ᐃᓂᖓ ᐱᓇᓱᐊᕆᐊᓕᖏᓪᓗ:

ᐊᖓᔪᕐᖄᖃᕐᓗᓂ ᑐᑭᒧᐊᑦᑎᓯᔨᖓᓂᒃ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᑏᑦ ᐱᑦᔪᔭᐅᕕᖓᑕ, ᑐᑭᒧᐊᑦᑎᓯᔨᐅᑉ ᐃᑲᔪᕐᑎᖓ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᑏᑦ ᐱᑦᔪᔭᐅᕕᖓᓂ ᐱᓇᓱᒐᖃᕐᐳᖅ ᐃᓚᖏᓐᓂᒃ ᐱᓇᓱᒍᑎᑦᓴᓕᐊᖑᒪᔪᓂᒃ ᑲᔪᓯᑎᑦᓯᓂᕐᒥᒃ ᐊᒻᒪᓗ ᖃᐅᔨᒪᔨᒋᔭᐅᑦᓱᓂ ᐊᑕᐅᓯᑐᐃᓐᓇᐅᖏᑦᑐᒧᑦ ᐱᓇᓱᑦᑕᐅᔪᒧᑦ ᐱᑦᔪᔨᕕᒻᒥ ᐱᓇᓱᕝᕕᒥᓂ. ᑖᓐᓇ ᐱᓇᓱᒐᖅ ᐃᓚᖃᕐᑐᖅ ᑲᒪᒋᔭᖃᕐᑎᐅᓂᕐᒥᒃ ᐱᓇᓱᑦᑕᐅᔪᓂᒃ (ᐸᕐᓇᓂᒃᑯᑦ, ᐃᓂᓪᓚᖓᓂᒃᑯᑦ, ᑲᒪᔨᐅᓂᒃᑯᑦ, ᐊᐅᓚᑕᖃᕐᓂᑯᑦ ᐊᒻᒪᓗ ᓇᐅᑦᓯᑐᖃᑦᑕᓂᒃᑯᑦ).

ᑐᑭᒧᐊᑦᑎᓯᔨᐅᑉ ᐃᑲᔪᕐᑎᖓ ᐱᑕᖃᕐᑎᓯᔨᐅᕗᖅ, ᐱᓇᓱᒐᕐᒥᓂ ᐱᔪᓐᓇᓯᐊᕐᓂᒥᒍᑦ ᐊᑐᕐᑕᖃᕐᓗᓂ ᐱᐅᓂᕐᐹᓂᒃ ᑲᒪᒋᔭᖃᕐᑎᐅᒍᑎᓂᒃ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᑏᑦ ᐱᑦᔪᔭᐅᕕᖓᓂ.

ᑖᓐᓇ ᐱᓇᓱᒐᖅ ᐃᓚᖃᕐᒥᔪᖅ ᑲᒃᑯᓂᖓ ᐱᔭᑦᓴᒋᐊᓪᓚᓂᒃ:

