ᒪᓐᑐᔨᐊ, ᑯᐯᒃ (ᒣ 8, 2025) – ᑲᑎᕕᒃ ᐃᓕᓴᕐᓂᓕᕆᓂᖅ ᐊᓂᒎᑎᑦᓯᐊᑐᒃᑯᑦ ᐊᖏᖃᑎᒌᒐᓱᐊᕐᓂᖃᓚᐅᕐᖁᖅ ᐊᖏᖃᑎᒌᒋᐊᖕᖓᐅᑎᖃᕐᓱᑎᒃ ᑲᑐᑦᔨᖃᑎᒌᑦᑎᖏᓐᓂᒃ ᐱᒍᓐᓇᐅᑎᓖᑦ, ᓄᑕᐅᓯᓕᕐᑕᐅᓱᑎᒃ ᐱᓇᓱᒍᑦᔨᓂᕐᒧᑦ ᐊᖏᕐᓯᒪᐅᑎᖏᑦ 2020-2023-ᒨᓕᖓᔪᑦ. ᑐᓴᕐᑎᑕᐅᓚᐅᔪᕗᒍᑦ ᐊᖏᖃᑎᒌᓐᓂᖅ ᓱᓕᓂᕋᕐᑕᐅᑎᓪᓗᒍ ᑲᑐᑦᔨᖃᑎᒌᓐᓃᑦ ᐱᑦᔪᔨᔭᖏᓐᓄᑦ ᒣ 6, 2025-ᒥ, 95%-ᖏᑦ ᐊᖏᕈᑎᖃᕐᑐᕕᓂᐅᑎᓪᓗᒋᑦ. ᑲᑐᑦᔨᖃᑎᒌᑦᑐᑦ ᐱᓇᓱᒋᐊᖃᓕᕐᑐᑦ ᐊᓪᓚᖁᑎᖏᑦᑕ ᐃᓱᓕᒍᑎᖏᓐᓂᒃ, 2023-2028-ᒨᓕᖓᔪᑦ ᐱᓇᓱᒍᑦᔨᓂᕐᒧᑦ ᐊᖏᕐᑎᒪᐅᑏᑦ ᐊᑐᓕᕐᑎᖁᓪᓗᒋᑦ ᖃᒻᒥᐅᒍᓐᓇᕕᓕᒫᖓᒍᑦ.

“ᐱᓇᓱᐊᕈᑎᖃᕐᑐᒍᑦ ᐊᑑᑎᓚᐅᕐᓯᒪᖕᖏᑐᓂᒃ ᐊᐅᓚᑦᓯᓂᓕᕆᓂᑦᑎᒍᑦ ᐋᕐᕿᓯᒪᐅᑎᓂᒃ 2022-ᒥ ᓄᐃᑕᐅᔪᕕᓂᕐᓂᒃ ᐱᓇᓱᒍᑦᔨᓂᕐᒧᑦ ᐊᖏᕐᓯᒪᐅᑏᑦ ᐊᖏᖃᑎᒌᒐᓱᐊᕈᑕᐅᑎᓪᓗᒋᑦ. ᒫᓐᓇᐅᑎᓪᓗᒍ ᑲᒪᒋᔭᖃᕐᑐᒍᑦ ᐱᓇᓱᑦᑎᙯᓐᓇᕋᓱᐊᕈᑎᓂᒃ ᐱᔪᒥᓇᕋᓱᐊᕈᑎᓂᓪᓗ ᐱᕙᓪᓕᖁᑎᓂᒃ ᓱᕐᖁᐃᓯᓯᒪᔭᖃᕐᓂᒧᑦ ᐱᓕᐅᑦᔨᓇᕐᓂᑕᓕᒃᑯᑦ ᐱᓇᓱᕝᕕᐅᓂᕐᒧᑦ ᐃᓕᓐᓂᐊᓂᓕᕆᓂᕐᒥ,” ᐅᖃᕐᑐᖅ ᖄᔨᐊ ᑭᓕᐅᑕᖅ, ᑲᑎᕕᒃ ᐃᓕᓴᕐᓂᓕᕆᓂᕐᒥ ᑲᔪᓯᒃᑫᔨ.

