ᐅᐱᕐᖔᒥ ᕿᑲᕐᓇᐅᓲᖅ ᑎᑭᒋᐊᕕᐊᐱᓕᕇᕐᑐᖅ.
ᓄᓇᕕᒻᒥ, ᓯᓚ ᓂᕈᒥᑦᓯᕙᓪᓕᐊᑎᓪᓗᒍ, ᓄᓇᒦᒍᒪᓂᕗᑦ ᓅᑉᐸᓕᐊᕌᑕᕐᑐᖅ ᐊᒻᒪᓗ ᓯᓚᐅᑉ ᐱᐅᓯᖏᑦ ᒪᓕᑦᓱᒋᑦ ᐆᒪᔪᓐᓂᐊᖃᑦᑕᕈᒪᓂᐅᓲᑦ ᓄᐃᒋᐊᕕᐊᐱᑦᓱᑎᒃ… ᐅᖃᐅᑎᑦᓯᐊᐸᒋᑦ ᓄᓇ ᐅᕙᑦᑎᓂᑦ ᖃᓪᓗᓈᑦ ᓄᓇᖓᓐᓂᒥᐅᓂᑦ ᓄᓇᕕᐅᑉ ᓯᓚᑖᓃᑦᑐᓂᑦ ᑌᒫᑦᓭᓇᖅ ᐃᑉᐱᓂᐊᕐᑎᓯᓚᕿᒻᒥᔪᖅ.
ᐅᑎᕐᕕᒋᑦᓱᒋᑦ ᐱᔭᑦᓴᙯᓐᓇᖃᑦᑕᓯᒪᓂᖓ ᐃᓕᓐᓂᐊᓇᐅᑉ ᐊᕐᕌᒍᖓᓂ, ᐃᑭᑦᑐᓂᑦ ᑐᓴᕋᑦᓴᖃᓕᕐᒥᔪᒍᑦ.
ᐊᖏᖃᑎᒌᓐᓃᑦ ᓄᑕᐅᓯᓕᕐᑐᑕᐅᓂᖏᑦ 2020-2023 ᐱᓇᓱᒍᑦᔨᓂᕐᒧᑦ ᐊᖏᕐᓯᒪᐅᑏᑦ ᐃᓕᓐᓂᐊᑎᑦᓯᔨᑦᑎᓄᑦ, ᐱᓇᓱᑦᑎᑐᐃᓐᓇᓄᑦ ᐊᒻᒪᓗ ᐱᔪᓐᓇᐅᑎᓕᓐᓄᑦ ᑲᔪᓯᐅᑦᔭᐅᖏᓐᓇᑐᑦ. 2022-ᖑᑎᓪᓗᒍ, ᐱᒻᒪᕆᐊᓗᒻᒥᒃ ᐊᓪᓗᒋᐊᕈᑎᑖᕐᓯᒪᔪᒍᑦ ᐅᒃᑯᐊᓯᕙᓪᓕᐊᓂᒃᑯᑦ ᐃᓚᑰᓲᒥᒃ ᐱᓇᓱᓐᓂᒧᑦ ᐱᐅᓯᒋᔭᐅᕆᐊᖃᓲᑦ ᐱᓇᓱᑦᑎᓄᑦ ᐱᓇᓱᑦᑎᑖᕆᔭᐅᓯᒪᔪᓄᑦ ᓄᓇᓕᐅᑉ ᐃᓗᐊᓂ (ᐊᒥᓲᓂᕐᓭᑦ ᐃᓄᑐᐃᓐᓇᐅᓱᑎᑦ) ᐊᒻᒪᓗ ᑕᒪᒃᑯᐊ ᐱᓇᓱᑦᑎᑖᕆᔭᐅᓲᑦ ᓄᓇᕕᐅᑉ ᓯᓚᑖᓂ ᐱᓯᒪᔫᑦᓱᑎᑦ. ᐱᓇᓱᕝᕕᐅᓱᑕ, ᐱᒻᒪᕆᐅᔪᖁᑎᒋᔭᕗᑦ ᐱᕙᓪᓕᐊᑎᑦᓯᒐᓱᐊᕐᓂᖅ ᑕᒪᒃᑯᓂᖓ ᑭᖕᖒᒪᒋᔭᐅᔪᓂᑦ ᐱᓇᓱᑦᑎᙯᓐᓇᓯᐊᖁᓪᓗᑕ ᐱᓇᓱᑦᑎᖁᑎᑦᑎᓂᑦ ᐊᒻᒪᓗ ᐅᓇᒻᒥᓱᕈᓐᓇᓯᖁᓪᓗᒋᑦ ᐱᔪᓐᓇᐅᑎᓪᓚᕆᓖᑦ ᓄᓇᕕᒻᒥ ᐃᓕᓐᓂᐊᕕᑦᑎᓂ.
