ᓄᓇᖓ ᐱᒋᐊᕐᑕᐅᓂᖓ ᐊᓕᐊᓲᑎᓖᑦ ᐊᓕᐊᓱᒍᑎᖃᕐᓱᑎᑦ ᐊᖏᔪᒻᒪᕆᒻᒥᑦ ᐃᓕᓐᓂᐊᓂᓕᕆᓂᕐᒧᑦ ᐃᒻᒪᖃᐅᑎᓕᐅᕐᓯᒪᓂᕐᒧᑦ ᖁᐊᕐᑕᒥ

ᖁᐊᕐᑕᖅ (ᑯᐯᒃ.) ᓯᑦᑎᒻᐱᕆ 2, 2026 – ᑲᑎᕕᒃ ᐃᓕᓴᕐᓂᓕᕆᓂᖅ ᐅᐱᒍᓱᑉᐳᑦ ᓇᓗᓀᕐᓯᓂᕐᒥᓂᒃ ᐊᖏᔪᒥᒃ ᐊᓪᓗᕆᐊᒍᑕᐅᔪᒥᑦ ᓄᓇᓕᖓᓄᑦ ᖁᐊᑕᐅᑉ ᒪᓂᕐᕋᐅᑉ ᓴᓇᔭᐅᕙᓪᓕᐊᓯᓂᖓᓂᒃ ᑲᑎᖃᑎᒌᓐᓂᖅ ᐊᓕᐊᓱᒍᑎᖃᕐᓂᒧᑦ ᐱᒋᐊᓪᓚᕆᓐᓂᖓᓄᑦ ᓴᓇᔭᐅᓂᑦᓴᖓᓄᑦ ᓄᓇᓕᐅᑉ ᓄᑖᖅ ᐃᓱᒻᒪᓴᕐᕕᒃ ᐃᓕᓐᓂᐊᕕᒃ.

ᑕᑦᓱᒪᐅᑉ ᓄᑖᒥᑦ ᐃᓕᓐᓂᐊᕕᐅᑉ ᐱᓇᓱᐊᕐᑕᐅᓂᖓ ᐃᓚᒋᔭᐅᕗᖅ ᐊᖏᓂᕐᐸᐅᖃᑕᐅᔪᒥᑦ ᐃᓕᓐᓂᐊᓂᓕᕆᓂᐅᑉ ᐱᖁᑎᒻᒪᕆᖏᑦᑕ ᐃᒻᒪᖃᐅᑎᓕᐅᕈᑕᐅᓯᒪᓂᒃᑯᑦ ᐊᑑᑎᔭᐅᓯᒪᓂᖓᓂᒃ ᓄᓇᕕᒻᒥ. ᐋᕐᕿᓱᕐᑕᐅᓯᒪᔪᖅ ᐱᒍᑦᔨᓚᖓᑎᓪᓗᒍ ᐃᓕᓐᓂᐊᑎᓂᒃ ᐱᒋᐊᕐᓗᒋᑦ ᐃᓕᓐᓂᐊᕆᐊᖕᖓᑐᓂᒃ ᑎᑭᑦᓱᒋᑦ ᐳᕐᑐᓂᕐᓭᑦ ᑕᓪᓕᒪᖓᓄᑦ, ᑖᓐᓇ ᓄᑖᖅ ᐱᓇᓱᐊᕐᕕᒃ ᐱᒍᓐᓇᕕᖃᕐᑎᓯᓚᖓᔪᖅ ᓄᑖᓂᒃ, ᐃᓕᕐᖁᓯᕐᒨᓕᖓᔪᓂᒃ ᐃᓕᓐᓂᐊᕕᖃᕐᑎᓯᓂᒃᑯᑦ ᐊᒻᒪᓗ ᐱᒍᑦᔨᒍᓐᓇᓂᐊᕐᓱᓂ  ᒥᑦᓴᐅᓵᕐᓱᒋᑦ 250 ᐃᓕᓐᓂᐊᑏᑦ. ᐃᓕᓐᓂᐊᕕᑦᓴᐅᑉ ᐱᔭᕇᕐᑕᐅᓂᑦᓴᖓ ᐃᓱᒪᒋᔭᐅᔪᖅ ᐊᕐᕌᒍᖓᓂᒃ 2030.