ᑖᓐᓇ ᐊᖏᖃᑎᒌᓐᓂᖅ ᑲᑎᕕᒃ ᐃᓕᓴᕐᓂᓕᕆᓂᕐᒥᒃ ᐊᑐᓕᕐᑎᓯᒍᓐᓇᓯᑎᑦᓯᓚᖓᕗᑦ ᓄᑖᓂᒃ ᐊᐅᓚᑦᓯᓂᓕᕆᓂᕐᒥ ᐋᕐᕿᓯᒪᐅᑎᓂᒃ ᐃᓚᒋᐊᕈᑎᒋᑦᓱᒋᑦ ᐱᑕᖃᕇᕐᑐᓄᑦ ᐱᓇᓱᑦᑎᙯᓐᓇᕋᓱᐊᕈᑎᓂᒃ ᓄᓇᓕᒻᒥ ᐱᓇᓱᑦᑎᑖᖑᓲᓄᑦ, ᐊᐅᓚᒍᑎᖃᕐᓂᒧᑦ ᐱᕙᓪᓕᖁᑏᑦ (ᐃᓚᒋᔭᐅᑎᓪᓗᒋᑦ ᓄᓇᒦᑦᑎᑕᐅᓂᖏᑦ ᓄᓇᕕᒻᒥᐅᑦ), ᓂᖀᑦ ᑎᑭᓴᕐᑕᐅᒍᑎᖏᑦ, ᐃᓪᓗᖃᕐᓂᒥ ᐃᑲᔪᕐᓯᒍᑏᑦ ᓄᓇᓕᒻᒥ ᐱᓇᓱᑦᑎᓄᑦ. ᓄᓇᕕᒻᒦᑐᓕᒫᓄᑦ ᐱᒍᓐᓇᐅᑎᓕᓐᓄᑦ ᐊᖏᖃᑎᒌᓐᓂᖅ ᐱᔪᒥᓇᒻᒪᕆᑦᑐᑕᓕᒃ ᐊᑎᓕᐅᓕᕈᑎᒃ ᐊᑭᓕᕐᑕᐅᒍᑎᓂᒃ $7500-ᓂᒃ ᐊᕐᕌᒍᑕᒫᕐᓗ ᐅᑎᕐᓂᖏᓐᓄᑦ ᐊᑭᓕᕐᑕᐅᒍᑏᑦ $2600. ᐱᒍᓐᓇᐅᑎᓖᑦ ᑎᑭᐅᑎᒍᑎᓖᑦ ᐱᒋᔭᐅᒋᐊᓕᓐᓄᑦ, ᓇᓃᒐᓗᐊᕐᐸᑦ ᐱᓇᓱᒐᖓ, ᐱᐅᓯᒋᐊᒻᒪᕆᐅᑎᓕᒃ ᐱᓇᓱᑦᑎᙯᓐᓇᕋᓱᐊᕐᓂᒧᑦ ᐊᑭᓖᒍᑎᓂ ᓄᐃᑕᐅᑦᓱᓂ ($12000-ᓄᑦ ᑎᑭᐅᑎᒍᓐᓇᑐᑦ); ᐱᕙᓪᓕᖁᑎ ᑖᓐᓇ ᑐᖕᖓᕕᖃᓕᕐᑐᖅ ᐊᕐᕌᒍᓄᑦ ᖃᓄᓪᓗᐊᑎᒋᒃ ᐱᓇᓱᐊᕐᓯᒪᓕᕐᓂᖏᓐᓄᑦ, ᐃᓂᓪᓚᖓᐅᓯᐅᖔᕈᓐᓀᓱᓂ ᐊᕕᑦᑐᓯᒪᐅᑎᑎᒍᑦ.

ᓯᕗᓪᓕᐸᐅᑎᓲᖑᕙᕗᑦ ᖃᓄᐃᖕᖏᓯᐊᕆᐊᖃᕐᓂᖏᑦ ᐊᑦᑕᓇᕐᑐᒦᒋᐊᖃᖕᖏᓂᖏᓪᓗ ᐃᓕᓐᓂᐊᑏᑦ. ᐊᓕᐊᓱᑉᐳᒍᑦ ᓄᑖᑦ ᒪᓕᒐᖃᕐᑎᓯᒍᑏᑦ ᐃᓚᐅᓕᕐᑎᐅᔪᑦ ᐱᓇᓱᒍᑦᔨᓂᕐᒧᑦ ᐊᖏᕐᓯᒪᐅᑎᓄᑦ ᐱᐅᓯᐅᒥᑎᑦᓯᓚᖓᒻᒪᑕ ᑲᒪᒍᓐᓇᓂᑦᑎᓂᒃ ᖃᐅᔨᓴᕐᓂᒥ ᐱᖁᔭᑎᒍᑦ ᐱᓂᕐᓗᓯᒪᐅᑎᖃᖕᖏᑲᓗᐊᕐᒪᖔᑕ ᐱᒍᓐᓇᐅᑎᓖᑦ ᐱᓇᓱᑦᑎᐅᖏᓐᓇᑎᓪᓗᒋᑦ. ᑕᒪᓐᓇ ᐃᓚᒋᐊᕈᑎᐅᓚᖓᔪᖅ ᖃᐅᔨᓴᕐᓂᐅᓲᓄᑦ ᐱᓇᓱᑦᑎᑖᕆᔭᐅᓯᑦᓱᑎᒃ ᐱᓂᕐᓗᓯᒪᐅᑎᖃᖕᖏᑲᓗᐊᕐᒪᖔᑕ.

