ᐃᓕᓐᓂᐊᓇᐅᑉ ᐊᕐᕌᒍᖓᑕ ᕿᑎᕐᖃᖓᓃᓕᕇᕐᑐᒍᑦ. ᓱᓕᔫᔮᖕᖏᑐᖅ ᐃᓓ? ᐊᒥᓱᑦ ᐱᓀᓗᑌᑦ ᑕᕐᕿᐅᓚᐅᔪᓂ ᐊᑑᑎᖃᑦᑕᓚᐅᔪᒻᒪᑕ ᓱᑲᑦᑐᐹᓗᒻᒥ ᓯᑯᖕᖏᓚᑦᑐᑎᑐᑦ ᑕᒪᐅᖕᖓ ᑎᑭᑦᑑᔮᕇᕐᓱᑕᓗ: ᐱᓇᓱᑦᑎᓴᖃᑦᓯᐊᖏᓐᓃᑦ, ᐊᔭᐅᕆᒐᓱᐊᕐᓂᒧᑦ ᓄᕐᖃᖓᓃᑦ, ᐱᑦᔪᑎᒋᑦᓱᒋᑦ ᓄᑕᐅᓯᓕᕐᑐᑕᐅᒋᐊᖃᕐᓂᖏᓐᓄᑦ ᐱᓇᓱᒍᑦᔨᓂᕐᒧᑦ ᐊᖏᕐᓯᒪᐅᑏᑦ, ᐅᖄᕈᑎᖃᕐᓃᑦ ᐱᖁᔭᖅ 14 ᒥᑦᓵᓄᑦ, ᐃᓗᓕᑦᑕᖏᑦ ᐊᒥᓱᑲᓪᓓᑦ…

ᑌᒣᒐᓗᐊᕐᑎᓗᒍ, ᐊᒥᓱᓂᒃ ᐊᓂᒎᑎᖃᑦᑕᓯᒪᔭᑦᑎᓂ ᖁᕕᐊᓱᒍᑎᖃᕐᑐᒍᑦ. ᐃᓕᓐᓂᐊᓇᐅᑉ ᐊᕐᕌᒍᖓ ᐱᒋᐊᓕᕐᓂᒪᑦ, ᐱᓇᓱᑦᑎᑖᕐᓯᒪᔪᒍᑦ 126-ᓂᒃ ᓄᑖᓂᒃ. ᐃᓕᓐᓂᐊᑎᑦᓯᔨᑦᓴᓂᒃ ᑭᖕᖒᒪᑦᓯᖏᓐᓇᑐᒍᑦ ᐊᒥᓱᓂᒃ, ᑭᓯᐊᓂ ᐱᓇᓱᑦᑎᑖᕋᓱᐊᕐᑏᑦ ᐱᓇᓱᑦᑎᖁᑎᕗᑦ ᐊᔪᐃᓐᓇᕋᓱᐊᕐᓂᖏᑦ ᐅᐱᒋᔭᒃᑲ – ᒫᓐᓇᐅᔪᖅ ᐱᓇᓱᒐᕐᓂᒃ ᑕᑯᑦᓴᐅᑎᑦᓯᒋᐊᕐᑐᖃᑦᑕᑐᑦ ᑲᓇᑕᒥ ᓄᓇᓕᓐᓂ – ᐊᒥᓱᖕᖑᖁᓪᓗᒋᑦ ᐅᖃᐅᓯᐅᑉ ᐁᑉᐱᐅᑎᖓᓂ ᐃᓕᓐᓂᐊᑎᑦᓯᔨᑦᓭᑦ. ᐃᓄᑦᑎᑐᑦ ᐃᓕᓐᓂᐊᑎᑦᓯᔨᓂᒃ ᑭᖕᖒᒪᑦᓯᒋᕗᒍᑦ. ᖃᐅᔨᒪᒍᕕᑦ ᑭᓇᑐᐃᓐᓇᒥᒃ ᐱᓇᓱᒍᒪᕋᔭᕐᑐᒥᒃ, ᑫᓪᓗᑐᖃᑦᑕᓯᒋ ᙯᖁᓪᓗᒋᑦ ᐃᓕᓐᓂᐊᕕᓐᓄᑦ ᐊᑎᒥᓂᒃ ᐋᑦᓯᒋᐊᕐᑐᖁᓪᓗᒋᑦ ᐊᐅᓚᑦᓯᓂᓕᕆᔨᓄᑦ.

ᓂᓪᓕᐅᓯᖃᕆᐊᖃᕐᖁᖓ ᐅᖃᓪᓗᑐᕆᐊᓕᒻᒥᒃ: ᖃᐅᔨᒪᑦᓯᐊᖁᖓ ᐃᓕᓐᓂᐊᕕᓐᓂᒃ ᐅᒃᑯᐃᓯᒋᐊᓪᓚᓛᕐᓂᑎᓐᓂᒃ ᐃᓕᓐᓂᐊᓇᐅᑉ ᐊᕐᕌᒍᖓᑕ ᕿᑎᕐᖃᖓᓂ ᐱᓇᓱᒍᑦᔨᓂᕐᒧᑦ ᐊᖏᕐᓯᒪᐅᑏᑦ ᐱᓀᓗᑦᓯᐅᑎᖏᑦ ᑐᑭᑖᕐᑕᐅᕋᑕᖕᖏᑎᓪᓗᒋᑦ.

