ᖂᑦᔪᐊᖅ, ᓄᓇᕕᒃ (ᔫᓂ 11, 2021) – ᑲᑎᕕᒃ ᓄᓇᓕᓕᒫᑦ ᑲᕙᒪᖓ (ᑫᐋᔩ), ᑲᑎᕕᒃ ᐃᓕᓴᕐᓂᓕᕆᓂᖅ (ᑫᐁ) ᐊᒻᒪᓗ ᓇᒻᒥᓂᖅ ᐱᓇᓱᕝᕕᑖᕋᓱᐊᕐᓂᒧᑦ ᐃᓕᓐᓂᐊᕕᖓ ᑯᐸᐃᒃᒥ ᐱᓇᓱᖃᑎᒌᓐᓂᖁᑦ ᓴᓇᕐᕈᑎᒥᒃ ᐃᓕᓐᓂᐊᕈᑎᓕᐅᕐᓱᑎᒃ ᐊᑭᖃᖕᖏᑐᒥᒃ ᐃᑲᔪᕐᓯᒍᑕᐅᓛᕐᑐᒥᒃ ᓇᒻᒥᓂᖅ ᐱᓇᓱᕝᕕᑖᕐᖃᒦᑦ ᐃᓕᑦᓯᒋᐊᓪᓚᖁᓗᒋᑦ ᓇᒻᒥᓂᖅ ᑮᓇᐅᔭᓕᐅᕋᓱᐊᕈᑎᑦᓴᒥᒃ ᐱᒋᐊᕐᑎᓯᓂᕐᒥᒃ.

ᑲᑎᑦᓱᑎᒃ, 17 ᖃᐅᔨᑎᑦᓯᓃᑦ ᓴᓇᔭᐅᓐᓂᖁᑦ ᑫᐋᔩ ᓄᓇᕕᒻᒥ ᐊᒻᒪᓗ ᓄᓇᓖᑦ ᐱᕙᓪᓕᐊᑎᑦᓯᓂᕐᒧᑦ ᐱᑦᔪᔨᕕᖓᓄᑦ (ᐊᕐᐃᓪᑎᑎ) ᐱᓇᓱᖃᑎᖏᓐᓄᓗ. ᖃᐅᔨᑎᑦᓯᓃᑦ ᓴᓇᔭᐅᒪᕗᑦ ᓄᑖᓄᑦ ᓇᒻᒥᓂᖅ ᑮᓇᐅᔭᓕᐅᕋᓱᐊᕐᑏᑦ ᐊᐅᓚᑦᓯᔨᖏᑦᑕ ᑭᖕᖒᒪᒋᔭᖏᑦ ᒪᓕᑦᓱᒋᑦ, ᓄᓇᕕᒻᒥᐅᑦ ᓇᒻᒥᓂᖅ ᑮᓇᐅᔭᓕᐅᕋᓱᐊᕐᓂᒥᒃ ᐱᒋᐊᕈᒪᔪᓄᑦ, ᐅᕝᕙᓘᓐᓃᑦ ᓇᒻᒥᓂᖅ ᐱᓇᓱᕝᕕᖃᕋᓱᐊᕈᓂᒧᑦ ᐃᓕᓐᓂᐊᕈᒪᔪᑦ ᐃᓕᓐᓂᐊᕈᓐᓇᖁᑦ ᐃᓕᓐᓂᐊᓂᕐᒥ ᓈᒻᒪᒋᔭᒥᓂᒃ ᐱᕙᓪᓕᐊᓗᑎᒃ.