ᑲᔪᓯᐅᑦᔭᐅᖏᓐᓇᑎᓪᓗᒍ ᐃᓓᓐᓇᖓ ᓄᓇᕕᒻᒥ ᐃᓕᓐᓂᐊᓂᓕᕆᓃᑦ, ᐱᓇᓲᒐᕐᑐᒍᑦ ᓇᓂᔭᕕᓂᕐᓂᒃ 2019-2021-ᒥ ᐃᓕᓐᓂᐊᕖᑦ ᖃᐅᔨᓴᕐᑕᓂᖏᑦ (ᑕᒻᒪᓯᒪᔪᓐᓂᐊᑕᐅᓂᖏᑦ). ᑲᔪᓯᑎᑕᐅᓂᖃᕐᓱᑎᒃ ᑲᑎᖕᖓᔨᓄᑦ, ᑖᓐᓇ ᖃᐅᔨᓴᕐᑕᐅᕈᑎᖓ ᐱᐅᓯᐅᔪᕕᓂᖅ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐅᖃᐅᓯᐅᑉ ᐁᑉᐱᐅᑎᖓᓂ ᐃᓕᓐᓂᐊᕈᑕᐅᓲᓂᑦ ᐊᒻᒪᓗ ᖃᓄᐃᓕᖓᓕᕇᑦᓯᐅᓱᒋᑦ ᑯᐯᒃᑯᑦ ᐃᓕᓐᓂᐊᓂᓕᕆᕕᖏᓐᓄᑦ. ᖁᕕᐊᓱᑦᓱᖓ ᑐᓴᕐᑎᓯᓕᕆᕗᖓ ᐱᕙᓪᓕᐊᓂᖃᕐᓂᑎᓐᓄᑦ ᓱᓕᑦᓯᐊᑐᓂᑦ ᓇᓗᓀᕐᓯᒋᐊᕆᓂᕋᓱᐊᕐᓂᑯᑦ ᐊᒻᒪᓗ ᑲᔪᓯᑎᑦᓯᓂᐊᕐᓂᑎᓐᓄᑦ ᑐᑭᓯᓇᑦᓯᐊᑐᓂᑦ ᐊᕐᖁᑎᑦᓴᐅᔪᓂᑦ ᐃᓕᓐᓂᐊᑏᑦ ᐊᓂᒎᑎᑦᓯᐊᕈᓐᓇᖁᓪᓗᒋᑦ. ᐱᓇᓱᐊᕐᓂᕗᑦ ᑲᔪᓯᔪᖅ ᓇᓂᓯᒐᓱᐊᕐᓂᑯᑦ ᐃᓕᓐᓂᐊᑎᑦᓯᒍᑎᑦᓴᓅᓕᖓᔪᓂᑦ ᐊᐴᒪᒍᑎᐅᓲᓂᑦ ᐊᒻᒪᓗ ᐃᓚᑰᓲᓂᑦ ᐅᓇᑕᒃᑳᑕᐅᓯᒪᔪᓂᑦ ᐃᓕᓐᓂᐊᑎᑦᓯᔩᑦ ᐃᓕᓐᓂᐊᑎᑕᐅᓂᕆᓲᖏᓐᓂ.
ᓇᓕᕐᙯᑐᖅ 2024 ᐱᒋᐊᕐᓱᒍ, ᐱᓇᓱᐊᕐᓯᒪᔪᒍᑦ ᓇᓗᒫᓂᖃᕐᓱᑕ ᐱᑦᔪᑎᒋᑦᓱᒋᑦ ᖃᐅᔨᓴᕐᑕᐅᒍᑎᐅᔪᑦ ᑯᐯᒃᑯᑦ ᐃᓕᓐᓂᐊᓂᕐᒥᒃ ᒥᓂᔅᑕᖃᕐᕕᖏᑦᑕ ᓄᐃᓯᒪᔭᖏᓐᓄᑦ ᑮᓇᐅᔭᓕᕆᓂᕐᓅᓕᖓᔪᓂᑦ, ᐊᐅᓚᑦᓯᒍᑎᒋᔭᑦᑎᓂ ᐊᒻᒪᓗ ᐱᔪᓐᓇᐅᑎᒋᔭᑦᑎᓂ. ᑲᔪᓯᑦᓯᐊᑐᒥ ᐱᓇᓱᐊᖃᑎᖃᖏᓐᓇᑐᒍᑦ ᖃᐅᔨᓴᕐᑎᓂᑦ ᐊᒻᒪᓗ ᓂᕆᐅᓐᓂᖃᕐᑐᒍᑦ ᐱᓇᓱᐊᕐᓂᕆᔭᖏᑦ ᐱᔭᕇᓛᕐᓂᐊᑎᓪᓗᒋᑦ ᒪᓐᓂᓕᐅᑦ 30, 2024-ᒥ.
