖓᔪᖓᓂ ᐃᓕᓐᓂᐊᓇᐅᑉ ᐊᕐᕌᒎᑉ ᐁᑉᐸᖓᓂ:

• EDU1433 – ᐃᓕᓐᓂᐊᑎᑦᓯᓂᕐᒧᑦ ᐃᓅᖃᑎᖃᕐᓂᖅ ᐃᓄᒻᒪᕆᓐᓄᑦ ᐱᐊᕋᕐᓄᓗ (3 ᖁᕝᕙᒋᐊᕈᑏᑦ)

ᐃᓄᐃᑦ ᐃᓕᓐᓂᐊᑎᖏᑦ ᖃᐅᔨᒪᓂᕐᑖᓚᖓᓗᑎᒃ ᐱᕙᓪᓕᐊᒍᑎᑦᓴᓂᒃ ᑐᑭᓯᒪᒍᑎᒋᓂᐊᕐᑕᖏᓐᓂᒃ ᐃᓄᐃᑦ ᐱᐊᕋᖏᑦᑕ ᓇᒻᒥᓂᖅ ᐃᓕᓐᓂᐊᓂᕆᔭᖏᓐᓂᒃ, ᒪᓕᑦᓱᒋᑦ ᐱᐅᓯᕆᔭᐅᕙᓚᐅᕐᑐᑦ ᐊᒻᒪᓗ ᐃᓕᓐᓂᐊᓂᐅᑉ ᐃᓗᐊᓂ. ᐱᕙᓪᓕᐊᑎᑦᓯᓂᖅ ᖃᐅᔨᒪᓂᕐᒥᒃ ᐅᓪᓗᒥᐅᔪᖅ ᐃᓕᓐᓂᐊᓂᕐᒧᑦ ᐃᓱᒪᓯᐅᕐᓂᓂᒃ. ᐃᓕᓐᓂᐊᓂᕐᒨᓕᖓᔪᓂᒃ ᖃᐅᔨᓴᕈᓐᓇᓯᓂᕐᒥᒃ ᑐᕌᒐᕐᓂᓗ ᖃᓪᓗᓈᑦ ᐃᓱᒪᒍᓯᖓᑎᒍᑦ. ᑐᑭᓯᕙᓪᓕᐊᓗᑎᒃ ᐊᓯᑦᔨᐸᓪᓕᐊᔪᓂᒃ ᐃᓅᓯᐅᑉ ᐊᒻᒪᓗ ᐃᓕᓐᓂᐊᕐᓂᓕᕆᓂᕐᒧᑦ ᐃᓕᓴᐃᓂᕐᒧᓗ ᐊᑐᕐᑕᐅᕙᑦᑐᓂᒃ. ᑐᑭᓯᐅᒪᓕᕐᑎᑦᓯᒍᒪᓂᕐᒧᑦ ᐃᓕᓐᓂᐊᓂᓕᕆᓂᕐᒥᒃ ᒪᕐᕉᓂᒃ ᐃᓗᕐᖁᓯᖃᖃᑎᒌᖕᖏᑦᑐᓂᒃ ᓱᓕᔪᓂᒃ ᐃᓕᓐᓂᐊᕐᕕᖕᒥ ᖃᓄᐃᓕᖓᓂᕆᔭᐅᔪᒥ. ᑐᑭᓯᓗᒋᑦ ᐱᕙᓪᓕᐊᑎᓗᒋᓗ, ᐃᓕᓐᓂᐊᑎᑦᓯᔨᐅᓗᓂ, ᑐᑭᖏᑦ ᐃᑲᔪᕐᑎᒌᓐᓂᖅ ᐃᓕᓐᓂᐊᑎᐅᑉ ᐊᖓᔪᕐᖄᖏᓐᓂᒃ ᐊᒻᒪᓗ/ᐅᕝᕙᓘᓐᓃᑦ ᐊᑖᑕᑦᓯᐊᑯᖏᓐᓂᒃ ᐃᓕᓴᕐᓂᒥᒃ ᐊᓂᒎᑎᑦᓯᐊᒍᓐᓇᓲᑦ ᐅᕕᒃᑲᓂᒃ.