• ᑐᑭᓯᓇᕐᑎᓯᓗᓂ ᐅᕝᕙᓘᓐᓃᑦ ᐱᓇᓱᖃᑕᐅᓗᓂ ᑐᑭᓯᓇᕐᑎᓯᔪᒧᑦ ᓯᕗᓂᓕᐊᖑᒪᔪᓂᓪᓕ ᒪᓕᒐᖃᕐᑎᑕᐅᒍᓂᓪᓗ ᐃᓕᖓᔪᓂᒃ ᐱᓇᓱᒍᑎᓄᑦ ᐊᓪᓚᕕᒻᒥ ᐊᑕᐅᑦᓯᑯᑦ ᑲᒪᔨᐅᓗᓂ, ᐃᓱᒪᒋᑦᓯᐊᓗᒋᑦ ᐃᓘᓐᓈᒍᑦ ᓯᕗᓂᓕᐊᖑᓯᒪᔪᑦ ᐊᒻᒪᓗ ᒪᓕᒐᖁᑎᖏᑦ ᐃᓕᓴᕐᓂᓕᕆᓂᐅᑉ;
• ᑐᑭᒧᐊᑦᑎᓯᓗᓂ, ᑲᒪᒋᔭᖃᕐᑎᐅᓗᓂᓗ ᐊᒻᒪᓗ ᓇᐅᑦᓯᑐᖃᑦᑕᓗᓂ ᐱᓴᓱᑦᑎᓂᒃ ᐱᓇᓱᒐᓕᐅᑉ ᑲᒪᒋᔭᑦᓴᔭᖏᓐᓂᒃ;
• ᐃᑲᔪᕐᓯᒪᖃᑦᑕᓗᓂ ᐊᑐᐃᓐᓇᕈᕐᑎᑕᐅᓕᕐᐸᑕ ᐱᑦᔪᔨᕕᒻᒥ ᑮᓇᐅᔭᑎᒍᑦ ᑐᕌᒐᑦᓴᖏᑦ ᐊᒻᒪᓗ ᑲᒪᔨᐅᓗᓂ ᑮᓇᐅᔭᕐᑐᕈᑎᓂᒃ ᐃᓕᖓᑦᓱᑎᒃ ᐱᑦᓴᑕᖑᒋᐊᓕᓐᓄᓗ ᐱᓇᓱᒍᑎᓄᓪᓗ ᐱᓇᓱᒐᕐᑕᑑᑉ ᑲᒪᒋᒋᐊᓕᖏᓐᓂᒃ;
• ᐃᑲᔪᕐᓯᒪᖃᑦᑕᓗᓂᓗ ᐅᖃᐅᑦᔨᖃᑦᑕᓗᓂᓗ ᑐᑭᒧᐊᑦᑎᓯᔨᒥᒃ ᐊᓯᖏᓐᓂᓗ ᐳᕐᑐᓂᕐᓴᒥᒃ ᐱᓇᓱᒐᓕᓐᓂᒃ ᖃᐅᔨᑎᓪᓗᒋᑦ ᐊᓯᖏᓐᓂᒃ ᐱᑦᔪᔨᒍᑎᐅᒍᓐᓇᑐᓂᒃ ᐊᒻᒪᓗ ᐱᓇᓱᒐᖃᕐᕕᐅᔪᓂᒃ ᐱᑦᔪᑎᖃᕐᓗᓂ ᐱᓇᒍᑎᓕᐊᖑᓯᒪᔪᓂᒃ ᑲᒪᒋᒋᐊᓕᒻᒥ ᐃᓚᖏᓐᓅᓕᖓᔪᓂᒃ;
• ᑲᒪᔨᐅᓗᓂ ᓱᔪᖃᕐᑎᓯᔪᖃᓕᕐᐸᑦ, ᐱᓇᓱᒍᑎᓕᕆᔨᐅᓗᓂ ᐊᒻᒪᓗ ᐱᑦᓴᖑᕈᓐᓇᑐᓕᕆᔨᐅᓗᓂ;
• ᑐᑭᒧᐊᑦᑎᓯᔨᒥᒃ ᐃᓇᖐᒪᖃᑦᑕᓗᓂ ᐃᓇᖏᕐᑕᐅᒪᒋᐊᖃᓕᑐᐊᕐᐸᑦ;
• ᐱᓇᓱᖃᑦᑕᒥᓗᓂ ᐊᓯᖏᓐᓂᒃ ᑲᒪᒋᔭᑦᓴᒥᓂᒃ ᐱᓇᓱᒐᕐᒥᓅᓕᖓᔪᓂᒃ ᑎᓕᔭᐅᒍᑎᖃᕈᓂ ᐊᖓᔪᕐᖄᒥᓄᑦ.

ᐱᒍᓐᓇᐅᑎᒋᒋᐊᓕᖏᑦ:

• ᐊᕕᑦᑐᓯᒪᓂᐅᑉ ᓯᕗᓪᓕᖓᓂᒃ ᐃᓕᓐᓂᐊᕕᕐᔪᐊᒥ ᐱᔭᕇᕐᓯᒪᐅᑎᖃᕐᓗᓂ ᑌᒣᑦᑐᓅᓕᖓᔪᓂᒃ ᐃᓕᓐᓂᐊᓯᒪᓂᕋᐅᑎᖃᕐᓗᓂ ᐊᕐᕌᒍᕐᓂ ᐱᖓᓱᕐᔪᐊᓂᓪᓘᓃᑦ ᐳᕐᑐᓂᕐᓴᒥᓪᓘᓃᑦ ᐱᓇᓱᒐᖃᕐᓯᒪᓗᓂ ᐊᐅᓚᑦᓯᓂᓕᕆᓂᕐᒥ, ᐊᑐᕈᓐᓇᐅᑎᖃᕆᐊᖃᕐᓂᑕᓕᒻᒥᒃ ᒥᑭᓂᕐᐸᐅᑎᓪᓗᒍ ᐊᕕᑦᑐᓯᒪᓂᐅᑉ ᓯᕗᓪᓕᖓᓂᒃ ᐃᓕᓐᓂᐊᕕᕐᔪᐊᒥ, ᐃᓕᓐᓂᐊᓂᓕᕆᓂᕐᒥ.
• ᐊᕐᕌᒍᓂ ᐱᖓᓲᔪᕐᑐᓂ (6) ᐱᓇᓱᐊᕐᓯᒪᓗᓂ ᑌᒣᑦᑐᓅᓕᖓᔪᓂᒃ.