ᑕᒪᒃᑯᐊᓕᒫᑦ ᐊᑑᑎᒐᓗᐊᕐᑎᓗᒋᑦ, ᐅᐱᒍᓱᒃᑯᒍᑦ ᓄᓇᕕᒻᒥᐅᓕᒫᓂᑦ ᐱᔭᕇᒍᓯᕐᑕᐅᓛᕐᑐᓂᑦ ᑕᒡᒐᓂ ᐊᕐᕌᒍᒥ. ᐅᐱᒋᕙᑦᓯ ᐳᕐᑐᓂᕐᓴᒥ ᐃᓕᓐᓂᐊᑏᑦ ᓴᐱᓕᕐᑌᓕᖃᑦᑕᓯᒪᔪᓄᑦ ᐊᒻᒪᓗ ᐳᕐᑐᓂᕐᓴᒥ ᐃᓕᓐᓂᐊᓂᕐᒧᑦ ᐃᓕᑕᕆᔭᐅᒍᑎᑖᓛᕐᑐᓄᑦ ᐅᑭᐅᑭᓐᓂᓭᓪᓗ ᐅᕝᕙᓘᓐᓃᑦ ᐃᓄᒻᒪᕇᑦ ᐃᓕᓐᓂᐊᕕᖏᓐᓂ. ᐊᒥᓱᐃᓪᓗ ᐱᓇᓱᒐᕐᒥᒃ ᐱᒋᐅᕐᓴᑎᑕᐅᓂᓖᑦ, ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᔪᑦ ᐊᒻᒪᓗ ᓯᓚᑦᑐᓴᕐᕕᒥ ᐅᕝᕙᓘᓐᓃᑦ ᐃᓕᓐᓂᐊᕕᕐᔪᐊᓃᑦᑐᑦ. ᐅᐱᒋᕙᑦᓯ ᐊᓂᒎᑎᑦᓯᐊᓂᑦᓯᓄᑦ.
ᑭᖑᓪᓕᐹᒥ, ᓇᓗᓀᕐᓯᒍᒪᕗᖓ ᑲᔪᓯᐅᑦᔨᓛᕐᑐᓄᑦ ᐊᒻᒪᓗ ᐱᔪᒪᓂᖃᓪᓚᕆᑦᑐᓄᑦ ᐃᓕᓐᓂᐊᕕᒻᒧᑦ ᐅᑎᓛᕐᓂᐊᑐᓄᑦ ᑕᒡᒐᓂ ᐅᐱᕐᖔᖑᓛᕐᑐᒥ. ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᑦ ᐅᐱᕐᖔᒥ ᐱᓇᓱᐊᕐᑏᑦ ᐃᓂᓪᓚᑎᕆᓛᕐᓂᐊᑐᑦ ᐱᓇᓱᐊᖃᑎᖃᕐᓗᑎᒃ ᒪᑭᐊᓪ ᐃᓕᓐᓂᐊᕕᕐᔪᐊᖓᓂᑦ ᐊᑑᑎᔭᐅᓛᕐᓂᐊᓱᑎᓪᓗ ᐃᓄᑦᔪᐊᒥ. ᑌᒣᑎᓪᓗᒍ, ᐅᐱᕐᖔᒥ ᐃᓕᓐᓂᐊᓃᑦ ᐊᑐᐃᓐᓇᐅᑎᑕᐅᓛᕐᒥᔪᑦ ᑰᑦᔪᐊᒥ ᐳᕐᑐᓂᕐᓴᒥ ᐃᓕᓐᓂᐊᑎᓄᑦ ᐆᑦᑐᕆᐊᓪᓚᕈᒪᓂᓕᓐᓄᑦ ᐊᕐᕌᒎᑉ ᓈᓂᖓᓂ ᒥᓂᔅᑕᑯᑦ ᖃᐅᔨᓴᐅᑎᒋᔭᖓᓂ.
ᐅᐱᕐᖔᓯᐅᑦᓯᐊᓛᕐᖁᓯ ᐊᒻᒪᓗ ᑲᒪᑦᓯᐊᓗᓯ!
ᖄᔨᐊ ᑭᓕᐅᑕᒃ
ᑲᔪᓯᒃᑫᔨ