______

• LIT1745 – ᐃᓄᒃᑎᑐᑦ ᐊᓪᓚᓯᒪᔪᓕᕆᓂᖅ (3 ᖁᕝᕙᒋᐊᕈᑏᑦ)

ᐃᓄᐃᑦ ᐃᓕᓐᓂᐊᑎᖏᑦ ᖃᐅᔨᒪᓂᕐᑖᑎᑕᐅᖃᑦᑕᓂᐊᕐᒪᑕ ᐱᕙᓪᓕᐊᑎᑦᓯᒍᑎᑦᓴᒥᓂᒃ ᖃᐅᔨᒪᓂᕐᑖᕆᐊᕐᓗᑎᓗ ᐱᐊᕋᕐᓂᒃ ᐊᓪᓚᕆᐅᕐᓴᑐᓂᒃ. ᖃᐅᔨᑎᒍᒪᓪᓗᒋᑦ ᐃᓄᐃᑦ ᐃᓕᓐᓂᐊᑏᑦ ᐃᓗᕐᖁᓯᖏᓐᓂᒃ ᐱᐊᕃᑦ ᐊᓪᓚᓂᐊᒐᖏᑎᒍᑦ. ᐃᑉᐱᒋᔭᐅᒋᐊᕐᑎᓯᓕᓗᑎᑦ ᐱᒻᒪᕆᐅᓂᖓᓂᒃ ᐱᐊᕃᑦ ᐊᑐᐊᒐᖏᓐᓂᒃ ᐃᓕᑦᓯᓂᕐᒧᑦ ᐃᓕᓐᓂᐊᑎᑕᐅᒍᑎᓂᒃ ᐃᓕᓐᓂᐊᕕᓐᓂ ᐳᒃᑭᓂᕐᓴᓂ, ᐊᓪᓚᓂᕐᓗ ᐃᓚᐅᑎᓪᓗᒍ. ᐱᕙᓪᓕᐊᑎᑦᓯᓗᑎᑦ ᐆᑦᑐᕋᕐᑎᓯᓗᑎᓗ ᐊᓪᓚᓂᕐᒥᒃ ᐃᓕᓐᓂᐊᑎᑦᓯᕕᐅᑉ ᐃᓗᐊᓂ ᐃᓕᓐᓂᐊᒋᐊᖓᑐᓂ ᐳᒃᑭᓂᕐᓴᒦᑦᑐᓂᓗ ᐃᓕᓐᓂᐊᕕᒻᒥ. ᐋᕐᖀᓗᑎᑦ ᐅᓂᒃᑳᑐᐊᕐᓂᒃ ᓄᓇᕐᔪᐊᒥ ᐃᓚᐅᔪᓄᑦ ᐊᒻᒪᓗ ᐱᐊᕋᕐᓄᑦ ᓯᓚᕐᔪᐊᒥᐅᓄᑦ.

ᑐᔪᕐᒥᐅᕕᒃ ᐊᖏᕐᕋᕆᔭᐅᔪᖅ ᐃᓕᓐᓂᐊᑎᓂᒃ ᐃᓄᑑᓈᕐᑎᑐᓂᒃ ᐃᓚᒌᓂᓪᓘᓃᑦ ᐅᕝᕙᓘᓐᓃᑦ ᐁᑉᐸᖃᖕᖏᑐᓂᓪᓘᓃᑦ ᐱᐊᕋᓕᓐᓂᒃ.

• ᑐᔪᕐᒥᐅᕕᒃ ᐱᐅᒡᒍᑎᖃᑦᓯᐊᑐᖅ ᓂᕆᕕᓕᒃ, ᐱᓇᓱᑦᑎᖃᕐᓱᑎᒃ ᐅᓪᓗᓕᒫᑦᓯᐅᑎᓂᒃ, ᐃᒐᔨᖃᕐᓱᓂ ᖃᐅᑕᒫᑦ, ᑕᒐ ᐃᓕᓐᓂᐊᑏᑦ, ᐃᓚᒋᔭᐅᑎᓪᓗᒋᑦ ᐃᓚᖏᑦ, ᐃᓱᒫᓗᒋᐊᖃᓚᖓᖕᖏᑐᑦ ᓂᕆᔭᑦᓴᓕᐅᕐᓂᒥᒃ ᓇᖕᒥᓂᖅ, ᐃᓕᓐᓂᐊᓂᕐᒥᒃ ᑲᔪᓯᑐᐃᓐᓇᒋᐊᓖᑦ.
• ᑐᔪᕐᒥᐅᕕᒃ ᐱᑕᖃᕐᒥᔪᖅ ᓱᖃᑦᓯᕈᑎᐅᒍᓐᓇᑐᓂᒃ ᐃᓘᓐᓀᓂᒃ ᐊᑐᕐᕕᐅᒍᓐᓇᑐᓂᒃ ᐃᓗᕐᖁᓯᕐᒨᓕᖓᔪᓂᒃ ᓱᖃᑦᓯᕕᐅᒍᓐᓇᑐᓂᒃ, ᐅᑦᑑᑎᒋᓗᒋᑦ ᒥᕐᓱᕈᑎᑦᓭᑦ ᐅᕝᕙᓘᓐᓃᑦ ᓴᓇᖕᖑᐊᕕᑦᓴᖅ, ᐊᒻᒪᓗ ᓂᒪᓐᓂᑯᑦ ᐃᙯᓕᓴᕐᕕᒃ, ᓱᖃᑦᓯᕕᒃ, ᐊᒻᒪᓗ ᐯᕆᑦᓯᕕᖃᑦᓯᐊᓱᓂᓗ.

