ᐃᓂᖓ ᐱᓇᓱᐊᕆᐊᓕᖏᓪᓗ:

ᑲᓴᒋᔭᐅᑦᓱᓂ ᐊᖓᔪᕐᖄᓄᑦ ᐊᓪᓚᕕᒻᒥ, ᐊᑕᐅᑦᓯᑰᕐᑎᓯᔨᐅᑉ ᐱᓇᓱᒐᖓ ᐱᓇᓱᐊᕋᑦᓴᓕᒃ ᐱᔭᑦᓴᕆᔭᐅᒋᐊᓕᓕᒫᓂᒃ ᐊᑕᐅᑦᓯᑰᕐᑎᓯᓂᕐᒧᑦ, ᑲᒪᒋᔭᖃᕐᓂᒧᑦ, ᓇᐅᑦᓯᑐᕐᓂᒧᑦ, ᖃᐅᔨᓴᕐᓂᒧᑦ ᐱᕙᓪᓕᐊᑎᑦᓯᓂᕐᒧᓗ ᓄᓇᕕᒃ ᓯᕗᓂᑦᓴᕗᑦ ᐃᓕᓐᓂᐊᕈᑎᖏᓐᓂᒃ, ᐃᓚᖃᕐᑎᓗᒋᑦ ᓇᐅᑦᓯᑐᕈᑎᓂᒃ ᖃᐅᔨᓴᕈᑎᓂᓪᓗ, ᐃᓕᓭᒍᑎᑦᓴᖏᓐᓂᒃ, ᐊᐅᓚᑦᓯᓂᕐᒥᓗ ᐱᓇᓱᑦᑎᓕᕆᓂᕐᒥᒃ, ᑮᓇᐅᔭᖏᓐᓂᒃ ᐃᓕᓐᓂᐊᕈᑎᑦᓴᖏᓐᓂᓗ. ᐃᓘᓐᓇᒍᑦ ᑕᑯᑦᓱᒍ, ᑖᓐᓇ ᐱᓇᓱᒐᖅ ᐱᑕᓕᒃ ᐅᑯᓂᖓ ᑲᒪᒋᒋᐊᓕᖏᓐᓂᒃ:

• ᐊᑕᐅᑦᓯᑰᕐᑎᓯᓗᓂ ᖃᐅᔨᒐᓱᐊᖃᑦᑕᓗᓂᓗ ᓄᓇᕕᒃ ᓯᕗᓂᑦᓴᕗᑦ ᐃᓕᓐᓂᐊᕈᑎᖏᑦᑕ ᑲᔪᓯᑎᑕᐅᓂᖏᓐᓂᒃ.
• ᑎᑭᐅᑎᔭᐅᒐᓱᑦᑐᓄᑦ ᑐᕌᒐᖏᓐᓄᓗ ᒪᓕᑦᑐᓂᒃ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐊᒻᒪᓗ ᓄᓇᕕᒃ ᓯᕗᓂᑦᓴᕗᑦ ᐊᔪᖀᒋᐊᕐᓂᒧᑦ ᑲᑎᖕᖓᔨᖏᑦᑕ ᒪᓕᑦᑐᓂᒃ, ᐊᑕᐅᑦᓯᑰᕐᑎᓯᓗᓂ ᒍᐃᒍᐃᑎᑑᕐᑐᓂᒃ ᓄᓇᕕᒃ ᓯᕗᓂᑦᓴᕗᑦ ᐃᓕᓐᓂᐊᒐᑦᓴᕆᓛᕐᑕᖏᑦᑕ ᓴᓇᔭᐅᓂᖏᓐᓂᒃ.
• ᐱᓇᓱᑦᑎᓴᕐᓯᐅᕈᑎᓄᑦ ᐱᔪᓐᓇᐅᑎᓕᓐᓂᒃ ᐃᑲᔪᕐᑎᓂᓪᓗ ᐱᓇᓱᑦᑎᓂᒃ ᐃᓚᐅᖃᑦᑕᓗᓂ.
• ᐊᑕᐅᑦᓯᑰᕐᑎᓯᓗᓂ ᐱᓇᓱᑦᑕᐅᒋᐊᓕᓐᓂᒃ ᐃᓕᓐᓂᐊᑏᑦ ᖁᕝᕙᕆᐊᕈᑎᑖᖏᑦᑕ John Abbott College-ᑯᓐᓄᑦ ᐊᓯᖏᓐᓄᓗ ᐱᓇᓱᐊᖃᑎᐅᒻᒥᔪᓄᑦ ᐋᑦᓯᖃᑦᑕᓗᓂ.
• ᐱᓇᓱᖃᑎᐅᔪᓄᑦ ᑎᒥᐅᔪᓄᑦ ᑭᒡᒐᑐᕐᑎᐅᓗᓂ John Abbott College, ᑯᐯᒻᒥ ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᑯᑦ, ᓄᓇᖃᕐᖄᓯᒪᔪᓅᓕᖓᔪᓂᒃ ᐱᓇᓱᕝᕕᒃ ᑲᓇᑕᒥ (INAC), ᓄᓇᕗᑦ ᓯᕗᓂᑦᓴᕗᑦ ᐊᓯᖏᓐᓂᓗ ᐱᓇᓱᐊᕐᕕᓄᑦ.
• ᑲᒪᒋᔭᖃᕐᓗᓂ ᓇᐅᑦᓯᑐᖃᑦᑕᓗᓂᓗ ᐱᓇᓱᑦᑎᓂᒃ ᑲᒪᒋᔭᕆᐊᓕᒻᒥᓂᒃ.