“ᑖᑦᓱᒪᐅᑉ ᓄᓇᒥ ᐱᒋᐊᕐᓯᓂᐅᑉ ᑲᑎᖃᑎᒋᒍᑎᐅᓂᖓ ᐱᒻᒪᕆᐅᕗᖅ ᓄᓇᓕᒥᐅᖃᑎᒌᖏᓐᓄᑦ ᖁᐊᕐᑕᒥᐅᑦ.’’ ᐅᖃᓚᐅᕐᑐᖅ ᓯᐊᔭ ᐋᓗᐸ, ᑲᑎᕕᒃ ᐃᓕᓴᕐᓂᓕᕆᓂᖅ ᐊᖓᔪᕐᖄᖓ. ‘’ᑖᓐᓇ ᓄᑖᖅ ᐃᓕᓐᓂᐊᕕᑦᓴᖅ ᐃᑲᔪᕐᓯᓚᖓᔪᖅ ᒫᓐᓇᓯᐅᑎᓂᒃ ᓯᕗᓂᕐᒥᓗ ᐃᓕᓐᓂᐊᓂᓕᕆᓂᐅᑉ ᑭᖕᖒᒪᓇᕐᓂᕆᓚᖓᔭᖏᓐᓂᒃ ᑐᓂᓯᖏᓐᓇᓯᐊᕋᓱᐊᕐᓂᑯᑦ ᐅᐱᒪᓇᕐᑐᓂᒃ ᐃᓕᓐᓂᐊᕕᖃᕐᑎᓯᓂᒃᑯᑦ ᓄᐃᑕᑎᑦᓯᓂᖃᕐᑐᓂᒃ ᓄᓇᓕᐅᑉ ᖃᓄᐃᑦᑐᔭᐅᓂᕆᓪᓚᕆᑦᑕᖏᓐᓂᒃ ᐃᑲᔪᕐᓯᓂᖃᕐᓗᓂᓗ ᐃᓕᓐᓂᐊᑏᑦ ᑲᔪᓯᑦᓯᐊᕈᓐᓇᓂᖏᓐᓂᒃ.’’

ᐃᓱᒪᒋᔭᐅᒍᓯᖓ, ᐋᕐᕿᓱᕐᑕᐅᓯᒪᔪᖅ ᐅᑯᓄᖓ ᑲᑐᑦᔨᖃᑎᒌᒍᑕᐅᑦᓱᓂ ᐅᑯᓄᖓ (MLS + Jodoin Lamarre Pratte architectes en consortium), ᑕᑯᓐᓇᖑᐊᕐᓯᒪᔪᖅ ᐅᒥᐊᖕᖑᐊᒥᑦ, ᐱᐅᓯᑐᖃᕐᑎᒍᑦ ᐃᓄᐃᑦ ᐅᒥᐊᖓᑦ ᐊᑐᕐᑕᐅᖃᑦᑕᓯᒪᔪᑦ ᐃᖏᕐᕋᒍᑎᒋᑦᓱᒋᑦ ᐊᓐᓂᑐᕈᑎᒋᑦᓱᒋᓪᓗ. ᐃᓪᓘᑉ ᐋᕐᕿᓱᕐᓯᒪᓂᖓ ᓄᐃᑕᑎᑦᓯᔪᖅ ᐅᕕᐅᓪᓛᖑᐊᕐᑐᓂᒃ ᐊᒻᒪᓗ ᓴᖑᐃᓪᓛᓂᓕᓐᓂᒃ ᓂᒪᑦᑑᔮᕐᑎᓯᑦᓱᓂ ᐃᒫᒍᑦ, ᓄᐃᑕᑎᑦᓯᓱᓂ ᓲᖑᔪᐹᓗᒻᒥᒃ ᐱᑐᑦᓯᒪᖃᑎᖃᕐᓂᒧᑦ ᐃᓄᐃᑦ ᐃᓕᕐᖁᓯᖓᓄᑦ.

(AtkinsRéalis) ᐱᓇᓱᒐᑦᓴᓖᑦ ᐊᐅᓚᐅᑎᓕᕆᓂᕐᒥᒃ ᐃᑯᒪᓕᕆᓂᕐᒥᓗ ᐋᕐᕿᓱᕐᑕᐅᒍᑎᖏᓐᓂᒃ ᑖᑦᓱᒪᐅᑉ ᐱᓇᓱᐊᕈᑕᐅᔫᑉ, ᐅᑯᐊᓕ (EXP) ᐱᓇᓱᒐᑦᓴᖃᕐᑎᓗᒋᑦ ᐃᓅᖃᑎᒌᓅᓕᖓᔪᓂᒃ ᐋᕐᕿᓱᕐᓯᒪᐅᑎᑦᓴᖏᓐᓄᓗ ᓴᓇᒻᒪᕆᒍᑕᐅᓂᖏᓐᓄᑦ.

