ᓄᓕᐊᕐᓂᒧᐊᓕᖓᔪᓂᒃ ᐃᓕᓐᓂᐊᓂᖅ: ᐆᑦᑐᕋᐅᑎᒋᓗᒍ ᐱᓇᓱᑦᑕᐅᓂᖓ ᐱᒋᐊᓚᖓᔪᖅ ᒪᕐᕉᓂ ᓄᓇᕕᒻᒥ ᐃᓕᓐᓂᐊᕖᓐᓂ
ᑲᑎᕕᒃ ᐃᓕᓴᕐᓂᓕᕆᓂᖅ, ᐱᓇᓱᖃᑎᖃᕐᓗᓂ ᓄᓇᕕᒻᒥ ᓄᓇᓕᓕᒫᑦ ᑲᑎᒪᔨᖏᓐᓂᒃ ᐃᓗᓯᓕᕆᓂᒃᑯᑦ ᐊᒻᒪᓗ ᐃᓄᓕᕆᓂᒃᑯᑦ ᐱᒍᑦᔨᔨᓄᑦ (NRBHSS), ᐱᒋᐊᓛᓯᔪᖅ ᐆᑦᑐᕋᐅᑎᒥᒃ ᓄᓕᐊᕐᓂᒧᐊᓕᖓᔪᓂᒃ ᐃᓕᓐᓂᐊᕈᑎᒥᒃ 2026-2027-ᒥ ᐃᓕᓐᓂᐊᓇᐅᑉ ᐊᕐᕌᒍᖓᓂ ᑰᑦᔪᐊᒥ ᐊᒻᒪᓗ ᐅᒥᐅᔭᒥ.
ᑖᓐᓇ ᐱᒋᐊᕐᑎᑕᐅᔪᖅ ᑭᖑᓂᐅᕗᖅ ᐃᓕᓐᓂᐊᕈᑎᓄᑦ ᐱᒍᑦᔨᕕᐅᑉ ᑎᓕᔭᐅᒪᓂᖓᓄᑦ ᑭᒡᒐᑐᕐᑏᑦ ᑲᑎᒪᔨᖏᓐᓄᑦ ᐊᒻᒪᓗ ᓄᐃᑎᑦᓯᕗᖅ ᑲᔪᓯᖏᓐᓈᑐᒥᒃ ᐃᑲᔪᕐᑎᒌᓐᓂᒥᒃ ᐃᓕᓐᓂᐊᑎᑦᓯᓂᕐᒥᒃ ᐱᓇᓱᑦᑎᒪᕆᓐᓄᑦ ᐊᒻᒪᓗ ᐃᓗᓯᓕᕆᓂᕐᒥᒃ ᐱᓇᓱᑦᑎᒪᕆᓐᓄᑦ ᐃᑲᔪᕐᑐᕈᑕᐅᑎᓪᓗᒍ ᐃᓕᓐᓂᐊᑏᑦ ᖃᓄᐃᒐᑎᒃ ᐱᕙᓪᓕᐊᓂᖓᓂᒃ ᐊᒻᒪᓗ ᖃᓄᐃᖕᖏᓯᐊᕐᓂᖓᓂᒃ.
ᔫᓂ 2026-ᒥ, ᑭᒡᒐᑐᕐᑏᑦ ᑲᑎᒪᔨᖏᑦ ᐱᑎᑕᐅᓚᐅᔪᔪᑦ ᐊᖑᒻᒪᑎᒍᑎᓂᒃ ᐃᓕᓐᓂᐊᕈᑎᐅᑉ ᐃᓗᓕᖏᑦᑕ ᒥᑦᓵᓄᑦ. ᑭᒡᒐᑐᕐᑏᑦ ᑲᑎᒪᔨᖏᑦ ᐅᖃᑦᓯᐊᓚᐅᔪᔪᑦ ᐱᒻᒪᕆᐅᓂᖓᓂᒃ ᓱᕐᖁᐃᓗᓂ ᒪᓕᒋᐊᖏᓐᓂᒃ ᐃᓄᐃᑦ ᐃᓗᕐᖁᓯᖓᓂᒃ, ᐱᑦᔪᑎᖃᓗᐊᕐᓱᑎᒃ ᐃᓕᓐᓂᐊᑎᓂᒃ ᓄᑲᕐᓯᓂᒃ, ᐅᖃᑦᓯᐊᓱᑎᓪᓗ ᖃᐅᔨᑎᑦᓯᒍᑕᐅᒋᐊᑲᕐᓂᖓᓂᒃ ᑲᒪᒍᑕᐅᓗᓂᓗ ᐱᐊᕋᓕᓐᓂᒃ ᐊᑐᕐᓂᓕᒫᖓᓂ.