ᐱᒍᓐᓇᐅᑎᒋᒋᐊᓕᖏᑦ:

• ᐳᕐᑐᓂᕐᓴᐅᑉ ᐊᓪᓕᖓᓂᒃ ᐱᔭᕇᒍᑎᑖᕐᓯᒪᓗᓂ ᐊᑐᕐᓂᖃᕈᓐᓇᑐᓂᑦ ᐃᓕᓐᓂᐊᒐᕐᓂᑦ ᐃᓕᑕᕐᓯᔪᒥᒃ ᐊᕐᕌᒍᓂᒃ-ᐱᖓᓱᓂᒃ ᐃᑭᓐᓂᓴᐅᖕᖏᑐᓂᒃ ᐃᓕᓐᓂᐊᕕᕐᔪᐊᒥ ᐃᓕᓐᓂᐊᓯᒪᓂᕐᒥᒃ ᑎᒍᒥᐊᕐᓗᓂᓘᓐᓃᑦ ᐳᕐᑐᓂᕐᓴᒥᒃ ᐱᓇᓱᒐᖃᕐᒥᒃ. ᐳᕐᑐᓂᕐᐹᒥᒃ ᐃᓕᓐᓂᐊᕕᕐᔪᐊᒥ ᐱᔭᕇᒍᑎᑖᕐᓯᒪᒍᓂ ᐱᐅᔪᖁᑎᒋᔭᖅ.
• ᑕᓪᓕᒪᓂᒃ (5) ᐊᕐᕌᒍᓂᒃ ᐊᑐᕐᓂᓕᓐᓂᒃ ᐱᓇᓱᓚᐅᕐᓯᒪᓗᓂ.

ᐃᓕᓐᓂᐊᓂᓕᕆᓂᖅ ᖁᓛᓂ ᐅᖃᕐᑕᐅᔪᓂᒃ ᐊᑐᖕᖏᑑᑎᑦᓯᒍᓐᓇᑐᖅ ᐱᒍᓐᓇᐅᑎᒋᔭᐅᒋᐊᓕᓐᓂᒃ ᓈᒻᒪᑐᕆᑦᓯᒍᓂ ᐊᖏᖃᑎᒌᓐᓂᒧᑦ ᐃᓚᐅᒍᑎᖃᕐᑐᒥᒃ ᐱᓇᓱᒐᕐᑖᕋᓱᐊᕐᑐᒥᒃ. ᐃᓕᓐᓂᐊᓂᓕᕆᓂᐅᓪᓗ ᐱᒋᐅᕐᓴᑎᑦᓯᒍᑎᖏᓐᓂᒃ ᐃᓚᐅᕕᖃᕋᔭᕐᓂᒥᒃ ᐊᖏᕐᓯᒪᔪᒥᒃ.