ᐊᖏᖃᑎᒌᒐᓱᐊᕐᓃᑦ ᐱᓇᓱᑦᑎᑐᐃᓐᓀᑦ ᐃᓕᓐᓂᐊᑎᑦᓯᔩᓪᓗ ᑲᑐᑦᔨᖃᑎᒌᓐᓂᖏᓐᓄᑦ ᑲᔪᓯᖏᓐᓇᑐᑦ. “ᓈᒻᒪᓴᖃᑎᒌᓐᓂᑯᑦ ᐊᖏᖃᑎᒌᒍᓐᓇᓯᕈᒥᓇᕐᑑᕗᖅ ᑖᒃᑯᓅᖓ ᖃᒻᒥᐅᒍᓐᓇᕕᓕᒫᖓᒍᑦ. ᐊᖏᕐᓯᒪᐅᑎᖃᕐᖁᒍᑦ ᐊᑦᔨᖃᒐᓚᕋᓱᐊᕐᑐᑯᑦ ᐱᓇᓱᓐᓂᒥ ᖃᓄᐃᑦᑐᒦᓐᓂᖃᕈᑎᓄᑦ ᐱᓇᓱᑦᑎᓕᒫᓄᑦ ᑲᑐᑦᔨᖃᑎᒌ8ᓂᑕᓕᓐᓄᑦ ᐊᖏᖃᑎᒌᒐᓱᐊᕐᓂᖃᓲᖑᑦᓱᑕᓗ ᑕᒪᓐᓇ ᑐᖕᖓᕕᒋᖏᓐᓇᓲᕆᑦᓱᒍ,” ᖄᔨᐊ ᐅᖃᕐᑐᖅ.

ᐃᓕᓴᕐᓂᓕᕆᓂᖅ:

ᑲᑎᕕᒃ ᐃᓕᓴᕐᓂᓕᕆᓂᖅ, ᐃᓕᓐᓂᐊᓂᓕᕆᔨᒃᑯᑦ ᓄᓇᕕᒻᒥ, ᓄᐃᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ). 1978-ᒥᓂᑦ ᑲᑎᕕᒃ ᐃᓕᓴᕐᓂᓕᕆᓂᖅ ᑖᓐᓇᑐᐊᖑᑦᓱᓂ ᐱᑕᖃᕐᑎᓯᔪᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ.  ᐃᓕᓐᓂᐊᓂᕐᒨᓕᖓᔪᑦ ᐱᓇᓱᐊᕐᑕᐅᔪᑦ ᐱᕙᓪᓕᐊᑎᓯᒪᔭᖏᑦ ᐃᓕᓐᓂᐊᓂᓕᕆᓂᐅᑉ ᐊᑐᐃᓐᓇᐅᑎᑕᐅᕗᑦ ᐃᓘᓐᓇᖏᓐᓂᑦ ᐃᓕᓐᓂᐊᕕᖏᓐᓂᑦ 14-ᓂᑦ ᓄᓇᕕᒻᒥ ᓄᓇᓕᓐᓂ, ᐃᓄᒃᑎᑑᕐᖄᓱᑎᒃ ᐅᖃᐅᓯᕐᖄᒥᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐁᑉᐱᐅᑎᖃᕐᑎᓪᓗᒍ ᐅᖃᐅᓯᖓ.  ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 18-ᓂᒃ ᐃᓕᓐᓂᐊᕕᓐᓂᒃ ᐳᒃᑭᓂᕐᓴᓂᒃ ᐳᕐᑐᓂᕐᓴᓂᓪᓗ ᐊᒻᒪᓗᑦᑕᐅ 6-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ. ᑐᑭᓯᒋᐊᑦᓯᐊᕕᑦᓴᖅ ᖃᕆᑕᐅᔭᒃᑯᑦ: kativik.qc.ca.

— 30 —

ᑐᑭᓯᒋᐊᑦᓯᐊᕈᒪᒍᕕᑦ:

ᔮᑦ ᑐᓯᐊᔅᓇᐅ-ᐱᐊᕐᓃ
ᑐᓴᐅᒪᖃᑎᒌᓐᓂᒧᑦ ᐊᑕᐅᑦᓯᑰᕐᑎᓯᔨ
514-482-8220 ext. 309
publicrelations@kativik.qc.ca