ᐃᓕᓐᓂᐊᑎᑦᓯᒍᑎᑕᖏᑦ ᐱᕙᓪᓕᐊᑎᑕᐅᓯᒪᔪᑦ NRBHSS-ᑯᓐᓄᑦ ᑲᑎᕕᒃ ᐃᓕᓴᕐᓂᓕᕆᓂᖅ ᐃᑲᔪᕐᑎᓗᒍ ᐊᒻᒪᓗ ᓈᒻᒪᓯᓕᑎᕐᓯᒪᑦᓱᑎᒃ ᓄᓇᕕᒻᒥ ᖃᓄᐃᓐᓂᓚᕆᒻᒧᑦ ᐊᑐᕐᓱᓂ ᐃᓱᒪᑦᓴᓯᐅᕐᓂᒍᑎᓂᒃ ᐱᐊᕋᓕᓐᓂᒃ ᐊᒻᒪᓗ ᓄᓇᓕᓐᓂ ᐊᑦᑐᐊᖃᑕᐅᔪᓂᒃ.
ᐆᑦᑐᕋᐅᑎᒥᒃ ᐱᓇᓱᓐᓂᖅ ᐃᓚᖃᓛᕐᑐᖅ:
- ᐱᓇᓱᑦᑏᑦ ᐱᒋᐅᕐᓴᐅᑎᖓᓂᒃ;
- ᐱᐊᕋᓖᑦ ᖃᐅᔨᒪᑕᐅᒍᑎᖏᓐᓂᒃ ᑲᑎᒍᑎᓂᒃ;
- ᐱᕕᑦᓴᖃᕐᑎᓯᒍᑎᓂᒃ ᓄᓇᓕᒻᒥᐅᑦ ᐅᖃᐅᓯᑦᔭᕐᓂᖓᓂᒃ;
- ᑲᔪᓯᖏᓐᓈᑐᒥᒃ ᐃᑲᔪᕐᑎᖃᕐᓂᒥᒃ ᐃᓗᓯᓕᕆᔨᓂᕐᒥᒃ ᐊᒻᒪᓗ ᐃᓕᓐᓂᐊᑎᑦᓯᓂᕐᒥᒃ ᐱᓇᓱᑦᑎᒪᕆᓐᓂᒃ.
ᐱᐊᕋᓖᑦ ᐊᒻᒪᓗ ᑲᒪᔨᐅᔪᑦ ᕿᒥᕐᕈᖁᔭᐅᓛᕐᑐᑦ ᐃᓕᓐᓂᐊᕈᑏᑦ ᐱᖁᑎᖏᓐᓂᒃ, ᐊᐱᕐᓱᖁᓗᒋᓪᓗ, ᐊᒻᒪᓗ ᑐᑭᓯᒋᐊᑦᓯᐊᖁᔭᐅᓗᑎᒃ ᐆᑦᑐᕋᐅᑎᒥᒃ ᐱᓇᓱᒍᑎᐅᑉ ᑐᕌᕐᑕᖏᑕ ᒥᑦᓵᓄᑦ ᐃᓕᓐᓂᐊᑎᑦᓯᒍᑏᑦ ᐃᓕᓐᓂᐊᑎᓂᒃ ᐱᒋᐊᓚᐅᕐᑎᓇᒋᑦ.
ᐅᖃᐅᓯᑦᓭᑦ ᓄᐊᑕᐅᔪᑦ ᐆᑦᑐᕋᐅᑎᒥᒃ ᐱᓇᓱᓐᓂᖏᓐᓂ ᐃᑲᔪᓛᕐᑐᑦ ᑐᑭᒧᐊᒍᑕᐅᓗᑎᒃ ᓯᕗᓂᕐᒥ ᑐᑭᑖᖑᓛᕐᑐᓄᑦ ᑖᓐᓇ ᐃᓕᓐᓂᐊᕈᑎ ᐱᑦᔪᑎᒋᓗᒍ.