2019ᒥ ᐱᓇᓱᐊᕐᓂᐅᑉ ᐱᒋᐊᕐᑎᑕᕕᓂᐅᑉ ᓄᐃᑕᖓᑕ ᐊᑕᐅᑦᓯᑰᕐᑎᑕᐅᑦᓱᑎᓪᓗ ᐊᕐᐃᒻᑎᑎᒧᑦ, ᑖᒃᑯᐊ ᖃᐅᔨᑎᑦᓯᓃᑦ ᐊᑐᐃᓐᓇᐅᓕᕐᖁᑦ ᐊᑮᑦᑑᓱᑎᒃ ᑫᐋᔩ ᐊᓪᓚᕕᒻᒪᕆᖓᓂ ᑰᑦᔪᐊᒥ ᐊᒻᒪᓗ ᐊᓯᖏᓐᓂ ᓄᓇᓕᓐᓂ ᓄᓇᓕᒻᒥ ᐱᓇᓱᒐᓕᕆᕕᐅᑉ ᐊᓪᓚᕕᖓᓂ (ᐃᓪᐃᐅ). ᓄᓇᕕᒻᒥᐅᓄᑦ ᐱᔪᑦᓴᐅᔮᕐᑐᓄᑦ ᐊᑐᐃᓐᓇᐅᔫᒥᖁᓗᒋᑦ ᐊᖏᕐᕋᒥ ᖃᕆᑕᐅᔭᒃᑯᑦ ᐃᓕᓐᓂᐊᑐᓄᑦ, ᑖᒃᑯᐊ ᖃᐅᔨᑎᑦᓯᓃᑦ ᐊᑐᐃᓐᓇᐅᒋᕗᑦ ᔫᐃᔅᐲᒥ ᑲᑉᐳᑎᖓᕐᓂ ᖃᕆᑕᐅᔭᒧᑦ ᐃᓕᓐᓂᐊᑐᑦ ᓄᓇᓕᒻᒥ ᐱᓇᓱᑦᑎᓕᕆᔨᐅᑉ ᐊᓪᓚᕕᖓᓂ ᑐᑦᓯᕋᕐᑕᐅᒍᓐᓇᑐᑦ.

17 ᖃᐅᔨᑎᑦᓯᓃᑦ ᐅᓂᒃᑳᑐᑦ ᐃᒪᐃᑦᑐᓂᒃ: ᓇᒻᒥᓂᖅ ᐱᓇᓱᕝᕕᓕᐅᑉ ᖃᓄᐃᑦᑑᓂᖏᑦ, ᓴᓇᕐᕈᑏᑦ ᓇᓗᓇᐃᕐᓯᒍᑏᑦ ᑮᓇᐅᔭᓕᐅᕋᓱᐊᕈᑎᑦᓴᓄᑦ ᐃᓱᒪᒋᔭᕐᓄᑦ, ᐱᖁᔭᓅᓕᖓᔪᑦ ᑮᓇᐅᔭᓕᐅᕋᓱᐊᕈᑎᒥᒃ ᓇᒻᒥᓂᖃᕐᓱᓂ, ᓂᐅᕐᕈᓯᕐᓂᒧᑦ ᑖᒃᓰᑦ, ᓂᐅᕐᕈᓴᐃᓂᕐᒧᑦ ᓴᓇᕐᕈᑏᑦ ᐊᒻᒪᓗ ᖁᕝᕙᒋᐊᕐᑎᓯᓂᕐᒧᑦ ᐋᕐᕿᓯᒪᐅᑏᑦ.

“ᑖᓐᓇ ᑲᔪᓯᑦᓯᐊᑐᖅ ᐃᑲᔪᖃᑎᒌᓐᓂᖅ ᐊᑐᐃᓐᖃᕐᑎᓯᓯᒪᕗᖅ ᐊᑦᑕᓇᐃᑦᑐᒥᒃ ᑐᖕᖓᕕᒻᒥᒃ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐱᓇᓱᐊᕈᑦᔨᓂᐊᕐᓂᕋᐅᑎᑖᕆᓯᒪᔭᖓᓄᑦ ᐱᕙᓪᓕᑎᑦᓯᔪᑦᓴᐅᓱᓂ ᓴᓇᕐᕈᑎᒋᐊᓪᓚᓂᒃ ᐊᒻᒪᓗ ᖃᐅᔨᑎᑦᓯᓂᕐᓅᓕᖓᕙᓪᓗᑐᓄᑦ ᖃᐅᔨᑎᑦᓯᓂᕐᓄᑦ, ᑮᓇᐅᔭᓕᐅᕋᓱᐊᕐᕕᓕᓐᓂᒃ ᐱᔪᓐᓇᓚᕆᑦᑐᓄᑦ ᐊᔪᕿᒋᐊᕐᑕᐅᓂᕐᒧᑦ ᐊᑐᐃᓐᓇᖃᕐᑎᓯᓚᕿᑦᓱᓂ”, ᐅᖃᕐᑐᖅ ᒪᐃᑯ ᑯᐊᑕᓐ, ᑫᐋᔩ ᑐᑭᒧᐊᑦᑎᓯᔨᒻᒪᕆᖓ. ᑕᒪᓐᓇ ᐱᓇᓱᓐᓂᖅ ᑲᔪᓯᓚᖓᔪᖅ 2021ᒥ ᐊᒻᒪᓗ 2022ᒥ.

