ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐊᖏᕐᑐᑦ ᐱᓇᓱᒍᑦᔨᓂᕐᒧᑦ ᐊᖏᕐᓯᒪᐅᑎᒥᒃ ᓴᓇᔭᐅᓂᑦᓴᖓᓄᑦ ᐃᓕᓐᓂᐊᕕᑦᓴᐅᑉ ᖁᐊᕐᑕᒥ
ᑲᑎᕕᒃ ᐃᓕᓴᕐᓂᓕᕆᓂᖅ ᐅᐱᒍᓱᑦᓱᓂ ᑐᓴᕐᑎᓯᓕᕆᕗᖅ ᐊᓪᓗᕆᐊᒻᒪᕆᒍᑎᒥᒃ ᐅᑕᕐᕿᔭᐅᕉᑕᕆᔪᒥᒃ ᐊᑯᓂᓂᑦ ᓴᓇᔭᐅᓂᑦᓴᖓᓄᑦ ᐃᓕᓐᓂᐊᕕᑦᓴᐅᑉ ᖁᐊᕐᑕᒥ. ᑲᑎᒪᓂᖃᕐᑎᓗᒋᑦ ᐃᓕᓐᓂᐊᓂᕐᒥᒃ ᑭᒡᒐᑐᕐᑏᑦ ᔮᓄᐊᕆ 14, 2026-ᖑᑎᓪᓗᒍ, ᑐᑭᑖᕈᑎ ᑭᓯᑦᔪᑎᓕᒃ CC 2025-2026-40-ᒥᒃ ᐊᑐᓕᕐᑎᑕᐅᔪᕕᓂᖅ, ᑲᔪᓯᑎᑕᐅᓂᐊᕐᑎᓗᒍ ᐱᓇᓱᒍᑦᔨᓂᕐᒧᑦ ᐊᖏᕐᓯᒪᐅᑎ ᓴᓇᓂᐊᕐᓂᖏᓐᓄᑦ ᓴᓇᔩᑦ Les Constructions Pépin et Fortin Inc., ᑌᒣᒻᒪᑦ ᑖᓐᓇ ᐱᓇᓱᐊᕋᑦᓴᖅ ᐱᒋᐊᓛᓕᕐᑐᑦ ᐃᓕᓐᓂᐊᕕᑦᓴᓕᐅᕐᓂᒧᑦ.
ᐃᓕᓐᓂᐊᕕᑦᓴᓕᐅᕐᐸᓕᐊᓂᖅ ᐱᕙᓪᓕᐊᑕᐅᓯᒪᓕᕐᑐᖅ ᐊᕐᕌᒍᓂ ᐊᒥᓱᒐᓚᓐᓂ. ᐃᓕᓐᓂᐊᓂᕐᒥᒃ ᑐᕐᖃᑕᕐᕕᑯᑦ (MEES) ᐊᖏᕈᑎᖃᕆᐊᖕᖓᓯᒪᔪᑦ ᐱᓇᓱᑦᓴᐅᔪᑦᓴᒥᒃ ᐊᐅᒡᒎᓯ 2020-ᒥ, ᐃᓕᑕᕆᑦᓱᒋᑦ ᑭᖕᖒᒪᑦᓯᓂᖏᑦ ᓄᑕᐅᓯᓕᕆᐊᖃᓕᕐᓂᖏᑦᑕ ᓄᓇᓕᒻᒥᓗ ᐃᕐᐸᑎᕐᓯᒪᓂᖏᑦ ᐃᓕᓐᓂᐊᑎᑦᓯᕕᐅᓲᑦ ᑕᑯᑦᓱᒋᑦ. ᐊᑭᖓ ᖄᖏᐅᑎᓯᒪᓂᑯᖓᓄᑦ $50 ᒥᓕᐊᓂᒃ, ᐊᑐᐃᓐᓇᕈᕐᑎᑕᐅᓂᖓ ᑐᖕᖓᕕᖃᕐᑎᑕᐅᓯᓚᐅᔪᖅ “ᐱᓇᓱᐊᕐᑕᐅᒪᕆᒋᐊᓕᒻᒥᒃ,” ᐊᑐᐃᓐᓇᕈᕐᑎᑕᐅᒋᐊᖃᓚᕿᑦᓱᑎᒃ ᑕᒪᖏᓐᓄᑦ ᐱᕕᑦᓴᖃᕐᕕᖃᕐᓂᑯᑦ ᑮᓇᐅᔭᕐᑐᓚᖓᓂᕐᓄᓗ ᐊᖏᕐᑕᐅᕆᐊᖃᕐᓱᑎᓗ ᑮᓇᐅᔭᓕᕆᔩᑦ ᑲᑎᒪᔨᖏᓐᓄᑦ ᑲᕙᒪᒃᑯᓂ. ᑖᒃᑯᐊ ᐊᖏᕐᑕᐅᒍᑎᖃᕐᓯᒪᔪᑦ ᔪᓓ 2023-ᒥ ᐊᒻᒪᓗ ᐆᒃᑑᐱᕆ 31, 2025-ᒥ.