ᐊᒥᓱᐃᑦ ᐅᑭᐅᑦ ᓈᓕᕐᑎᓗᒋᑦ ᐸᕐᓇᓂᕐᒧᑦ ᐱᕙᓪᓕᐊᑎᑦᓯᓂᕐᒧᓗ, ᑲᑎᕕᒃ ᐃᓕᓴᕐᓂᓕ’ᕆᓂᖅ ᐁᑦᑑᓯᐊᖃᓚᐅᕐᑐᖅ ᓴᓇᓂᕐᒧᑦ ᐱᒍᑦᔨᐅᑎᒥᒃ ᐅᑯᓄᖓ (Les Constructions Pépin et Fortin Inc). ᔭᓄᐊᕆ 2026-ᖑᑎᓪᓗᒍ, ᑲᔪᓯᑎᑦᓯᒋᐊᖕᖓᓚᐅᕐᑐᖅ ᓴᓇᔭᐅᓂᑦᓴᖓᓄᑦ, ᓴᓇᓂᑦᓴᐅᔪᖅ ᐊᖏᕈᑕᐅᕐᖄᓚᐅᑲᑦᓱᓂ ᑮᓇᐅᔭᖃᕐᑎᑕᐅᓂᑦᓴᖓᓄᑦ ᑐᕐᖃᑕᕐᕕᑯᖏᓐᓄᑦ ᐃᓕᓴᕐᓂᓕᕆᓂᒥᒃ 2020-ᖑᑎᓪᓗᒍ ᐊᒻᒪᓗ ᑲᔪᓯᐅᑦᔨᓯᓐᓂᒥᔪᖅ ᐱᔭᕇᕐᓱᒋᑦ ᐱᖁᔭᐅᔪᑦ ᑲᕙᒪᓄᑦ ᐊᖏᕈᑕᐅᓂᖏᑦᑕ ᐊᑐᕐᑕᐅᒍᓯᖓᒍᑦ ᐱᒻᒪᕆᓐᓄᑦ ᒪᑭᑕᒐᓱᐊᕈᑎᑦᓭᑦ ᐱᓇᓱᐊᕐᑕᐅᒍᑎᑦᓴᖏᓐᓄᑦ.

ᐱᓂᐊᕐᓂᐅᑉ ᖃᓄᐃᓕᖓᐅᑎᑦᓴᖏᑦ:

📍 ᓄᑖᖅ ᐃᓕᓐᓂᐊᕕᑦᓴᐅᑉ ᓴᓇᔭᐅᕕᑦᓴᖓᑕ ᐃᓂᖓ, ᖁᐊᕐᑕᖅ, ᓄᓇᕕᒃ
🗓️ ᓯᑦᑎᒻᐱᕆ 2, 2026
🕥 10:30 ᐅᓪᓛᑯᑦ.

ᐃᓕᓴᕐᓂᓕᕆᓂᖅ:

ᑲᑎᕕᒃ ᐃᓕᓴᕐᓂᓕᕆᓂᖅ, ᐃᓕᓐᓂᐊᓂᓕᕆᔨᒃᑯᑦ ᓄᓇᕕᒻᒥ, ᓄᐃᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ). 1978-ᒥᓂᑦ ᑲᑎᕕᒃ ᐃᓕᓴᕐᓂᓕᕆᓂᖅ ᑖᓐᓇᑐᐊᖑᑦᓱᓂ ᐱᑕᖃᕐᑎᓯᔪᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ.  ᐃᓕᓐᓂᐊᓂᕐᒨᓕᖓᔪᑦ ᐱᓇᓱᐊᕐᑕᐅᔪᑦ ᐱᕙᓪᓕᐊᑎᓯᒪᔭᖏᑦ ᐃᓕᓐᓂᐊᓂᓕᕆᓂᐅᑉ ᐊᑐᐃᓐᓇᐅᑎᑕᐅᕗᑦ ᐃᓘᓐᓇᖏᓐᓂᑦ ᐃᓕᓐᓂᐊᕕᖏᓐᓂᑦ 14-ᓂᑦ ᓄᓇᕕᒻᒥ ᓄᓇᓕᓐᓂ, ᐃᓄᒃᑎᑑᕐᖄᓱᑎᒃ ᐅᖃᐅᓯᕐᖄᒥᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐁᑉᐱᐅᑎᖃᕐᑎᓪᓗᒍ ᐅᖃᐅᓯᖓ.  ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 18-ᓂᒃ ᐃᓕᓐᓂᐊᕕᓐᓂᒃ ᐳᒃᑭᓂᕐᓴᓂᒃ ᐳᕐᑐᓂᕐᓴᓂᓪᓗ ᐊᒻᒪᓗᑦᑕᐅ 6-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ. ᑐᑭᓯᒋᐊᑦᓯᐊᕕᑦᓴᖅ ᖃᕆᑕᐅᔭᒃᑯᑦ: kativik.qc.ca.

— 30 —

ᑐᑭᓯᒋᐊᕐᕕᓴᖅ:

ᔮᑦ ᑐᓯᓅ ᐱᕐᓀ
ᑐᓴᐅᒪᖃᑎᒌᓐᓂᒥᒃ ᑐᑭᒧᐊᑦᑎᓯᔨ
514 797-8220 | 1 800 360-2244 ᓵᖓᓃᑦᑐᖅ ᑭᓯᑦᔪᑎᖓ 309
publicrelations@kativik.qc.ca