“ᑰᕕᑦ-19 ᖃᓂᒪᓐᓇᔪᐊᖅ ᓄᓇᕐᔪᐊᓕᒫᒥ ᐊᑦᔨᐅᖏᑦᑐᒥᒃ ᐱᓇᓱᓚᕿᑎᑦᓯᓯᒪᕗᖅ ᐅᕙᑦᑎᓂᒃ”, ᐅᖃᕐᓂᖁᖅ ᑏᕝ ᒥᒃᒧᓪᓚᓐ, ᐊᑕᐅᑦᓯᑰᕐᑎᓯᔨ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖓ ᐊᒻᒪᓗ ᐱᓇᓱᒐᕆᒍᒪᔭᒥᓂᒃ ᐃᓕᓐᓂᐊᓂᕐᒥ ᑲᑎᕕᒃ ᐃᓕᓴᕐᓂᓕᕆᕕᒻᒥ. ᐅᐃᒪᑦᓱᑕ ᐱᓇᓱᐊᕋᑦᓴᓂᒃ ᖃᕆᑕᐅᔭᐅᑉ ᐱᑐᑦᓯᒪᐅᑎᖓᒍᑦ ᒪᓂᔨᑦᓱᑕ ᖃᓂᖕᖏᑑᑦᓱᓂᓗ, ᖃᐅᔨᕚᓪᓗᓚᐅᔪᕗᒍᑦ ᓄᓇᕕᒻᒥᐅᑦ ᐊᑐᐃᓐᓇᐅᓂᖏᓐᓂᒃ ᐱᔪᑦᓴᐅᔮᕐᓱᑎᓪᓗ ᑕᐃᒪᐃᑦᑐᓄᑦ ᐃᓕᓐᓂᐊᓂᕐᓄᑦ. ᓯᕗᒧᑦ ᑕᑯᓐᓇᓱᑕ, ᐱᒍᑦᔨᓂᑦᑎᓂᒃ ᐱᒍᑦᔨᒋᐊᓪᓚᕆᒍᓐᓇᕕᓕᒫᑦᑎᓄᑦ ᐱᒍᑦᔨᕋᓱᓛᕐᖁᒍᑦ ᓇᒻᒥᓂᖅ ᐱᓇᓱᕝᕕᓖᑦ ᐱᓇᓱᓗᐊᕐᑐᑦ ᐃᓕᓐᓂᐊᕈᓐᓇᖁᓪᓗᒋᑦ ᓈᒻᒪᒋᔭᒥᒍᑦ ᓱᑲᓐᓂᒥᒍᑦ, ᐅᖃᕐᑕᒥᓂᒃ ᐃᓚᐃᒋᐊᕐᑐᖅ.