“ᓴᓇᓂᕐᒨᐸᓪᓕᐊᓕᕐᓂᖅ ᐊᓂᒎᑎᒻᒪᕆᒍᑎᐅᕗᖅ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ ᖁᐊᕐᑕᒧᓪᓗ. ᑖᓐᓇ ᐱᓇᓱᒍᑦᔨᓂᕐᒧᑦ ᐊᖏᕐᓯᒪᐅᑎ ᐊᖏᕈᑎᐅᓯᒪᓕᕐᑎᓗᒍ, ᐱᓇᓱᐊᕋᑦᓴᒥᒃ ᓯᕗᒧᐊᑉᐸᓕᐊᑎᑦᓯᒍᓐᓇᑐᒍᑦ ᐱᐅᓯᐅᒦᒋᐊᕐᓂᐊᑎᓪᓗᒍ ᐃᓕᓐᓂᐊᓂᕐᒥ ᖃᓄᐃᑦᑐᒦᓐᓂᐅᓲᓂᒃ ᓴᐳᒻᒥᓯᐊᕐᓂᓴᕆᓗᒋᓪᓗ ᐃᓕᓐᓂᐊᑏᑦ ᐊᓂᒎᑎᔭᖃᕈᓐᓇᓂᖏᓐᓄᑦ. ᕿᓚᓈᕈᑎᒋᓕᕐᑕᕗᑦ ᑖᑦᓱᒪ ᐃᓕᓐᓂᐊᕕᑦᓴᐅᑉ ᐊᕐᕌᒎᖃᑦᑕᓚᖓᔪᓂ ᐱᕙᓪᓕᐊᔭᐅᓂᕆᖃᑦᑕᓚᖓᔭᖓᓄᑦ.