ᕿᑐᕐᖓᑎᑦ ᐃᓕᓐᓂᐊᑎᐅᑉᐸᑕ, ᐊᑎᓕᐅᕈᓐᓇᓂᐊᑕᑎᑦ ᐅᕙᓂ ᐃᓐᓇᓕᒃ ᐃᓕᓐᓂᐊᕕᒃ ᐅᕝᕙᓘᓐᓃᑦ ᐅᖂᑕᖅ ᐃᓕᓐᓂᐊᕕᒃ.

ᐅᑯᓂᖓ ᒪᓕᒐᓂᒃ ᓈᒻᒪᓇᕐᓯᒪᒋᐊᖃᕐᑐᑎᑦ:

• ᐳᕐᑐᓂᕐᓴᒥ ᐃᓕᓐᓂᐊᕕᒻᒥ ᐱᔭᕇᕈᑎᑖᕐᓯᒪᓗᓂ.
• 18-ᓂᒃ ᐅᖓᑖᓄᓘᓐᓃᑦ ᐅᑭᐅᖃᕐᓗᓂ.
• ᐃᓚᐅᔫᒍᑎᖃᕐᓗᓂ.

ᑖᒃᖁᓂᖓ ᐃᓚᖏᓐᓂᒃ ᐱᑕᖃᖕᖏᑯᕕᑦ, ᐅᕙᑦᑎᓄᑦ ᖃᐅᔨᒋᐊᕈᓐᓇᖁᑎᑦ.
ᕿᒥᕐᕈᓚᖓᔪᒍᑦ ᐃᓕᓐᓂᐊᑎᐅᑉ ᐊᓪᓚᓯᒪᔪᖁᑎᖏᓐᓂᒃ ᕿᓂᕐᓗᖃᓗ ᐱᕕᑦᓴᖃᕐᑎᓯᒍᑎᐅᒍᓐᓇᑐᓂᒃ.
ᖃᕆᑕᐅᔭᑎᒍᑦ ᐊᓪᓚᕕᒋᑎᒍᑦ ➔

*ᐱᒻᒪᕆᒃ ᖃᐅᔨᒪᔭᐅᒋᐊᓕᒃ*
ᖃᕆᑕᐅᔭᑎᒍᑦ ᐱᔪᑦᓴᐅᔮᕐᑐᕕᓂᐅᕇᒍᕕᑦ, ᐅᖄᓚᕕᒋᓛᕐᖃᑎᒋᑦ. ᐅᑯᐊ ᐊᑦᔨᖏᓐᓂᒃ ᐊᓪᓚᖁᑎᓂᒃ ᐱᒋᐊᖃᕐᑐᒍᑦ:

• ᐱᓂᕐᓗᓯᒪᖕᖏᒪᐅᑎᖃᖕᖏᑲᓗᐊᕐᒪᖔᑦ ᖃᐅᔨᓴᕐᑕᐅᒍᑎᒃ
• ᐃᓅᓕᕐᑐᕕᓂᐅᓂᕐᐱᑦ ᓇᓗᓀᒃᑯᑕᖓ
• ᒪᑭᕝᕕᒃ ᐃᓚᐅᒍᑎᒃ ᐃᓪᓓᒍᑎᑦᓴᔭᖅ (ᐊᑎᓕᐅᕐᑕᐅᓯᒪᑦᓯᐊᑐᒥᒃ ᐊᒻᒪᓗ ᓈᒻᒪᓈᑦᓯᐊᑐᒥᒃ ᐃᓅᓕᕐᕕᐅᑉ ᓇᓗᓀᒃᑯᑕᖓᓂ)
• ᓯᕿᓂᖕᖑᐊᖅ – ᐋᓐᓂᐊᕕᓕᐊᕈᓐᓇᐅᑎᒃ
• ᐳᕐᑐᓂᕐᓴᒥ ᐃᓕᓐᓂᐊᑏᑦ ᐊᓪᓚᓯᒪᔪᖏᑦᑕ ᑭᖑᓪᓕᐹᒥ