“ᖁᕕᐊᓇᓪᓚᕆᒃᑯᒃ ᑯᐸᐃᒻᒥ ᓇᒻᒥᓂᖅ ᐱᓇᓱᕝᕕᑖᕋᓱᐊᕐᓂᒧᑦ ᐃᓕᓐᓂᐊᕕᒻᒧᑦ ᐃᑲᔪᕐᓯᒋᐊᒥᒃ ᑖᑦᓱᒥᖓ ᐱᓇᓱᖃᑎᑦᓯᐊᓚᕆᒻᒥᒃ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ, ᐊᒻᒪᓗ ᑲᑐᑦᔨᖃᑎᒌᓪᓗᑕ ᐃᖏᕐᕋᑎᑦᓯᓂᕐᒥᒃ ᓇᒻᒥᓂᖅ ᐱᓇᓱᕝᕕᖃᕋᓱᐊᕐᓂᒥᒃ ᑮᓇᐅᔭᓕᐅᕋᓱᐊᕈᑎᑦᓴᒥᒃ ᓄᓇᕕᒻᒥ. ᓇᑯᕐᓴᖁᒍᑦ ᐱᔪᓐᓇᓚᕆᐅᑎᑦᑎᓂᒃ ᐱᓇᓱᒋᐊᒥᒃ ᐃᑲᔪᕐᑎᒌᓐᓂᖅ ᐱᓪᓗᒍ ᐊᒻᒪᓗ ᐊᑐᐃᓐᓇᐅᑎᑦᓯᓂᖅ ᐃᓄᑑᓈᕐᑎᑐᓕᒫᓄᑦ, ᓇᒻᒥᓂᖅ ᑮᓇᐅᔭᓕᐅᕋᓱᐊᕐᑎᓴᓄᑦ, ᐱᔪᑦᓴᐅᔮᕐᑐᓄᑦ ᐱᒍᓐᓇᓂᕐᒥᓂᒃ ᐱᕙᓪᓕᐊᓂᕐᒥᓂ’’, ᐅᖃᕐᓂᖁᖅ ᑐᕇᓯ ᐋᓐ ᐸᐅᕗᔅ, ᐊᖓᔪᕐᖄᑉ ᑐᖓᓕᐊ, ᐊᐅᓚᑦᓯᓂᕐᒧᑦ ᐊᓯᑦᔨᕙᓪᓕᐊᓂᕐᒧᓗ, ᑯᐸᐃᒻᒥ ᓇᒻᒥᓂᖅ ᐱᓇᓱᕝᕕᑖᕋᓱᐊᕐᓂᒧᑦ ᐃᓕᓐᓂᐊᕕᖓᓂ.

ᑫᐋᔩ ᒥᑦᓵᓄᑦ:
ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᓄᓇᖃᑎᒌᖕᖏᑐᑦᔭᓂᒃ ᐃᑉᐱᒋᔭᖃᕋᓂ ᐃᓄᓕᒫᓄᑦ ᑎᒥᐅᔫᕗᖅ ᓄᐃᑕᕕᓂᖅ 1978ᒥ, ᔭᐃᒥᔅ ᐸᐃ ᐊᒻᒪᓗ ᑯᐸᐃᒃ ᑕᕐᕋᖓᑕ ᐊᖏᖃᑎᒌᓐᓂᖓᑕ ᐊᑖᓂ. ᑎᒥᐅᔪᖅ ᑲᒪᒋᔭᓂᒃ ᑯᐸᐃᒃ ᑕᕐᕋᖓᑕ ᓄᓇᓕᒫᑲᓵᓗᐊᓂ 55ᖁᓛᓂ ᓄᓇᒥ ᓄᓇᓕᓐᓅᓕᖓᔪᓂᒃ, ᐃᖏᕐᕋᐅᑎᓕᕆᓂᕐᓂᒃ, ᐊᕙᑎᓕᕆᓂᕐᒥᒃ, ᐳᓖᓯᓕᕆᓂᕐᒥᒃ, ᐱᓇᓱᒐᑦᓴᓕᕆᓂᖅ, ᐱᔭᕆᐅᕐᓴᑎᑦᓯᓂᖅ, ᓇᖐᓗᑕᓂᒃ ᑮᓇᐅᔭᓕᕆᓂᖅ, ᐱᐊᕋᓕᕆᓂᕐᒥᒃ ᐱᒍᑦᔨᓂᖅ, ᐊᑐᕋᑦᓴᓂᒃ ᓄᑕᐅᓯᓕᕈᓐᓇᑐᓕᕆᓂᖅ, ᓄᓇᐅᑉ ᐊᑐᕐᑕᐅᓂᖓᓂᒃ ᐸᕐᓇᓂᖅ, ᐊᑦᑕᓇᑦᑐᒦᑦᑎᓯᑦᑕᐃᓕᓂᖅ ᐃᓅᖃᑎᒌᓂᒃ ᐊᒻᒪᓗ ᒪᑭᑕᒐᓱᐊᕐᓂᒧᑦ ᐱᕙᓪᓕᐊᓂᕐᒥᒃ.