ᐅᖄᖃᑎᙯᓐᓇᖃᑦᑕᓂᐊᕐᑐᒍᑦ ᑲᕙᒪᒃᑯᓂᒃ ᓇᓗᓀᕐᑕᐅᓯᐊᖁᓪᓗᒋᑦ ᐱᓇᓱᓐᓂᕆᓲᑦᑕ ᖃᓄᐃᑦᑑᓂᖏᓐᓄᑦ, ᑌᒫᑦᓭᓇᖅ ᐊᔪᐃᓐᓇᒍᑎᖃᕋᑦᑕ ᐅᖃᐅᓯᕐᒥᒃ ᐃᓄᒃᑎᑐᑦ ᐊᑐᕐᓂᖃᕆᐊᖃᕐᓂᑎᓐᓄᑦ ᐱᒍᓐᓇᓂᖃᑦᓯᐊᓗᑕ ᐃᓅᑦᓱᑕ. ᐋ, ᐅᖄᕈᑎᖃᕐᓃᑦ ᐱᖁᔭᖅ 14-ᒨᓕᖓᔪᓄᑦ (ᑌᔭᐅᖃᑦᑕᓯᒪᔪᖅ ᐱᖁᔭᖅ 96) ᐱᔭᕇᑦᓴᐅᑎᒋᕈᓇᐅᕋᓂᓗ.

ᐃᓕᓐᓂᐊᕕᓐᓄᑦ ᐅᑎᕐᓯᒪᓕᕋᓗᐊᕐᓱᑕ ᐊᔭᐅᕆᒐᓱᐊᕐᓂᒧᑦ ᓄᕐᖃᖓᕇᕐᓯᒪᓕᕐᓱᑕ, ᐃᓕᓐᓂᐊᕖᑦ ᐊᒥᓱᑦ ᐅᒃᑯᐊᓯᒪᖃᑦᑕᓚᐅᕐᑐᑦ ᓯᓚ ᐱᑦᔪᑎᒋᑦᓱᒍ ᐅᕝᕙᓘᓐᓃᑦ ᓄᕙᓐᓇᑐᐊᓗᖃᖃᑦᑕᒪᑦ ᐁᑦᑐᑑᑎᐅᓐᓇᑐᒥᒃ.

ᐃᓕᓐᓂᐊᑎᖁᑎᒋᔭᐅᔪᑦ ᐃᓕᓐᓂᐊᖃᑦᑕᓯᒪᖕᖏᒪᑕ ᐅᓪᓗᓂ ᐊᒥᓱᓂ, ᐊᒥᓱᑦ ᐃᓕᓐᓂᐊᑎᑦᓯᔩᑦ ᐃᓱᒫᓗᒍᑎᖃᕐᓂᒥᓂᒃ ᐅᖃᕐᓯᒪᔪᑦ ᖃᓄᖅ ᖃᐅᔨᓴᕐᓂᖃᕐᑐᓴᐅᒻᒪᖔᒻᒥᒃ ᐅᓄᕐᓂᓕᐅᕐᑐᓴᐅᒻᒪᖔᒻᒥᓗ ᐃᓕᓐᓂᐊᑎᒥᓂᒃ, ᐃᓱᒪᒋᑦᓱᒋᑦ ᐃᓕᓐᓂᐊᕆᐊᓕᒻᒥᓂᒃ ᐃᓕᓐᓂᐊᓯᒪᖕᖏᓂᑯᖏᓐᓄᑦ ᐃᓗᐃᑦᑐᒥᒃ.

ᓂᕆᐅᕐᓂᖃᕐᑐᖓ ᐊᖑᒪᑦᓯᒐᓱᐊᕐᓂᒧᑦ ᐸᕐᓇᑕᐅᒪᔪᖅ ᑲᕙᒪᒃᑯᓄᑦ ᐅᓐᓂᑑᑎᕕᓂᐅᑦᓱᓂ ᐃᑲᔪᕐᓯᓛᕆᐊᖓ ᐊᖑᒻᒪᑦᓯᒍᑎᐅᓗᓂ ᐃᓕᓐᓂᐊᑕᐅᒪᖕᖏᑐᓂᑦ ᐃᓕᓐᓂᐊᑎᑦᓯᒍᑎᐅᓯᓗᓂ.

ᐊᕐᕌᒍᕐᓯᐅᓯᐊᖁᕙᑦᓯ ᑕᒡᒐᓂ ᐊᕐᕌᒍᒥ 2024-ᒥ,

ᖄᔨᐊ ᑭᓕᐅᑕᒃ

ᑲᔪᓯᒃᑫᔨ