ᐊᑐᕈᓐᓇᕆᐊᓕᖏᑦ:

• ᐊᒡᓚᒍᓐᓇᓗᓂ ᐅᖄᒍᓐᓇᓯᐊᕐᓗᓂᓗ ᒪᕐᕉᓂᒃ (2) ᐅᖃᐅᓰᓐᓂᒃ ᑖᒃᑯᓇᖕᖓᑦ ᐱᖓᓱᓂᑦ (3) ᐅᖃᐅᓯᓂᑦ ᐃᓕᓴᕐᓂᓕᕆᓂᕐᒥ ᐊᑐᕐᑕᐅᔪᓂᑦ (ᐃᓄᒃᑎᑐᑦ, ᒍᐃᒍᐃᑎᑐᑦ, ᖃᓪᓗᓈᑎᑐᑦ).
• ᖃᐅᔨᒪᓪᓚᕆᓪᓗᓂ ᐳᕐᑐᓂᕐᓴᐅᑉ-ᑭᖑᓪᓕᖏᓐᓂᒃ ᐃᓕᓐᓂᐊᓂᓕᕆᓂᕐᒥᒃ.
• ᖃᐅᔨᒪᓪᓚᕆᓪᓗᓂ ᓄᓇᖃᕐᖄᓯᒪᔪᓂᑦ ᐃᓕᓐᓂᐊᓕᓂᕆᓂᕐᒥᒃ.
• ᑐᑭᓯᒪᖃᑎᒌᒐᑎᓅᓕᖓᔪᓂᒃ ᐱᒃᑲᕆᑦᑑᒋᐊᓕᒃ, ᓯᕗᓕᕈᓐᓇᓗᓂ ᑲᔪᖏᕐᓭᒍᓐᓇᓗᓂ ᐱᓇᓱᖃᑎᒌᑦᑐᓂᒃ.
• ᐱᓇᓱᓚᐅᕐᓯᒪᓗᓂ ᐊᓯᖏᓐᓂᒃ ᐱᓇᓱᕝᕕᓂᒃ ᐱᓇᓱᖃᑎᒌᒍᑎᐅᓲᓂᒃ ᐆᒃᑐᕋᐅᑎᒋᓗᒋᑦ ᑲᕙᒪᒃᑯᑦ ᑭᒡᒐᓕᕋᕐᑕᐅᕕᖏᑦ.
• ᐊᕐᕕᑕᕆᐊᖃᓕᑐᐊᕈᓂ ᓄᓇᕕᒻᒥ ᐊᕐᕕᑕᕈᓐᓇᓗᓂ.

ᐱᓇᓱᒐᖓᑕ ᑌᔭᐅᓂᖓ / ᑮᓇᐅᑦᔭᓵᖏᑦ / ᐃᓱᕐᕉᑎᑦᓴᖏᓪᓗ:

ᐳᕐᑐᓂᖓ 00-08* ᒪᓕᑦᓱᒋᑦ ᐱᓇᓱᒐᖓᑕ ᖃᓄᐃᓕᖓᓂᖓ ᑲᑎᕕᒃ ᐃᓕᓴᕐᓂᓕᕆᓂᕐᒥ ᑲᒪᔩᑦ:  ᐱᒋᐊᕐᑐᑦ $101,612-ᓂᑦ $135,480-ᓄᑦ ᑎᑭᐅᑎᒍᓐᓇᓱᑎᒃ / ᐊᕐᕌᒍᑕᒫᑦ ᐱᒍᓐᓇᐅᑎᖏᑦ ᐱᓇᓱᐊᕐᓯᒪᓂᖏᓪᓗ ᒪᓕᑦᓱᒋᑦ. ᐱᕙᓪᓕᖁᑎᑖᕈᑎᓕᒫᑦ ᐱᖃᕐᑎᑕᐅᔪᑦ ᑐᖕᖓᕕᒋᑦᓱᒋᑦ ᐱᔭᑦᓴᖏᑦᑕ ᐳᓴᓐᑎᖏᑦ.