ᑲᑎᕕᒃ ᐃᓕᓴᕐᓂᓕᕆᓂᖅ, ᐃᓕᓐᓂᐊᓂᓕᕆᔨᒃᑯᑦ ᓄᓇᕕᒻᒥ, ᓄᐃᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ). 1978-ᒥᓂᑦ ᑲᑎᕕᒃ ᐃᓕᓴᕐᓂᓕᕆᓂᖅ ᑖᓐᓇᑐᐊᖑᑦᓱᓂ ᐱᑕᖃᕐᑎᓯᔪᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ. ᐃᓕᓐᓂᐊᓂᕐᒨᓕᖓᔪᑦ ᐱᓇᓱᐊᕐᑕᐅᔪᑦ ᐱᕙᓪᓕᐊᑎᓯᒪᔭᖏᑦ ᐃᓕᓐᓂᐊᓂᓕᕆᓂᐅᑉ ᐊᑐᐃᓐᓇᐅᑎᑕᐅᕗᑦ ᐃᓘᓐᓇᖏᓐᓂᑦ ᐃᓕᓐᓂᐊᕕᖏᓐᓂᑦ 14-ᓂᑦ ᓄᓇᕕᒻᒥ ᓄᓇᓕᓐᓂ, ᐃᓄᒃᑎᑑᕐᖄᓱᑎᒃ ᐅᖃᐅᓯᕐᖄᒥᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐁᑉᐱᐅᑎᖃᕐᑎᓪᓗᒍ ᐅᖃᐅᓯᖓ. ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 17-ᓂᒃ ᐃᓕᓐᓂᐊᕕᓐᓂᒃ ᐳᒃᑭᓂᕐᓴᓂᒃ ᐳᕐᑐᓂᕐᓴᓂᓪᓗ ᐊᒻᒪᓗᑦᑕᐅ 6-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ. ᑐᑭᓯᒋᐊᑦᓯᐊᕕᑦᓴᖅ ᖃᕆᑕᐅᔭᒃᑯᑦ: kativik.qc.ca.

—30—

ᑐᑭᓯᒋᐊᑦᓯᐊᕈᒪᒍᕕᑦ:
ᐊᑎᐅᓪ ᔭᔅᓴ
ᑐᑭᒧᐊᑦᑎᓯᔨ,  ᓄᓇᕕᓕᒫᒥ ᓄᓇᓕᓐᓂᓗ ᐱᕙᓪᓂᐊᑎᑦᓯᒐᓱᐊᕐᓂᒥᒃ ᐱᒍᑦᔨᕕᖓ
ᑲᑎᕕᒃ ᓄᓇᓕᓕᒫᑦ ᑲᕙᒪᖓ
ᐅᖄᓚᐅᑎᖓ: (819) 964-2961 ᑭᓯᑦᓯᒍᑎᖓ. 2262

ᔮᑦ ᑐᓯᓅ-ᐱᕐᓀ
ᑐᓴᕋᑦᓴᓕᕆᕕᒻᒥ ᐊᑕᐅᑦᓯᑰᕐᑎᓯᔨ
ᑲᑎᕕᒃ ᐃᓕᓴᕐᓂᓕᕆᓂᖅ
514 797-8220 | 1 800 360-2244 ᓵᖓᓃᑦᑐᖅ ᑭᓯᑦᔪᑎᖓ 309
publicrelations@kativik.qc.ca