ᐃᓕᓐᓂᐊᓂᓕᕆᓂᖅ ᖁᓛᓂ ᐅᖃᕐᑕᐅᔪᓂᒃ ᐱᒍᓐᓇᐅᑎᒋᔭᐅᒋᐊᓕᓐᓂᒃ ᐊᑐᙱᑑᒍᓐᓇᑐᖅ ᓈᒻᒪᑐᕆᑦᓯᒍᓂ ᐊᖏᖃᑎᒌᓐᓂᒧᑦ ᐃᓚᐅᒍᑎᖃᕐᑐᒥᒃ ᐱᓇᓱᒐᕐᑖᕋᓱᐊᕐᑐᒥᒃ. ᐃᓕᓐᓂᐊᓂᓕᕆᓂᐅᓪᓗ ᐱᒋᐅᕐᓴᑎᑦᓯᒍᑎᖏᓐᓂᒃ ᐃᓚᐅᕕᖃᕋᔭᕐᓂᒥᒃ ᐊᖏᕐᓯᒪᓗᓂ.

ᐊᑐᕈᓐᓇᕆᐊᓕᖏᑦ:

• ᐅᖄᒍᓐᓇᓯᐊᕐᓗᓂ ᒪᕐᕉᓂᒃ ᐅᖃᐅᓰᓐᓂᒃ ᐱᖓᓱᓂᑦ ᐅᖃᐅᓯᕆᔭᐅᔪᓂᑦ ᐃᓕᓴᕐᓂᓕᕆᓂᕐᒥ (ᐃᓄᒃᑎᑐᑦ, ᖃᓪᓗᓈᑎᑐᑦ ᐊᒻᒪᓗ ᒍᐃᒍᐃᑎᑐᑦ);
• ᐱᔪᓐᓇᑕᖃᑦᓯᐊᓗᓂ ᑲᒪᔨᒻᒪᕆᐅᒍᑎᓂᒃ ᐊᓪᓚᕕᒻᒥᓗ ᐃᓂᓪᓚᖓᐅᓯᕐᓂᒃ ᐱᐊᓚᔪᑦᓯᐊᖑᒍᑎᑦᓴᒥᓂᒃ ᐱᓇᓱᕝᕕᒥᓂ;
• ᐱᕙᓪᓕᐊᑎᑦᓯᒍᓐᓇᓂᖃᕐᓗᓂ;
• ᖃᐅᔨᒪᔭᖃᑦᓯᐊᓗᓂ ᖃᕆᑕᐅᔭᕈᑎᓂᒃ ᐅᑯᓂᖓ MS Outlook, Word ᐊᒻᒪᓗ Excel;
• ᖃᐅᔨᒪᔭᖃᕈᓂ ᓄᓇᕕᒻᒥᒃ ᐃᓄᐃᓪᓗ ᐃᓗᕐᖁᓯᖓᓐᓂᒃ ᐱᓇᓱᒐᕐᑖᕋᓱᓐᓂᖓ ᐃᑲᔪᕐᓯᔭᐅᒐᔭᕐᑐᖅ.

ᐱᓇᓱᒐᖓᑕ ᑌᔭᐅᓂᖓ / ᑮᓇᐅᑦᔭᓵᖏᑦ / ᐃᓱᕐᕉᑎᑦᓴᖏᓪᓗ:

ᐳᕐᑐᓂᖓ 10* ᒪᓕᑦᓱᒋᑦ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᐱᓇᓱᒐᖃᕐᓂᒥ ᖃᓄᐃᑦᑐᒦᓐᓂᖃᕈᑎᖏᑦ ᐊᐅᓚᑦᓯᓂᓕᕆᔩᑦ: $116,551-ᓂᑦ $155,396-ᓄᑦ ᑎᑭᐅᑎᒍᓐᓇᑐᑦ ᐱᒍᓐᓇᐅᑎᒋᒋᐊᓕᖏᑦ ᐱᓇᓱᐊᕐᓯᒪᓂᖏᓪᓗ ᑐᙵᕕᒋᓗᒋᑦ. ᐱᕙᓪᓕᖁᑎᑖᕈᑎᓕᒫᑦ ᐱᖃᕐᑎᑕᐅᔪᑦ ᑐᖕᖓᕕᒋᑦᓱᒋᑦ ᐱᔭᑦᓴᖏᑦᑕ ᐳᓴᓐᑎᖏᑦ.