ᐊᖏᕈᑎᐅᓯᒪᓕᕐᑎᓗᒋᑦ, ᑲᑎᕕᒃ ᐃᓕᓴᕐᓂᓕᕆᓂᖅ ᐊᑭᑦᑐᕋᐅᑎᑎᑦᓯᓂᖃᓯᓚᐅᔪᖅ (KI-2024-205-060), ᑏᓯᒻᐱᕆ 17, 2025-ᖑᑎᓪᓗᒍ ᐅᒃᑯᐊᓚᐅᔪᑦ. ᕿᒥᕐᕈᕇᕐᓯᒪᓕᕋᒥᒃ ᐊᑭᑦᑐᕋᐅᑎᒍᑎᓂᒃ, ᐃᓕᓐᓂᐊᓂᕐᒥᒃ ᑭᒡᒐᑐᕐᑏᑦ ᓇᓗᓀᕐᓯᓚᐅᔪᕗᑦ ᓴᓇᔩᑦ Les Constructions Pépin et Fortin Inc. ᐊᑭᑭᓐᓂᐸᐅᑎᓪᓗᒋᑦ. ᑭᒡᒐᑐᕐᑏᑦ ᑐᑭᑖᕈᑎᖃᓚᕿᑎᓪᓗᒋᑦ ᓴᓇᔩᑦ ᐱᓇᓱᒍᑦᔨᓂᕐᒧᑦ ᐊᖏᕐᓯᒪᐅᑎᑖᕐᑎᑕᐅᑎᓪᓗᒋᑦ ᐅᓄᕐᓂᓕᒻᒥᒃ $122,295,458.25-ᓂᒃ, ᑖᒃᓯᓴᔭᖏᑦ ᐃᓚᐅᑎᓪᓗᒋᑦ, ᓴᓇᔭᐅᓂᖓᓄᑦ ᐃᓕᓐᓂᐊᕕᑦᓴᐅᑉ. ᐱᖁᑎᓕᕆᕕᒻᒥ ᑐᑭᒧᐊᑦᑎᓯᔨ ᐊᖏᕐᑕᐅᓯᒪᔪᖅ ᐊᑎᓕᐅᕈᓐᓇᕕᖃᓚᖓᑎᓪᓗᒍ ᐊᓪᓚᖁᑎᓕᒫᓂᒃ ᐱᓇᓱᑦᑕᐅᔪᖅ ᑲᔪᓯᑦᓯᐊᖁᓪᓗᒍ. ᑐᑭᑖᕈᑎ ᐊᑐᓕᕐᑎᑕᐅᓯᒪᔪᖅ ᔮᓄᐊᕆ 14, 2026-ᒥ.
ᓯᕗᒧᑦ ᑕᑯᓐᓈᓂᖅ
ᐃᓕᓐᓂᐊᕕᑦᓴᖅ ᐊᖏᔪᒻᒪᕆᐅᑦᓱᓂ ᑮᓇᐅᔭᕐᑑᑎᐅᕗᖅ ᐃᓕᓐᓂᐊᕕᐅᓛᓕᕐᓱᓂ ᓄᑖᑦᓯᐊᖑᓗᓂ ᐃᓗᕐᖁᓯᒧᓪᓗ ᐱᑐᑦᓯᒪᑦᓯᐊᓗᓂ, ᐃᓕᓐᓂᐊᕕᐅᓛᕐᓱᓂ 250-ᒐᓛᓄᑦ ᐃᓕᓐᓂᐊᑎᓄᑦ ᐃᓕᓐᓂᐊᕆᐊᖕᖓᑐᓂᑦ ᐳᕐᑐᓂᕐᓴᒥ 5-ᒧᑦ, ᐱᐅᓯᐅᒥᓚᕿᑎᓪᓗᒋᑦ ᐃᓕᓐᓂᐊᓂᕐᒥ ᖃᓄᐃᑦᑐᒦᓐᓂᖏᑦ ᓴᐳᑎᑦᓯᐊᓗᒋᓪᓗ ᐃᓕᓐᓂᐊᑏᑦ ᐊᓂᒎᑎᔭᖃᕈᓐᓇᓂᖏᑦ ᖁᐊᕐᑕᒥ.
ᐃᓕᓐᓂᐊᕕᑦᓴᐅᑉ ᐱᓇᓱᑦᑕᐅᓂᖓ ᐱᔭᕇᕐᑐᓴᓕᐊᖑᓯᒪᔪᖅ 2030-ᒥ.
ᑲᑎᕕᒃ ᐃᓕᓴᕐᓂᓕᕆᓂᖅ ᓇᑯᕐᒦᑐᖅ ᖁᐊᕐᑕᐅᒥᐅᓂᒃ, ᐱᓇᓱᖃᑎᒥᓐᓂᒃ, ᐱᓇᓱᑦᑎᓕᒫᓂᓪᓗ ᑖᑦᓱᒧᖓ ᐱᓇᓱᑦᑕᐅᔪᒧᑦ ᐃᑲᔪᕐᓯᓯᒪᓂᖏᓐᓄᑦ. ᐃᓕᓐᓂᐊᓂᕐᒥᒃ ᑭᒡᒐᑐᕐᑏᑦ ᐃᓕᑕᕐᓯᒥᔪᑦ ᓯᕗᓕᓲᓂᒃ ᐱᓇᓱᐊᒻᒪᕆᓲᖑᓂᖏᓐᓂᓗ ᐱᓇᓱᑦᑕᐅᔪᒧᑦ ᐊᐅᓚᑦᓯᓂᓕᕆᔩᑦ ᐱᖁᑎᓕᕆᕕᒻᒥ ᐱᓇᓱᑦᑕᐅᒪᕆᑦᑐᓴᓕᕆᔨᖏᓐᓂᒃ, ᖃᐅᔨᒪᔨᒻᒪᕆᐅᓂᖏᑦ ᐊᑐᕐᑐᒪᕆᐅᒻᒪᑕ ᐊᓂᒎᑎᓯᒪᒻᒪᕆᑦᑕᐅᔪᓄᑦ ᐃᓕᓐᓂᐊᕕᑦᓴᓕᐅᕐᓂᒥ ᐱᓇᓱᑦᑕᐅᔪᒧᑦ. ᐊᖑᒪᑦᓯᑎᑦᓯᒍᑏᑦ ᐃᓕᓐᓂᐊᕕᐅᑉ ᓴᓇᔭᐅᓂᖓᑕ ᐱᕙᓪᓕᐊᔭᐅᓂᖓᓄᑦ ᑐᓴᐅᒪᑎᑦᓯᒍᑎᐅᖏᓐᓇᖃᑦᑕᓚᖓᔪᑦ.
ᖃᐅᔨᒋᐊᓪᓛᕈᒪᕋᔭᕐᖀᑦ ᐱᓇᓱᐊᒻᒪᕆᐅᑎᐅᓲᖑᓂᖏᓐᓂᒃ ᓴᓇᔭᐅᒻᒪᕆᑦᑐᑦ ᑮᓇᐅᔭᕐᑐᒪᕆᐅᑎᐅᑦᓱᑎᒃ ᐅᑭᐅᕐᑕᑐᒥ? ᒪᒃᑯᐊ ᐊᓕᐊᒋᑐᐃᓐᓇᕆᐊᓕᑎᑦ ᐊᑐᐊᕋᑦᓭᑦ:
ᐃᓪᓗᓕᐅᕐᓂᖅ ᓄᓇᕕᒻᒥ : ᑕᑯᓐᓈᖑᐊᕐᓂᒥᒃ / ᐊᓪᓚᖑᐊᕐᓂᒥᒃ ᐃᓪᓗᓕᐅᕐᓂᒧᑦ ➔
ᐃᓪᓗᓕᐅᕐᓂᖅ ᓄᓇᕕᒻᒥ: ᐱᔭᕆᐊᑦᑐᑎᑦᓯᔪᑦ ᐃᓂᑦᓴᒥᒃ ᓂᕈᐊᓂᕐᒥᒃ ➔
ᑲᖐᓱᒋᐊᓪᓚᑎᑦᓯᒐᑦᑕ, ᐊᑦᔨᐸᓱᖏᓐᓂᒃ ᐱᓇᓱᖃᑕᐅᒍᒪᒐᔭᕐᓱᑎᑦ ᓄᓇᕕᒻᒥ?
ᐱᓇᓱᑦᑐᓴᕐᓯᐅᖁᒍᑦ, ᐊᑐᐃᓐᓇᐅᑎᑦᓯᓱᑕᓗ ᐱᒍᒥᓇᕐᑐᓂᒃ ᐱᕙᓪᓕᖁᑎᓂᒃ! ᐱᓇᓱᑦᑎᐅᓕᕆᑦ ᐱᓇᓱᖃᑎᕗᓐᓄᑦ ᐱᒐᓱᐊᓕᕆᑦ ᐅᓪᓗᒥ.